دانا حەمەعەزیز بەدریژایی میژوی تازە، چوار ساڵی ڕابردوی سیاسەتی دەرەوەی ئەمریکا بە ناکاریگەرترین قۆناغ دا تێپەڕیوە. ترەمپ، پەیوەندیە سیاسی و ئابوریەکانی ئەمریکای لەگەڵ جیهان، دوچاری پاشاگەردانیی کردۆتەوە. پارسەنگ و ڕاستکردنەوەی  ئەم سیاسەتە، یەکێکە لە ئەرکە قورسەکانی  جۆ بایدن لەگەڵ هەموو ئەو وڵاتانەی  زەرەر یان قازانجیان کردوە. زۆربەی وڵاتان بە گەشبینی و هەندێکیشیان بە نیگەرانیەوە ئەڕواننە ئیدارەی تازەی ئەمریکا.   کوردوستانی عێراق  لە دوای ڕاپەڕینەوە ئەمریکا پێنج سەرۆکی گۆڕیوە، بەڵام  لەسایەی هیچیاندا بە ترەمپیشەوە، ئەمریکا پشتی لە کورد نەکردوە  تەنانەت لەکاتی شەرمەزاریی و هەڵە کوشندەکانی بارزانیشدا بە ٣١ی ئاب و دەستبەردار نەبونی دەسەڵات و چەسپاندنی حوکمی خێڵ و هەڵەی جەرگبڕی ڕیفراندۆمیشەوە. لە سەردەمی ترەمپدا، پشتیوانیەکانی ئەمریکا بۆ هەرێمی کوردوستان بەردەوام بوون، تەنانەت حکومەتی ئەمریکا دڵسۆزانە لە بارزانی پاڕایەوە ڕیفراندۆم نەکا، لەبەرامبەردا لە دۆکیمێنتیکی مێژووییدا بەدیلیکی زۆر گرنگی خستە بەردەم و هاوکات لە مەترسیەکانی ڕیفراندۆم و ئەنجامە خراپەکانی ئاگاداری کردەوە. تا ئێستا ئەمریکا دەستبەرداری پشتیوانی کوردی عێراق نەبوە، بەڵام ئەمریکا و هەمو دۆستە خۆراوایەکانی کورد نا ئومێدن لەم مۆدێلەناشیرینەی حوکمڕانیی لە هەرێمی کوردوستان. بارزانی هێشتا خۆی بەسەرۆك و تەنانەت هاوڕێی بایدنیش ئەزانێ بەڵام ناچێێتە ژێر باری بەرپرسیاریەتی هیچ کام لە و شکست و کارەساتانەی لەژێر فەرمانڕەوایی ئەودا دوچاری کوردوستانی عێراق بوە. تائیستا ئاماژەیەك نیە بۆ راگرتنی پشتیوانیەکانی ئیدارەی نوێی ئەمریکا بۆ هەرێمی کوردوستان، بەڵام ئەم شیوازە گەڕوگولەی حوکمڕانیی هەرێم دواجار مایەیی بەزەیی و پشتیوانی نیە، بەتایبەتی لە وجودی بەغدایەکی بەهێزدا کە بایدن پشتیوانیەتی. تورکیا تورکیا و ئەردۆغان، سودمەند بون لە ڕەفتارەکانی ترەمپ. داگیرکردنی بەشێك لە کوردوستانی سوریا لەلایەن سوپای تورکەوە بە تویتیکی بێ مەعنای ترەمپ، دەسکەوتێکی کەم نەبوو بۆ ئەردۆغان ئەگەر کاتیش بێ!  سەرکوتکردن و پێشێلکاری ئازادیە سەرەتاییەکانی ناوخۆ، کڕینی سیستەمی موشەکیی ڕوسیی، پەلکێشیەکانی تورکیا بۆ ناو ئاوەکانی قوبرس و یۆنان و ناردنی هێز بۆ لیبیا و بەئاشکرا پشتیوانیکردنی گروپە جیهادیەکانی سوریا، ئەنجامی بیدەنگیی ئیدارەی واشنتن بوە. لەگەڵ ئیدارەی تازە و گەڕانەوەی ئەمریکا بۆ پرەنسیپەکانی، حکومەتەکەی ئەردوغان ترسی هەیە ڕوبەڕوی سزای ئابوری و لە قاڵبدانی سیاسی و سەربازی ببێتەوە بەتایبەتی لەم کاتەدا کە باری ئابوری زۆر دژوارە.  ئێران ئەگەرچی بایدن حەز بە گەڕانەوە بۆ پەیمانی ساڵی ٢٠١٥ ئەکات بۆ سنوردارکردنی توانا ئەتۆمیەکانی ئێران، بەڵام سەرکێشی و گاڵتەکردنی ئاخوندەکان (لەسەرویانەوە خامنەیی) بەتوانای ئەمریکا و بە سەرۆکی نوێ، ڕێگەی وتوێژ سەختتر ئەکا. ئەگەر ئاخوندەکان سور بن لەسەر ئەم سیاسەتەیان، گوشار و سزاکانی ترەمپ لە دژی ئێران ئەگەر زیاد نەکا، وەك خۆی ئەمێنێتەوە. لەلایەکی ترەوە ئاشتبونەوەی بەشێك لە وڵاتانی عەرەب لەگەڵ ئیسرایل، هەڵوێستی دەوڵەتی عیبری توندتر و بەهیزتر کردوە بەرامبەر ئێران. ئیسرایل بەئاشکرا ئەڵێ ئێران مەترسیە بۆسەر ئاسایشی ئیسرایل و ئیمارات و سعودیە و ڕێگەی پێنادەن لە قەبارەی خۆی دەرچێت! چین بە قسە بێتامەکانی ترمپ بێ، پەیوەندیەکانی ئەمریکا لەگەڵ چین لەئاستێکی زۆر خراپدایە، بەڵام جگە لە ناکۆکی لەسەر چۆنیەتی بڵاوبونەوەی ڤایرۆسی کۆرۆنا، بەدریژایی چوار ساڵی ڕابردو و تائێستاش، چین سودمەندی گەورەی چەوتیەکانی سیاسەتی دەرەوەی  ترەمپ بوە. چینیەکان نایشارنەوە کە لەسایەی ئیدارەی نوێی و ئەوکاتەی ئەمریکا ئەچیتەوە سەر ڕێڕەوی خۆی، دوچاری گوشاری سیاسی و سزای ئابوری زیاتر ئەبنەوە بەهۆی پێشێلکردنی ئازادیی و سەرپێچی بازرگانیی لەلایەن چینەوە. تاکە هیوای چین بە ئیدارەی نوێ، گەیشتنە بەڕێکەوتن لەگەڵ ئەمریکا لەسەر ئاو و هەوا و هاوکاری بۆ ڕوبەڕوبونەوەی ڤایرۆسی کۆرۆنا.  ڕوسیا ڕوسیا هۆکاری سەرەکی دەرچونی ترەمپ بوو لە هەڵبژاردنی ٢٠١٦دا. بێدەنگیی ئەمریکا بەرامبەر پەلهاویشتن و پێشیلکاریەکانی ڕوسیا لە چوار ساڵی ڕابردودا، پوتین ی بەرەوە دیکتاتۆری و تاکڕەوەی زیاتر بردوە. لەم چوارساڵەدا، ڕوسیا هیچ بەرهمێکی ئابوری نەچنیوەتەوە، بەڵام دەرفەتی باش بۆ بەپاڵەوان بونی پوتین ڕەخسا بەتایبەتی دوای دەرکەوتنی سوپاکەی لە سوریا وەك هێزێکی بێ ڕکابەر و مامەڵەکردن بە خاکی سوریاوە لەسەر مێزی ئاشتی لەگەڵ تورکیا و ئێراندا. پوتین مەترسی زۆری لە سزای  ئیدارەی تازەی واشنتن هەیە بۆ گێڕانەوەی مۆسکۆ بۆ قەبارەی خۆی، بەتایبەتی لەم کاتەدا کە ڕوسیا بە قۆناغێکی ئابوری زۆر سەختدا تێئەپەڕێ، بارودۆخی سیاسی ناوخۆی نالەبارە و پەیوەندیەکانی لەگەڵ ئەلمانیا و یەکێتی ئەوروپا خراپە. ساڵی ٢٠١١ بایدن بە ئاشکرا بە پۆتین ی وت: " ئەگەر لەشوێنی تۆبومایەوە خۆم هەڵنەئەبژاردەوە، چونکە ئەوە بۆ خۆت و بۆ ڕوسیا باشتر بوو"! ئەلمانیا و ئەوروپا ئەڵمانیا وەك چوارەم گەورەترین ئابوری جیهان و گەورەترین هاوبەشی ئابوری ئەمریکا، زەرەرمەندی سیاسەتی ئابوری ئیدارەی ترەمپ بوە. بەپێی سەنتەری لێكۆڵینەوەی Pew، بەدرێژایی مێژوو، ترەمپ ناپەسندترین سەرۆکی ئەمریکا بوە و تەنها لە ١٠% ئەڵمانەکان متمانەیان پێی هەیە. هەوڵدانی ترەمپ بۆ کۆسپ دروستکردن لەبەردەم هاوردەی تەکنۆلۆجیای ئەڵمانی و گاڵتەکردن بە ئۆتۆمبێلی ئەڵمانی، زۆرترین توڕەیی لە ناوەندە پیشەسازیەکانی ئەڵمانیا دا دروستکردوە. لەلایەکی ترەوە بەهۆی مامەڵەی نادروستی بازرگانیی ترەمپەوە، هەناردەی پیشەسازی ئەلمانیا بۆ چین زەرەری پیگەیشتوە. چوار ساڵە ئیدارەی ترەمپ هەر خەریکی سەرزەنشتکردن و سوکایەتی کردنە بە توانای هێزە ئەوروپیەکانی ناو ناتۆ، لە دوو ساڵی ڕابردودا هاریکاریی و پشتیوانی بەرنامەی ناتۆ لەلایەن ئەمریکاوە، پاشەکشەی زۆری کردوە.  بریتانیاش لە سایەی کۆنە پارێزە دژە ئەوروپیەکاندا، ڕۆڵی نیودەوڵەتی خۆی لەدەست داوە. لە ئیستادا فرەنسا، بەتەنیا سەرکردایەتی سیاسەتی دەرەوەی خۆرئاوا ئەکات. لەم قۆناغەدا پشتیوانی فرەنسیەکان بەپلەی سەرەکیی هێزی ئابوری ئەڵمانیا و وڵاتە بچوکەکانی باکوری ئەوروپایە. بەپێچەوانەی ترەمپ، بایدن ئاواتەخوازی ناتۆیەکی بەهێز و  فروانکردنی ڕۆڵ و گەشەپیدانی تواناکانیەتی.   ترەمپ بەئاشکرا دژایەتی خۆی بۆ یەکێتی ئەوروپا و ئەوروپایەکی یەکگرتوو نیشانداوە،  چوار ساڵە هانی ئینگلیز ئەدا بۆ دورکەوتنەوە لە ئەوروپا و ڕەتکردنەوەی شەراکەتی ئابوری و بازرگانی ئازاد لەگەڵ یەکێتی ئەوروپادا. بەڵام جۆ بایدن بەدرێژایی ئەو هەشت ساڵەی جێگری سەرۆکی ئەمریکا بوە، خۆیی و سەرۆکەکەی، پشتیوانی یەکیتی ئەوروپا و ئەوروپایەکی یەکگرتوو بون، دژیی برێکست و بەداخ بون بۆ جیابونەوەی بریتانیا لە یەکێتی ئەوروپا. لای بایدن مامەڵکردن لەگەڵ بەرلین و پاریس پەسندترە لە (لەندەن)ێکی تەنیا.  بایدن، دژی هەر سەرکێشیەکی بریتانیایە کە ببێتە هۆی پێشێلکردنی ڕێکەوتن نامەی ئاشتی ئیرلەندای باکور. بایدن بە توندی دژی هەر هەوڵێکی بریتانیایە بۆ توندکردنی سنوری نێوان ئیرلەنداکان و کۆنترۆڵ و پشکنینی کاڵا لە نێوان ئیرلەندای باکور و بریتانیای مەزن(ئینگلتەرا، سکۆتلاند، وێڵز).  جۆ بایدن بەرەچەڵك ئیرلەندیی و  هاوڕێی نزیکی جێری ئادەمزی سەرکردەی شین فینە. بایدن شانازی بە کاریگەریی لۆبی ئیرلەندیەوە ئەکات کە  هەژمونێکی باشی بەسەر سیاسەتی ئەمریکاوە هەیە، ئەمە جێگەی نیگەرانی کۆنەپاریزەکانی ئینگلیزە و بە نیگەرانیەوە ئەڕواننە ئایندەی پەیوەندیەکانی بریتانیا و ئەمریکا بەتایبەتی دوای بەتەواوی دەرچونی  بریتانیا لە یەکیتی ئەوروپا لە مانگی یەکی ٢٠٢١ دا.

  راپۆرت: محەمەد رەئوف- فازل حەمەڕەفعەت لە گەشتێكی نوێدا بۆ هەولێر، بافڵ تاڵەبانی دواین نامەی یەكێتی گەیاندە دەستی بەرپرسانی باڵای پارتی، یەكێتی تا كۆتایی ئەمساڵی داناوە بۆ جێبەجێكردنی رێككەوتنی پێكهێنانی حكومەت لەگەڵ پارتی، بەپێچەوانەوە بەوتەی خۆیان هەڵوێستی یەكلاكەرەوەیان دەبێت، هاوسەرۆكەكان لەدوای دەستبەكاربوونیانەوە هەر مانۆڕێكی سیاسییان بەرامبەر بە پارتی كردبێت بە شكست لێی دەرچوون، ئەمان چاویان لەوەیە دەستیان بە هەڕەمی دەسەڵاتی پارتی (مەسعود بارزانی) بگات، بەڵام تائێستا لە نێچیرڤان بارزانی‌و مەكتەبی سیاسی پارتی زیاتریان چنگ نەكەوتووە، كە ئەوانیش بڕیاری كۆتایی پارتییان لانییە. نامەیەكی نوێ بۆ پارتی دوێنێ بافڵ تاڵەبانی هاوسەرۆكی یەكێتی چووە هەولێر، بەپێی زانیارییەكانی (درەو) نامەیەكی نوێی یەكێتی داوە بە نێچیرڤان بارزانی سەرۆكی هەرێمی كوردستان‌و جێگری سەرۆكی پارتی.  (درەو) تائێستا وردەكاری ناوەڕۆكی پەیامەكەی بافڵ تاڵەبانی دەستنەكەوتووە، بەڵام سەرچاوەكان لەناو یەكێتییەوە باسلەوە دەكەن، لەنامەكەدا بافڵ تاڵەبانی جەخت لەسەر سوربوونی یەكێتی لەسەر جێبەجێكردنی رێككەوتنی پێكهێنانی كابینەی نۆیەمی حكومەت دەكات كە لەنێوان هەردوو حزبدا ئیمزاكراوە. لەنامەكەدا بافڵ تاڵەبانی باسی لەوەكردووە رێككەوتنی پێكهێنانی حكومەت تەنیا پڕكردنەوەی پۆستەكان نییە، بەڵكو بابەتی تریشە كە تائێستا جێبەجێ نەكراوە‌و داوا دەكات پارتی دواین وەڵامی خۆی لەبارەی جێبەجێكردنی ئەو رێككەوتنە بە یەكێتی رابگەیەنێت. یەكێتی لەبارەی رێككەوتنەكەی لەگەڵ پارتی بۆ پێكهێنانی حكومەت، ئێستا لەسەر ئەم تەوارانە تێبینی هەیە: •    لامەركەزیەتی ئیداری‌و دارایی •    شەراكەتی یەكێتی لە حكومەت •    پڕكردنەوەی پۆستەكانی یەكێتی لە حكومەت‌و ڤیتۆی پارتی لەسەر كاندیدەكانی یەكێتی •    هەڵوێستی یەكێتی لەبارەی دۆخی ئێستای كوردستان‌و كێشەی پەكەكە سەردانەكەی بافڵ تاڵەبانی بۆ هەولێر دوای دەستپێشخەرییەك دێت بۆ ئاسایكردنەوەی پەیوەندییەكانی نێوان هەردوو حزب، دەستپێشخەرییەكە لەناو حكومەت‌و لەلایەن هەریەكە لە مەسرور بارزانی سەرۆكی حكومەت‌و قوباد تاڵەبانی جێگرییەوە كراوە‌و، لەسەر بنەمای ئەو دەستپێشخەرییە لە رۆژی 17ی مانگی رابردوو، واتە رۆژێك دوای یادی "16ی ئۆكتۆبەر"، بۆ ماوەی 72 كاتژمێر میدیای پارتی‌و یەكێتی شەڕی راگەیاندنیان لەدژی یەكتر راگرتووە، لە تیمی پارتی پشتیوان سادق وەزیری ئەوقاف‌و لە تیمی یەكێتی دارا رەشید وەزیری پلاندانان چاودێری رێككەوتنی راگراتنی شەڕە میدیاییەكەی نێوان هەردوو حزبیان كردووە. دوای ئەم دەستپێشخەرییە، یەكێتی نامەیەكی لەبارەی پرسە هەڵپەسێردراوەكانی نێوانیان، ئاڕاستەی پارتی كردووە، لەو نامەیەدا داوای بەلاداخستنی پرسی لامەركەزیەتی ئیداریی‌و دارایی‌و شەراكەت‌و پشكەكانی یەكێتی لەناو حكومەت كردووە. پارتی وەڵامی نامەكەی یەكێتی داوەتەوە‌و لەبارەی پرسی لامەركەزییەوە باسی لەوەكردووە ئەم بابەتە بەشێكە لە كارنامەی حكومەت‌و یەكێتی دەتوانێت لەچوارچێوەی ئەو كارنامەیەدا لامەركەزیەت جێبەجێ بكات، لەبارەی پشكی یەكێتی لە حكومەت بەدیاریكراویش دەستەی ناوچە كوردستانییەكانی دەرەوەی هەرێم كە یەكێتی (رەوەند مەلا مەحمود)ی بۆ كاندیدكردووە‌و پارتی كاندیدەكەی یەكێتی رەتدەكاتەوە، لەوەڵامەكەی پارتیدا جارێكی تر جەخت لەسەر ئەوە كراوەتەوە كە مەسرور بارزانی قایل نییە بەوەی رەوەند مەلا مەحمود ئەو پۆستە وەربگرێت، رەوەند ئەندامی سەركردایەتی یەكێتییە‌و خەڵكی كەركوكە، پارتی تۆمەتباری دەكات بەوەی بەشداربووە لە رووداوەكانی 16ی ئۆكتۆبەردا، بۆیە ڤیتۆیان هەیە لەسەری‌و دوای زیاتر لە ساڵێك‌و پێنج مانگ لە دەستبەكاربوونی كابینەی نۆیەمی حكومەتی هەرێم، تائێستا بەهۆی ئەم كێشەیەوە یەكێتی نەیتوانیوە ئەو پۆستە پڕبكاتەوە.  لەبارەی شەراكەتی یەكێتییەوە لە حكومەت، پارتی لەنامەكەیدا جەخت لەسەر ئەوە دەكاتەوە رێككەوتنەكە جێبەجێ كراوە‌و یەكێتی بەشی زۆری پۆستەكانی لە حكومەت وەرگرتووە، لەم چەند رۆژەی رابردوودا یەكێتی ژماریەك پۆستی سەرۆكی دەستەو بریكاری وەزیر و راوێژكاری لەناو حكومەت پڕكردەوە. یەكێتی چی دەوێت ؟ بەگشتی لە گەڕی ئەمجارەی دانوستانەكاندا یەكێتی دەیەوێت دەسەڵاتی لامەركەزیەتی ئیداریی‌و دارایی بۆ سنوری دەسەڵاتی خۆی لە پارتی وەربگرێتەوە، بەڵام ئەوەی تائێستا پارتی پێیداوە هەر ئەو جۆرە لە لامەركەزیەتەیە كە ئێستا هەیە‌و لەچوارچێوەی وەزارەتی ناوخۆدایە‌و هەندێك دەسەڵاتە كە دراوە بە پارێزگارەكان، یەكێتی چاوی لە زیاترە، دەیەوێت بەیاسا لامەركەزیەتی تەواوەتی دارایی‌و ئیداری بۆ سنوری دەسەڵاتی خۆی بسەپێنێت‌و بەجۆرێك چیتر سلێمانی بۆ بڕیارە دارایی‌و ئیدارییەكانی نەگەڕێتەوە بۆ هەولێر، ئەمە بوو وای كرد مەسعود بارزانی لەرێگەی مەكتەبی سیاسی پارتییەوە پەیام بۆ یەكێتی بنێرێت‌و پرۆژەی گەڕانەوەیان بۆ قۆناغی بەر لە یەكخستنی حكومەت واتە دوو ئیدارەیی بخاتە بەردەم. یەكێتی نایەوێت بگەڕێتەوە بۆسەردەمی دوو ئیدارەیی، بەڵكو دەیەوێت بگەڕێتەوە بۆ سەردەمی سەرەتای یەكخستنی حكومەتی هەردوولا لە ساڵی 2005دا، چونكە ئەو سەردەمە یەكێتی هەم لە هەولێر شەریكە دەسەڵاتی پارتی بووە، هەمیش پشكی سنوری خۆی لە دارایی هەرێم بەشێوەیەكی سەربەخۆ وەرگرتووە‌و خۆی بەوشێوەیەی كە ویستویەتی لە سلێمانی بەكاریهێناوە، سەرباری ئەمە لەڕووی ئیدارییەوە یەكێتی پێیوایە دەسەڵاتی ئیداری بەتەواوەتی لە هەولێردا قۆرخ بووە‌و سلێمانی دەسەڵاتی لە هیچ بڕیارێكی ئیداریدا نییە، بۆ نمونە پێشتر بەڕێوەبەرایەتی گشتی وەبەرهێنانی سلێمانی مۆڵەتی پرۆژەكانی بە سەرمایەداران‌و بازرگانان داوە، ئێستا ئەم دەسەڵاتە لە هەولێرەو بەڕێوەبەرەكەی سلێمانی هیچ دەسەڵاتێكی نییە، ئەمە بۆ بەڕێوەبەرایەتییەكانی تریش بە هەمان شێوەیە بەپێی ئەوەی یەكێتی باسی دەكات. لەبەرامبەردا پارتیش گلەیی لە یەكێتی هەیە، پارتی بەفەرمی ناڕەزایەتی خۆی لەبارەی چۆنیەتی بەڕێوەبردنی دەروازە سنورییەكان بە یەكێتی راگەیاندووە، پارتی باسلەوە دەكات بەڕێوەبردنی دەروازە سنورییەكانی ناوچەی خۆی رێكخستوەتەوە‌و بەوهۆیەوە داهاتی دەروازەكانی زیادی كردووە، ئەمە لەكاتێكدایە لە دەروازەكانی سنوری یەكێتی بەشێوەیەكی بەربڵاو قاچاخچێتی دەكرێت‌و داهاتی پێویست بۆ حكومەت ناگەڕێتەوە، مەسرور بارزانی چیتر ناتوانێت پارەی سنوری پارتی كۆبكاتەوە‌و بینێرێت بۆ خەرجی سنوری ئیدارەی یەكێتی ئەگەر یەكێتی هاوكاری حكومەت نەكات لە زیادكردنی داهاتەكاندا.  پرسی پێشمەرگە‌و هێزە ئەمنییەكان لەسەر پرسی پێشمەرگە‌و هێزە ئەمنییەكانیش یەكێتی لەگەڵ پارتی ناكۆكی هەیە. ئەنجومەنی ئاسایشی هەرێمی كوردستان لەدوای دەستبەكاربوونی مەسرور بارزانی لە پۆستی سەرۆكی حكومەت، نوێ نەكراوەتەوە، بەمدواییە یەكێتی وەڵامی بەیاننامەیەكی ئەنجومەنی ئاسایشی هەرێمی دایەوە‌و ئەمە پارتی نیگەران كرد. ئێستا كە پارتی لەسەروبەندی شەڕو روبەڕووبونەوەدایە لەگەڵ (پەكەكە)، یەكێتی وەكو پێویست نەهاتوەتە پێشەوە، تەنانەت تیمی یەكێتی ناڕازی بوون لەسەر ئەوەی حكومەتی هەرێم بەیاننامە لەدژی جموجوڵەكانی پەكەكە لەناو هەرێمی كوردستان بڵاوبكاتەوە، دواجار قوباد تاڵەبانی كێشەكەی چارەسەر كرد‌و بەیاننامەكەی تێپەڕاند. بەپێی زانیارییەكانی (درەو)، لەدواین كۆبونەوەی مەكتەبی سیاسی یەكێتیدا باسلەوە كراوە یەكێتی لەگەڵ شەڕی پەكەكەدا نییە، هەندێك لە یەكێتییەكانیش باسلەوە دەكەن، ئەگەر شەڕ رووبدات یەكێتی هێزی خۆی بەشداری پێناكات لەو شەڕەدا. یەكێتی نایەوێت دەسەڵاتی سەربازی‌و ئەمنی هەرێمی كوردستان لای مەسرور بارزانی سەرۆكی حكومەت بێت، دەیەوێت هاوشێوەی ئەوەی پێشتر هەبووە، دەسەڵات لای سەرۆكی هەرێم بێت كە ئێستا نێچیرڤان بارزانییە‌و بەپێی یاسا فەرماندەی گشتی هێزە چەكدارەكانی هەرێمی كوردستانە‌و هاوكات ئەنجومەنی ئاسایشی هەرێم وەكو بەرزترین دەسەڵاتی ئەمنی لەهەرێم بەپێی یاسا بە سەرۆكایەتی هەرێمەوە بەستراوە نەك سەرۆكایەتی حكومەت.  نەوت‌و وزە یەكێك لە نیگەرانییەكانی تری یەكێتی لەسەر چۆنیەتی بەڕێوەبردنی دۆسیەی نەوتە لە هەرێمی كوردستان، یەكێتی داوای دەكات لە بڕیارەكانی تایبەت بەم كەرتەدا بەشدار بێت، سەرباری ئەمە بەپێی زانیارییەكانی (درەو) بەمدواییە لەناو یەكێتیدا رەخنە دەستیپێكردووە سەبارەت بەوەی حكومەتی هەرێم گرێبەستە گەورەكانی بواری نەوتی داوە بە كۆمپانیاكانی پارتی بەدیاریكراویش كۆمپانیای (كار)‌و یەكێتی هیچ پشكدارییەكی لەم بوارەدا نییە. ئەمە لەكاتێكدایە بەرپرسانی باڵای پارتی چەندینجار پەیامیان بۆ یەكێتی ناردووە‌و لەبارەی دۆسیەی نەوتەوە ئاگاداریان كردوون لەوەی بەشدارن‌و پشكی خۆیان وەردەگرن‌و دەچێتە سەر ژمارە حسابییەك لە بانكی "میسر" لە دوبەی‌و هەموو مانگێك یەكێتی پشكی خۆی وەرگرتووە. پێشتریش لەسەر ئەم پرسە جارێك پارتی وەڵامی یەكێتی دایەوە بەوەی قوباد تاڵەبانی جێگری سەرۆكی حكومەتە‌و ئاگاداری دۆسیەی نەوتە. سەفەرەكانی بافڵ بۆ هەولێر تەموزی رابردوو هاوشێوەی ئێستا یەكێتی‌و پارتی پەیوەندییەكانیان بە دۆخێكی ئاڵۆزدا تێدەپەڕی، ئەوكات یەكێتی بەدیاریكراویش لاهور شێخ جەنگی هەڕەشەی هەڵپەساردنی پەرلەمان‌و حكومەتی دەكرد‌و لەبەرامبەردا مەسرور بارزانی هەڕەشەی دووبارەكردنەوەی سیناریۆكەی بزوتنەوەی گۆڕان‌و دەركردنی وەزیرەكانی یەكێتی لە حكومەت دەكرد، بەڵام بەنێوەندگیرییەك بافڵ تاڵەبانی چووە هەولێرو نێچیرڤان بارزانی لە درەنگانێكی شەودا بینی، ئەوكات رێككەوتن لەسەر ئەوەی پارتی و یەكێتی لیژنەیەكی هاوبەش دروست بكەن‌و ئەو لیژنەیە گفتوگۆ لەسەر كێشەكانی نێوانیان بكات‌و چارەسەریان بۆ بدۆزێنەوە، هەردوولا لیژنەیان دروستكرد، رۆژی 11ی ئاب وەفدێكی پارتی بە سەرۆكایەتی هۆشیار زێباری هاتنە هاوینەهەواری دوكان‌و لەگەڵ بافڵ تاڵەبانی‌و وەفدی یەكێتیدا كۆبونەوە، یەكێك لە بڕیارەكانی ئەو كۆبونەوەیە راگرتنی شەڕی میدیای هەردوو حزب بوو، ئەو بڕیارەش جێبەجێ نەكراو چیتر كۆبونەوەی تری بەدوادا نەهات‌و راوەستا. سەفەری ئەمجارەی بافڵ تاڵەبانی بۆ هەولێر رەنگە هاوشێوەی سەفەرەكەی تەموز بێهودە بێت، چونكە وەڵامەكانی پارتی گۆڕانكارییەكی ئەوتۆیان بەسەردا نەهاتووە. رەنگە بەربەستی گەورەی بەردەم هاوسەرۆكەكان لە پەیوەندییەكانیان لەگەڵ پارتی ئەوەبێت تائێستا نەیانتوانیوە كۆبونەوەی لوتكە لەگەڵ پارتی رێكبخەن، هاوسەرۆكەكان خوازیارن لەگەڵ بڕیاربەدەستەكانی پارتی قسە بكەن كە مەسعود بارزانی‌و مەسرور بارزانی كوڕیەتی، بەڵام پارتی نێچیرڤان بارزانی‌و مەكتەبی سیاسی حزبیان روبەڕوو دەكاتەوە، كە هیچیان دەسەڵات‌و بڕیاری یەكلاكەرەوەی پارتییان لانییە. بەفەرمی ئەمە جاری دووەمە بافڵ تاڵەبانی دەچێتە هەولێر بۆ قسەكردن لەبارەی پەیوەندییەكانی یەكێتی لەگەڵ پارتی، بەڵام پارتی تائێستا لەسەر ئاستی كەسی یەكەم‌و دووەم‌و تەنانەت سێیەمیش نەهاتوەتە سلێمانی‌و بەدەنگ نیگەرانییەكانی یەكێتییەوە نییە. یەكێتی یەك دەنگ نییە نزیكەی ساڵێكە یەكێتی كۆنگرەی كردووە‌و دەستەیەكی سەرۆكایەتی نوێی هەڵبژاردووە، بەڵام هێشتا ماڵەكەی پەرتەوازەیە‌و كۆنگرە لە بری كۆكردنەوەی زیاتر پەرتی كردووە. دوای ساڵێك لە كۆنگرە، هێشتا دەستوری ناوخۆی حزب تەواونەكراوە، ئەنجومەنی باڵای سیاسی كە كۆسرەت رەسوڵ سەرۆكایەتی دەكات‌و مەكتەب سیاسییەكانی پێشتری حزبی لەخۆیدا كۆكردوەتەوە هێشتا دەسەڵاتەكانی یەكلانەكراوەتەوە، ئەمانە ناڕازین لە سیاسەتەكانی بافڵ تاڵەبانی‌و لاهور شێخ جەنگی‌و هەندێكجار هەوڵی سازدانی مانۆڕی سیاسی دەدەن، بەڵام بەگشتی هێشتا كارێكی ئەوتۆیان نەكردووە كە مەترسی لەسەر پێگەی هاوسەرۆكەكان دروست بكات، بەمدواییە كۆسرەت رەسوڵ نامەیەكی بۆ هاوسەرۆكەكان نوسی لەبارەی كاری دەروازە سنورییەكانەوە، بەڵام كاتێك (درەو) كۆپییەكی نوسراوەكەی بڵاوكردەوە، نوسینگەی رۆژنامەوانی كۆسرەت رەسوڵ نوسراوەكەی رەتیكردەوە‌و بەوشێوەیە پەیامەكەی وەكو ئەوەی دەیویست بە هاوسەرۆكەكان نەگەیشت.  لەلایەكی ترەوە یەكێتی لە قەیرانی دارایدایە، داهاتی حزب بەشی خەرجییەكانی ناكات، بەمدواییە هاوسەرۆكەكان لیژنەیەكی سێ كەسییان پێكهێناوە بۆ كۆكردنەوەی داهاتەكانی حزب، بەرپرسانی حزب تێرن، بەڵام دامەزراوەكانی حزب لاواز‌و بێ داهاتن، دارایی یەكێتی بەشێوەیەك تێكەڵ بە دارایی بەرپرسەكانی بووە، هاوسەرۆكەكان بۆیان جیاناكرێتەوە. تیمی یەكێتی لەناو حكومەت‌و پەرلەمان لەنێوان دوو ئاڕاستەدا سەریان لێ شێواوە، ئاڕاستەیەك قوباد تاڵەبانی‌و بافڵی تاڵەبانی برای سەرەوكاریی دەكەن‌و پەیوەندییەكانیان ئاسایی‌و باشە لەگەڵ پارتی، ئاڕاستەكەی تر لاهور شێخ جەنگییە كە ناكۆكە لەگەڵ پارتیدا‌و تائێستا بارزانی‌و پارتی دانیان پێدا نەناوە. بافڵ تاڵەبانی‌و لاهور شێخ جەنگی لەدوای دەستبەكاربوونیان لە پۆستی هاوسەرۆكایەتی یەكێتی، هەر مانۆڕێكیان بەرامبەر پارتی كردبێت بە شكست لێی دەرچوون، لەوانە لە كێشەی زینی وەرتێ‌و لامەركەزیەتی ئیداری‌و مانۆڕە سیاسییەكان ناو پەرلەمان، هەوڵەكانی دروستكردنی بەربەست بۆ بڕیارەكان لەناو حكومەت، پارتی زیرەكانە هەموو كارتەكانی فشاری لەدەستی هاوسەرۆكەكاندا سوتاندووە، ئێستاو دوای ئەو زنجیرە شكستە، قسەوباس لەسەر ئەوە هەیە گوایە هاوسەرۆكەكان تا كۆتایی ئەمساڵ دەرفەت بە پارتی دەدەن بۆ چارەسەركردنی كێشەكان، بەپێچەوانەوە بەشێوەی تاكلایەنە بڕیار لەسەر چارەنوسی سنوری دەسەڵاتدارێتی خۆیان دەدەن، بەڵام ئایا بەو بارودۆخە ناسەقامگیرەی ناو حزبەكەیانەوە دەتوانن بڕیاری گەورە لەبارەی چارەنوسی پەیوەندییەكانیان لەگەڵ پارتی بدەن ؟

(درەو): ئەگەر جۆ بایدن هەڵبژاردنی سەرۆکایەتی بباتەوەو ببێت بە سەرۆکی ئەمریکا وەکو ئەوەی ئێستا پێشبینی ئەنجامەکان وادەڵێن، دۆخی خۆرهەڵاتی ناوەڕاست لە سایەی سیاسەتی بایدنەوە بەمشێوەیە خوێندنەوەی بۆ دەکرێت: عێراق کاتێک جێگری باراک ئۆباما بووە، بایدن چەندینجار سەردانی عێراق و هەرێمی کوردستانی کردووە، بەباشی لە کێشەی عێراق تێدەگات، کوڕەکەی لە ریزی سوپای ئەمریکا لە عێراق خزمەتی کردووە، بایدن خاوەنی پرۆژەی دابەشکردنی عێراقە بەسەر سێ هەرێمی شیعەو سوننەو کورددا، ئەو پێیوایە بە دابەشکردن دەتوانرێت یەکێتیی عێراق بپارێزرێت. هەندێک بە دیاریکراویش پارتی دیموکراتی کوردستان خۆشحاڵن بە سەرکەوتنی بایدن، بەوپێیەی بایدن وەکو دۆستێکی نزیکی کوردو هاوڕێی مەسعود بارزانی دەناسێنن، پێیانوایە ئەگەر ریفراندۆمی سەربەخۆیی لەسەردەمی بایدندا بکرایە ئەنجامەکەی بەجۆرێکی تر دەبوو. لەبەرامبەردا ئەوانەی پشتیوانی مانەوەی عێراق دەکەن لەچوارچێوەکەی خۆیدا ترسیان هەیە بایدن نەخشەکەی بۆ دابەشکردنی عێراق بخاتەبواری جێبەجێکردنەوە. لەبارەی بوونی هێزەکانی ئەمریکا لە عێراق کە ئێستا بابەتی گەرمی پەیوەندییەکانی نێوان ئەمریکاو عێراقە، پێشبینی دەکرێت بایدن هەوڵە سەربازییەکانی ئەمریکا لە عێراق و سوریاو ئەفغانستان سنوردار بکات یان بەیەکجاری کۆتایی پێ بهێنێت و لەبری ئەوە هەندێک هێزی دژەتیرۆر لەو وڵاتانە بهێڵێتەوە. سعودیە لە ساڵیادی تیرۆرکردنی (جەمال خاشوقچی)دا بایدن وتی:" چاو بە پەیوەندییەکانی ئەمریکا لەگەڵ سعودیەدا دەخشێنمەوە"، هەر لەبارەی سعودیەوە جارێک بایدن وتی:" بەهای ئەمریکا بە سواڵکردن بۆ فرۆشتنی چەک و کڕینی نەوت بەدی نایەت". بایدن بەڵێنیداوە کۆتایی بە یارمەتییەکانی ئەمریکا بۆ سعوییە بهێنێت لە جەنگی یەمەندا، هەروەها چاوپۆشی لە پێشێلکاریی مافەکانی مرۆڤ نەکات لەبەر بەرژەوەندییە سیاسییەکان. ئیسرائیل و دۆزی فەلەستین بایدن پاڵپشتی ئەوە ناکات خاکی کەناری خۆرئاوا بخرێتە سەر ئیسرائیل، بایدن دەڵێ:" چالاکی دروستکردنی کۆمەڵگە جولەکەنشینەکان لەلایەن ئیسرائیلەوە، هەرجۆرە ئومێدێک بۆ ئاشتی دەخنکێنێت"، بەڵام سەرباری ئەمەش پێشبینی ناکرێت جارێکی تر باڵیۆزخانەی ئەمریکا لە قودسەوە بگەڕێنێتەوە بۆ تەلئەبیب یان هەر هەنگاوێکی تر هەڵگرێت کە ببێت بە هەڕەشە لەسەر سەلامەتی ئەو رێککەوتنانەی بۆ ئاسایکردنەوەی پەیوەندییەکان بەمدواییە لەنێوان ئیسرائیل و وڵاتانی عەرەبیدا کراوە. بەڵام سەرباری ئەمانە بایدن بەڵێنیداوە جارێکی تر کۆمەکەکانی ئەمریکا بۆ فەڵەستینییەکان دەستپێبکاتەوە، هەروەها دەرگای کونسوڵگەری ئەمریکا لە قودسی رۆژهەڵات و نوسینگەکانی رێکخراوی رزگاریخوازی فەلەستین لە واشنتۆن بکاتەوە. ئیداری بایدن هەوڵی زیندوکردنەوەی بیرۆکەی چارەسەری ئاشتی، کێشەی نێوان ئیسرائیل و فەڵەستینییەکان چارەسەر بکات. میسر لەبارەی دەسەڵاتی میسرەوە بایدن قسەیەکی هەیە کە وەکو ئاماژەیەک بۆ عەبدولفەتاح سیسی سەرۆک میسر دەڵێ:" ئیتر چەکی سپی زیاتر نادەین بە دیکتاتۆرە دڵخوازەکەی ترەمپ". میسر یەکێک لەو وڵاتانەیە کە لە بایدن نیگەرانە بەهۆی ئەوەی بەردەوام ئیدانەی دۆخی مافەکانی مرۆڤی کردووە لەو وڵاتە. بەگوێرەی قسەی ئەنجومەنی ئەوروپا بۆ پەیوەندییە دەرەکییەکان، بایدن بەشێک لەو یارمەتییە داراییە گەورەیە رادەگرێت کە ئەمریکا ساڵانە بە میسری دەدات، ئەگەر ئاستی پێشێلکارییەکانی مافی مرۆڤ لەو وڵاتە پەرەسەندنی زیاتر بەخۆە ببینێت. سوریا پێشبینی ناکرێت بایدن هێزەکانی ئەمریکا لە سوریا بکێشێتەوە، پاشەکشێ لە سزاکان بۆسەر دیمەشق ناکات. پەیوەندی بەهێزی بایدن  لەگەڵ کوردی رۆژئاوای کوردستان، ئەنکەرە نیگەران دەکات. تورکیا بایدن، ئەردۆغانی بە "ستەمکار" ناوبردووەو داوای لە ئۆپۆزسیۆنی تورکیا کردووە لە هەڵبژاردندا بیخەن. پێشبینی دەکرێت بایدن بەهۆی گرێبەستی کڕینی سیستمی بەرگری موشەکی (S400) لە روسیا، سزا بەسەر تورکیادا بسەپێنێت. ماکس هۆڤمان کە لێکۆڵەرێکی سیاسییە وەکو ئاماژەیەک بۆ پەیوەنییەکانی ترەمپ و ئەردۆغان و ئەو گۆڕانکارییەی دوای دەستبەکاربوونی بایدن روودەدات، بە ئاژانسی رۆیتەرزی وتووە:" ئیتر ئەردۆغان ناتوانێت بە تەلەفۆنێک بۆ کۆشکی سپی، سیاسەتی ئەمریکا سەرەوژور بکاتەوە". ئێران بایدن دەڵێ رێککەوتنی ئەتۆمی ئێستا لەگەڵ ئێران "شورەیی"ە، بەڵام باشترە لەوەی "بوونی هەبێت" بۆ سەرکوتکردنی ئارەزووە ئەتۆمییەکانی ئێران. بایدن دەڵێ:" ئەگەر ئێران گەڕایەوە بۆسەر پابەندییە ئەتۆمییەکانی، جارێکی تر ئەگەڕێینەوە بۆ ناو رێککەوتنە ئەتۆمییەکە". بەگشتی سەرکەوتنی بایدن لە هەڵبژادنی سەرۆکایەتی ئەمریکا، بۆ چوار ساڵی داهاتوو هەندێک لە سیاسەتەکانی ئەمریکا لەناوچەی خۆرهەڵاتی ناوەڕاست دەگۆڕێت و وەکو خۆی دەڵێ هەڵەکانی ترەمپ راست دەکاتەوە، بەڵام بەگشتی گۆڕانکارییەکان گەورە نابن هێندەی ئەوەی وەکو جوانکاری سیاسی تەماشا دەکرێن.

 راپۆرت: درەو هەوڵی کۆتایهێنان بە هەژموونی محەمەد حەلبوسی، سەری ئوسامە نوجێفی وەکو سەرکردەیەکی دیاری سوننەکان کرد بەناو ماڵەکەی بارزانی و شیعەکاندا، نزیکەی حەوت مانگ ماوە بۆ بەڕێوەچوونی هەڵبژاردنی پێشوەختە لە عێراق، لەناو پێکهاتەی سوننەدا شەڕ لەسەر کورسی سەرۆکی پەرلەمان دەستی پێکردووە، ماڵی سوننە لە عێراق هێشتا ماڵێکی شێواو و لێکترازاوە، نوجێفی بەرەیەکی دژی حەلبوسی دروستکردووەو  نوجێفی لە ماڵی بارزانی دوێنێ سەرکردەکانی هاوپەیمانی بەرەی عێراقی سەردانی هەولێریان کردو چاویان بە مەسعود بارزانی سەرۆکی پارتی دیموکراتی کوردستان کەوت. بەرەی عێراقی هاوپەیمانێتییەکەی نوێی سوننەکانی عێراقە کە بەقسەی خۆیان (٣٥) ئەندامی پەرلەمانی عێراقیان لەگەڵدایەو ئوسامە نوجێفی سەرۆکایەتی دەکات. سایتی "بارەگای بارزانی" کە بەردەوام هەواڵی چالاکییەکانی مەسعود بارزانی بڵاودەکاتەوە، هەواڵی سەردانی سەرکردەکانی بەرەی عێراقی بۆلای بارزانی بڵاو نەکردەوە. بەڵام میدیایەکی عێراقی لەزاری سەرچاوەیەکەوە باسی لەوەکرد، لەو دیدارەدا سەرکردەکانی بەرەی عێراقی داوایان لە بارزانی کردووە پاڵپشتییان بکات بۆ دورخستنەوە محەمەد حەلبوسی لە پۆستی سەرۆکی پەرلەمانی عێراق. بەقسەی سەرچاوەکە، بارزانی بەمەرجێک رازی بووە پاڵپشتییان بکات، کە محەمەد حەلبوسی و بەرهەم ساڵحی سەرۆک کۆمار پێکەوە لە پۆستەکانیان دوربخرێنەوە. راستی ئەم قسەوباسانە تائێستا بەتەواوەتی پشتڕاست نەکراونەتەوە، بەڵام لە بەیاننامەی هاوپەیمانی عێراقدا سەبارەت بە دیدارەکەی بارزانی باسلەوەکراوە" هەردوولا هاوڕابوون لەسەر پێویستی هەڵگرتنی هەنگاوی یەکلاکەرەوە بۆ چاکسازیکردن لە پرۆسەی سیاسی"و هەردوولا بەڵێنیانداوە بەردەوامی بدەن بە گفتوگۆکانیان لەپێناو بەدیهێنانی ئەم ئامانجە". نوجێفی تەنیا سەردانی بارزانی نەکرد، دوای گەڕانەوەی لە هەولێر چاوی بە عەممار حەکیم سەرۆکی رەوتی حیکمە کەوتووەو دەیەوێت سەرکردەی لایەنە شیعەکانی تریش ببینێت. لە عێراقی دوای سەددامدا بووە بە نەریت سێ پۆستە سەرۆکایەتییەکە بەمشێوەیە لەنێوان پێکهاتەکاندا دابەشکراوە: ٭ پۆستی سەرۆک وەزیران بۆ پێکهاتەی شیعە ٭ پۆستی سەرۆک کۆمار بۆ کورد ٭ پۆستی سەرۆکی پەرلەمان بۆ پێکهاتەی سوننە بۆیە هەرکاتێک لەناو یەکێک لەو پێکهاتانەدا کێشە لەسەر پۆستێک دروست دەبێت، پەنا بۆ یەکتری دەبەن. هەرچۆنێک بێت ئەگەر رێککەوتنێکیش کرابێت بۆ دورخستنەوەی حەلبوسی و بەرهەم ساڵح لە پۆستەکانیان، ئەم رێککەونە دەبێت بۆ دوای هەڵبژاردنی پێشوەختەی عێراق و بۆ خولی داهاتووی حکومەت و پەرلەمان بێت، چونکە لە ئێستادا محەمەد حەلبوسی و بەرهەم ساڵح خۆیان لە کۆتایی دەسەڵاتەکانیان نزیکدەبنەوە، بەتایبەتی ئەگەر مانگی شەشی ساڵی داهاتوو هەڵبژاردنی پێشوەختە لە عێراق بەڕێوە بچێت. هاوپەیمانی بۆ خستنی حەلبوسی ٢٥ی مانگی رابردوو، ئوسامە نوجێفی کە یەکێکە لە کارەکتەرە سیاسییە دیارەکانی پێکهاتەی سوننە، هاوپەیمانێتییەکی نوێی بەناوی "بەرەی عێراقی" راگەیاند. ئەوکات نوجێفی وتی هاوپەیمانێتییەکەی (٣٥) ئەندامی پەرلەمانی عێراقی لەگەڵدایەو پێکدێت لە پێنج لایەنی سیاسی کە ئەمانەن: ٭ جبهة الإنقاذ والتنمية ٭ كتلة المشروع العربي  ٭ كتلة الجماهير الوطنية  ٭ الحزب الإسلامي  ٭ الكتلة العراقية المستقلة بەڵام کۆتایی مانگی رابردوو (المشروع العربی) کە خەمیس خەنجەر سەرۆکایەتی دەکات، بێبەریبوونی خۆی لە هاوپەیمانێتییە نوێیەکەی نوجێفی راگەیاند. بەرە نوێیەکەی نوجێفی وەکو ئەوەی خۆی بانگەشەی بۆ دەکات ئامانج لێی "یەکخستنی هەڵوێستی سوننەکانە"، بەڵام وا دەردەکەوێت ئامانجە سەرەکی و گەورەکەی لێدانە لە پێگەی محەمەد حەلبوسی سەرۆکی پەرلەمانی عێراق، ئەمە شەڕی سەرکردایەتیکردنی شەقامی سوننەی عێراقە بەر لە بەڕێوەچوونی هەڵبژاردنی پێشوەختە لە عێراق. حەلبوسی بەسودوەرگرتن لە پێگەکەی وەکو سەرۆکی پەرلەمان ئێستا نەک لە پارێزگای ئەنبار کە خۆی خەڵکی ئەو پارێزگایەیە، پەلی بۆ پارێزگای نەینەوای گۆڕەپانی ئوسامە نوجێفی-ش کێشاوەو پێگەی جەماوەری دروستکردووە، ئەمە سەرباری پارێزگای سەلاحەدین کە مەڵبەندی لایەنگرانی نەیارەکانی تریەتی بەتایبەتی ئەحمەد جبوری پارێزگاری پێشووی سەلاحەین و ئەندامی پەرلەمانی عێراق. ململانێی سەرکردەکانی سوننە لەسەر رێبەرایەتیکردن، لەکاتێکدایە ناوچەکانیان کە بەهۆی شەڕی "داعش"وە وێران بووە، دوای پێنج ساڵ لە کەوتنی "داعش" هێشتا وێرانەیەو ئاوەدان نەکراونەتەوە. یاسای نوێی هەڵبژاردن و چۆنیەتی دابەشکردنی بازنەکانی هەڵبژاردن وەکو دەوترێت بە پلەی یەکەم لە ناو شیعەکاندا بەرژەوەندی رەوتی سەدر دانراوە، لەناو سوننەکانیش محەمەد حەلبوسی، بۆ کوردیش یاساکە زیاتر لە بەرژەوەندی پارتی دیموکراتی کوردستانە، نوجێفی و هاوپەیمانەکانی دەیانەوێت سنورێک بۆ حەلبوسی دابنێن ئەگەر لەلایەن کورد (بارزانی)و شیعەکانەوە گڵۆپی سەوزیان بۆ هەڵبکرێت. ناکۆکی ئەمجارەی نێو ماڵی سوننە لەکاتێکدایە هەموو پێشبینییەکان بۆ ئەوەدەچن ئاستی بەشداری دەنگدەران لە هەڵبژاردنی پێشوەختەی عێراقدا لەناوچە سوننەنشینەکان رێژەیەکی زۆر کەم تۆماربکات، بەتایبەتی لەکاتێکدا بەگوێرەی راپۆرتی مانگی شوباتی رابردووی نەتاوە یەکگرتووەکان هێشتا نزیکەی (ملیۆنێک و ٥٠٠ هەزار) کەسی لە ئاوارەکانی ئەو ناوچانە دور لە شوێنی نیشتەجێبوونی خۆیان دەژینو بەشێکی تریان لە زیندانەکاندان یاخو گەڕاونەتەوە بۆ ناوچەکانی خۆیان و بەدەست بێکارییەو دەناڵێنن. ماڵێکی لێکترازاو  لە کۆی (٢٩٣) کورسی، لەخولی ئێستای پەرلەمانی عێراقدا هێزە سونییەکان (٧٣) کورسییان هەیە، ئەم کورسییانە دابەش بووبوو بەسەر ژمارەیەک کوتلەی سیاسیدا، بەڵام سوننەکان لە ئابی ٢٠١٨دا هاوپەیمانێتییەکیان بەناوی "میحوەری نیشتمانی"ی راگەیاند، ئەمە گەورەترین کوتلەی سوننەکان بوو لەناو پەرلەمانی عێراق، کوتلەکە (٥٠) کورسی پەرلەمانی هەبوو، بەڵام دواتر ناکۆکی کەوتە ناو هاوپەیمانێتییەکەو جیابونەوە رویدا، لەم ناکۆکییەدا هاوپەیمانێتییە گەورەکەی سوننە دابەشبوو بەسەر دوو هاوپەیمانێتی نوێدا: ٭ هاوپەیمانی هێزە عێراقییەکان بە سەرۆکی محەمەد حەلبوسی سەرۆکی پەرلەمان ٭ هاوپەیمانی میحوەری نیشتمانی بە سەرۆکایەتی خەمیس خەنجەر واتا ئەو بەرە نوێیەی کە ئوسامە نوجێفی مانگی رابردوو لەناو سوننەکاندا دروستیکرد، لە دیمەنە گشتییەکیدا پەرتکردنی ماڵێک بوو کە خۆی لە بنەڕەتەوە لێکترازا بوو. نوجێفی لەبەردەم رایگشتیدا وا بانگەشە دەکات گوایە بەرە نوێیەکەی بە ئامانجی دۆزینەوەی چارەسەر بۆ کێشەی پارێزگا سوننەنشینەکان و دۆزینەوەی چارەنوسی هەزاران رۆڵەی سوننە دروستکردووە کە بێسەروشوێن کراون، بەڵام چاودێران و نەیارەکانی دەڵێن بەرەکەی تەنیا بۆ لێدانە لە پێگەی محەمەد سەرۆکی پەرلەمان کە تادێت هەژموونی لەناو سونەکاندا وەکو سەرکردەیەکی نوێ، فراوانتر دەبێت. هەندێک لە چالاکوانانی سیاسی سوننە باسلەوەدەکەن، سەرکردەکانیان هێندەی سەرقاڵی ململانێن لەسەر دەستکەوتە سیاسییەکانیان، هێندە نەیانتوانیوە نوێنەرایەتی پێکهاتەکەیان بکەن و چارەسەری گونجاو کێشە هەڵپەسێردراوەکانی پێکهاتەی سوننە لە عێراقی دوای سەددامدا بدۆزنەوە. هەندێک هۆکاری ئەم لاوازییەی سوننە بۆ ئەو هەڵمەتی پەراوێزخستن و دورخستنەوەیە دەگێڕنەوە کە لەسەردەمی حوکمی نوری مالیکیدا بەرامبەر بە سیمبولە دیارەکانی سوننە لە عێراق گیراوەتەبەرو بووەتەهۆی دەرکەوتنی هەندێک سەرکردەی نوێ، کە بەبەراورد بەوانەی پێشتر ئەو پێگەیان لەنا شەقامی سوننەدا نییە، سەرباری ئەمەش تێکچوونی تەونی کۆمەڵایەتی ناوچە سوننەنشینەکان لە شەڕی "داعش"دا زیاتر دۆخەکەی لە سوننەی عێراق ئاڵۆزکردووەو بەگشتی ئەم هۆکارانە بەوتەی ئەوان پێگەی نوێنەرایەتی سوننەی لە پەرلەمانی عێراق لە (٩٠) کورسییەوە بۆ (٧٣) کورسی لە خولی ئێستای پەرلەماندا کەمکردوەتەوە.   شەڕ لەسەر پۆستێک پۆستی سەرۆکی پەرلەمانی عێراق بۆ سوننەکان چەنێک کۆکەرەوەی ماڵی سوننە بوبێت بەهەمان ڕادە ماڵەکەشی پەرتکردووە. ئێستا بەرە نوێیەکەی ئوسامە نوجێفی، محەمەد حەلبوسی سەرۆکی پەرلەمان بەوە تۆمەتبار دەکەن کە "تاکڕەویی" دەکات بە بڕیاری سوننەکانەوە. ئەمە سەرچاوەی ناکۆکییەکی نوێیە لەناو سوننەکاندا، تا ئەوڕادەیەی بەرە نوێیەکەی نوجێفی بێ سڵەمینەوە باس لە لابردنی حەلبوسی دەکەن لە پۆستی سەرۆکی پەرلەمان، پەرلەمانێک کە ئەگەر هەڵبژاردنی پێشوەختە وەکو ئەوەی بڕیاری لەسەر دراوە لە وادەی خۆیدا بەڕێوەبچێت، تەنیا (٧) مانگ تەمەنی ماوە، بەڵام وا دەردەکەوێت نوجێفی و هاوپەیمانەکانی ئامانجی دورمەوداتریان هەیە کە ئەویش خستنی حەلبوسییە لە هەڵبژاردنی پێشوەختەی عێراق و کۆتایهێنانە بە هەژمونەکەی. هەرچۆنێک بێت ئێستا ئیتر ئەوەی دەردەکەوێت ئەوەیە لەناو سوننەکاندا دوو هاوپەیمانێتی بەرامبەر یە یەکترن، یەکەم هاوپەیمانی هێزە عێراقییەکانی محەمەد حەلبوسی و دووەم هاوپەیمانی بەرەی عێراقی ئوسامە نوجێفی. کێشەی پێکهاتەی سوننە بەر لە هەڵبژاردنی پێشوەختەی عێراق لەسەر پۆستی سەرۆکی پەرلەمان چڕبوەتەوە، ئەمە لەکاتێکدایە شیعەکان کێشەی گەورەتریان هەیە کە فرەیی ناوەندی هێزو دەسەڵاتەو هەندێکجار ئەگەر مەرجەیەتی باڵاو ئێران دەستوەردان نەکەن بۆ راگرتنی ئەو ناکۆکییانە، دورنییە سەربکێشێت بۆ پێکدادانی چەکداری، کوردیش لە عێراقدا بێ کێشە نییە، ناکۆکی پارتی و یەکێتی لەسەر پۆستی سەرۆک کۆمار بەتەواوەتی بینرا، کاتێک یەکێتی بۆ یەکەمجار لە دەرەوەی رێککەوتنی سیاسی لەگەڵ پارتی بەرهەم ساڵحی کرد بە سەرۆک کۆمار. هەموو ئەم ناکۆکییە ناوخۆییانە لەناو پێکهاتەکاندا سەبارەت کورسی سێ سەرۆکایەتییەکەی بەغداد (سەرۆکایەتی کۆمار، سەرۆکایەتی پەرلەمان، سەرۆکایەتی حکومەت) هەیە، بۆ خولی داهاتوو گۆڕانکاری لە سێ پۆستەکەدا دروست دەکەن و هەم گۆڕانکارییەش بە تەوافوق دەبێت لەنێوان هەرسێ پێکهاتەکەداو لەناو یەکێک لە پێکهاتەکانەوە بڕیاری لەسەر نادرێت.

ئامادەكردنی:عەلی مەحمود محەمەد هەرە دەوڵەمەندەكان لە 0,001%ی كۆمەڵگای ئەمەریكی, ئەوانەی چەكی بەخششەكانیان لە 8  ژمارە كەمتر نانووسێت, بەشی زۆریان  لەو دیو پەردەوە كار دەكەن وەك لۆبی فشاری بەهێز بۆ دەرچوونی كاندیدە خواستراوەكەیان, ئەوان بەهۆی كاری بزنس و سەرقاڵییانەوە نایانەوێت راستەوخۆ دەربكەون, كەمایەتیكیشیان بەناوی گەلەوە حوكمەكەن یان رۆڵی ئۆپۆزسیۆن دەگێڕن, روڵەكان لە نێوان خۆیان, بە پێی بەرژەوەندیەكانیان دابەش دەكەن, بۆ ئەوەی داواكارییەكانیان بسەپێنن و پارێزگاریش لە هەبووەكانیان بكەن, تا دەزگا حكومیەكان لاواز بن, دەوڵەمەندەكان باشتر دەتوانن پارەكانیان بۆ ئاراستەكردنی سەرجەم دەسەڵاتەكان بەكار بهێنن, بۆ ئەوەی بڕیارەكان لە بەرژەوەندیان دەربچێت, ئاخر بڕیارەكان لە پۆستەكان بۆ ئەوان گرنگترن. برایانی كوك  " دیڤید و تشارلز , دیڤید ئەمساڵ مرد" كە خاوەند 108 ملیار دۆلار سەرمایەن, دەیان ساڵە كار بۆ ئەوە دەكەن دەست بەسەر سستەمی سیاسی ئەمەریكادا بگرن بە هاوكاری خاوەند كۆمپانیا راستگەراكان "الدیمقراگیە المعگلە فی أمیركا- Jeffrey D. Sachs ". تەنانەت كاركردن بۆ هەڵوەشاندنەوەی ئۆباما كیر  لەسەر خواستی برایانی كوك و بەخششەكەرەكانی كۆماریەكانە "الصمود أمام انهیار أمریكا السیاسی- Jeffrey D. Sachs", بە تایبەتیش كۆمپانیاكانی بیمە, دەرچوون لە پەیماننامەی پاریسیش لە بەرژەوەندی كۆمپانیاكانی وزەیە, هاوكات ئەوان كاریان دەكرد لەسەر كەمكردنەوەی باج , كاندیدە كۆمارییەكان شەڕیانە لەسەر بەدەست هێنانی متمانەیان, لەبەر زیرەكی و خۆشەویستیان نا, بەڵكە لەبەر قورسایی گیرفانیان" النموژج اڵامیركی»..هل بدأ فی التصدع؟-تشارلز بلو ". ترامپ كاتی خۆی بەخششی جیمی كارتەر و ریگانی هاوكات پێكەوە دەكرد, ئەمە تایبەتمەندی زۆرێك  لە دەوڵەمەندەكانە,  لای ئەو كێ بیباتەوە تا لە گەڵی رێك بكەوێت, لە رابردوودا 6 جار بەخششی هەڵمەتی هەڵبژاردنی هیلاری كلنتۆنی كردووە, دوایی لە هەڵمەتی هەڵبژاردنی رابردوو هێرشی توندی دەكردە سەری, چونكە لای ئەو سیاسەت كاسبییە,ئەخلاق و رابردوو بە عانەیەك, وەك مینبەری مەزادكردن, ترامپ  كە دەستیكرد بە پیتاك كۆكردنەوە, راچێتەی نان خوادنی ئێوارە لە میوانخانەكەی گەیشتە 35 هەزار دۆلار, ئەوشی 100هەزار دۆلار پیتاك بدات دەبێتە بەخشەری شایستە, دواتر بە سانایی دەیبینێت. دوای گەیشتنی بە دەسەڵات, یانەی ترەمپ نرخی ئابونمێنتی گۆڵفی كردە 200 هەزار دۆلار" الشعبویە والفساد- روبی میلی ", بە هەموو  پێوەرێك رونە كە ئەوەی  ترامپ  دەیكات لە بڕی  دیموكراسی كلێپتۆكراسییە,  واتە دەسەڵاتی سیاسی بەكار دەهێنێت بۆ بەدەست هێنانی سەروەت و سامان. والتەر شوب بەڕێوەبەری بیرۆی رەوشتی حكومەتی ئەمەریكی لە 19ی تەموزی 2017 دەستی لەكار كێشایەوە وەك ناڕەزایەتیەك لە هەمبەر ترامپ كە بەرژەوەندی كەسی  و حكومەتی تێكەڵ  كردوو  پێشتر ئۆباماش سەرۆكی پێشوی ئەمەریكا جاین هارتلی كردە سەفیری وڵاتەكەی لە فەرەنسا وەك پاداشتێك كە خۆی و پیاوەكەی نیوملیۆن دۆلار كۆمەكیان بۆ هەڵمەتی هەڵبژاردنەكەی كۆكردبوەوە, هیچ ناڕونیەك نەماوە لەوەی  دەسەڵاتی سیاسی  نوێنەرایەتی تەواوی  كۆمپانیا گەورەكان دەكەن  لە ئەمەریكا, یاسای كەمكردنەەی باج لەو روانگەیەوەیە, كە ساڵ لە دوای ساڵ  هەڵبژاردن دوای هەڵبژاردن روو لە نشێو لە داكشاندایە, تا ترامپ لە 35% ەوە دایگرت بۆ 21%, ملیاردێرەكان دافوس  ترەمپیان لە هەنگاوە ئابووریەكانی خۆشە وێت , بەڵام گەمژەیی و راگوڕینی و سیاسەتی ئابووری نەتەوەیی ئەویان بە دڵ نییە. زانای سیاسەت مارتن جیلنز لە زانكۆی برینستۆن و  بنیامین بیجج لە زانكۆی نۆرس وینسترن پێیان وایە  دیموكراسیەتی ئەمەریكی لە پێناو 1%ی هەرە دەوڵەمەندەكانی كۆمەڵگا كاردەكات , لەبەر ئەوە دیموكراتی ئەمەریكی ئەوەی پەسەندە "عدم المساواە فی أمیركا-تاریخ النشر: الجمعە 16 دیسمبر 2016 -مات أوبراین: محرر الشۆون الاقتصادیە فی مدونە «وونكبلوج» ", واتا لە بری دیموكراسی بلۆتۆكراسییە. 22 پەرلەمانتاری پارتی كۆماری داوایان كرد  ئەمەریكا  لە پەیماننامەی پاریس ی ژینگە بكشێنەوە, كە  هەموویان بەخششیان بۆ هەڵمەتی هەڵبژاردن لە پیشەسازی نەوت و غازەوە وەرگرتبوو, بە تایبەتیش لە براكانی كوكشەوە, یاخود ناڕاستەوخۆ لە رێكخراوە سێبەرەكانیانەوە, لە هەڵبژاردنی  كۆنگرێسی ئەمەریكا 88%ی بەخششەكانی پیشەسازی نەوت و گاز بۆ كۆمارییەكان رۆیشت, پارتی  كۆماری بۆتە پارتی  وێرانكردنی  ژینگە, كۆمارییەكان 97%ی كۆمەكی پیشەسازی خەڵوزیان بۆ دەچێت , 88% ی پیشەسازی نەوت و گاز, كە نرخی نەوت  لە بازاڕەكانی جیهان دابەزی ترامپ هاوكار بوو بۆ رێكەوتنی ئۆپۆێك, چونكە پەیوەندی بە كارتێلەكانی نەوتەوە هەیە, بە تایبەتیش ئەوانەی تكساس كە ولایەتەكەیان  38  نوێنەری لە 538  نوێنەرەكەی هەڵبژێرەری سەرۆك كۆماردا هەیە. ترامپ گوایە بۆ دۆزینەوەی هەلی كار بۆ هاووڵاتیان پشتیوانی كەرتی نەوت دە, كە كەرتی بەرهەم هێنانی نەوت تەنها 150 هەزار كارمەندی هەیە, كە 0,1%ی كۆی هێزی كاری ئەمەریكایە,بەڵام هۆكار ئەوەیە ئەم كەرتە 88%یان وەك ئاماژەمان پێدا بەخشش و  پشتیوانی دارایی دەدەنە كۆمارییەكان, وە چاویشی لە كورسیەكانی تەكساس  و ناوچەی بەرهەم هێنانی نەوتی بەردینە. بەرامبەر بەو پشتیوانیانە لە پارتەكەی, ترامپ وایكرد كۆمپانیاكانی خەڵوز و نەوت و گاز بەرپرس بن لە دانانی سیاسەتی ژینگەی وڵات, كۆمپانیاكانی دەرمان كەرتی تەندروستی و دانانی نرخ لەسەر دەرمانەكان, و گروپی كۆمپانیاكانی چەك لە وەزارەتی بەرگری و , وە بانكە وەبەرهێنەكان باڵادەست بن لە وڵ  ستریت , وە كارتێلەكانی كشتوكاڵ هژمۆنیایان هەبێت  بەسەر زەوی كشتوكاڵییەكانی وڵاتەوە, واتا بەرخی سپارت بە گورگ. كۆمەڵەی نیشتمانی چەك, كە كۆمپانیاكانی چەكسازی و بازرگانانی چەك دایان مەزراندووە, تەموینی هەڵمەتی هەڵبژاردنی سەرۆكەكان و سیاسیەكان بە سەخاوەتەوە دەكات, لەوانە ترامپ,هەڕەشەیان لەوانە كرد, كە داوای قەدەغەكردنی  هەڵگرتنی چەك دەكەن, بەوەی لە هەڵبژاردنی داهاتوو تۆڵەی خۆیانیان لێ  دەكەنەوە, لە رێگای بەخشینی بەخشش بە نەیارەكانیان. لە ساڵی 1791 ەوە  بە پێی مادەی دووەمی دەستوری ئەمەریكی رێگای دراوە بە هەڵگرتنی ئازادانەی چەك, بەهۆی ئەوەی میلشیا چەكدارەكان رۆڵی گرنگیان گێڕا دژ بەریتانیا لە جەنگدا,كۆمپاتیاكانی چەكی ئەمەریكیش بەخششی زۆری سیاسییەكانی ئەمەریكا دەكەن بە تایبەت  كۆماریەكان, بۆ ئەوەی ئەو بەندە دەستكاری نەكرێت, وڵات هەر تیكساسەكەی فلیمە كابۆییەكان بێت .  لە ماوەی 6 ساڵی نێوان 1997 بۆ 2003 , رێكخراوەكانی پشتیوانی لە هەڵگرتنی چەك 6 جار زیاتری دژبەرانیان پارەیان خەرجكردووە, بۆ رێگا گرتن لە ئەگەری هەر گۆڕانكارییەك, بە تایبەت دوای هەر كارەساتێكی دڵ تەزێن ململانێكان توندترەوە دەبن, نیوەی چەكی تاكە كەسی جیهان لە ئەمەریكایە, دوانزە جار زیاتر لە رێژەی جیهانی, ساڵانە زیاتر لە 33000 كەسی سڤیل قوربانی چەك هەڵگرتنن لەم وڵاتە , بەڵام بەهۆی پارەوە ناتوانرێت  وڵات لەم كارەساتە دەرباز بكرێت, لە رێگای هەڵبژاردنەوە لغاوی گۆڕانكاری كراوە. ترەمپ لە بەر ئەوەی پشتیوانی كۆمپانیای ئەمازۆنە, بۆیە پشتگیری دارایی رزگاركردنی بیرۆی پۆستی ئەمەریكی ناكات كە خاوەندی 600هەزار كارمەندە . جیف بیزۆس خاوەنی ئەمازۆن دوای ئەوەی واشنتۆن پۆستی كڕی, ئێستا لە هەوڵی كڕینی  سی ئێن ئێن یشدایە, چونكە پێ  بە پێی سەركەوتنی سەرمایەكەی كە لە 200 ملیار دۆلار لە سەركەوتن و دابەزیندایە پێویستی بە كەناڵی راگەیاندیش  هەیە وەك پارێزەری سامانەكەی, كەواتە دەبێت لە داهاتوودا زیاتر ملكەچی خواستەكانی ببن. پارتی كۆماری پارتێكی ئاینی و یانەی گەورە دەوڵەمەندو ملیاردێرەكانە, بەهۆی كۆمەكی دەوڵەمەندەكانەوە لە كامپینی هەڵبژاردنی ترەمپ حكومەتی ترامپ  دەوڵەمەندترین كابینەیە لە مێژوودا, ترامپ رایگەیاند بۆ پۆستە ئابووریەكان كەسی دەوڵەمەندم دەوێت. تەنانەت دادگای باڵای ئەمەریكاش  كاندیدەكانی لە لایەن  كۆمەڵەی فیدراڵییەوە  هەڵدەسەنگێنرێن , ئەویش لە ژێر چاودێری  كۆمپانیاكاندایە, ئەمی كونی باریتی  زوو دانا , چونكە پەیوەندی بە هەڵبژاردن و ژینگەو بیمەی تەندروستییەوە هەیە, ئەوانیش  سەرێكیان هەیەو هەزار سەودا, وەك هەزار سەرە, هەر یەكەی بەرژەوەندیەكیان بە جۆرێك لە كارتلەكانەوە بەستراوەتەوە, ئەو لوغمەیان بۆ رێگا گرتن لە گۆڕانكاری چاند. دیموكراتەكانیش لە روی پشتیوانی ملیاردێرەكانەوە باخەڵ گەرمن, بە وتەی بێرنەر ساندەرز بایدن 44  ملیاردێر و بوتینجادج  39  ملیاردێر  پشتیوانیان لێیان  دەكرد , لە هەڵمەتی بەرایی هەڵبژاردن لەناو دیموكراتەكان, هاوكات 30 كاندیدی دەزگای هەواڵگری و 15 ملیۆنێر لە لیستی دیموكراتەكان هەیە بۆ  كۆنگرێس  و ئەنجومەنی پیران. بەو هۆیانەوەو كۆمەڵێكی دیش كە لێرە ئاماژەیان پێ دەدەین, 44%ی هاووڵاتیان پێیان وایە گەندەڵی لە كۆشی سپیدایە, 8% زیاتر لە ئەنجومەنی پیران, واتا 36%ی هاوڵاتیان پێیان  وایە ئەنجومەنی پیران گەندەڵەو بڕیارەكانی لە خزمەت ۆڵ ستریتە, ئەمەو بە پێی راپرسی دەزگای بێوی ئەمەریكی كە ساڵی 2015 ئەنجامدراوە 80%ی هاووڵاتیان متمانەیان بە حكومەتی فیدراڵی نییە,  هەر ئەمەشە  وا دەكات دەسەڵاتە سیاسییەكان لە 20 وڵاتە بەهێزەكەی جیهان بەرەو ناسەقامگیری بچێت. تێچووی هەڵبژاردنەكانی  ئەمەریكا جۆن كەنەدی   تەنها 72  هەزار دۆلاری لە بانگەشەی  هەڵبژاردنی سەرۆكایەتی خۆی لە  ساڵی 1960 خەرج كرد, كە بە نرخی ئێستا 575 هەزار دۆلاری دەكرد,كەچی  ركابەرەكەی هۆبرت هامفەری هاواری لێ هەڵستاو  وتی "ئەمە زۆرترین خەرجییە لە مێژووی هەڵبژاردنەكانی ئەمەریكا", بەڵام كەنەدی وەڵامی دایەوە كە هەڵمەتی هەڵبژاردنی ئێزینهاوەر لە ساڵی 1952دا بڕی 2,5 ملیۆن دۆلاری  خەرج كردووە, كە بە نرخی ئێستا دەیكردە 20 ملیۆن دۆلار. تێچووی هەڵبژاردنەكان ئەمەریكا   لە ساڵی 2004  تەنها 700 ملیۆن دۆلار بووە, لە ساڵی 2008  بووە ملیارێك دۆلار , لە ساڵی 2012  گەیشتە 2  ملیار دۆلار , لە 2016  گەیشتە 6,6  ملیار دۆلار بووە , بەڵام  بۆ ساڵی 2020  بەرز بۆتەوە  بۆ 14 ملیار دۆلار , 3  ملیار دۆلار زیاتر لە تێچووی  هەڵبژاردنەكانی هیندستان, هەڵبژاردنی هیندستان  لە دوای ئەمەریكا دووەم تێچووی هەیە لە جیهاندا, بەهۆی شەڕی كارتلەكان بۆ بەدەستهێنانی كورسی, تێچوی نزیك 5 ملیار دۆلار بوو, 3 جار زیاتر لە هەڵبژاردنی ساڵی 2009 ی هەمان وڵات, لێ  دوا هەڵبژاردنی ئەمەریكا لە ساڵی 2016 , 7 ملیاردۆلاری تێچوو كە تیایدا ترەمپ بوو بە سەرۆك كۆمار. تەنها كورسی سەرۆك كۆماری لە هەڵبژاردنی ساڵی 2016 ەدا, بڕی 2,4 ملیار دۆلاری تێچوو, هەڵبژاردنی  كۆنگرێس و سێیەكی ئەنجومەنی پیرانیش  4,2  ملیار دۆلار  تێچویان بووە  لە هەڵبژاردنی 2016 دا, بەڵام  لەم خولە نرخی بۆ 6,6 ملیار دۆلار بەرز بۆتەوە, دووەكەی تریش بۆ زیاتر لە 7 ملیار دۆلار, رێگای كۆشكی سپی لە جیاتی فەرشی سوور بە دۆلار راخراوە, تا مانگی پێشوو بایدن 938  ملیۆن دۆلار و  , ترامپیش  596 ملیۆن  دۆلار كۆمەكی سپیان كۆكردبوەوە, رەشەكانیش وەك لەناوەكەی دیارە سەرچاوەو بڕەكەی لە تاریكیدا ونە. تا ئێستاش لە كۆی  هەڵبژاردنەكانی  خولەكە, بە سەرۆك و جێگرەكانیان و  435 كورسی كۆنگرێس و  33ی ئەنجومەنی پیران دیموكراتەكان 5,5  ملیار دۆلار و  كۆمارییەكانیش  3,8 ملیار  دۆلاریان خەرج كردووە. تا 10ی مانگی سەپتەمبەر كۆی گشتی  5 ملیار دۆلار كۆمەك كۆكراوەتەوە , لە ساڵی 2002 تەنها 2 ملیار  بووە لە ساڵی   2014  بەرز بۆتەوە بۆ 3,67   ملیار  دۆلار . ساڵ لە دوای ساڵ  نرخی كورسییە زێڕینەكان زیاد دەكات, دەبێت بۆ خولی داهاتوو, نرخی ئەم كورسییە چۆن بچێت بە ئاسمانا؟. بەخشش و پارە تاریكەكان وەك لەسەرەوە ئاماژەمان پێدا, پەیوەندییەكی ئۆرگانی لە نێوان كورسی سەرۆك و  ئۆلیگارشیەكاندا هەیە, تەواو كەری یەكترن, دەوڵەت لە بەرژەوەندی ئەوان بە نانۆمیتەریش  دور ناكەوێتەوە. بەرامبەر بە بەخششەكانیان, پۆست, لێبوردن لە باج و گومرگ, گۆمرگ خستنە سەر كاڵای ركابەرەكانیان, یاساغكردنی  هاوردە كردنی كاڵای ركابەر, وەرگرتنی كۆنتراكت لەناو خۆو دەرەوە ... هتد, پاداشتیانە, ئەمە وایكردووە بوترێت  دیموكراسی ئەمەریكی مەزادخانەی ۆڵ ستریتە. بۆ كەمكردنەوەی رۆڵی دەوڵەمەندەكان لە دیاریكردنی سەرۆك, كە وەك بوكە شوشەی دەستی بەخششەكانی وایە , سەرۆكی ئەمەریكا تیۆدۆر رۆزفڵد لە ساڵی 1907 داوای كرد بودجە بۆ هەڵبژاردنەكان لە لایەن حكومەتەوە  دیاری بكرێت  تا كۆتایی بەم  پارە زۆر كۆكردنەوەیە بهێنریت, هاوكات رۆزفۆڵت داوای كرد بەخششی كۆمپانیاكان قەدەغە بكرێت"الانتخابات وترشید التمویل-تاریخ النشر: الپلاپا‌و 31 مارس 2015".  ئەمەریكا نەك دوای 113 ساڵ ویستی رۆزفێڵدی جێبەجێ نەكرد, بگرە دادگای باڵای ئەمەریكی لە ساڵی 2010  بڕیاری هاووڵاتیان یەكگرتووین یدا, كە لانی زۆری بەخششی هەڵگرت و بێسنوری كرد لە بەردەم ملیاردێرەكان بۆ ئەوەی ئازادانە دەستبخەنە ناو هەڵبژاردنەكان, ئەمەش لە خزمەت دوبراكەی كۆكش بوو"  david-h-koch, charles-d-koch",كە  400 ملیۆن دۆلاریان بەخشش دا بۆ ئەوەی ئۆباما دەرنەچێتەوە لە ساڵی 2012, برایانی كۆكش بڕیاریان داوە بۆ هەڵبژاردنی داهاتوو 1 ملیار دۆلار خەرج بكەن . هەرچەندە  یەكێك  لە خواستەكانی  باڵی پێشكەوتنخوازو لیبراڵی ناو دیموكراتەكان  شۆرشی سیاسییە  لە وڵات, یەكێك لە خاڵە زەق لە پێشینەكانی  ئەم شۆڕشە هەڵبژاردن و پارەی هەڵبژاردنەكان و سەرچاوەی  داهاتی پرۆسەی بانگەشەی هەڵبژاردنە, وەلێ پێی ناچێت لەبەرامبەر كارتلەكانی پارە سەركەوتوو بن, لە كاتێكدا خودی دیموكراتەكانیش  سودمەنێكی پرۆسەكەن. كە هەڵبژاردن  دێتە پێشەوە ,كۆمپانیاكانی راگەیاندن و ریكلام جەژنیانە , كەناڵە ناخۆییەكان زۆرترین پارە دەبەنەوە, نزیك 47% پارەی بانگەشەی هەڵبژاردنیان بەردەكەوێت , 16,5%یش  بۆ ریكلامی هەمان ئەو كەناڵانەیە, 21%یش بۆ تۆڕی كۆمەڵایەتی,  12%بۆ كەناڵی سەرانسەری كابڵەكان , 5%یش بۆ رادیۆكان دەڕوات, ئەم پارانە 40%یان خەڵكانی نەناسراو و بێ تارمایی دەیدەن, سەرچاوەیان دیار نییە. یاسای ئەمەریكی یاساغی كردووە كاندیدانی پلە گشتیەكان كۆمەك لە لایەن و كەسی بیانی وەربگرن, بێگانەكە تەنانەت دانیشتووی ئەمەریكاش بێت و مافی مانەوەیان هەبێت,   ئەوانەی  ناسنامەی ئەمەریكایان نییە ناتوانن بەخشش بكەن بۆ هەڵمەتی هەڵبژاردنی سەرتاسەری و هەرێمی, 9 دادوەری باڵای  وڵات مافی بەخششی بۆ دو كرێكاری بێگانە كەمافی مانەوەی كاتیان هەبوو رەتكردەوە. كەچی بە پێی OpenSecrets.org  لە ساڵی  2016  دا 178 ملیۆن دۆلار پارەی بیانی هاتۆتە ناو هەڵمەتی هەڵبژاردنەوە , وەك ئەوەی زانرا بێت , كەچی  ئەمەریكا ئەم یاسایەی  دەركردووە, خۆی یەكەم وڵاتە  كۆمەكی  نۆكەرانی  دەكات لە جیهاندا,  ئەمەریكاو یەكێتی سۆڤیەت و روسیای ئێستا  گلاونەتە 117  هەڵبژاردنی وڵاتانەوە, 69%ی  ئەمەریكا ئەنجامی داون, هەڵبژاردنی ئیتاڵیا لە ساڵی 1948, یەكەم چالاكی سیای ئەمەریكا بوو لەو بوارەدا, ملیۆنان دۆلاری خەرجكرد بۆ ئەوەی شیوعیەكان نەگەنە دەسەڵات كە حیزبی یەكەمی وڵات بوون, لە ساڵی 2005 جۆرج بۆش لە یەكەم هەڵبژاردنی پەرلەمانی  عێراق و دواتریش ئۆباما لە هەڵبژاردنەكانی دواتری عێراق ویستیان هەبوو, دەست لە هەڵبژاردنەكان وەردەن, گوایە دواتر ئەنجامیان نەداوە, دوارۆژ  دەردەكەوێت. هەرچەندە لە 22 ولایەتی ئەمەریكا یاساغ  كراوە كۆمپانیاكان بەشداری لە بەخششی هەڵبژاردنەكان بكەن, وە  لە 39ولایەتی ئەمەریكا ئاستێك دیاریكراوە بۆ پیتاكی تاك, بەڵام قازانجی پشكیان بۆ دەچێت لە لایەن كۆمپانیاكانەوە بێ ئەوەی خاوەن پشكیش بن, سنوریشی دیارینەكراوە, وەك فێڵێك"  أپریا‌و المشهد السیاسی اڵامیركی- تشیسون لی ودانییل وینر", ئەمە وێڕای ئەوەی  كاتێك خاوەند كۆمپانیاكان  دێنە ناو هەڵمەتەكەوە, لەبەر ئەوەی لانی زۆری خەرجی  دیارینەكراوە, بە كەیفی خۆیان ترۆمپای پارەكانیان دەڕێژنە ناو هەڵمەتەكەوە, لە هەڵمەتی هەڵبژاردنی ناوخۆیی دیموكراتەكان مایكل بلۆمبێرگ لەماوەی سێ مانگدا ملیارێك و تۆم ستێر 270 ملیۆن دۆلاریان خەرج كرد, هەرچەندیشە زوو  دۆڕان لە كاندیكردنیان بۆ پۆستی سەرەك كۆماری لەسەر پارتی دیموكرات. لە 5 ساڵی رابردوو  لیژنەی  سۆپەر باكس  5  ملیار دۆلاری كۆكردۆتەوە, بەشێكی سەرچاوەكەی دیار نییە, پارەی تاریكییە "  أپریا‌و المشهد السیاسی اڵامیركی- تشیسون لی ودانییل وینر" , بەشێك  لەو پارانە لە بانگەشەی هەڵبژاردن بەكار دەهێنرێن, پارەی نهێنی و پارەی رەشن , تەنانەت  داوای سەرچاوەی پارەی بەخششەكان لە رێكخراوەكانی كۆمەڵگای  مەدەنی ناكرێت , سەیر كەن تەنها رێكخراوی  "  Center for Responsive Politics "  لە نێوان نۆڤەمبەری 2011  بۆ دیسەمبەری 2014  بڕی 323,936,500 دۆلاری  رەشیان خستۆتە ناو هەڵمەتی هەڵبژاردنەوە, كە سەرچاوەكەی بێ دایك و باوك بووە, تەنها لەم هەڵبژاردنە  215  ملیۆن دۆلاری  رەش  تا چەند مانگێك لەمەوپیًش ئەوەی زانراوە  خراوەتە ناو هەڵمەتی هەڵبژاردنەوە, پارەی  رەشی بێ  دایك و باوك هەموو ئەگەرەكانی لە بەردەمدایە, لە پارەی رەش , پارەی  ۆڵ ستریت, پارەی بیانی . نەك تەنها دەرەوەی نوێنەری دوو پارتەكە, ئەستەمە بگەنە ئەم 537  كورسییە كە شەڕی لەسەرە, بگرە ژنانی ناو دوو پارتەكەش, رێژەیان زۆر لە خوارە, زۆر كەمتر لە وڵاتانی ئەفریقاو  ئەمەریكای لاتین و تەنانەت عێراق و كوردستانیش , ژنانی ئەمەریكا  19,3203%  كۆنگرێس , 103 كەس وە  ئەنجومەنی پیرانیش 23 %پێ دەهێنن, بەهۆی ئەوەی كێشەی كۆمەك و پیتاكیان هەیە, بەخششەرەكان كەمتر پیتاكیان پێ دەدەن. بەم شێوەیە بەشداری لە هەڵبژاردنی ئەمەریكا, بە گیرفانی بەتاڵەوەو لە دەرەوەی كەرو فیلەكە, وەك خۆ هەڵدانە لە كێوێكی هەزار بە هەزارەوە بۆ قوڵایی.

وەرگێڕانی: فازل حەمەڕەفعەت  دێسەمبەری 2016 رۆژنامەی "نیویۆرك تایمز" هێرشێكی توندی كردەسەر گروپەكانی هەڵبژاردن لە ئەمریكا، ئەم گروپەی بە دەزگایەك ناوبرد كە سەردەمی بەسەرچووە‌و بۆچونی زۆرینەی ئەمریكییەكان پشتگوێ دەخات. ئەم هێرشە هاوكات بوو لەگەڵ كۆبونەوەی ئەندامانی گروپی هەڵبژاردن دوای مانگێك لە بەڕێوەچوونی هەڵبژاردنی سەرۆكایەتی، كە تێیدا دۆناڵد ترەمپی كاندیدی كۆمارییەكان بەسەر هێلاری كلینتۆنی كاندیدی دیموكراتەكاندا سەركەوت.   لەم هەڵبژاردنەدا، لە دەنگدانی گشتیدا هێلاری بەجیاوازی نزیكەی (3 ملیۆن) دەنگ بەسەر ترەمپدا سەركەوت، بەڵام ترەمپ بە دەنگی نوێنەرەكانی هەڵبژاردن بە جیاوازی (304) دەنگ بەبەرامبەر بە (227) دەنگ بوو بە سەرۆكی ویلایەتە یەكگرتووەكانی ئەمریكا.  ئەو بنەمایەی كە لەسەر ئاستی جیهان هەڵبژاردنی پێدەناسرێتەوە ئەوەیە كێ زۆرترین دەنگی بەدەستهێنا دەسەڵات دەگرێتەدەست، بەڵام لە ئەمریكا بەوشێوەیە نییە، سیستمی هەڵبژاردنی سەرۆك لە ئەمریكا لەسەر بنەمای "گروپەكانی هەڵبژاردن"ە، لە دەستوری ئەمریكادا شتێك بوونی نییە بەناوی ئەوەی گەل سەرۆك هەڵبژێرێت، مافی هەڵبژاردن تەنیا بۆ گروپەكانی هەڵبژاردنە.  ئەمەیە وایكردووە زۆرێك سیستمی هەڵبژاردنەكان لە ئەمریكا بە سیستمێكی ستەمكارانە ناودەبەن، لەبەرامبەریشدا خەڵكانێك ئەم سیستمە بە سیستمێكی سەركەوتوو وێنا دەكەن.  گروپی هەڵبژاردن چییە ؟  لە (48) ویلایەتی ئەمریكا پرۆسەی هەڵبژاردن پشت بەو بنەمایە دەبەستێت كە دەڵێ "براوە هەموو دەنگەكان دەبات"، بەواتای ئەوەی هەر كاندیدێك زۆترین دەنگی ولایەتەكە ببات، هەموو ئەو دەنگدانەی پێدەدرێت كە بۆ گروپەكانی هەڵبژاردن لە ویلایەتەكە دانراوە، بەدەنگی كاندیدە دۆڕاوەكەشەوە.  هەردوو ویلایەتی نبراسكا (4 كورسی)‌و ماین (5 كورسی) جیاكارییان بۆ كراوە، لەم دوو ویلایەتە هەردوو كاندیدەكە تەواوی دەنگەكانی خۆیان دەبەن.  هەر ویلایەتێك بەگوێرەی ژمارەی دانیشتوانەكەی، ژمارەیەكی دیاریكراوی دەنگی هەیە لەناو گروپەكانی هەڵبژاردندا، تێكڕای دەنگی گروپەكانی هەڵبژاردن لە ئەمریكا (538) دەنگە، بۆیە براوەی هەڵبژاردنی سەرۆكایەتی لە ئەمریكا ئەو كەسەیە (270) دەنگ یان زیاتر لەناو ئەم گروپەدا كۆدەكاتەوە.  لە مێژووی ئەمریكادا (5) سەرۆك هەن كە هەڵبژاردنی گشتییان دۆڕاندووە، بەڵام بە دەنگی گروپەكانی هەڵبژاردن بوون بە سەرۆكی وڵات، لەوانە جۆن كوینسی ئادامز لە ساڵی 1824.  لە هەڵبژاردنی سەرۆكایەتی ساڵی 2000دا كە جۆرج دەبلیو بوش كاندیدی كۆمارییەكان ركابەرێتی لەگەڵ ئال گۆر كاندیدی دیموكراتەكان دەكرد، هەمان سیناریۆ دووبارە بووەوە، لەم هەڵبژاردنەكەدا ئال گۆر لەسەر ئاستی دەنگدانی گشتی (500 هەزار) دەنگ زیاتری لە بوش بەدەستهێنا، بەڵام بوش (271) دەنگی لە گروپەكانی هەڵبژاردن بەدەستهێنا‌و بوو بە سەرۆكی وڵات.  رەخنەكان  رەخنەگران وای دەبینن ئەم سیستمەی هەڵبژاردن نەك ئەوەی ملیۆنان دەنگ بەهەدەر دەبات، بەڵكو دەنگی ملیۆنان كەس لە هاوڵاتیانی ئەمریكا دەبات بۆ كاندیدێك كە ئەوان دەنگیان بۆ نەداوە‌و كەسێك كورسی ویلایەتەكەیان دەبات كە ئەوان پاڵپشتییان لێ نەكردووە.  بەدرێژایی مێژووش هەردوو پارتەكەی ئەمریكا (كۆماری‌و دیموكراتەكان) بنكەی جەماوەرییان لە ویلایەتەكان بۆ خۆیان دروستكردووە‌و ویلایەتەكانیان لەنێوان خۆیاندا یەكلاكردوەتەوە، بۆ نمونە (كالیفۆرنیا) ویلایەتێكە كە بۆ دیموكراتەكان یەكلابوەتەوە، بەڵام ویلایەتی (یوتا) بۆ كۆمارییەكان یەكلابوەتەوە، بۆیە ئەو ویلایەتانە كاندیدی هەڵبژاردنی سەرۆكایەتی بەلادا دەخەن كە هێشتا خۆیان یەكلانەكردوەتەوە بۆ هیچ یەكێك لە پارتەكان، ئەم ویلایەتانەش ژمارەیان كەمە‌و جارێك بەلای كۆمارییەكان‌و جارێكی تر بەلای دیموكراتەكاندا دەشكێنەوە. ئەمە بەواتای ئەوەدێت ملیۆنان دەنگ لەو ویلایەتانەی كە بۆ یەكێك لە دوو پارتەكە یەكلابوەتەوە، بەهەدەر دەچێت. رەخنەگران دەڵێن كاندیدی "س" رەنگە ویلایەتێك بە جیاوازی 30 بۆ 10%ی دەنگەكان ببات، بەڵام هەمان ژمارەی كورسی لە گروپی هەڵبژاردن دەبات، ئەمەش بەبڕوای ئەوان شورەییەكی گەورەیە لە سیستمی هەڵبژاردندا، خۆ ئەگەر ئەو كاندیدە بە جیاوازی 1% ویلایەتێكی تر لەوانەی كە یەكلانەبووەتەوە ببات، بۆ نمونە فلۆریدا كە خاوەنی (29) كورسییە لە سیستمی هەڵبژاردندا، ئەمە ئەنجامی هەڵبژاردن هەڵدەگێڕێتەوە.  دیموكراتیەكەی ئەمریكا دادپەروەرانە نییە ! جیسی ویجمان رۆژنامەنوس لە رۆژنامەی "نیویۆرك تایمز" كە خاوەنی كتێبێكە بەناوی "رێگە بدە خەڵك سەرۆك هەڵبژێرن" دەڵێ:" دیموكراتیەتی ئەمریكا دادپەروەرانە نییە".  باسلەوە دەكات:" پێنج جار لە مێژووی ئێمەدا، ئەو كاندیدانەی سەرۆكایەتی كە بە دەنگدانی زیاتر لە ركابەرەكەیان بردوەتەوە، هەڵبژاردنیان دۆڕاندووە، ئەمە بۆچی ؟ هۆكارەكەی سیستمەی هەڵبژاردنەكەمانە كە تەمەنی 230 ساڵە". رەخنەگران وای دەبینن، سیستمی هەڵبژاردن  كە "دامەزرێنەرانی ئەمریكا"وە، واتا ئەوانەی كە بناغەی دەوڵەتی ئەمریكایان داناوە، لەدواین ساتەكاندا دەستوردا بڕیاری لەسەردراوە، ئەوكات باوەڕیانوابووە ئەمە باشترین شێوازە بۆ هەڵبژاردنی سەرۆكی وڵات، ئەمەش لەبەر هەندێك هۆكار كە ئەو هۆكارانە ئێستا بونیان نییە.  بەڵام، لەبەرامبەردا خەڵكانێك هەن كە بەرگری لە سیستمی هەڵبژاردنی ئەمریكا دەكەن، بەهانەشیان ئەوەیە، زۆرینەی هەرە زۆری سەرۆكەكانی ئەمریكا دوای تەوافوقی دەنگدانی گشتی‌و دەنگدانی گروپەكانی هەڵبژاردن گەیشتونەتە سەر كورسی حوكم.  لایەنە ئەرێنییەكان لایەنگرانی سیستمی هەڵبژاردنی ئەمریكا دەڵێن ئەم سیستمە هاوسەنگی دروستدەكات لەنێوان ئیرادەی جەماوەرو مەترسی ئەوەی ناوی لێنراوە "ستەمی زۆرینە"، بەتایبەتیش كاتێك كە دەنگی جەماوەر رەنگە ببێتە هۆی لەناوبردنی دەنگی كەمینەكان‌و هەڕەشە لەسەریان.  هەروەك گروپەكانی هەڵبژاردن زامنی بەشداری هەموان دەكەن لەسەر ئاستی وڵات لە هەڵبژاردنی سەرۆكدا، ئەمە بەواتای ئەوە دێت ئەو كەسەی هەڵبژاردن دەباتەوە دواجار خزمەت بە هەموو وڵات دەكات، بەڵام دەنگدانی راستەوخۆ وا لە كاندیدەكان دەكات هەڵمەتی بانگەشەی هەڵبژاردنی خۆیان كورت بكەنەوە لە ناوچە قەرەباڵغەكاندا‌و گوندنشین‌و ناوچە دورەدەستەكان پشتگوێ بخەن.  ئالین جیلزو بەڕێوەبەری سەنتەری توێژینەوەكانی سەردەمی جەنگی ناوخۆیی لە كۆلیژی جیتیسبێرگ دەڵێ ئەم سیستمە هانی ساختەكاری نادات، چونكە پارتەكان ئەگەر ساختەكارییان كرد، ئەنجامی گەورە بەدەستناهێنن. جیلزو لەوەڵامی ئەوانەدا كە دەڵێن گروپەكانی هەڵبژاردن سیستمێكی پڕ گرێ‌و گۆڵە، باسلەوە دەكات، لە دەستوری ئەمریكادا نەهاتووە حكومەت بەشێوەیەكی سادەو ساكار هەڵبژێردرێت.  جەخت لەسەر ئەوە دەكات سیستمی هەڵبژاردنی ئەمریكا نە سیستمێكی بێكەڵكە‌و نە سیستمێكی كۆن، ئەم سیستمە دانراوە بۆ روبەڕووبونەوەی خراپترین پاڵنەری مرۆیی‌و پارێزگاریكردن لە نەتەوە لە مەترسییە شاراوەكانی ناو پرۆسەی دیموكراتی.  سەرچاوە: سكای نیوز  

(درەو): دامەزراوەی "EMHRF" كە دامەزراوەكی سەربەخۆیە‌و لەلایەن كۆمەڵێك بەرگریكاری مافەكانی مرۆڤەوە بەڕێوەدەبرێت، راپۆرتێكی لەبارەی دۆخی ئازادییە گشتییەكان لە هەرێمی كوردستان بڵاوكردەوە. راپۆرتەكە لەژێر ناوی " كوردستانی عێراق.. هەڵكشانی قەیران‌و مافە درزاوەكان" بڵاوكراوەتەوە، تێیدا باسی قەیرانی دارایی حكومەتی هەرێم‌و كاریگەری بڵاوبونەوەی ڤایرۆسی كۆرۆنا دەكات لە هەرێمی كوردستان. راپۆرتەكە نوسیویەتی:" سەروەت‌و سامانی كوردستان لەدەستی ژمارەیەكی دیاریكراو لە بەرپرسان كۆبوەتەوە‌و رێژەی هەژایی تادێت زیاتر دەبێت، لەپاڵ ئەمەدا رێژەی خۆكوشتن زیادی كردووە‌و تادێت ژمارەیەكی زیاتر لە خەڵك بەرەو ئەوروپا كۆچ دەكەن". لەبەشێكی تری راپۆرتەكەدا باسلەوەكراوە، دوای دابەزینی نرخی نەوت، پلانی حكومەت بۆ كەمكردنەوەی خەرجییە گشتییەكان قەیرانەكەی قوڵتر كردوەتەوە‌و دابەشكردنی موچەی فەرمانبەران بۆ ماوەیەكی زۆر دوادەكەوێت، ئەم دواكەوتنە كاریگەری لەسەر بژێوەی فەرمانبەران دروستكردووە". راپۆرتەكە دەڵێ:" هێزە ئەمنییەكانی هەرێمی كوردستان بەشێوەیەكی هەڕەمەكی چالاكوانان‌و خۆپیشاندەران دەستگیردەكەن"، لیستی ناوی ئەو كەسانەی بڵاوكردوەتەوە كە دەستگیركراون. دوای دیكۆمێنتكردنی چیرۆكی ئەو چالاكوانان‌و رۆژنامەنوسانەی كە بەمدواییە لە هەرێمی كوردستان دەستبەسەركراون‌و روبەڕووی زیندانیكردن بونەتەوە، رێكخراوەكە داوا لە حكومەتی هەرێم دەكات: •    دەسەڵاتدارانی هەرێمی كوردستان بەشێوەیەكی خێرا دەستگیركردنی چالاكوانان‌و رۆژنامەنوسان رابگرن.  •    ناكرێت دەسەڵاتدارانی هەرێم لەسەر بنەمای یاساكانی تر رۆژنامەنوسان دادگایی بكەن‌و دەبێت لەسەر بنەمای ئازادی كاری رۆژنامەنوسی دادگایی بكرێن.  •    دەسەڵاتدارانی هەرێم رێوشوێنی توند لەبەرامبەر ئەو كەسانە بگرنەبەر كە دەیانەوێت چالاكوانان‌و رۆژنامەنوسان‌و رێكخەرانی خۆپیشاندانەكان بتۆقێنن.  •    دەسەڵاتداران دەستهەڵگرن لە داخستنی میدیاكان‌و دەستگیركردنی تیمە رۆژنامەوانییەكان بەبێ هیچ بنەمایەكی یاسایی. •    دەبێت دەسەڵاتدارانی هەرێم دۆخی زیندان‌و دەستگیركراوان باش بكەن كە جۆرێك پێداویستی تەندروستی لەم دۆخی كۆرۆنایەدا لەخۆبگرێت.  •    دەبێت دەسەڵاتداران دەستهەڵگرن لە دەستگیركردنی هاوڵاتیانی مەدەنی بەبێ بوونی هیچ تۆمەتێك لەسەریان.  •    پێویستە كۆمەڵگەی نێودەوڵەتی بەشێوەیەكی خێرا دەستوەردان بكات بۆ راگرتنی پێشێلكارییەكان لە هەرێمی كوردستان.  •    دەبێت دەسەڵاتدارانی هەرێم وەڵامی داواكاری هاوڵاتیان بدەنەوە بە پلانێكی كردەیی كە ئامانج لێی باشكردنی دۆخی ئایبوری‌و روبەڕووبونەوەی گەندەڵی بێت لەسەرجەم دامەزراوەكاندا.  دەقی راپۆرتەكە  https://euromedmonitor.org/uploads/reports/kurdistanrepen.pdf  

راپۆرت: محەمەد رەئوف- فازل حەمەڕەفعەت مەسعود بارزانی كە بەر لە سێ ساڵ سەرۆكایەتی هەوڵی دروستكردنی دەوڵەتی سەربەخۆی كوردستانی دەكرد، ئەم رۆژانە لەنامەیەكدا بۆ یەكێتی داوای گەڕانەوە بۆ قۆناغی دووئیدارەیی دەكات، بەڵام بەمەرجێك پەرلەمان‌و حكومەتی هەرێم وەكو خۆیان بمێننەوە‌و زیان بە قەوارەی دەستوریی هەرێمی كوردستان نەگات، (درەو) لەم راپۆرتەدا ناوەڕۆكی نامەیەكی نوێی بارزانی بۆ یەكێتی ئاشكرا دەكات. نامەكەی بارزانی   مەسعود بارزانی سەرۆكی پارتی دیموكراتی كوردستان لەدوو توێی نامەیەكدا، بەفەرمی پرۆژەی زیندوكردنەوەی دووئیدارەیی لە هەرێمی كوردستان بۆ یەكێتی پێشنیاز كردووە. بەپێی زانیارییەكانی (درەو)، لە چەند رۆژی رابردوودا، بارزانی نامەیەكی بۆ یەكێتی نیشتمانی كوردستان ناردووە، نامەكە لە (8) خاڵ پێكدێت، پوختەكەی ئەمەیە: •    پارتی‌و یەكێتی لەڕووی بەڕێوەبردنی هەرێمی كوردستانەوە بگەڕێنەوە بۆسەردەمی قۆناغی دوو ئیدارەیی واتا بەر لە یەكخستنی حكومەت لە ساڵی 2005. •    بەڵام حكومەت‌و پەرلەمان‌و سەرۆكایەتی هەرێمی كوردستان وەكو خۆیان بەبێ دەستكاریكردن بمێننەوە لەپێناو پاراستنی قەوارەی دەستوریی هەرێمی كوردستان. •    یەكێتی ئیدارەی ناوچەی ژێردەسەڵاتی خۆی بدات، پارتیش ناوچەی خۆی. •    داهاتی ناوخۆ (گومرگ‌و باج‌و داهاتەكانی تر)ی سنوری یەكێتی بۆ یەكێتی‌و سنوری پارتیش بۆ پارتی بێت‌و هەریەكەیان ئەو داهاتانە بۆ ئیدارەدانی سنوری ناوچەكەی خۆیان بەكاربهێنن. •    داهاتی نەوت‌و پشكی كورد لە بودجەی عێراق هاوشێوەی قۆناغی پێش یەكخستنی حكومەت، رێژەی 43%ی بۆ ناوچەی سەوز‌و رێژەی 57%ی بۆ ناوچەی زەردو هەریەكەیان بەو داهاتانە موچە‌و خەرجی ناوچەی خۆیان دابین بكەن. نامەكەی بارزانی بۆ ؟ بەگوێرەی ئەو زانیارییانەی كە لە چەند سەرچاوەیەكی ئاگادارەوە دەست (درەو) كەوتوون، نامەكەی بارزانی بۆ یەكێتی دوای ئەو گرژیانە هاتووە كە بەمدواییە لەنێوان پارتی‌و یەكێتی سەریهەڵداوە‌و بارزانی پێیوایە چیتر ناتوانن بەوشێوەیە لەگەڵ یەكێتی درێژە بە كاركردن بدەن، بەتایبەتیش لەبارەی ئەوەی تیمی یەكێتی‌و پارتی لە حكومەت كۆك نین‌و بەمدواییە لەبارەی رووداوەكانی 16ی ئۆكتۆبەرەوە تیمی یەكێتی بەفەرمی‌و لە بەیاننامەدا وەڵامی مەسرور بارزانییان داوەتەوە، هەروەها یەكێتی لەبارەی پرسی پەكەكە لە هەرێمی كوردستان لەگەڵ پارتی كۆك نییە بەتایبەتیش لە دۆخێكدا كە پارتی لەسەروبەندی شەڕو روبەڕووبونەوەدایە لەگەڵ پەكەكە. هەندێك سەرچاوەی تر باسلەوەدەكەن، سەركردەكانی یەكێتی لەگەڵ حكومەتی بەغداد گفتوگۆیان كردووە‌و تاكلایەنە‌و بەبێ پارتی بەڵینیان بە عێراق داوە دەروازە سنورییەكانی ناوچەی ئیدارەی خۆیان بخەنەژێر چاودێری حكومەتی عێراقەوە، ئەمەش بارزانی توڕەو نیگەران كردووە. بەگشتی بەپێی قسەی سەرچاوە ئاگادارەكان، بەر لەم نامەیەی بارزانی، مەكتەبی سیاسی یەكێتی بەنیاز بووە، نامەیەك ئاڕاستەی پارتی بكات ‌و تێیدا سەقفێكی زەمەنی دیاری بكات بۆ جێبەجێكردنی داواكارییەكان لەناو حكومەت، بەدیاریكراویش پرسی "شەراكەتی راستەقینە" لە بڕیاردا كە یەكێتی زۆر قسەی لەبارەوە دەكات. ئەوەی تائێستا زانراوە ئەوەیە، بارزانی بەناردنی ئەو نامەیە بۆ یەكێتی، پێشوەختە كارتە فشارەكەی دەستی یەكێتی سوتاندووە، تائەو رادەیەی ئەوسەری بابەتەكەی لە یەكێتی گرتووە‌و یەكێتی خستوەتە بەردەم بژاردەیەكی قورسەوە كە ناچار بە پاشەكشێیان بكات لە راكێشانی هەرجۆرە كارتێكی فشاری تر بەرامبەر بە پارتی‌و حكومەتەكەی مەسرور بارزانی كوڕی. یەكێتی رازی نییە ! بەپێی زانیارییەكانی (درەو)، یەكێتی قایل نییە بە پرۆژە نامەكەی مەسعود بارزانی‌و پێیوایە ئەو پرۆژەیە بۆ زیندوكردنەوەی دووئیدارییە لە هەرێمی كوردستان نەك ئەو لامەركەزیەتە ئیداریی‌و داراییەی كە یەكێتی بۆ ناوچەی ژێردەسەڵاتی خۆی داوای دەكات. سەرچاوەیەكی باڵا لە پارتی بە (درەو)ی راگەیاند، نامەكەی بارزانی بۆ یەكێتی رایگشتی پارتی لەسەر نییە‌و زیاتر گوزارشت لە خواستی مەسرور بارزانی سەرۆكی حكومەت دەكات‌و نێچیرڤان بارزانی‌و لایەنگرەكانی لە مەكتەبی سیاسی پارتی پرۆژەكەیان پێ باش نییە‌و پێیانوایە زیندوكردنەوەی دووئیدارەیی لە هەرێمی كوردستان "هەڵەیەكی ستراتیژی گەورەیە"، لەناو یەكێتیش بەشێك لە مەكتەب سیاسییە كۆنەكانی حزب‌و گروپی سەركردە هەولێرییەكان دژی دروستكردنەوەی دووئیدارەین. هەندێك لە بەرپرسانی یەكێتی لەبارەی كرۆكی نامەكەی بارزانییەوە باسلەوە دەكەن، ئەوەی لەنامەكەدا هاتووە دروستكردنەوەی دووئیدارەییە، ئەگەر ئەو كارە بكرێت، ئیتر هیچ ماناو وەزیفەیەك بۆ حكومەت‌و پەرلەمانی كوردستان نامێنێت. ئەگەر دووئیدارەیی دورست ببێتەوە ؟ ئەگەر پرۆژەكەی بارزانی بخرێتە بواری جێبەجێكردن‌و دووئیدارەیی دروستبكرێتەوە بەو واتایەی پارتی ئیدارەی ناوچەی خۆی بدات‌و یەكێتیش ناوچەی خۆی، ئەوكات داهات‌و خەرجی ناوچەی یەكێتی بەمشێوەیە دەبێت: بەگوێرەی زانیارییە نافەرمییەكان، خەرجی سنوری ئیدارەی یەكێتی مانگانە (350 ملیۆن) دۆلارە، ئەم بڕە پارەیە مانگانە بەتەنیا (315 ملیۆن) دۆلاری بۆ موچەی موچەخۆران سنورەكە دەڕوات. ئایا یەكێتی ئەگەر پرۆژەكەی مەسعود بارزانی قبوڵ بكات، دەتوانێت بەو داهاتانەی كە لەنامەكەی بارزانیدا بۆی دیاریكراوە، ئیدارەی دارایی سنوری خۆی بدات ؟ ئەگەر داهاتی نەوتی كوردستان‌و بەشەبودجەی بەغدادو یارمەتی دارایی هاوپەیمانان بەشێوەی 43% بۆ یەكێتی‌و 57% بۆ پارتی دابەش بكرێت، داهاتی مانگانەی یەكێتی لەم هاوكێشەیەدا بەمشێوەیە دەبێت: •    ئێستا لەچوارچێوەی رێككەوتنێكدا، مانگانە حكومەتی هەرێم وەكو موچەی فەرمانبەران (320 ملیار) دینار لە حكومەتی عێراق وەردەگرێت، ئەگەر ئەم پارەیە بەپێی كرۆكی نامەكەی بارزانی بەرێژەی 43% بۆ یەكێتی‌و 57% بۆ پارتی دابەشبكرێت، پشكی مانگانەی یەكێتی لە پارەكە (138 ملیار) دینار دەبێت‌و پشكی پارتیش (182 ملیار) دینار دەبێت. •    ئێستاو دوای داڕمانی نرخی نەوت لە بازاڕی جیهانیدا، داهاتی مانگانەی نەوتی هەرێم (270 ملیار) دینارە (ئەمە ئەو داهاتەی نەوتە كە بۆ موچە تەرخانكراوە)، ئەگەر بەپێی كرۆكی نامەكەی بارزانی ئەم داهاتە لەنێوان پارتی‌و یەكێتی دابەش بكرێت، مانگانە یەكێتی (116 ملیار) دیناری دەبات‌و پارتیش (154 ملیار) دینار. •    هاوپەیمانی نێودەڵەتی بە سەرۆكایەتی ئەمریكا مانگانە وەكو كۆمەكی وەزارەتی پێشمەرگە بڕی (21 ملیار) دینار بە حكومەتی هەرێم دەدات، ئەگەر ئەم پارەیەش دابەش بكرێت، یەكێتی مانگانە (9 ملیار) دیناری دەبات‌و پارتیش (11 ملیار) دیناری دەبات. واتا تێكڕای داهاتی یەكێتی بۆ بەڕێوەبردنی سنوری خۆی لە نەوتی هەرێم‌و بەشە بودجەی بەغداد‌و پارەكەی هاوپەیمانان دەبێت بە (263 ملیار) دینار، ئەمە لەپاڵ (80 ملیار) دیناری مانگانەی داهاتی ناوخۆی سنورەكەدا، تێكڕای داهاتی مانگانەی یەكێتی دەگەیەنێتە (343 ملیار) دینار. تەنیا خەرجی موچەی موچەخۆرانی سنوری ئیدارەی یەكێتی مانگانە (315 ملیۆن) دۆلارە كە دەكاتە نزیكەی (380 ملیار) دینار، واتا بەو داهاتانەی كە بارزانی پێشنیازی كردووە، هێشتا یەكێتی مانگانە تەنیا بۆ موچەی موچەخۆرانی سنورەكەی نزیكەی (40 ملیار) دینار كورتهێنانی دەبێت، ئەمە جگە لەوەی پارەی پێویستی بۆ خەرجی تەشغیلی‌و پرۆژەكان  لەبەردەستدا نابێت، رەنگە ئەمە هۆكارەكە بێت یەكێتی ناڕەزییە بە پێشنیازەكە. بەپێی ئەوەی باسدەكرێت، پارتی دەیەوێت بەم داهاتانە قوباد تاڵەبانی جێگری سەرۆكی حكومەت ئیدارەی سنوری سلێمانی بگرێتەدەست‌و چیتر یەكێتی پرسی لامەركەزیەت‌و دەسەڵاتەكانی لە حكومەت نەجوڵێنێت‌و هەر كەسێك ئیدارەی سنوری خۆی بدات، بەبێ ئەوەی قەوارەی دەستوری هەرێم بخرێتە بەردەم مەترسی هەڵوەشاندنەوە. ئەگەر سلێمانی لە هەولێر جیاببێتەوە ؟ ئەگەر سلێمانی لە هەولێر جیاببێتەوە چی رودەدات، (درەو) بەوردی باسی چۆنیەتی دابەشبوونی خەڵك‌و خاك‌و داهات‌و چەكدار دەكات لەنێوان هەردوولادا‌. دێگەڵە.. سنوری دوو هەرێم  لەدوای ساڵی 1994و سەرهەڵدانی شەڕی ناوخۆ، سنورێكی دەستكرد بەزەبری چەك لەنێوان ناوچەكانی ژێر دەسەڵاتی یەكێتی‌و پارتی كێشرا، كە بەسنوری "دێگەڵە" ناسراوە، دوای تێپەڕبونی چارەكە سەدەیەك هێشتا ئاسەواری ئەو سنورە بەتۆخی ماوەتەوەو لەگەڵ توندبونەوەی ململانێكاندا، بەتایبەت پارتی ئەم سنورە بیری خەڵك‌و هێزە سیاسییەكانی تر دەهێنێتەوە، چی بەڕێگەگرتن بێت یان سنوردارشكردنی ئەو كەسانەی كە پارتی لەسنوری نفوزیدا خۆیدا حەز بەچارەیان ناكات. لەدوای گەڕانەوەی كورد بۆ بەغدادو پەسەندكردنی دەستوری هەمیشەیی عێراق، بەدوایدا گۆڕینی تەرازوی هێز لە هەرێمی كوردستان‌و دروستبوونی ئۆپۆزسیۆنێكی بەهێز، ئەم پرسە بەجۆرێكی تر هاتەوە پێشەوە، دەستەواژە كۆنەكە "دوو ئیدارەیی" كە زیاتر وەك دەرەنجامی ململانێی چەكداری خۆی بەرجەستەكردبوو، گۆڕا بۆ دەستەواژەیەكی یاسایی بەناوی "دوو هەرێمیی"، كە لێكەوتی ململانێی سیاسی‌و هەستركردنە بەجۆرێك لەستەم‌و پەراوێزخستن‌و دابەش نەكردنی سامانی گشتی بەشێوەیەكی یەكسان‌و جیاوازیكردن لەنێوان شاروشارۆچكەكانی هەرێمی كوردستان، بەتایبەت لەڕووی خزمەت‌و ئاوەدانی‌و بوژانەوەی ژێرخانی ئابوری‌و كۆی بوارە ژیاری‌و ئیداری‌و كۆمەڵایەتی‌و سیاسییەكان.  رووبەر‌و سنور بەپێی ماددەی (53)ی دەستوری كاتیی عێراق، سنوری ئیدارەی هەرێمی كوردستان تاوەكو ئەو سنورەیە كە لە (19/3/2003) هەبووە، واتە سنوری پێش روخانی رژێمەكەی سەددام حسێن. بەپێی ئەو ماددەیەی دەستور، رووبەری هەرێمی كوردستان (41 هەزارو 939) كیلۆمەتر دوجایە، بەمشێوەیە لەنێوان قەڵەمڕەوی پارتی‌و یەكێتیدا دابەشبووە: •     سنوری قەڵەمڕەویی یەكێتی لەناو رووبەری گشتی هەرێمی كوردستان نزیكەی (20 هەزار) كیلۆمەتر دوجایە. •     لەبەرامبەردا ناوچەكانی ژێر دەسەڵاتی پارتی دیموكراتی كوردستان كە هەولێرو دهۆكە، رووبەرەكەی دەبێت بە نزیكەی (22 هەزار) كیلۆمەتر دوجا. ژمارەی دانیشتوان ژمارەی دانیشتوانی پارێزگاكانی هەرێم بەپێی ئاماری دەستەی ئاماری هەرێم بەمشێوەیەیە: •     پارێزگای هەولێر: (ملیۆنێك‌و 986 هەزارو 113) كەس. •     پارێزگای دهۆك: (ملیۆنێك‌و 397 هەزارو 515) كەس. بەپێی ئەم ئامارانە، ژمارەی دانیشتوان لەناوچەكانی ژێر دەسەڵاتی پارتی بەگشتی دەبێت بە (3 ملیۆن‌و 383 هەزارو 628) كەس. ژمارەی دانیشتوانی ناوچەكانی ژێر دەسەڵاتی یەكێتی بەمشێوەیەیە: •     پارێزگای سلێمانی: (2 ملیۆن‌و 82 هەزارو 832) كەس. •     پارێزگای هەڵەبجە: (111 هەزارو 355) كەس. بەپێی ئەم ئامارە، ژمارەی دانیشتوان لەناوچەكانی ژێر دەسەڵاتی یەكێتی بەگشتی دەبێت بە (2 ملیۆن‌و 194 هەزارو 187) كەس. نەوت‌و سەرچاوەی داهات نەوت كە سەرچاوەی سەرەكی داهاتە لە هەرێمی كوردستان، لەنێوان سنوری قەڵەمڕەوی پارتی‌و یەكێتیدا بەمشێوەیە دابەشبووە: •     لە سنوری قەڵەمڕەوی پارتیدا كە هەولێرو دهۆكە، رۆژانە نزیكەی (425 هەزار) بەرمیل نەوت بەرهەمدەهێنرێت، ئەمە لەكاتێكدا ئێستا ئاستی بەرهێنانی نەوت لە هەرێمی كوردستان بەگشتی رۆژانە (470 هەزار) بەرمیلە‌و هەندێكی هەناردە ناكرێت‌و بۆ بەكارهێنانی ناوخۆیە. •     لەسنوری قەڵەمڕەوی یەكێتیدا، ئەوەی ئێستا بەرهەمدەهێنرێت رۆژانە نزیكەی (45 هەزار) بەرمیلە. یەدەگی نەوت یەدەگی نەوت بەمشێوەیە لەنێوان قەڵەمڕەوی پارتی‌و یەكێتیدا دابەشبووە. سامانی سروشتی لە قەڵەمڕەوی پارتیدا: •     یەدەگی نەوت لە سنوری قەڵەمڕەوی پارتیدا (6 ملیار) بەرمیلە. •     یەدەگی غازی سروشتی لە سنوری قەڵەمڕەوی پارتیدا (300 ملیار) پێ سێجا. سامانی سروشتی لە قەڵەمڕەوی یەكێتیدا: •     یەدەگی نەوت لە سنوری قەڵەمڕەوی یەكێتیدا (13 ملیار) بەرمیلە. •     یەدەگی غازی سروشتی لە سنوری قەڵەمڕەوی یەكێتیدا (18 ترلیۆن‌و 300 ملیار) پێ سێجا. سنوری قەڵەمڕەویی یەكێتی یەدەگی نەوتی زیاترە لە سنوری قەڵەمڕەوی پارتی، بەرهەمهێنانی نەوت لە سنوری پارتی زیاترە لە یەكێتی، بەڵام لە غازی سروشتیدا ناوچەی قەڵەمڕەوی یەكێتی سەرچاوەی دابینكردنی غازی ماڵان‌و وێستگەكانی كارەبایە لە هەموو هەرێمی كوردستان، ئێستا غاز كارتی بەهێزی دەستی یەكێتی‌و نەوتیش كارتی بەهیزی دەستی پارتییە، بەڵام رەنگە ئەم هاوكێشانە لە داهاتوودا گۆڕانكارییان بەسەردا بێت، بەتایبەت ئەگەر یەكێتی هێڵێكی نوێ جگە لە هێڵەكەی ژێر كۆنترۆڵی پارتی بۆ هەناردەی نەوت‌و غاز بدۆزێتەوە. داهاتەكانی تر داهاتی ناوخۆی هەرێمی كوردستان هاوشێوەی داهاتی نەوت لەنێوان قەڵەمڕەویی پارتی‌و یەكێتی دابەشبووە، بەمشێوەیە: •     داهاتی ناوخۆ واتە داهاتەكانی تر جگە لە نەوت، لە ناوچەكانی سنوری قەڵەمڕەوی پارتی زیاتر لە (200 ملیار) دینارە لە مانگێكدا (ئەمە لەدۆخی ئاساییدا واتە بەر لە روودانی قەیرانی كۆرۆنا یان هەر قەیرانێكی تر لە داهاتوودا). •     داهاتی ناوخۆ لە ناوچەكانی سنوری قەڵەمڕەوی یەكێتی نزیكەی (80 ملیار) دینارە لە مانگێكدا (ئەمە لەدۆخی ئاساییدا واتە بەر لە روودانی قەیرانی كۆرۆنا یان هەر قەیرانێكی تر لە داهاتوودا). هێزی سەربازی چۆن دابەشبووە ؟ هەرێمی كوردستان لەڕووی هێزی سەربازییەوە بەمشێوەیە لەنێوان پارتی‌و یەكێتیدا دابەشبووە: هێزی سەربازی پارتی •     پارتی خاوەنی هێزی (80)یە، ئەم هێزە ژمارەی پێشمەرگەكانی زیاتر لە (56 هەزار) كەسە. •     پارتی هێزێكی تری سەربازی هەیە بەناوی هێزی "زێرەڤانی"، ئەم هێزە (44 هەزار) كەسە. •     ئاسایشی پارتی زیاتر لە (16 هەزار) كەسە. كۆی گشتی هێزی چەكداری پارتی بە هێزی دژە تیرۆرو هێزەكانی تریشەوە بە زیاتر لە (100 هەزار) كەس دەخەمڵێندرێت. هێزی سەربازی یەكێتی •     یەكێتی خاوەنی هێزی (70)یە، ئەم لەنزیكەی (56 هەزار) پێشمەرگە پێكدێت. •     هێزی بەرگری‌و فریاكەوتنی یەكێتی (26 هەزار) كەسە. •     ئاسایشی یەكێتی زیاتر لە (14 هەزار) كەسە. كۆی گشتی هێزی چەكداری یەكێتی بە نزیكەی (100 هەزار) كەس دەخەمڵێندرێت. سنوری‌و دەوازەكان هەرێمی كوردستان لەڕووی جوگرافییەوە هاوسنورە لەگەڵ توركیا‌و ئێران‌و سوریا، ناوچەی قەڵەمڕەوی یەكێتی تەنیا سنوری لەگەڵ ئێراندا هەیە‌و لەم سنورەدا دوو رێڕەوی سنوری نێودەوڵەتی هەن بەناوەكانی (باشماخ‌و پەروێزخان). بەڵام ناوچەی قەڵەمڕەوی پارتی هاوسنورە لەگەڵ ئێران‌و سوریا‌و توركیادا، لەم سنورەدا پارتی سێ رێڕەوی سنوریی لەگەڵ هەرسێ وڵاتەكەدا هەیە، لەگەڵ ئێران دەروازی نێودەوڵەتی (حاجی ئۆمەران)، لەگەڵ سوریا دەروازەی (فیشخاپور)، لەگەڵ توركیاش دەروازی (ئیبراهیم خەلیل). توانای مرۆیی حكومەتی هەرێمی كوردستان بەكۆی گشتی خاوەنی (ملیۆنێك‌و 249 هەزار) موچەخۆرە، لەم ژمارەیە (721 هەزار)ی فەرمانبەرن. ژمارەی فەرمانبەران لە سنوری ناوچەی قەڵەمڕەویی یەكێتی (268 هەزار) فەرمانبەرە، واتە (453 هەزار) فەرمانبەری لە سنوری پارتیدایە. بەشێوەیەكی گشتی ژمارەی فەرمانبەران‌و موچەخۆران لە سنوری پارتی زیاترە لە سنوری یەكێتی، ئەمە لەحاڵی دروستبوونی دوو هەرێمیدا بارگرانیی دابینكردنی موچەكانیان دەكەوێتە سەرشانی هەریەكێك لەو ئیدارانە.   بابەتی پەیوەندیدار لامەركەزی یان دوو هەرێمیی ئەگەرەكانی دروستبوونی دوو هەرێمیی لە كوردستان  

راپۆرت: محەمەد رەئوف- فازل حەمەڕەفعەت یاسای نوێی هەڵبژاردن لە پەرلەمانی عێراق پەسەندكرا، بەپێچەوانەی ئەوەی خۆپیشاندەرانی ئۆكتۆبەر داوایان دەكرد، یاساكە لەبەرژەوەندی كاندیدی سەربەخۆو حزبە بچوكەكان نییە، لە هەرێمی كوردستان گۆڕان بیر لەوە دەكاتەوە بە هاوپەیمانێتییەكی سیقۆڵی لەگەڵ پارتی‌و یەكێتی بچێتە هەڵبژاردنەوە، كۆمەڵ‌و یەكگرتووش دەیانەوێت هاوپەیمانێتی بكەن، لە دەرەوەی هاوپەیمانێتی، جگە لە پارتی‌و یەكێتی، لایەنەكانی تر و كاندیدە سەربەخۆكان چانسێكی ئەوتۆیان نیە بۆ سەركەوتن بۆ پەرلەمان، بەتایبەتیش هێشتا ئەگەری روودانی ساختەكاری گەورە لە ئارادایە، نەخشەی پێگەی لایەنەكانی هەرێمی كوردستان لە هەڵبژاردنی پێشوەختەی عێراق لەم راپۆرتەدا. هەڵبژاردن بەیاسایەكی نوێوە دوێنێ شەو بە دەنگدان لەسەر دابەشكردنی بازنەكانی هەڵبژاردن لە پارێزگای كەركوك، پەرلەمانی عێراق كۆتایی بە مشتومڕەكان هێنا لەسەر یاسای نوێی هەڵبژاردنەكان. لەدوای روخانی رژێمی سەددامەوە لە ساڵی 2003، یەكەمجارە گۆڕانكاری گەورە لە یاسای هەڵبژاردنەكاندا دەكرێت، مانگی ئۆكتۆبەری رابردوو شەپۆلێكی بەرفراوانی خۆپیشاندان لەعێراق دژ بە دەستەبژێری دەسەڵاتدارو ئەو حزبە سیاسییانە دەستی پێكرد كە لە (17 ساڵ) رابردوودا جڵەوی دەسەڵاتیان بەدەستەوە بووە، خۆپیشاندانەكە بۆ یەكەمجار لەدوای روخانی رژێمی سەددامەوە سەرۆك وەزیرانێكی ناچار بە دەستلەكاركێشانەوە كرد كە عادل عەبدولمەهدی بوو، لەپاڵ دژایەتی گەندەڵی، یەكێك لە دروشمەكانی خۆپیشاندانی ئۆكتۆبەر ناڕەزایەتی بوو دژ بە یاسای هەڵبژاردن، كە بەوتەی ئەوان یاسایەك بوو لەبەرژەوەندی حزبە گەورەكان‌و رێگەی بە هاتنەپێشەوەی خەڵكانی سەربەخۆو دڵسۆز نەدەدا‌و وایكردبوو روودانی گۆڕانكاری سیاسی لە عێراق كارێكی ئەستەم بێت، بۆیە دەستبەكاربوونی مستەفا كازمی سەرۆك وەزیرانی نوێی عێراق بەمەرجی دەستكاریكردنی یاسای هەڵبژاردنەكان، لەلایەن شەقامی ناڕازییەوە قبوڵكرا. پەرلەمانی عێراق دوای چەند مانگێك مشتومڕ، یاسایەكی نوێی بۆ هەڵبژاردن پەسەندكرد، یاساكە شێوازی هەڵبژاردنی لە فرەبازنەیی لەسەر بنەمای پارێزگاكانەوە گۆڕی بۆ فرەبازنەیی لەچوارچێوەی پارێزگاكاندا، واتا یاسا نوێیەكە بازنەكانی هەڵبژاردنی لە (18) بازنەی (18) پارێزگای گۆڕی بۆ (83) بازنە، لەیاسای پێشتردا هەر پارێزگایەك بازنەیەكی هەڵبژاردن بوو، ئێستا هەر پارێزگایەك بەپێی ژمارەی "كۆتا"ی ژنان بازنەكانی هەڵبژاردنی بەسەردا دابەشكراوە. بەپێی یاسا كۆنەكە، (320) كورسی پەرلەمان لەگەڵ (9) كورسی كۆتاكان لە (18) بازنەی هەڵبژاردندا پڕدەكرایەوە، بەڵام ئێستا كورسییەكانی پەرلەمان دابەشكراوە بەسەر (83) بازنەدا، لە هەر بازنەیەك ژنێك سەردەكەوێت، واتا یاسا نوێیەكە جارێكی تر پارێزگاری لە "كۆتا"ی ژنان لە پەرلەمان كردووە كە رێژەكەی 25%ە.  شێوازی هەڵبژاردنی پێشوەختەی عێراق "تاكیی نەگوازراوە"یە، واتا دەنگەكان لە كاندیدێكەوە بۆ كاندیدێكی ترو لە بازنەیەكەوە بۆ بازنەیەكی تر ناگوازرێتەوە، لە حاڵەتی سەرنەكەوتنی كاندیددا بۆ پەرلەمان، دەنگەكانی دەفەوتێت‌و ناچێت بۆسەر دەنگی كاندیدێكی تر لە حزبەكەی یان بۆسەر دەنگی كاندیدی ركابەری.  كورد لە هەڵبژاردنی عێراق لە یاسای نوێی هەڵبژاردنەكان، ژمارەی كورسی پارێزگاكان لە پەرلەمانی عێراق وەكو خۆی ماوەتەوە‌و دەستكاری نەكراوە، كورسی كورد لە هەرسێ پارێزگای هەولێرو سلێمانی‌و دهۆك لە پەرلەمانی عێراق (44) كورسییە، پارێزگای هەڵەبجە لە یاسای نوێی هەڵبژاردندا وەكو پارێزگایەكی سەربەخۆ نەناسێندراوە‌و بازنەكەی لكێندراوە بە پارێزگای سلێمانییەوە.   بەشێوەیەكی گشتی هەرێمی كوردستان دابەشكراوە بەسەر (12) بازنەی هەڵبژاردندا، بازنەكانەكانی هەڵبژاردن بەمشێوەیە دابەشكراوە بەسەر پارێزگاكاندا:  پارێزگای هەولێر ژمارەی كورسییەكانی لە پەرلەمانی عێراق (15) كورسییە، هەولێر دابەشكراوە بەسەر (4) بازنەی هەڵبژاردندا، لەكۆی (15) كورسییەكە، (4) كورسییان بۆ ژنان دەبێت بەپێی سیستمی كۆتا. بازنەكانی هەڵبژاردن لەپارێزگای هەولێر بەمشێوەیە دابەشكراون بەسەر ناوچەكاندا: •    بازنەی یەك: سۆران + مێرگەسوور + رواندز + چۆمان + شەقلاوە، ئەم بازنەیە (4) كورسی پەرلەمان لەخۆدەگرێت، واتا چوار كەس لەم بازنەیە سەردەكەون بۆ پەرلەمانی عێراق •    بازنەی دوو: دەشتی هەولێر + كۆیە + خەبات، ئەم بازنەیە بەهەمان شێوە (4) كورسی لەخۆدەگرێت. •    بازنەی سێ‌: بەشی رۆژئاوای قەزای ناوەندی هەولێر، ئەم بازنەیە (3) كورسی لەخۆدەگرێت. •    بازنەی چوار: بەشی رۆژهەڵاتی قەزای ناوەندی هەولێر، ئەم بازنەیە (4) كورسی لەخۆدەگرێت.  بۆ زانینی دەنگ‌و پێگەی لایەنەكان لە هەڵبژاردنی پێشوەختەی عێراقدا لە سنوری پارێزگای هەولێر، پەنا بۆ ئەنجامی دواین هەڵبژاردنی پەرلەمانی عێراق دەبەین كە ساڵە 2018 بەڕێوەچوو، واتا بەر لە دوو ساڵ. لە هەڵبژاردنی 2018دا، دەنگی لایەنەكان لە هەولێر بەمشێوەیە بوو: •    پارتی (321 هەزارو 920) دەنگ •    یەكێتی (79 هەزارو 745) دەنگ •    نەوەی نوێ (70 هەزارو 833) دەنگ •     گۆڕان (40 هەزارو 863) دەنگ •    هاوپەیمانی بۆ دیموكراسی‌و دادپەروەری (50 هەزارو 537) دەنگ •    كۆمەڵ ( 36 هەزارو 784) دەنگ •    یەكگرتوو ( 24 هەزارو 475) دەنگ  ئەمە دەنگی لایەنەكان لەناو بازنەی هەولێر بەشێوەیەكی گشتی، بەڵام بەپێی یاسای نوێی هەڵبژاردن، لە هەڵبژاردنی پێشوەختەی عێراقدا كە بڕیارە مانگی شەشی ساڵی داهاتوو بەڕێوەبچێت، دەنگی لایەنەكان دابەش دەبێت بەسەر چوار بازنەی هەڵبژاردندا، ئەمە هۆكارەكەیە كە دەوترێت یاسای نوێی هەڵبژاردن لەبەرژەوەندی حزبە گەورەكان‌و لەزیانی حزبە بچوكەكاندایە، بۆ نمونە لە پارێزگای هەولێر لە هەڵبژاردنی رابردوودا هێزێكی سیاسی وەكو كۆمەڵی ئیسلامی زیاتر لە (36 هەزار) دەنگی لە بازنەی هەولێردا بەدەستهێناوە، هەڵبژاردنی داهاتوو ئەم دەنگانە دابەش دەبن بەسەر چوار بازنەی هەڵبژاردندا، واتا ئەگەر دەنگەكانی كۆمەڵ وەكو خۆشی بمێنێتەوە‌و كەم نەكات، ئەوكات (36 هەزار) دەنگەكەی دابەش دەبێت بەسەر چوار بازنەدا‌و لە هەر بازنەیەكی هەڵبژاردندا كەمتر لە (10 هەزار) دەنگی دەبێت، ئەوكات ئەگەری سەركەوتنی كاندیدەكانی لە هەریەكێك لەو بازنانە ئەستەم دەبێت‌و ئەگەر كاندیدەكانی لە هەریەكێك لەو بازنانەدا دەنگی زۆرینە بەدەست نەهێنن‌و سەرنەكەون بۆ پەرلەمانی عێراق، تەواوی دەنگەكانی دەفەوتێت. لە هەڵبژاردنی رابردوودا كۆمەڵ لە هەولێر یەك كاندیدی سەركەوتووە كە (سەلیم شوشكەیی)ە، ئەم پیاوە بە (17 هەزار) دەنگ سەركەوتووە بۆ پەرلەمان، ئەمە لەكاتێكدا بووە كە هەولێر بەگشتی یەك بازنەی هەڵبژاردن بووە، هەڵبژاردنی داهاتوو هەمان سیناریۆ دووبارە نابێتەوە، (17 هەزار) دەنگەكەی سەلیم شوشكەیی دابەش دەبێت بەسەر چوار بازنەدا‌و هیچ كاندیدێكی كۆمەڵ لە بازنەكاندا چانسی سەركەوتنیان بۆ پەرلەمان نابێت، مەگەر بە بردنەوەی كۆتایی ژنان كە دەنگی كەمتری پێویستە، بەڵام ئەمە پێویستی بە هەڵبژاردنی كاندیدی دیار‌و ناسراو هەیە لەناو ژناندا. دابەشبوونی بازنەكانی هەڵبژاردن لە هەولێر، بەپلەی یەكەم لە بەرژەوەندی پارتی دیموكراتی كوردستانە، لە هەڵبژاردنی پێشوودا پارتی لە هەولێر زیاتر لە (321 هەزار) دەنگی بەدەستهێناوە، ئەم دەنگانە ئەگەر بەپێی یاسای نوێی هەڵبژاردن دابەشبكرێت بەسەر (4) بازنەی هەڵبژاردندا، دەنگی پارتی لە هەر بازنەیەك دەبێت بە زیاتر لە (80 هەزار) دەنگ، ئەمەش ژمارەیەكی گەورەیە بەبەراود بە دەنگی هێزێكی وەكو كۆمەڵی ئیسلامی لە هەر بازنەیەكدا كە كەمتر لە (10 هەزار) دەنگە، ئەم زۆرینەیەی پارتی لەیاسای نوێی هەڵبژاردندا زامنی ئەوە دەكات ئەو كاندیدانەی كە پارتی پشتیوانیان دەكات زۆرینەی كورسییەكانی هەولێر ببەنەوە. پارێزگای سلێمانی ئەم پارێزگایە لە پەرلەمانی عێراق (18) كورسی هەیە، لەم ژمارەیە (5) كورسییان بۆ "كۆتا"ی ژنانە، پارێزگای سلێمانی دابەشكراوە بەسەر (5) بازنەی هەڵبژاردندا بەمشێوەیە:  •    بازنەی یەك: باكوری قەزای ناوەندی سلێمانی + چوارتا + ماوەت، ئەم بازنەیە (4) كورسی لەخۆدەگرێت. •    بازنەی دوو: باشوری قەزای ناوەندی سلێمانی + قەرەداغ، ئەم بازنەیە (3) كورسی لەخۆدەگرێت. •    بازنەی سێ‌: هەڵەبجە + سەیدسادق + شارەزوور + پێنجوێن، ئەم بازنەیە (3) كورسی لەخۆدەگرێت. •    بازنەی چوار: پشدەر + رانیە + دوكان، ئەم بازنەیە (4) كورسی لەخۆدەگرێت. •    بازنەی پێنج: كەلار + دەربەندیخان + كفری + چەمچەماڵ + بەشێك لە خانەقین، ئەم بازنەیە (4) كورسی لەخۆدەگرێت.  لە هەڵبژاردنی رابردووی پەرلەمانی عێراقدا دەنگی لایەنەكان لە پارێزگای سلێمانی بەمشێوەیە بووە: •    یەكێتی (259 هەزارو 378) دەنگ  •    گۆڕان (154 هەزارو 947) دەنگ •    نەوەی نوێ (63 هەزارو 760) دەنگ •    پارتی (48 هەزارو 706) دەنگ •    هاوپەیمانی بۆ دیموكراسی‌و دادپەروەری (46 هەزارو 552) دەنگ •    كۆمەڵ (51 هەزارو 563) دەنگ •    یەكگرتوو (30 هەزارو 19) دەنگ  ئەمە دەنگی لایەنەكانە لە سنوری پارێزگای سلێمانی كاتێك بەپێی یاسا كۆنەكە سلێمانی یەك بازنەی هەڵبژاردن بووە، بۆ هەڵبژاردنی داهاتووی عێراق دەنگی لایەنەكان دابەش دەبێت بەسەر (5) بازنەدا، لەم فرەبازنەییەدا بۆ نمونە هێزێكی سیاسی وەكو یەكگرتووی ئیسلامی كە هەڵبژاردنی رابردوو (30 هەزار) دەنگی هێناوە، ئەم دەنگانە ئەمجارە دابەش دەبێت بەسەر (5) بازنەی هەڵبژاردندا، واتا یەكگرتووی ئیسلامی ئەگەر دەنگەكانی وەكو خۆی بمێنێتەوە، هەڵبژاردنی داهاتوو لە هەر بازنەیەكی هەڵبژاردن لە سلێمانی رێژەی دەنگەكانی كەمتر لە (6 هەزار) دەنگ دەبێت، ئەمە چانسی سەركەوتنی كاندیدەكانی بۆ پەرلەمانی عێراق زۆر ئاستەم دەكات، مەگەر بەسودوەرگرتن لە كۆتای ژنان كە بەرێژەیەكی كەمتری دەنگ كورسییەكان دەبەنەوە. لەبەرامبەردا بۆ هێزێكی وەكو یەكێتی نیشتمانی كوردستان كە هەڵبژاردنی رابردوو لە پارێزگای سلێمانی (259 هەزار) دەنگی بەدەستهێناوە، ئەگەر ئەم ژمارەیە دابەش بكرێت بەسەر (5 بازنەی) هەڵبژاردندا، یەكێتی لە هەر بازنەیەكی هەڵبژاردن زیاتر لە (50 هەزار) دەنگی دەبێت، واتا یەكێتی سودمەندی یەكەم دەبێت لەیاسای نوێی هەڵبژاردنەكان‌و زۆرترین كورسی پەرلەمانی عێراق لە سنوری پارێزگای سلێمانی دەباتەوە.   پارێزگای دهۆك ئەم پارێزگایە (11) كورسی لە پەرلەمانی عێراق بۆ دانراوە، سیان لە كورسییەكان بەپێی سیستمی "كۆتا" بۆ ژنان دەبێت، پارێزگاكە دابەشكراوە بەسەر (3) بازنەدا بەمشێوەیە:  •    بازنەی یەك: دهۆك + ئامێدی، ئەم بازنەیە (4) كورسی بۆ تەرخانكراوە. •    بازنەی دوو: زاخۆ + سیمێل، ئەم بازنەیە (3) كورسی بۆ تەرخانكراوە.  •    بازنەی سێ‌: ئاكرێ‌ + شێخان + بەردەڕەش‏، ئەم بازنەیە (4) كورسی بۆ تەرخانكراوە. هەڵبژاردنی پێشووی پەرلەمانی عێراق دەنگی لایەنەكان لە پاریزگای دهۆك بەمشێوەیە بووە:  •    پارتی (354 هەزارو 101) دەنگ •    یەكگرتوو (43 هەزارو 525) دەنگ •    یەكێتی (25 هەزارو 515) دەنگ •    گۆڕان (3 هەزارو 801) دەنگ •    نەوەی نوێ (18 هەزارو 52) دەنگ  •    هاوپەیمانی (25 هەزارو 664) دەنگ •    كۆمەڵ (3 هەزارو 621) دەنگ ئەمە دەنگی لایەنەكانە كاتێك دهۆك یەك بازنەی هەڵبژاردن بووە، هەڵبژاردنی داهاتوو كە پارێزگاكە دەبێت بە سێ بازنەی هەڵبژاردن، دەنگ‌و كورسی لایەنەكانیش گۆڕانكاری بەسەردا دێت، بۆ نمونە هێزێكی سیاسی وەكو جوڵانەوەی نەوەی نوێ هەڵبژاردنی رابردوو لە دهۆك (18 هەزار) دەنگی بەدەستهێناوە، هەڵبژاردنی داهاتوو ئەم (18 هەزار) دەنگە دابەش دەبێت بەسەر سێ بازنەی هەڵبژاردندا، واتا لە هەر بازنەیەك ژمارەی دەنگەكانی نەوەی نوێ دەبێت بە (6 هەزار) دەنگ، ئەم ژمارەیە زامنی سەركەوتنی هیچ كاندیدێكی جوڵانەوەی نەوەی نوێ ناكات، مەگەر بەسودوەرگرتن لە كۆتای ژنان. لەبەرامبەردا هێزێكی وەكو پارتی كە هەڵبژاردنی رابردوو (354 هەزار) دەنگی هەبوو، ئەگەر ئەم ژمارەیە دابەشبكرێت بەسەر سێ بازنەی هەڵبژاردندا، لە هەر بازنەیەك ژمارەی دەنگەكانی پارتی دەبێت نزیكەی (120 هەزار) دەنگ، بۆیە پارتی سودمەندی گەورە دەبێت لە فرەبازنەیی هەڵبژاردن‌و زۆرینەی كورسییەكانی دهۆك دەباتەوە. حزبەكان چۆن دەچنە هەڵبژاردنەوە ئێستا كە ئیتر بۆ هەموو لایەك رون بوەتەوە كە یاسای نوێی هەڵبژاردنەكان خزمەت بە كاندیدی لایەنە بچوكەكان‌و كاندیدی سەربەخۆكان ناكات، لایەنە سیاسییەكان بیر لە دروستكردنی هاوپەیمانێتی دەكەنەوە. بزوتنەوەی گۆڕان كە هەڵبژاردنی رابردووی عێراق رێژەی 58%ی دەنگەكانی لەدەستدا، لەیاسای نوێی هەڵبژاردنی عێراقدا روبەڕووی مەترسی گەورەتر دەبێتەوە، بۆیە سەركردەكانی گۆڕان ئێستا تاوتوێی دۆزینەوەی رێگای رزگاریی دەكەنەوە.  بەپێی زانیارییەكانی (درەو)، سەركردەكانی گۆڕان دەیانەوێت بۆ هەڵبژاردنی پێشوەختەی عێراق لەچوارچێوەی هاوپەیمانێتییەكی سێقۆڵیدا لەگەڵ پارتی‌و یەكێتی بچنە ناو هەڵبژاردنەكانەوە. ئەوانەی لەناو گۆڕاندا پاڵپشتی ئەوە دەكەن گۆڕان بە هاوپەیمانێتی لەگەڵ پارتی‌و یەكێتیدا بچێتە هەڵبژاردنەوە، بەهانەیان بۆ ئەم كارە ئەوەیە گۆڕان لە هەرێمی كوردستان لەگەڵ پارتی‌و یەكێتیدا لە حكومەتدا هاوبەشە‌و ناكرێت لە هەڵبژاردندا ئەو سێ لایەنە بچنە ناو هەڵمەتی هەڵبژاردن دژ بەیەكتری‌و ئەمە كاریگەری لەسەر ئەدای كاری حكومەتی هەرێم دەبێت. دەوترێت مستەفای سەید قادر جێگری سەرۆكی هەرێمی كوردستان عەڕابی ئەم بیرۆكەیەیە لەناو بزوتنەوەی گۆڕاندا، دروستكردنی هاوپەیمانێتییەكی سێقۆڵی لەوجۆرە، لانی كەم رێگر دەبێت لەوەی گۆڕان زیانی گەورەتری بەربكەوێت‌و زامنی چەند كورسییەكی لە هەردوو زۆنی سەوزو زەرد بۆ دەكات، بەڵام لایەنە نەرێنییەكەی ئەوەیە بەتەواوەتی دیمەنی گۆڕان لەبەردەم دەنگدەرانی كوردستان دەكات بە هێزێكی هاوبەشی پارتی‌و یەكێتی، لەحاڵێكدا بزوتنەوەكە لە بنەڕەتەوە بۆ خۆجیاكردنەوەی لەو دوو هێزە هاتوەتە ناو گۆڕەپانە سیاسییەكەوە، بە كورتییەكەی هاوپەیمانێتییەكە لەوجۆرە خوێندنی "فاتیحە"ی لەسەر تەرمی گۆڕان لەناو شەقام‌و دەنگدەرانی كوردستاندا. پارتی بیرۆكەكەی هاوپەیمانێتی سێقۆڵی لەگەڵ گۆڕان‌و یەكێتیدا قبوڵ كردووە، بەڵام دەیەوێت هاوپەیمانێتییەكە فراوانبكرێت بۆ چوارچێوەی رێككەوتنێكی ستراتیژی نوێ لەنێوان هەرسێ لایەندا، یەكێتی خوازیاری رێككەوتنی ستراتیژی دوو قۆڵییە، نایەوێت لەهەر رێككەوتنێك لەگەڵ پارتی، بزوتنەوەی گۆڕان ببێت بە برابەشی، بەپێی زانیارییەكانی (درەو) یەكێتی‌و بەدیاریكراویش لاهور شێخ جەنگی هاوسەرۆكی حزبەكە دروستكردنی هاوپەیمانێتی سێقۆڵیی بۆ هەڵبژاردنی پەرلەمانی عێراق رەتدەكاتەوە، لەبری ئەمە لاهور شێخ جەنگی چاوی لە دروستكردنی بەرەیەكی هاوپەیمانە لە سنوری سلێمانی كە یەكێتی باڵادەست بێت تێیدا، لەم چوارچێوەیەدا دەیەوێت لایەنەكان لە كورسییەكانی ئەم زۆنەدا هاوبەش بكات، ئێستا گۆڕان لەبەرداشی پارتی‌و یەكێتیدایە، سەركردەكانی گۆڕان نایانەوێت لە هەڵبژاردنی داهاتوودا بچنە ریزی هێزە بچوكەكان‌و گورزی گەورەتر بەر ژمارەی كورسییەكانیان لە پەرلەمانی عێراق بكەوێت. لە دەرەوەی سێ لایەنە پێكهێنەرەكەی حكومەتی هەرێم (واتا پارتی+ یەكێتی+ گۆڕان)، لایەنە ئۆپۆزسیۆنەكانی تر زەرەرمەندی گەورە دەبن لە هەڵبژاردنی داهاتووی عێراقدا، هەندێك لەو لایەنانە بەمەبەستی زامنكردنی چەند كورسییەك لە پەرلەمانی ئایندەی عێراقدا بیری لە دروستكردنی هاوپەیمانێتی دەكەنەوە، بەدیاریكراوی كۆمەڵی‌و ئیسلامی‌و یەكگرتووی ئیسلامی، ئەمەش تائێستا قسە‌و گفتوگۆی بەراییەو نەچوەتە بواری جێبەجێ كردن.  بەگشتی لە هەڵبژاردنەكانی پەرلەمانی عێراقدا دەنگدەرانی كوردستان لەسەر پرسە ناوخۆییەكانی هەرێم دەنگ بە كاندیدو حزبەكان دەدەن نەك پرسی كورد وەكو بەشێك لە عێراق، سەرباری ئەوەی پێشبینی دەكرێت لە هەڵبژاردنی داهاتوو هاوشێوەی هەڵبژاردنی رابردوو رێژەی بایكۆتی هەڵبژاردن لە ئاستێكی بەرزدا بێت، پێشبینی پاشەكشێی دەنگی ئەو لایەنانەش دەكرێت كە بەشدارن لە كابینەی نۆیەمی حكومەتی هەرێم، كابینەیەك كە ئێستا لە قەیرانێكی دارایی قوڵدایە‌و موچەی مانگانەی فەرمانبەرانی پێ دابین ناكرێت، لەمەشدا زیاتر بزوتنەوەی گۆڕان زەرەرمەند دەبێت. لەسەر ئاستی حزبەكانی دەرەوەی حكومەت، پێشبینی پاشەكشێی دەنگەكانی جوڵانەوەی نەوەی نوێ دەكرێت، بەتایبەتی دوای ئەوەی هەموو ئەندامانی فراكسیۆنەكەی لە پەرلەمانی عێراق‌و بەشێكی ئەندامانی فراكسیۆنەكەی لە پەرلەمانی كوردستان لە جوڵانەوەكە جیابونەوە، ئەمە دیمەنێكی خراپی لای دەنگدەرانی جوڵانەوەكە دروستكردووە بەوەی دەنگدەكانیان بەهەدەرچووە. كۆمەڵ‌و یەكگرتوو بەپێی یاسای نوێی هەڵبژاردن ئەگەر هاوپەیمانێتی نەكەن‌و لەچوارچێوەی بازنەكاندا كار بۆ سەرخستنی كاندیدی یەكتر نەكەن، زیانی گەورە بەر پێگەو كورسییان دەكەوێت لە پەرلەمانی داهاتووی عێراق. لایەنە بچوكەكانی تری وەكو حزبی شیوعی‌و حزبی سۆسیالیست دیموكراتی كوردستان چانسی سەركەوتنیان بۆ پەرلەمانی داهاتووی عێراق نییە. لە دەرەوەی حزبە سیاسییەكان، كۆمەڵێك خەڵك‌و كەسایەتی دیار دەیانەوێت خۆیان بۆ هەڵبژاردنی داهاتوو وەكو سەربەخۆ كاندید بكەن، لەمەشدا دەیانەوێت سود لە یاسای نوێی هەڵبژاردنەكان وەربگرن كە دەرفەت بۆ كاندیدبوونی كەسانی سەربەخۆ دەكاتەوە، ئەم شێوازە لە كوردستان ئەزمون نەكراوە‌و پێشبینی ناكرێت لەناو ململانێی حزبەكاندا كاندیدە سەربەخۆكان بە ئاسانی سەركەون، ئەوانەی كە كاندیدە سەربەخۆكان هیوایان لەسەر هەڵچنیوە ئەو كەسانەن كە لە هەڵبژاردنەكانی رابردوودا بایكۆتی پرۆسەی هەڵبژاردنیان كردووەو بۆ هەڵبژاردنی داهوش تا ئێستا گۆڕانكاریەكی وا رووینەداوە كە وا لە بایكۆتچیەكان بكەات كە زۆرینەی ژمارەی دەنگدەرانن جارێكی تر بگەڕێنەوە بۆسەر سندوقەكانی هەڵبژاردن و متمانە بە پرۆسەی سیاسی بدەنەوە، بەتایبەتیش هێشتا ئەگەری روودانی ساختەكاری گەورە لە پرۆسەكەدا ئەگەرێكی كراوەیەو حزبە باڵا دەستەكان هەژمونیان بەسەر وردەكاری پرۆسەی هەڵبژاردن و دەرئەنجامەكانیەوە هەیە.    

راپۆرت: محەمەد رەئوف- فازل حەمەڕەفعەت باسی پلانی كوشتنی دیپلۆماتكارو بەرپرسی باڵای هەواڵگری‌و پارێزگاری شارێك‌و دادوەرێك لە ئارادایە، پارتی دەڵێ "پەكەكە" پلانداڕێژەی هێرشەكان بووە، یەكێتی رەتیدەكاتەوە‌و دەڵی لە ئەنجومەنی ئاسایش ئێمە زۆرینەین‌و ئاگاداری پلانی لەو جۆرە نین، ماوەی 15 ساڵە كۆتایی بە دوو ئیدارەیی هاتووە‌و حكومەتی یەكگرتووی كوردستان دروستكراوە، بەڵام هێشتا دۆسیەی ئەمنی یەكی نەگرتوەتەوە، دوو پیاوی ئەمنی (مەسرور بارزانی‌و لاهور شێخ جەنگی) ئێستا لە لوتكەی هەڕەمی دەسەڵاتدان، یەكەمیان سەرۆكی حكومەت‌و دووەم هاوسەرۆكی یەكێتییە، یەكەم نایەوێت دۆسیەی ئەمنی رادەستی كەسی تر بكات، دووەم دەڵێ رادەستم كردووە، بەڵام هێشتا دەستێكی لەناو دۆسیەكەدا ماوەتەوە. دۆخی ئەمنی لە بۆشایی ئەمنیدا سەرباری ئەوەی لە ساڵی 2005وە بە فەرمی كۆتایی بە دوو ئیدارەیی هاتووە‌و حكومەتی یەكگرتووی هەرێمی كوردستان پێكهێنراوە، هێشتا هاوشێوەی بوارەكانی تر، دۆسیەی ئەمنی لەنێوان پارتی‌و یەكێتیدا بە پارچە پارچەیی ماوەتەوە‌و یەكی نەگرتوەتەوە. دوێنێ ئەنجومەنی ئاسایشی هەرێمی كوردستان راگەیەندراوێكی بڵاوكردەوە، رایگەیاند، سێ هێرشی تێكدەرانەی لە هەرێمی كوردستان پوچەڵكردوەتەوە كە بریتی بوون لە: •    پلانی هێرش بۆسەر كونسوڵگەری وڵاتێك لە هەولێرو كوشتنی دیپلۆماتكارێكی ئەو كوسنوڵگەرییە •    پلانی تیرۆركردنی پارێزگاری یەكێك لە شارەكانی كوردستان •    پلانی كوشتنی بەرپرسێكی باڵای هەواڵگری‌و دادوەرێك  ئەنجومەنی ئاسایش لە پشت هەموو ئەم هەوڵانەشەوە ناوی پارتی كرێكارانی كوردستان (پەكەكە)ی هێناوە. چەند كاتژمێرێك دوای ئەم بەیاننامەیە، میدیای یەكێتی بەناوی وتەبێژێك لە ئەنجومەنی ئاسایشی هەرێمەوە راگەیەندراوێكی بڵاوكردەوە‌و رایگەیاند، ئەنجومەنی ئاسایش لە پێنج ئەندامی سەرەكی پێكدێت، سیان لەوانە سەربە یەكێتین، یەكێتی ئاگاداری هەوڵی پوچەڵكردنەوەی ئەو هێرشانە نییە كە لە بەیاننامەی ئەنجومەنی ئاسایشدا باسكراوە‌و رەتیدەكاتەوە. لەمە توندتر، راگەیەندراوەكەی یەكێتی باسی لەوەكردووە، رێگەنادەن بەناوی ئەنجومەنێكەوە راگەیەندراو بڵاوبكرێتەوە كە پێش بڵاوكردنەوەی ئەندامە سەرەكییەكانی پرس‌و رایان پێ نەكرابێت. ئەمڕۆ ئەنجومەنی ئاسایش وەڵامی راگەیەندراوەكەی یەكێتی دایەوە‌و دەڵێ:" تەنیا ئەو راگەیەندراو و بابەتانە گوزارشت لە رای ئەنجومەنی ئاسایش دەكەن كە لە سایتی فەرمی ئەنجومەنەكەدا بڵاودەكرێنەوە". بەبێ ناوهێنانی یەكێتی، راگەیەندراوی ئەنجومەنی ئاسایش (واتا ئەو بەشەی ئەنجومەنەكە كە لەژێر كۆنترۆڵی پارتیدایە)، راگەیەندراوەكەی دوێنێ شەوەی یەكێتی بە "هەوڵی دژایەتیكردنی دەسەڵاتە فەرمییەكان" ناو دەبات. رۆژی 25ی ئەم مانگە مەكتەبی سیاسی یەكێتی كۆبووەوە، بەپێی زانیارییەكانی (درەو)، لەو كۆبونەوەیەدا مەكتەبی سیاسی یەكێتی بەكۆی دەنگ بڕیاریداوە لەسەر ئەوەی لە هەر شوێنێك پێویست بكات‌و هەست بەوە بكرێت پارتی مافی یەكێتی خواردووە، یەكێتی روبەڕووی دەبێتەوە. سەرباری لەم چەند رۆژ    رابردوودا یەكێتی چەند پۆستێكی بریكارو سەرۆكی دەستەی لەناو حكومەت پڕكردوەتەوە، بەڵام هێشتا سەركردەكانی یەكێتی هێشتا پێیانوایە رێككەوتنی پێكهێنانی كابینەی نۆیەمی حكومەتی هەرێم بەتەواوەتی جێبەجێ نەكراوە‌و هەموو پشكەكانی خۆیان وەرنەگرتووە. (درەو) زانیویەتی، بڕیارە چەند رۆژی داهاتوو جارێكی تر وەفدی پارتی‌و یەكێتی كۆببنەوە، یەكێتی دەیەوێت لەو كۆبونەوەیەدا جارێكی تر پرسی رێككەوتنی پێكهێنانی حكومەت بخاتەوە بەر باس‌و گفتوگۆكان.  وەڵامدانەوەی بەیاننامەی ئەنجومەنی ئاسایش لەلایەن تیمی یەكێتییەوە لەم كاتەدا، رەنگە بەو كۆبونەوە چاوەڕوانكراوەوە هەبێت‌و یەكێتی چاوی لە نوێكردنەوەی ئەنجومەنی ئاسایشی هەرێمە لەدوای رۆیشتنی مەسرور بارزانی لە پۆستەكە. لەبارەی ئەنجومەنی ئاسایشەوە ئەنجومەنی ئاسایش، بەپێی یاسای ژمارە (4)ی ساڵی 2011ی یاسای ئەنجومەنی ئاسایشی هەرێمی كوردستانی عێراق دروستكراوە، مەسرور بارزانی یەكەم راوێژكاری ئەم ئەنجومەنە بووە‌و لەدوای دەستبەكاربوونی لە پۆستی سەرۆكی حكومەتی هەرێم، هێشتا هیچ كەسێك لە شوێنەكەی دەستبەكارنەبووە. بارەگای ئەنجومەنی ئاسایش لە "سەری رەش"ە، لە نزیك بارەگای بارزانی، راوێژكاری ئەنجومەنەكە بەپێی یاسا پلەكەی وەزیرە، دروستكردنی ئەم ئەنجومەنە هەر لە سەرەتاوە وەكو دۆزینەوەی پۆستێكی حكومی بۆ مەسرور بارزانی لێكدرایەوە، چونكە ئەوە یەكەمجار بوو مەسرور بارزانی پۆستێكی حكومی وەرگرێت، بەهۆی دروستكردنی ئەم ئەنجومەنەوە مەسرور بارزانی دەزگای "پاراستن" كرد بە دەزگایەكی حكومی‌و لە بودجەی هەرێمی كوردستان پشكی بۆ بڕییەوە، ئەمە بۆ دەزگای زانیاریی یەكێتی نیشتمانی‌و لاهور شێخ جەنگیش بەهەمان شێوە بوو. بڕیاری دروستكردنی ئەنجومەنی ئاسایش‌و پەسەندكردنی یاساكەی لە پەرلەمان لەكاتی خۆیدا هەڵای زۆری دروستكرد، بەپێی یاسا ئەنجومەنەكە بەسترایەوە بە سەرۆكایەتی هەرێمەوە، نەك سەرۆكایەتی حكومەت، ئەوكات مەسعود بارزانی سەرۆكی هەرێم‌و نێچیرڤان بارزانی سەرۆكی حكومەت بوون، مەسرور بارزانی نەیدەویست ئەنجومەنەكەی لەژێر فەرمانی سەرۆكی حكومەت واتە نێچیرڤان بارزانیدا بێت، بۆیە ئەنجومەنەكە بەسترایەوە بە سەرۆكایەتی هەرێمەوە واتە بە مەسعود بارزانی باوكییەوە. پێكهاتەی ئەنجومەنی ئاسایش بەپێی بڕگەی یەكەم لە مادەی دووەمی یاسای ژمارە (4)ی ساڵی 2011ی ئەنجومەنی ئاسایشی هەرێمی كوردستان، ئەنجومەنەكە پێكدێت لە: * دەزگای ئاسایشی هەرێم * بەڕێوەبەری هەواڵگری سەربازیی پێشمەرگە * ئاژانسی پاراستن‌و زانیاری لەناو ئەم دامەزراوانەدا، (5) پۆست هەن، ئەم پۆستانە بەمشێوەیە لەنێوان پارتی دیموكراتی كوردستان‌و یەكێتی نیشتمانیدا دابەشكراوە‌و كەسانی تەكنۆكرات یان كەسانی دەرەوەی ئەو دوو حزبە هیچ پۆستێكیان لەم ئەنجومەنەدا نییە:  * راوێژكاری ئەنجومەنی ئاسایشی هەرێمی كوردستان/ مەسرور بارزانی (پارتی) * سەرۆكی دەزگای ئاسایشی هەرێمی كوردستان‌و جێگری راوێژكاری ئەنجومەن/ د. خەسرەو گوڵ محەمەد (یەكێتی) * سەرۆكی دەزگای پاراستن‌و زانیاری- زانیاری / لاهور شێخ جەنگی (یەكێتی)  * سەرۆكی دەزگای پاراستن‌و زانیاری- پاراستن/ نەزهەت حالی (پارتی)  * سەرۆكی دەزگای هەواڵگری هێزەكانی 70ی یەكێتی‌و هێزەكانی 80ی پارتی ئەم پۆستە لای یەكێتییە‌و نوێنەرەكەی یەكێتی بریتییە لە (لیوا محەمەد هیدایەت)   ئەنجومەنەكە بەفەرمی لە ساڵی 2012دا دەستبەكاربووە، لەماوەی (8)ی رابردوودا‌و لە سەرەتای دامەزراندنییەوە تائێستا، ئەم ئەنجومەنە بەهۆی ناكۆكی نێوان ئەندامەكانییەوە، كۆنەبوەتەوەو هەماهەنگی تەواوەتی لەنێوان ئەندامانی ئەنجومەنی ئاسایشی هەرێمی كوردستاندا نییە، بۆیە زۆرجار كە كێشەیەكی ئەمنی لە یەكێك لە زۆنەكان روودەدات، بەرپرسانی ئەمنی ناو ئەنجومەنەكە لەڕێگەی بەیاننامەوە قسە لەگەڵ یەكتر دەكەن‌و وەڵامی یەكتر دەدەنەوە. بەشێكی كێشەكانیش پەیوەندییان بە دابینكردنی بودجەوە هەیە، ساڵانی رابردوو هەندێكجار یەكێتی سكاڵای هەبوو لەسەر ئەوەی ئەنجومەنی ئاسایش بودجەی پێویست بۆ دەزگا ئەمنییەكانی دابین ناكات، هاوشێوەی ئەوەی بۆ دەزگاكانی پارتی دەكات.  بودجەی ئەنجومەنی ئاسایش لە ساڵی 2013وە هەرێمی كوردستان یاسای بودجەی نەبووە، بەڵام بەپێی دواین پرۆژە یاسای بودجە، ژمارەی كارمەندانی ئەنجومەنی ئاسایش (6 هەزارو 476) كارمەندەو بودجەكەشی (344 ملیارو 630 ملیۆن) دینارە، رێژەی (2.9%)ی بودجەی هەرێم لەو ساڵەدا بۆ ئەم ئەنجومەنە تەرخانكراوە. ئەمە سەرباری ئەوەی، هەربە بەپێی دواین پرۆژە یاسای بودجە، دەزگای ئاسایش كە ژمارەی كارمەندانی بە (31 هەزارو 421) كەس دیاریكراوە، بڕی (487 ملیارو 443 ملیۆن) دیناری بۆ تەرخانكراوە كە دەكاتە (4.2%)ی كۆی بودجەی هەرێم لەو ساڵەدا. لەدوای ساڵی 2013ەوە تائێستا بەهۆی نەبوونی یاسای بودجەوە نازانرێت بودجەی ئەو دەزگایانە چەندەو چۆن خەرجدەكرێت، سەرباری ئەمە بودجەی ئەنجومەنی ئاسایش‌و وردەكاری خەرجییەكانی وەكو بابەتێكی ئاسایشی نیشتمانیی تەماشا دەكرێت‌و ناكەوێتە ژێر چاودێری پەرلەمانەوە. چارەنوسی ئەنجومەنی ئاسایش ماوەی زیاتر لە ساڵێك‌و سێ مانگە كابینەی نویەمی حكومەتی هەرێم بە سەرۆكایەتی مەسرور بارزانی دەستبەكاربووە، بەڵام پۆستەكانی ئەنجومەنی ئاسایش نوێ نەكراونەتەوە. بەپێی زانیارییەكانی (درەو)، ئێستا (وەیسی مەسعود بارزانی) برای مەسرور بارزانی كاروبارەكانی ئەنجومەنی ئاسایش بەڕێوەدەبات، مەسرور بارزانی كە پۆستی سەرۆكی حكومەت وەرگرتووە، هێشتا دەستبەرداری دۆسیەی ئەمنی نەبووە‌و ئامادە نییە سەرۆكایەتی ئەو ئەنجومەنە رادەستی كەسێك بكات كە لەژێر كۆنترۆڵی خۆیدا نەبێت، بەڵام بەپێی قسەی بەرپرسانی یەكێتی، لاهور شێخ جەنگی دوای ئەوەی پۆستی هاوسەرۆكی یەكێتی وەرگرتووە، دەستبەرداری پۆستە ئەمنییەكەی بووە‌و ئێستا بە فەرمی (محەمەد شێخ تەحسین تاڵەبانی) سەرۆكی دەزگای زانیارییە لە شوێنەكەی لاهور شێخ جەنگیی، بەڵام ئەمە هێشتا بەتەواوەتی دەستی لاهور شێخ جەنگیی لەناو دۆسیەی ئەمنیدا نەهێناوەتە دەرەوە.  (درەو) زانیویەتی، سەرەتاكانی ئەمساڵ هەوڵێك هەبووە لەلایەن نێچیرڤان بارزانی سەرۆكی هەرێمی كوردستانەوە بۆ ئەوەی (رەوان بارزانی) برای پۆستی راوێژكاری ئەنجومەنی ئاسایش وەرگرێت، بەوپێیەی ئەنجومەنی ئاسایش بەپێی یاسا سەربە سەرۆكایەتی هەرێمە، بەڵام ئەو هەوڵە سەركەوتوو نەبووە. بەهۆی ناكۆكی بنەماڵەی بارزانی لەسەر دانانی كەسی جێگرەوەی مەسرور بارزانی لە پۆستی راوێژكاری ئەنجومەنی ئاسایش، تائێستا ئەو پۆستە بەبەتاڵی ماوەتەوە‌و سەرباری ئەوەش پۆستەكانی تری ناو ئەنجومەنەكەش نوێ نەكراونەتەوە، بزوتنەوەی گۆڕان چاوی لەوەیە لە پرۆسەی نوێكردنەوەی ئەنجومەنی ئاسایشی هەرێمدا چەند پۆستێك لەو ئەنجومەنەدا وەربگرێت‌و لەوێوە ببێت بە بەشداری پارتی‌و یەكێتی لە بڕیاری ئەمنیی هەرێمی كوردستاندا. بەپێی رێككەوتنی پێكهێنانی كابینەی نوێی حكومەت، پارتی بەڵێنی بە بزوتنەوەی گۆڕان داوە، دوو پۆستی باڵا لەناو ئەنجومەنەكە بە بزوتنەوەی گۆڕان بدات، بەڵام ئەو پۆستانە تائێستا یەكلانەبونەتەوە. بە كشانەوەی مەسعود بارزانی لە پۆستی سەرۆكی هەرێم، جموجوڵی دەسەڵات لەناو بنەماڵەی بارزانیدا رویدا، نێچیرڤان بارزانی پۆستی سەرۆكی هەرێمی وەرگرت‌و مەسرور بارزانی پۆستی سەرۆكی حكومەتی وەرگرت، لەم ئاڵوگۆڕەدا پۆستی راوێژكاری ئەنجومەنی ئاسایشی هەرێم چۆڵ بوو، ئێستا پڕكردنەوەی ئەم پۆستە لەپاڵ پۆستی وەزارەتی نەوتدا، كێشەیەكی تری بۆ پارتی دروستكردووە. ئەگەر یاسای ئەنجومەنی ئاسایش هەموارنەكرێتەوە‌و دامەزراوەكە سەربە سەرۆكایەتی هەرێم بێت، دەبێت نێچیرڤان بارزانی كەسێك بۆ پۆستی سەرۆكی ئەنجومەنەكە كاندید بكات، بەڵام پێناچێت هەرگیز ئەمە روبدات، چونكە مەسرور بارزانی بەهیچ جۆرێك ئامادە نییە دۆسیەی ئەمنیی رادەستی نێچیرڤان بارزانی ئامۆزای بكات، بەوهۆیەشەوە لەدوای رۆشتنی لە پۆستی راوێژكاری ئەنجومەنی ئاسایش، تائێستا مەسرور بارزانی بەپێی یاسای ئەنجومەنی ئاسایش دۆسیەی ئەمنی رادەستی نێچیرڤان بارزانی سەرۆكی هەرێم نەكردووە. هەموو ئاماژەكان بۆ ئەوەدەچن، دواجار (وەیسی مەسعود بارزانی) پۆستی سەرۆكی ئەنجومەنی ئاسایش وەربگرێت، ئەمە وادەكات دۆسیەی ئەمنی هەر لەدەستی مەسرور بارزانیدا بمێنێتەوە، مەسرور بارزانی كە ئێستا سەرۆكایەتی حكومەت دەكات، لە هەموو كاتێك زیاتر پێویستی بەوەیە جڵەوی دۆسیەی ئەمنی لای خۆی بهێڵێتەوە. بەڵام بە وەرگرتنی پۆستی سەرۆكی حكومەت، مەسرور بارزانی گورزێكی بەهێزی لە دەزگای ئەنجومەنی ئاسایش‌و تەنانەت دەزگای پاراستن-یشدا، بەپێی زانیارییەكان، مەسرور بارزانی رێژەی 90%ی ستافی ئەنجومەنی ئاسایش‌و پاراستنی لەگەڵ خۆیدا راپێچی حكومەت كردووە، لەدیارترینی ئەوانەی لە ئەنجومەنی ئاسایش‌و پاراستنەوە چونەتە ناو حكومەت بریتین لە هەریەكە: •    شەعبان شەعبان چالی بەڕێوەبەری نوسینگەی سەرۆك وەزیران •    هێمن هەورامی جێگری سەرۆكی پەرلەمان •    رێبەر ئەحمەد وەزیری ناوخۆ •    جوتیار عادل وتەبێژی حكومەت •    ساسان عەونی وەزیری شارەوانی‌و گەشتوگوزار سەرباری ئەمانە، زۆربەی بەڕێوەبەرە گشتییەكان لە خەڵكانی سەربە ئەنجومەنی ئاسایش پڕكراونەتەوە، رەنگە ئەمە هۆكارەكە بێت هەندێك كابینەی مەسرور بارزانی بە كابینەیەكی ئەمنی ناودەبەن. نازانرێت پارتی چۆن پرسی ئەنجومەنی ئاسایش یەكلادەكاتەوە، بەڵام لە هەموو حاڵەكاندا ئەو كەسەی كە پۆستەكە وەردەگرێت لەژێر فەرمانی مەسرور بارزانیدا دەبێت نەك نێچیرڤان بارزانی، ئەمە لەكاتێكدایە یەكێتیش چاوی لە پۆستەكانی ناو ئەو ئەنجومەنەیە‌و دەیەوێت لەچوارچێوەی رێككەوتنی پێكهێنانی حكومەتدا پۆستەكانی ئەو ئەنجومەنە نوێ بكاتەوە.   بابەتی پەیوەندیدار چارەنوسی ئەنجومەنی ئاسایش بەكوێ دەگات ؟

راپۆرت: فازل حەمەڕەفعەت "ساختەكاری وەسڵی فافۆن" ئەمە ناونیشانی قەیرانێكی نوێیە لە سنوری دەسەڵاتدارێتی یەكێتی نیشتمانی، لەم دۆسیەیەدا زیانی زیاتر لە (25 ملیار) دینار بەر حكومەتی هەرێم كەوتووە، مەترسی هەیە تێوەگلاوان لە سزای یاسایی رزگاربكرێت‌و لەچوارچێوەی رێككەوتنێكی سیاسیدا دۆسیەكە دابخرێت، (درەو) لەم راپۆرتەدا وردەكاری زیاتر دەخاتەڕوو.   رێككەوتن لەسەر ساختەكاریی ! دواجار گومانەكان لەبارەی پرۆسەی قاچاخچێتی‌و ساختەكاری لە دەروازە سنورییەكانی هەرێمی كوردستان بوون بە ڕاستیی، رۆژی 10ی ئەم مانگە دادگای لێكۆڵینەوەی خانەقین/ قۆرەتوو، فەرمانی دەستگیركردنی بۆ دوو كەس دەركرد، یەكێكیان پیاوێكی كاسبكار بوو، ئەوی تر ئەندامێكی ئەنجومەنی پارێزگای سلێمانی بوو لە فراكسیۆنی گۆڕان بەناوی (محەمەد شێخ وەهاب). فەرمانی دەستگیركردنەكە بەپێی ماددەی (289)ی یاسای سزادانی عێراقییە، ئەم ماددە تایبەتە بە ساختەكردنی نوسراوی فەرمی دامودەزگاكان، سەلماندنی لەسەر هەركەسێك، حوكمەكەی (15 ساڵ) زیندانییە، ئەم كەسیە ناوی لێنراوە "ساختەكاری وەسڵی فافۆن". بەگوێرەی قسەی دوو پەرلەمانتاری گۆڕان (دابان محەمەدو عەلی حەمەساڵح)، تائێستا (40) كەس لە ساختەكاری وەسڵی فافۆندا ناویان هاتوە، بەڵام ژمارەیەكی كەمیان فەرمانی دادگایان بۆ دەرچوەو بەشێكی فەرمانەكەش جێبەجێ نەكراوە. گومان هەیە بەرپرسانی باڵای یەكێتی دەستوەردانیان لە كەیسەكەدا كردبێت بەمەبەستی داخستنی، ئەو دوو پەرلەمانتارەی گۆڕان دەڵێن" نابێت هیچ بەرپرسێكی حیزبی‌و ئەمنی بە هەڕەشەكردن‌و چاوسوركردنەوە لە دادوەران یان كەسی دیكە، كار بۆ داخستنی ئەم دۆسیەو دەربازكردنی تۆمەتباران بكەن"، گومانەكە لەوەوە سەرچاوەی گرتووە بەرپرسی باڵای سەربازی یەكێتی لە سنوری گەرمیان تێوەگلابێت، بۆیە یەكێتی هەوڵ بۆ داخستنی دۆسیەكە دەدات. محەمەد شێخ وەهاب كە ئەندامی فراكسیۆنی گۆڕان لە ئەنجومەنی پارێزگای سلێمانی‌و لەسەر ئەم دۆسیەیە فەرمانی دەستگیكردنی بۆ دەرچووە، تائێستا خۆی رادەست نەكردووە، لەناو گۆڕاندا راوبۆچونی جیاواز هەیە لەسەر دۆسیەكە، هەندێك لە بەرپرسانی بزوتنەوەكە دەیانەوێت كێشەكە لەگەڵ یەكێتی لەچوارچێوەی رێككەوتنێكی سیاسیدا چارەسەر بكرێت، بەوپێیەی خەڵكانی یەكێتیش لە دۆسیەكەدا تێوەگلاون، هەندێكی تر لە بەرپرسانی گۆڕان داوا دەكەن محەمەد  شێخ وەهاب خۆی رادەست بكات‌و بچێتە بەردەم دادگا، بەگشتی گۆڕان ترسی هەیە لەم دۆسیەیەدا زیانی گەورە بە پێگەی جەماوەریی بگات لە ناوچەی گەرمیاندا، بەتایبەتیش كە عێراق لەبەردەم هەڵبژاردنێكی پێشوەختەدایە. مەترسی هەیە، یەكێتی‌و گۆڕان دواجار لەچوارچێوەی رێككەوتنێكی سیاسیدا، كەیسەكە بەكەمترین زیان لە بەرژەوەندی خۆیان‌و زۆترین زیان لە بەرژەوەندی گشتی كۆتایی پێبهێنن، بەڵام ئەمە هێشتا گومانە‌و رۆژانی داهاتوو ئەمە دەسەلمێنێت. چی رویداوە ؟ ئەوەی تایبەتە بە دۆسیەی ئەو ئەندامەی ئەنجومەنی پارێزگا، پرسێكە پەیوەندی بە ساختەكردنی زیاتر لە (2 هەزارو 500) وەسڵی گومرگەوە هەیە لە بەڕێوەبەرایەتی گومرگی گەرمیان. لە سنوری پارێزگای سلێمانی دوو دەروازەی فەرمی نێودەوڵەتی هەیە كە بریتین لە دەروازەكانی (باشماخ)‌و (پەروێزخان)، ماوەیەكە لەناو پەرلەمانی كوردستانەوە بەشێوەیەكی چڕ باس لە دیاردەی قاچاخچێتی‌و بەهەدەردانی سامانی گشتی دەكرێت لە دەروازە سنورییەكان، ئەوانەی زیاتر باسیان لەم دۆسیەیە دەكرد پەرلەمانتارانی گۆڕان بوون، بەدیاریكراویش (عەلی حەمەساڵح)، زۆربەی قسەكانیش لەبارەی قاچاخچێتییەوە باسی دەروازەكانی سنوری دەسەڵاتدارێتی یەكێتی نیشتمانی كوردستانە لە سلێمانی. بەپێی بەدواداچونەكانی (درەو)، زیاتر لە 50%ی داهاتی گومرگەكانی سنوری سلێمانی بریتییە لە داهاتی گومرگی (كانزا لەكاركەوتووەكان)، هەر بارێكی ئەم جۆرە كانزایانە ئەگەر كێشەكەی (20 تەن) بێت، نزیكەی (10 ملیۆن‌و 500 هەزار) دینار گومرگ دەكرێت. كانزا لەكاركەوتووەكان بریتین لە: •    مس •    فافۆن •    وردەخۆڵی ئاسن •    پاتری شكاو ئەم ماددانە بەپێی یاسای گومرگیی لە عێراق، لەبنەڕەتەوە ناردنە دەرەوەیان قەدەغەیە، بەڵام بەبەهانەی جۆراوجۆر لە نمونەی بەهانەی "تەلەفكردن"، بەقاچاخ‌و هەندێكجاریش بەمۆڵەتی وەزارەتی پیشەسازی ئاودیوی دەرەوە دەكرێن، بەپێی بەدواداچونەكانی (درەو)، زۆربەی ئەو فافۆنەی لە دەروازەكانی هەرێمەوە ئاودێوی ئێران دەكرێت، لەناوچەكانی تری عێراقەوە دێنە هەرێمی كوردستان، هەندێكیشی لە ناوخۆی هەرێمدا كۆدەكرێنەوە‌و رەوانەی دەرەوە دەكرێت، ئەوەی لە ناوچەكانی عێراقەوە دێت دەوترێت پەیوەندی بە پرۆسەیەكی گەورەی گەندەڵییەوە هەیە لە وەزارەتی كارەبای عێراقدا، خەڵكانێك لەو وەزارەتە كێبڵ‌و مس‌و فافۆنی وەزارەتەكە بەناوی تەلەفكردنەوە لەناودەبەن‌و دەیكەن بە كانزای لەكاركەوتوو، بەشێكی رەوانەی هەرێمی كوردستانی دەكەن‌و لە كوردستانیشەوە قاچاخی رەوانەی ئێران دەكرێت، هەندێكی تریشی حەشدی شەعبی لە سنورەكانی تری عێراقەوە ئاودیوی ئێرانی دەكات.  ئەو ساختەكارییەی لەم بوارەدا رویداوە بریتییە لە ساختەكردنی پسوڵەیەكی گومرگ بەناوی پسوڵەی (37 ئەلف)، هەر كەسێك ئەم پسوڵەیە وەرگرێت، واتا باجی گومرگیی هێنانە ناوەوە یان بردنەدەرەوەی بارەكەی داوە بە حكومەت، ئەمە وەسڵی سندوقی داهاتی حكومەتە لە گومرگ‌و دامودەزگاكاندا. بەپێی بەدواداچوونی (درەو)، ئەوانەی تێوەگلاون لەم ساختەكارییە گەورەیەدا، وەسڵی گومرگیان بۆ خاوەن بارەكان كردووە بە بڕی (10 ملیۆن) دینار، بەڵام لەو وەسڵانەدا كە دەگەڕێتەوە بۆ حكومەت‌و داخڵی كۆمپیوتەر دەكرێت بڕی (40 هەزار) دیناریان نوسیوە، ئەمە تەنیا نمونەیەكە لە یەكێك لەو وەسڵانەی كە ساختە كراوە‌و تەنیا لە پرۆسەی ناردنەدەرەوەی فافۆندا كراوە، لە كانزاكانی تریشدا بەهەمان شێوەو بە بڕی جیاواز وەسڵەكان ساختەكراون. زیانی حكومەت لە ساختەكارییەكەدا ئەوانەی ئاگادارن لە كەیسەكە دەڵێن، زیاتر لە ساڵێك بووە ئەم پرۆسەی ساختەكارییە لە وەسڵەكانی گومرگدا بەردەوام بووە، لەم ماوەیەدا (2 هەزارو 500) وەسڵ ساختەكراوە، بەهای هەر وەسڵێك (10 ملیۆن) دینار بووە، كۆی گشتی داهاتی ئەو وەسڵە ساختەكراوانە بە نزیكەی (25 ملیار) دینار دەخەمڵێندرێت، واتا حكومەت لەو ماوەیەدا تەنیا لە ناردنەدەرەوەی فافۆن‌و كانزا لەكاركەوتووەكاندا، بەهۆی ساختەكارییەكەوە بڕی (25 ملیار) دینار زیان بەر داهاتەكانی كەوتووە، ئەوەش لەكاتێكدایە ئێستا حكومەت بەدەست قەیرانی داراییەوە دەناڵێنێت‌و مانگانە پارەی پێویستی ناكەوێتە بەردەست بۆ دابینكردنی موچەی فەرمانبەران. ئەمە تەنیا قەبارەی ئەو زیانە داراییەیە كە لە ساختەكردنی (2 هەزارو 500) وەسڵدا بەر داهاتی حكومەت كەوتووە، دەبێت رێژەی ئەو زیانە داراییە چەند بێت كە مانگانە لە هەموو گومرگەكانی سنوری پارتی‌و یەكێتی بەهۆی قاچاخچێتی‌و ساختەكارییەوە بەر داهاتی حكومەت دەكەوێت ؟    چۆن ئاشكرا بوو ؟ ئەوەی رویداوە‌و ناوی لێنراوە ساختەكاری، بەشێوەیەكی گشتی بریتی بووە لە بڕینی پسوڵەی (37 ئەلف) لە دەرەوەی رێكاری گومرگیی بۆ ئەو بارانەی كە بە گومرگی پەروێزخاندا تێپەڕیوون. لە بنەڕەتەوە ئەم كارە دەبێت یەكێك لە نوسینگەكانی (ئیخراجی) ئەنجامی بدات، كارەكەش بریتییە لە قەپانكردنی بارەكان، واتا نوسینگەكان ئەركی لایەنی یاسایی‌و راگەیەندراوی گومرگی لە ئەستۆدەگرن، ئەوەی تائێستا نادیارە ئەوەیە نازانرێت چ نوسینگەیەك تێوەگلاوە لە پرۆسەی ساختەكارییەكەدا، یان ناوی چ نوسینگەیەك بۆ ساختەكارییەكە بەكارهێنراوە.  بەپێی بەدواداچوونەكانی (درەو)، ئاستی ساختەكارییەكە هێندە گەورەیە، بۆ هەموو بارێك پسوڵەیەكی كۆپی هاوشێوەی ئەوەی گومرگی بۆ دروستكراوە بە هەموو مۆرو ئیمزایەكەوە، تەنانەت بە ناوی فەرمانبەرەكانی گومرگیشەوە، ئەمەیە وایكردووە هەندێك لەوانەی ئاگاداری دۆسیەكەن دەڵێن ئەوەی ساختەكارییەكەی كردووە، كەسێكی شارەزا بووە لە چۆنیەتی بەڕێوەچوونی كاروبارەكان لە مەرزی پەروێزخان.  ماوەی ساڵێك بووە بەم وەسڵە ساختانەوە باری فافۆن‌و كانزا لەكاركەوتووەكانی تر لە رێگەی هەردوو مەرزی باشماخ‌و پەروێزخانەوە نێردراوە بۆ ئێران‌و بەشی هەرەزوری داهاتی گومرگی ئەو بارانە بۆ ساختەكارەكان رۆیشتووە‌و بڕێكی زۆر كەمی بۆ حكومەت گەڕاوەتەوە.  سەرەتای ئەمساڵ بەهۆی دۆسیەیەكی یاساییەوە كە پەیوەندی بە كاری كۆمپانیایەك هەبوو لە دەروازەی پەروێزخان، بەڕێوەبەری دەروازەكە‌و بەڕێوەبەری گشتی گومرگی گەرمیان بە فەرمانی دادگا نێردرانەوە بۆ ماڵەوە، لەو ماوەیەدا وەزیری دارایی بەشێوەیەكی كاتیی دوو كەسی لە شوێنیان دانا بۆ ئەوەی كاروبارەكان بەڕێوەببەن. ئەو كەسەی ئەوكات لە شوێنی بەڕێوەبەری گشتی گومرگی گەرمیان دانرا كاروبارەكان بەڕێوەببات، كەسێك بوو بە ناوی (قادر پیرۆت) ئەم پیاوە سەربە یەكێتی بوو، چونكە پۆستەكە پشكی یەكێتی بوو، دەوترێت قادر پیرۆت یەكەم كەس بووە ساختەكارییەكەی لە وەسڵەكانی گومرگدا ئاشكراكردووە‌و پێی زانیوە، دوای چەند مانگێك لە دەستبەكاربوونی، پیرۆت رۆژێك چەند بارهەڵگرێكی كانزای لەكاركەوتووی بینیوە، دوای وەسڵی گومرگی لێكردوون، لەوێوە هەستی بەبوونی ساختەكارییەكی گەورە كردووە، بۆ وردبینی زیاتر چوەتە دەروازەكە‌و وەسڵی گومرگیی لە هەموو ئەو بارهەڵگرانە وەرگرتووە كە بەنیازبوون بچنە ناو خاكی ئێرانەوە، ئیتر دڵنیا بووە لەوە ساختەكارییەكی گەورە روودەدات، دواتر بەڕێوەبەرایەتی گومرگی سلێمانی هاتوەتە ناو كێشەكەوە، بەوپێیەی بەشێك لەو بارانەی كە بە گومرگی باشماخدا چونەتە ناو خاكی ئێران، بە بنكەی گومرگی پێنجوێندا تێپەڕیون‌و لەو بنكەیە پسوڵەی "كەشفی ئجور"یان بۆ كراوە، گومرگی سلێمانی لێكۆڵینەوە كردووە، بۆی دەركەوتووە ژمارەیەكی زۆر بار رۆیشتوەتە دەرەوە، بەڵام هیچ سەرەتایەكیان لە گومرگی پەروێزخاندا نییە.  گومانەكان لەبارەی دۆسیەكەوە ئەوانەی لە نزیكەوە ئاگاداری دۆسیەكەن، گومانیان هەیە لەوەی چۆن ماوەی ساڵێك ئەم ساختەكارییە بەردەوام بووە‌و بەسەر كارمەندانی گومرگدا تێپەڕێوە لە حاڵێكدا هەموو بەڕێوەبەرێتییەكانی گومرگ بەشی (داتابەیس، ئامار، پلان‌و وردبینی)یان هەیە‌و لەهەر یاریپێكردنێك یان دەستكاری‌و جوڵەیەك لەداهاتدا، دەبێت ئەو بەڕێوەبەرایەتیانە ئاگادار بن، بەتایبەتیش لەرێگەی بەشی وردبینییەوە، لە حاڵەتی هەڵەكردندا فەرمانبەر دەبێت كورتهێنان لە پارەكاندا ببژێرێت. سەرباری ئەمە باسلەوەدەكرێت، لەناو وەسڵە ساختەكراوەكاندا وەسڵ هەیە كە لەسەر بڕی پارەكەی نوسراوە (101 ملیۆن) دینار، كە ئەمە باجی گومرگی (200 تەن) كانزای لەكاركەوتووە، پرسیارەكە ئەوەیە ئایا هیچ بارهەڵگرێك هەیە (200 تەن) هەڵگرێت ؟  یەكێك لە رەخنە گەورەكان لەم دۆسیەیەدا ئاڕاستەی بەڕێوەبەرایەتی گشتی گومرگ دەكرێت ئەوەیە چۆن ماوەی ساڵێك بووە ئاگای لە جوڵەو داهاتی گومرگ نەبووە ؟ چۆن دەبێت داهات كەمی كردبێت لە حاڵێكدا پرۆسەی ناردنەدەرەوەی كانزا زیادی كردبێت ؟  بەگشتی لەم پرۆسەی ساختەكارییەدا كێشەی گەورەی بەڕێوەبردن لە گومرگدا دەركەوتووە، كەموكورتی بەڕێوەبردن گەیشتوەتە ئاستێك، سەرباری ئەوەی چەند مانگێكە ئەم دۆسیەی ساختەكارییە ئاشكرابووە، بەڵام ماوەی چەند رۆژێكە گومرگ مۆرو وەسڵی تایبەتی بەخۆی گۆڕیوە. ئەم دۆسیەیە جارێكی تر قسەوباسی ئەوەی هێناوەتە پێش كە جگە لە سزادانی تێوەگلاوان لە دۆسیەكە، رەنگە پێویست بكات حكومەت پێداچوونەوە بە چۆنیەتی بەڕێوەبردنی كاری گومرگ‌و بەڕێوەبەرایەتییەكانی گومرگدا بكات. لیژنەیەك پێكهێنراوە بۆ لێكۆڵینەوە لەم دۆسیەیە، كە دەوترێت پێكهاتووە لە دادوەرێكی وەزارەتی دارایی‌و نوێنەری چاودێری دارایی‌و بەرپرسی بەشی یاسایی گومرگی سلێمانی، هەندێك رەخنەیان لە لیژنەكە هەیە‌و دەڵێن لە ئاستی گەورەیی قەبارەی ساختەكارییەكەدا نییە.   

د. بەكر صدیق هیچ كاتێك مێژوونوسان ناتوانن لە تۆماركردنی رووداوەكانی 31 ی ئاب و 16 ی ئۆكتۆبەردا، بێلایەن بن  . چونكە بۆ هەر دوك روداوەكە ، سەرچاوەی زانیاری دژ بەیەك و پاساوی هەمە چەشن ، دەچنە ناو ئەو دیكۆمینت و بیرەوەری و سەربوردانەی كەسەكانی ناو روداوەكان دەیاننوسنەوە . بۆهەردووك روداوەكەش سەرەرای ئەو جیاوازیەی لە گیرانەوەو خستنە رووی راستیەكانیاندا هەیە ، لاسەنگیەكی تەواو  لە هەلمەتی میدیایی دوو قوتابخانە نەیارە مێژویەكاندا بەدی دەكرێ . بەوحوكمەی لە بەرەی قوتابخانەی تالەبانیەوە ، هەندێك لە مەكتەب سیاسیەكان و سەركردایەتیەكانی پێش كۆنگرەی چوارەمی (ی،ن،ك) لە چەواشەكردنی روداوی 16 ی ئۆكتۆبەردا ، بەهەر پالنەرو هۆكارێك بوبێ ، هاو هەڵوێستی پارتی بون . ئەمەش بوە هۆكارێك ، كە گوتاری بەرەی 31 ی ئاب ، بەسەر گوتاری 16 ی ئۆكتۆبەردا، خۆ بسەپێنی . بەڵام لەناو ئەو واقیعە نا هاوسەنگەدا ، كۆمەڵێك ڕاستی حەشاردراون، كە ئەگەر لەئێستادا ساخ نەكرێنەوە، نەوەكانی داهاتومان دەتوانن ، بە یاسا  ساخیان بكەنەوە .  ئەوسا نەفرەتی ئەوان بەسەر میژونوسان و میدیاكارو سەركردەو بكەرە سیاسیەكانی ئێستاماندا دەبارێت . لەم نوسینەدا هەوڵ دەدەین بەرچاورونیەكی سیاسی و یاسایی، بدەینە ئێلیتی سیاسی و رۆشنبیران و تەنانەت دەسەڵاتی یاسادانەر لەهەریم و خاوەندارەكانی هەردووك  روداوەكە ، تا هەر لایەو بە هەلوێستی خۆیدا بچێتەوەو چیتر دیماگۆجیانە مامەلە لەگەل روداوەكان نەكرێت ،  وبازاری تەخوینكردنی نارەوا، راستیی روداوەكان چەواشەنەكات و تاك و كۆی كۆمەلگاكەشمان لە سێبەری شەری میدیاو سۆشیال میدیای حیزبییانەدا نەگەوجێنرێن ! یەكەم:- روداوی 31ی ئاب و دەرەنجامەكانی  هۆكاری روداوی 31 ی ئاب ، بۆ ئەو بایەخە ستراتیژیەی دەروازەی ئیبراهیم خەلیل دەگەرایەوە ، كە لە سایەی گەمارۆ ئابوریەكەی سەر عیراقدا لە  سالانی نەوتەكانی سەدەی رابردوو دا بۆ توركیاو عیراقی سەردەمی سدام حسین پەیدای كردبوو . ئەوەش ئەو دەرفەتەی بۆ بارزانی رەخساند كە رقی توركەكان و رژیمی بەعس دەرهەق بە تالەبانی و حیزبەكەی بقۆزێتەوە و بە هێنانی سوپای بەعسیەكان بۆسەر هەولێری پایتەخت، بە پالپشت و پشتگیری  توركەكانیش ،  ئەمریكای لە هاوپەیمانێتی نێوان خۆیی و و سەدام حسیندا ،تارادەیەكی زۆر  بێلایەنكرد. بەو مانایەی دەروازەی ئیبراهیم خەلیل كە دەكەوتە قەلەمرەوی پارتیەوە ، توركیای لە لێكەوتەكانی گەمارۆكانی سەرعیراق دورخستبوەوە! ریگە خۆشكەریش بوو كە هاوپەیمانێتی دوقۆلی نێوان پارتی و توركیا دژی پەكەكە، پێهەڵابچێت . عیراقیش لەو سەردەمەدا بۆ دەستەبەركردنی رێگای ابراهیم خلیل بەڕێرەوی هەولێر -كەركوكدا ، ناچاربو بچێتە ژێرباری ئەوەی كە دوای دەركردنی یەكێتی لەهەولێر ، شارەكە بۆ پارتی لە هێزی سوپاكەی خۆی چۆل بكات . ئەوە جگە لەوەی ،بریاری 688 یش رێگەی مانەوی سوپای عیراقی سەدام حوسێنی نەدەدا چونكە هەولێر دەكەوتە ناو هێلی پانی 36 وە . بەدەر لەو هۆكارانەش ، سیاسەتی پارتی  لەبەرامبەر تالەبانی و یەكێتیدا لەسەر چونێتی مامەڵەكردن لەگەل رژیمەكەی صدام حسیندا ،ئەوپەری ناتەبابون ، چونكە تالەبانی و یەكێتی پێیان لە سەر سیستمی فیدرالی دادەگرت و پیشمەرگەو فەرماندەكانی یەكێتی بەرەی شەریان لەگەل پارتی چۆل دەكردوو دەچونە سەر مۆلگەكانی بەعس لە دەوروبەری كەركوك . لەلایەكی تریشەوە ، فراكسیۆنی پارتی لە پەرلەمانی كوردستان  دژی ئەو هەڵوێستەی فراكسیۆنی یەكیتی بون كە دەیویست ئاڵای عیراق لە پەرلەمانی كوردستان لاببرێ . پارتیەكان  پێیان لە سەر ئۆتۆنۆمی دادەگرت و بەتوندی دژی ئەوەبون سیستمی فیدرالی بكرێتە وەرەقەی گفتوگۆی لایەنی كوردی و حكومەتی ناوەندی لە بەغدا . ئەمانە هۆكاربون كە پارتی هەولێر كۆنترۆل بكات. ئەوەی كە بۆ یەكێتی ببوە خالی لاواز لە بەرامبەر پارتیدا ، تێپەرینی سوپای پاسداران بوو بە سنوری یەكیتی و حاجی هۆمەراندا ، ئەوەش بوە پاساوی نیگەرانی ئەمریكاو  هێندەی تر پاساوی بیدەنگی ئەمریكای لە بەرامبەر ریكەوتنە سێقۆلیەكەی توركیاو عیراق و پارتی بۆ هێنانی سوپای بەعس بۆهەولیرو دەركردنی یەكێتی لەو شارە ، خولقاند . كەوابێ دەكرێ بوترێ كە 31 ی ئاب سەفقەیەكی سێقۆلی توركەكان و عیراق و پارتی بوو ،بە بێدنگبونی ئەمریكا، بۆ ئەوەی بریاری سیاسی لە هەرێمی كوردستاندا ، بكەوێتە دەستی پارتی و دواجار جوگرافیای ریرەوی بازرگانی هەمەچەشنەی ئیبراهیم خلیل-هەولێر بەغداد ، بەسەلامەتی بمێنێتەوە ،كە لەدواجاردا پارتی و عیراق و توركیاش لە روی ئابوریەوە تێكەلتر و سودمەند تر دەبون . بەڵگەی ئەو راستیەش لە روداوەكانی جەولەی كۆتایی شەری ناوخۆی نێوان پارتی و یەكێتیدا دەردەكەوێت كە یەكێتی ناوی لێنابووگەردەلولی دوەمی تۆڵە ،كاتێك یەكێتی  ویستی واقعی داسەپاوی جوگرافیای 31 ئاب بگۆرێ، زۆری نەمابوو بگاتە ئامانج و ئاكامی روداوی 31 ی ئاب هەڵگەرێنێتەوە . بەلام توركیا بەهێزی ئاسمان و بە پالپشتی تۆپخانەی نوێچەشن روبەرووی هیزەكانی یەكێتی وەستایەوەو نەیهێشت ئەوسنورەی دیگەڵە دەستكاری بكرێت كە ئاكامی 31ی ئاب دروستی كردبوو . بەڵام لە سەروبەندی روخانی بەعسدا ، رەوانشاد تاڵەبانی ، لە پێناوی دەستكەوتی نەتەوایەتیدا ، قبولی واقعی 31 ئابی كردوو ، سەرەنجام لەدوای روخانی بەعسیشدا ، بێئەوەی هیچ مەرجێك بخاتە روو، قبولی كرد بەهەژمونی سەربازی  و ئەمنیانەی پارتیەوە ، هەولێر ناوەندی حوكمرانی كوردستان بێت . ئەوەش هێندەی تر بواری بۆ پارتی رەخساند كە تەحەكوم بكات و دەستبگرێت بە مونۆپۆلكردنی دروستكردنی بریاری سیاسی و داراییەوە . چونكە لە هەولێردا بە ئێستاشەوە ، دامەزراوە دەستوریەكان كاتێك بەركارن ، كە هیچ بریارو یاسایەك توانای ئەوەی نەبێ هەژمونی پارتی لە هەولێر بروشێنی !! دوو ەم: روداوی 16 ی ئۆكتۆبەر و دەرەنجامەكانی  ئەگەر ئامانج لە روداوی 31ی ئاب ، وەك هاوپەیمانێتیەكی رانەگەیەنراوی سێ قۆلی نێوان توركیاو پارتی و دەسەلاتی بەعس لە سالی 1996ی سەدەی رابردوودا ، بۆ زاڵبونی پارتی بوبێت بەسەر جوگرافیای سیاسی هەولێری پایتەخت و لەوەوە مۆنۆپۆلی دروستكردنی یاساو بریارەسیاسیەكان لەكوردستاندا لەلایەن بارزانی و پارتیەوە بەرجەستە بوبێت . ئەوا روداوی 16ی ئۆكتۆبەر بەپێچەوانەوە ، بۆ ئەوەبوو ، كە هەرچۆنێك بێت رێگە لەوە بگیرێت ناوچە جێناكۆكە رزگاركراوەكان بەخوێنی هەزاران شەهید لە  دەستی داعش ، جارێكی تربكەونەوە دەست هەژمونی دەسەڵاتی حكومەتی ئیتیحادیەوە . بەدیوێكی دیكەدا ، دەتوانرێت بوترێت ،كە بۆ رێگری كردن لە لێكەوتە نەرێنیە سیاسی و سەربازی و ئابوریەكانی بریاری ریفراندۆم ، ئەوباڵەی یەكێتی ، كە نەیتوانی رێبگرێت لە خزانی بەشێكی زۆری بریاربەدەستانی ئەوسای یەكێتی بۆ ژێر هەژمونی بریاری پارتی لە ئەنجامدانی ریفراندۆمدا ، هەولیدا ، ئەودۆخە بقۆزێتەوە بۆ ئەوەی دور لە هەژمونی پارتی، لەرێگەی خۆكردنەوە بەخاوەنی بریاری سیاسی لە سنوری زۆنی سەوزدا ، رێبگرێ‌ لەو كارەساتە چاوەروانكراوەی كە ناوچە جیناكۆكەكان روبەروی دەبنەوە . روداوی 16ی ئۆكتۆبەر دەرەنجامی ، بێئاكامبونی ئەو دانوستانەبوو لە نێوان ئەو ئاراستەیەی لە ناو یەكێتیدا كە دركیان بە خەتەری لەدەستدانی ناوچە جیناكۆكەكان كردبوو، لەگەل حكومەتەكەی عەبادیدا . بەلام هاورانەبونی پارتی لەگەل یەكێتی  لەو دانوستانەو دابەشبونی یەكێتی بەسەر دو ئاراستەدا ، حكومەتی عیراقی، هەلی پشتیوانی توركیاو ئیران و ، بێلایەنبونی ئەمریكای لە پرۆسەكە قۆستەوەو ، هەموو هەوڵەكانی دوای ریفراندۆم و لە پێش 16ی ئۆكتۆبەری 2017 ی بێبایەخكردوو، هێرشی بۆ سەر ناوچە جیناكۆكەكان ،كە تەوەری دانوستانی نێوان یەكێتی حكومەتی عیراقی بون ، غافلگیرانە  ئەنجامدا ! لە پرسی ریفراندۆمیشدا توركیاو ئیران بە پلەی یەكەم هەرەشەكانیان بۆ ئەوەبوو كە ریفراندۆم لە  ناوچە جێناكۆكەكان بە تایبەت لە شاری كەركوك، ئەنجام نەدرێت. خۆ ئەگەر ریفراندۆم لەوناوچانە و كەركوكدا ،دا ئەنجام نەدرابا، زەحمەت بوو روبەروو بونەوەی چەكداری رویداباو بەو ئەندازەیە ناوچە جیناكۆكەكان و كەركوك بكەوتنایەتەوە ژێر هەژمونی حكومەتی ئیتیحادیەوە . بەوەش یەكێتی لەروی سیاسی و جوگرافی و جەماوەری لە سەر ئاستی هەریمایەتی و عراقی و كوردستانیدا ، لەبەرامبەر پارتیدا، هاوسەنگی سیاسی بۆ دەگەرایەوە . بەلام بە لەدەستدانی كەركوك ، لە سەرئاستی ناوخۆی هەرێمدا ، پارتی ئەو بایەخە ئەرزیەی بۆگەرایەوە كەبەهۆی روداوی 31 ی ئابەوە ، پارتی كردبوە خاوەنداری سەرەكی لەدروستكردنی بریاری سیاسی لە كوردستاندا .كەوابێ روداوی 16ی ئۆكتۆبەر پیلانێكی كەمەرشكین بوو دەرهەق بەیەكێتی ئەنجامدراو لە قازانجی پارتی شكایەوە ، چونكە جگە لە تێكچونەوەی بالانسی سەربازی و جوگرافی و سیاسی و كۆمەلایەتی بۆ یەكێتی ، پارتی ، روداوی 16ی ئۆكتۆبەری دیماگۆجیانە ، كردە چەپەری شاردنەوەی ئەو قەیران و دۆخە ناهەموارو نابوتیانەی كە  بریار و ئەنجامدانی ریفرادۆم، بەسەر خەلكی كوردستانیدا هێنا ، و لەرویی میدیایشەوە هێندەی تر توانی بابەتێكی پرۆپاگەندەیی  كەمەرشكینی چەشنی 16ی ئۆكتۆبەر ،بكاتە دەستەخوشكی روداوی 31 ی ئاب .                                  سبێیەم :ڕامانێك لە تانەو تەشەری هەردولای روداوەكە  ئەگەر سەرنجێك لە و تانەو تەشەرو شەرە میدیایەی نیوان هەردوو لای روداوەكان بكەین، ئەم تێبینیانە دەكەونە بەرچاوی هەركەسێك كەخەمی نیشتیمانی وولاتەكەی هەڵگرتبێت :- 1-31 ئاب رێكەوتنی پارتی بوو لەگەل رژێمیك ، كە پەرلەمانی كوردستان ،لە یاسای ەلبژاردنی پەرلەمانی كوردستاندا، بەدەسەلاتی داپلۆسێنەری ناساندبوو ، ئەو رژێمەبوو كە سیاسەتی ئەنفال و كیمیایی بارانی هەلەبجەو ئەنفالی بارزانیەكانی ئەنجام دابوو، سەرەرای گەمارۆی نێودەولەتیش ، گەمارۆی بەغدادی بەسەر خەلكی كوردستاندا سەپاندبوو ، وە ئامادە نەبوو بچوكترین مافی سیاسی و مەدەنی خەلكی كوردستان بسەلمێنێ . بەلام 16ی ئۆكتۆبەر دەرەنجامبی بێئاكامبونی دانوستانی یەكێتی و نەوەكانی تالەبانی بوو لەگەل كابینەی عەبادیدا . بەومانایەی 16ی ئۆكتۆبەر فەشەلی ریككەوتنبوو ، نە ك ئەنجامی ریككەوتن .  31 ی ئاب بۆ هێنانی سوپای بەعسی سەدام بوو بۆ پایتەختێك كە یەكێتی دەرپەرێنی و پارتی بخاتە شوێنی . بەلام 16ی ئۆكتۆبەر ئەگەر رێكەوتنبا لەگەل نەوەكانی تالەبانی ، یەكێتی بە هژمونێكی سەربازی و ئەمنی و ئیداری دەمایەوەو تەحەكومی بە بریاری كارگێری دەكرد لەناو كەركوكدا،. بەلام ئەوەی كە بەدەرنرا ، خودی یەكێتی و هێزو  هەژمونی یەكێتی بوو . لێرەدا پرسیارێك زەق دەبێتەوە ، كە ئاخۆ هیچ هێزێك هەیە رێكەوتن بكات بۆ بچوككردنەوەو دۆڕانی خۆی؟ لە كاتێكدا 16ی ئۆكتۆبەر هەمان شكستی 31 ئابی بەسەر یەكیتیدا هێنایەوە ، بەلام ئەمجارە لە شارێك كە جەوهەری ململانێی كورد و بەغدا پێك دەهێنی و تاڵەبانی دانوستانی ساڵانی 1983 و1984 ی لەسەر ئەو شارە تێكدایەوە !! 2- لەگەل ئەوەدا كە تا جێبەجیكردنی مادەی 140ی دەستوری 2005 ، مافی دەولەتی ئیتیحادیە لەو ناوچانەدا بونی سەربازی و ئەمنی هەبێت ، واش، یەكێتی لە دوای ریفراندۆم و پێش 16ی ئۆكتۆبەر هەوڵیدا رێگە لە هاتنەوەی دەسەڵاتی ناوەند بگرێ . بەلام پارتی ، هاوكاری یەكێتی نەكرد و بە شێوەیەكی پێچەوانە ، مامەلەی لە گەل روداوەكەداكرد. سەرەرای ئەوەش ئەگەر پەلكێشكردنی دەسەلات و هێزی بێگانە بەخیانەت لێكبدرێتەوە ،ئەوا هاتنی سوپای عیراق بۆ ناوچە جێناكۆكەكان رەوایەتی دەستوری هەیە . بەلام هاتنی سۆپای عیراقی پێش  راستاندنی دەستوری 2005 بۆ هەولێری پایتەختیش نەك بۆ شاری كەركوك . دەبێ چ وەسفەیەكی سیاسی و یاسایی بۆ بكریت نەك لە ئێستادا بەلكو لە سێبەری دەیان و سەدان و هەزاران نەوەی داهاتوماندا كاتێك نەتەوەكەمان لەم بەشەی كوردستاندا بگاتە كات و سەردەمی دامەزراندنی سیستمێكی سیاسی و یاسایی داد پەروەرانە، كە تیایدا پایەكانی دەولەتێكی دەستوری راگیرببن ؟ 3- ئەگەر هاتنی سوپای عیراق بوكەركوك بە خیانەت وەسف بكرێت و بدریتە پال لایەنێك  كەتەنها دانوستانی بۆ رێگریكردن لە هاتنی سوپایەكی شەرعی بۆ شارێكی ناكۆكی لەسەر بە رێسایە دەستوریەكانی ولاتەكەمان كردوە  ، ئایا چ سیفەتێكی سیاسی و یاسایی دەدرێت بە بێدەنگبونی هیزێك لە بەرامبەر هاتنی سوپای دەولەتی توركیا كە بە هەموو ناوچەكانی بادیناندا تەراتێن دەكات و لەجیاتی روبەرو بونەوە ، هەماهەنگی سەربازیشی لەتەكدا دەكری و لە زۆربواری ئەمنی ئابوری و سیاسیشدا لەگەلیدا ریكەوتن هەبێت ؟ سەرەراش هیچ كاتێك بۆ هیچ كام لە بابەتی رێككەوتنەكاندا پەرلەمان و دامەزراوەكانی دەسەلات لێیان ئاگادارنەبن ! ئەگەرچی زۆرینەی پەرلەمانیش لە دەستی ئەو هێزەدابێ كە خاوەنی زۆنێكە كە توركیاو هیزەسەربازی و موخابەراتیەكەی تەراتێنی تێدا بكات ؟! 4-لەروی رەوایەتی یاساییەوە ، روداوی 31 ی ئاب ، دەرەنجامی رێكەوتنێك بو لە گەل دەسەلاتێك كە رژێم و سەرۆكەكەی ، شەرعیەتی یاساییان لە سەر ئاستی هەرێمی كوردستان و لە سەرئاستی ئیقلیمی و نێو دەولەتی ، لەدەست دابوو . بەلام ئەو دانوستانەی كە نەوەكانی تاڵەبانی پێش 16ی ئۆكتۆبەر ئەنجامیاندا، لەگەل دەسەلاتێك بووكە شەرعیەتی یاسایی لەسەرئاستی عیراق و هەریمی كوردستان و ولاتانی ئیقلیمی و نێودەولەتی ، لە ئەوپەری دابوو . 5-ئامانج لە رێكەوتنی پارتی و بەعسیەكان ، لە روداوی 31ی ئابدا ، پیلان گێران بوو بەمەبەستی قولكردنەوەی برینەكانی شەری ناوخۆو ، دابەشبونێكی قوڵی سیاسی و جوگرافی و سەربازی لێكەوتەوە . بەلام ئامانج لە دانوستانەكانی پێش 16ی ئۆكتۆبەر ، بریتی بوو لە رێگرتن لە و كارەساتەی كەبوەهۆی لەدەستدانی ناوچەو روبەرێكی بەرینی كوردستان . بەو مانایەی بكەرانی دانوستانەكانی پێش 16ی ئۆكتۆبەر مەبەستیان بوو ، ئەو ناوچە جێناكۆكانەی كە  بەهۆی شەری داعشەوە وەك دیفاكتۆیەك لكاونەوە بە خاك و جوگرافیای هەرێمی كوردستانەوە  ، وەك كارتێكی گوشار لەبن دەستی هەرێمدا وەمێنن ، تاچارەنوسی مادەی 140 یەكلایی دەبێتەوە . بۆیە هیچ دیكۆمێنتێك نیە پێچەوانەی ئەو بۆچونەی نوسەری ئەم بابەت بسەلمێنێ . بەتەنیشت ئەوەشەوە ، ئەو قوربانیانەی حیزبەكەی تالەبانی لەكەركوك بەخشیان ، ئەوە پشتراستدەكاتەوە ، كە نەوەكانی تالەبانی هەولیان داوە ، ناوچەجێناكۆكەكانیان لەكیس نەچێت . بەلام هیچ دیكۆمێنتێك نیە كە هیچ رەوایەتیەكی نیشتمانی و یاسایی ، بخاتە پاڵ روداوی 31 ی ئابەوە . چونكە بكەرەكانی روداوی 31 ی ئاب نایشارنەوە كە پەنایان بۆ بەعس بردوە تا یەكێتی لە هەولێر دەربكەن . ناشكری بگوتری صدام حسین و رژیمەكەی لە پێناوی كوردایەتیدا، سوپای عیراقیان بردۆتە هەولێر!! چوارەم :-چوارچێوەی یاسایی بو لەمەحەكدانی هەردووك روداوەكە  هەر پێناسە كردنێك یان لەمەحەكدانی روداویكی سیاسی یان دیاردەیەكی نایاسایی بە ریسا یاساییەكان و بە تەخوین لەقەلەمدانی روداوێك لەروی یاساییەوە ،  ئەركی سەرشانی دەسەلاتی یاسادانەرە . بەو مانایەی ئەگەر بویسترێ  چەمكی تەخوینی سیاسی پێناسە بكرێت دەبێت لە قاڵبی رێسای یاساكان بدرێت و چوارچێوەو سروشتە یاساییەكەی لە ناو سیستمی یاساكانی هەلبژاردنەكانی ولات و لە ناو یاساكانی سزاداندا ، پیناسەكرابێت و سزاش دانرابێت بۆ كەسە سروشتی و مەعنەویەكان كە لە دیاردەی خیانەتەوە دەگلێن ، بەر حوكمی یاسای خیانەت دەكەون. لەو سۆنگەیەوە ئەگەر بمانەوێت كۆتایی بە سیناریۆی گەوجاندنی خەڵك بهێنین لەوەی ، كام لە  روداوەكانی 31 ی ئاب و 16ی ئۆكتۆبەر ، بە خیانەت لەقەلەم دەدرێن ؟ ئەوا دەبێت پەرلەمانێك دروست بكەین دور لە هەر ساختەكاریەك ئەندامانی هەلبژێردرابن ، و ئەوسا بە رەچاوكردنی ئاكاری یاسادانەری عیراق و یاسادانەری ئەو ولاتانەی خیانەتی نیشتیمانیان تیدا ئەنجام دراوە ، وەسفی یاسایی بۆ خیانەت بكەین و سزای تاوان و سزای سیاسیش بۆ بكەرەكانی دابنرێت . لە دەولەتی جەزائیردا لە یاسای ژمار 16 -10 ی سالی 2016 بە گوێرەی برگەی 18 لە مادەی 138 ، یاسادانەری جەزائیری ئەوەی سەپاندوە كە بەدەق دەلێت دەبێت هەركەسێك كە خۆی بو هەڵبژاردنەكانی سەرۆكایەتی لە جەزائیردا بپالێوێت، دەبێت ئەوبەڵگانە بخاتە روو كە بیسەلمێنن باوانی پالێوراوی لەدایكبوو ،لە یولیوی 1942 دا ، بەشداریان نەكردوە لە و كارانەی دژی شۆرشی 1954 ئەنجام دراون . لە یاسای هەلبژاردنەكانی ئەنجومەنی نوێنەرانی عیراقیشدا ، ژمارە 45 ی سالی 2013 دا ، یاسادانەری عیراقی لە برگەی دوەمی مادەی 8ی ئەو یاسایەدا پێی لە سەر ئەوەدا گرتوە كە ئەوكەسەی خۆی بۆ ئەندامێتی ئەنجومەنی نوێنەران دەپالێوێت نابیت یاسای دەستەی لێپێچینەوەو دادوەری ژمارە 10 ی سالی 2008 بیگرێتەوە . لە كاتیكدا ئەو یاسایە تایبەتە بە ریشەكێشكردنی حیزبی بەعس ، لە مادەی 10 ی ئەویاسایەشدا هاتوە كە هەموو ئەوانەی تاوانیان بەرامبەر گەلی عیراق ئەنجام داوە دەدرێنە دادگاو سزا دەدرێن . لە هەریمی كوردستانیشدا ، برگەی 6 لە مادەی بیست و یەكی یاسای هەڵبژاردنی پەرلەمانی كوردستان كە پەیوەستە بە مەرجەكانی خۆپالاوتن بۆ پەرلەمانی كوردستان بە دەق پێی لە سەر ئەوەدا گرتوە كە نابێت كەسی پالێوراو بۆ ئەندامێتی پەرلەمان بەشداری لە و تاوانانەدا كردبێت كە دەسەلاتی داپلۆسێنەر نەخشەی بۆ كێشاون یان لە كوردستان ئەنجامی داون .  بەلام یاسادانەری كوردستان لە مەرجەكانی خۆپالاوتن بۆ سەرۆكی هەرێم خۆی لە قەرەی ئەو بابەت و مەرجانە نەداوە كە لە مەرجەكانی خۆپالاوتن بۆ ئەندامێتی پەرلەمانی كوردستان دایناون.پرسیاری هەستیاری یاساییش ئەوەیە ، كە چۆن دەكرێت یاسا دانەر مەرجی قورس بۆ هەلبژاردنی ئەندامێتی پەرلەمان دابنێت،  بەلام مەرجەكانی كاندیدكردن بۆ هەڵبژاردنی سەرۆكایەتی هەریم خالی بن لەو مەرجە هەستیارانە ، لە كاتێكدا  هەڵبژاردنی سەرۆكایەتی، قورسایی سیاسی زیاترە لە هەلبژاردنەكانی تر ؟ لە بەر رۆشنایی ئەو چوارچێوە یاسایی و مەرجانەی كە یاسادانەرە جیاوازەكان لە جەزائیرو عیراق و لە یاسای پەرلەمانی كوردستانیشدا باسكراون . دەتوانین ئەم سەرنجە یاساییانەی خوارەو لە هەلوەستەماندا لە سەر روداوەكانی 31 ی ئاب و 16ی ئۆكتۆبەردا بەراورد بكەین بەم جۆرە . 1-بەپێی یاسای هەڵبژاردنی سەرۆكایەتی جەزائیرو یاسای هەلبژاردنەكانی پەرلەمانی عیراق بێت ، بەرونی ئاماژە بە وە كراوە كە بەشداری كردن لە دژایەتی شۆرش یان بەشداریكردن لە تاوانەكانی دەسەلاتی بێگانە لە جەزائیرو دەسەلاتی بەعس لە عیراقدا ، وەك تاوانێك ئەژمار دەكرێت و بواری بەشداری سیاسی ناهێلێتەوە . 2-لە كوردستاندا یاسادانەر بە شەرمەوە باسی دەسەلاتی داپلۆسێنەری كردوەو وەك بلێی نەیوێراوە دەسەلاتی داپلۆسێنەر ناوبنێ كە ئەوە بۆخۆی كەلێن و ناتەواویەكی یاساییەو دەبێت چارەسەر بكرێت . 3-یاسادانەری كوردستان ، تەنها لە خۆپالاوتن بۆ ئەندامێتی پەرلەمانی كوردستاندا ، كردویەتی بە مەرج كە كەسی پاڵێوراو نابێت بەشداری تاوانەكانی دەسەلاتی داپلۆسێنەری كردبێ . 4-یاسادانەر لە مەرجەكانی خۆپالاوتن بۆ سەرۆكایەتی هەرێم باسی ئەو مەرجەی نەكردوە كە لە مەرجەكانی خۆپالاوتن بۆ ئەندامێتی پەرلەمان سەپاندویەتی .  5- ئەگەر یاسادانەر ترسی نەبوبێت لە هەژمونی دەسەلاتی بەعس بەسەر هەولێرو پەرلەمانی كوردستانەوە، بۆچی ئەوكاتەی كە یاساكە دانراوە یان هەموار كراوەتەوە ، ناوی دەسەلاتی داپلۆسێنەر بە دەسەلاتی بەعس ناو نەنراوە ؟ لە كاتێكدا پەرلەمان لە دایكبوی ئەو راپەرینەیە كە دەسەلاتی بەعسی لە كوردستان روخاند . یان دەكرێت بپرسین بۆ تا ئێستاش دوای روخانی بەعسیش هیچ  فراكسیۆنێكی ناو پەرلەمانی كوردستان خۆی لە قەرەی ئەو مادەیە نەداوە ؟ وە دەكرێت بپرسین بۆچی یاسادانەر هەمان مەرجی پالیوراوی پەرلەمانی نەكردۆتە مەرج بۆ كاندیدی سەرۆكایەتی هەرێمی كوردستان ؟ 6- بەو پێودانگە یاساییانەی لە عیراق و جەزائیرو كوردستانیش كە خرانە روو ، دەكرێت بپرسین ئایا روداوی 31ی ئاب تاوان و خیانەتە یان روداوی 16ی ئۆكتۆبەر ؟ وەلامی ئەو پرسیارە بۆ خوێنەران و یاسادانەرانی ئێستاو ئایندەی هەریمی كوردستان جیدەهێلین . بەلام راستیەك هەیە كە پێویستە پاڵپشتیەكی یاسایی، بۆ چەمكی خیانەت لە ناو دامەزراوەی یاساداناندا ، دابتاشرێ . بۆ ئەوەی كۆمەڵگای كوردی ، لە گرێی تەخوینی سیاسی قوتاری ببێت!  

راپۆرت: محەمەد رەئوف- فازل حەمەڕەفعەت پەنەما، BVI، كاریبیەن ئایلەند.. ئەم شوێنانە بەهەشتی ئەو بەرپرسانەن كە سەروەت‌و سامانەكانیان تێدا شاردوەتەوە، بەرپرسانی كورد لەم ناوچانەی جیهان كۆمپانیا بەناوی كەسانی ترەوە دەكەنەوە‌و پارەكانیان دەشارنەوە، یەكێتی 14 ساڵ بەر لەئێستا قەبارەی سەروەت‌و سامانەكەی (10 ملیار) دۆلار بووە، ئێستا (100 مليار) دۆلارە، حكومەتەكەی بەدەست قەیرانی داراییەوە دەناڵێنێت، مەسرور بارزانی پارەی بۆ موچەی فەرمانبەران دەستناكەوێت، سەروەت‌و سامانی بەرپرسان لە كوێیە ؟       پارە دزراوەكان "هەر كەسێك زانیاری بە حكومەت بدات لەبارەی شوێنی پارە دزراوەكانی عێراقەوە، بە بڕی 10 ملیۆن دۆلار خەڵات دەكرێت"، ئەمە بڕگەیەكە لەناو یاسایەكی عێراقدا بەناوی یاسای (گەڕاندنەوەی پارە دزاوەكان). ئەم یاسایە گرفتی تێدایە‌و بۆ دۆخی ئێستا ناگونجێت، هەندێك لە فراكسیۆنەكانی پەرلەمانی عێراق دەیانەوێت هەمواری بكەنەوە، چونكە مەبەست لە پارە دزراوەكان لەم یاسایەدا، ئەو پارانەیە كە تاوەكو ساڵی 2003 دزراون، واتا بەر لە روخانی رژێمی پێشووی عێراق، ئەمە لەكاتێكدایە قەبارەی پارە دزراوەكانی عێراق لەدوای روخانی رژێمی سەددام كەمتر نییە لە پارە دزراوەكانی بەر لە كەوتنی سەددام. یوسف محەمەد سەرۆكی فراكسیۆنی گۆڕان لە پەرلەمانی عێراق بە (درەو)ی راگەیاند، بەنیازن لەگەڵ چەند كوتلەیەكی تری شیعەو سوننە لە پەرلەمانی عێراق داوای هەمواركردنەوەی یاساكە بكەن، بەجۆرێك دزییەكانی دوای ساڵی 2003 بگرێتەوە. قەبارەی پارە دزراوەكانی عێراق‌و هەرێمی كوردستان لەدوای ساڵی 2003وە بەدیاریكراوی نازانرێت‌و ژمارەی جیاواز لەبەردەستدان، مانگی تەموزی رابردوو رۆژنامەی (نیویۆرك تایمز)ی ئەمریكی رایگەیاند" سیاسەتمەدارانی عێراقی نزیكەی (150 ملیار) دۆلاریان لە بانكەكانی دەرەوەدا داناوە، هەندێك دەڵێن بڕی پارەكە زیاترەو دەگاتە (300 ملیار) دۆلار". راپۆرتەكەی (نیویۆرك تایمز) بەوردی باسی لە چۆنیەتی ناردنەدەرەوەی پارەی هەرێمی كوردستان نەكردبوو لەلایەن بەرپرسانەوە، تەنیا ئاماژەی بەوەكردبوو لە هەرێم بنەماڵەی تاڵەبانی‌و بارزانی دەستیان بەسەر گرێبەستەكاندا گرتووە، پرسیارەكە ئەوەیە ئایا بەرپرسانی هەرێم چۆن پارەكانیان دەبەنە دەرەوەی وڵات ؟ یاخود چۆن پارە سپی دەكەنەوە ؟ 118 بەرپرسی كورد لەژێر چاودێریدان مانگی ئازاری ساڵی رابردوو، یەكێتی ئەوروپا دوای بەدواداچونێكی چەندین ساڵە لەسەر كەیسی زیادبوونی دیاردەی سپیكردنەوەی پارە لە بانكەكانی ئەوروپادا، لەڕێگەی "دەسەڵاتی بانكیی یەكێتی ئەوروپا"وە دەزگایەكی بۆ روبەڕووبونەوەی (سپیكردنەوەی پارە، ئاڵوگۆڕی پارەی زۆر، پرۆژەی وەبەرهێنانی كارەكتەرە سیاسییەكان) لەناو سنوری یەكێتی ئەوروپا، دامەزراند، ئەو دەزگایە ناوی لێنرا "ئاژانسی چاودێری بۆ روبەروبونەوەی سپیكردنەوەی پارە". (درەو) ساڵی رابردوو، بەدواداچوونی كرد بۆ پشتڕاستكردنەوەی ئەو زانیارییانەی كە باسیان لەوەدەكرد بەرپرسانی حزبی‌و حوكمی كورد سەرقاڵی سپیكردنەوەی پارەن، ئەوكات دەستمان گەیشت بە كەسێكی نزیك لە "ئاژانسی چاودێری بۆ روبەروبونەوەی سپیكردنەوەی پارە" لە دەسەڵاتی بانكیی یەكێتی ئەوروپا. ئەو سەرچاوەیە بە (درەو)ی راگەیاند، (118) كارەكتەری حیزبی‌و حكومی هەرێمی كوردستان لەژێر چاودێریی وردی ئاژانسی روبەرووبونەوەی سپیكردنەوەی پارەدان لە یەكێتی ئەوروپا (ناوی بەشێك لەو بەرپرسانە لای درەو  پارێزراوە). بەپێی بەدواداچونەكانی (درەو)، دەسەڵاتی بانكیی یەكێتی ئەوروپا زانیاری لەسەر ئەو بەرپرسانەی هەرێم لەبەردەستدایە كە لەنێوان (2011 بۆ 2019)  پارەیان بە ناشەرعی پەیداكردووە‌و پارەكانیان رەوانەی بانكەكانی ئەوروپا كردووە، هەندێك لەوانە پرۆژەی گەورەیان دامەزراندووەو موڵك و ماڵیان پێ كڕیوە (ناوی كەسایەتییەكان‌و پرۆژەكانیان لە هەندێك لە وڵاتانی وەك ئەڵمانیاو بەریتانیاو سویسراو فەرەنساو هۆڵەندا لای (درەو) پارێزراوە، تائەوكاتەی لێكۆڵینەوەكان دەگەن بەئەنجام‌و بەفەرمی بڵاودەكرێنەوە). هەرچەند بەپێی زانیارییەكانی (درەو)، بەهۆی ئەوەی حكومەتی عێراق وەكو پێویست زانیاری لەبارەی ئەو كەسانەوە نەداوە بە "ئاژانسی چاودێری بۆ روبەروبونەوەی سپیكردنەوەی پارە"، تاڕادەیەك لە ئێستادا پرۆسەی چاودێرییەكە راوەستاوە، چونكە هەندێك كەسایەتی سیاسی كاریگەری عێراق لە لیستی گومانلێكراواندان‌و لێكەوتەكانی هەر بڕیارێكی ئاژانسەكە كاریگەری گەورەی لەسەر دۆخی سیاسی عێراق دەبێت، بەرپرسانی كورد ئەوانەی پارەیان ناردوەتە دەرەوە لەمەدا سودمەندبوون‌و جارێ هیچ بڕیارێك لەسەر سامانەكانیان نەدراوە.  پارە چۆن سپی دەكرێتەوە ؟ (درەو) چەندین چیرۆكی سپیكردنەوەی پارەی لەلایەن بەرپرسانی كوردەوە دەستكەوتووە، كە شێوازی جیاوازیان هەیە. یەكێك لەو بەرپرسە كوردانەی كە پارە سپی دەكاتەوەو لەو رێگەیەوە سەروەتەكەی دەشارێتەوە، كەسێكە كە لە عێراق پۆستێكی باڵای هەیە. بەپێی ئەو زانیارییانەی كە لە چەند كەسێكی شارەزایی بواری بانكیی لە ئەوروپا دەست (درەو) كەوتوون، ئەو بەرپرسە بۆ شاردنەوەی سامانە زۆرو زەوەندەكەی كە لەڕێگەی كۆمپانیایەكی خۆماڵییەوە لە سلێمانی دەستی دەكەوێت، كۆمپانیایەكی لە (پەنەما) تۆماركردووە، سەرمایەی كۆمپانیاكەی خستوەتەسەر ژمارە بانكیی كەسێك لە دورگەكانی ڤێرجینی بەریتانیی (BVI)‌و ژمارە حسابییەكە بە (كاریبیەن ئایلەند) بەستوەتەوە، بەمشێوەیە سامانەكەی شاردوەتەوە، چونكە كۆمپانیاكان لەم ناوچانەی جیهان تاكس "باج" نادەن، بۆیە ناكەونە ژێر چاودێرییەوەو خاوەنەكانیان دەتوانن ناسنامەی راستەقینەی خۆیان بشارنەوە‌و بەناوی ترەوە تۆماری بكەن. هەمان ئەم كارەكتەرە سیاسییە چەند ساڵێك پێشتر بڕی (900 ملیۆن) دۆلاری كەوتووەتە عەممانی پایتەختی ئوردن‌و دۆسیەی لەسەر كراوەتەوە، بەڵام ئەمە سامانی پشكەكانی نەبووە لە كۆمپانیاكەی سلێمانی، بەڵكو ئەو داهاتانە بووە كە بەرێگەی جیاواز لە بەغداد دەستی كەوتووە، ئەم پارەیە ماوەیەك دۆسیەی لەسەر كراوەتەوە، بەڵام ئێستا داخراوە.  بەرپرسێكی تری كورد لە عێراق (ناوەكەی لای درەو پارێزراوە)، چەند ساڵێك لەمەوبەر بڕی (200 ملیۆن) دۆلاری وەكو بەرتیل لە كۆمپانیایەكی كەنەدی بەناوی (نۆرتێل) وەرگرتووە لەبەرامبەر پێدانی گرێبەستی راكێشانی هێڵی ئینتەرنێت بەو كۆمپانیایە.   هەموو ئەم پارانە كە بەرپرسانی كورد بەشێوەی جیاجیا دەستیان دەكەوێت، زۆربەیان دەچن بۆ دورگەكانی (كەیمەن‌و پەنەما)، ئەوەش لەڕێگەی "كۆمپانیا هۆڵدین" واتا "گروپی كۆمپانیا"، ئەمانە ژمارەیەكی زۆر كۆمپانیان كە لەژێر چەترێكدا كۆدەبنەوە، كۆمپانیاكە بەناوی بەرپرسەكە خۆیەوە نابێت، بەڵكو بەناوی گروپی پارێزەرانەوە دەبێت كە ئێستا زۆرێك لە كۆمپانیاكان بەوشێوەیە كاردەكەن، ناوی بەشێك لە بەرپرسانی هەرێم لای (درەو) پارێزراوە، كە لەو دوو دورگەیە پارەكانیان خستوەتەگەڕ، هەروەها بەشێكیشیان پارەو پرۆژەكانیان لە (سویسرا، قوبرس، ماڵتا، ئیستۆنیا‌و لیتوانیا..) داناوە، كە بانكەكانیان ناكەوێتە ژێر چاودێری‌و لێكۆڵینەوەی وڵاتانی یەكێتی ئەوروپاو ئەمریكاوە، بۆیە یاسای بانكیی تایبەت بەخۆیان هەیەو بازرگان‌و سەرمایەداران ناو و پارەو پرۆژەكانیان پارێزراوە. ئەم وڵاتانە رێككەوتنی پەیوەست بە بانك‌و پرۆژە ئابورییەكانیان لەگەڵ وڵاتانی یەكێتی ئەوروپادا واژو نەكردووە، بۆیە چاودێری‌و لێكۆڵینەوە نایانگرێتەوە.  پارەی حزبەكان لە بانكەكانی دەرەوەدا یەكێتی نیشتمانی كوردستان یەكێكە لەو حزبە سیاسییانەی هەرێمی كوردستان كە بەمدواییە‌و دوای هەڵبژاردنی هاوسەرۆكەكان (بافڵ تاڵەبانی‌و لاهور شێخ جەنگی) بەدوای سامانە ونبووەكەیدا دەگەڕێت. بەرپرسانی باڵای یەكێتی كە (درەو) قسەی لەگەڵ چەند كەسێكیان كردووە باسلەوەدەكەن، قەبارەی سەروەت‌و سامانی حزبەكەیان ساڵی 2006 كاتێك جەرد كراوە (10 ملیار) دۆلار بووە، بەڵام چەند مانگێك پێش ئێستا كاتێك سەرلەنوێ جەرد كراوەتەوە بەهای موڵك‌و ماڵ‌و سامانەكەی یەكێتی ناگاتە (100 ملیۆن) دۆلار، ئەمە لەكاتێكدا بەوتەی ئەوان لە سنوری یەكێتیدا كۆمپانیا هەیە تەنیا بەهای داراییەكەی (12 ملیار) دۆلارە. بەرپرسانی نوێی یەكێتی، واتا ئەوانەی كە لەدوای كۆنگرەی چوارەمەوە دەسەڵاتیان گرتوەتەدەست پێیانوایە بەشێكی زۆری سامانی یەكێتی لەلایەن كارەكتەرە دەسەڵاتدارەكانی حزبەوە رەوانەی دەرەوە كراوە، بەتایبەتیش ئەوانەی كە رۆژگارێك سەروەت‌و سامانی حزب‌و بڕیاری داراییان بەدەستەوە بووە. لەناو پارتیش هەمان كێشە هەیە، مەسرور بارزانی كە لەدوای مەسعود بارزانی باوكییەوە كەسی دەستڕۆیشتووی حزبەكەیە، ئەم رۆژانە سەرۆكایەتی حكومەت دەكات‌و حكومەتەكەی بەدەست قەیرانی داراییەوە دەناڵێنێت، بەڵام توانای گەڕاندنەوەی ئەو پارانەی نییە كە بەرپرسانی حزبەكەی كۆیانكردوەتەوە‌و لە بانكەكانی دەرەوە بەناوی ترەوە شاردویانەتەوە. بەپێی راپۆرتێكی پەیمانگای "بازل"ی نێودەوڵەتی تایبەت بەسپیكردنەوەی پارە، كە لە دیسەمبەری 2018 دەرچووە، لەسەر ئاستی جیهان لە (20) دەوڵەتدا كاری سپیكردنەوەی پارە دەكرێت، لەوانە: •    Andorra •    the Bahamas •    Belize •    Bermuda  •    the British Virgin Islands •     the Cayman Islands •    the Channel Islands,  •    the Cook Islands •    The Island of Jersey •    Hong Kong •    The Isle of Man •    Mauritius •    Lichtenstein •    Monaco •    Panama •    St. Kitts •    and Nevis •    Luxembourg  •    Switzerland  •    Malta كورد لەناو تاڵانییەكەی عێراقدا لەناو ئەو تاڵانییەی كە لەدوای روخانی رژێمی سەددامەوە لە 2003 لە عێراق رویدا، كورد بێبەش نەبوو، بەرپرسانی كورد چ ئەوانەی لە هەرێمی كوردستان پۆستی حكومی‌و حزبییان هەبوو، چ ئەوانەی لە بەغداد لەسەر پشكی كورد پۆستیان وەرگرت، هەندێكیان تێوەگلان لە تاڵانییەكەی عێراقدا.   ساڵی 2014 گەورەترین دۆسیەی گەندەڵی‌و سپیكردنەوەو حەواڵەكردنی پارەی بەرپرسانی عێراق ئاشكرا بوو، ئەوكات (ئەحمەد چەلەبی) سەرۆكایەتی لیژنەی دارایی دەكرد پەرلەمانی عێراق، چەلەبی سیاسییەكی زیرەك‌و بەئاگابوو، پەیوەندی بەهێزی لەگەڵ ناوەندە هەواڵگرییەكانی خۆرئاوادا هەبوو، دیكۆمێنتی ئاشكرا كرد لەبارەی تێوەگلانی بانك‌و بەرپرسان لە تالانكردنی سامانی عێراق‌و ناردنە دەرەوەی. دۆسیەكەی چەلەبی (72) لاپەڕە بوو، ئاشكرای كردبوو لەنێوان ساڵانی (2007 -2013) بڕی (312 ملیار) دۆلار چوەتە بانكەكانی عێراقەوە، لەوە بڕی (212 ملیار) دۆلاری چوەتە دەرەوەی عێراق، لەو نێوەندەدا بڕی (78 ملیار) دۆلار چارەنوسی نادیارە‌و نازانرێت لەلایەن كێوە بۆ كێ رۆیشتووە؟. سەبارەت بەو حەواڵانەش، لەو ماوەیەدا (60 هەزار) جوڵەی بانكیی هەبووە، لەو (60 هەزار) جوڵەیە (30 هەزار) جوڵەی بانكیی نازانرێت لە كێوە بۆ كێ چووە؟، بەشێوەیەكی گشتی لەو ماوەیەدا رۆژانە بە تێكڕا (50 ملیۆن) دۆلار جوڵەی پێكراوە، بەشی زۆری ئەو پارەیە حەواڵەی بانكەكانی دەرەوە كراوە. لەو (78 ملیار) دۆلارەی كە نازانرێت لە كێوە بۆ كێ رۆشتووەو چارەنوسی نادیارە، بڕی (12 ملیار) دۆلاری لە بانكەكانی هەرێمی كوردستانەوە چوەتە دەرەوە، (32) بەرپرس‌و (25) كۆمپانیای هەرێمی كوردستان لەناو دۆسیەكەدان، كە دەوترێت مردنی گوماناوی (ئەحمەد چەلەبی) لە 2015دا پەیوەندی بەو دۆسیەیەوە هەبووە. بەمدواییانە باسلەوەدەكرێت ئێستا هەموو جموجوڵێكی حەواڵەكردنی پارەی زۆر بەئاگاداری بانكی ناوەندیی عێراق دەبێت، ئەگەرچی چونە دەرەوەی پارە بە بڕی زۆر بەئاسانی ناكرێت، بەڵام لەڕێگەی دەروازە سنورییەكانەوە پارەی زۆر حەواڵە دەكرێت، ئەویش لەبەرامبەر هاوردەكردنی كەلوپەل‌و فێڵی ترەوە. بەپێی راپۆرتی پەیمانگەی "بازل"ی نێودەوڵەتی كە تایبەتە بە سپیكردنەوەی پارە، لە ساڵی 2012دا لە دزین‌و سپیكردنەوەی پارەی حكومەتدا، عێراق پلەی یەكەمی هەبووە لەسەر ئاستی وڵاتانی عەرەبی‌و هەموو جیهان، لەم تاڵانییەدا كوردیش بەشدارە.  

راپۆرت: محەمەد رەئوف- فازل حەمەڕەفعەت جگە لە (شێخ باز)، ناوی دوو كەسی تر لەسەر مێزی گفتوگۆیە بۆ ئەوەی پۆستی وەزیری سامانە سروشتییەكان وەربگرن، مەسرور بارزانی كەوتوەتە نێوان فشاری عێراق‌و هەڕەشەی توركیاوە، ئەمریكاش داوا دەكات هەرێم كەسێكی شارەزای بواری (غاز) بكات بە وەزیری سامانە سروشتییەكان، یەكێتیش لەسەر پۆستی جێگری وەزیری نەوت لە عێراق كەوتوەتە ناو كێشمەكێشمێكی نوێ، عیزەت سابیر چوەتە بەغداد بۆ ئەوەی پۆستەكە وەربگرێت، لەم راپۆرتەدا زانیاری زیاتر لەبارەی چارەنوسی پۆستی وەزیری سامانە سروشتییەكانی هەرێم‌و پۆستی جێگری وەزیری نەوتی عێراق بڵاودەكەینەوە.   پۆستە بەتاڵەكەی حكومەت زیاتر لە ساڵێك‌و سێ مانگە كابینەی نۆیەمی حكومەتی هەرێمی كوردستان دەستبەكاربووە، مەسرور بارزانی سەرۆكی كابینەكە هێشتا پۆستێكی وزاری گرنگی لەناو كابینەكەی پڕنەكردوەتەوە كە پۆستی وەزیری سامانە سروشتییەكانە.  رۆژی (5)ی ئەم مانگە مەسرور بارزانی لەبەردەم پەرلەمانی كوردستاندا لەبارەی ئەوەی بۆچی تائێستا پۆستی وەزیری سامانە سروشتییەكانی پڕنەكردوەتەوە، وتی:" خۆم حەزم دەكرد لە وردەكاری وەزارەتی سامانە سروشتییەكان ئاگادار بم، بۆیە پۆستەكەم پڕنەكردوەتەوە". مەسرور بارزانی باسی لەوەكرد، بەدوای كەسێكدا دەگەڕێت كە جێگەی متمانەبێت بۆ ئەوەی دۆسیەكە بەڕێوەببات، پێشنیازی دوو كەسی كردووە بۆ ئەوەی پۆستی وەزیری سامانە سروشتییەكان وەربگرن. مەسرور بارزانی لەبەردەم پەرلەماندا ناوی ئەو دوو كەسەی ئاشكرانەكرد كە پێشنیازی بۆ كردوون پۆستی وەزیری سامانە سروشتییەكان وەربگرن، بەڵام بەپێی بەدواداچوونەكانی (درەو) هەندێك كێشمەكێشی نوێ لەبارەی چۆنیەتی پڕكردنەوەی پۆستی وەزارەتی سامانە سروشتییەكان دروستبووە. لەبارەی چارەنوسی وەزارەتەكەوە  بەپێی ئەو زانیارییانەی كە لە چەند سەرچاوەیەكی ئاگادارەوە لەناو پارتی دیموكراتی كوردستان‌و حكومەتی هەرێمەوە دەست (درەو) كەوتوون، ئێستا كاندیدەكانی پارتی‌و مەسرور بارزانی بۆ وەرگرتنی پۆستی وەزیری سامانە سروشتییەكان بریتین لە دوو كەس: •    كاندیدی یەكەم: شێخ باز ئەم پیاوە بەڕێوەبەری جێبەجێكاری كۆمپانیای (كار)ە، كۆمپانیاكەی خاوەنی رێژەی 40%ی بۆری هەناردەی نەوتی هەرێمی كوردستانە، سەرباری ئەمە كێڵگەی "خورمەڵە" كە گەورەترین كێڵگەی نەوتی هەرێمە لای كۆمپانیاكەی شێخە، گروپێك لە بەرپرسانی پارتی پاڵپشتی لە شێخ باز دەكەن بۆ ئەوەی پۆستی وەزیری سامانە سروشتییەكان وەربگرێت، لەدوای پێكهێنانی كابینەی نوێی حكومەتەوە، مەسرور بارزانی چەندجارێك شێخ بازی بردە ناو كۆبونەوەكانی حكومەت‌و چەندجارێكیش لەگەڵ وەفدی هەرێم ناردی بۆ بەغداد، ئەمە وا لێكدرایەوە مەسرور بارزانی دەیەوێت شێخ باز بكات بە وەزیری سامانە سروشتییەكان، بەڵام لەراستیدا هێشتا بڕیاری كۆتایی لەوبارەیەوە نەدراوە. •    كاندیدی دووەم: كەمال ئەتروشی  ئێستا لەناو پارتیدا ناوی كەسێكی تر بۆ وەرگرتنی پۆستی وەزیری سامانە سروشتییەكان هاتوەتە پێشەوە، كە ئەوەش پیاوێكە بەناوی (كەمال ئەتروشی)، زانیاری زۆر لەبارەی كەمال ئەتروشی لەبەردەستی (درەو)دا نیە، تەنیا ئەوە نەبێت دەوترێت (پێشتر راوێژكاری كۆمپانیایەكی كوەیتی بواری نەوت بووە). ئاشتی هەورامی لە مەترسیدایە ! پۆستی وەزارەتی سامانە سروشتییەكانی هەرێمی كوردستان لە ساڵی 2005وە دروستكراوە، لەوكاتەوە تاوەكو مانگی تەموزی ساڵی رابردوو كە دەكاتە (14 ساڵ) ئەم وەزارەتە تەنیا لەلایەن پیاوێكەوە بەڕێوەدەبرا بەناوی (ئاشتی هەورامی). مەسرور بارزانی لەگەڵ دەستبەكاربوونیدا لە پۆستی سەرۆكی حكومەت، هەورامی لە پۆستی وەزیری سامانە سروشتییەكان دورخستەوە، بەڵام بەتەواوەتی دەستی لەناو دۆسیەی نەوتی هەرێمدا نەبڕی، مەسرور بارزانی بۆ یەكەمجار لە مێژووی حكومەتی هەرێمدا، پۆستێكی نوێی بەناوی یاریدەدەری سەرۆكی حكومەت لە دەرەوەی یاسا كارپێكراوەكان داتاشی، ئاشتی هەورامی كرد بە یاریدەدەری خۆی بۆ كاروباری وزە‌و سامانە سروشتییەكان. ئاشتی كە پێشتر بینای نەبوو، دۆسیەی سامانە سروشتییەكان لە جەنتاكەیدا هەڵگرتبوو، دوای دورخستنەوەی لە پۆستەكەی، وەزارەتەكەی بردە ناو بینایەك لە لەندەنی پایتەختی بەریتانیا، بەپێی زانیارییەكانی (درەو) بیناكە دەكەوێتە تەنیشت باڵیۆزخانەی ئیسرائیل لەناوچەیەك لە پشت كۆشكی (باكینگهام)، ئاشتی لەم بینایەدا ژمارەیەك فەرمانبەری وەزارەتی سامانە سروشتییەكان‌و راوێژكاری بیانی لەگەڵدایە‌و هێشتا دۆسیەی نەوت بەڕێوەدەبات، لەمەشدا دەسەڵاتی لە مەسرور بارزانی سەرۆكی حكومەت وەرگرتووە، ئەوەش بەپێی فەرمانێك كە رۆژی 24ی تەموزی 2019 مەسرور بارزانی بە نهێنی‌و بە زمانی ئینگلیزی بۆی دەركردووە. (لێرە كلیك بكە بۆ زانینی زانیاری زیاتر لەبارەی ئەو نوسراوە) سەرباری ئەوەی مەسرور بارزانی دەسەڵاتی وەزیری سامانە سروشتییەكانی بەخشی بە ئاشتی هەورامی، بەڵام بەپێی زانیارییەكانی (درەو)، بەمدواییە مەسرور بارزانی بەتەواوی پاشەكشێی لە ئاشتی هەورامی كردووە، بەتایبەتیش دوای ئەو سكاڵا نوێیەی كە لەلایەن كۆمپانیای (دایناستی پترلیۆم) لە دادگای لەندەن لەسەری تۆماركراوەو ئەنجامەكانی بڕیاری دادگاكە لە مانگی شوباتی ساڵی داهاتوو، رەنگە بە قورسی لەسەر دۆسیەی نەوتی هەرێم بشكێتەوە. بەمدواییە ئاشتی هەورامی روبەڕووی دۆسیەیەكی تری یاسایی بوەتەوە، (درەو) زانیویەتی هەفتەی رابردوو، دادگای ساختەكارییە قورسەكان لە لەندەن كە بە "Serious fraud office" ناسراوە، ئاشتی هەورامی بانگهێشتكردووە، تۆمەتباری كردووە بەوەی لە پرۆسەی ساختەكاری گەورە تێوەگلاوە. ئەوانەی شارەزای كاروباری ئەم دادگایەن دەڵێن:" لە بەریتانیا هەر كەسێك كاری بكەوێتە ناو ئەم دادگایە، رزگاربوونی زەحمەتە، چونكە ئەم دادگایە زۆر بەهێزە‌و تەنانەت بەبێ نوسراوی دادوەر دەتوانێت پشكنین بۆ ماڵی هەر كەسێك بكات كە گومانی لەسەری هەبێت". ساڵی رابردوو، ئەم دادگایە سزای قورسی بەسەر دوو كەسدا سەپاند، بەپێی ئەوەی سەرچاوە ئاگادارەكان بە (درەو)یان راگەیاندووە، ئەگەر تۆمەتەكان لەسەر ئاشتی هەورامی ساغ ببێتەوە، دادگاكە سزای (25 ساڵ) زیندانی بەسەردا دەسەپێنێت، لەمە مەترسیدارتر ئەوەیە كەسانی تر لە دۆسیەكانی ئاشتی هەورامیدا تێوەبگلێن. هەڕەشەكەی ئەردۆغان ! بەگوێرەی ئەو زانیارییانەی كە لە چەند سەرچاوەیەكی ئاگادارەوە لەناو حكومەت دەست (درەو) كەوتوون، بەمدواییە مەسرور بارزانی توركەكانی بینیوە، پێی وتوون:" عێراق فشار دەخاتە سەرمان بۆ ئەوەی نەوتەكەی رادەست بكەین"، لەوەڵامی ئەم قسەیەدا، رەجەب تەیب ئەردۆغانی سەرۆكی توركیا زۆر توڕە بووە‌و هەڕەشەی كردووە پەلاماری كوردستان بدات ئەگەر نەوتەكەی رادەستی عێراق بكات. لەدوای هەڕەشەكەی ئەردۆغانەوە، مەسرور بارزانی پەنای بۆ ئەمریكییەكان بردووە‌و بەتەلەفۆن لەگەڵ وەزیری وزەی ئەمریكا قسەی كردووە‌و ئاگاداری كردووە لە بارودۆخی هەرێم لەنێوان فشاری عێراق‌و هەڕەشەكانی توركیادا. وەزیری وزەی ئەمریكا چەند پێشنیازێكی داوە بە مەسرور بارزانی، كە دیارترینیان ئەمانە بوون: •    بەزوترین كات پۆستی وەزیری سامانە سروشتییەكان پڕبكاتەوە، كەسێك لە پۆستەكەدا دابنێت كە شارەزای بواری (غاز) بێت، ئەمریكییەكان دەیانەوێت لەدوای قەیرانی كۆرۆناوە ستراتیژیەتی خۆیان لە نەوتەوە بگۆڕن بۆ غاز. •    ئەمریكییەكان داوایان لە مەسرور بارزانی كردووە یەكێتی نیشتمانی بەشدار بكات لە بڕیارەكانی تایبەت بە نەوت‌و غازی هەرێمی كوردستان، رەنگە ئەمە پەیوەندی بەوەوە هەبێت لە عێراق سێ زۆنی (غاز) هەیە، یەكێك لەو زۆنانە لە سنوری یەكێتیدایە، دوانەكەی تر یەكێكیان لە ناوچەی سوننە‌و ئەوی تر لە ناوچەی ژێر دەسەڵاتی شیعەكاندایە، ئەمریكییەكان چاویان لە غازەكەی سنوری یەكێتییە. ئامانج رەحیم كاندیدە هاوشێوەی كابینەكانی پێشووی حكومەت، پۆستی وەزارەتی سامانە سروشتییەكان لە كابینەی ئێستای حكومەتی هەرێمی كوردستان هەر لای پارتی دیموكراتی كوردستانە. ئەگەر دۆخەكە بەوشێوەیە بڕوات‌و پارتی كەسێكی شارەزای بواری غازی بۆ وەرگرتنی پۆستەكە دەست نەكەوێت، یاخود پابەند بێت بە داواكارییەكەی ئەمریكاوە، پێدەچێت كەسێكی یەكێتی دڵخوازی پارتی بۆ پۆستەكە كاندید بكات. سەرچاوەیەك لەناو یەكێتی لەبارەی ئەم بابەتەوە بە (درەو)ی راگەیاند، ئامانج رەحیم سكرتێری ئەنجومەنی وەزیران كە سەربە یەكێتییە، وەكو كاندید بۆ وەرگرتنی پۆستی وەزیری سامانە سروشتییەكان ناوی دەهێنرێت. ئامانج رەحیم نزیكەی (10 ساڵ)ە سكرتێری ئەنجومەنی وەزیرانە، یەكێك لەو كەسانەیە كە زۆرترین كات لە پۆستەكەی لەناو ئەنجومەنی وەزیران ماوەتەوە، ئامانج لەوانەیە ناچێتە ناو كێشمەكێشە سیاسییەكانەوە، هەم دڵی یەكێتی‌و هەم دڵی پارتیشی راگرتووە، بۆیە دور نیە دواجار بازەكە لەسەر شانی بنیشێتەوە، بەتایبەتیش لەكاتێكدا وردبینترین كەسی ناو ئەنجومەنی وەزیرانە‌و ئاگاداری وردەكاری دۆسیەكانی نەوت‌و غازە. یەكێتی‌و پۆستەكەی بەغداد پۆستێكی تری بواری وزە هەیە كە هاوشێوەی پۆستی وەزارەتی سامانە سروشتییەكانی هەرێمی كوردستان كێشەی تێدایە، ئەم پۆستە پشكی یەكێتییە لە حكومەتی عێراقدا. چەند رۆژێكە مشتومڕ لەسەر پڕكردنەوەی پۆستی جێگری وەزیری نەوتی عێراق لەناو یەكێتی نیشتمانی گەرمە، ئەمە یەكێكە لەو پۆستانەی كە لەدوای روخانی سەددامەوە لای یەكێتی بووە. بەگوێرەی زانیارییەكانی (درەو) كە لە چەند سەرچاوەیەكی باڵاوە لەناو یەكێتی دەستی كەوتووە، چەند كەسێك خۆیان بۆ وەرگرتنی پۆستەكە كاندید كردووە، یەكێك لەوانە (عیزت سابیر) پەرلەمانتاری پێشووی یەكێتییە لە پەرلەمانی كوردستان كە لە كۆنگرەی چوارەمی یەكێتیدا بە ئەندامی سەركردایەتی هەڵبژێردرا. عیزت سابیر كاندیدی قوباد تاڵەبانی‌و شاناز ئیبراهیم ئەحمەدە بۆ وەرگرتنی پۆستەكە، (درەو) زانیویەتی، عیزەت چووەتە بەغداد‌و چاوپێكەوتنی تایبەت بە وەرگرتنی پۆستەكەی كردووە، عیزەت سابیر بڕوانامەی دكتۆرای لە بواری ئابوریدا هەیە. لەپاڵ ئەمەدا (پەروین بابەكر) ئەندامی سەركردایەتی یەكێتی یەكێكە لە كاندیدەكان  بۆ پۆستی جێگری وەزیری نەوتی عێراق، پەروین پێشتر لە بواری نەوتی تایبەت بە كۆمپانیای (نۆكان)ی یەكێتی كاریكردووە، ماوەیەكیش وەزیر بووە لە حكومەتەكەی سلێمانی یەكێتیدا. پۆستی جێگری وەزیری نەوتی لە عێراق پێشتر لەلایەن كۆسرەت رەسوڵ جێگری پێشووی سكرتێری گشتی یەكێتییەوە پڕدەكرایەوە، رۆژی (17)ی ئەم مانگە كۆسرەت رەسوڵ كە ئێستا سەرۆكی ئەنجومەنی باڵای سیاسی یەكێتییە، نوسراوێكی ئاڕاستەی بافڵ تاڵەبانی‌و لاهور شێخ جەنگی هاوسەرۆكەكانی یەكێتی كرد‌و داوای لێكردن سنورێك بۆ قاچاخچێتی دەروازە سنورییەكان دابنێن، ئەگەر نا ئەو دەسەڵاتەكانی خۆی بەكاردەهێنێت. هەندێك لە یەكێتییەكان، ئەو نامەیەی كۆسرەت رەسوڵ بۆ هاوسەرۆكەكان وەكو كارتێكی فشار لەبارەی پڕكردنەوەی پۆستی جێگری وەزیری نەوتی عێراق لێدەدەنەوە، پێیانوایە كۆسرەت رەسوڵ بەو پەیامە دەیەوێت ئاگاداریان بكاتەوە ئەو پۆستی جێگری وەزیری نەوتی عێراق پشكی ئەوە‌و دەبێت خۆی كاندیدەكەی دیاری بكات. 

راپۆرت: فازل حەمەڕەفعەت ئەمڕۆ بۆ ئێران رۆژێكی گرنگ بوو، سزای ئەنجومەنی ئاسایشی نێودەوڵەتی كۆتایی هات، ئێران ئیتر دەتوانێت هەم چەك بكڕێت‌و هەم بیفرۆشێت، ئێرانی چەك لە كێ دەكڕێت‌و چەكی خۆی بە كێ دەفرۆشێت، لەم راپۆرتەدا وردەكاری زیاتر بخوێنەرەوە. هەڵگرتنی سزاكان ئەمڕۆ ماوەی ئەو سزایە كۆتایی هات كە مانگی ئازاری 2007وە ئەنجومەنی ئاسایشی نێودەوڵەتی بەسەر ئێرانیدا سەپاند‌و بەپێی سزاكە هاوردەكردن‌و هەناردەكردنی چەكی لە ئێران قەدەغەكرد. ساڵی 2015، ئێران رێككەوتنی ئەتۆمی لەگەڵ وڵاتانی زلهێز (5+1) ئیمزا كرد، بەپێی ئەو رێككەوتنە رێگە بە ئێران درا دوای پێنج ساڵ لە رێككەوتنەكە چەكی كلاسیكی بكڕێت، واتا لە رۆژی 18ی ئۆكتۆبەری 2020وە كە دەكاتە ئەمڕۆ، هەروەها رێككەوتنەكە دەڵێ دوای هەشت ساڵ لە رێككەوتنەكە قەدەغە لەسەر موشەكی ئێران‌و پرۆگرامەكەی هەڵدەگیرێت واتا لە ساڵی 2023. سەرباری ئەوەی لە ساڵی 2018وە ئەمریكا لە رێككەوتنی ئەتۆمی یاخود ئەوەی ئێرانییەكان ناویان لێناوە "برجام" كشاوەتەوە، بەڵام هێشتا رێككەوتنەكە بەركارە، چاودێرانی نێودەڵەتی دەڵێن مانەوەی ئێران لەناو رێككەوتنەكەی دوای كشانەوەی ئەمریكا، تەنیا لەبەر ئەوە بوو ئەنجومەنی ئاسایشی نێودەوڵەتی ئەو سزایەی لەسەر هەڵگرێت.   لە چەند مانگی رابردوودا ئەمریكا هەوڵیدا پشتیوانی نێودەوڵەتی كۆبكاتەوە بۆ درێژكردنەوەی سزاكەی ئەنجومەنی ئاسایش لەسەر ئێران، بەڵام لەمەدا سەركەوتوو نەبوو، روسیا‌و چین كە خاوەنی كورسی هەمیشەین لە ئەنجومەنی ئاسایشی نێودەوڵەتی، لەگەڵ درێژكردنەوەی سزاكەدا نەبوون.  چەكەكانی ئێران گۆڤاری "ئیكۆنۆمیست"ی بەریتانی دەڵێ:" جبەخانەی ئێران لە تانكی بەریتانی‌و كۆپتەری ئەمریكی كۆن پێكدێت، ئەم چەكانە ئێستا لە خۆرئاوا خراونەتە ناو مۆزەخانەوە" واتا چیتر مۆدێلیان بەسەرچووە. بەپێی قسەی ئەو گۆڤارە، ئێران لە جەنگی هەشت ساڵەدا لەگەڵ عێراق، زیاتر لە "یەك لەسەر سێ"ی جبەخانە سەربازییەكەی لەدەستداوە، ئێستا كە سزای نەتەوە یەكگرتووەكانی لەسەر هەڵگیراوە، ئیتر ئێران دەتوانێت چەكی نوێ بكڕێت.  رۆژی چوارشەممەی رابردوو، دوای كۆبونەوەی حكومەت، حەسەن رۆحانی سەرۆك كۆماری ئێران پیرۆزبایی لە خەڵكی وڵاتەكەی كرد بەبۆنەی كۆتایهاتنی وادەی سزاكەی نەتەوە یەكگرتووەكان لەسەر ئێران‌و ئەمەی بە رۆژێكی نیشتمانی لە مێژووی وڵاتەكەی‌و سەركەوتن بەسەر ئەمریكادا وەسفكرد. ئێستا ئێران ئیتر دەستكراوەیە لەوەی چەك بكڕێت، بەڵام هێشتا دەرفەتەكە بۆ تاران سنوردارە، چونكە: •    ئێران لەناو كێشە دارایی‌و قەیرانێكی ئابوریدایە، ئەمە وادەكات نەتوانێت بڕێكی زۆری پارە بۆ كڕینی چەك خەرج بكات. •    لەلایەكی ترەوە، هێشتا سزا تاكلایەنەكانی ئەمریكا لەسەر ئەو كۆمپانیایانەی كە چەك بە ئێران دەفرۆشن، بەردەوامە، ئەمەش هەندێك كێشە بۆ ئێران دروست دەكات. •    هاوكات ئێران خۆشی نایەوێت دوای هەڵگرتنی سزاكەی ئەنجومەنی ئاسایش بەشێوەیەكی خێرا هەموو جۆرە چەكێك بكڕێت، بەرپرسان دەڵێن دەیانەوێت پشت بە بەرهەمی ناوخۆی چەك ببەستن‌و ئەگەر پارەیەكیش لەو بوارەدا خەرج بكەن دەبێت بۆ كڕینی تەكنەلۆژیای نوێی پەرەپێدانی پیشەسازی چەكی خۆماڵی بێت، بەتایبەتیش لە بواری بەرگری ئاسمانیی‌و دەریایی، نەك تەنیا كڕینی چەك.   بەرپرسانی ئێرانی پێیانوایە ئەگەر بیانەوێت چەك بكڕین، سزا تاكلایەنەكانی ئەمریكا ناتوانن رێگر بن، چونكە ئێران پێشتر سیستمی بەرگری (ئێس 300)ی لە روسیا كڕیوە‌و ئێستاش دەتوانێت سیستمی (ئێس 400) بكڕێت.  ئەولەویەتی ئێران بۆ كڕینی چەك دوای هەڵگرتنی سزاكەی ئەنجومەنی ئاسایشی نێودەوڵەتی دەبێت پۆشتە‌و پەرداخكردنی هێزی ئاسمانی بێت، فڕۆكەكانی سوپای ئێران بەشێكی زۆریان تەمەنیان (40 ساڵ) زیاترە‌و پێویستیان بە نوێكردنەوەیە. سەرباری ئەمە، ئەو فڕۆكانەی كە ئێران خۆی دروستیكردوون لەوانە ( كەوسەر، ساعیقە، قاهر 313) ئەو توانا جەنگییەیان نییە كە لەبەرامبەر فڕۆكەیەكی نوێدا مانۆڕ بكەن. ئێستا كە سزاكەی ئەنجومەنی ئاسایش وادەكەی كۆتایی هات، هەریەكە لە روسیا‌و چین چاویان لەوەیە چەك بە ئێران بفرۆشن، چاودێران دەڵێن ئێران دەتوانێت چەكی نوێ بە نرخێكی هەرزانتر بكڕێت، ئەگەر بتوانێت لەو بوارەدا جۆرێك لە ركابەرێتی لەنێوان روسیا‌و چیندا دروست بكات.  هەندێك لە چاودێرانی سیاسی پێشبینی دەكەن، روسیاو چین بكەونە ركابەرێتی یەكتر بۆ ئیمزاكردنی رێككەوتنی فرۆشتنی چەك بە ئێران، بەڵام رەنگە زۆر دوریش نەڕۆن‌و چاوەڕێی دەرەنجامی هەڵبژاردنی سەرۆكایەتی ئەمریكا بكەن، سەرباری ئەمە هەردوو وڵات بەرژەوەندی ئابوری گەورەیان لەگەڵ هەندێك لەو وڵاتانی تری ناوچەكەدا هەیە كە خۆشحاڵ نین بەوەی ئێران چەكی نوێی دەستبكەوێت. ئەو چەكانەی كە ئێران لە لیستی خۆیدا دایناون بۆ ئەوەی دوای هەڵگرتنی سزاكە بیانكڕێت، بریتین لەم چەكانە: •    فڕۆكەی (سوخۆ سو 30)ی روسی •    تانكی (تی-90) •    موشەكی سیزلر-ی هێزی دەریایی روسیا •    فڕۆكەی (جی- 10)ی چینیی هەناردەی چەك هەڵگرتنی سزاكەی ئەنجومەنی ئاسایشی نێودەوڵەتی لەسەر ئێران تەنیا كڕینی چەك ناگرێتەوە، بەشێكی تری سزاكە تایبەت بوو بە هەناردەكردنی چەك. نەیارانی ئێران لەناوچەكە لەوانە سعودیە‌و ئیسرائیل دەڵێن ئێران هەر لە سەرەتاوە پابەندی ئەم بڕگەیەی سزاكەی ئەنجومەنی ئاسایش نەبووە، چونكە بەردەوام چەكی ناردووە بۆ هاوپەیمانەكانی لە یەمەن‌و لوبنان لەمەدا مەبەستیان لە حوسییەكان‌و حزبوڵایە.  بۆ ئێران بابەتەكە لەمە فراوانترە، بەرپرسانی تاران باسلەوە دەكەن پیشەسازی سەربازییان گەشەی كردووە‌و كاتی ئەوە هاتووە بیفرۆشن بە وڵاتانی دەرەوە، لەوانە پیشەسازی موشەكیی‌و فڕۆكەی بێ فڕۆكەوان‌و ئۆتۆمبیلی سەربازیی‌و بەلەمی تیژڕە. لەم بوارەشدا ئێران كڕیاری تایبەتی خۆی هەیە، لەوانە سوریا، عێراق، ئەفغانستان‌و ڤەنزەوێلا، هەڵبەت دەبێت كڕینی چەك لەلایەن ئەم وڵاتانەوە لە ئێران بەشێوەیەكی نهێنی بێت‌و بەدوربگیرێت لە فشارەكانی ئەمریكا.