راپۆرتی: درەو میدیا - ئینستتیۆتی پەی بۆ پەروەردەو گەشەپێدان بەشی چوارەم  ئامانجی سەرەكی لە پرۆسەی پەروەردە‌و فێركردندا، خوێندكارە كە پێویستە كۆی پرۆسەكە لە خزمەتی پێگەیاندنیدا بێت بە شێوەیەكی زانستی ‌و دروست، لە هەرێمی كوردستاندا چەندین كێشە‌و گرفتی سەرەكی پەیوەست بە خوێندكاران هەن كە كاریگەریی خراپیان بۆسەر كۆی پرۆسەی پەروەردە‌و فێركردن هەبووە. ئاستی خوێندن و فێرکردن لە هەرێمی كوردستاندا دابەزیوەو لەگەڵا ستاندارتی نێودەوڵەتیدا ناكۆكە، یەكێك لە هۆكارەكان زۆری رۆژانی پشووەكانە كە بە شێوەیەكی بەرچاو بە هۆكاری جۆراوجۆر زیادبوون، مامۆستایان ناتوانن بەباشی پڕۆگرامەكانی خوێندن تەواوبكەن و خوێندكاران فێربكەن، یان پەلە لە تەواوكردنی پڕۆگرامەكانیان دەكەن ئەوەش كاریگەری لەسەر ئاستی تێگەیشتنی قوتابی دەبێت. هەروەها دیاردەی وازهێنان لە خوێندن دیاردەیەكی خراپ و مەترسیدارە لە هەرێمی كوردستاندا، بە پێی ئامارەكانی خودی وەزارەتی پەروەردە ساڵانە ژمارەیەكی زۆر لە منداڵان واز لە خوێندن دەهێنن كە لە ساڵی 2018 دا ( 34 هەزارو 527 ) قوتابی وازیان لە خوێندن هێناوە. وەك پێویست نەبوونی كەرتی پەروەردە‌و خوێندنی حكومی، بواری بۆ وانەی تایبەت و كردنەوەی قوتابخانەی ئەهلی رەخساندووە، وانەی تایبەتە كە لەلایەن هەندێك مامۆستای موچەخۆری پەروەردەوە پیادەدەكرێت. و وانەی تایبەت بازرگانیەكی بەرچاوە بە پەروەردەوە دەكرێت، لە بەرامبەردا بۆ هەر وانەیەك (2-5) ملیۆن دینار لە خوێندكار وەردەگرن، گوایە بەپێی هێنانی نمرەكانیش پارە وەردەگیرێت، ئەمەش حاڵەتێكی دەروونی خراپی لای خوێندكارە هەژارەكان دروستكردووە. وانەی تایبەت، رەهەندێكی بازرگانی وەرگرتووە، نەك پەروەردەیی و زانستی. گرفتەكانی پەیوەست بە خوێندكاران دابەزینی ئاستی خوێندن: ئاستی خوێندن و فێربوون لە هەرێمی كوردستاندا دابەزیوەو لەگەڵا ستاندارتی نێو دەوڵەتیدا ناكۆكە. بۆ نمونە سالی 2012-2013 لە تاقیكردنەوەیەكی نێو دەوڵەتیدا كە لە كۆمەڵگەی شەهید فاخیر مێرگەسۆری بۆ ژمارەیەك قوتابخانەو خوێندكار ئەنجامدرا كە خوێندكاران لەسەر ئاستی هەرێم بەشدار بوون. رێژەی دەرچوون تیایدا ئەوەندە نزم بوو كە رووی باسكردنی نیە. كە ئەمە زەنگێكی مەترسیدار بوو و پێویست بوو وەزارەتی پەروەردە گوێی لێبگرێت و بەدووای هۆكارەكانیدا بچوایە و بەدوای چارەسازیدا بگەڕایە، بەڵام بەداخەوە نەك هەر ئەوەی نەكرد بەڵكو ساڵانی دواتر رێژەی دەرچوون زیاتر دابەزی، بەتایبەت لەم چەند ساڵەی قەیراندا زۆر كەمیكردوە.  یەكێ‌ لە هۆكارەكان زۆری رۆژانی پشووەكانە كە بە شێوەیەكی بەرچاو بە هۆكاری جۆراوجۆر زیادبوون، مامۆستایان ناتوانن بەباشی پڕۆگرامەكانی خوێندن تەواوبكەن و خوێندكاران فێربكەن، یان پەلە لە تەواوكردنی پڕۆگرامەكانیان دەكەن ئەوەش كاریگەری لەسەر ئاستی تێگەیشتنی قوتابی دەبێت. چونكە زۆری پشووەكان كاریگەری دەبێت لەسەر پەروەردە، ئاستی دەرچوون لە پۆلەكانی یەك و دووی ناوەندی كە زۆر نزمە، بە بەراورد بە ساڵانی پیشوو… پلە بەرزەكان بە پەنجەی دەست دەژمێردرێن و پلە ناوەندییەكان زۆر زۆر كەم بوونەتەوە، تەنها دەرچووەكان پلەكانیان لە نێوان 50 و 60 كاندا دێن و دەڕۆن.  لەم خشتەیەدا ئاماری دەرچوون و دەرنەچوونی پێنج ساڵی رابردووی خوێندكارانی هەرێممان بۆ دەردەخات:     وازهێنان لە خوێندن: دیاردەی وازهێنان لە خوێندن دیاردەیەكی خراپ و مەترسیدارە لە هەرێمی كوردستاندا، بە پێی ئامارەكانی خودی وەزارەتی پەروەردە ساڵانە ژمارەیەكی زۆر لە منداڵان واز لە خوێندن دەهێنن، ئەمە جگە لەوانەی كە هەر پەیوەندیان بە خوێندنەوە نەكردووە و ناونوس نەكراون كە ئەمانە هیچیان لەم ئامارانەدا نین، واتە ئەو كاتە ژمارەكە چەند قات زیاد دەكات، دیارە ئەمە هۆكاری زۆرە، هەر لە پەروەردەیی، دەروونی، كۆمەڵایەتی، ئابوری و سیاسی و هتد. هەندێك كات وازهێنانی خوێندكار لە خوێندن لە پاڵا هۆكارەكانی تردا دەبەسترێتەوە بە خراپی پرۆگرامی خوێندنەوە. كاری وەزارەتی پەروەردەیە لەگەڵا لایەنە پەیوەندیدارەكانی تردا هەوڵی بنەبڕكردنی، یا هیچ نا كەمكردنەوەی بدات، چونكە گەر ساڵانە ئەم رێژە زۆرەی نەخوێندەوار بڕژێنە نێو كۆمەڵی كوردەوارییەوە ئەوا بێگومان داهاتوی نەوەكانمان و كۆمەڵەكەمان باش نابێت.  لەم خشتەیەدا ئاماری دیاردەی وازهێنان لە خوێندنمان بۆ دەردەكەوێت كە چەند قات زیادیكردووە: پەیوەندی نەكردن بە خوێندن بە پێی هەندێك داتای نا فەرمی كە لەبەر دەستدان رێژەی ئەوانەی تەمەنیان دەگاتە شەش ساڵان و نانێردرێنە بەر خوێندن زۆرە، بەڵام هیچ داتایەكی فەرمیمان لەبەر دەستدا نیە، كە ئەمە لە داهاتودا گرفتێكی كۆمەڵایەتی گەورەی لێدەكەوێتەوە و پێویستە وەزارەتی پەروەردە بە ئەركی خۆی بزانێت و بەدوواداچوونی بۆ بكات نەك بێدەنگی هەڵبژێرێت.  داخل بوون و داخل نەبوونی خوێندكارانی قۆناغی (12): یەكێ‌ لە گرفتەكان مەسەلەی داخڵا بوون و داخل نەبوونی خوێندكارانی قۆناغی (12)یە بۆ تاقیكردنەوەی كەلۆری كە ساڵانە كێشەی لێدەكەوێتەوەو ساڵانە دڵەڕاوكێ‌ بۆ خوێندكاران دروستدەكات و دەبێتە سەرئێشە بۆ بەڕێوەبەرو مامۆستایانیش، ئینجا دیاردەی واسیتەو هەڕەشەو كێشەی لێ‌ دەكەوێتەوە، لەپڕێكدا وەزارەت بڕیاری (4) دەرسی دەر دەكات و مامۆستاكان تووشی شۆك دەكەن بەتایبەتی ئەو مامۆستایانەی پێیان وایە (مستەوای) قوتابی 1 یان 2 یانش 5 نمرەیە، زۆر جار مامۆستا (49) ناكەتە (50) ئەوەش زۆر تێنەگەیشتنە لەو سەردەمە و نەزانینە لە فێر بوون، چونكە فێركردن پێوەر (قیاس) ی قوتابیە نەك نمرە! هیچ پاساوێك نەماوە بۆ داخل نەبوون كەچی بڕیاری پەروەردە هەر ئەوەیە ساڵانە رێگە بە ژمارەیەك خوێندكار نادات بەشداری تاقیكردنەوەكانی كۆتایی ساڵ بكەن. دەركردنی خوێندكار: هەر چەندە دروشمی خوێندن بۆ هەموان بەرز كراوەتەوە، بەڵام بەهۆی ئەوەی خوێندكارێك دوو ساڵ لە پۆلێك دەرنەچێت، ئەوە مافی ئەوەی نامێنێت لە قوتابخانەی رۆژ دەوام بكات و دەبێت بچێتە دەوامی ئێواران، ئەمەش گرفتێكە و پێویستە چارەسەر بكرێت، چونكە ئەو خوێندكارە لە خوێندن دادەبڕێت.  دیاردەی توند و تیژی: هەرچەندە مایەی خۆشحاڵییە لەم ساڵانەی دواییدا بە بڕیار دیاردەی لێدانی منداڵان لە قوتابخانەكاندا قەدەغە كراوە، بەڵام لەگەڵا ئەوەشدا هێشتا بونی هەیە و لە هەندێك قوتابخانەدا دەبینرێت. چونكە هیچ رێكارێك دەستنیشان نەكراوە بۆ جێگرەوەی توند و تیژی و لە گەلێك لە خوێندنگەكانیشدا چاوپۆشی لە توندو تیژی كراوە و دەكرێت.  بۆ نمونە چەندین دەستەواژەی نەشیاو و ناپەروەردەیی هەیە كە هەندێك مامۆستا بەكاری دەهێنن، لەوانە: (لەسوچی پۆلەكەدا لەسەر قاچێك بوەستە، ئێوە بەرەڵاكراون، هەموتان دەستان بكەنەوە گوێ لەكەس ناگرم، ملت بشكێنە و دانیشە، ئەتنێرم بۆ لای بەڕێوەبەر...) ئەوە ئەو دەستەواژانەن كە هەندێك لە مامۆستایان بەكاریان هێناوە لەچەندین قوتابخانەدا، بەداخەوە بەپێی ئەوەی لێرەو لەوێ دەیبینین و دەیبستین هەرچەندە توندوتیژی دەروونی بەبەردەوامی لە قوتابخانەو خوێندنگاكاندا هەیە هاوكات جارێكی تر توندوتیژی جەستەیی بۆتەوە بەدیاردە بەتایبەت لەئەم ساڵی خوێندندا بەتایبەت تریش بۆقۆناغی 1-6بنەڕەتی، سزادان ئاسانترین و خێراترین ڕێگەیە كە مامۆستا دەتوانێت بەكاریبهێنێت وەك خۆیان دەڵێن بۆكۆنتڕۆڵكردنی پۆل و بێدەنگكردنی خوێندكارەكان، بەبێئەوەی بیر لە كاریگەرییە خراپەكانی ئەو شێواز و رەفتارانە بكەنەوە. زۆرپرسیاری ئەوە دەكرێت ئایا مامۆستایەك خۆی لەسایەی سیستەمیكی توندوتیژدا گەورە بێت دەتوانێت نەوەیەك پەروەردە بكات كە توندوتیژ نەبێت؟؟ بیگومان ئەوە پێویستی بەڕاهێنان و رێگا نوێیەكانی رەفتاركردنە تا ئەو دیاردەو حاڵەتانە كەمبكرینەوە هەم لەلایەن خودی مامۆستاكەوە هەم لەنێوان خوێندكارەكان لەرێگەی مامۆستاو دابینكردنی ژینگەی لەبار.   رۆژانە بەپێی هەواڵەكانی تیڤی و تۆرەِكۆمەڵایەتییەكانەوە چەند ڕووداوێك لە بارەی توندوتیژی و ئازاردان لە قوتابخانەو خوێندنگاكانەوە دەخرێنە روو، چ مامۆستا بەرانبەر خوێندكارو چ خوێندكار بەرانبەر مامۆستا! لە ڕاستیدا بۆ یەكێك سەرنجی وورد بدات و لەو ناوەندەدا كاربكات ئەو هەواڵانە مایەی سەرسوڕمان و شۆكبوون و سەیر نییە، چونكە لە بنەمادا كۆی كۆمەڵگاو حوكمڕانی كوردی و بونیادی كۆمەڵگا لە هەموو ڕوویەكەوە مایەی سەرسوڕمان و شۆكبوونە! لە خوێندنگاكان بە شێوەیەكی گشتی هەست بەوە دەكرێت توندوتیژی و ئازاردان بە هەموو جۆرو شێوەیەك هەیە چ مادی یان مەعنەوی لە چەشنی لێدانی جەستەیی و هەڕەشەكردن و ناووناتۆرە لێنان و گاڵتەپێكردن و شكانەوەو توڕەبوون و قسەی زبرو تەریقبوونەوەو هتد... پێویستە ناوەندەكانی خوێندن ڕێگا لە توندوتیژی بگرن و بنبڕی بكەن، كەم نین ئەو مامۆستاو بەرپرسە پەروەردەییانەی ئێستاش داخ بۆ ئەوە دەخۆن لێدان و دارو سۆندە نەماوەو دەڵێن تەنها قسەمان ماوە بیكەین" چ جۆرە قسەیەك!" و پێیان وایە كۆمەڵگای ئێمە دواكەوتوەو لێدان نەماوە!  جگە لەوە توندوتیژی بەرامبەر مامۆستاش هەیە، و گەلێ جار مامۆستاش لێی دەدرێ و بەبێ ئەوەی یاسایەك هەبێ كەرامەتی مامۆستا بپارێزێ چەندان جار سووكایەتی بە مامۆستا كراوە و تاكو ئێستەیش كەسانی تاوانكار هیچ سزایەك نەدراون. لەهەمان كاتیشدا پەروەردە بۆ مەسەلەی سزادانی منداڵ هیچ میكانیزمێكی دیارینەكردووە لەسەری بڕوات. واتا ئەلتەرناتیڤی نییە.  خۆكوشتنی خوێندكار: یەكێك لەو گرفتە ترسناكانەی رووبەڕووی پەروەردە بۆتەوە خۆكوشتنی خوێندكارانە، كە لەم دوواییانە زیادی كردووە و ساڵانە ئەم حاڵەتانە دەبیستین كە روو دەدەن و راگەیاندنەكانیش باسی لێوە دەكەن، ئەگەر هۆكارەكەیشی پەروەردە نەبێت، بەڵام یەخەی پەروەردە دەگرێتەوە، چونكە لە هەندێ‌ كاتدا بەهۆی دەرنەچوون یا كەمی نمرە یا لێدان و توند و تیژی مامۆستاوە خۆی دەكوژێت. پێویستە پەروەردە بەجدی بیرێكی لێبكاتەوەو بەرنامەی هەبێت بۆ رووبەڕوو بوونەوەی. ساڵانە دەیان خوێندكار توشی شۆك دەبن ئەگەر خۆشیان نەكوژن بەتایبەت دوای راگەیاندنی ئەنجامەكانی پۆلی 12. بۆ نمونە: -رۆژی 13/9/2014 دوای وەرگرتنەوەی نمرەی خولی دووەمی تاقیكردنەوەی قوتابخانە، دوو كچە قوتابی كۆتایی بە ژیانی خۆیان دێنن. یەكێك لە كچەكان لە كفری بە گوللە خۆی كوشت و ئەوەی دیكە لە دەربەندیخان خۆی فڕێدایە نێو رووباری سیروانەوە، گەنجێكیش كە لەو كاتەدا هەوڵیداوە رزگاری بكات، ئەویش دەخنكێت. -ساڵی 2015 لە سنووری قەزای رانیە، سێ كچە خوێندكار لە سێ كاتی جیاوازدا هەوڵی خۆكوشتن دەدەن، دوویان ویستیان خۆیان بخنكێنن و سێیەمیش ویستی خۆی بسووتێنێ، بەڵام هەوڵەكانیان سەرناگرێت، چونكە كەسوكاریان زوو فریایان كەوتوون و رزگاریان كردوون. -رۆژی 7/11/2016 دوای راگەیاندنی ئەنجامی كۆتایی تاقیكردنەوەكانی پۆلی 12ی لە شارۆكەی شەقڵاوەی سەر بە پارێزگای هەولێر، گەنجێكی تەمەن 16 ساڵ خۆی بە پەتێك هەڵداوەسێت و كۆتا بەژیانی خۆی دێنێت. -رۆژی‌ چوارشەممە21/1/2016 بەهۆی دەرنەچوونیەوە لە وەرزی یەكەمی خوێندن خوێندكارێك لەقوتابخانەی‌ شەهید ئارام، لە شاری سلێمانی، فیشەكێك دەنێت بەسەری خۆیەوەو بەسەختی بریندار دەبێت، پاش سێ رۆژ مانەوە لەنەخۆشخانەی‌ فریاكەوتنی سلێمانی گیان لەدەستدەدات. -كچێكی‌ تەمەن 21 ساڵ نیوەڕۆی‌ ڕۆژی‌ شەممە 19/8/ 2017، بەهۆی‌ كەمیی‌ نمرەكانی‌ لەژورەكەی‌ خۆیدا لەگەڕەكی‌ قرگەی‌ شاری‌ سلێمانی‌ بەسەرپۆشەكەی‌ دایكی‌ خۆی دەخنكێنێت.  -كچێكی خوێندكار لە كفری لە پێنج وانەدا كەوت و بە دەمانچەكەی باوكی خۆی كوشت. -رۆژی 25/7/2017دوای ڕاگەیاندنی ئەنجامی تاقیكردنەوەی پۆلی دوانزە لەقەزای سەیدسادق كچە خوێندكارێك بەهۆی كەمی نمرەكانیەوە لەبینایەكەوە خۆی هەڵدەداتە خوارەوە بەمەبەستی خۆكوشتن، بەسەختی بریندار دەبێیت  -رۆژی 25/3/2017 كچە قوتابیەكی پۆلی هەشتەمی بنەڕەتی و دانیشتووی گەڕەكی ئاشتی لە شارۆچكەی قەڵادزێ‌، دوای ئەوەی نمرەی وەرزی یەكەمی تاقیكردنەوەكانی خوێندنی وەرگرتەوە و لە چەند وانەیەكدا كەوتبوو، ئاگری لە جەستەی خۆی بەردا، هەفتەیەك لەژێر چاودێریی پزیشكدا لە نەخۆشخانەی فریاكەوتنی سلێمانی مایەوە، بەڵام بەهۆی زۆریی رێژەی سووتانەكەی گیانی دەرچوو. -رۆژی 29/10/2017 لە ناحیەی شۆڕشی سەر بە شارۆچكەی چەمچەماڵ، قوتابییەكی تەمەن 13 ساڵان دوای دەرنەچوونی لە چەند وانەیەك، لە ژوورەكەی خۆیدا، خۆی كوشت. دیاردەی مانگرتنی خوێندكاران: یەكێ‌ لەو دیاردانەی وەك گرفتێك ساڵانە رووبەڕووی پەروەردە دەبێتەوە مانگرتنی خوێندكارانە، هەندێك لەو مانگرتن و بایكۆتكردنانەی خوێندكاران دەیكەن هۆكارەكەی رەوایە و هەندێكیشی ناڕەوا. ئەوانەی رەوان پێویستە پەروەردە گوێیان لێبگرێت و بۆیان جێبەجێ‌ بكات. بەڵام ئەوانەی ناڕەوان هەق نیە پەروەردە دەسكاری سیستەمی خۆی بكات و تەنها لە پێناو ئەوەی دەنگی ناڕەزایی نەهێلێت بەدەم داوایانەوە بچێت. پێویستە پەروەردە بەرنامەو ستراتیجی خۆی هەبێت و دوای دراسەكردنی ورد بڕیاری لێ‌ بدات، ناكرێت لەبەر خاتری ئەم و ئەو پاشگەز بێتەوە لە ستراتیجی خۆی و خاوەن بڕیاری خۆی نەبێت.  وەرنەگرتنی خوێندكاران لە زانكۆ: نەگەرانەوەی بەشێك لە ناوی خوێندكاران ساڵانە، كە رێژەیەكی زۆرە، بەشێكی بۆ بێپلانی وەزارەتەكانی پەروەردەو خوێندنی باڵا دەگەڕێتەوە، بەشێكیشی جۆرێكە لە بازرگانی و بازاڕ پەیداكردن بۆ زانكۆ ئەهلییەكان لە هەرێمی كوردستاندا. جیاواز لە ساڵانی ڕابردوو لە ئەمساڵدا ژمارەیەكی زۆر لە دەرچووانی ١٢ی ئامادەیی لە هەرێمی كوردستان لە هیچ زانكۆ و پەیمانگایەك ناویان نەهاتەوە كە هەندێكیان نمرەی بەرزیشیان بەدەستهێناوە، ئەوەش نیگەرانی خوێندكاران و كەسوكارەكانیانی لێكەوتووەتەوە و لە ماوەی رابردوودا و چەندین خۆپیشاندانیان لە ناوچە جیاوازەكانی هەرێم ئەنجامداوە. ئەمەش دوای ئەو بڕیارەی وەزارەتی خویندنی باڵا هات كە بۆ ئەمساڵی خوێندن داینابوو كە ڕێژەی لەسەدا ٧٠ی وەرگرتن لە زانكۆو پەیمانگاكان بۆ ئەو خوێندكارانە تەرخان كرا كە لە خولی یەكەم دەرچوو بوون هەروەها ڕێژەی سەدا ٣٠ یش بۆ ئەو خوێندكارانە تەرخان كرا كە لە خولی دووەم دەرچووبوون. نەهاتنەوەی ناوی بەشێك لەو دەرچووانە لەكاتێكدایە لەهەرێمی كوردستان ١٦ زانكۆی حكومی هەیە، كە دابەشبون بەسەر شارەكانی كوردستاندا، لەگەڵ ئەوەشدا ١٩ زانكۆ و ١٤ پەیمانگای ئەهلییش هەن كە هەندێكیان ئەمساڵ كراونەتەوەو ساڵانە بە پارەیەكی زۆر خوێندكار لە بەشەكانیان دەخوێنێت و زۆرینەی ئەو زانكۆ و پەیمانگا ئەهلیانە هی بەرپرسانی پارتی و یەكێتین. وەك بەشێك لە شارازایانی بواری خوێندن ئاماژەی پێدەكەن حكومەت لە رێگەی وەزارەتی خوێندنی باڵاوە دەیەوێت بەشێكی زۆر لە خوێندكاران بنێرێتە زانكۆ و پەیمانگا ئەهلییەكان كە كرێی ساڵانەی خوێندن تیایاندا زۆرە و لە توانای ئەواندا نییە. بەمەش وەرنەگرتنی خوێندكاران بەو رێژە زۆرە جۆرێكە لە بازرگانی و بازاڕ پەیداكردنە بۆ زانكۆ ئەهلییەكان، چونكە حزبە باڵادەستەكان هاوشێوەی كەرتەكانی دیكە دەستیان بەسەر كەرتی خوێندندا گرتووە و لە ماوەی چەند ساڵێكدا دەیان زانكۆی ئەهلیان كردووەتەوە و بە بڕە پارەیەكی زۆر خوێندكار وەردەگرن.  بۆ نمونە: ساڵی پار وەزارەتی خوێندنی باڵا بەهۆی وەرنەگرتنیان لە زانكۆ و پەیمانگاكان نزیكەی پێنچ هەزار خوێندكاری بێبەشكرد لە خوێندن، بەجۆرێك ئەو خوێندكارەی كە كۆنمرەی 62 بە خوارەبێت ناوی نەگەڕاوە، بەڵام ئەمساڵ بە پێچەوانەوە بۆ لقی زانستی كۆنمرەی 50 ناوی گەڕاوەتەوە، ئەوانەی پارساڵ ئەمساڵ چاوەڕێی گەڕانەوەی ناوەكانیان بوون لە زانكۆ و پەیمانگاكان، بەڵام هیچیان ناویان نەگەڕاوە. وانەی تایبەت: یەكێ‌ لە دیاردە ناشیرین و ناشایستەكان، مەسەلەی وانەی تایبەتە كە لەلایەن هەندێك مامۆستای موچەخۆری پەروەردەوە پیادەدەكرێت. وانەی تایبەت بازرگانیەكی بەرچاوە بە پەروەردەوە دەكرێت، لە بەرامبەردا بۆ هەر وانەیەك (2-5) ملیۆن دینار لە خوێندكار وەردەگرن، گوایە بەپێی هێنانی نمرەكانیش پارە وەردەگیرێت، ئەمەش حاڵەتێكی دەروونی خراپی لای خوێندكارە هەژارەكان دروستكردووە. وانەی تایبەت، رەهەندێكی بازرگانی وەرگرتووە، نەك پەروەردەیی و زانستی، دەبوو وەزارەتی پەروەردە بەیاسا ئەوە رێكبخات، دەیان سەرپەرشتیار وانەی تایبەت دەڵێنەوە، زۆریان بەگرێنتی 95%پارە لەقوتابی وەردەگرن، هەندێكیان كەموزۆر ئاگایان لەپرسیاردانان هەیە، ئەوە كێشەیەو پرسیار دزەكردنی ساڵانە بێ‌ هۆ نییە! بەداخەوە بەهۆی نەبونی هەڵوێست لەلایەن وەزارەتی پەروەردەو بەڕێوەبەرایەتیەكانەوە، ئێستا زۆرترین ریكلام بۆ وانەی تایبەت دەكرێت، تەنانەت مامۆستایان لەناو پۆل و لە تۆڕە كۆمەڵایەتیەكان بەشانازیەكی گەورەی دادەنێنن.  گرفتی مەلزەمە و سەرلێشێواندنی خوێندكار:  یەكێ‌ لە دیاردە خراپەكانی ناو خوێندنگەكان بوونی مەلزەمەیە، كە زۆرترین مەلزەمە لەلایەن هەندێ‌ مامۆستاوە ئامادە كراوەو خراوەتە بازاڕەكانەوە و زۆربەیان پرۆگرام و كتێبی خوێندنەكەشیان شێواندووەو سەریان لە خوێندكارەكانیش تێكداوە. مەلزەمە دانان بووەتە دیاردەیەكی بەربڵاو و بەنەرێنی كاریگەری لەسەر قوتابی داناوە، نەك ئەرێنی، ئەمەش بازرگانییەكی دیكەیە. مامۆستا هەیە لەقوتابخانەكەی خۆی مەلزەمە بەقوتابی دەفرۆشێت و پێیان دەڵێت: ئەوە پرۆگرامی منە، قوتابیان نانووسنەوە، بەحسابی ئەوەی هەیە لەو مەلزەمەیەدایە، راڕایی و دوودڵی زۆر لای قوتابی دروستبووە، نموونە پۆلی 12حەوت كتێبە، ئەگەر هەر قوتابییەك لەهەر وانەیەكدا دوو مەلزەمە لەخۆی كۆبكاتەوە، دەكاتە 21كتێب! ئەمەش دەبوو بەیاسا رێكبخرێت.   هەرچەندە دروستكردنی مەلزەمە و ساغكردنەوەی بەسەر خوێندكاراندا بەپێی یاسای وەزارەتی پەروەردە قەدەغەیە، بەڵام ساڵانە و رۆژبەڕۆژ لە تەشەنە سەندندایە و لە حاڵەتەوە بۆتە دیاردە بە تایبەتی بۆ قۆناغی 12ی ئامادەیی، ئەوەش كاریگەری خراپی كردۆتە سەر دەرونی خوێندكاران و نیگەرانی لا دروستكردون، هەروەها لە رووی داراییەوە بارگرانی بۆ كەسوكاری خوێندكاران دروستكردوە، خوێندكارانیشی لە بەكارهێنانی كتێب دورخستۆتەوە. لەوبارەیەشەوە مامۆستا بەكر محەمەد بەڕێوەبەری پەروەردەی رۆژئاوای سلێمانی لە پرێس كۆنفرانسێكدا وتی "پێویستە بەدەر لە وەزارەتی پەروەردە، وەزارەتی دیكەش بێنە سەرخەت وەك وەزارەتی ناوخۆ و وەزارەتی رۆشنبیری، چونكە مامۆستاكان لە رێگەی چاپخانەكانەوە مۆڵەتی چاپكردنی كتێب وەردەگرن و دواتر مەلزەمە چاپ دەكەن، چاپخانەكانی سلێمانی-یش بە ئاشكرا ئەو كارە دەكەن و وەزارەتی ناوخۆ لێی بێدەنگە". وتیشی "بەپێی بەدواداچونی بەڕێوەبەرایەتیمان، ساڵانە بەمەبەستی چاپكردنی مەلزەمە، زیاتر لە 900 هەزار دۆلار بەسەر خوێندكاراندا ساغدەكرێتەوە". دیاردەی مەلزەمە كاریگەری خراپی لەسەر خوێندكاران هەیە و پێویستە رێگەی لێبگیرێت. كڕینی مەلزەمەیەكی زۆر كە ریكلامی ئەوان و هەروەها هەڵەو ناڕونی و نەبوونی چاپی تازەی كتێبش كاریگەریی هەیە. هەرچەندە ئێستا بەپێی بریارێك كە بۆ خوێندنگاكان نێردراوە مەلزەمە قەدەغەیە، بەڵام ئەوە هیچ ناچێتە بواری جێبەجێكردنەوە لەبەر زۆری هەلەو كەم و كورییەكانی پرۆگرامەكان و هاوكات ئەو هۆكارانەی تریش كە لەسەرەوە باسكراوە. قورسیی ئەركی ماڵەوە: لە سیستەمی پەروەردەو خوێندنی وڵاتان ڕۆژ بەڕۆژ كار بۆ كەمكردنەوەی ئەركی ماڵەوەی خوێندكار دەكرێت بەڵام لە كوردستان ڕێك بەپێچەوانەوە ڕۆژ بەڕۆژ ئەركی ماڵەوە زیاتر دەبێت بەتایبەت لە قوتابخانە ئەهلییەكان كە كاتێكی زۆر لە قوتابخانەن و كاتێكی كەم لەماڵەوەن, كە هۆكاری ئەوەش بەشێكی پەیوەندی بە مامۆستایانەو بەشێكی تریشی پەیوەندی بە كاتی دەوامكردن و پڕۆگرام و.. هەیە، بۆیە پێویستە وەزارەت بیر لە ڕێگەیەك بكاتەوە چونكە گەر وابێت خوێندكار هەر لەماڵەوە بخوێنێت باشترە، چونكە بەو هەموو تێچوونەی  خوێندكار جا چ ئەوەی لەسەر پەروەردەیە یا ئەوەی خێزانەكان دەیكەن. گرفتی ئەو خوێندكارانەی لە دەرەوە دەگەڕێنەوە: ساڵانە ژمارەیەك خوێندكار و منداڵانی ئەو خێزانە كوردانەی لە دەرەوە دەگەڕێنەوە روو دەكەنە قوتابخانەكانی كوردستان، بەڵام لەگەڵا یەكەم رۆژی دەوامیاندا گرفتیان بۆ دروستدەبێت، هەر لە شێوازی هەڵس و كەوتی مامۆستا و سیستەمی خوێندن و پرۆگرامەكان و زمانەكانی كوردی و عەرەبی و وانەی ئایین و هتد. هەرچەندە هەوڵا دراوە میكانیزمێك دابنرێت بۆ هاوكاری كردنیان، بەڵام تاكو ئێستاشی لەگەڵدابێت گرفتەكانیان بنەبڕ نەكراوەو كێشەكانیان بەردەوامی هەیە.  گرفتی خوێندكارە ئاوارەكان: یەكێك لە گرفتەكانی پەروەردە خوێندكارە ئاوارەكانە، جا چ ئەو خوێندكارانی رۆژئاوابێت یاخود خوێندكارانی ناوچە كوردستانیەكانی دەرەوەی هەرێم یاخود ناوچەكانی ناوەراست و باشوری عیراق كە روویان لە هەرێمی كوردستان كردووە، راستەوخۆبێت یا ناراستەوخۆ كاریگەرییان لەسەر پرۆسەی پەروەردەی هەرێمی كوردستان هەیە. بە گوێرەی ئاماری نوێنەرایەتی وەزارەتی پەروەردەی عێراق لە سلێمانی، بە هۆی شەڕی داعشەوە لە سەرەتادا، نزیكەی 80 هەزار قوتابی ئاوارەیان لە پارێزگای سلێمانی هەبووە، بەڵام لەئێستادا نیوەی خێزانە ئاوارەكان گەڕاونەتەوە ناوچەكانی خۆیان و تەنها 35 هەزار قوتابی ئاوارە ماونەتەوە و بۆ ساڵی نوێی خوێندن درێژە بە خوێندن دەدەن. لە پارێزگاكانی هەولێر و سلێمانی و دهۆك نزیكەی 220 هەزار قوتابی ئاوارە و 376 خوێندنگەی تایبەت بە ئاوارەكان هەیە، لەو ژمارەیەك 35 هەزار قوتابی دەكەونە سنووری پارێزگای سلێمانی، بۆ ئەو مەبەستەش 100 خوێندنگەیان بۆ كراوەتەوە و هەزار و 136 مامۆستایان هەیە كە ئەوانیش مامۆستا ئاوارەكانن مووچەكانیان لە لایەن حكوومەتی عێراقەوە دابین دەكرێت. لە سەرەتای ئەمساڵدا وەزارەتی پەروەردەی عێراق، بڕیاری داخستنی سەرجەم ئەو خوێندنگایانەی دەركرد كە ماوەی چەند ساڵێكە بۆ ئاوارە عەرەبەكانی نیشتەجێی ناوچەكانی هەرێمی كوردستان كراونەتەوە، بە گوێرەی بڕیارەكەش بۆ ساڵی نوێی خوێندن هەموو ئەو خوێندنگایانە دادەخران. ئەو بڕیارەی نیگەرانی و توڕەیی ئاوارەكانی لێكەوتەوە و چەند جارێك لە بەردەم نوێنەرایەتی سلێمانی وەزارەتی پەروەدەی عێراق قوتابیان و كەسوكاریان گردبوونەوە و خۆپیشاندانی ناڕەزاییان ئەنجامدا و داوای هەڵوەشاندنەوەی بڕیارەكەیان كرد. بۆ نمونە مانگی 11 ی 2018 بڕیاری داخستنی قوتابخانەیەكی تایبەت بە ئاوارەكان لە هەولێر كە ماوەی چوار ساڵە كراوەتەوە ناڕەزایی لێ كەوتەوە، خوێندكاران و كەسوكارەكانیان و مامۆستایانی قوتابخانەكە گردبوونەوەیەكی ناڕەزاییان ئەنجامدا و داوایانكرد بڕیارەكە هەڵبوەشێتەوە. ئەمە لەكاتێكدا  گەشتوونەتە نیوەی ساڵ و پێیانوتراوە دەبێ منداڵەكانیان بگوازنەوە بۆ قوتابخانەیەكی دیكە كە لێرەوە دوورە و پێویستیان بە ئۆتۆمبێل دەبێت بۆ گواستنەوەیان. ئەو خوێندكارانەی لەو قوتابخانەیە دەیانخوێند، بەشێكیان ئاوارەی شارەكانی باشووری عێراق بوون و بەشێكیشیان خەڵكی سوریا و ژمارەیەكیشیان خەڵكی هەولێر بوون.

راپۆرت: محەمەد رەئوف- فازل حەمەڕەفعەت دوای هەڵگرتنی پاشەكەوتی موچە، ئەو پارەیەی كە مانگانە دەگەڕێتەوە بۆسەر موچەی پەرلەمانتار یان وەزیرێك، 16 جار لەو پارەیە زیاترە كە دەگەڕێتەوە بۆسەر موچەی مامۆستایەك، (درەو میدیا) لەم راپۆرتەدا وردەكاری موچە دوای بڕیاری هەڵوەشاندنەوەی پاشەكەوتنی موچە بڵاودەكاتەوە. دوای زیاتر لە سێ ساڵ، دواجار حكومەتی هەرێمی كوردستان بڕیاری "پاشەكەوتكردن"ی موچەی فەرمانبەرانی هەڵوەشاندەوە، پاشەكەوتێك كە دیارنییە ئاخۆ حكومەت رۆژێك لە رۆژان بۆ فەرمانبەرانی دەگێڕێتەوە یاخود نا. بەپێی بڕیاری حكومەتی هەرێم، لەم مانگەوە، فەرمانبەران بەپێی خشتە كۆنەكە، موچە وەردەگرن، واتە بارودۆخەكە دەگەڕێتەوە بۆ رۆژانی بەر لە مانگی شوباتی ساڵی 2016. پاشەكەوتەكە چۆن بوو ؟ رۆژی 3ی شوباتی 2016، حكومەتی هەرێمی كوردستان بەبەهانەی نەناردنی بودجە لە بەغداد‌و دابەزینی نرخی نەوت‌و شەڕی "داعش"‌و هاتنی ژمارەیەكی زۆر ئاوارە بۆ هەرێم، بڕیاری ژمارە (64)ی دەركرد، بەپێی ئەو بڕیارە، سیستمی "پاشەكەوت" بەسەر موچەی فەرمانبەراندا سەپێندرا، هەر فەرمانبەرێك بەپێی پلە وەزیفییەكەی بڕێك لە موچەكەی كەمكرایەوە، رێژەی پاشەكەوتكردنی موچە لە (15% وە دەستیپێكرد بۆ 75%). رۆژی 28ی ئازاری 2018، لەژێر فشاری خۆپیشاندانی فەرمانبەران، حكومەتی هەرێم كەمترین ئاستی پاشەكەوتی موچەی لە 15%وە كەمكردەوە بۆ (10%)، بەرزترین ئاستی پاشەكەوتیش لە (75%)وە كەمكردەوە بۆ (30%)، بەڵام ئەمە پلە تایبەتەكانی نەگرتەوە (دواتر بە بڕیارێك پاشەكەوتی موچەی پلە تایبەتەكان لە رێژەی 75% بۆ 40% كەمكرایەوە). بەپێی بەدواداچونەكانی (درەو میدیا)، ئێستا حكومەتی هەرێمی كوردستان بڕی (16 ترلیۆن‌و 150 ملیار) دینار قەرزاری فەرمانبەرانە، ئەوەش ئەو پارەیەیە كە لە موچەی فەرمانبەران بڕدراوە لەژێر ناوی "پاشەكەوت"دا، لە رۆژی 3ی شوباتی 2016وە بۆ 8ی ئازاری ئەمساڵ، واتە دوێنێ كە بڕیاری هەڵوەشاندنەوەی بڕیاری پاشەكەوت درا. نادادی دەستپێدەكاتەوە ؟ "پاشەكەوت"ی موچە هەڵوەشایەوە، خەڵك‌و فەرمانبەران (ملیۆنێك‌و 249 هەزار موچەخۆر لە هەرێمی كوردستاندا هەیە) دڵخۆشن، بەڵام هێشتا نیگەرانییەكان بەتەواوەتی نەڕەویونەتەوە، لەگەڵ راگەیاندنی هەڵوەشاندنەوەی بڕیاری پاشەكەوتی موچەدا، جارێكی تر قسەوباس لەسەر نادادی لە موچەدا سەریهەڵدایەوە، بابەتێك كە بەر لە بڕیاری پاشەكەوتكردنی موچەش، قسەی گەرمی شەقام بوو. پلە تایبەتەكان (وەزیر- جێگری وەزیر- بریكاری وەزیر- راوێژكار- بەڕێوەبەری گشتی- پەرلەمانتار) ئەمانە تا ساتی دەرچوونی بڕیاری پاشكەوت، زۆرترین موچەیان وەردەگرت، بەبەراورد بە فەرمانبەرانی تر، بەڵام دوای دەرچوونی بڕیاری پاشكەوت زۆرترین بڕ لە موچەی ئەم توێژە كەمكرایەوە. كەمكردنەوەی زۆرترین بڕ لە موچەی پلە تایبەتەكان، تاڕادەیەك ناڕەزایەتی شەقامی لە بڕیاری پاشەكەوتی موچە كەمكردەوە، بەڵام بە هەڵگرتنی پاشەكەوتی موچە، ئەگەر بەیاسا موچەی پلە تایبەتەكان رێكنەخرێت‌و جۆرێك لە دادپەروەری نەچەسپێندرێت، پێدەچێت، جارێكی تر شەپۆلی ناڕەزایەتی لەبارەی نادادی موچەوە دەستپێبكاتەوە. موچە پلە تایبەتەكان دوای پاشەكەوت ! •    موچەی هەر پەرلەمانتارێكی كوردستان مانگانە (8 ملیۆن‌و 200 هەزار) دینارە، لەسەرەتای بڕیاری پاشەكەوتدا، 75%ی موچەكانیان بەر پاشەكەوت كەوت، واتە مانگانە (2 ملیۆن‌و 500 هەزار) دیناریان وەردەگرت، بەڵام دواتر پاشەكەوتی موچەی پەرلەمانتاران بۆ رێژەی 40% كەمكرایەوە، لەوكاتەوە تائێستا پەرلەمانتاران مانگانە (4 ملیۆن‌و 850 هەزار) دینار وەردەگرن، دوای هەڵگرتنی پاشەكەوتی موچە، موچەی مانگانەی هەر پەرلەمانتارێك دەبێتەوە بە (8 ملیۆن‌و 200 هەزار) دینار، تائێستا هیچ یاسایەك بۆ رێكخستنەوەی موچەی پەرلەمانتاران‌و پلە تایبەتەكان دەرنەچووە، بەڵام بەپێی زانیارییەكانی (درەو میدیا)، فراكسیۆنی پارتی دیموكراتی كوردستان لە پەرلەمانی كوردستان پرۆژەیەكیان هەیە بۆ رێكخستنەوەی موچە لەم خولەی پەرلەماندا.  •    موچەی  وەزیرێكی حكومەتی هەرێمی كوردستان مانگانە (8 ملیۆن‌و 200 هەزار) دینارە، رێژەی 40%ی موچەكانیان بەر پاشەكەوت كەوت‌و مانگانە بڕی (4 ملیۆن‌و 850 هەزار) دیناریان وەردەگرت، ئەمە سەرەڕای ئەو نەسریەیەی كە لەبەردەستی هەر وەزیرێكدا هەیە. دوای هەڵگرتنی پاشەكەوت، موچەی مانگانەی هەر وەزیرێك دەبێتەوە بە (8 ملیۆن‌و 200 هەزار) دینار. •    موچەی هەر جێگر وەزیرێكی حكومەتی هەرێمی كوردستان مانگانە (5 ملیۆن‌و 500 هەزار) دینارە، رێژەی 40%ی موچەكانیان بەر پاشەكەوت كەوت‌‌و مانگانە بڕی (3 ملیۆن‌و 300 هەزار) دیناریان وەردەگرت، دوای هەڵگرتنی پاشەكەوت، موچەی مانگانەیان دەبێتەوە بە (5 ملیۆن‌و 500 هەزار) دینار. •    موچەی  هەر راوێژكارێكی حكومەت‌و پەرلەمان مانگانە (6 ملیۆن‌) دینارە، رێژەی 40%ی موچەكانیان بەر پاشەكەوت كەوت، مانگانە بڕی (3 ملیۆن‌و 600 هەزار) دیناریان وەردەگرت، دوای هەڵگرتنی پاشەكەوت، موچەی مانگانەیان دەبێتەوە بە (6 ملیۆن‌) دینار. •    موچەی  هەر بەڕێوەبەرێكی گشتی مانگانە (3 ملیۆن‌و 500 هەزار) دینارە، رێژەی 40%ی موچەكانیان بەر پاشەكەوت كەوت‌و مانگانە بڕی (2 ملیۆن‌و 100 هەزار) دیناریان وەردەگرت، دوای هەڵگرتنی پاشەكەوت موچەی مانگانەیان دەبێتەوە بە (3 ملیۆن‌و 500 هەزار) دینار. موچەی فەرمانبەرێكی ئاسایی دوای پاشەكەوت ! بە نمونە ئەگەر مامۆستایەك وەربگرێن كە بەر لە بڕیاری پاشەكەوتی موچە، موچەكەی (یەك ملیۆن) دینار بووبێت، ئەم مامۆستایە لەسەرەتای بڕیاری پاشكەوتی موچەدا، بڕی 60%ی موچەكەی بڕدرا، واتە مانگانە تەنیا (400 هەزار) دیناری وەردەگرت، لە قۆناغێكی تری پاشەكەوتی موچەدا، پاشەكەوتی موچەی مامۆستایان كرا بە 20%، واتە لەو ماوەیەشدا ئەم مامۆستایە كە لە بنەڕەتەوە موچەكەی (یەك ملیۆن) دیناربوو، مانگانە (800 هەزار) دیناری وەرگرتووە، دوای هەڵگرتنی پاشەكەوت، ئەم مامۆستایە تەنیا (200 هەزار) دینار دەگەڕێتەوە بۆسەر موچەكەی. بەبەراوردكردنی ئەو موچەیەی كە دوای هەڵگرتنی پاشەكەوت بۆ كەسێكی پلە تایبەتی وەكو (پەرلەمانتار یان وەزیر) دەگەڕێتەوە لەگەڵ ئەو موچەیەی كە بۆ مامۆستایەك دەگەڕێتەوە، جیاوازییەكە (16) هێندەیە، واتە ئەو پارەیەی كە بەهۆی هەڵگرتنی پاشەكەوتەوە بۆ هەر وەزیر یان پەرلەمانتارێك دەگەڕێتەوە، 16 هێندەی ئەو پارەیەیە كە بۆ مامۆستایەك دەگەڕێتەوە. وەزیر یان پەرلەمانتارێك بەهۆی هەڵگرتنی پاشەكەوتەوە، مانگانە (3 ملیۆن‌و 350 هەزار) دینار دەگەڕێتەوە بۆسەر موچەكانیان، بەڵام مامۆستایەك تەنیا (200 هەزار) دینار دەگەڕێتەوە بۆسەر موچەكەی. 

راپۆرتی: محەمەد رەئوف دواجار دوای زیاتر لە 3 ساڵ و رەوانەكردنی (522 ملیار) دینار لەلایەن بەغداوە، بڕیاری هەڵوەشانەوەی تەواوەتی پاشەكەوتی موچە درا، كە لە ئێستادا داهاتەكانی هەرێم زیاتر لە( یەك ترلیۆن دینار)ەو حكومەت دەتوانێت كۆی موچە بدات و مانگانەش بەشێك لە پاشەكەوتی موچەی موچەخۆران بداتەوە.    نەوت و پاشەكەوتی موچە بەرپرسانی حكومەتی هەرێمی كوردستان هۆكاری بڕیاری پاشەكەوتی موچە دەگەڕێننەوە بۆ ( قەیرانی دارایی و دەركەوتنی داعش و دابەزینی نرخی نەوت و بڕینی بەشە بودجەی هەرێم لەلایەن بەغداوە). رەنگە هەر یەك لەو هۆكارانە كاریگەری خۆیان هەبێت، بەڵام هۆكاری راستەقینە، رێكنەكەوتنی حكومەتی هەرێم و بەغداد بوو لەسەر پرسی نەوت و دواجار بەغداد بەشە بودجەی هەرێمی بڕی و لەوێوە قەیرانی دارایی لە هەرێم درووست بوو. حكومەتی عێراق تا ساڵی 2013 بەشە بودجەی هەرێمی دەنارد كە ساڵی 2013 مانگانە بڕی ( یەك ترلیۆن و 200 ملیار دینار)ی بۆ هەرێم دەنارد كە ( 850 ملیار) دیناری بۆ موچەو ( 350 ملیار) دیناریشی بۆ وەبەرهێنان و خەرجیەكان بوو، كە  ساڵانە دەیكردە ( 14 ترلیۆن و 400 ملیار ) دینار، لە پرۆژە بودجەی 2014 ی عێراقدا، حكومەتی هەرێمی كوردستان پابەندكرا بە رادەستكردنی ( 400 هەزار بەرمیل ) نەوتی رۆژانە، بەڵام هەرێمی كوردستان پابەند نەبوو بەو بڕیارەو لەسەرەتای ساڵی 2014دا حكومەتی عێراق پشكی هەرێمی بڕی، لەوێوە قەیرانی دارایی روبەرووی هەرێم بووە كە ( 6) مانگ پێش دەركەوتنی داعش بوو ( داعش لە 10/6/2014 دەركەوت)، بۆیە سەرچاوەی قەیرانی دارایی هەرێم، رازی نەبوونی حكومەتی هەرێم بوو بە رادەستنەكردنی (400 هەزار) بەرمیل نەوت بە بەغدا و برینی بەشە بودجە. بڕیاری پاشەكەوتی موچە حكومەتی هەرێمی كوردستان بە بڕیاری ژمارە ( ٦٤)ی (3/2/2016 ) سیستمی پاشەكەوتی موچەی فەرمانبەران وموچەخۆرانی دەركرد. كەبەپێی سیستمەكە موچەی فەرمانبەران بەپێی زۆرو كەمی موچەكانیان پاشەكەوت دەیانگرتەوە بەشێوەیەك كەلە ( ۱٥٪ بۆ ۷٥٪ )ی موچەكانیان بۆیان پاشەكەوت دەكرا. لە 28/3/2018 دا و لەژێر فشاری توندی خۆپیشاندەراندا حكومەتی هەرێم دەستكاری پاشەكەوتی موچەیكرد بە جۆرێك لە ( 10% بۆ 75%)ی پاشەكەوتەوەو كەمكرایەوە بۆ ( 10% بۆ 30%) جگە لە پلە تایبەتەكان. سەرئەنجام ئەمڕۆ 8/3/2019 حكومەتی هەرێمی كوردستان بەیەكجاری پاشەكەوتی موچەی هەڵوەشاندەوە، كە ئەم بریارەی دوای گەیشتن و دڵنیابوون لە ناردنی (522 ملیار) دیناری مانگانە لەلایەن بەغداوە بوو، كە ئەم بڕیارە تەنها بۆ یەك ساڵە، كە سەرەرای چەسپاندنی لە بودجەی گشتی 2019ی عێراق رێكەوتنی بەرپرسانی هەرێم و حكومەتی عێراقی لەسەرە، بەڵام دەبێت لە ساڵی داهاتوو هەرێمی كوردستان رێكەوتنی تەواو بكات لەگەڵ بەغداد لەسەر پرسی نەوتەكەی. چارەنووسی موچە پاشەكەوتكراوەكان حكومەتی هەرێمی كوردستان بڕێكی زۆری موچە قەرزاری موچەخۆرانی هەرێمی كوردستانە لە 3/2/2016 تا 8/3/2019 بەم شێوەیە:. •    لە ساڵی 2015 موچەی تەواوی مانگەكانی ( 9 – 10 – 11 -12 )ی موچەخۆران پاشەكەوتكراوە كە مانگانە كۆی موچە لەو كاتەدا ( 850 ملیار ) دینار بووە موچەی تەواوی هەر چوار مانگەكە دەكاتە ( 3 ترلیۆن و 400 ملیار دینار) •    لە ساڵی 2016 نیو موچەی 12 مانگا دەكاتە ( 5 ترلیۆن و 100 ملیار) دینار. •    لە ساڵی 2017 نیو موچەی 12 مانگا دەكاتە ( 5 ترلیۆن و 100 ملیار) دینار. •    لە ساڵی 2018 سێیەكی موچەی 12 مانگا دەكاتە ( 2 ترلیۆن و 550 ملیار) دینار. كۆی گشتی موچەی پاشەكەوتكراوی موچەخۆران لای حكومەتی هەرێم دەكاتە ( 16 ترلیۆن و 150 ملیار دینار)، كە حكومەتی هەرێمی كوردستان قەرزاری موچەخۆرانی هەرێمە. بە نمونە ئەگەر موچەی مامۆستایەك وەربگرێن كە موچەكەی (یەك ملیۆن) دینار بووبێت، كە ( 400 هەزار دیناری پێدراوەو 600 هەزار دیناری بۆ پاشەكەوتكراوە) بەرێژەی 60%، بەو پێیە چەند قەرزی لای حكومەتە:. •    لە ساڵی 2015 موچەی تەواوی مانگەكانی ( 9 – 10 – 11 -12 )ی موچەخۆران   دەكاتە ( 4 ملیۆن دینار) •    لە ساڵی 2016 نیو موچەی 12 مانگا دەكاتە ( 7 ملیۆن و 200 هەزار ) دینار. •    لە ساڵی 2017 نیو موچەی 12 مانگا دەكاتە  7 ملیۆن و 200 هەزار ) دینار. •    لە ساڵی 2018 بڕی پاشەكەوت كەمكرایەوە بۆ 20% و موچەی 12 مانگا دەكاتە ( 2 ملیۆن و 400 هەزار) دینار. كۆی گشتی موچەی پاشەكەوتكراوی مامۆستایەك ئەگەر موچەكەی ( یەك ملیۆن ) دینار بوبێت، ئەوا دەكاتە ( 20 ملیۆن و 800 هەزار دینار). داهاتی ئێستای حكومەت چەندە؟  ئێستا حكومەتی هەرێم بۆ ساڵی 2019 مانگانە بڕی (522 ملیار) دینار لە بەغداوە بۆ دێت، لەگەڵ داهاتەكانی تری ناوخۆ  كۆی داهاتەكەی دەبێتە ( یەك ترلیۆن و 44 ملیار دینار) سەرچاوەی داهاتەكانی هەرێمیش بەم شێوەیەیە:  •    بڕی (522ملیار)دینار لە بەغدادەوە بۆ هەرێم دێت، ئەم پارەیە بڕی (454 ملیار) دیناری بۆ موچەی فەرمانبەران دەبێت‌و بڕی (68 ملیار) دیناریش بۆ موچەی پێشمەرگە دەبێت .  •    سەرچاوەیەكی تری داهاتی حكومەتی هەرێم، داهاتی ئەو نەوتەیە كە خۆی دەیفرشێت، ئێستا داهاتی یەك مانگی نەوت كە دەست حكومەتی هەرێم دەكەوێت زیاتر لە (700 ملیار) دینارە، لەم بڕە پارەیە (200 ملیار) بۆ قەرز‌و خەرجی كۆمپانیاكانی بەرهەمهێنانی نەوت دەڕوات، واتە بە كۆی گشتی حكومەتی هەرێم مانگانە نزیكەی (500 ملیار) دیناری لە داهاتی نەوت بۆ دەمێنێتەوە. بەپێی دوایین راپۆرتی ( دیلۆیت) لە مانگەكانی ( تەموز ، ئاب ، ئەیلولی 2018 ) مانگانە حكومەتی هەرێم بایی ( 754 ملیۆن دۆلار) نەوتی فرۆشتووە.  •    داهاتی ناوخۆ، سەرچاوەیەكی تری داهاتی حكومەتی هەرێمە، حكومەت مانگانە (120 ملیار)دیناری لەم سەرچاوەیەوە دەستدەكەوێت. •    ویلایەتە یەكگرتووەكانی ئەمریكاش لەچوارچێوەی بودجەی كۆنگرێسی وڵاتەكەی بۆ یارمەتیدانی هێزی پێشمەرگە، مانگانە بڕی (24 ملیار) دینار بە حكومەتی هەرێم دەدات‌و ئەمەش تائێستا سەرچاوەیەكی داهاتی گرنگە بۆ حكومەت. بە كۆكردنەوەی كۆی ئەو داهاتانەی سەرەوە كە لە مانگێكدا دەست حكومەتی هەرێم دەكەوێت، دەردەكەوێت كابینەی نوێی حكومەت مانگانە بڕی (ترلیۆنێك‌و 167ملیار) دیناری دەستدەكەوێت، موچەی موچەخۆرانی هەرێم لە یەك مانگدا (881 ملیار) دینارە، بەمە دەردەكەوێت حكومەت لەتوانایدایە موچەی موچەخۆران دابین بكات‌و سەرباری ئەوەش (286ملیار) دیناری بۆ دەمێنێتەوە. واتا ئێستا حكومەتی هەرێمی كوردستان تەنها بڕی ( 359 ملیار) دیناری پێویستە بۆ موچەی موچەخۆران بەو پێیەی بڕی ( 522 ملیار ) دیناری لە بەغداوە بۆ دێت تەواوكاری تا ( 881 ملیار دینار)ی موچە دەكاتە ( 359 ملیار ) دینار، لە كاتێكدا كۆی داهاتەكانی هەرێم بەبێ پارەكەی بەغداد زیاتر لە ( 700 ملیار دینار)ە. بۆیە حكومەتی هەرێمی كوردستان بەبێ موچە بڕی ( 286 ملیار) دیناری بۆ دەمێتەوە ئەتوانێت مانگانە ( 100 ملیار دینار) تەرخانبكات بۆ دانەوەی پاشەكەوتی موچە.    

درەو میدیا:  بەپێی ئەو زانیاریانەی دەست درەو میدیا كەوتووە لە كۆبونەوەی سبەینێی ئەنجومەنی وەزیراندا بڕیار لەسەر هەڵوەشاندنەوەی پاشەكەوتی موچە دەدرێت، بەڵام تا ئێستا روون نیە ئەو بڕیارە لەم مانگەوە جێبەجێ دەكرێت یاخود لە مانگی داهاتووەوە، چونكە ئەو موچەیە كە بڕیارە لە هەفتەی داهاتووەوە دابەشبكرێت، موچەی مانگی 12ی ساڵی رابردووە، بۆیە لە مانگی داهاتووەوە موچەی مانگی یەكی 2019 دابەشدەكرێت. ئەمە لە كاتێكدایە ئەمڕۆ  بڕی 522 ملیار دینار و 410 ملیار دیناری زیادەی مانگەكانی پێشوو خراوتە سەر ژمارە بانگی وەزارەتی دارایی حكومەتی هەرێمی كوردستان و بڕیارە هەفتەی داهاتوو پارەكە بە كاشی بگاتە هەرێمی كوردستان، بۆ ئەو مەبەستەش سبەی هەینی ئەنجومەنی وەزیران سەبارەت بە پرسی پاشەكەوتی موچە كۆدەبێتەوەو ئەگەری لابردنی پاشەكەوتی موچە زۆرە. ئەگەر بەشێوەیەكی بەردەوام 522 ملیار دینار لە بەغداوە بۆ هەرێمی كوردستان رەوانە بكرێت، ئەوا كۆی داهاتەكانی هەرێم دەبێتە ( یەك ترلیۆن و 44 ملیار دینار) سەرچاوەی داهاتەكانی هەرێمیش بەم شێوەیەیە:  •    بڕی (522ملیار)دینار لە بەغدادەوە بۆ هەرێم دێت، ئەم پارەیە بڕی (454 ملیار) دیناری بۆ موچەی فەرمانبەران دەبێت‌و بڕی (68 ملیار) دیناریش بۆ موچەی پێشمەرگە دەبێت .  •    سەرچاوەیەكی تری داهاتی حكومەتی هەرێم، داهاتی ئەو نەوتەیە كە خۆی دەیفرشێت، ئێستا داهاتی یەك مانگی نەوت كە دەست حكومەتی هەرێم دەكەوێت نزیكەی (700 ملیار) دینارە، لەم بڕە پارەیە (200 ملیار) بۆ قەرز‌و خەرجی كۆمپانیاكانی بەرهەمهێنانی نەوت دەڕوات، واتە بە كۆی گشتی حكومەتی هەرێم مانگانە نزیكەی (500 ملیار) دیناری لە داهاتی نەوت بۆ دەمێنێتەوە، لەم بڕە پارەیەش كە دەمێنێتەوە، وەزارەتی سامانە سروشتییەكان بڕی (378 ملیار) دیناری بۆ موچەی موچەخۆران بە وەزارەتی دارایی دەدات. •    داهاتی ناوخۆ، سەرچاوەیەكی تری داهاتی حكومەتی هەرێمە، حكومەت مانگانە (120 ملیار)دیناری لەم سەرچاوەیەوە دەستدەكەوێت. •    ویلایەتە یەكگرتووەكانی ئەمریكاش لەچوارچێوەی بودجەی كۆنگرێسی وڵاتەكەی بۆ یارمەتیدانی هێزی پێشمەرگە، مانگانە بڕی (24 ملیار) دینار بە حكومەتی هەرێم دەدات‌و ئەمەش تائێستا سەرچاوەیەكی داهاتی گرنگە بۆ حكومەت. بە كۆكردنەوەی كۆی ئەو داهاتانەی سەرەوە كە لە مانگێكدا دەست حكومەتی هەرێم دەكەوێت، دەردەكەوێت كابینەی نوێی حكومەت مانگانە بڕی (ترلیۆنێك‌و 44ملیار) دیناری دەستدەكەوێت، موچەی موچەخۆرانی هەرێم لە یەك مانگدا (897 ملیار) دینارە، بەمە دەردەكەوێت حكومەت لەتوانایدایە موچەی موچەخۆران دابین بكات‌و سەرباری ئەوەش (147ملیار) دیناری بۆ دەمێنێتەوە.

راپۆرتی: بی بی سی  وەرگێڕانی: نامیق رەسوڵ ماوەی چەند ساڵێكە توركیا سەرقاڵی پتەوتركردنی هەژمونیەتی لە باكوری خۆرئاوای سوریا، ئەوەش بەلای هەندێك هەوڵێكی ئەنكەرەیە بە بەتورك كردنی ئەو ناوچانە تا لە داهاتوودا بەتەواوەتی بیانلكێنێت بە توركیاوە. ئێستا توركیا چەند ناوچەیەكی خۆرئاوای رووباری فوراتی لەژێردەستدایە, كە هاوسنورن لەگەڵ سنورەكانی باشوری خۆرهەڵاتی توركیا، ئەو ناوچەیە لە شارۆچكەی جەرابلوس لە خۆرهەڵاتەوە دەستپێدەكات بۆ كانتۆنتی عەفرین لە باكوری خۆرئاوای سوریا كە زۆرینەی دانیشتوانەكەی كوردن. ئەمە چۆن روویدا؟ ئامادەیی توركیا لە ناوچەكانی باكوری سوریا تەنها بواری سەربازیی نیە، بەڵكو دەسەڵاتدارانی توركیا، بە هاوكاری گروپە چەكدارە ئۆپۆزسیۆنەكانی سوریا سەرقاڵی بڵاوكردنەوەی زمان و رۆشنبیری توركین, لەگەڵ قۆرخكردنی پرۆژە ئابورییە سەرەكییەكانی ناوچەكە. لە ئابی 2016 توركیا لەگەڵ گروپە ئۆپۆزسیۆنەكانی سوریا ئۆپەراسیۆنێكی سەربازی بەناوی " قەڵغانی فورات" بۆسەر چەند ناوچەیەك دەستپێكرد, كە ئەوكات لەژێر دەسەڵاتی رێكخراوی دەوڵەتی ئیسلامی " داعش" دا بوون‌و لە سەرەتای ساڵی 2017 هێزەكانی توركیا و هاوپەیمانەكانی زنجیرەی سنوری نێوان هەردوو وڵاتیان كۆنترۆڵكرد, كە لە جەرابلوسەوە لە خۆرهەڵات دەرێژدەبێتەوە بۆ ئەعزاز لە خۆرئاوا و ناوچەی باب لە باشوور. ئامانجی ئاشكرای ئەوكاتەی توركیا شەڕكردن بوو دژی داعش، بەڵام ئامانجە ستراتیژییە گرنگەكەی ئەوە بوو بەربگرێت لە هەژمونی شەڕڤانانی كورد كە ئەمریكا پشتیوانیان لێدەكات بە ئاراستەی ناوچەكانی خۆرهەڵاتی فورات. لە مانگی كانونی دووەمی 2018 توركیا و گروپە ئۆپۆزسیۆنەكانی سوریا، ئۆپەراسیۆنێكی سەربازی نوێیان لە ناوچەكە دەستپێكرد، كە ئەمجارەیان ئامانج لێی كانتۆنی عەفرین بوو, كە لەسەرەتای قەیرانی سوریاوە لەژێر كۆنترۆڵی شەڕڤانانی كورددا بوو. لەدوای كۆنترۆڵكردنی عەفرینەوە, چەندین رێكخراوی جیهانی تایبەت بە مافەكانی مرۆڤ و میدیا و دەزگاكانی راگەیاند باس لە خراپبوونی دۆخی ئابوری و ئەمنیی و مرۆیی دەكەن لەو بەشەی سوریادا. فولکەی کاوەی ئاسنگەر لە عەفرین رێككەوتنی روسیا و توركیا ئۆپەراسیۆنی سەربازی دژی عەفرین ماوەی دوو مانگی خایاند و لە كۆتاییدا هێزەكانی توركیا و ئۆپۆزسیۆنی سوریا ناوچەكەیان داگیركرد و بەهۆیەوە زیاتر لە 130 هەزار هاوڵاتی كورد لە عەفرین و گوند‌و ناوچەكانی دەوروبەری ئاوارەبوون‌و  لە كەمپەكانی ناوچەی شەهبا لە ریفی حەڵەب و لە دوری تەنها چەند كیلۆمەترێك لە ماڵەكانیان نیشتەجێبوون و ئاوارەكانی ناوچەی دوما‌و غۆتەی خۆرهەڵات‌و حمس‌و حەما‌و كەسانی تری ناوچەكانی سوریای سەر بە گروپەكانی ئۆپۆزسیۆن جێگەیان گرتنەوە. تاڵانکردن لە عەفرین تاوانی جەنگ لیژنەی سەربەخۆی مافەكانی مرۆڤی سەربە رێكخراوی نەتەوە یەكگرتووەكان لە راپۆرتێكیدا كە 31ی كانونی دووەمی 2019 دەریكردووە دەڵێت:" زیاتر لە 50 گروپی چەكدار لە باكوری سوریا جێگیربوون و دانیشتوانی ئەو ناوچانە بە تایبەتی عەفرین كە زۆرینەیان كوردن بەدەست كردەوەی تاڵانكاریی بەردەوامی ئەو گروپە چەكدارانەوە دەناڵێنن، كە دەبوو ئەوانە خزمەتیان بكردنایە و پارێزگاریان لە هاوڵاتیان بكردایە، هەروەها یاساو رێككاری لە ناوچەكەدا بوونی نیە و حاڵەتەكانی وەك رفاندن‌و ئەشكەنجەدان و بڵابوونەوەی میلیشیا ژیانی خەڵكی كردووە بە دۆزەخ". هاوڵاتیانی ناوچەكە دەڵێن زۆرجار سكاڵایان بردوەتە بەر پۆلیسی خۆجێی و دەسەڵاتدارانی توركیا، بەڵام هیچ سودێكی نەبووە. راپۆرتەكە ئاشكراشیكردووە, زۆربەی ئەو كەسانەی دەڕفێندرێن و دەستگیردەكرێن كوردن، بە تایبەتی چالاكوانان كە رەخنە لە تاڵانكردن و پێشێلكاریی یاسا دەگرن لەلایەن ئەو میلیشیایانەوە. لیژنەكەی نەتەوە یەكگرتووەكان چەندین راپۆرتی بەدەستگەیشتووە دەربارەی ئەو كردەوانەی كە هاوڵاتیانی مەدەنی لەلایەن ئەو میلشیا چەكدارانەوە رووبەڕووی دەبنەوە‌و تەنانەت بۆ راییكردنی سادەترین كاروباری رۆژانەیان داوای بەرتیلیان لێدەكەن، بە تایبەتی لەو خاڵەكانی پشكنین كە لەناوچەكەدا دایانناوە. بڕیارەكان لە توركیاوە دێن دانیشتوانی ناوچەكە تێبینیان كردوە هێزە سەربازییەكانی توركیا لە عەفرین‌و ئەعزاز ماونەتەوە و بینای قوتابخانەكانی ناوچەكە بۆ ئامانجی سەربازیی بەكاردەهێنن لە عەفرین سەرەڕای ئەوەی بانگەشەی ئەوە دەكەن كە كشاونەتەوە لە ناوچەكە. دانیشتوانی ناوچەكە كە قسەیان بۆ ئەو لیژنەیەی نەتەوە یەكگرتووەكان كردووە ئاماژەیان بەوەداوە, ناتوانن لە عەفرین و ناوچەكانی دەوروبەری بە ئازادی جموجوڵ بكەن، ئەگەر مۆڵەت یان بەڵگەنامەی رەسمی دەسەڵاتدارانی توركیایان پێنەبێت. دانیشتوانی عەفرین ئاماژەیان بەوەشداوە كە دادوەران و پارێزەرانی سوریا بە هەماهەنگی وەزارەتی دادی توركیا نەبێت دانامەزرێنرێن و ئەفسەرانی پۆلیسی مەدەنی‌و سەربازی لەلایەن دەسەڵاتدارانی توركیاوە مەشق‌و راهێنانیان پێدەكرێت. ئەو كەسانەی كە لیژنەی سەربەخۆی مافی مرۆڤی نەتەوە یەكگرتووەكان چاوپێكەوتنیان لەگەڵدا كردون، باسیشیان لەوەكردووە فەرمانگەكانی كارگێڕی و جێبەجێكردن لە عەفرین زۆر ناكاران و ناتوانن ئەو پێشێلكاریانە چارەسەربكەن كە میلیشیاكان ئەنجامیدەدەن. لیژنەكەی نەتەوە یەكگرتووەكان، جەختدەكاتەوە هۆكاری تەواوەتی هەن كە دەیسلەمێنن ئەو میلیشیانە لە عەفرین تاوانی جەنگیان ئەنجامداوە، وەك رفاندنی خەڵك و مامەڵەی توند و ئەشكەنجەدان و تاڵانكردن و گێچەڵكردن بە ژنان. منداڵانی گوندێکی عەفرین دوای داگیرکردنی لەلایەن تورکیاوە ناسنامەی توركی توركیا بەشێوەیەكی راستەوخۆ سەرپەرشتی ئەو ئەنجومەنە خوجێیانە دەكات كە ناوچەكانی نێوان جەرابلوس و باب و عەفرین بەڕێوەدەبەن، ئەم ئەنجومەنانە سەربە بەناو " حكومەتی سوریای كات" ین، كە بارەگاكەی لە توركیایەوەو فەرمانبەرەكانی موچە لە حكومەتی توركیا وەردەگرن. ئازاری رابردوو، بەرپرسێكی ئەو میلیشیا چەكدارانەی سەربە توركیا رایگەیاند، ئەنجومەنی عەفرین لە رووی ئیدارییەوە سەر بە ویلایەتی ئەنتاكیا " هاتای" توركیایە كە هاوسنوری عەفرینە. لە راپۆرتی حوزەیرانی 2018ی كۆمسیۆنی باڵای نەتەوە یەكگرتووەكان بۆ مافەكانی مرۆڤ هاتووە: حاكمی هاتای دوو كەسی بۆ سەرپەرشتیكردنی بەڕێوەبردنی عەفرین دامەزراندووە. لە ناوچەی باب، دانیشتوانی ناوچەكە داواكارییان پێشكەشكردووە بۆئەوەی ناسنامەی نوێیان لەلایەن دەسەڵاتدارانی توركیاوە پێبدرێت، كە لە حاڵەتی سەركەوتنی ئەو پرۆژەیەدا، ئەوا بەسەر ناوچەكانی تری ژێر دەسەڵاتی توركیا و گروپە چەكدارەكانی هاوپەیمانیدا جێبەجێدەكرێت. كاروباری ئابوری و ئاسایش توركیا لە ساڵی 2017ەوە هێزەكانی پۆلیسی ناوچەكە مەشقپێدەكات، گرتەیەكی ڤیدیۆیی لە تۆڕە كۆمەڵایەتییەكاندا بڵاوبوەوە, دەریدەخات لە شاری جەرابلوس، كارمەندانی پۆلیس سڵاو بۆ رەجەب تەیب ئەردۆغان سەرۆكی توركیا دەنێرن و دروشمی " بژی توركیا بژی, ئەردۆغان دەڵێنەوە". هەندێك ئەمە وا لێكدەدەنەوە كە بەرجەستەكردنی دەسەڵاتی گەشەسەندوی توركیایە لە سویاو لایەنگرانی توركیاش دەڵێن ئەردۆغان تەنها دەیەوێت پارێزگاری لە ناوچەكە بكات نەك زیاتر. لەرووی ئابوریشەوە جگە لەو دامەزراوە و كۆمپانیایانەی كە لە توركیا تۆماركراون, رێگە بەهیچ لایەنێكی تر نادرێت لە عەفرین یان ناوچەكانی تر كاربكات و توركیا دوو سەنتەری بۆ خزمەتگوزاری پۆستی توركیا كردوەتەوە لە هەردوو شارۆچكەی جەرابلوس و باب، چاوەڕوانیش دەكرێت بەمزوانە لە عەفرینیش بیكاتەوە. ئەم سەنتەرانە رۆڵی بانكەكان دەگێڕن‌و تاكە ناوەندی رەسمین كە دارایی هاتوو, رۆیشتوی ئەو ناوچانە تۆماردەكەن‌و پارێزگاری غازی عەنتابی توركیا نوێنەرانی خۆی نارد بۆ كردنەوەی شارێكی پیشەسازی كە دەكەوێتە نێوان باب و حەڵەب‌و بەڕێگایەكیشەوە بەستراونەتەوە بەیەكەوە كە توركیا بونیادی ناوە، بۆئەوەی ئاسانكاری بكات بۆ پرۆسەی هەناردەكردن‌و هاوردەكردن لە نێوان ئەو ناوچانە‌و توركیادا. خوێندن‌و رۆشنبیری توركیا لە كۆتاییەكانی 20018دا لقێكی زانكۆی حەرانی لە باب كردەوە، كە بەشەكانی ئەندازیاری كارەبا‌و كشتوكاڵ‌و بونیادنان لەخۆدەگرێت بە زمانەكانی عەرەبی و توركیی و ئینگلیزی، لە عەفرینیش خوێندنگەیەكی ئامادەیی ئیسلامی توركی كراوەتەوە كە هاوشێوەی خوێندنگەی  پێگەیاندنی" ئیمام و خەتیب" ە، لەگەڵ چەند خوێندنگەیەكی تر‌و هەمویان لەلایەن توركیاوە بودجەی بۆ دابینكراوە. چالاكوانان توركیا تۆمەتباردەكەن كە سیاسەتی بەتورك كردن " تەتریك" پیادە دەكات بە تایبەتی لە عەفریندا، ئەوەش لەرێگەی نەهێشتن و لابردنی هەموو سیمبوڵێكی كورد لە شارەكە‌و گۆڕینی ناوی شەقام‌و گۆڕەپانە سەرەكییەكان و شوێنە گشتییەكان و داماڵینیان لە هەموو سیمایەك كە ئاماژەبە ناسنامە كوردییەكەی بدات‌و ئاڵای توركیا‌و وێنەی ئەردۆغان لە فەرمانگە رەسمییەكان‌و خوێندنگەكان و شوێنە گشتییەكاندا هەڵواسراون. دەسەڵاتدارانی توركیا بانگەشەی ئەوەدەكەن كە لەرووی مێژووییەوە پەیوەندی بەهێز‌و پتەویان بە باكوری سوریاوە هەیە‌و بەشێك لە شارۆچكەی باب لە بنەڕەتدا دەگەڕێتەوە بۆ خانەوادەی سوڵتان عەبدولحەمیدی دووەم. هەروەها توركیا پلاندادەڕێژێت بۆ نوێكردنەوە و گۆڕینی خانویەك لە عەفرین بە پاساوی ئەوەی كەمال ئەتاتورك دامەزرێنەری توركیای نوێ لەمیانی جەنگی دووەمی جیهانیدا بەكاریهێناوە. بەمدواییانە حاكمی ئەنتاكیای توركیا رایگەیاند بنكەیەك هەیە كە دامەزرێنەری توركیای نوێی كەمال ئەتاتورك لە میانی جەنگی دووەمی جیهانیدا بەكاریهێناوە كە دەكەوێتە ناوچەی راجوی سەربە عەفرین و راشیگەیاند ئەوان لە داهاتوویەكی نزیكدا كاردەكەن بۆئەوەی نۆژەنی بكەنەوە و بیكەن بە مۆزەخانەیەكی مێژوویی. خێزانێکی ئاوارەی عەفرین " لە نیشتمانی خۆیاندا ئاوارەن" كاروكردەوەی گروپە چەكدارەكان لە عەفرین، بوونەتەهۆی ئاوارەبوونی زیاتر لە 130 هەزار هاوڵاتی ئەو ناوچانەی كە لە ناوچەكانی ژێر دەسەڵاتی حكومەتی روسیا یان هێزەكانی سوریای دیموكرات بوون لە باكوری خۆرهەڵاتی توركیا، كاتێكیش نزیكەی 10 هەزار هاوڵاتی مەدەنی عەفرین گەڕانەوەی بۆ ماڵەكانیان جگە لە وێرانەیەك هیچی تریان نەبینی و هەندێكیان بینیان كە ماڵەكانیان خێزانی گروپە چەكدارەكانیان تێدا نیشتەجێكراوە  

(درەو میدیا): بەهۆی خراپی خزمەتگوزارییەكانیانەوە، حكومەتی عێراق هەرسێ كۆمپانیای (ئاسیاسێڵ‌و كۆڕەك تیلیكۆم‌و زەین)ی سزادا. دەستەی راگەیاندن‌و پەیوەندییەكانی عێراق ئەمڕۆ سزای دارایی بەسەر سێ كۆمپانیای بواری پەیوەندییە تەلەفۆنییەكاندا سەپاند، ئەوەش بەهۆی خراپی كوالیتی خزمەتگوزارییەكانیان. دەستەكە لە بەیاننامەیەكدا رایگەیاند، هەریەكە لە كۆمپانیاكانی (ئاسیا سێڵ‌و كۆڕەك تیلیكۆم‌و زەین) سزادراون، بڕیاری سزاكانیشیان لەسەر بنەمای راپۆرتی تیمە تایبەتمەندەكانی سەربە دەستەكە بووە، كە بەردەوام لەسەرەتاسەری عێراق پشكنین دەكەن، ئەمە سەرباری ئەو سكاڵایانەی كە لەلایەن خەڵك بۆی نێردراوە.  دەستەی راگەیاندن‌و پەیوەندییەكان ئاماژەی بەوەكردووە، سەرباری سزای دارایی كە بەسەر ئەو سێ كۆمپانیایەدا سەپێندراوە، هەرسێ كۆمپانیاكەش پابەندكراون بەوەی دەبێت لەوادەیەكی زەمەنی دیاریكراودا خزمەتگوزارییەكانیان باش بكەن، بەپێچەوانەوە دەستەكە رێوشوێنی توندتریان لەدژ دەگرێتەبەر.  

 راپۆرتی: درەو میدیا - ئینستتیۆتی پەی بۆ پەروەردەو گەشەپێدان بەشی سێیەم لە هەرێمی كوردستاندا  (128424) مامۆستا هەیە، ئەوەش رێژەیەكی كەم نیە ئەگەر زیاد نەبێت,  بەڵام هۆكاری ئەوەی كە هەندێك قوتابخانە بەدەست بێ مامۆستایی و كەمی مامۆستاوە دەناڵێََنن ئەوەیە كە ناڕێكی لە دابەشكردنی مامۆستادا هەیە، قوتابخانە هەیە رێژەی زیاد لە پێویستی مامۆستای هەیە، قوتابخانە هەیە ژمارەی مامۆستاكانی ئەگەر بەقەد خوێندكارەكانی نەبێت هیچی وای كەمتر نیە، قوتابخانەش هەیە بە نزیكەی (700) خوێندكارەوە (10) مامۆستای هەیە، لە هەرێمدا هەر مامۆستایەك 17 خوێندكاری بەردەكەوێت،  كەمی و زۆری مامۆستای میلاك میلاكی مامۆستا لە قوتابخانەكاندا وەك پێویست نیە، سەرباری ئەوەی پێشتر ساڵانە ژمارەیەكی بەرچاو مامۆستا دادەمەزران، كەچی لە گەلێ‌ شوێندا میلاك كەمە، لە كاتێكدا ئەگەر ستاندارتێكی نێودەوڵەتی لەبەرچاو بگرین، یاخود بە بەراورد لەگەڵا وڵاتانی تردا رێژەی مامۆستا زۆر زیادە لە هەرێمدا، بۆ نمونە لە وڵاتێكی وەك توركیا هەر مامۆستایەك (25) خوێندكاری بەردەكەوێت بەڵام لە هەرێمی كوردستان هەر مامۆستایەك (17) خوێندكاری بەردەكەوێت. كەچی هێشتا لای خۆمان مامۆستا كەمە!  هەرێمی كوردستان كە (128424) مامۆستای هەیە، ئەوەش رێژەیەكی كەم نیە ئەگەر زیاد نەبێت,  بەڵام هۆكاری ئەوەی كە هەندێك قوتابخانە بەدەست بێ مامۆستایی و كەمی مامۆستاوە دەناڵێََنن ئەوەیە كە ناڕێكی لە دابەشكردنی مامۆستادا هەیە، قوتابخانە هەیە رێژەی زیاد لە پێویستی مامۆستای هەیە، قوتابخانە هەیە ژمارەی مامۆستاكانی ئەگەر بەقەد خوێندكارەكانی نەبێت هیچی وای كەمتر نیە، قوتابخانەش هەیە بە نزیكەی (700) خوێندكارەوە (10) مامۆستای هەیە. ئەمەش دیاردەیەكی ناتەندروستە و پرۆسەی پەروەردە سەقەت دەكات. كە هۆكاری سەرەكیش تیایدا دەست تێخستنی حزب و بەرپرسانە لەوەی كە رێگە نادرێت بەپێی پێویستی میلاك دابەش بكرێتەوە و بەرژەوەندی تایبەتی لەبەرچاو دەگیرێت نەك گشتی.  كەمی ژمارەی مامۆستای پێویست لە خوێندنگەكاندا ئاستەنگێكی تری بەردەم پرۆسەی خوێندنە، چەند سالێكە مامۆستا دانامەزرێت و ئەوەش گرفتی گەورەی دروست كردوە، جگە لەوەی نایەكسانیەكی زۆر هەیە لەدابەشكردنی مامۆستایان بەسەر قوتابخانەكان هەندێك لێیان زیادە هەندێكی تریش تا كۆتایی ساڵا وانە هەیە ناخوێنرێت بەهۆی نەبونی مامۆستاوە. بەداخەوە دیسانەوە حزبایەتی و پەیوەندی كەسیەكانی بەرێوەبەرو سەرپەرشتیاران و بەڕێوەبەرایەتیەكان هۆكاری ئەوەن. بەپێی لێدوانێكی وەزیری پەروەردە، هەرێمی كوردستان پێوستی بە ١٠ بۆ       ١٥هەزار مامۆستای دیكە هەیە تا بۆشایی كەمی مامۆستای پێ پڕ بكاتەوە.  لەم خشتانەدا ئاماری پێنج ساڵی مامۆستایان لە هەرێمی كوردستاندا خراوەتە روو:    پرۆسەی دامەزراندن ئەگەر چی تا ئاستێكی زۆر گۆڕانی بەسەردا هاتووەو بەبەراورد لەگەڵا پێشتر باشترە، بەڵام هێشتا گرفتی تێدایە و وەك پێویست شوێنی خۆی ناگرێت و ئامانجەكانی پەروەردە نایەنەتە دی.  بۆ نمونە پێویستە لە پرۆسەی دامەزراندنی مامۆستایاندا پەروەردە لەپاڵا بەڕێوەبەرایەتی ئاماردا رۆڵی زیاتری هەبێت خۆی بڕیار بدات. چونكە پەروەردە خۆی دەزانێت چی پسپۆرییەكی زیاتر پێویستە و چی كاتێك پێویستە دامەزرێن و دەست بەكار بن. ساڵانە ئەو پلانەی كە دادەمەزرێن لە كاتی خۆیان زۆر زیاتر دووادەكەون و وەك پێویست سودیان لێنابینرێت. پسپۆرییەكان وەك پێویست نین كە بەپێی پێداویستی پەروەردە دامەزرێن. پرۆسەكە بەیەك جار راناگەیەنرێت و بە دوو جار یا بە سێ‌ جار ئینجا تەواو ئەبێت. هەر ئەمەشە وای كردووە كە وەك پێویست ئەوانەی دادەمەزرێن دەستبەكار نەبن. هەرچەندە لەساڵی 2014 وە دامەزراندن وەستاوەو تەنها ئەو مامۆستایانە نەبێت كە بەشێوەی گرێبەست دانراون. نەبوونی خولی راهێنان بۆ مامۆستایان خۆرۆشنبیركردنی مامۆستایان یەكێ‌ لە كۆڵەكەكانی بەهێزبوونی سیستمی پەروەردەی هەر وڵاتێكە، بەتایبەت بۆ هەرێمی كوردستان گرنگیی تایبەتی خۆی هەیە، چونكە سیستەمی خوێندن و پرۆگرامەكان گۆڕاون. بەڵام مامۆستایان هەمان مامۆستای جارانن، بێگومان ئەمەش بەیەكدادان دروستدەكات و نە مامۆستاكان لە ئەركی خۆیان سەركەوتوو دەبن و نە سیستەمەكە وەك پێویست بەڕێوە دەچێت و نە پرۆگرامەكەش وەك پێویست دەخوێنرێت و لە ئەنجامیشدا خوێندكاران زەرەر مەند دەبن. ئەمە ئەركی سەر شانی وەزارەت بوو كە بەشێوەیەكی بەردەوام خول بۆ مامۆستایان بكاتەوە بەڵام بەداخەوە كە وەك پێویست بەم ئەركەی سەر شانی هەڵنەستاوە.  هەرچەندە وەزارت ساڵانە كۆمەڵێك كەس، بەناوی بەشداریكردن لەخول و بابەتی پەروەردەیی، دەنێرێتە دەرەوە. بەڵام دواتر كە دەگەڕێنەوە، نە كاریگەریەكەی لەسەر خودی ئەو كەسانە ئەبینین لەناو پرۆسەكە نە لەسەر تەواوی پرۆسەكە، جگە لەوەی لەم سەردەمەدا زۆر گرنگە مامۆستا بەردەوام زانیاری و شێوازی وانەوتنەوە نوێبكاتەوە، راهێنانی پێ‌ بكرێت و سود لە ئەزمونی هەم راهێنەران و مامۆستایان و پسپۆرانی كورد وەربگرێت. هەروەها بیانیش بهێنرێنە كوردستان بەچاودێرییەوە خول بكەنەوە، بەڵام خولی بەهێزكردن تەنها لەپێناوی ئەوە نەبێت كە بڵێن خول كراوەتەوە، بەداخەوە ئەوانەی پێشو بەو شێوەیە بوون و سودێكی ئەو تۆیان نەبووە. پێشتر ساڵانە لەكاتی پشووی هاویندا خولی راهێنان هەبوو بۆ مامۆستایان، بەڵام لەم ساڵانەی دواییدا بەهۆی قەیرانی داراییەوە ئەو خولانەش وەستاون.   بڕینی موچەی مامۆستایان ئەگەر بەراوردی موچەی مامۆستایانی هەرێمی كوردستان، لەگەڵ موچەی مامۆستایانی وڵاتانی تر بكەین، جیاوازی زەق بەرچاودەكەوێت و دەردەكەوێت كە مامۆستایانی هەرێمی كوردستان لەم هەرێمە دەوڵەمەنەددا، چ موچەیەكی كەم وەردەگرن. بۆ نمونە موچەی مامۆستایەك لە وڵاتی لۆكسمبۆرگ، هەر ئەوە نییە كە باشترین موچەیە لە جیهان، بگرە موچەی مامۆستا لە یەكەم ساڵی كاركردنیدا، زیاترە لە موچەی مامۆستا بە درێژایی ژیانی لە هەر شوێنێكی دیكەی جیهان. بەپێی داتا تازەكان كە لە ڕاپۆرتی رێكخراوی هاریكاری ئابوری و گەشەپێدان OECD بڵاوكراوەتەوە، لە وڵاتی لۆكسمبۆرگ موچەی دەستپێكی مامۆستایەك كە خیبرەی نییە دەگاتە 73 هەزار دۆلار لە ساڵێكدا، موچەكەی لە كاتی خانەنشینبووندا دەگاتە 131 هەزار دۆلار لە ساڵێكدا. جیاوازییەكی گەورە لە نێوان موچەی مامۆستایەك لە لۆكسمبۆرگ، لەگەڵ موچەی مامۆستایەك لە ئیرلەندە هەیە. ئیرلەندە بە دووەم وڵات دادەنرێت لە بەرزی موچەی مامۆستا. لە كۆریای باشور كە سێیەم وڵاتە لە بەرزی موچەی مامۆستا، مامۆستایەكی تازە دامەزراوی بێ خیبرە، موچەكەی نزیكەی 22 هەزار دۆلارە لە ساڵێكدا، دوای نزیكەی 10 ساڵ لە دامەزراندنی، موچەكەی دەگاتە نزیكەی 34 هەزار دۆلار، لەكاتی خانەنشینداو لە كۆتایی دوا ساڵی كاركردنیدا موچەكەی لەوانەیە بگاتە 62 هەزار دۆلار. لە ئەڵمانیا كە لەسەر ئاستی جیهان، چوارەم وڵاتە لە بەرزی موچەی مامۆستا، مامۆستایەكی تازە دامەزراو موچەكەی 46 هەزار دۆلارە لە ساڵێكدا، بە موچەی 60 هەزار دۆلار لە ساڵێكدا خانەنشین دەبێت. لە ویلایەتە یەكگرتووەكانی ئەمریكا كە لە پلەی پێنجەندایە، مامۆستای تازە دامەزراو موچەی ساڵانەكەی دەكاتە 37 هەزار دۆلار، لە كاتی خانەنشینبوندا دەگاتە 60 هەزار دۆلار. لەهەندێ‌ ولاتی تردا موچەی مامۆستایان كەمە، ئەو دە وڵاتەی كە تێیدا مامۆستا كەمترین موچە وەردەگرێت، بریتین لە: یۆنان، چیلی، مەكسیك، توركیا، ئیستۆنیا، چیك، سلۆڤینیا، پۆڵەندە، هەنگاریا و كۆلۆمبیا. بۆ نموونە لە یۆنان مامۆستا لە تەمەنی خانەنشینیدا موچەكەی دەگاتە 37 هەزار دۆلار لە ساڵێكدا، ئەوە لە ئەمریكا موچەی مامۆستایەكی تازە دامەزراوی بێ خیبرەیە، لە چیلی لە تەمەنی خانەنشینیدا دەگاتە 39 هەزار دۆلار لە ساڵێكدا. مامۆستا لە كۆڵۆمبیاو چیلی، لەبەرامبەر ئەو موچە كەمەی وەریدەگرن، زۆرترین كار دەكەن. مامۆستای كۆلۆمبیا لە ساڵێكدا نزیكەی 1200 كاتژمێر لە قوتابخانە كاردەكات، لە چیلی نزیكەی 1150 كاتژمێر كاردەكات. بەڵام ئەم ئامارانە مانای ئەوە نییە، خوێندن لەو وڵاتانەدا خراپبێت، بەڵكو مانای ئەوەیە موچەكەیان كەمە. هەروەها مانای ئەوە نییە موچەی مامۆستا خراپە، لێرەدا مەسەلەكە پشت بە ئاستی مەعیشەت دەبەستێت لەو ولاتانەدا. بۆنموونە لە كۆڵۆمبیا موچەی ساڵانەی مامۆستایەك دەگاتە 6 هەزار دۆلار، بەڵام ئەگەرچی ئەم موچەیە جیاوازییەكی هێجگار گەورەی لەگەڵ موچەی مامۆستایەكی لۆكسمبۆرگ هەیە، كەچی لەگەڵ ئەوەشدا دەتوانێت بڕێكی باش لە پارەكەی پاشەكەوت بكات بە بەراورد بە مامۆستای هەندێك لە وڵاتە پێشكەوتووەكان.  هەر بۆ نمونە تێكرای موچەی بنەڕەتی مامۆستایەك ساڵانە لە كوەیت 4 هەزار دۆلار و لە قەتەر 49440 دۆلار و لە توركیا 8000 دۆلار و لە ئوردن 7500 دۆلار، سەرباری ئەمەش بەپێی بارودۆخی ولاتەكانیان كە ئاسانكاری و پێداویستی تریان بۆ ابین كراوە خۆشگوزەران پێی دەژین. كەچی لەكوردستاندا نەك هەر موچەی مامۆستا كەمە، بەڵكو ئەو كەمەش كراوە بە نیوە و چارەك و چەندین مانگ ئەو نیوەو چارەكە موچەیەشیان وەرنەگرتووە! جیاوازی لە موچەو دەرماڵەی مامۆستایان تا ئێستاشی لەگەڵدا بێت بە پێی سیستەمی موچە لە هەرێمی كوردستاندا جیاوازی لەموچەی بنەڕەتی و دەرماڵەی مامۆستایان هەیە و لە هەموو ناوچە و پارێزگاكاندا وەكو یەك نیە و ئەمەش ناڕەزایی لەلایەن مامۆستایانەوە لێكەوتۆتەوە، سەرباری ئەوەی دەیان یاداشت و داواكاری لەم بارەیەوە دراوە بە ئەنجومەنی وەزیران و وەزارەتەكانی پەروەردەو دارایی كەچی تا ئێستا وەك خۆی ماوەتەوەو چارەنەكراوە. جگە لەمە مامۆستایان بەهۆی پاشەكەوتی موچەوە ماوەی سێ ساڵ نیوەو چارەكە موچەیان وەرگرتووەو چەندین مانگیش موچەكەیان پێنەدراوە، كە ئەمەش كاریگەریی خراپی لەسەر گوزەرانی مامۆستایان هەیە. بایكۆتی مامۆستایان یەكێك لەگرفتەكانی پەروەردەو پەك كەوتنی دەوامی خوێندن لەم ساڵانەی دواییدا بایكۆتی مامۆستایان بوو، كە بەهۆی پێنەدانی موچەكانیانەوە لە پارێزگاكانی سلێمانی و هەڵەبجەو ئیدارەی گەرمیان و راپەڕیندا كرا، دیارە هۆكاری ئەم بایكۆتەش حكومەت لێی بەرپرسیار بوو نەك مامۆستایان، چونكە مامۆستایان داوای مافێكی رەوای خۆیان دەكرد كە تەنها وەرگرتنی موچەكانیان بوو لەكاتی خۆیدا، لەكاتێكدا بۆ چارەكە موچەش كەم ببویەوە، كەچی وەزیری پەروەردە پشتیوان سادق وەزیری پەروەردەی حكومەتی هەرێمی كوردستان لە كۆنگرەی رۆژنامەوانی راگەیاندنی ئەنجامی تاقیكردنەوەكانی ئەزموونە گشتییەكانی خولی یەكەم بۆ ساڵی خوێندنی ٢٠١٧-٢٠١٨ لەبارەی خراپی بارودۆخی پەروەردە هێرشی كردەسەر مامۆستایانی سلێمانی و دەڤەری گەرمیان بەوە تۆمەتباریانی كرد كە بایكۆتی خوێندنیان كردووە پرۆسەی خوێندنیان دواخستووە. بەڵام باسی لە كەمتەرخەمی حكومەت نەكرد! ئەگەرچی بایكۆتی ئاشكرای مامۆستایان تەنها لە سلێمانی و هەڵەبجەو گەرمیاندا بوو، بەڵام رەوشی دەوامی مامۆستایانی هەولێر و دهۆكیش لەوان باشتر نەبوو چونكە لەو دوو پارێزگایەشدا بایكۆتێكی شاراوە هەبوو كە رانەگەیەنرابوو. زۆر باسی كاریگەری بایكۆت دەكرێت لەسەر خوێندكار، بەڵام بەدڵنیاییەوە كۆی بارودۆخی قەیران كاریگەری لەسەر پڕۆسەكە هەیە ئەنجام ڕێژەی دەرچون لەشارەكاندا سەلمێنەری ئەو ڕاستیەیە.    شكاندنی كەسایەتی مامۆستا مامۆستایەتی بەرزترین پیشەیە و هەرچی كەسایەتی و شارەزاو زاناو سیاسی و ناوداری كۆمەڵ هەیە، لەسەر دەستی مامۆستا پێدەگەن، بەداخەوە وەك پێویست رێز لە مامۆستا نەگیراوە و وەك پێویست پێداویستی و ئیمتیازاتی بۆ دابین نەكراوە، موچەی وەك پێویست نییە، بۆیە لەدوای دەوام بەناچاری پەنا بۆ پیشەو كارێكی تر دەبات بۆ بژێوی ژیانی، بەتایبەت لەم سێ‌ ساڵەی دواییدا كە مامۆستا لەبەر بێ‌ پارەیی پەنای بردۆتە بەر فرۆشتنی كەلوپەلە زۆر پێویست و خۆشەویستەكانی، جگە لەوەی بەهۆی ئەو بارودۆخە خراپەوە، ئێستا قەرزارن. بۆیە مامۆستا لەدۆخێكی ناجێگری لەو شێوەیەدا ناتوانێت پەیامەكەی خۆی بگەیەنێت، دابین نەكردنی بژێویی ژیانی مامۆستایان جگە لەوەی كاریگەری خراپی لەسەر ژیانی ئەوان كردووە، هاوكات بۆتە هۆكاری ئەوەی كە لەڕوی زانستیشەوە لاوازبوون، چونكە هێندەی بەڕێكردن و تەواوكردنی پڕۆگرام یان خوێندنی چەند بابەتێك بووە، هێندەی بەخەمی ئەوەوە نەبووەو كاتی ئەوەشی نەبووە كە ژینگەیەكی گونجاو بڕەخسێنێت. لە گەلێ‌ كاتیشدا دەبینین كەسایەتی مامۆستاش لە قوتابخانەكاندا دەشكێت و و هەمان ئەو توند و تیژییەی لەلایەن هەندێك مامۆستاوە بەرامبەر بە خوێندكاران دەكرێت، پێچەوانەكەیشی هەیە. هۆكاری سەرەكیش روانین و مامەڵەی دەسەڵات و ئەقڵیەتی سیاسییە كە چۆن دەڕوانێتە سێكتەری پەروەردەو مامۆستایان. تا دەسەڵات بەو تێگەیشتنە خراپەی مامەڵە لەگەڵ پەروەردە بكات، كەسێتی مامۆستا باڵا ناكات و داهێنان و دروستكردنی مرۆڤ و دیدگای نوێش لە ئاستێكی لاوازو خراپدا دەبێت.  ئەوەی لەماوەی بارودۆخی قەیراناوی كوردستاندا زۆرترین قوربانی دا، مامۆستایان بون و بەهەمو شێوەیەك كەسایەتیان شكێندرا، لەكاتێكدا ئەوان بوونە پێشەنگی زیاتر لە 63 خۆپیشاندان لەپێناوی گێڕانەوەی مافە زەوتكراوەكانیان، بەداخەوە حكومەت گەورەترین سوكایەتی بە مامۆستایان كرد. بۆ نمونە چەندین بەڵێنی پێدان و هیچی جێبەجێ نەكرد. لە ساتی خۆپیشاندانەكانی ئازاری 2018 دا كە مامۆستایان بۆ داواكردنی مافە سەرەتاییەكانیان كردیان، هێزە ئەمنیەكان بەجلی مەدەنییەوە بەجۆرەها شێواز ئازاری مامۆستایانیاندا، بۆ نمونە: هێرشكرایە سەر مامۆستایەكی خانەنشینكراوی بەتەمەنی هەولێر، جگە لە سوكایەتیپێكردن زۆریشیان لێدا و زیاتر شكۆی مامۆستا شكێنرا. هەرچەندە لەمبارەیەوە لێژنەی تۆماركردنی داوای مافی گشتیی هەولێر، لە نووسراوێكدا كە ئاڕاستەی دادگای لێكۆڵینەوەی شارەكەی كردووە، داوای جووڵاندنی سكاڵا لە بەرامبەر ئەو دوو كەسە دەكات كە لە خۆپیشاندانی شاری هەولێردا هێرشیان كردووەتە سەر مامۆستاكە، بەڵام هیچ ئەنجامێكی لێنەكەوتەوە. جگە لەمە لە زۆربەی خۆپیشاندانەكاندا، هێزە چەكدارەكان بە توندترین شێوە، رووبەرووی مامۆستایان بوونەتەوەو برینداریان كردوون و ئازاریان داون، تا ئاستێك لە ئەنجامی تەقەكردندا مامۆستاش شەهید بووە. بۆ نمونە رۆژی 19/12/2017 مامۆستا (هێرش عومەر)، یەكێك لەبریندارەكانی خۆپیشاندانەكان كە بەتەقەی هێزە ئەمنیەكان لەبەردەم مەڵبەندی كۆیەی یەكێتی برینداربوو، دوای نۆ ڕۆژ مانەوەی لەنەخۆشخانە لەهەولێر شەهید بوو. لەم بارەشەوە هەرچەندە لەدادگای كۆیە سكاڵا تۆمار كراوە، بەمەبەستی سزادانی بكەرانی ئەم تاوانە، بەڵام تا ئێستاشی لەگەڵدابێت بێ ئەنجام بووەو تۆمەتباران ئامادە نەبوون بچنە بەردەم دادگا.  ئەمەو توندوتیژی بەرامبەر مامۆستایان هەندێ‌ كات لەلایەن خوێندكاران یا كەسوكاریشیانەوە كراوە، بۆ نمونە لە كانی قرژاڵەی سەر بە پارێزگای هەولێر،  لەلایەن خوێندكارێكەوە لە خوێندگایەكی ناحیەكەدا، هێرشكرایە سەر مامۆستایەك و بەسەختی برینداركرا. لەماوەی رابردوودا چەندین حاڵەتی لەو جۆرە دووبارەبوونەتەوە. یەكێتی مامۆستایانی كوردستانیش هەستی بەم دیاردە خراپە كردووە، هەر بۆیە بۆ  رێكخستنی پەیوەندیەكانی نێوان مامۆستا و خوێندكار و گەڕانەوەی شكۆی مامۆستا لە خوێندنگەكاندا پرۆژە یاسایەكی ئامادە كرد و پێشكەشی پەرلەمانی كوردستانی كرد، بەڵام تا ئێستا ئەو پرۆژەیاسایە كاری لەسەر نەكراوە..  كێشەی وانەبێژ و گرێبەستەكان لەم ساڵانەی ئەم دواییەدا كە دامەزراندنی مامۆستا نەماوە، یا كەم بۆتەوە، بۆ پڕكردنەوەیەی ئەم بۆشاییەو دابینكردنی مامۆستا وەزارەتی پەروەردە هانای بۆ دابینكردنی مامۆستا بردووە بە شێوازی وانەبێژ، بەڵام مامۆستایانی وانەبێژیش بێ كێشە نین، زۆرینەیان لە لادێ دوورە دەستەكاندا وانەدەڵێنەوە، ماوەی 5-6 ساڵە گرێبەستیان بۆ كراوەو بەڵێنیان پێدراوە كە بۆیان بكرێت بە هەمیشەیی، بەڵام تا ئێستاش بۆیان نەكراوە، موچەی ئەو وانەبێژانەی هەڵگری بڕوانامەی دبلۆمن (400000) چوارسەد هەزار و بەكالۆریۆسیش (450000) چوار سەدوپەنجا هەزار دینارە. كە هەم جیاوازی لە موچەكانیاندا هەیە لەگەڵا هاوتاكانیان و هەم بەڵێنی بوون بەهەمیشەییان بۆ جێبەجێنەكراوەو لە دڵەراوكێدان. جگە لەمە كردەی بەناو پاشەكەوتی موچە ئەوانیشی گرتەوە كە موچەكانیان سەرباری كەمی بڕەكەی بوو بە نیوە. گرفتێكی تریش سەرفكردنی كرێی وانەی وانە بێژەكانە كە لە بری مانگانە ساڵی دوو جار (لە وەرزی یەكەم و دووەمی خوێندن) بۆیان سەرفكراوە. بەپێی ئاماری پەروەردە ساڵی خوێندنی 2017-2018 لە سەرجەم هەرێمدا (11136) مامۆستا وەك وانەبێژ گرێبەستیان بۆ كراوە كە لەوانە (4770) ی نێر و (6366)ی لە رەگەزی مێن.  

درەو میدیا:  عومەر سەید عەلی رێكخەری گشتی بزوتنەوەی گۆڕان لەگەڵ ژمارەیەكی  لە هەڵسوڕاوانی بزوتنەوەكەی لە گردی زەرگەتەی شاری سلێمانی كۆبوەوە و رایگەیاند: "گەلەكەمان دوای دەیان ساڵ لە خەبات و تێكۆشان بۆ دەستەبەركردنی مافە رەواكانی، لەم رۆژەدا و لە پێنجی ئازاردا بە سەرۆكایەتی ئەندازیاری راپەرین رەوانشاد نەوشیروان مستەفا لە دەروازەی راپەرین دەستی پێكرد و لە رانیەوە پەرەی سەند و هەمو شار و شارۆچكەكانی هەرێمی كوردستانی گرتەوە و لە نەورۆزدا تاجی سەركەوتنی خستە سەر خەباتی گەلەكەمان و هەمو دام و دەزگاكانی رژێمی راماڵی". ڕێكخەری گشتی بزوتنەوەی گۆڕان ڕێككەوتنەكەیانی لەگەڵ پارتی بۆ هەڵسوڕاوانی بزووتنەوەكەی رونكردەوەو وتی: پارتی جەختی لەوە كردووەتەوە نابێت پێیەكیان لە حكومەت و پێیەكیان لە ئۆپۆزسیۆن بێت، "وەفدەكەی گۆڕانیش وتویانە ئەوەمان قبوڵە، بەڵام لەبری ئەوە شەش مانگ دەوەستین بۆ ئەنجامدانی چاكسازی لابردنی پاشەكەوت و باشكردنی بژێوی خەڵك و دابینكردنی خزمەتگوزاریی." عومەر سەید عەلی دەشڵێت"دوای شەش مانگ ئەگەر زانیمان هیچ هەنگاوێك نییە بە ئاڕاستەی چاكسازی و باشكردنی بژێوی خەڵك، ئەوا گۆڕان وەك لایەنێكی سیاسی و بەشدار لە حكومەت لەگەڵ پارتی دیموكراتی كوردستان كۆدەبێتەوە، وەك دو لایەنی سیاسی دادەنیشینەوە و دەڵێین ئەوە شەش مانگ تێپەڕی هیچ دەستپێشخەرییەك نیە، بۆیە ئاگاداربن و پێویستە هەنگاو بنرێت، بەڵام شەش مانگی دیكەش دەدەینەوە حكومەت، ئەگەر زانیمان دوای ئەوە هەر هیچ بەرەو پێشچونێك نییە ئەوە ئێمە رادەوەستین و ئینجا دێین قسە بۆ خەڵك و میللەتی خۆمان دەكەین و هەڵوێستی دیكەمان دەبێت، شاندی پارتیش ئەوەی قبوڵ بوە." بەپێی میدیاكانی بزووتنەوەی گۆڕان كە ناوەڕۆكی وتەكانی عومەر سەید عەلییان بڵاوكردووەتەوە، دەربارەی پشكی گۆڕان لە حكومەت، ئەوەی خستووەتەڕوو، "جەختمان كردوەتەوە كە ناماناوێت لەپشكی خۆمان زیاترمان بدرێتێ‌و خێرمان پێ بكرێت، بەڵكو دەمانەوێت بە قەبارەو قورسایی خۆمان لە زاخۆ تا خانەقین بەپێی پرەنسیپی ستونی و ئاسۆیی بەشداربین لە هەمو دام و دەزگاكان و داوای زیاتر ناكەین، ئەوانیش پێیان باش بو." عومەر سەید عەلی دەربارەی پۆستەكانی گۆڕان ئەوەی خستووەتەڕوو، جێگری سەرۆكی هەرێم بەر بزوتنەوەی گۆڕان كەوتوە، هەروەها ئەو دەستەیەی بۆ چاكسازی دادەمەزرێت كە بەرپرسەكەی یاریدەدەری سەرۆكی حكومەت دەبێت، لەگەڵ چوار وەزارەت و بریكاری وەزارەتەكانی چوار وەزارەتی دیكە و سێ بەڕێوەبەری گشتیی دیار لەوانە؛ ئەمینداری پێشمەرگە و بەڕێوەبەری گشتییەك لە پەرلەمان یەكێكیش لە فەرمانگەی پەیوەندییەكانی دەرەوە. هەربەپێی رێككەوتنەكە؛ لە وەزارەتەكان بەپێی ئەو (12%)ی گۆڕان هەیەتی بەڕێوەبەری گشتی و ڕاوێژكاریان بەردەكەوێت‌و دەبێت لەماوەی سێ مانگدا ئیستیحقاقی خۆیان پێ بدرێت. لەبارەی پەیوەندییەكانیان لەگەڵ یەكێتی، عومەر سەید عەلی باسیلەوە كردووە، چوار رێككەوتنیان لەگەڵ یەكێتی هەیە، دوانیان لەسەر ئاستی حزبیی‌و دوانیان لەسەر ئاستی حكومەتە خۆجێییەكانی سلێمانی‌و هەڵەبجە، بەڵام "یەكێتی هیچیانی جێبەجێ نەكردووە." ڕێكخەری گشتی گۆڕان ئاماژەی بەوەشكردووە، لەم كۆتاییەدا یەكێتی چەند جارێك داوای كۆبونەوەیان لە گۆڕان كردوە، "ئێمە وتومانە ئێوە یەك هەنگاو بنێن، ئیمە ئامادەین، وتومانە لە هەڵەبجە فەرمان بۆ پارێزگار دەركراوە بۆ جێگری پارێزگار و قائیمقامیش دەربكەن كە مافی ئێمەیە با دەست بە كارەكانیان بكەن دوای ئەوە ئێمە ئامادەین بۆ دانیشتن، بەڵام نەیانكردوە." عومەر سەید عەلی، دەشڵێت"دوای چەند كۆبونەوەیەك لەنێوان پارتی و یەكێتی، دوێنێ ڕێككەوتن و لەژێر وێنەی ڕەوانشاد جەنابی مام جەلال واژۆیان كرد، مام جەلال بە ڕەحمەت بێت كە لە ژیاندا بو بە ئامادەبونی ئەو ڕێككەوتنیان لەگەڵ ئێمە كرد و جێبەجێیان نەكرد، ئومێد دەكەین ئەو ڕێككەوتنەی دوێنێ لەژێر وێنەی مام جەلال كردویانە جێبەجێی بكەن بۆ خزمەتی گەلەكەمان."  

راپۆرت: محەمەد رەئوف- فازل حەمەڕەفعەت چارەنوسی زیاتر لە 80%ی كۆی پۆستەكانی كابینەی نوێی حكومەت لەنێوان پارتی‌و یەكێتی‌و گۆڕاندا یەكلابوەتەوە‌و تەنیا چەند وەزارەتێك ماوە كە هێشتا گفتوگۆیان لەسەرە. پارتی دەیەوێت بەر لە جەژنی نەورۆز پێكهاتەی كابینەی نوێی حكومەت رابگەیەنێت، بەپێی بەدواداچوونی (درەو میدیا)، پۆستەكانی كابینەی نوێ بەمشێوەیە بەسەر لایەنەكاندا دابەشبووە: چوار سەرۆكایەتییەكە هەر چوار پۆستە سەرۆكاییەكەی هەرێم (سەرۆكایەتی پەرلەمان- سەرۆكایەتی هەرێم- سەرۆكایەتی حكومەت- سەرۆكایەتی ئەنجومەنی دادوەری) یەكلابونەتەوە. •    پۆستەكانی سەرۆكی هەرێم‌و سەرۆكی حكومەت پارتی دیموكراتی كوردستان دەیبات، نێچیرڤان بارزانی یەكلابوەتەوە بۆ سەرۆكایەتی هەرێم، مەسرور بارزانیش بۆ سەرۆكایەتی حكومەت. •    پۆستی سەرۆكی پەرلەمانی كوردستانیش یەكلابوەتەوە بۆ یەكێتی نیشتمانی، بڕیارە ئەو حزبە سبەی كاندیدی خۆی لەنێوان هەریەكە لە (بێگەرد تاڵەبانی‌و رێواس فایەق) بۆ سەرۆكی پەرلەمان یەكلابكاتەوە. •    پۆستی جێگری سەرۆكی پەرلەمان یەكلابوەتەوە بۆ پارتی، سكرتێری پەرلەمانیش بۆ پێكهاتەكان. •    پۆستی جێگری سەرۆكی حكومەتی هەرێم یەكلابوەتەوە بۆ یەكێتی‌و (قوباد تاڵەبانی) كاندیدی بەهێزە بۆ وەرگرتنی ئەو پۆستە. •    پۆستی یاریدەدەری سەرۆكی حكومەتی هەرێم بۆ كاروباری چاكسازی، یەكلابوەتەوە بۆ بزوتنەوەی گۆڕان، ئەم پۆستە نوێیە‌و لەم كابینەیەدا دروستدەكرێت. •    پۆستی جێگری سەرۆكی هەرێم یەكلابوەتەوە بۆ بزوتنەوەی گۆڕان‌و (مستەفا سەید قادر) كاندیدی بەهێزە بۆ وەرگرتنی پۆستەكە، بەڵام دەنگۆی خۆكاندیدكردنی (محەمەد تۆفیق رەحیم)یش هەیە بۆ هەمان پۆست، (درەو میدیا) لەبارەی خۆكاندیدكردنی، پەیوەندی بە محەمەد تۆفیق رەحیمەوە كرد، ئەو خۆكاندیدكردنی بۆ پۆستی جێگری سەرۆكی هەرێم رەتیكردەوە. •    پۆستی یاریدەدەری سەرۆكی هەرێم بۆ كاروباری سەربازی، ئەم پۆستەش پۆستێكی نوێیەو لەم كابینەیەدا دروستدەكرێت، ئەم پۆستە نوێیە بۆ یەكێتی یەكلابوەتەوە، زیادكردنی پۆستی یاریدەدەر بۆ پۆستی سەرۆكی هەرێم، لەبەرامبەر زیادكردنی پۆستی یاریدەدەرە بۆ سەرۆكی حكومەت، كە یەكەمیان بۆ گۆڕانە‌و دووەمیان بۆ یەكێتی. •    پۆستی سەرۆكایەتی دەستەی دادوەری هەرێمی كوردستان، ئەم پۆستە بۆ پارتی یەكلابوەتەوە. بەركەوتی یەكێتی لە وەزارەتەكان بەپێی زانیارییەكانی (درەو میدیا)، ئەو پۆستە وزارییانەی كە تائێستا بۆ یەكێتی نیشتمانی یەكلابونەتەوە بریتین لە (5) وەزارەت‌و چەند دەستە‌و بریكارێك كە ئەمانەن:   •    وەزارەتی كشتوكاڵ •    وەزارەتی تەندروستی •    وەزارەتی شارەوانییەكان •    وەزارەتی پێشمەرگە، بەڵام یەكێتی شەڕی وەرگرتنی وەزارەتی ناوخۆ دەكات، واتە ئەمە هیشتا یەكلانەبوەتەوە •    وەزارەتی خوێندنی باڵا، بەڵام پارتی دەیەوێت وەزارەتی پەروەردە بە یەكێتی بدات، واتە ئەمەش هێشتا یەكلانەبوەتەوە •    بریكاری وەزارەتی سامانە سروشتییەكان •    جێگری سەرۆكی فەرمانگەی پەیوەندییەكانی دەرەوە •    سكرتێری ئەنجومەنی وەزیران •    چوار ئەندام لە ئەنجومەنی دادوەری هەرێمی كوردستان •    جگە لە پۆستەكانی هەرێم، بەپێی رێككەوتنی نێوان پارتی‌و یەكێتی، پۆستی پارێزگاری كەركوك‌و وەزیری دادی عێراق كە پشكی كوردن، بۆ یەكێتی یەكلابوەتەوە بەركەوتی گۆڕان لە وەزارەتەكان لە كابینەی نوێی حكومەتدا، ئەم پۆستە وزاریانە بۆ بزوتنەوەی گۆڕان یەكلابوەتەوە: •    یاریدەدەری سەرۆكی حكومەت بۆ كاروباری ئەنجومەنی چاكسازی •    وەزیری دارایی •     وەزارەتی بازرگانی‌و پیشەسازی •     وەزارەتی كارو كاروباری كۆمەڵایەتی •   وەزارەتی ئاوەدانكردنەوە  •    سەرۆكی سندوقی داهاتە نەوتییەكان  •    ئەمینداری وەزارەتی پێشمەرگە •    جێگری وەزیری ناوخۆ •    دوو نوێنەرایەتی حكومەتی هەرێم لە دەرەوەی وڵات  •    بەڕێوەبەری گشتی‌و بەرپرسی دیوانی هەموو ئەو وزارەت‌و دەستانەی كە گۆڕان وەریدەگرێت •    بریكاری وەزیری پەروەردە بەركەوتی پارتی لە وەزارەتەكان دوای لێدەركردنی پشكی یەكێتی‌و گۆڕان، ئەم پۆستانە بۆ پارتی دیموكراتی كوردستان ماونەتەوە: •    وەزارەتی سامانە سروشتییەكان •    وەزارەتی ناوخۆ (یەكلانەبوەتەوە) •    وەزارەتی رۆشنبیری •    وەزارەتی داد •    وەزارەتی كاروباری شەهیدان •    وەزارەتی پلاندانان •    وەزارەتی گواستنەوە‌و گەیاندن •    وەزیری هەرێم بۆ كاروباری پەرلەمان •    وەزیری هەرێم بۆ كاروباری ژینگە •    وەزارەتی ئەوقاف •     سەرۆكی فەرمانگەی پەیوەندییەكانی دەرەوە •    سەرۆكی دیوانی ئەنجومەنی وەزیران •    دەستەی وەبەرهێنان •    دەستەی گشتی ناوچە كوردستانییەكانی دەرەوەی هەرێم •    سەرۆكی دیوانی سەرۆكایەتی هەرێم (پلەكەی وەزیرە) •    راوێژكاری ئەنجومەنی ئاسایشی هەرێمی كوردستان (پلەكەی وەزیرە) •    دەزگای گشتی كاروباری مین  •    فەرمانگەی هەماهەنگی‌و بەدواداچوون •    فەرمانگەی میدیا‌و زانیاری •    وتەبێژی حكومەت‌و وتەبێژی سەرۆكایەتی هەرێم بەركەوتی لایەنەكانی تر  پێشبینی دەكرێت پارتی دیموكراتی كوردستان، حزبی سۆسیالست دیموكراتی كوردستان بەشداری پێبكات لە حكومەت‌و لە پشكی خۆی پۆستی وەزارەتی شەهیدان‌و ئەنفالكراوان یاخود دەستەی ناوچە كوردستانییەكانی دەرەوەی هەرێم بدات بە كەسایەتییەك لە حزبی سۆسیالست.  ئەگەری بەشداریكردنی بزوتنەوەی ئیسلامیش لە حكومەت هەیە، پێدەچێت پارتی لە پشكی خۆی، پۆستێك بەو حزبەش بدات. بڕیارە پێكهاتەكانیش (مەسیحی- توركمان) پۆستێك لە حكومەت وەرگرن، ئەم پۆستەش پارتی لە پشكی خۆی دەیدات.

راپۆرت: محەمەد رەئوف- فازل حەمەڕەفعەت پارتی‌و یەكێتی تا ساتی نوسینی ئەم راپۆرتە كرۆكی رێككەوتنەكەی ئەمڕۆی نێوانیان بۆ رایگشتی هەرێمی كوردستان بڵاونەكردوەتەوە، بەڵام بەپێی زانیارییەكانی (درەو میدیا)، یەكێتی پۆستی یاریدەدەری سەرۆكى هەرێم بۆ كاروباری سەربازی وەردەگرێت‌و پرۆسەی هەڵبژاردنی پارێزگاری كەركوكیش سپێردراوە بە حكومەتی داهاتووی هەرێم. دوای پێنج مانگ لە هەڵبژاردنی پەرلەمانی كوردستان، دواجار ئەمڕۆ پارتی دیموكراتی‌و كوردستان‌و یەكێتی نیشتمانی كوردستان رێككەوتنیان لەسەر پێكهێنانی كابینەی نوێی حكومەتی هەرێم ئیمزا كرد. (درەو میدیا) زانیویەتی، لە دوو رۆژی داهاتوودا ئەنجومەنی سەركردایەتی یەكێتی كۆدەبێتەوە بەمەبەستی پەسەندكردنی رێككەوتنەكە لەگەڵ پارتی‌و یەكلاكردنەوەی كاندیدی پۆستی سەرۆكی پەرلەمان كە بۆ یەكێتییە. رێككەوتنەكە ! بەپێی ئەو زانیارییانەی كە لە چەند سەرچاوەیەكی باڵای جیاوازەوە لەناو یەكێتی‌و پارتی دەست (درەو میدیا) كەوتوون، لەبارەی پرسی پێكهێنانی حكومەتی هەرێم‌و پشكی یەكێتی لە حكومەت، رێككەوتنی ئەمڕۆی نێوان پارتی‌و یەكێتی هیچ شتێكی زیاتری تێدا نییە لەو رێككەوتنەی كە رۆژی (5)ی شوبات لەنێوان هەردوولادا كرا. (درەو میدیا) زانیویەتی، یەكێتی قایل بووە بەو پۆستانەی كە پێشتر لە حكومەت پێیدراوە، واتە پۆستی سەرۆكی پەرلەمان‌و جێگری سەرۆكی حكومەت‌و پێنج وەزارەت‌و چەند دەستەیەك. تەنیا پەرەسەندنێك كە لە رێككەوتنەكەی ئەمڕۆیدا رویداوە، ئەوەیە، یەكێتی بەنوسراو گەرەنتی "شەراكەتی راستەقینە"ی لە پارتی وەرگرتووە لە پرسی حكومەتداریدا لە هەرێم، بەتایبەتی لە بوارەكانی نەوت‌و پەیوەندییەكانی دەرەوە. گرێكوێرەكەی كەركوك سەبارەت بە پرسی كەركوك كە خاڵی گەورەی ناكۆكی نێوان پارتی‌و یەكێتی بوو لە پرۆسەی پێكهێنانی كابینەی نوێ حكومەتی هەرێمدا، سەرچاوەیەكی ئاگادار لەناو یەكێتی بە (درەو میدیا)ی راگەیاند، پارتی‌و یەكێتی رێككەوتوون لەسەر ئەوەی چارەنوسی هەڵبژاردنی پارێزگارێكی نوێ بۆ كەركوك، حكومەتی نوێی هەرێم یەكلايی بكاتەوە، بەجۆرێك حكومەتی نوێی هەرێم لەگەڵ بەغداد رێككەوتن بكات لەسەر ئاسایكردنەوەی دۆخی كەركوك‌و ناوچە جێناكۆكەكان‌و دوای ئاسایكردنەوەی دۆخەكان، پارێزگارێكی نوێ لە یەكێتی بۆ كەركوك هەڵبژێردرێت. واتە لەبارەی دۆخی كەركوكەوە، دواجار پارتی بۆچونەكانی خۆی چەسپاند‌و ئەوەی بۆ یەكێتی ماوەتەوە تەنیا ئەوەیە پارێزگاری داهاتووی كەركوك كەسێك دەبێت لە یەكێتی نیشتمانی، چونكە پێشتر پارتی جەختی لەسەر ئەوە دەكرد دەبێت سەرەتا دۆخی كەركوك ئاسایی بكرێتەوە‌و دواتر پارێزگار هەڵبژێردرێت، بەڵام یەكێتی داوای دەكرد دەبێت سەرەتا گرەنتی هەڵبژاردنی پارێزگارێكی یەكێتی بۆ كەركوك بكرێت. پەرلەمان‌و یەكێتی ! بەپێی رێككەوتنە نوێیەكە، دەبێت لە كورتترین ماوەدا، یەكێتی نیشتمانی كاندیدی خۆی بۆ وەرگرتنی پۆستی سەرۆكی پەرلەمان پێشكەش بكات، بۆ ئەوەی پارتی لە پۆستی سەرۆكی پەرلەمان بۆ یەكێتی بكشێتەوە‌و كاندیدی یەكێتی بەدەنگدان لەناو پەرلەماندا وەكو سەرۆكی پەرلەمان هەڵبژێردرێت.  كاندیدەكانی یەكێتی بۆ پۆستی سەرۆكی پەرلەمان هێشتا گۆڕانكاری بەسەردا نەهاتووە‌و تەنیا (بێگەرد تاڵەبانی‌و رێواز فایەق)ن. سەرۆكایەتی هەرێم (درەو میدیا) زانیویەتی، بەپێی رێككەوتنەكە، لەدوای پێكهێنانی سەرۆكایەتی پەرلەمان (واتە دەستبەكاربوونی كاندیدی یەكێتی لە پۆستی سەرۆكی پەرلەمان) یاسای سەرۆكایەتی هەرێم لەناو پەرلەمانی كوردستانەوە هەموار دەكرێتەوە، كە ئێستا پارتی پرۆژە هەموارەكەی ئامادەكردووە‌و، ئەویش هەمواركردنی ئەو بڕگەیە كە باس لە هەڵبژاردنی سەرۆكی هەرێم دەكات‌و لە هەموارەكەدا داواكراوە سەرۆكی هەرێم لەناو پەرلەمانەوە هەڵبژێردرێت. بەگوێرەی رێككەوتنەكەی پارتی‌و یەكێتی، پۆستی یاریدەدەری سەرۆكی هەرێم بۆ كاروباری سەربازی زیاد دەكرێت‌و ئەو پۆستە بە یەكێتی دەدرێت، پۆستی جێگری سەرۆكی هەرێمیش بۆ بزوتنەوەی گۆڕان دەبێت. سەبارەت بە یاسای دابەشكردنی دەسەڵاتەكانی سەرۆكی هەرێم‌و یاسای هەڵپەساردنی دامەزراوەی سەرۆكایەتی هەرێم، بڕیارە لەهەمان رۆژدا كۆتایی بە كاركردن بەو دوو یاسایە بهێنرێت‌و دامەزراوەی سەرۆكایەتی هەرێم كارابكرێتەوە. بەپێی زانیارییەكانی (درەو میدیا)، دەسەڵاتەكانی سەرۆكی هەرێم وەكو خۆی دەمێنێتەوە‌و كەمناكرێنەوە، هەموو ئەم پرۆسەیە بڕیارە لەماوەی كەمتر لە (10) رۆژدا جێبەجێ بكرێت. سەرۆكی نوێی هەرێم، بە دەنگی (دوو لەسەر سێ)ی ئەندامانی پەرلەمانی كوردستان هەڵدەبژێردرێت، ئەمەش لەسەر بنەمای دەستوری عێراق دەكرێت، چونكە هەرێمی كوردستان تائێستا دەستوری نییە. بەڵام ئەگەر زیاتر لە كەسێك خۆیان بۆ پۆستی سەرۆكی هەرێم كاندیدكرد‌و دەنگەكانیان لەناو پەرلەمان یەكسان بوو، ئەوكات بەزۆرینەی سادەی دەنگ كاندیدی سەرۆكی هەرێم یەكلادەكرێتەوە. سەرۆكایەتی حكومەت‌و وەزارەتەكان لەبارەی پێكهێنانی سەرۆكایەتی نوێی حكومەتی هەرێمیشەوە، زانیارییەكانی (درەو میدیا) ئاماژە بەوەدەكەن، پارتی هەوڵێكی هەیە بۆ ئەوەی بەر لە جەژنی نەورۆز حكومەتی نوێی هەرێم پێكبێت. لە یەكێتی نیشتمانی كوردستان (قوباد تاڵەبانی) كاندیدە بۆ وەرگرتنی پۆستی جێگری سەرۆكی حكومەتی هەرێم، پۆستەكانی تریش لەناو باڵەكانی یەكێتیدا یەكلادەكرێتەوە، بەڵام پێدەچێت كاندیدی پۆستەكانی تر لەناو یەكێتی دوچاری گێرمە‌و كێشە ببێتەوە. لەبارەی وەزارەتەكانیشەوە، یەكێتی لە كابینەی نوێدا (5) وەزارەت وەردەگرێت، یەكێتی تائێستا سورە لەسەر وەرگرتنی وەزارەتی ناوخۆ، یەكلاكردنەوەی پۆستی وەزارەتی ناوخۆ‌و پشكەكانی تری یەكێتی لە حكومەت سپێردراوە بەو كۆمیتە هاوبەشەی كە لە چەند رۆژی داهاتوودا لەنێوان هەردوولادا دروستدەكرێت.  كێشەی بەغداد لەسەر پرسی وەزارەتی دادی عێراق كە پشكی كوردە‌و بەهۆی ناكۆكی نێوان پارتی‌و یەكێتی تائێستا ئەو وەزارەتە پڕنەكراوەتەوە، مەسعود بارزانی بەڵێنی بە یەكێتی داوە ئەو پۆستە بۆ ئەوان دەبێت. بەپێی زانیارییەكانی (درەو میدیا)، هەرچەندە عادل عەبدولمەهدی سەرۆك وەزیرانی عێراق پێشتر كاندیدی بۆ پۆستی وەزارەتی داد راگەیاندووە، بەڵام پێشبینی دەكرێت دواجار یەكێتی (خالید شوانی) لە پۆستی وەزارەتی داد جێگیر بكات. بەرهەم ساڵح‌و پارتی سەرچاوەیەكی ئاگادار لەناو یەكێتی بە (درەو میدیا)ی راگەیاند، پارتی بەڵێنیداوە بەمزوانە پەیوەندییەكانی لەگەڵ بەرهەم ساڵح سەرۆك كۆماری عێراق ئاسایی بكاتەوە، كە یەكێك لە خاڵە ناكۆكەكانی نێوان هەردوو حزب بوو، بەوپێیەی بەرهەم ساڵح لە دەرەوەی رێككەوتنی سیاسی نێوان پارتی‌و یەكێتی بۆ پۆستی سەرۆك كۆماری عێراق هەڵبژێردرا.

راپۆرتی: سەرتیپ وەیسی كەریم  یه‌كێتیی خواستیبوو به‌ زووترین كات له‌گه‌ڵ پارتی بگاته‌ ڕێككه‌وتن، به‌ڵام نه‌یده‌توانی، ئه‌مه‌ش به‌هۆی ئه‌و مه‌رجانه‌ی له‌كۆبوونه‌وه‌كانی ڕابردوو بۆچوونه‌ حكومه‌ت له‌سه‌رپارتی داینابوو، دوای ئه‌وه‌ی زانی به‌ ته‌واوی ناتوانێت ئامانجه‌كانی بهێنێته‌دی، له‌م چه‌ند ڕۆژه‌ی ڕابردوودا، ده‌ستیكرد به‌ دۆزینه‌وه‌ی ده‌ره‌چه‌ ( مه‌خره‌جێك ) بۆ ده‌ربازبوون له‌و بارودۆخه‌ی تێیكه‌وتووه‌و بۆ ڕێگه‌گرتن له‌ زیاتر په‌راوێزخستنی، به‌ڵام به‌هۆی ئه‌وه‌ی كه‌س نه‌یده‌توانی له‌و حزبه‌ ئۆباڵی ئه‌ستۆی ئه‌و ڕێككه‌وتنه‌ بخاته‌ سه‌ر ملی، رٍێككه‌وتنه‌كه‌ هه‌ر دواده‌كه‌وت، دواجار به‌ڵێنێكی زاره‌كی دوێنێی مه‌سعود بارزانی و كۆسره‌ت ره‌سوڵیان كرده‌ ده‌ره‌چه‌، بۆ ده‌ربازبوون له‌و دۆخه‌و واژۆكردنی ڕێككه‌وتنه‌كه‌ی ئه‌مڕۆیان. پارتی و یه‌كێتیی له‌سه‌ر پرسی پۆسته‌كانی حكومه‌ت و په‌رله‌مان و به‌غدا هیچ كێشه‌یه‌كیان نه‌بووه‌، به‌ڵام پرسی كه‌ركوك، واژووكردنی ڕێككه‌وتنی سیاسی نێوانیان دواخستبوو، به‌ڵام دواجار له‌ دوا كۆبوونه‌وه‌ی ئه‌مڕۆدا، یه‌كێتیی نه‌یتوانی ڕێككه‌وتنێكی كۆنكرێتی و دیاریكراو، له‌باره‌ی ناوی پارێزگارو واده‌ی دانانی پارێزگار، به‌ مسۆگه‌ری له‌گه‌ڵ پارتی واژووبكات، ته‌نها ئه‌وه‌یه‌ له‌ باره‌ی رێككه‌وتن له‌سه‌ر پۆستی پارێزگاری كه‌ركووك، سیغه‌یه‌كی لاستیكی و مه‌تاتیان داڕشتووه‌، میكانیزمیان بۆ هه‌ڵبژاردنی پارێزگاری كه‌ركوك داناوه‌، دووباره‌ ئه‌و پرسه‌ی ده‌سپێردرێت به‌ لیژنه‌، له‌گه‌ڵ گه‌ره‌نتی پێدانی ئه‌و پۆسته‌ به‌ یه‌كێتیی. به‌پێی ڕێككه‌وتنه‌كه‌ی ئه‌مڕۆی نێوانیان ( جگه‌ له‌ قسه‌ ئینشائییه‌كانی نێو ڕێككه‌وتنه‌كه‌ له‌ باره‌ی كاری هاوبه‌ش و پێكه‌وه‌یی له‌سه‌ر ئاستی به‌غداو هه‌رێم )، هه‌نگاوه‌كانی پێكهێنانی حكومه‌ت و هه‌ڵبژاردنی سه‌رۆكی په‌رله‌مان و هه‌رێم خێراده‌بێت، یه‌كێتیش جگه‌ له‌ وه‌رگرتنی هه‌ردوو پۆستی سیادی ( سه‌رۆكی په‌رله‌مان و جێگری سه‌رۆكی حكومه‌ت)، پێنج پۆستی وزاری وه‌رده‌گرێت، به‌ڵام ورده‌كاری ته‌واوی جێبه‌جێكردنی ڕێككه‌وتنه‌كه‌ دراوه‌ته‌ كۆمیته‌یه‌كی هاوبه‌ش. ئه‌وه‌ی له‌ ناوه‌ڕۆكی رێككه‌وتنه‌كه‌ی ئه‌مڕۆدا هاتووه و زۆر به‌ دڵی یه‌كێتیی نییه‌، برتییه‌ له‌ چاوه‌ڕوانی یه‌كێتیی له‌ پارتی، بۆ كاتی دانانی پارێزگاری كه‌ركوك و ده‌شبێت ئه‌و پرسه‌ بارزانی و كۆسره‌ت ڕه‌سوڵ یه‌كلایبكه‌نه‌وه‌، ئه‌مه‌ش ده‌وه‌ستێته‌ سه‌ر پابه‌ندبوون هه‌ردوولا به‌ ناوه‌ڕۆكی رێككه‌وتنه‌كه‌ وه‌كو خۆی.

راپۆرتی:  درەو میدیا وەڵامەكانی بارزانی لە ئاستی چاوەڕەوانی وەفدی باڵای یەكێتی نیشتیمانی كوردستان نەبوو، كە ئەمڕۆ لە پیرمام لەگەڵی كۆبونەوە،  مەسعود بارزانی بەغدای بە نیوەناچڵ چارەسەركردوو پرسی كەركوكیشی هەڵپەسارد، چارەسەری بنەڕەتی بۆ كێشەكانی نێوان پارتی و یەكێتی پێنەبوو. بە پێی زانیاریەكانی (درەو میدیا) كە لە چەند سەرچاوەیەكی جیاوازەوە دەستی كەوتووە، مەسعود بارزانی هیچ پرسێكی بەتەواوی لەگەڵ بەرپرسانی یەكێتی یەكلا نەكردوەتەوە، تەنها لەسەر هێوركردنەوەی راگەیاندن و گرژییەكانی نێوانیان رێکكەوتوون. بارزانی چی بۆ یەكێتی پێبووە؟ بڕیار بوو ئەمڕۆ وەفدی یەكێتی و پارتی كۆببنەوەو دواتر پێكەوە بچنە لای مەسعود بارزانی، بەڵام بەهۆی سوربوونی یەكێتی لەسەر داواكانی خۆی و نەبوونی چارەسەری بەدیل لەلایەن پارتیەوە، كۆبونەوەكە نەكراوەو دواجار وەفدی باڵای یەكێتی چونەتە لای مەسعود بارزانی لە پیرمام، بارزانی لە گفتوگۆو لێدوانەكانیدا خۆی وەكو مەرجەعێك پیشانداوەو لە هەندێك لە لێدوانەكانیدا بێلایەنانە قسەیکردووە.  ئەوەی هەردوولا لەسەری كۆك بوون، هەوڵدان بۆ هێوركردنەوەی بارودۆخەكەو رێگەگرتن لە هەڵمەتی راگەیاندن لە دژی یەكتر بۆ ئەوەی كەشوهەوایەكی گونجاو بڕەخسینن بۆ رێكکەوتنی نێوان هەردوولا، بەڵام لەسەر بەشێك لە پرسەكان هەڵوێستیان جیاواز بووە. پرسی وەزارەتی دادی عێراق لەسەر پرسی پێدانی وەزارەتی دادی حكومەتی عێراق بە یەكێتی نیشتیمانی كوردستان، مەسعود بارزانی بەڵێنی بە وەفدەكەی یەكێتی داوە كە ئەتوانن كاندیدی خۆیان بدەنە عادل عەبدولمەهدی و ئەوان هیچ لاریەكیان نیە و كاندیدیان نابێت و پشتیوانیشی ناكەن، پێشی وتوون كە ئەو وەزارەتە هیچ سودێكی بۆ هەرێمی كوردستان نابێت، بۆیە نابێت ببێتە كێشە لەبەردەم پێكهێنانی حكومەتی هەرێم و تێكچونی پەیوەندییەكانی نێوان یەكێتی و پارتی.   پرسی سەرۆك كۆمار لە پرسی مامەڵەكردنی پارتی لەگەڵ سەرۆك كۆماری عێراق ( بەرهەم ساڵح) مەسعود بارزانی نیگەرانی خۆی بە وەفدی یەكێتی راگەیاندووە لەسەر میكانیزمی هەڵبژاردنی سەرۆك كۆماری عێراق، بەڵام پێشی راگەیاندوون كە پەیوەندیەكانیان ئاسایی دەكەنەوەو وەك یەكەم هەنگاویش هۆشیار زێباریان ناردووە بۆ كۆبونەوە لە سەرۆكایەتی كۆمار، كە ئەمەش سەرەتای ئاساییكردنەوەی پەیوەندیەكانی پارتیە لەگەڵ بەرهەم ساڵح، لە سەرۆكایەتی كۆماریش هۆشیار زێباری بۆ ماوەی 20 خولەك لەگەڵ بەرهەم ساڵح كۆبوەتەوەو پەیامی ئاساییكردنەوەی پەیوەندیەكانی پارتی پێگەیاندووە. پرسی كەركوك  لەسەر پرسی كەركوك، مەسعود بارزانی بە وەفدی یەكێتی راگەیاندووە " ناكرێت بە بێ ئاساییكردنەوەی بارودۆخی كەركوك پارێزگار هەڵبژێردرێت، چونكە بەبێ ئاساییكردنەوەی دۆخەكەو گەڕانەوەی پێشمەرگە، ئەگەر پارێزگار كوردیش بێت دەسەڵاتی ئەوتۆی نابێت"، لەگەڵ ئەوەی وەفدی یەكێتی سوربوونی سەركردایەتی حزبەكەیان راگەیاندووە لەسەر ئەوەی كە دەبێت پارێزگاری كەركوك هەڵبژێردرێت و بۆ یەكێتیش بێت، هەروەها پارتی پێشنیازێكی نوێی خستوەتە بەردەم یەكێتی بۆ كەركوك، ئەویش پێدانی وەزارەتی ناوخۆی حكومەتی هەرێمە بە یەكێتی لەبەرامبەر دواخستنی پرسی پارێزگاری كەركوك، هەرچەندە رەنگە ئەم پێشنیازە بۆ یەكێتی خراپ نەبێت و باڵەكانی یەكێتی لەسەری بوەستن، بەڵام زۆرینەی سەركردایەتی یەكێتی  تا ئێستاش سورن لەسەر ئەوەی كە پارتی بە نوسراو گرەنتی پارێزگاری كەركوك بدات بە یەكێتی، چونكە یەكێتی پێی وایە تاكە دەستكەوتی لەم حكومەتە تەنها بەدەستهێنانی پارێزگاری كەركوكە، پارتیش سەرەرای بیانوی نائارامی كەركوك، گومانیشی لە فراوانبوونی دەسەڵاتی یەكێتی هەیە لە حاڵەتی گرتنە دەستی پارێزگاری كەركوك. رەنگە كەركوك بۆیەكێتی خۆیشی سەرئێشەو ناكۆكی بەداودا بێت بەتایبەتی لە دیاریكردنی كاندیدی پارێزگاری كەركوك كە ئێستا هەرباڵەی ناو یەكێتی كاندیدی نوێ پێشكەشدەكەن. پۆستەكانی هەرێم بەشێكی زۆری سەركردایەتی یەكێتی پێیان وایە كە پۆستی سەرۆكی پەرلەمانی كوردستان هیچ گرنگیەكی نەماوە بۆ یەكێتی و پێویستە لەبەرامبەر سەرۆكی پەرلەمان پۆستی دیكە وەربگرن، بەتایبەت پۆستی سیادی، زانیارییەكان ئاماژە بەوە دەكەن یەكێتی لەبەرامبەر پۆستی سەرۆكی پەرلەمان داوای پۆستی وەزارەتی ناوخۆ و جێگری سەرۆكی هەرێم دەكات، هەرچەندە پارتی بە بەرپرسانی یەكێتیان راگەیاندووە جێگری سەرۆكی هەرێم بەپێی رێكکەوتن دراوە بە گۆڕان و پاشەكشەی لێناكەن، بەڵام رەنگە لە حاڵەتی رازی بوونی یەكێتی بە چونی بۆناو حكومەت پۆستەكان گۆڕانكارییان بەسەردا بێت، چونكە یەكێتی داوای دوو ئەوەندەی ئەو پۆستانە دەكات كە بەر بزوتنەوەی گۆڕان كەوتووە، ( چوار وەزارەت و چوار بریكار و جێگری سەرۆكی هەرێم و یاریدەدری سەرۆكی حكومەت بۆ چاكسازی و دەیان بەرێوەبەر و راوێژكار) . كۆبونەوەی یەكلاكەرەوە؟ بڕیارە سبەی دووشەممە وەفدی یەكێتی و پارتی لە هەولێر كۆببنەوە، ئەگەرچی باس لە كۆبونەوەی یەكلاكەرەوە دەكرێت، بەڵام رەنگە ئەو كۆبونەوەیە درێژە بكێشێت بۆ چەند كۆبونەوەیەكی دیكە، چونكە كۆبونەوەكەی بارزانی و وەفدی یەكێتی كێشەكانی بەتەواوی ( حەسم )نەكرد، ئێستا لەبەردەم كۆبونەوەی سبەی وەفدی باڵای یەكێتی و پارتی چەن پرسێك ئامادەیە بۆ یەكلاكردنەوە لەوانە:  •    پرسی بارودۆخی كەركوك و یەكلاكردنەوەی پارێزگاری كەركوك  •    پرسی هاوبەشی راستەقینەی یەكێتی لە حكومەت  •    پرسی بەركەوتەی یەكێتی لە حكومەت و پەرلەمان  •    پرسی میكانیزمی هەڵبژاردنی سەرۆكی هەرێم  •    پرسی بەغداو سەرۆك كۆمار  •    پرسی میكانزمی رێكکەوتنی سیاسی نێوان هەردولا  بەڵام ئاماژەكان بۆ ئەوە دەچن كە هەردوولا بگەنە رێكکەوتن و چارەسەری مامناوەند بۆ پرسەكان بدۆزنەوە، چونكە هەردوولا ماندووبون لەوەی ناتوانن یەكتری بخەن و ناشتوانن بەبێ یەك حكومەت پێكبهێنن و سەرەرای فشاری نێودەوڵەتی ( ئیران – ئەمریكا) لەسەر هەرێم بۆ رێكکەوتن، بەرژەوەندییە سیاسی و ئابورییەكانی نێوان هەردوولاش زۆر لەوە زیاترن كە لێكبترازێن.      

راپۆرتی: درەو میدیا  ساڵی رابردوو دروست لە 3/5/2018 لەو كاتەی ئاسمانی فڕۆكەخانەی نێودەوڵەتی سلێمانی بەرووی توركیا داخرابوو، شاسوار عەبدولواحید لە بەریتانیاوە دەگەڕێتەوە فڕۆكە خانەی بەغدا و لەوێشەوە بۆ فرۆِكەخانەی نێو دەوڵەتی سلێمانی، كاتێك دەچێتە شوێنی چێككردن، "بە وتەی كەسێكی نزیكی شاسوار عەبدولواحید" یەكسەر شاسوار عەبدولواحید بەرێدەكەن و نەچێكی پاسپۆرتی بۆ دەكەن نە پەنجە مۆر و نە وێنەی دەگرن بە پێچەوانەی سەرنشینانی ترەوە".  شاسوار عەبدولواحید بە كارمەندی ئاساییشی فڕۆكەخانە دەڵێت:"  بۆچی چێكی پاسپۆرتم بۆ ناكەن، چونكە ناوبراو گومانی لا دروست دەبێت لەوەی دواتر كێشەی بۆ دروست بكەن، كارمەندەكان پێی دەڵێن نایەوێت، لەو كاتەدا دەمە بۆڵە دروست دەبێت لە نێوان هەردوولادا، بە وتەی كارمەندانی فڕۆكەخانە شاسوار عەبدولواحید ئیهانەی كردون وەك لە سكاڵاكەدا هاتووە، بەڵام كەسە نزیكەكانی دەڵێن شاسوار عەبدولواحید تەنها پێی وتوون ئێوە دەتانەوێت كێشەم بۆ دروست بكەن و من لە سەرو خۆتان لە بەغداو لە هێڵی فڕۆكەوانی عێراق سكاڵاتان لەسەر تۆماردەكەم". تۆماركردنی سكاڵا  شاسوار عەبدولواحید دوو سكاڵای لەسەر تۆمار كراوە یەكێكیان كارمەندی ئاسایشی فڕۆكەخانەی سلێمانیە كە شاسوار عەبدولواحیدی تۆمەتباركردووە بەوەی قسەی پێ وتووەو ئیهانەی كردووە، ئەوی تریان كارمەندێكی ( كۆمپانیای ئەزمەڕ ئێرلاین)ە كە شاسوار عەبدولواحیدی تۆمەتباركردووە بەوەی پاڵی پێوەناوە لەناو فڕۆكەخانەدا. رێباز مەحمود، پارێزەری شاسوار عەبدولواحید بە ( درەو میدیا) راگەیاند" شاسوار عەبدولواحید دوو سكاڵای لەسەر تۆمار كراوە، یەكەمیان سكاڵایەكە بە مادەی ( 229 )  كە تایبەتە بە ئیهانەكردن بە كارمەدانی گشتی دەوڵەت، لەسەر ئەم سكاڵایە دادوەر بە بارمتەی ( 1 ملیۆن دینار) شاسوار عەبدولواحیدی ئازادكرد". لە دەقی مادەی 229 ی یاسای سزادانی عێراقیدا هاتووە" هەر كەسێك ئیهانە یان هەڕەشە لە فەرمانبەر یان هەر كەسێك راسپێدرابێت بۆ كارێكی گشتی(مكلف بخدمە عامە) بكات، ئەوا سزادەدرێت بە بەند كردن( حبس ) كە زیاتر نەبێت لە دوو ساڵ و غەرامە كردنی كە زیاتر نەبێت لە دوو سەد دینار". سكاڵای دووەم بە پێی مادەی ( 434 ) ی یاسای سزادانی عێراقیە كە تایبەتە بە دەمە بۆڵە( جنێودان) لە نێوان دوو كەسدا،  ئەمەش لە مادە ئاسانەكانە، هەربۆیە بە پێی ئەو مادەیە شاسوار عەبدولواحیدیان دەستگیركرد، بیانووی دەستگیركردنەكەش ئەوەیە كە بنكەی پۆلیسی فڕۆكەخانەی سلێمانی كە سكاڵاكان لەوێ تۆماركراون" دەڵێن چەندجارێك ئاگاداركردنەوەیان ناردووە بۆ شاسوار عەبدولواحید و كەس لێی وەرنەگرتوون، بەڵام پارێزەرەكەی دەڵێت شوێن و ناونیشانی شاسوار عەبدولواحید دیارەو كەس ئاگاداركردنەوەی نەهێناوە.  هەروەك لە راگەیەنراوەكەی دادگای سلێمانیدا هاتووە" لە مانگی 5/2018 وە دادگا بانگهێشتنامەی ئاراستەی شاسوار عەبدولواحید كرد، بەڵام بەڕێزیان ئامادەنەبوو بێتە بەردەم دادگا و بەدەم بانگهێشنامەكەوە نەهات, بۆیە دادگا بەپێی یاسا فەرمانی دەستگیركردنی بۆ ناوبراو دەركرد" لە دەقی ماددەی‌ (434) لە یاسای سزادانی عیراقیدا هاتووە كە" تاوانی (جنێودان)بریتیە لەوەی كەسێك قسەی وەها بە یەكێك بڵێت كە ئابڕووی یان پێگەی لەكەدار بكات یان هەستی بریندار بكات هەرچەندە ڕووداوێكی دیاریكراوی نەدابێتە پاڵ".  ئێستا شاسوار عەبدولواحید، سەرۆكی جوڵانەوەی نەوەی نوێ‌ براوە بۆ زیندانی گرتن‌و گواستنەوەی ( مەعەسكەر سەلام) و بڕیارە سبەی بهێنرێتەوە بۆ بەردەم دادوەری لێكۆڵێنەوەی ئاسایش، كە پێشتر دادوەر بە پارێزەرانی  شاسوار عەبدولواحیدیان راگەیاندبوو با بێتە بەردەم دادگاو بە كەفالەت ئازاددەكرێت چونكە مادەكانی سوكە. هەربۆیە شاسوار عەبدولواحید كاتژمێر 9:30 خولەكی بەیانی  لە ماڵەكەی خۆی بەرەو دادگای سلێمانی بەرێكەوتووە‌و چوەتە بەردەم دادوەری لێكۆڵینەوەی ئاسایشی سلێمانی لەوێ دەستگیركراوەو براوە بۆ بنكەی پۆلیسی فڕۆكەخانەی سلێمانی و لەوێشەوە بۆ  زیندانی گرتن‌و گواستنەوەی ( مەعەسكەر سەلام). لەتیف شێخ مستەفا دادوەری دەستلەكاركێشاوە لە نوسێنێكدا لە پەیجی تایبەتی خۆی دەڵێت"  مادەی ٤۲٤ لە یاسای سزادان سزاكەی لە ساڵ كەمترە وتاوانی جۆری كەتنی سادەیە و پێویستە (واجبە ) لەسەر دادوەر یەكسەر بەكەفالەت بەری بدات بەگوێرەی مادەی۱۱٠لەیاسای بنەمای دادگەریە سزاییەكان و دەشێ هەر بەبەڵێن نامەی كەسی بەربدرێ بەتایبەتی ئەگەر تۆمەتبار كەسێكی ناسراو بێت و ترس لە ڕاكردنی نەبێت ،گرنگیش نیە بە پیر تەبلیغەكەوە نەچوبیت و فەرمانی گرتنی بۆ دەرچوبێت ،بەتایبەتی دەبێ ئەوەش بزانرێت كە تەوقیف ئیجرائیكی ئیحتیاتیەو سزا نیە ،باشە پرسیارەكە ئەوەیە بۆ چەند مانگە ئەو فەرمانە جێبەجێ نەكراوە و پشت گوێ خراوە ئایا تۆمەتبار هەر لەم شارە نەبوە ؟بۆ ئیستا جێ بەجێ دەكرێ دوای ئەوەی تۆمەتبار هەندێ قسەو ڕەخنەی سیاسی توند بە دەسەڵاتداران دەڵێت چۆن ئیتر خەڵك قەناعەت بكەن كە دادگا بەكار نایەت ؟" بەرپرسانی نەوەی نوێ گومانیان هەیە بەرپرسانی نەوەی نوێ گومانیان هەیە لە شێوازی دەستگیركردنی سەرۆكەكەیانە و پێیان وایە " دەستگیركردنەكەی سیاسییە نەك یاسایی".  فراكسیۆنی نەوەی نوێ لە پەرلەمانی كوردستان لە بەیاننامەیەكدا رایگەیاندووە"  دەستگیركردن و زیندانیكردنی شاسوار عەبدولواحید سەرۆكی جوڵانەوەی نەوەی نوێ سیاسییە نەك یاسایی". بەشێكی دیكەی بەرپرسانی نەوی نوێ پێیان وایە دەستگیركردنی، بەشێكی  هەوڵێكە بۆ شكاندنی كەسێتی شاسوار عەبدولواحیدو بەشێكیشی بۆ رێگریە لە كاروچالاكییەكانی بەتایبەتی كە بڕیاربووە سبەی دووشەممە لە بەغداد لەگەڵ بەشێك لە سەركردە باڵاكانی عێراق كۆببێتەوەو دووسبەی سێشەممەش لە پەرلەمانی بەریتانیا كۆڕێك سازبكات سەبارەت بە بارودۆخی عێراق و هەرێمی كوردستان. رەنگە بە حوكمی پۆستەكەی دەستگیركردنی شاسوار عەبدولواحید بەرگێكی سیاسی وەرگرتبێت و هەموو لێكدانەوەكان بە ئاراستەی دیوە سیاسیەكەی دەڕەوات، كە لە پاڵ ئەو لێكدانەوەیەی كە دەوترێت بۆ تێكشكاندنی كەسێتی سیاسی شاسوارعەبدولواحیدە، لێكدانەوەیەكی تر دەڵێت دەستگیركردنەكەی هەولێكە بۆ زیاتر گەورەكردن و ناساندنی شاسوار عەبدولواحید.   دادگا بێدەنگی دەشكێنێت هەرچەندە بەرپرسانی نەوەی نوێ پێیان وایە دەستگیركردنی شاسوار عەبدولواحید پەیوەندی بە هەڵوێست و قسەو لێدوانەكانیەوە هەیەو كەیسەكەی سیاسییە نەك یاسایی، بەڵام لە رونكردنەوەیەكدا دادگای سلێمانی رایدەگەیەنێت " فەرمانی دەستگیركردنی هاوڵاتی (شاسوار عەبدولواحید) پەیوەندی بە پۆستەكەیەوە نییە وەكو سەرۆكی پارتێكی سیاسی، بەڵكو لەسەر دوو سكاڵایە كە دژی خودی خۆی تۆماركراون، دوای ئەوەی بەدەم بانگهێشتی دادگاوە نەهاتووە" رونكردنەوەكەی دادگا ئەوەشی خستوەتەروو كە شاسوار عەبدولواحید بەشێوەیەكی كاتی راگیراوە" لە دۆسیەی سكاڵای دوو كارمەندەكەی ئاسایشی فڕۆكەخانە كە مادەی (۲۲۹ لە یاسای سزادانی عێراقی) بۆ دانراوە، تۆمەتبار بە بڕیاری دادوەری لێكۆڵینەوە بە كەفالەت ئازاد كراوە، و لە دۆسیەی كارمەندی كۆمپانیاكە كە مادەی (٤۳٤ لە یاسای سزادانی عێراقی) بۆ دانراوە، تۆمەتبار بەشێوەیەكی كاتی ڕاگیراوە"    

 راپۆرتی: درەو میدیا - ئینستتیۆتی پەی بۆ پەروەردەو گەشەپێدان بەشی دووەم یەكێك لە كێشە سەرەكییەكانی قوتابخانەكانی هەرێم كێشەی زۆری خوێندكارە لە پۆلێكدا كە لەگەڵ ستاندارە نێودەوڵەتیی و زانستییەكاندا یەكناگرێتەوە، لە كۆی ( 1 ملیۆن و 741 هەزار و 764 ) قوتابی ( 68 هەزارو 91 ) پۆلی خوێندن هەیەو كە ( 5 هەزارو 234 ) قوتابخانە كە پۆلەكان بە شێوەی نادادپەروەر قوتابیەكان بەسەر پۆلەكان دابەشبوون، هاوكات  ( 716 ) قوتابخانە نەبەستراونەتەوە بە ئاوی پاكەوە و گرفتی ئاوی خواردنەوەیان هەیە.  لە ( 5 هەزارو 234 ) قوتابخانە ( 159 ) قوتابخانەی تەوالێت ( W.C ) ی نیە بۆ قوتابیەكان و ( 350 ) قوتابخانەی تەواڵیتی بۆ مامۆستا نیە، هەروەها ( 2 هەزارو 411 ) قوتابخانە باخچەی نیە بەرێژەی ( 46%).  زۆری ژمارەی خوێندكار لە پۆلێكدا بەپێی سیستمی نوێی خوێندن دەبێت هەر پۆلێك لە (15-40) خوێندكاری زیاتر تیادا نەبێت،  بەڵام ئەوەی ئێمە تێبینیدەكرێت بەهۆی ژمارەی زۆری خوێندكاران و كەمی پۆلەكانەوە ئەم ستاندارە جێبەجێ‌ نەكراوە، زۆر قوتابخانە هەیە پۆلەكانیان 50-60 خوێندكاری تیادایە و ئەمە لەگەڵ هیچ پێوەرێكی پەروەردەییدا ناگونجێت، كە بێگومان ئەم ژمارە زۆرەش دەبێتە مایەی ئەوەی كە فەوزا لە پۆلەكەدا هەبێت و مامۆستا نەتوانێت بەباشی وانەكە بگەیەنێت و نەتوانێت وەك پێویست چاودێری خوێندكارەكان بكات لە فێربوون و تێگەیشتنیان لە وانەكە. بێگومان ئەم حاڵەت زۆرتربووە كەمتر نەبوە، بەتایبەت بەهۆی بارودۆخی ئەم چەند ساڵەو نەكردنەوەی قوتابخانەی نوێ‌ ئەوەش هێندەی تر كاری مامۆستای قورستركردوە پڕۆسەی فێركردنی هێندەی تر دواخستوە. ئاماری پێنج ساڵی رابردووی ژمارەی خوێندكاران لە پۆلێكدا: پاكوخاوێنی لە قوتابخانەكاندا ژمارەیەكی زۆر لە قوتابخانەكان لەڕوی پاكوخاوێنییەوە وەك پێویست نین. چ ژووری پۆلەكان، یا دیوارەكان یا گۆڕەپانەكانی، ئەمە جگە لە توالێتەكان كە هەر باس ناكرێت. ئەمە هەم دیمەنێكی ناشیرینە و هەم دەبێتە مایەی بڵاوبوونەوەی جۆرەها نەخۆشی، هەم دەبێت بە كلتورێكیش لای ئەو مناڵانە كە گرنگی بە پاكوخاوێنی نەدەن. ئەوەش سەلمێنەری ئەو ڕاستیەیە پەروەردە غیابە لەناو قوتابخانەكانی ئێمەدا، هەر بۆیە دەبێت پەروەردە پێش فێركردن بێت. گرفتی گەورە سەرەتا لەقۆناغی بنەڕەتی و گرنگی نەدانی پێویست بەهۆشیاری پاك راگرتنی ژینگەو خاوێنی قوتابخانە دەستپێدەكات، تا لەقۆناغی ئامادەیی دەگاتە ئەوەی رۆژانە بن رەحلەو سەر پەنجەرەو قادرمەو بن دیوارو ژوورەكان، پڕ دەكرێن لەپاشماوەی قوتووی ئاوو بیبسی و كاغەزو سەمون. ئەم حاڵەتە ئەوە دەهێنێت كاری پەروەردەیی جدی بۆ بكرێت. لە راستیدا گرنگیدان بەهەستی بەرپرسیارێتی پاك راگرتنی قوتابخانەو بایەخدان بە كاری هەرەوەزی، ئەركێكی سەرەكی پرۆسەی پەروەردەو فێركردنە. بۆ ئەو مەبەستە دەكرێت قوتابیان و تێكڕای ستافی مامۆستایان، بە بەرێوەبەرو جێگرەكانییەوە، بەشداربن لە شوشتنی ژورو پۆل و راوەوەكان و خاوێنكردنەوەی قوتابخانە، دەكرێت لە ساڵەكەدا چەند رۆژێك بۆ كاری پاكردنەوەی قوتابخانە، بە شێوەی كۆمەڵ، دیاری بكرێت و بخرێتە بەرنامە یان ساڵنامەی قوتابخانەكەوە، نەك هەر پشت بەستن بەتاقە خزمەتگوزارێك.   گرفتی ئاوی خواردنەوە ئاوی خواردنەوە یەكێكە لە مافە سەرەتاییەكانی هەر خوێندكارێك كە پێویستە لە قوتابخانەكاندا بۆی دابین بكرێت، بەڵام بەشێكی زۆر لە قوتابخانەكان، بە تۆڕی ئاوی پاكەوە نەبەستراونەتەوە و نەبوونی ئاوی پاك بۆ خواردنەوە لە خوێندگاكاندا گرفتێكی ترە. ئەو قوتابخانانەش كە بەتۆڕی ئاوی خواردنەوەوە بەستراونەتەوە، وەك پێویست نییە، یا ئاوەكە پاك نییە یاخود شوێنی دابینكردن یا بەكارهێنانی ئاوەكە و تانكی سەربانی قوتابخانەكان وەك پێویست نین و پاك نین، مەرجی سەرداپۆشین و پارێزگاریشیان تێدا نییە، كە هۆكاری پیسبوونی زیاتری ئاون، تانكی ئاوەكان ساڵانە پاكناكرێنەوە، ئەمەش كاریگەری لەسەر تەندروستی ئەو مناڵانە دەبێت. خۆ ئەگەر لیژنەیەك بچێت پشكنین بۆ تانكی ئاوەكان بكات، ئەوسا دەزانێ‌ چ میكرۆبێك لەنێو ئەو تانكییانەدایە، هەندێك لە قوتابخانەكان چەندان ساڵە تانكییەكانیان پاك نەكردووەتەوە. بەپێی ئامارێك 13.6%ی قوتابخانەكانی هەرێم لە ئاوی خواردنەوە بێبەشن.  لەم خشتەیەدا بۆمان دەردەكەوێت كە چەند قوتابخانە بە تۆڕی ئاوی پاكەوە نەبەستراونەتەوە: گرفتی توالێت و دەستشۆر شوێنی دەست شۆردن و توالێتەكانی زۆربەی قوتابخانەكان پاك نین و شایەنی بەكار هێنان نین و هیچ مەرجێكی تەندروستیان تێدا نیە, ئەمەش هەم دەبێتە مایەی بڵاوبوونەوەی چەندین نەخۆشی و هەم نەنگییە بۆ دەزگایەكی رەسمی و پەروەردەیی شوێنی تەوالێت و دەستشۆرەكانی بەم شێوازە بێت. كە دواجار كاریگەری لەسەر خوێندكارەكان بەشێوەیەك دەبێت كە پەروەردە نەبن.  لەو قوتابخانانەشدا كە تەوالێت هەیە ژمارەیان كەمە، قوتابخانەیەك ئەگەر 500 قوتابی هەبێت، چۆن دەكرێت لە پشوویەكی 5 خولەكیدا ئەو ژمارەیە بە 5 یان 6 تەوالێت رابگەن؟! دەستشۆریش هەمان شت. لەم خشتەیەدا دەردەكەوێت كە تەنانەت چەندان قوتابخانە تەوالێتیان نیە:   ساردی و گەرمی قوتابخانەكان ژینگەی زۆربەی قوتابخانەكان لەڕووی ساردی و گەرمیەوە بۆ منداڵان گونجاو نیە، لە وەرزی هاوینا گەرم و تاقەت پڕوكێنە و هۆكارەكانی فێنككردنەوە نین و گەر هەشبێت وەك پێویست نیە، لە وەرزی زستانیشا ساردە، بەشێك لە پۆلەكانی خوێندن شوشەی پەنجەرەكانیان شكاوەو ئەمەش دەبێتە مایەی ساردی زیاتر. یان هۆی گەرم كەرەوەیان نیە یان زۆپاكان شكاون یان نەوت و پلیتەیان تیانیە، بەگشتی ئەمانە دەبنە مایەی ئەوەی منداڵا لە قوتابخانە بێزار بێت. لەلایەكی تریشەوە حكومەت و وەزارەت وەك پێویست سوتەمەنی بۆ قوتابخانەكان دابین ناكەن، لەم خشتەیەدا هۆكارەكانی گەرمی و فێنك كەرەوەمان بۆ دەردەكەوێت:   گرفتی كارەبا لە قوتابخانەكاندا پێویستە قوتابخانەكان بەردەوام كارەبای نیشتمانییان هەبێت، بەڵام  كارەبا وەك پێویست نیە و ئەو ئامێرانەش كە بە كارەبا كار دەكەن لەو كاتانەدا لە كار دەوەستن. ئەمەش بوەتە مایەی ئەوەی خوێندكاران لە وەرزی گەرمادا لە خوێندن بێزار بن. وە لەوەرزی زستانیش لەبەر سەرما و هەڵا لەرزینیان نەتوانن بەباشی لەپۆلدا دابنیشن. ئەم گرفتە وایكردووە، ئەگەر كەش هەور و باراناوی بێت، ژوورەكان بەتەواوی تاریكدابێن، بەتایبەت لە دەوامی ئێواران، مامۆستا ناچارە خوێندكاران ڕەوانەی ماڵەوە بكاتەوە. ئەمەش دەبێتە تەگەرە لەبەردەم تەواوكردنی پرۆگرامی خوێندن. زۆر قوتابخانە دەوامی ئێواران بەتایبەتی وەرزی زستان هەر لەكاتژمێر 3ی دوای نیوەڕۆوە، كە كارەبا نەبێت، ژوورەكان تاریك و نوتەكن، گرفتی نەبوونی كارەبا فرە رەهەندەو زۆر ئیشوكاری پێویستی قوتابخانەی پەكخستووە، چارەسەر ئەوەیە لەبیری ئاوی گەڕەكەكان كە خەتی هەمیشەیی كارەبای نیشتمانیان هەیە، خەت بۆ قوتابخانەكان رابكێشرێت، یان لەرێی پارێزگاكان گازی تایبەت بەموەلیدەكان بدرێت و هەتا ئەمپێری موەلیدەی ئەهلی گەڕەكیشیان هەبێت.  لەم خشتەیەدا باری قوتابخانەكانمان بۆ دەردەكەوێت كە تاچەند كارەبای نیشتمانی بەردەوامیان هەیە:   نەبوونی كارگوزار و باخچەوان لە قوتابخانەكاندا ژمارەیەكی زۆر لە قوتابخانەكان یا كارگوزاریان نیە، یا ئەوەتا ئەگەر هەشیان بێت یەك یا دوو كارگوزاریان هەیە و ئەوانیش بەساڵاچوون و پێویستە خانەنشین بكرێن, ئەمەش یەكێك لە هۆكارەكانی پیس و پۆخلی هەندێك لە قوتابخانەكانە. وە ناكرێت لە قوتابخانەیەكدا چەند كارگوزارێك هەبێت و لە زۆربەی قوتابخانەكانی تریشدا یەك دانە یا هیچ نەبێت.  لەم خشتەیەدا ئاماری پێنج ساڵی رابردووی كارگوزار لە قوتابخانەكاندا دەخاتە بەرچاو:    نەبوونی باخچە لە قوتابخانەكاندا مەسەلەی ژینگە و ژینگە پارێزی یەكێك لەبابەتەكانی سەردەمە و پێویستە گرنگی پێ بدرێت و خوێندكار لەگەڵی رابهێنرێت، بۆئەوەی گیانی ژینگە پارێزی هەر لە مناڵیەوە تیایدا چەكەرە بكات، بەڵام بەداخەوە زۆبەی هەرە زۆری قوتابخانەكانی ئێمە باخچەیان تیادا نیە و ئەم بابەتە گرنگی پێ‌ نادرێت و پشتگوێ‌ خراوە كە ئەمەش هەم دیمەنی قوتابخانەكانی ناشیرین كردووەو هەم خوێندكارانیش بەم گیانە راناهێنێت.  لەو قوتابخانانەشدا كە باخچە هەیە، سەرەتا دارێكی زۆر دەڕوێنرێت، چونكە فەرمانبەری تایبەتی وەك باخەوان بۆ دانامەزرێت، دارو گوڵ و سەوزاییەكەی هەرزوو وشك دەكات و مشوری ناخورێت، لەكاتێكدا ناكرێت قوتابخانە باخەوانی نەبێت.  لەم خشتەیەدا رێژەی باخچەی قوتابخانەكان روون دەبێتەوە:    كێشەی فرۆشگە (حانوت)ی قوتابخانەكان فرۆشگەی قوتابخانەكان كە شوێنی دەستكەوتن و كڕینی كەلوپەل و پێداویستی و خواردنی خوێندكارانە لە قوتابخانەكاندا، بەڵام وەك پێویست نیە، لە هەندێك قوتابخانە هەر نیە، لە هەندێكیان هەیە بەڵام بێ‌ سەروبەرە، كەلوپەلەكانی گرانە، شت و مەكی بەسەرچوو لە هەندێكیان فرۆشراوەو چاودێری بەسەرەوە نیە كە ئەمەش مەترسی هەیە بۆسەر تەندروستی خوێندكارەكان، هەندێك لەو مادانەی لە فرۆشگەكان دەفرۆشرێن، بەهیچ شێوەیەك لە ڕووی تەندروستییەوە ڕێگە پێدراو نین و زیان بە تەندروستیی خوێندكاران دەگەیەنن.  لە هەندێك قوتابخانەشدا فرۆشگا بازرگانی پێوە دەكرێت كە بە نرخێكی خەیاڵی بە كرێدراوە كە لۆژیك قبوڵی ناكات و مایەی سەرسوڕمانە، بەتایبەت لە هەندێك لە ئامادەییەكانی كچان! كە نازانرێت هۆكارەكەی چیە؟ ئەمە گرفتێكەو ئەركی سەر شانی وەزارەتە هیچی تر پشتگوێی نەخات و بەدوایدا بچێت. جگە لەوەی لەم دووساڵەدا پارەی فرۆشگاكان دەبرێنە بانك و جارێكی تر لەوێوە دابەش دەكرێت، بەڵام زۆرێك لە فرۆشگاكان ئەو پارەیەیان وەرنەگرتوە یان لەكاتی خۆیدا وەریان نەگرتوەو قوتابخانەكان كەوتونەتە ژێر باری قەرزێكی زۆرەوە. یان ناتوانن پێداویستیەكان لەكاتی خۆی دابین بكەن، جگەلەوەی بڕێكی زۆری دەگەڕێتەوە بۆ پەروەردەكان، لەكاتێكدا ئەگەر پارەكە لە دەستی قوتابخانەكە خۆیدا بێت و لیژنەیەكی شارەزاو بەرپرسیار سەرپەرشتی بكات، ساڵانە زۆر كێشەی خۆیان چارەدەكەن و پێداویستییەكانیان دابین دەكەن.  لەم خشتەیەدا رەوشی فرۆشگای قودابخانەكان دەردەكەوێت:   لە هەندێك ناوچەی دەرەوەی شارەكاندا بەچەند گوندێك یەك قوتابخانەیان هەیە، هاتوچۆی منداڵانی گوندەكانی تر بۆ ئەو گوندەی قوتابخانەی لێیە قورسە، بەتایبەتی لە وەرزی زستاندا، هیچ هۆكارێكی هاتوچۆشیان بۆ دابین نەكراوە. بۆ پاراستنی گیانی ئەو منداڵانە و باشتر سەرخستنی پرۆسەی پەروەردە لەو ناوچانەدا، پێویستە وەزارەت بیرێكی لێبكاتەوە و بەرنامەیەكی بۆ دابنێت و هۆكارەكانی هاتوچۆیان بۆ دابین بكات.  ئێستا زۆربەی قوتابی و خوێندكارانیش لەناو شارەكان هەر بەپاس یان تەكسی هاتوچۆ دەكەن ئەوەی گرفتە زۆربەی كچان لەگەڵا سایەقی پاسەكان روبەری كێشەی گەورە بونەتەوە هەروەها لەناو پاسەكاندا بەتایبەت بۆ منداڵان لەبەیانی زوو هەتا نیوەرو ئێوارە گۆرانی زۆر نەشیاویان بۆ لێدەدەریت كە بووە بەسەر زاری هەمویان رۆژانە دەیڵێنەوە و پڕن لەوشەی ناپەروەردەیی، جگە لە هەرەمەكی نرخەكانیان، بۆیە گرنگە پەروەردە بەجدی رێنمایی هەبێت لەوبارەیەوە وە بەرَێوەبەر ئاگاداری دۆخەكە بێت بەهەماهەنگی لەگەڵ كەس و كاریان.       

راپۆرت: نامیق رەسوڵ- محەمەد رەئوف   "كێشەی هەڤاڵ ئەبوبەكر كۆتایی نایەت" ئەمە ناونیشانی قەیرانێكی نوێیە لە دۆخی سیاسی زۆنی سەوزو نیللیدا، ماوەیەكە لەناو یەكێتی قسەوباس دەكرێت لەبارەی سەندنەوەی پۆستی پارێزگاری سلێمانی لە گۆڕان، ئەمە لەكاتێكدایە ئەندامێكی یەكێتی لە ئەنجومەنی پارێزگا دەڵێ" هەڤاڵ ئەبوبەكر وەكو یەكێتییەك مامەڵە دەكات‌و سیاسەتی یەكێتی جێبەجێ دەكات". لەدوای دروستبونییەوە لە ساڵی 2009، بزوتنەوەی گۆڕان دووجار رێككەوتنی لەگەڵ یەكێتی نیشتمانی كوردستان ئیمزا كردووە: •    رێككەوتنی یەكەم: رێككەوتنی پێكهێنانی حكومەتی خۆجێی سلێمانی كە لە 12/11/2014 ئیمزاكرا. •    رێككەوتنی دووەم: رێككەوتنی سیاسی نێوان یەكێتی‌و گۆڕان "رێككەوتنی دەباشان" كە لە 17/5/2016 ئیمزاكرا. رێككەوتنی دووەمی نێوان یەكێتی‌و گۆڕان "رێككەوتنی دەباشان" تەنیا یەك خاڵی لێ جێبەجێكرا، ئەو خاڵەش بڵاوكردنەوەی دەقی رێككەوتنەكە بوو بۆ رایگشتی، رۆژی 20/12/2017 بزوتنەوەی گۆڕان لایخۆیەوە كاركردنی بە رێككەوتنەكە هەڵپەسارد. لەدوای هەڵپەساردنی "رێككەوتنی دەباشان"، ئێستا تەنیا یەك رێككەوتن ماوە لەنێوان یەكێتی‌و گۆڕاندا، ئەویش رێككەوتنی پێكهێنانی حكومەتی خۆجێییە لە سلێمانی‌و هەڵەبجە. ئەم رێككەوتنەش بەپێی ئەوەی لە دەقی نوسراوی رێككەوتنەكەدا ئاماژەی بۆ كراوە، رۆژی 30/4/2018 كۆتایی هاتووە، واتە نزیكەی ساڵێكە وادەی كاركردن بەم رێككەوتنە بەسەرچووە‌و هەردوو لایەن رێككەوتنەكەیان هەموارنەكردوەتەوە. یەكێتی پارێزگار دەگۆڕێت ؟ لەدوای ئەو رێككەوتنە سیاسییەی كە رۆژی 18ی شوبات بزوتنەوەی گۆڕان‌و پارتی دیموكراتی كوردستان لەبارەی پێكهێنانی كابینەی نوێی حكومەتی هەرێم ئیمزایان كرد، لەناو سەركردایەتی یەكێتی دەنگێك بەرزبوەتەوە‌و داوادەكات پۆستەكانی حكومەتی خۆجێی سلێمانی بەتایبەتی پۆستی پارێزگار لە بزوتنەوەی گۆڕان وەربگیرێتەوە. ئەوانەی ئەم بۆچونەیان هەیە، ئاماژە بە رێككەوتنەكەی تشرینی دووەمی 2014ی پێكهێنانی حكومەتی خۆجێی سلێمانی‌و هەڵەبجە دەكەن كە لەنێوان گۆڕان‌و یەكێتیدا ئیمزا كرا. بەپێی ئەو رێككەوتنە، دوو ساڵ بە دووساڵەكەی یەكێتی‌و گۆڕان كۆتایی هاتووە، چونكە بە دەق لە رێككەوتنەكەدا نوسراوە، دوو ساڵی دووەمی پۆستەكانی پارێزگاری سلێمانی‌و هەڵەبجە لە رۆژی 30/4/2018 كۆتایی دێت. یاسا یان رێككەوتن ؟ ئەوانەی لە ناو یەكێتیدا داوای سەندنەوەی پۆستی پارێزگاری سلێمانی لە بزوتنەوەی گۆڕان دەكەن، پشتئەستور بە دەقی رێككەوتنە سیاسییەكەی یەكێتی‌و گۆڕان قسە دەكەن، چونكە بەپێی ئەو رێككەوتنە وادەی هەڤاڵ ئەبوبەكر وەكو پارێزگاری سلێمانی لەسەر پشكی بزوتنەوەی گۆڕان نزیكەی ساڵێكە كۆتایی هاتووە. بەڵام  لەبەرامبەردا بزوتنەوەی گۆڕان بەیاسا دەیەوێت هەڤاڵ ئەبوبەكر لە پۆستەكەیدا بهێڵێتەوە تائەوكاتەی هەڵبژاردنی نوێی ئەنجومەنی پارێزگاكان دەكرێت. ئەنوەر تاهیر ئەندامی ئەنجومەنی پارێزگای سلێمانی لە فراكسیۆنی گۆڕان لە لێدوانێكدا بۆ (درەو میدیا) وتی:" حكومەتی خۆجێی بەپێی یاسای پارێزگاكانی هەرێمی كوردستان پێكهێنراوە، رێككەوتنە سیاسییەكە تەنیا بناغەی كارەكە بووە". بەگوێرەی ماددەی (بیست‌و یەك) لە یاسای ژمارە 3ی ساڵی 2009ی پارێزگانی هەرێمی كوردستان" پارێزگارو هەردوو جێگرەكەی بەردەوام دەبن لە بەڕێوەبردنی كاروباری رۆژانە دوای تەواوبوونی ماوەی خولی هەڵبژاردنی ئەنجومەن تا ئەوكاتەی ئەنجومەنی نوێ لەدوای ئەوان كەسانی تر هەڵدەبژێرن". ئەمە ئەو ماددە یاساییەیە كە هەڤاڵ ئەبوبەكر بەهۆیەوە دەیەوێت لە پۆستی پارێزگاری سلێمانی بمێنێتەوە تا ئەوكاتەی هەڵبژاردن دەكرێت، بەڵام هێشتا دیارنییە ئاخۆ هەڵبژاردنی ئەنجومەنی پارێزگاكان دەكرێت یاخود نا. پارتی دیموكراتی كوردستان وەكو براوەی یەكەمی هەڵبژاردنی پەرلەمانی كوردستان خوازیاری ئەوەیە كاركردن بە ئەنجومەنی پارێزگاكان رابگیرێت‌و لەبری ئەو، ئەنجومەنی شارەوانییەكان كارابكرێنەوە. "هەڤاڵ ئەبوبەكر سیاسەتی یەكێتی جێبەجێ دەكات" پێناچێت یەكێتی نیشتمانی جددی بێت لە لابردنی هەڤاڵ ئەبوبەكر لە پۆستی پارێزگاری سلێمانی، بەپێی بەدواداچونی (درەو میدیا) كە قسەی لەگەڵ ژمارەیەك لە بەرپرسانی بزوتنەوەی گۆڕاندا كردووە، یەكێتی تەنیا وەكو كاردانەوەیەك لەبەرامبەر رێككەوتنەكەی گۆڕان لەگەڵ پارتی، پرسی گۆڕینی پارێزگاری سلێمانی هێناوەتەپێشەوە، ئەگەرنا جدی نییە لە هەنگاونان بۆ جێبەجێكردنی هەڕەشەكانی. لە لێدوانێكدا بۆ (درەو میدیا) رێكەوت زەكی, ئەندامی ئەنجومەنی پارێزگای سلێمانی لە فراكسیۆنی یەكێتی وتی:" وادەی هەڤاڵ ئەبوبەكر وەكو پارێزگاری سلێمانی تەواوبووە، یەكێتی فایلی پارێزگاری ئامادەكردووە، دواكەوتنی گۆڕینی هەڤاڵ ئەبوبەكر لەكاتی خۆیدا لەبەر دوو هۆكار بوو، هۆكاری یەكەم ئەوەبووە كە هەڤاڵ ئەبوبەكر نزیك بووە لە یەكێتی‌و سیاسەتەكانی یەكێتی جێبەجێكردووە‌و وەكو یەكێتییەك مامەڵەی كردووە، هۆكاری دووەمیش ئەوە بوو، ئەوكات كە وادەكەی تەواوبووە، هەرێمی كوردستان لەناو هەڵمەتی بانگەشەی هەڵبژاردندا بووە، ئەگەرنا ئەو فایلە لای یەكێتی هەر كراوە بووە". رێكەوت زەكی ئاماژەی بەوەكرد" راستە هەڵبژاردنی نوێی ئەنجومەنی پارێزگا نەكراوە، بەڵام بەپێی ئەنجامی دوو هەڵبژاردنی دوایی یەكێتی دەنگی زۆرینەی لە سلێمانی هەیە‌و پۆستی پارێزگار مافی یەكێتییە، ئەو كەسەی لەو شوێنەدایە دەبێت یان یەكێتی بێت یان وەكو یەكێتی مامەڵە بكات". لەكاتی هەڵمەتی بانگەشەی هەڵبژاردنی ئەنجومەنی پارێزگادا، یەكێتی نیشتمانی لە سلێمانی كەمپەینێكی توندی لەدژی هەڤاڵ ئەبوبەكر كاندیدی گۆڕان بۆ پۆستی پارێزگار كرد، یەكێتی لە شەقامەكانی سلێمانی پۆستەری گەورە هەڵواسیبوو، هەڤاڵ ئەبوبەكری وەكو "كۆنە بەعسی‌و هەڵەوەڕ" ناوبرد، بەهۆی كەمپەینە توندەكەی یەكێتییەوە، رێژەی دەنگەكانی هەڤاڵ ئەبوبەكر هەڵكشا. بەپێی بەدواداچوونەكانی " درەومیدیا"  هەڤاڵ ئەبوبەكر دوای وەرگرتنی پۆستی پارێزگاری سلێمانی، خۆی لە كاری حزبی بەدوورگرتووە‌و بەشداری هیچ كەمپەینێكی هەڵبژاردنی بزوتنەوەی گۆڕانی نەكردو لەكاتی ئاڵۆزبوونی پەیوەندییەكانی نێوان گۆڕان و یەكێتی لەدوای هەڵبژاردنەكانەوە، رۆژانە بەرپرسە حزبەییەكانی یەكێتی سەردانی دەكەن‌و لەبارەی تەقەكردن لە بارەگای بزوتنەوەی گۆڕان و چەند پێشێلكارییەكی ئەمنی هیچ كاردانەوەیەكی ئەوتۆی نەبوو كە خۆی سەرپەرشتی لیژنەی ئەمنیی "ئارامی" سلێمانی دەكات. پۆستی" لەبری پارێزگار" رۆژی 9ی ئابی 2016 بەگوێرەی رێككەوتنی بزوتنەوەی گۆڕان‌و یەكێتی نیشتمانی كوردستان، ماوەی دوو ساڵەكەی یەكێتی (ئاسۆ فەرەیدون) لە پۆستی پارێزگاری سلێمانی كۆتایی هات، بزوتنەوەی گۆڕان لەوكاتەدا لە لوتكەی ململانێی سیاسیدا بوو لەگەڵ پارتی دیموكراتی كوردستان، گۆڕان ئامادە نەبوو، مەسعود بارزانی مەرسوم بۆ دانانی پارێزگارەكەی لە سلێمانی (هەڤاڵ ئەبوبەكر) دەربكات، بۆ خۆدەربازكردن لە مەرسومەكەی بارزانی، گۆڕان‌و یەكێتی رێككەوتن لەسەر ئەوەی سەردار قادر كە ئەوكات جێگری پارێزگاری سلێمانی بوو لەسەر پشكی گۆڕان، بەناونیشانی "لەبری پارێزگار" كاروبارەكان بەڕێوەببات تا ئەوكاتەی كێشەی نێوان گۆڕان‌و پارتی چارەسەردەبێت. بەڵام مانەوەی سەردار قادر لە پۆستی "لەبری پارێزگار"دا زۆری نەخایاند، رۆژی 2ی ئازاری 2017 سەردار قادر دەستیلەكاركێشایەوە، بە پاساوی ئەوەی "ناتوانێت لەو پۆستەدا خزمەتی هاوڵاتیان بكات". لەبەردەم نێچیرڤان بارزانیدا سوێندی خوارد بزوتنەوەی گۆڕان كە لەسەرەتاوە قایل نەبوو بەوەی پارێزگارەكەی لە سلێمانی بەپێی یاسا لەبەردەم مەسعود بارزانی سەرۆكی ئەوكاتی هەرێمدا سوێندی یاسایی بخوات، بەڵام دواتر رازی بوو بەوەی هەڤاڵ ئەبوبەكر لەبەردەم نێچیرڤان بارزانی سەرۆكی حكومەتی هەرێم‌و جێگری سەرۆكی پارتیدا سوێند بخوات. دوای وازهێنانی مەسعود بارزانی لە پۆستی سەرۆكی هەرێم لە 29/10/2017دا، بەپێی یاسای دابەشكردنی دەسەڵاتەكانی سەرۆكی هەرێم، دەسەڵاتی سوێندخواردنی پارێزگارەكان لەبەردەم سەرۆكی هەرێم، گوازرایەوە بۆسەر دەسەڵاتەكانی سەرۆكی حكومەت، رۆژی 5/12/2017 هەڤاڵ ئەبوبەكر لەبەردەم نێچیرڤان بارزانی سەرۆكی حكومەت‌و كەریم سنجاری وەزیری ناوخۆ كە هەردووكیان سەربە پارتی بوون، سوێندی یاسایی خوارد‌و وەكو پارێزگاری سلێمانی دەستبەكاربوو. پارێزگارێكی سەربە كێشە هەڤاڵ ئەبوبەكر كە لە هەڵبژاردنی ئەنجومەنی پارێزگاكانی ساڵی 2014دا زیاتر لە (240 هەزار) دەنگی بەدەستهێنا، ماوەی ساڵێكە‌و سێ مانگە لە پۆستی پارێزگاری سلێمانیدایە، پاشماوەی دوو ساڵەكەی سەردار قادر تەواویكردووە كە لە "بری پارێزگا" دانرا. لەماوەی چوار ساڵی رابردوودا دانانی هەڤاڵ ئەبوبەكر لە پۆستی پارێزگار یەكێك لە قەیرانە سەرەكییەكانی زۆنی سەوزو نیلی بوو، چاوەڕوانییەكان بۆ دانانی هەڤاڵ ئەبوبەكر لەو پۆستە زۆر گەورە بوون، بەڵام لەگەڵ دەستبەكاربونیدا دەنگدەرەكانی بێئومێد كرد، ئەو سەرباری ئەوەی تائێستا نەیتوانیوە هیچ پرۆژەیەكی ستراتیژی لە سنورەكەیدا جێبەجێ بكات، هاوكات ناوبەناو بە لێدوانەكانی خەڵك‌و دەنگدەرەكانی توڕە كردووە. لە وتەكانی هەڤاڵ ئەبوبەكر هەڤاڵ ئەبوبەكر دەرچووی بەشی زمانی كوردییە‌و هاوكات مامۆستای راگەیاندنیش بووە، ئەو پەیوەندییەكی بەهێزی لەگەڵ ئەدەبیاتدا هەیە، لە یاریكردن بە وشە‌و رستەكاندا توانایەكی گەورەی هەیە. لەماوەی رابردوودا قسەكانی ئەو لە تۆڕە كۆمەڵایەتییەكاندا كاردانەوەی زۆریان لێكەوتەوە. لە دیاترین ئەو قسانەی هەڤاڵ ئەبوبەكر كە لەماوەی رابردوودا كاردانەوەی لێكەوتووەتەوە ئەمانەن: •    بۆ چارەسەری كێشەی سوتەمەنی ماڵان، هەڤاڵ ئەبوبەكر داوای لە خەڵك كرد، لە هاویندا نەوت بكڕن، بەڵام ئەمساڵ سەرباری سەختی وەرزی سەرما، لە زستاندا نرخی نەوت لە هاوین هەرزانتر بوو. •    لە وەڵامی پرسیاری ئەوەی چیت كردووە لە پۆستی پارێزگاردا، جارێك هەڤاڵ ئەبوبەكر وتی:" لەماوەی 11 مانگدا 11 هەزار ئیشم كردوو". •    یەكێك لە قسەكانی تری هەڤاڵ ئەبوبەكر كە كاردانەوەی لێكەوتەوە ئەو قسەیە بوو كە وتی:" لەگەڵ نێچیرڤان بارزانی‌و قوباد تاڵەبانیدا بەڵێنمانداوە دەوڵەتداری بكەین". •    لە لێدوانێكی تردا لەبارەی كێشەی ئاو و كارەباو سوتەمەنییەوە، هەڤاڵ ئەبوبەكر وتی:" دابینكردنی ئاو و كارەبا‌و سوتەمەنی ئیشی پارێزگار نییە".  •    جارێكی تری وتی:" سلێمانی ئێستا ئارامترین شوێنی دنیایە". •    قسەیەكی تری هەیە دەڵێ" ئەوە ئیشی من نییە هاوڵاتی لە ماڵەوە بەلوعەكەی بەردەداتەوە ئاوی نییە". •    كاتێكیش رەخنەیان لێگرت لەسەر شێوازی پێشوازیكردن لە بەرپرسانی حزبی لە فڕۆكەخانە، هەڤاڵ ئەبوبەكر وتی:" من مامۆستای ئەخلاق‌و ئەتەكێتم". •    هەڤاڵ ئەبوبەكر دوجار نرخی بەنزینی دابەزاند، هەرجار 25 دیناری عێراق نرخی داگرت، خەڵك گلەییان كرد لەوەی 25 دینار زۆركەمە، ئەو وەڵامی دانەوە‌و وتی:" نرخی بەنزین لە سلێمانی لە هەموو پارێزگاكانی عێراق‌و جیهانیش هەرزانترە"، دواتر لە تۆڕە كۆمەڵایەتییەكان وێنەی نرخی بەنزینیان لە شارەكانی عێراق بۆ بڵاوكردەوە كە زۆر لە سلێمانی هەرزانتربوو.