(درەو): سەركردایەتی یەكێتی سێ مانگ مەلا بەختیاری سڕكرد‌و ئاگاداركردنەوە بۆ هەریەكە لە قوباد تاڵەبانی‌و رێواز فایەق دەركرد.  ئەمڕۆ ئەنجومەنی سەركردایەتی یەكێتی نیشتمانی كوردستان بەڕێوەچوو. بەگوێرەی زانیارییەكانی (درەو)، كۆبونەوەكە بەزۆرینەی دەنگ ماوەی (3 مانگ) مەلا بەختیار ئەندامی ئەنجومەنی باڵای سیاسی یەكێتی سڕكردووە، ئەمە بەهۆی ئەو كتێبەی كە بەمدواییە بەناوی "لەبری بیرەوەری" بڵاویكردەوە‌و كاردانەوەی بەدوای خۆیدا هێنا. كۆبونەوەی سەركردایەتی، هاوكات بەزۆرینەی دەنگ ئاگاداركردنەوەى بۆ هەریەكە لە قوباد تاڵەبانی جێگری سەرۆك وەزیرانی هەرێمی كوردستان‌و رێواز فایەق سەرۆكی پەرلەمانی كوردستان دەركرد، ئەمە بەهۆی ئەوەی بەپێچەوانەی رای هاوسەرۆكەكانی یەكێتییەوە، بەمدواییە بەشداری كۆبونەوەی سێ سەرۆكایەتییەكەی هەرێمیان كردووە.

درەو: راپۆرتی: رێناس ساڵح - نه‌وژین "دەمویست داکۆکی لە پرسی ژنان بکەم، بەڵام خۆم بومە قوربانی گێچەڵی سێکسی لەلایەن پیاوێک لە رێکخراوێکی ژنان"، ئه‌مه‌ سكاڵاى (سۆلینا ئێڤێ)یه‌، ئه‌و كچه‌ چالاكوانه‌ى دهۆك كه‌ بڕیاری زیندانییكردنى بۆ ده‌رچوه‌. به‌ڵام كه‌سى به‌رامبه‌ریشی تۆمه‌ته‌كانى ئه‌و كچه‌ ره‌تدده‌كاته‌وه‌ و ده‌ڵێت: ئەو لەگەڵ باندێکی دزی بە پلان هاتونەتە سەری و ئەوندەیان لێداوە تاوەکو چاوێکی لەدەستداوە. سەر لەبەیانی رێکەوتی ٢٨/١١/٢٠١٨ لە شاری دهۆک روداوێک رودەدات کە تائێستاش بەتەمژاوی ماوەتەوە، لە روداوەکە کچێک دەڵێت هەوڵدراوە له‌نێو باره‌گاى رێكخراوێكى ژنان دەستدرێژی سێکسی بکرێتە سەرم، ئەو كچه‌ش (سۆلینا ئێڤێ)یە. ئه‌و لە رۆژی ١٩/١١/٢٠٢٠ لە رێگەی پەیجی خۆی لە تۆڕی کۆمەڵایەتی فەیسبوک، بانگەوازی ئەوەی بڵاکردەوە کە ئەو قوربانی ده‌ستدرێژی و گێچەڵی سێکسیە، کەچی دادگا بڕیاری بەندکردنی داوە به‌ 6 ساڵ و ده‌ستدرێژكاره‌كه‌یشی ئازاد کردوە. سۆلینا، له‌ چه‌ند دیدارێكى ته‌له‌فزیۆنى دا، روداوەکە بەمشێوەیە دەگێڕێتەوە: بۆ کارکردن وەک چالاکوانێکی ژنان سیڤی خۆم برد بۆ رێکخراوێک بەناوی (گەشەپێدانی ژنان) له‌ دهۆك، بەڵام بەڕێوبەری رێکخراوەکە ده‌ستدرێژی سێكسی كرده‌ سه‌رم.   "به‌ڕێوبه‌ره‌كه‌ نزیک بوەوە لێم و پێی وتم کە زۆر شیرین و جوانم و زۆری لای پەسەندم، وتی: ئەگەر لەگەڵیان کاربکەم دەمکات بە سەرپەرشتیاری پرۆژەکانی رێکخراوەکە، بەڵام من توڕەبوم لە هەڵسوکەوتی و ژورەکەم بەجێهێشت". سۆلینا، واده‌ڵێت. له‌ درێژەى گێڕانەوەکەیدا ده‌ڵێت: بەڵام وازی نەدەهێنا بەهۆی ئەوەی ژمارەکەم لە سەر سیڤیەکەم بو تێلی بۆ دەکردم، منیش وەڵامم دایەوە، وتی: تۆ وەک کچمی، بابی من به‌ هەڵە تێگەشتوی وەرەوە بۆ رێکخراو، دواتر منیش لەگەڵ دو هاوڕێی دیکەم چومەوە ئەوێ، ئەوان لە دەره‌وە لە ناو ئۆتۆمبێل چاوەڕێیان دەکردم، بینای رێکخراوه‌کە لە خانویەکی ماڵان بو، کەچومە ژورەوە ویستی دەستدرێژی بکاتە سەرم، بەڵام من هاوارم کرد و هاوڕێکانم هاتنە یارمەتیم، ئەوکات زۆرمان لێدا و بەوهۆیەوە پازدە رۆژ لە نەخۆشخانە مایەوە. سۆلینا ئێڤێ، هونەرمەندی شێوەکار و چالاکوان لەپارێزگای دهۆک، دەرچوی بەشی ئەندازیاری پلاندانانە لە زانکۆی دهۆک، لە ئێستادا پێشکەشکاری بەرنامەی باک ستەیجە لە کەناڵی وار. نه‌وژین، پاش په‌یوه‌ندیكردن به‌ سۆلینا و دیاریكردنى كاتێك بۆ دیدار له‌گه‌ڵی دا، به‌هۆی ئه‌نجامدانى دیدارى دیكه‌وه‌ دوجار كاتى دیداره‌كه‌ى دواخست و پاشان مۆبایله‌كه‌ى به‌رده‌ست نه‌ما.   لە بەرامبەردا، محەمەد ئەمین هیرو، ٦٥ ساڵ، بەڕێوبەری جێبەجێکاری پرۆژەکانی رێکخراوەکە کە سۆلینا تاوانباری دەکات بە گێچەڵپێکردنى، بۆ نەوژین چیرۆکەکانی روداوەکە بە شێوەیەکی دیکە دەگێڕێتەوە. "من لە ئۆفیسی رێکخراوەکەمان بوم کاتژمێر ١١ سەر لەبەیانی بو، خانمێک هات بۆ رێکخراوەکە ناوی خۆی بە شیرین ناساند کە دواتر دەرکەوت ناوی سۆلینایە، پێی وتین بۆ کار هاتوە و ئەو زۆر پێیوستی پێیەتی و باوکی لە ژیان نەماوە و دایکی لە وڵاتێکی دیکەیە. من لە گەڵ جوان کە ئێستا لە دەره‌وەی وڵات دەخوێنێت، دانیشتبوین، وتمان ئێمە هیچ کارێکمان نیە لە ئێستادا، بەڵام بۆ ساڵی نوێ ئاگەدارت دەکەینەوە، چونکە جوان ئیمێڵێکی ئینگلیزی پیشاندا وتی: خاتو شیرین زۆر زیرەکە لە زمانەکە". ئەو دەڵێت: ئەوکات وتمان سیڤیەکەت دابنێ، وتی پێم نیە و دواتر بۆتان دەهێنم، وتمان ژمارەکەت دابنێ هەرکات پێویست بو پەیوەندیت پێوە دەکەین، وتی ژمارەی خۆم لەبەرنیە ژمارەی خوشکم دادەنێم. کەچی دواتر کاتژمێر ٢:٣٠ دوانیوەڕۆ ژمارەیەک پەیوەندی پێوەکردم و وتی من شیرینم ئەتوانم سیڤیەکەم بهێنم؟ وتم کارمان هەیە خەریکی پرۆژەیەک بوین لەگەڵ جوان، کەچی دواتر کاتژمێر ٤:٣٠ هەم تەلەفۆنی کردەوە و وتی لای رێکخراوم سیڤیەکەم هێناوە، ئەوکات سایەقەکەشم لە رێکخراو رۆشتبو، سۆلینا هاتە ژورەوە وتی دەتوانیت پێش کار دەفتەرێک پارەم پێبدەن؟ وتم ئێمە ناتوانین ئیشی وابکەین، چوە لای پەنجەرەکە لەوکاتەدا پیاوێک لە سەری منی دا و کەوتم بەزەوی دا، ئەوەندە دەزانم پێیان وتم چەند پارەت پێیە وتم ٢٥ هەزار، چونکە ئەو رۆژە موچەم وەرگرتبو، بەڵام نیوەڕۆکەی کوڕەکەم هات بردیەوە، دواتر منیان بەستەوە، لێیاندام، مۆبایلەکەیان بردم کە تائێستاش نازانرێت چیان لێکردوە، لەگەڵ ئەو لاپتۆپەی کە ئەرشیفی ٣٠ ساڵی تێدابو.   هه‌ردو لا سكاڵا تۆمار ده‌كه‌ن سۆلینا له‌سه‌ر روداوه‌كه‌ سکاڵا تۆمار ناکات تا ئەو کاتەی کەسی بەرامبەر سکاڵا لە دادگای دهۆک تۆمار دەکات و وه‌كخۆی ده‌ڵێت کار دەگەیەنێتە هەڕەشەکردن و بۆ کپکردنەوەی بابەتەکەش داوای پارە دەکات "پێی وتین ئەگەر دەتانەوێت ئابڕوتان نەچێت، پێنج دەفتەرم پێبدەن بێدەنگ دەبم، من شۆک بوم کە زانیم ئەو سکاڵای تۆمار کردوە، چونکە تائێستا دەستدرێژیکار سکاڵای تۆمار نەکردوە!". له‌ وه‌ڵامى ئه‌و پرسیاره‌ى كه‌ بۆچی له‌سه‌ر روداوه‌كه‌ راسته‌وخۆ سکاڵای تۆمار نەکردوە؟ سۆلینا دەڵێت: من بە لێدانی، وام هەستکرد ئیتر تۆڵەی خۆم کردوه‌تەوە، بەڵام کە دوای سێ مانگ ئەو هەمو هەڕەشە و هەراسانەی خێزانەکەی کردم بڕیارمدا سکاڵای لە دژ تۆمار بکەم، کەچی لە دادگا سکاڵاکەی ئەو براوە بو به‌وه‌ى سزای منی دا بە شەش مانگ زیندانی لە دەره‌وەی بەندیخانە و بە ئازادکردنی دەستدرێژیکارەکە دۆسیەکە داخرا، به‌ڵام لە کۆتایی ٢٠١٩ سكاڵاكه‌ى ته‌میز كرده‌وه‌. دوای ساڵێک لە بڕیارەکەی دادگا و تۆماركردنى تانه‌ له‌لایه‌ن محه‌مه‌د ئه‌مینه‌وه‌، دادگاى تێهه‌ڵچونه‌وه‌ بڕیاره‌كه‌ ده‌گۆڕێت بۆ 6 ساڵ زیندانییكردن، پاش ئاگادار بون له‌و بڕیاره‌، سۆلینا لە هەژماری خۆی لە تۆڕە کۆمەڵایەتیەکان داوای هاوکاری و به‌ده‌مه‌وه‌هاتن دەکات و دەڵێت: رۆژی یەکشەمە دەچمە دادگا، بەڵام من داوای هاوکاری لە هەمو تاکێکی ئەم نیشتیمانە دەکەم کە داوای ئازادی و مافی ژن دەکەن.   2 كه‌سى تر له‌گه‌ڵ سۆلینا سزا دراون محەمەد ئەمین هیرۆ، کە خۆی دەڵێت بەتەواوی چاوێکی بەهۆی ئەو روداوە لەدەستداوە، باس لەوه‌ ده‌كات له‌ دۆسیه‌كه‌دا جگه‌ له‌ سۆلینا، دو كه‌سى تریش سزا دراون، ده‌شڵێت: ئەوکات بڕیارەکە لە دادگا وادەرچو کە هەرسێ کەسەکە بە ٦ مانگ زیندانی لە دەره‌وەی بەندیخانە سزادران، بەڵام من داوای تەمیزم کرد، چونکە ئەو گروپە بە پلان ئەوەیان کردبو، هەریەکەیان خەڵکی شارێک بون، کوڕەکە خەڵکی شەنگالە یەکێک لە کچەکان خەڵکی سلێمانیە و سۆلیناش خەڵکی دهۆکە، من گومانم لەم روداوە هەیە و کەسی دیکەی لە پشتە، چونکە دەبێت دادگا سزای ١٠ بۆ ١٥ ساڵی بەسەردا بسەپاندایەن، کەچی سۆلینا دۆسیەکەی گۆڕیەوە بۆ ئەوەی رێکخراوەکانی ژنان پشتیوانی بکەن، ئەوان تەنانەت ڤیدیۆی منیان تۆمارکردوە لە کاتی لێدانم لە کەلوپەلەکانیان بوە کە پۆلیس دەستی بەسەردا گرتوە".   رێكخراوه‌كه‌ داخراوه‌ یاخود نا؟ سۆلینا له‌ لێدوانى پێشتری باسی له‌وه‌كردوه‌، رێكخراوه‌كه‌ به‌ هۆی ئه‌و دۆسیه‌وه‌ داخراوه‌، به‌ڵام له‌به‌رامبه‌ردا محه‌مه‌د ئه‌مین هیرۆ ئه‌و قسانه‌ ره‌د ده‌كاته‌وه‌ و ده‌ڵێت: ئێمە لە کارکردن بەردەوامین لەگەڵ رێکخراوە نێودەوڵەتیەکان.   پۆلیس ئاگادارى پێشهاته‌كه‌ نیه‌ ئه‌گه‌رچی له‌ تۆڕه‌ كۆمه‌ڵایه‌تیه‌كاندا روداوه‌كه‌ بوه‌ته‌ باسێكى گه‌رم، به‌ڵام وته‌بێژی پۆلیسی پارێزگاكه‌ش رایده‌گه‌یه‌نێت له‌ ورده‌كارى دۆسیه‌كه‌ ئاگادار نیه‌. هێمن سلێمان، وتەبێژی بەڕێوبەرایەتی پۆلیسی دهۆک، بە نەوژینی راگەیاند: کە ئەویش بابەتەکەی لە سۆشیاڵ میدیا زانیوە و ئاگەداری دۆسیەکە نیە بەهۆی نەچونەوەی بۆ دەوام "لە یاسا دا دەبێت گێچەڵپێکراو شایه‌تحاڵی هەبێت" بەگوێرەی ئامارەکانی بەڕێوبەرایەتی گشتی بەرەنگاربونەوەی توندوتیژی دژی ئافرەتان و خێزان، لە ماوەی ٩ مانگی ساڵی ٢٠٢٠ لە پارێزگای دهۆک ١٧ حاڵەتی دەستدرێژی سێکسی دژ بە ئافرەتان تۆمارکراوە. له‌ یاسای سزادانی عێراقی ژماره‌ ١١١ ساڵی ١٩٦٩، گێچه‌ڵپێكردن (التحرش) تاوانه، لەمادەی(٤٠٠، ٤٠١، ٤٠٢)ی یاساكه‌دا، کەسی تاوانبار (المتحرش) سزادەدرێت بەبەندکردن بۆ ماوەیه‌ك زیاتر نەبێ له ساڵێک، یان سزای دارایی. تەمەنی ئەم یاسایە زیاتر لە پەنجا ساڵە و تائێستا هیچ گۆڕانکارییەکی تێدا نەکراوە، یەکێک لە نەنگیەکانی ئەم یاسایە ئەوەیە کە دەبێ سکاڵاکار شایەتحاڵی بۆ روداوەکە هەبێت، چونکە یاساکە دان بە سکاڵای ژن نانێت تەنها لە دۆخێك دا کە شایەتحاڵی هەبێت.  ئەو شوێنەی کە روداوەکەی سۆلینا تێیدا رویداوە ئۆفیسی رێكخراوه‌كه‌یه‌ و هیچ شاهیدێکیش لە دۆسیه‌كه‌دا نیه‌، شوێنه‌كه‌ش کامێرای چاودێریی لێنەبوە، ئەمەش دۆسیەکەی ناڕون هێشتوه‌تەوە.   * نه‌وژین، سه‌كۆیه‌كى رۆژنامه‌وانیی ئیلیكترۆنیه‌، له‌لایه‌ن (رادیۆی ده‌نگ) له‌ گه‌رمیان خاوه‌ندارێتى ده‌كرێت و به‌ پاڵپشتی سندوقی نیشتمانى بۆ دیموكراسی كاره‌كانى رایی ده‌كات.

د.هەردی مەهدی میکە – تایبەت بە (درەو) لە جەنگی قەرەباخدا ئێران بێلایەنی هەڵبژارد و هەڵوێستی نەرمی نواند، بەڵام وەک بڵێیت مێژووی هاوچەرخی ئێران، بێلایەنی لێنەیەت یان لێی قبوڵ نەکەن، لە جەنگی ٤٥ڕۆژەی قەرەباخدا ڕاستە ئێران خاک و سەروەریی پێشێل نەکرا، بەڵام زیانە ئاییندەییەکانی  هێندە زۆرن کە ڕەنگە جەنگەکەی لە ئاییندەدا سەختر نەبێت لە جەنگی خاک یان ململانێ گەرمەکانی لە کەنداو و عێراقدا.  جەنگی قەرەباخ یادەوەری دوو جەنگی جیهانی(یەکەم و دووەم) هێنایەوە یادی ئێرانییەکان، تاران لە هەردوو جەنگەکەدا بێلایەنی ڕاگەیاند و زیانمەندترین وڵاتیش لە ناوچەکەدا دەرچوو، ڕاستە بێلایەن بوو بەڵام هاوپەیمانانی وەک بەریتانیا و ڕووس خاکەکەیان بەکارهێنا، ئابووریی، سەروەریی و سیاسەتی ئەو وڵاتەیان بە جۆرێک شکان تا ئەمڕۆش ئێرانییەکان یادگاریی هەرەتاڵی مێژووی هاوچەرخیان لێی دەڕوانن. جەنگێک فراوانتر لە قەرەباخ هیچ کات هێندەی جەنگی قەرەباخ, ئێران، کەم جووڵە و بێلایەن نەبووە، لە جەنگێک کە ڕێک لە پشتسەریدا هەردوو دراوسێیکەی (ئەرمینیا و ئازەربایجان)بە گژیەکداچوون، ئەوەی یەکەمیان دۆستێکی دێرینی ئابووری و دووەمیشیان برایەکی ئایینی و هاومەزهەبی شیعەی دوانزەئیمامی. ئێرانێک لەسەر سوریا، لوبنان، یەمەن و عێراق قسەی یەکەم نەکات شەرکی قسەکەری یەکەمە لە داڕشتنی سیاسەت و جەنگی ئەو وڵاتانەدا، بەڵام لێرەدا بێدەنگ. وا جەنگەکە بەڕێژەیەکی بەرچاو بە قازانجی ئازەربایجان تەواو دەبێت. بەڵام لە گۆڕەپانی سیاسییدا تەنها باکۆ و ئیرەوان نەجەنگاوون، ئانکارا و تاران و مۆسکۆش بە جۆرێک بەشداری جەنگەکە بوون، تورکیا هەر زوو ئەمەی نەشاردەوە و بە ئاسمان و زەوی و هەژموونی، داکۆکییەکی "تورکانەی" لە ئازەرییە هاونەتەوەکانی کرد، کۆی توانای مرۆیی و سیاسیی خۆشی هەبوو خستییە گرەو و لە شامەوە بیگرە تا لێوارەکانی دەریای ناوەڕاست، هەرچی پرۆتورکیی ناتورکیش بوو خڕی کردەوە و خستنیە نێو جەرگەی جەنگە گەرمەکەی قەرەباخ.  مۆسکۆش کە هەم لە درواسێ و پارچە جیابووەوەکانی خۆیدا پریشکی سیاسیی و ئابووریی جەنگەکەی بەرکەوت و هەم هەندێ وردە حسابیشی لەڕێی جەنگی قەرەباخەوە لەگەڵ تورکیا و ئەرمینیا و ئازەریدا ساغ کردەوە. بۆ ڕووسیا گرنگە کەمترین ئاژاوە هەبێت لە قەوقازدا، چونکە خۆڵەمێشی هەندێ ململانێی ئاییندەیی قەوقاز موژدەیەکی خۆشیان بۆ مۆسکۆ پێی نییە و بریسکەکانی ئەو ململانێێەش تاڕادەیەک سێ لای تەنیووە. مۆسکۆ دەمێکە لە سەرۆکوەزیرانەکەی ئەرمینیا نیگەرانە، چونکە مەیلێکی ڕۆژئاوایی و سووککردنی هاوپەیمانێتی لەگەڵ مۆسکۆدا هەبوو، ئەمەش نیگەرانی بۆ پۆتین درووست کرد و لە جەنگی قەرەباخدا بە بێلایەنی خۆی، وانەیەکی تووندی بە ئیرەوان دا، هاوکات بەهۆی تورکیا و پشتنەگرتنی ئەرمینیاشەوە، تا ڕادەیەک دڵی ئازەرییەکانیشی هێنایەوە کە هەر لە سەرەتای جیابوونەوەی نەوەدەکانی سەدەی ڕابردووەوە  پشتی لە مۆسکۆ و ڕوو لە واشنتۆن و ئەنکەرە و تەلئەبیب بوو. دوو شیعەمەزهەبی ناجۆر بەڵام بۆ ئێران دۆخە زۆر سەخت تەواو دەبێت، ئەو بێلایەنێکی ناچاریی هەڵبژارد. ئازەربایجان دراوسێیەکی باکووری ستراتیژییە، هاومەزهەبییەتی، بە بەشێک لە ئێرانی کولتووری و وڵاتانی نەورۆزی دەزانێت، بەڵام کێشەکە ئەوەیە سیاسەتی گشتی ئازەربایجان لە تەمەنی زیاتر لە چارەکە سەدەیی خۆیدا پراگماتیک، واقیعییتر بووە و پشتی لە کارتی مەزهەبی شیعەگەریی و نەورۆزیی کرد و بە بەکارهێنانی کارتی نەتەوەیی(ئازەریی)-ڕۆژئاواگەریی و دۆستایەتی ئیسرائیل دەرگای لەگەڵ ئێراندا لە نەوەدەکانەوە داخست، ئەمە یارییەکی ئاگرین بوو، لەنێوان دوو بەرداشدا (ڕووس و ئێران)، خۆی گەیاندە ئانکارا و بە دۆستایەتی ئەو ڕێگای ئابووریی(وزە)، ڕێگای سیاسەتی نێودەوڵەتی و بەرژەوەندیگەرایی بەڕووی خۆیدا کردەوە. تورکیا لە نێوان فشاری ڕووس و ئێراندا بە تاڵەمووی سنوورەکانی، ئازەربایجانی نزیککردەوە لە ئیسرائیل، ڕۆژئاوا و ئەمریکا. بە جۆرێک ئێستا سەرەڕای شوناسی شیعەگەریی، هاوپەیمانی یەکەمی واشتنتۆنە لە ناوچەکەدا.  لێرە ئەوەی رۆڵ دەبینێ شوناس نیە پێچەوانەی ئەو ئیدیعایەی کە وڵاتە کاریگەرەکان مەزهەب و ئاین و ئایدۆلۆژیا دەکەنە کارت بۆ دەستێوەردان، لە شەڕی قەرەباغدا مەسیح و موحەممەد قوربانین، ئیسلام و مەسیحیەت شوێنگۆڕکێیان کردوە، ئاخر ئەگەر ئاین کاریگەر بوایە دەبوو تورکیا و ئێران لە پشتی ئازەربایجانی موسڵمان و روسیا و ئەمریکاش لە پشتی ئەرمینیا بوونایە. لە نەوەدەکانەوە، لەسەر ناوچەی جێناکۆکی قەرەباخ، هەردوو وڵات شەڕی سارد و کەم کەم گەرمیش بەڕێوە دەبەن. ئەم جەنگە ساردە چارەکە سەدەییە بوویە جەنگی گەرم و تاڕادەیەک یەکلاکەرەوە. دیارە ئەمە قوربانی گۆڕەپانێکی تری ئاگر و دیاری بلۆکبەندی ئێستای دنیای سیاسەتە و بەشێکیش دەبن لە گۆڕانکاریە چاوەڕوانکراوەکان یان ئەگەر راست بێت "سایکس-بیکۆی نوێ". شەڕی قەرەباخ وەک یەمەن، لوبنان، عێراق و سوریا نیە کە شوناسە مەزهەبییەکان ڕوخساری ململانێکان بن، لێرە بلۆکبەندی جیهانی و بەرژەوەندیەکان ڕوون و ئاشکران، ئاین و مەزهەب و یادەوەریی مێژوویی ناوچەکەش جۆرێک لە قوربانی و فەرامۆشکراوە. چونکە ئازەربایجانی ئیسلامی شیعەمەزهەب، پشتیوانی لە بلۆکی ئەمریکا-ئیسرائیل و تورکیای سوننە وەردەگرێت، ئەرمینیای عیسایی پەناگەکەی کە پێشتر ئێرانی شیعەمەزهەب و مۆسکۆ بوو. ئێستا ئیتر ئازەربایجان وەک نەوەدەکان نییە تەنها خەمی مانەوەی بێت، پێش پەلاماردان و گێڕانەوەی ئەو ناوچانەی کە بانگەشەیان بۆ دەکات، هەڵوێستی جیهانی بەلای خۆیدا ساف کرد و لە یەککاتدا ئێران و ڕووسیای  بێلایەن ڕاگرت، ئەمریکای بە بێدەنگی هێشتەوە، تورکیا و فرۆکە بێفرۆکەوانەکانی و گرووپە توندئاژۆ هاوپەیمانەکانی تورکیاشی لە سووریا بە چڕیی هێنایە مەیدانەکە. ئیسرائیلیشی لە ڕووی سەربازیی و سیاسییەوە بەکارهێنا و کردییە جەنگاوەرێکی نێو ململانێی قەرەباخ. لە ڕاستییدا ئەم یارییەی عەلیێفی سەرۆکی ئازەربایجان، تێکۆشان و تەقەلاکانی ئەتاتورکی باوکی تورکیای نوێی لە دەیەی بیستی سەدەی ڕابردوودا هێنایەوە بیر، کاتێک بەشێوەیەکی ئاڵۆز و چڕ مانۆڕە سەربازییەکانی ئەنجام دا و خاکی تورکیای لە مەترسی لەناوچوون و لە چنگی بەریتانیا، یۆنان و فەرەنسا  دەرهێنایەوە. ئێران؛ بێلایەنێک بە تامی دۆڕان گەرچی ئێران بێلایەن و دڵۆپێک خوێنی لە جەنگەکەشدا خەسار نەکرد، بەڵام زۆرجار بێلایەنی کشانەوە و ناچارییە و تامی دۆڕان دەبەخشێت. بۆچی ئێران زیانمەندی جەنگی قەرەباخە؟ لە ئێستادا فشارەکانی واشنتۆن لەسەر تاران لەوپەڕیدایە، کۆرۆنا یەخەی ئابووریی و ژینگەی ئێرانی چەقاندووە، دەستی وەک جاران لە سووریا و عێراق کراوە نییە، وا دۆخی سنوور-ئاسایشیی-سیاسیی لای باکووریشی گۆڕانی بەسەردا هات و چی¬تر وەک سێ دەیەی ڕابردوو نامێنێتەوە.   - لەم جەنگەدا ئێران دۆستێکی سیاسیی و ئابووری خۆی(ئەرمینیا) کە باش بەکاری دەهێنا دژی تورک و ئەمریکا و ئیسرائیل، وا بە دۆڕاوی لە جەنگی قەرەباخ دەچێتە دەرەوە و بەمەش بنکەی هاوکێشەکانی ململانێی ئێران گۆڕانی بەسەردا دێت چی دیکە ناتوانێت بە هەمان قەبارە نەرمەهێز و توندەهێزەکانی لە ئەرمینیا بەرامبەر باکۆ و ئەنکارا بەکار بهێنێت. - ڕوسیا بە هاوبەشی تورکیا، بە گرتنەدەستی جڵەوی ئاگربەست و ڕێکککەوتنی جەنگەکە ئێرانی پەراوێز خست، ئەمەش تاڕادەیەک هاوشێوەی جەنگی سوریای لێهات، کاتێک ئێران سەرەتا قسەکەر و پشتیوانی یەکەمی بەشار ئەسەد بوو، بەڵام پاشتر بە هاتنی مۆسکۆ بۆ نێو جەنگەکە، هێدی هێدی ڕووسیا لەگەڵ تورکیادا مێزیان کردەوە یەک و ئێرانیان پەرواێز خست لە بڕیار و دابەشکردنی کێکی پاراستنەوەی خاکی سوریادا. - تورکیا بە پشتیوانی ڕاستەوخۆی لە ئازەربایجان، چیتر کارتەکانی دەستی بەرامبەر ئێران بەهێزتر دەبن و لەلایەک مەسەلەی برایەتی ئازەریی-توورکی و وروژاندنی کارتی نەتەوەیی، لەلایەکی دیکەوە دەتوانێت باجگیری زیاتری سیاسی وەدەست بهێنێت و لە ڕووی ئابووریی، بازرگانی و وزەشەوە بە کۆمەکی ئازەربایجان موزایەدە و هەڕەشەی پتر لەسەر تاران بسازێنێت.  - مەترسیەکی دیکەی ئاسایشیی-سیاسیی بۆ ئێران، بریتییە لەو گۆڕانکارییە جیۆپۆلەتیکی و ئابووریی و سنووریانەی باکوری ئێران، بەهۆی سەرکەوتنی ئازەربایجانەوە و دەستخستنەوەی بەشێکی سنووری لەگەڵ ئێراندا کە پێشتر بەدەست ئەرمینیا بوو، بەڵام ئێستا لەدەستی باکۆدان. ئەمە ئێران ناچار دەکات هەم بە سیاسەتی خۆیدا بچێتەوە و هەم نیوەی فۆکەسی لە ناوچەکانی کەنداو، عێراق، یەمەن و لوبنان وەرچەرخێنێ بەرەو باکوری وڵاتەکەی، کە پێشتر بەهۆی ڕوسیا و ئەرمینیاوە لێی دڵنیا بوو. - خاڵێکی دیکە، پشتیوانی ئیسرائیل و بوونی باڵێۆزەکەی لە باکۆ، بۆ لەمەودوا ئیتر ئیسرائیل وەک دۆستی تەنگانەی ئازەربایجان، وەک دراوسێیەکی باکووری ئێران لە ڕێی خاکی ئازەربایجانەوە دەردەکەوێت و بۆ ئاییندە مەترسی ئەمنی-سیاسی و ستراتیژی جێدەێڵێت. -لەوەش بترازێ هەبوونی گرووپە توندڕەوە سوورییەکان و ئیسلامییە جیهادییەکان کە زۆرینەیان سوننەن و تورکیا بە بیانووی پشتیوانی باکۆی هێنانیە قەرەباخ، ئێرانی نیگەران کردووە و دوور نییە بۆ ئاییندە، هەڕەشەی تیرۆر و تۆقاندن لەناوخۆی ئێران و سنورەکانیدا زیاتر بکەن. - لە ناوخۆشدا، بە غرووری براوەی ئازەری مەترسیی بۆ ئاسایشی نەتەوەیی دروست دەکات، دووەمین نەتەوەی ئێران ئازەریەکانن، هەم پێکهێنەریی سەرەکی کولتووریی وهەم لە پێگە ستراتیژی و سیاسیی و سەربازییەکانی ئەو وڵاتەدا خاوەن هەژموونن، بەهۆی جەنگی قەرەباخەوە مەیلی ئازەریی ئازەرییەکانی نێو ئێران بووژایەوە و بۆیە نەیتوانی وەک ساڵانی ڕابردوو ڕاشکاوانە لە پشتی ئەرمینیا بووەستێت، ئەم هەڕەشەیە لەمەودوا کاریگەرتر دەبێت و چەندین بزووتنەوە و جوڵانەوەی نێو ئێران و تورکی و ئازەربایجانیش لە چالاکیدان بۆ یەکخستنەوەی ئازەریی و تورکەکان و سازاندنەوەی "ئازەربایجانی مەزن"، ئەمە ڕایەڵەیەکی هەستیاریی پرسی ئاسایشیی نەتەوەیی ئێرانە و دوور نییە ببێتە کارتێکی مەترسیدار و کاریگەر کە مل و قۆڵی سیاسەتی گشتی ئێران لە ناوخۆدا خوار بکاتەوە. بەمشێوەیە دەردەکەوێت، گەرچی بە هەڵوێست و سیاسەتی ڕەسمی ئێران بەشداری جەنگ نەبووە، بەڵام بە ئەنجام و لێکەوتەکانی پشکی زیانەکانی ئێران کەم نین و ئاییندەیەکی دڵنیا لەبەردەم تاراندا نییە.  

به‌رهه‌م ستار عەبدولڕەحمان- گۆڤاری ئایندەناسی بەرایی خوێندنی ئه‌لیکترۆنی به‌و خوێندنه‌ ده‌وترێت که‌ مامۆستا به‌ شێوه‌ی بنچینه‌یی یان ته‌واوه‌تی، وانه‌کانی له ‌ڕێگه‌ی ئینته‌رنێته‌وه‌ ده‌ڵێته‌وه‌ و کۆی گشتیی وانه‌کان به‌رده‌ستن و خوێندکار ده‌توانێت له‌ هه‌ر شوێنێک بێت بگه‌ڕێته‌وه‌ بۆیان و وانه‌کان بخوێنێت. به‌ واتایه‌کی تر: بریتییه‌ له‌ به‌کارهێنانی تەکنەلۆجیا بۆ خزمه‌تی فێربوون/فێرکردن، که‌ ده‌شێت هه‌موو قۆناغه‌کانی خوێندن بگرێته‌وه،‌ له‌ بنه‌ڕە‌تییه‌وه‌ بۆ خوێندنی باڵا. له‌ ڕێگه‌ی خوێندنی ئه‌لیکترۆنییه‌وه‌، په‌روه‌رده‌کردن پشت به‌ پتر له‌ ڕێگا یان ئامێرێکی تەکنەلۆجی ده‌به‌ستێت بۆ ناردنی په‌یامی په‌روه‌رده‌یی له‌لایه‌ن مامۆستاوه‌ بۆ خوێندکاران که‌ به‌ جه‌سته‌ له‌ یه‌کتره‌وه‌ دوورن. لەم شێوازە خوێندنەدا، پێویسته‌ مامۆستا بەباشی شاره‌زای ئینته‌رنێت و ته‌کنەلۆجیا ببێت، سه‌ره‌ڕای شاره‌زایی له‌ بابه‌ته‌که‌ی خۆی. خوێندنی ئەلیكترۆنی لە هەرێمی كوردستان لەدوای دەركەوتن و بڵاوەبوونەوەی ڤایرۆسی كۆرۆنا، بووەتە بابەتێكی جێی مشتومڕی سێكتەرەكانی پەروەردە و خوێندنی باڵا و سەرەڕای بیروڕا جیاوازەكان سەبارەت بە كاریگەرییە ئەرێنی و نەرێنییەكانی و زەمینەكانی جێبەجێكردنی لە هەرێمی كوردستان، بەڵام پێدەچێت بە هۆی تەشەنەسەندنی زیاتری ڤایرۆسەكە، وەك جێگرەوە و چارەسەرێك بۆ بەردەوامیی پڕۆسەی خوێندن لە هەرێمی كوردستان لێی بڕوانرێت. له‌م توێژینه‌وه‌یه‌دا، هه‌وڵ ده‌درێت تیشک بخرێته‌‌ سه‌ر دۆخی په‌روه‌رده‌ له‌ سه‌رده‌می کۆرۆنادا له‌ هه‌رێمی کوردستانی عێراق و گرنگترین ئه‌و ئالنگارییانه‌ بخرێنه‌ ڕوو که‌ له ‌کاتی جێبه‌جێکردنی‌ خوێندنی ئه‌لیکترۆنیدا ده‌شێت بێنه‌ پێش. توێژینه‌وه‌که‌ لێکۆڵینه‌وه‌یه‌کی په‌سنی (الوصفي)یە و توێژەر ڕە‌هه‌نده‌کانی خوێندنی ئه‌لیکترۆنی و ڕێکاری چه‌ند وڵاتێک ده‌خاته‌ ڕوو. له‌ کۆتاییدا چه‌ند ڕاسپاره‌ده‌یه‌ک پێشکه‌ش ده‌کات، که‌ بۆ ئه‌مڕۆی هه‌رێمی کوردستان پێویستن و زۆر گرفتی په‌روه‌رده‌ و خوێندنی باڵا چاره ‌ده‌که‌ن.   زەمینه به‌پێی ڕاپۆرتێکی نه‌ته‌وه ‌یه‌کگرتووه‌کان که‌ له‌ مانگی ئابی 2020دا بڵاو کراوه‌ته‌وه‌، به ‌ناونیشانی “Policy Brief: Education during COVID-19 and beyond”، په‌تای کۆرۆنا به شێوه‌یه‌کی خراپ کاریگه‌ریی کردووەته سەر‌ کۆی پڕۆسه‌ی په‌روه‌رده‌ که‌ له‌ مێژوودا شتی وا ده‌گمه‌نه‌، چونکه‌ زیاد له‌ 190 وڵات و به‌ نزیکه‌یی 1،6 بلیۆن خوێندکار له‌ هه‌موو کیشوه‌ره‌کان زه‌ره‌رمه‌ند بوون. داخستنی قوتابخانه‌ و خوێندنگه‌ و ناوه‌نده‌کانی خوێندن، کاریگه‌ریی نه‌رێیی کردووەته‌ سه‌ر 94%ی کۆی خوێندکارانی سه‌ر زه‌وی، به‌ڵام له‌ وڵاته‌ هه‌ژاره‌کاندا ڕێژە‌که‌ بۆ 99% به‌رز ده‌بێته‌وه‌[1]. جیاواز له‌ وڵاتانی تر، به‌پێی وێبسایتی “EUROPEAN DATA PORTAL“، له‌ وڵاتی سوێد خوێندنگه‌ سه‌ره‌تاییه‌کان دانه‌خران، هه‌روه‌ها له‌ هه‌ردوو وڵاتی نۆ‌رویژ و به‌لژیکا هه‌ندێک له‌ خوێندنگه‌کان کراوه ‌بوون بۆ منداڵی ئه‌و دایك و باوكانەی له‌ سێکته‌ره‌ سه‌ره‌کییه‌کان کار ده‌که‌ن. سه‌ره‌ڕای ئه‌مه‌ش، زۆربه‌ی وڵاتان ڕوویان کردووەته‌ خوێندنی ئه‌لیکترۆنی، به‌تایبه‌ت له‌ سه‌رده‌می کۆرۆنادا، هه‌روه‌ها له‌لایه‌ن بانکی نێوده‌وڵه‌تییه‌وه‌ پاڵپشتی ده‌کرێت که‌ تێیدا بانکه‌که‌ به‌پێی سیستم و ژینگه‌ی وڵاته‌که‌ پێوه‌ر داده‌نێت[2]. له‌ سه‌رانسه‌ری دنیادا خوێندنی ئه‌لیکترۆنی هه‌یه‌ و‌ بەزۆری پشت به‌ ئینته‌رنێت ده‌به‌ستێت و بۆ گشت قۆناغه‌کانی خوێندن به‌کار دێت. له‌گه‌ڵ هاتنی ساڵی 2020، به‌تایبه‌تی ئه‌و ده‌مه‌ی ڤایرۆسی کۆرۆنا بووه‌ هه‌ڕە‌شه‌ بۆ سه‌ر ژیان، هانابردن بۆ خوێندنی ئه‌لیکترۆنی زۆر زیاتر بووه‌ و زۆرینه‌ی وڵاتان، به‌ پێشکه‌وتوو و دواکه‌وتووه‌وه‌، له‌ هه‌وڵی دابینکردنی باشترین ئامێر و هێڵی ئینته‌رنێتن به‌ مه‌به‌ستی سه‌رکه‌وتنی پڕۆسه‌ی په‌روه‌رده‌ و فێرکردن. ئه‌م په‌نا بۆ ته‌کنەلۆجیا بردنه، بۆ هه‌ندێک وڵات ئاسانه‌ که‌ پێشتر زه‌مینه‌سازیی کردووه‌ یاخود پێشتر ژێرخانێکی باشی هه‌بووه‌، بۆ هه‌ندێک وڵاتی تریش‌ نه‌هامه‌تییه‌کی تره‌ که‌ هیچی وای له‌ خودی ڤایرۆسی کۆرۆنا که‌متر نییه‌. له‌ هه‌رێمی کوردستان، له‌پاش هاتنی شه‌پۆلی یه‌که‌می ڤایرۆسی کۆرۆنا، هه‌ردوو وه‌زاره‌تی په‌روه‌رده‌ و خوێندنی باڵا و توێژینه‌وه‌ی زانستی بڕیاریان دا که‌ پشت به‌ خوێندنی ئه‌لیکترۆنی ببه‌سترێت تا زیانی په‌تای کۆرۆنا که‌م بکرێته‌وه‌. هه‌ر چه‌نده‌ چه‌ند ساڵێکه‌ حکومه‌تی هه‌رێمی کوردستان دووچاری چه‌ندین قه‌یران بووەته‌وه‌ و تا ئێستا نه‌یتوانیوه‌ شایسته‌ داراییه‌کانی فه‌رمانبه‌رانی خۆی بدات و چه‌ندین چه‌مکی وه‌کوو “پاشکه‌وت” و “لێبڕێن” هاتووەته‌وه‌ ناو فه‌رهه‌نگی مووچه‌ دابه‌شکردنه‌وه‌. لێره‌وه‌ ده‌کرێت ئه‌وه‌ بوترێت ئه‌گه‌ر په‌تای کۆرۆنا بۆ وڵاتانی دی به‌ڵایه‌ک بێت، بۆ هه‌رێمی کوردستان بووەته‌ دوو به‌ڵا، چونکه‌ تا ئێستا ده‌وامی فه‌رمانبه‌ران ئاسایی نه‌بووەته‌وه،‌ به‌ هه‌ردوو هۆکاری نه‌دانی مووچه‌ و په‌تای کۆرۆنا. ناساندنی خوێندنی ئه‌لیکترۆنی له‌ فه‌رهه‌نگی په‌روه‌رده‌ و فێرکردندا، خوێندنی ئه‌لیکترۆنی به‌ چه‌ندین ناوی جیاجیا هاتووه‌ که‌ هه‌موویان جه‌خت له‌سه‌ر به‌کارهێنانی تەکنەلۆجیا و ئینته‌رنێت ده‌که‌نه‌وه‌، بۆ نموونه‌:  خوێندنی گریمانه‌یی، خوێندنی سه‌ر ئینته‌رنێت، خوێندنی ئه‌لیکترۆنی، خوێندن له‌ دووره‌وه‌، خوێندنی ده‌ره‌وه‌ی پۆل… و هتد. له‌م توێژینه‌وه‌یه‌دا، چه‌مکی خوێندنی ئه‌لیکترۆنی به‌کار ده‌هێنرێت.  خوێندنی ئه‌لیکترۆنی ڕێگایه‌که‌ تێیدا پڕۆگرامی خوێندن و وانه‌کان و وانه‌وتنه‌وه‌ هه‌مووی له‌ ڕێگه‌ی ئینته‌رنتێه‌وه‌ ده‌بێت، واتە خوێندکار و مامۆستا له‌ پۆلدا نابن. خوێندنی ئه‌لیکترۆنی شێوازێکی خوێندنه‌  له‌ دووره‌وه‌ و ئه‌م شێواز و ڕێگا فێرکارییانه‌ له‌خۆ ناگرێت: خوێندن له‌ ڕێگه‌ی بابه‌ت و پڕۆگرامی پرنتکراو و په‌رتووکه‌وه‌، په‌خشی ڕادیۆ و ته‌له‌ڤزیۆن، ڤیدیۆی فێرکاری، پڕۆگرامی کۆمپیوته‌ر، به‌تایبه‌تی ئه‌وانه‌ی په‌یوه‌ست نین به‌ ئینته‌رنێته‌وه‌، به‌مه‌ش هه‌ر ڕێگا و شێوازێک به‌ هۆی ئینته‌رنێته‌وه‌ نه‌بێت؛ به‌ خوێندنی ئه‌لیکترۆنی دانانرێت[3]. پاڵپشت به‌م بۆچوونه‌ی سه‌ره‌وه‌، ئه‌و ڕێگایه‌ی وه‌زاره‌تی په‌روه‌رده‌ی حکومه‌تی هه‌رێمی کوردستان گرتوویه‌تیه‌ به‌ر، ناچێته‌ چوارچێوه‌ی پێناسه‌ی خوێندنی ئه‌لیکترۆنییه‌وه‌، به‌ڵکوو ته‌نها ڕێكاره‌کانی وه‌زاره‌تی خوێندنی باڵا و توێژینه‌وه‌ی زانستی له‌و چوارچێوه‌یه‌دان. له‌ ده‌یه‌ی ڕابردوودا خوێندنی ئه‌لیکترۆنی گه‌شه‌یه‌کی به‌رچاوی به‌خۆیه‌وه‌ بینیوه‌، چونکه‌ خوێندکار و مامۆستا ده‌توانن له‌ “هه‌ر شوێنێک و هه‌ر کاتێك” وانه‌ بخوێنن/بڵێنه‌وه‌ و پڕۆسه‌ی په‌روه‌رده‌ به‌رده‌وام بێت. که‌واته‌ خوێندنی ئه‌لیکترۆنی ڕێگایه‌کی نوێیه‌، چونکه‌ ئه‌و شێوازه‌ کۆنه‌ په‌یڕە‌و ناکرێت کە ساڵانێکه‌ مامۆستا و خوێندکار له‌ پۆلدا و ڕووبه‌ڕوو بوون و په‌رتووک و ده‌فته‌ر و پێنووس له‌به‌ر ده‌ستی مامۆستا و خوێندکاردا بوون[4]. گرنگه‌ ئاماژە‌ به‌ ڕاستییه‌کی مێژوویی بدرێت که‌ خوێندن له‌ دووره‌وه‌ چه‌مکێکی نوێ نییه‌، له‌ کۆتایی (1800)ە‌کان، واته‌ کۆتایی سه‌ده‌ی نۆزده‌، زانکۆی چیکاگۆ له‌ ویلایه‌ته‌ یه‌کگرتووه‌کانی ئه‌مه‌ریکا یه‌که‌مین به‌رنامه‌ی خوێندن له‌ دووره‌وه‌ی جێبه‌جێ کرد که‌ مامۆستا و خوێندکار له‌ چه‌ندین شوێنی جیاواز بوون و له ‌ڕێی نامه‌وه‌ وانه‌کان ده‌خوێنران. پێش ئه‌و سه‌رده‌مه‌، له‌ زۆرێک له‌ وڵاتانی دی، بۆ نموونه‌ له‌ ئه‌ورووپای پێش شۆڕشی پیشه‌سازی، خوێندن تایبه‌ت بوو به‌ ڕە‌گه‌زی نێر، به‌تایبه‌تی له‌ گه‌یشتن به‌ ئاسته‌ باڵاکانی خوێندن. به‌ر له‌وه‌ی مامۆستا و په‌روه‌رده‌کار “ویڵیه‌م ڕە‌ینی هارپه‌” له‌ ساڵی 1890 جێگره‌وه‌ بۆ خوێندنی ناو پۆل دابنێت، هه‌وڵی تر به‌دی نه‌کراوه‌ و خوێندکاران و مامۆستایان ته‌نها له‌ناو پۆل بوون و وانه‌کان ده‌خوێنران. ویڵیه‌م ڕە‌ینی هارپه‌ ئه‌و جۆره‌ی خوێندنی هێنایه ‌بوون تا هه‌ل به‌ چه‌ندین كەس بدرێت بخوێنن، چونکه‌ زۆرێک له‌ خەڵك نه‌یانده‌توانی پاره‌ی خوێندن و مانه‌وه‌ دابین بکه‌ن[5]. چه‌ند به‌رنامه‌ و وێبسایتێکی فێرکاری پاش بڵاوبوونه‌وه‌ی په‌تای کۆرۆنا، وه‌کوو چاره‌یه‌ک بۆ ئه‌و قه‌یرانانه‌ی بواری په‌روه‌رده‌ و فێرکردن بۆی دروست بوو، ڕێکخراوی یونسکۆ، له‌ ماڵپه‌ڕی فه‌رمی، ژماره‌یه‌ک به‌رنامه‌ و سه‌کۆ و سه‌رچاوه‌ی داناوه‌ که‌ ده‌کرێت دامه‌زراوه‌ په‌روه‌رده‌ییه‌کان له‌ سه‌رانسه‌ری جیهاندا سوودی لێ ببینن. سه‌ره‌ڕای ئه‌مه‌ش، مامۆستایان و خوێندکاران و دایك و باوكی خوێندکاران سوودمه‌ند ده‌بن لێیان، به‌ مه‌به‌ستی ئاسانکاری بۆ فێربوون له‌ کاتی نه‌بوونی خوێندنگه‌دا. به‌شێکی زۆری ئه‌و به‌رنامه‌ و سه‌کۆیانه‌ به‌خۆڕایین و به‌کارهێنه‌ر هیچ بڕە‌ پاره‌یه‌ک نادات و به‌ چه‌ند زمانێکی جیاواز به‌رده‌ستن. لێره‌دا به‌ کورتی ئه‌و به‌رنامه‌ و سه‌کۆیانه‌ ده‌خرێنه‌ ڕوو، که‌ ده‌کرێت هه‌ردوو وه‌زاره‌تی په‌روه‌رده‌ و خوێندنی باڵا و توێژینه‌وه‌ی زانستیی حکومه‌تی هه‌رێمی کوردستان بۆ خوێندنی سه‌رده‌می کۆرۆنا سوودیان لێ ببینن. ئه‌و به‌رنامانه‌ی بۆ به‌ڕێوه‌بردنی فێربوونی دیجیتاڵی هه‌ن، بریتین له‌:  CenturyTech، ClassDojo، Edmodo، Edraak، EkStep، Google Classroom، Moodle، Nafham ،Paper Airplanes، Seesaw، Skooler، Schoology. هه‌روه‌ها چه‌ند به‌رنامه‌ و سیستمێکی تر هه‌ن تایبه‌تن به‌ مۆبایل و به‌ هه‌مان شێوه‌ بۆ په‌روه‌رده ‌و فێرکردن به‌سوودن، له‌وانه‌ش:  KaiOS، Cell-Ed، Eneza Education، Funzi، Ubongo، Ustad Mobile. بەشێك له‌م به‌رنامانه‌ به‌بێ ئینته‌رنێتیش کار ده‌که‌ن و له‌ هه‌ندێکی تریشدا خوێندکار چه‌قی فێربوونه. سه‌ره‌ڕای ئه‌مه‌، به‌رنامه‌ی  “Kolibri” که‌ پاڵپشتیی خوێندنی ده‌کات؛ به‌ 20 زمان به‌رده‌سته‌ و به‌ شێوه‌یه‌کی کارا بێ ئینته‌رنێت کار ده‌کات. هه‌روه‌ها هه‌ردوو به‌رنامه‌ و که‌ره‌سته‌ی په‌روه‌رده‌یی “Rumie” و  “Ustad Mobile” پێویستیان به‌ ئینته‌رنێتی به‌رده‌وام نییه‌ و به‌بێ ئینته‌رنێت کار ده‌که‌ن. لێره‌دا ده‌کرێت خوێندنگه و زانکۆکانی هه‌رێمی کوردستان سوود له‌م به‌رنامانه‌ وه‌ربگرن، یان به‌ لایه‌نی که‌مه‌وه‌ ئاسانکاری بکرێت لەلایه‌ن حکومه‌ته‌وه‌ بۆ تاقیکردنه‌وه‌ی چه‌ند به‌رنامه‌یه‌ک، تا بزانرێت کامیان له‌گه‌ڵ ژینگه‌ی په‌روه‌رده‌یی هه‌رێمی کوردستان یه‌ک ده‌گرنه‌وه‌، چونکه‌ مه‌رج نییه‌ هه‌موو به‌رنامه‌کان هه‌مان کاریگه‌ری و سوودیان هه‌بێت. جگه‌ له‌ به‌رنامه‌ یان سیستم، چه‌ند سه‌کۆیه‌کی تایبه‌ت به‌ خولی ڕاهێنان هه‌ن که‌ به‌ “MOOC” و پێوستیان به‌ ئینته‌رنێته‌، گشت خوێندکاران و مامۆستایان و فه‌رمانبه‌ران ده‌توانن به‌شدار بن، واته‌ هه‌موو که‌سێک ده‌توانێت به‌شدار بێت و ئه‌وه‌ی پێویست بێت ته‌نها بوونی ئیمێلێکه‌ به‌ مه‌به‌ستی کردنه‌وه‌ی هه‌ژماری تایبه‌تی، تا که‌سه‌که‌ به‌شداریی یه‌کێک له‌ خوله‌کان‌ بکات. گرنگترین ئه‌و سه‌کۆیانه‌ بریتیین له‌: Canvas، Coursera، European Schoolnet Academy، Alison، EdX، iCourse، Future Learn، Icourses، Udemy ، XuetangX ،TED-Ed Earth School.  ئه‌م خولانه‌ ته‌نها تایبه‌ت نین به‌ بوارێکی زانستی یان په‌روه‌رده‌یی، به‌ڵکوو هه‌موو بابه‌تێکیان تێدایه‌، بۆ نموونه‌ خولی ڕا‌هێنان هه‌یه‌ تایبه‌ته‌ به‌ بواری ژینگه‌، یان فێربوونی زمان، یان مێژوو، یان کولتوور و… هتد. هه‌ندێک به‌رنامه‌ و وێبسایتی تر هه‌ن له‌ خوێندنی خودی سوودیان هه‌یه‌، واته‌ که‌سه‌که‌ ده‌توانێت بێ بوونی مامۆستا سوود له‌م به‌رنامانه‌ وه‌ربگرێت و ته‌نها به‌ دابه‌زاندنی به‌رنامه‌که‌ یان بوونی ئینته‌رنێت؛ ده‌توانێت ده‌ست به‌ خوێندن بکات و فێر ببێت. ئه‌م به‌رنامانه‌ بۆ خوێندنه‌وه‌ و نووسین و قسه‌کردن و گوێگرتن سوودیان هه‌یه‌ و ده‌کرێت له‌ هه‌رێمی کوردستاندا سوودیان لێ وه‌بگیرێت. به‌شیكی ئه‌م به‌رنامه‌ و پڕۆگرامانه‌ چه‌ندین وانه‌ی خۆڕایی و هه‌مه‌جۆر و پسپۆڕیی جیاوازیان تێدایه‌ و ده‌توانرێت بەباشی سوودیان لێ ببینرێت، چونکه‌ بۆ هه‌ردوو زانستی مرۆیی و پراکتیکی سوودیان هه‌یه‌ و سه‌دان وانه‌ی تۆمارکراو و ڕاهێنانیان تێدایه‌. لای خواره‌وه‌ به‌شێکی ئه‌و به‌رنامه‌ و پڕۆگرام و وێبسایتانه‌ خراونه‌ته ‌ڕوو: ABRA، Code.org، British Council، Byju’s،  Code It، Code Week،Discovery Education، Duolingo، Edraak، Facebook Get Digital، Feed the Monster، Khan Academy، KitKit School، Madrasa، Mindspark، Music Crab، OneCourse، Profuturo، Polyup، Quizlet، Siyavula، SDG Academy Library، Smart History، Geekie، YouTube. سه‌ره‌ڕای هه‌موو ئه‌و به‌رنامه‌ و پڕۆگرام و وێبسایتانه‌ی خراونه‌ته ‌ڕوو، چه‌ند به‌رنامه‌ و وێبسایتێک هه‌ن که‌ له‌ بواری فێرکردن به‌ “سه‌کۆی هاریکاری که‌ پاڵپشتیی په‌یوه‌ندیی ڕاسته‌وخۆیی ڤیدیۆیی ده‌کات” ناسراون. ده‌کرێت له‌ هه‌رێمی کوردستان، زۆر جار، به‌تایبه‌تی بۆ خوێندنی زانکۆیی سوود له‌م سه‌کۆیانه‌ ببینرێت: Lark، Dingtalk، Hangouts Meet، Teams، Skype، WeChat Work، WhatsApp، Zoom. گرنگه‌ ئاماژە‌ به‌و که‌ره‌ستانه‌ بدرێت که‌ ده‌شێت مامۆستایان سوودیان لێ ببینن بۆ دروستکردنی ناواخنی فێربوونی دیجیتاڵی، واته‌ مامۆستا ده‌توانێت له ‌ڕێی ئه‌م به‌رنامه‌ و وێبسایتانه‌وه‌ وانه‌ ئاماده‌ بکات که‌ چه‌ندین وێنه‌ و ڤیدیۆ و بابه‌تی جیاواز له‌خۆ بگرێت. به‌گشتی ده‌شێت مامۆستا سوود له‌مانه‌ وه‌ربگرێت:  Thinglink، Buncee، EdPuzzle، EduCaixa، Kaltura، Nearpod، Squigl، Pear Deck، Trello[6].   سیناریۆی خوێندنی ئه‌لیکترۆنی له‌ چه‌ند وڵاتێک له‌ سه‌رده‌می کۆرۆنادا، له‌ وڵاتانی ئه‌ورووپایی،  دایك و باوك  و خوێندکاران و مامۆستایان له‌ هه‌وڵی خۆگونجاندن له‌گه‌ڵ ئه‌و بارودۆخه‌ نه‌خوازراوه‌ی هاتووەته‌ پێشه‌وه‌. لێره‌دا دوو گرفتی سه‌ره‌کی هه‌ن: یه‌که‌میان ئه‌گه‌ر خوێندن له‌ خوێندنگه‌کان بێت، ده‌بێت ده‌وڵه‌ت به‌وریاییه‌وه‌ ئاگاداری پاکوخاوێنی و پاراستنی دووریی نێوان که‌سه‌کان بێت. به‌دینه‌هێنانی ئه‌م خاڵه‌، ڕەنگه‌ کار بکاته‌ سه‌ر لایه‌نی ده‌روونیی دایك و باوك و منداڵه‌کانیان و بێبه‌شبوونی خوێندنی لێ بکه‌وێته‌وه‌. دووهه‌مین گرفت ته‌نها په‌یوه‌ست نییه‌ به‌ خۆگونجاندن له‌گه‌ڵ خوێندنی ئه‌لیکترۆنی، به‌ڵکوو په‌یوه‌سته‌ به‌ چۆنێتیی پاراستنی داتای تایبه‌ت به‌ که‌سێتیی خوێندکار و ڕە‌فتار و هه‌ڵسوکه‌وتی[7]. هه‌روه‌ک له‌ وێبسایتی “the World Bank” دانراوه‌، هه‌ر وڵاتێک بۆ ڕووبه‌ڕووبوونه‌وه‌ی کۆرۆنا ڕێکاری تایبه‌ت به‌ خۆی گرتووەته ‌به‌ر و هه‌وڵی داوه‌ به‌ باشترین شێوه‌ بگونجێت له‌گه‌ڵ دۆخی په‌روه‌رده‌ و فێرکردنی وڵات. هه‌ر بۆ ئه‌م مه‌به‌سته‌، ڕیوشوێنه‌کانی 71 وڵاتی خستووەته ‌ڕوو، که‌ تێیدا ورده‌کاریی هه‌نگاونان بۆ په‌روه‌رده‌ و فێرکردن له‌ سه‌رده‌می کۆرۆنادا باس کراوه‌. له‌م توێژینه‌وه‌یه‌دا 5 وڵات وه‌کوو نموونه‌ وه‌رده‌گیرێت، تا بزانرێت چۆن وڵاتان تەکنەلۆجیا بۆ خزمه‌ت په‌روه‌رده‌ به‌کار ده‌هێنن وه‌کوو ڕووبه‌ڕووبوونه‌وه‌یه‌ک بۆ په‌تای کۆرۆنا[8]. هه‌روه‌ها کام هه‌نگاوه‌یان گونجاوه‌ بۆ ژینگه‌ی هه‌رێمی کوردستان، تا وه‌زاره‌ته‌کانی په‌روه‌رده‌ و خوێندنی باڵا و توێژینه‌وه‌ی زانستی ڕەچاوی بکه‌ن. هیندستان له‌ وڵاتێکی وه‌کوو هیندستان، به ‌هۆی کۆرۆنا و داخستنی خوێندگه‌کانه‌وه‌‌، 320 ملیۆن خوێندکار زه‌ره‌رمه‌ند بوون، هه‌ر چه‌نده‌ حکومه‌تی ئه‌و وڵاته‌ ده‌ستبه‌جێ داوای به‌کار‌هێنانی خوێندنی ئه‌لیکترۆنیی کرد تا ڕێ له‌ کاره‌ساتی فه‌وتانی خوێندن بگرێت[9]. به‌پێی ڕاپۆرتی ژمارە 75ی “National Sample Survey Office” بۆ ساڵی 2017-2018، ته‌نها له‌ 23.8% خێزانی هیندستانی ده‌ستی به‌ ئینته‌رنێت ڕاده‌گات، به ‌شێوه‌یه‌ک که‌ له‌ ناوچه‌ لادێنشینه‌کان ته‌نها 14.9% و شارنشینیش 42% لەم خزمەتگوزارییە سوودمەندن، به‌ڵام گرفته‌که‌ هه‌ر ئه‌وه‌نده‌ نییه‌، بوونی ئینته‌رنێت و ده‌ستپێڕاگه‌یشتنی واتای ئه‌وه‌ ناگه‌یه‌نێت که‌ به‌کار بهێنرێت[10]. له‌م ڕێژەیه‌دا ته‌نها 16% ژنان و کچان ئینته‌رنێتیان هه‌یه‌ له ‌ڕێی مۆبایله‌کانیانه‌وه‌، له‌ کاتێکدا ڕێژە‌كه‌ بۆ پیاوان بریتییه‌ له‌ 36%، هه‌روه‌ها گه‌نجان که‌متر ده‌ستیان پێ ده‌گات. جگه‌ له‌مه‌ش، 12.5%ی خوێندکاران خاوه‌نی مۆبایلی زیره‌کن و زۆرێک له‌ مامۆستایان گرفتی وانه‌وتنه‌وه‌یان هه‌یه‌ بە هۆی ئینته‌رنێته‌وه‌[11]. له‌ ڕێکه‌وتی 21/3/2020دا، له‌ کۆنگره‌یه‌کی ڕۆژنامه‌وانیدا وه‌زیری گه‌شه‌پێدانی مرۆیی هیندستان ژماره‌یه‌ک به‌رنامه‌ و سه‌کۆی خستنه ‌ڕوو که‌ به‌خۆڕایین و له‌ کاتی داخستنی خوێندگاکاندا خوێندکاران و مامۆستایان سوودی لێ ده‌بینن تا به‌رده‌وامی به‌ خوێندن بده‌ن. به‌شێک له‌و به‌رنامه‌ و سه‌کۆیانه‌ ئه‌مانه‌ن: The DIKSHA، e-Pathshala، NROER، Swayam، Swayam Prabha. به‌شێک له‌م سه‌کۆیانه‌ زۆر به‌سوودن، بۆ نموونه Swayam، 1900 بابه‌ت و کۆرس له‌خۆ ده‌گرێت که‌ چه‌ندین وانه‌ی تۆمارکراو و ئه‌رکی ماڵه‌وه‌ و تاقیکردنه‌وه‌ و هه‌ڵسه‌نگاندنی تێدایه‌ که‌ بۆ پۆلی 9 بۆ 12 و هه‌روه‌ها خوێندنی زانکۆیی (به‌رایی و باڵا) به‌کار دێت. بابه‌ته‌کانیش هاوشانی پڕۆگرامی خوێندن، چه‌ندین بوار له‌خۆ ده‌گرن، له‌وانه‌: ئه‌ندازیاری، زانسته‌ مرۆڤایه‌تییه‌کان، زانسته‌ کۆمه‌ڵایه‌تییه‌کان، یاسا، به‌ڕێوه‌بردن و کارگێڕی… هتد[12]. پرسیار لێره‌دا ئه‌وه‌یه‌: ئایا‌ ته‌نیا بوونی سیستمی “E-Parwarda” و ته‌له‌ڤزیۆنی په‌روه‌رده‌یی به‌سن بۆ هه‌رێمی کوردستان تا له‌ سه‌رده‌می کۆرۆنادا په‌روه‌رده‌ و فێرکردن په‌کی نه‌که‌وێت؟ ئایا بۆ زانکۆکان چی بکرێت؟ وه‌ڵامی ئه‌م دوو پرسیاره‌ هه‌ر وا به‌زاره‌کی نادرێته‌وه‌ و داتای ورد و ئاماری پێویستی دەوێت، ده‌بووایه‌ حکومه‌تی هه‌رێمی کوردستان به‌ر له‌ ده‌ستپێکی ساڵی خوێندنی 2020-2021 ڕاپرسیی بکردایه‌ و ڕاوبۆچوونی خوێندکاران و دایک و باوکی خوێندکاران و مامۆستایان و شاره‌زایانی وه‌ربگرتایه‌، ئه‌مه‌ش ته‌نها له‌ڕیگه‌ی وێبسایتێکه‌وه ده‌کرا که‌ وڵامی سه‌رنج و پێشنیازه‌کانی له‌سه‌ر خوێندنی ئه‌لیکترۆنی بخستایه‌ته ‌ڕوو، تا دواتر له‌لایه‌ن شاره‌زایانی بواره‌که‌وه‌ شه‌نوکه‌وی بابه‌ته‌که‌ بکرایه‌. سه‌باره‌ت به‌ زانکۆکان، ئایا ته‌نها “Google Classroom” یان “Moodle” ده‌توانێت بۆ هه‌موو کۆلیج و پسپۆڕییه‌کان به‌کار بهێنرێت؟ ڕەنگه‌ وا پێویست بکات هه‌ر زانکۆیه‌ک په‌یڕە‌وی تایبه‌ت به‌ خۆی هه‌بێت له‌م ڕووه‌وه‌ و ته‌واوی زانکۆ حكومی و تایبه‌ته‌کان سه‌رپشک بکرێن له‌وه‌ی کام به‌رنامه‌، یان پڕۆگرام، یان وێبسایت هه‌ڵده‌بژێرن.   به‌نگلادیش سیستمی په‌روه‌رده‌ و فێرکردنی وڵاتی به‌نگلادیش به‌ یه‌کێک له‌ سیستمه‌ گه‌وره‌کانی جیهان داده‌نرێت، چونکه‌ 21.9 ملیۆن منداڵ ته‌نها له‌ باخچه‌ی منداڵان و خوێندنگه‌ سه‌ره‌تاییه‌کانن، به‌مه‌ش 14.4%ی بودجه‌ی نیشتمانی بۆ ئه‌م مه‌به‌سته‌ ته‌رخان کراوه‌[13]. هه‌ر چه‌نده‌ له‌ 8ی ئازاری 2020، یه‌که‌م تووشبوو به‌ ڤایرۆسی کۆرۆنا ڕاگه‌یه‌نرا، به‌ڵام دامه‌زراوه‌ په‌روه‌رده‌ییه‌کان هه‌ر به‌کراوه‌یی مانه‌وه‌ و حکومه‌ت بیری له‌ داخستنیان نه‌کرده‌وه‌ وه‌کوو بژارده‌یه‌ک. وه‌زاره‌تی په‌روه‌رده‌ بیری له‌ چه‌ندین ڕێگا کرده‌وه‌ بۆ خوێندنگه‌ سه‌ره‌تاییه‌کان، به‌وه‌ی پێویسته‌ مامۆستایان و خوێندکاران چی بکه‌ن، هه‌ر بۆیه‌ له‌ ڕێگه‌ی بڵاوکراوه‌کانه‌وه‌ هه‌وڵی هۆشیارکردنه‌وه‌ی خه‌ڵک درا، چونکه‌ زۆربه‌ی خوێندنگه‌کان ئاوده‌ستی ته‌ندروست و پاککه‌ره‌وه‌ی باش و پێویستیان نه‌بوو. هه‌ر بۆیه‌ مامۆستایان و دایك و باوكی خوێندکاران داوای داخستنی خوێندنگه‌کانیان ده‌کرد. حکومه‌تی ئه‌و وڵاته‌ دامه‌زراوه‌ په‌روه‌رده‌ییه‌کانی تا 9ی نیسان داخست و دواتر گه‌یشتنه‌ ئه‌و‌ بڕیاره‌ی، ئه‌گه‌ر پێویست بکات تا مانگی ئه‌یلوولی 2020 ده‌رگای دامه‌زراوه‌ په‌روه‌رده‌ییه‌کان نه‌کرێته‌وه‌[14]. سه‌باره‌ت به‌ ڕێوشوێنه‌کان، حکومه‌ت ته‌له‌ڤزیۆنی به‌نگلادیشی خسته‌ خزمه‌تی په‌روه‌رده‌وه ‌و له‌ پۆلی شه‌شە‌م تا ده‌هه‌م به‌رنامه‌ی “خوێندگه‌که‌م له‌ ماڵه‌که‌مه‌”  په‌خش ده‌کرا، ڕۆژانه‌ کاتژمێر 9 بۆ 12:30، دواتریش هه‌موو وانه‌کان له‌ که‌ناڵی یوتیوب دادە‌نران. سه‌ره‌ڕای ئه‌مه‌ش، بۆ به‌رده‌وامیی پڕۆسه‌ی په‌روه‌رده‌ و خوێندن له‌  ماڵه‌وه‌ له‌ کاتی داخستنی خوێندنگه‌کان، حکومه‌ت له‌گه‌ڵ ڕێکخراوی یونسێف کار ده‌کات بۆ جێبه‌جێکردنی خوێندنی ئه‌لیکترۆنی له‌ ڕێی ته‌له‌ڤزیۆن و ڕادیۆ و مۆبایل و سه‌کۆکانی ئینته‌رنێتەوە[15]. ئه‌وه‌ی پیویسته‌ بوترێت ئه‌وه‌یه‌ به‌ به‌راورد به‌ وڵاتێکی وه‌کوو به‌نگلادیش، هه‌رێمی کوردستان زۆر به‌ئاسانی ده‌توانێت گرفته‌کانی په‌روه‌رده‌ و فێرکردن چاره ‌بکات، چونکه‌ کۆی دانیشتووانی هه‌رێم ناکاته‌ یه‌ک له‌سه‌ر چواری خوێندکارانی به‌نگلادیش. چیلی به‌ هۆی کۆرۆناوه‌ زیاتر له‌ 3.6 ملیۆن خوێندکار ناچنه‌ پۆله‌وه‌ و به‌مه‌ش کۆرۆنا درزێکی گه‌وره‌ی خستووەته‌ بواری په‌روه‌رده‌وه‌[16]. له‌ 15ی ئازاری 2020، حکومه‌ت هه‌موو چالاکییه‌کی ناو خوێندنگه‌ و دامه‌زراوه‌ په‌روه‌رده‌ییه‌کانی هه‌ڵپه‌سارد تا ڕێ له‌ ته‌شه‌نه‌کردنی ڤایرۆسه‌که‌ بگرێت. وه‌زاره‌تی په‌روه‌رده‌ ئامۆژگاریی خوێندنگه‌ و دامه‌زراوه‌ په‌روه‌رده‌ییه‌کانی کرد تا خوێندنی ئه‌لیکترۆنی به‌کار بهێنن[17]. له‌ وڵاتی چیلی، سه‌کۆی “Aptus” بۆ بابه‌ته‌ فێرکارییه‌کان به‌کار دێت. تیمێکی وه‌زاره‌تی په‌روه‌رده‌ی چیلی ئه‌م پڕۆگرامه‌یان دایه‌ وڵاتانی ده‌وروبه‌ر، تا له‌ کاتی داخستنی خوێندنگه‌کاندا سوودی لێ ببینن. ئه‌م به‌رنامه‌یه‌ چه‌ندین ڤیدیۆی خۆڕایی تێدایه‌ که‌ له‌ چیلی به‌ر‌هه‌م هێنراوه‌، به‌تایبه‌تی بۆ منداڵانی ته‌مه‌ن 4 تا 13 ساڵ، هه‌روه‌ها ده‌توانرێت بۆ نه‌هێشتنی نه‌خوێنده‌وارییش سوودی لێ ببینرێت[18]. میسڕ به‌پێی ڕاپۆرتی ڕێکخراوی یونسێف، 52%ی دانیشتووانی میسڕ منداڵ و گه‌نجن و داخستنی ده‌رگای خوێندنگه‌ و دامه‌زراوه‌ په‌روه‌رده‌ییه‌کان کاریگه‌ریی نه‌رێنییان کردووەته‌ سه‌ر نزیکه‌ی 23 ملیۆن خوێندکار. ڤایرۆسی کۆرۆنا کاریگه‌ریی خراپی کردووەته‌ سه‌ر چه‌ندێتی و چۆنێتیی خوێندن. هه‌روه‌ها له‌ ساڵی 2014دا، له‌ 3 منداڵ، یه‌کیان به‌ جۆرێک له‌ جۆره‌کان به‌ هه‌ژار داده‌نرا له‌ میسڕ، به‌مه‌ش هه‌ژاری وای کردووه‌ زۆر که‌س له‌ خوێندن داببرێت و خواردنی پێویست نه‌خوات و نه‌توانێت به‌پێی پێویست سه‌ردانی نه‌خۆشخانه‌ و نۆرینگه‌کان بکات[19]. له‌ 15ی ئازاری 2020، وه‌زاره‌تی په‌روه‌رده‌ و په‌روه‌رده‌ی ته‌کنیکی چه‌ند ڕێگایه‌کی خسته‌ ڕوو به‌ مه‌به‌ستی جێبه‌جێکردنی خوێندنی ئه‌لیکترۆنی، بۆ ئه‌مه‌ش وه‌زاره‌ته‌که ماوه‌ی چوونه‌ژووره‌وه‌ی “بانکی زانیاریی میسڕی”ی بۆ خوێندکاران دریژ کرده‌وه‌، که‌ به‌پێی قۆناغ و بابه‌ت دانرابوون، هه‌موو بابه‌ته‌کانی قۆناغی باخچه‌ی منداڵان تا خوێندنی ئاماده‌یی تێدا بوو، به‌ هه‌ردوو زمانی عه‌ره‌بی و ئینگلیزی. هه‌روه‌ها کۆی وانه‌ و بابه‌ته‌کان بۆ مامۆستایان و دایك وباوكی خوێندکارانیش به‌رده‌ستن و چه‌ندین ڤیدیۆ و وێنه‌ و فیلمی به‌ڵگه‌نامه‌یی له‌خۆ ده‌گرێت به‌ مه‌به‌ستی ڕوونکردنه‌وه‌ی وانه‌ جیاوازه‌کان. جگه‌ له‌مه‌ش، په‌رتووکی خوێندن و فه‌رهه‌نگی تێدایه‌ و چوونه‌ ناو سیستمه‌که‌وه‌ به‌ مۆبایل و کۆمپیوته‌ر ده‌بێت. به‌م هه‌نگاوه‌ توانرا پردی په‌یوه‌ندیی نێوان مامۆستایان و خوێندکاران بنیات بنرێته‌وه‌ و نزیکه‌ی 22 ملیۆن خوێندکاری دابه‌شبوو به‌سه‌ر 55 هه‌زار خوێندنگه‌دا سوودمه‌ند بن و وه‌کوو ئه‌وه‌ی له‌ناو پۆلدا بن، چونکه‌ مامۆستایان وه‌ڵامی گشت پرسیاره‌کانی خوێندکاران ده‌ده‌نه‌وه‌ و تاقیکردنه‌وه‌ش ده‌که‌ن. جگه‌ له‌م کاره‌ش، له‌ 19ی ئازاری 2020، میسڕ له‌گه‌ڵ “Edmodo” ڕێک که‌وت به‌ مه‌به‌ستی فه‌راهه‌مکردنی خوێندنی ئه‌لیکترۆنی له‌ قۆناغی باخچه‌ی منداڵانه‌وه‌ تا خوێندنی ئاماده‌یی. هه‌روه‌ها سیمکارتی خۆڕایی دا به‌ خوێندکاران[20]. له‌ هه‌رێمی کوردستان، بێگومان مامۆستایان و خوێندکارانیش کێشه‌یان له‌گه‌ڵ خوێندنی ئه‌لیکترۆنی بۆ دروست ده‌بێت، چونکه‌ تا ئێستا زۆرێک له‌ مامۆستایان و خوێندکاران، به‌تایبه‌تی له‌ گونده‌کان، به‌ئاسانیی ده‌ستیان به‌ ئینته‌رنێتی باش ڕاناگات، یاخود ئه‌زموونی کارکردن و وانه‌وتنه‌وه‌/وانه‌خوێندنی ئینته‌رنێتییان نییه‌. هه‌ر چی خوێندنی زانکۆیه‌، تا ڕادەیه‌ک باشتره‌، چونکه‌ خوێندکاران به‌ته‌مه‌نترن و ڕە‌نگه‌ کردنه‌وه‌ی خولێکی ڕاهێنانی به‌ شێوه‌ی ئه‌لیکترۆنی بۆ مامۆستایان و خوێندکارانی زانکۆ؛ ئه‌م کێشه‌یه‌ زۆر بچووکتر بکاته‌وه‌. ده‌بێت ئه‌وه‌ش له‌بیر نه‌کرێت، ژماره‌ی خوێندکارانی مامۆستایانی هه‌رێمی کوردستان زۆر که‌متره‌ به‌ به‌راورد به‌ وڵاتێکی وه‌کوو میسڕ و ده‌توانرێت به‌ئاسانی کۆی گرفته‌کانی خوێندنی ئه‌لیکترۆنی له‌ هه‌رێم چاره‌ بکرێن.   فینلاند ئامانجی سه‌ره‌کیی سیستمی په‌روه‌رده‌ی وڵاتی فینلاند، بریتییه‌ له‌ ده‌ستبه‌رکردنی خوێندن و ڕاهێنان بۆ گشت دانیشتووانی وڵات. سیستمه‌که‌ له‌ سێ جۆر خوێندن پێک دێت: یه‌که‌م: خوێندنی بنه‌ڕە‌تی بۆ ماوه‌ی نۆ ساڵ، دووه‌م: خوێندنی دواناوه‌ندی که‌ خوێندنی پیشه‌یی و گشتی له‌خۆ ده‌گرێت، سێیه‌م: خوێندنی باڵا که‌ له‌ زانکۆ و په‌یمانگا ته‌کنیکییه‌کان هه‌ن[21]. له‌ وڵاتی فینلاند، دامه‌زراوه‌ په‌روه‌رده‌ییه‌کان به‌ شێوه‌یه‌کی سه‌رکه‌وتوو توانییان له‌ خوێندنی ناو پۆله‌وه‌ بچنه‌ سه‌ر خوێندنی ئه‌لیکترۆنی، ئه‌مه‌ش به‌ هۆی لێهاتوویی و توانا‌ی مامۆستایان و خوێندکارانه‌وه‌، هه‌روه‌ها دابینکردنی که‌ره‌سته‌ و ئامێری تەکنەلۆجی بۆ هه‌موو که‌سێک، که‌ کارێکی قورسه‌ هه‌مان کار له‌ وڵاتێکی تر بکرێت[22]. لێره‌دا گرنگه‌ ئاماژە‌ به‌وه‌ بکرێت که‌ پێویسته‌ حکومه‌تی هه‌رێمی کوردستان گرنگیی پتر به‌ بواری په‌روه‌رده‌ بدات و کارێک بکات خوێندکارێکی ناو شار و خوێندکارێکی گوندێکی دووره‌ده‌ست به‌ هه‌مان شێوه‌ ده‌ستیان به‌ ئینته‌رنێت ڕابگات، تا به‌ شێوه‌یه‌کی باش خوێندنی ئه‌لیکترۆنی ڕێچکه‌ی خۆی بگرێت و بیر له‌وه‌ نه‌کرێته‌وه‌ سیستمی فینلاندی یان میسڕی له‌م هه‌رێمه‌ په‌یڕە‌و بکرێت، به‌ڵکوو پێویسته‌ سیستمێکی کوردستانییانه‌ی نوێ و گونجاو له‌گه‌ڵ ژینگه‌ی کۆمه‌ڵایه‌تی و ده‌روونی و ئابووریی هاوڵاتییانی ئه‌م هه‌رێمه‌ به‌کار بهێنرێت. له‌گه‌ڵ بڵاوبوونه‌وه‌ی په‌تای کۆرۆنا له‌ فینلاند، بیر له‌ جێگره‌وه‌ی خوێندنی ناو پۆل کرایەوە. بۆ ئه‌م مه‌به‌سته‌ش خوێندنگه‌کان ڕێنمایی خوێندکارانیان کرد تا چی بکه‌ن و چۆن له‌ دووره‌وه‌ بخوێنن و تاقیکردنه‌وه‌ بکه‌ن. به‌ هۆی ئه‌وه‌ی له‌ فینلاند خوێندنی گریمانه‌یی به‌ شێوه‌یه‌کی به‌ربڵاو به‌کار ده‌هات، که‌متر دووچاری گرفته‌کانی خوێندنی ئه‌لیکترۆنی بوونه‌وه‌. ئاژانسی نه‌ته‌وه‌یی فینلاند بۆ په‌روه‌رده،‌ زوو ڕێنوێنیی دایه‌ خوێندنگه‌کان له‌مه‌ڕ چۆنێتیی به‌کارهێنانی خوێندنی ئه‌لیکترۆنی، به ‌جۆرێک که‌ خوێندکاران بتوانن وانه‌ بخوێنن و ئه‌رکه‌کانیان جێبه‌جێ بکه‌ن. بۆ ئه‌م مه‌به‌سته‌ش سوود له‌م سه‌کۆ و به‌رنامانه‌ وه‌رگیرا: Moodle، O365، Ville، Teams، Google Classrooms، Skype، .Zoom هه‌روه‌ها بۆ سه‌رنجڕاکێشانی خوێندکاران و ئافراندنی حه‌زی خوێندنی ئه‌لیکترۆنی، چه‌ندین یاریی په‌روه‌رده‌یی خرانه‌ خزمه‌تی ئه‌و بواره‌وه‌، له‌وانه‌ش: Sandbox، VirtualAutoedU، DigiVirtu[23]. بۆ دروستکردنی په‌یوه‌ندی له‌نێوان خوێندنگه‌ و ماڵ، واته‌ مامۆستا و خوێندکار و دایك و باوكی خوێندکار، سوود له‌ چه‌ندین سه‌کۆی ئه‌لیکترۆنی وه‌رده‌گیرێت، له‌و سه‌کۆیانه‌دا خوێندکار ئه‌رکه‌کانی ماڵه‌وه‌ی داده‌نێت، تێبینی و سه‌رنجی مامۆستا وه‌رده‌گرێت، تاقی ده‌کرێته‌وه‌ و نمره‌ی بۆ داده‌نرێت. بۆ هه‌ردوو قۆناغی بنه‌ڕەتی و ئاماده‌یی، سوود له‌م سه‌کۆیانه‌ ده‌بینن: Helmi، Wilma (Primus)، Studentaplus، Sopimuspro. سه‌باره‌ت به‌ خوێندنی باڵا، ژماره‌یه‌ک وێبسایت و سه‌کۆی ئه‌لیکترۆنی به‌کار ده‌هێنرێت: Moodle، Adobe Connect ، Zoom، Notebooks، Digital Matriculation Examination. جگه‌ له‌مانه‌ش، چه‌ندین وێبسایت و سه‌کۆی تر و کتێبخانه‌ی ئه‌لیکترۆنی خراونه‌ته‌ خزمه‌تی پڕۆسه‌ی فێرکردنه‌وه‌[24]. شایانی ئاماژەپێدانه‌، له‌ هه‌رێمی کوردستان تا ئێستا به‌ شێوه‌یه‌کی دروست و پێشکه‌وتوو کتێبخانه‌ی ئه‌لیکترۆنی به‌رده‌ست نییه‌ و مامۆستا و خوێندکار ناتوانن به‌سانایی ده‌ستیان به‌ سه‌رچاوه‌ جۆراجۆره‌کان بگات. پێویسته‌ هه‌ردوو وه‌زاره‌تی په‌روه‌رده‌ و خوێندنی باڵا و توێژینه‌وه‌ی زانستی، مکوڕانه‌ کار بۆ به‌ئه‌لیکترۆنیکردنی گشت سه‌رچاوه‌ و کتێبه‌کان بکه‌ن، تا کۆی مامۆستایان و خوێندکاران بتوانن سوود له‌ خوێندنی ئه‌لیکترۆنی وه‌ربگرن، چونکه‌ خوێندنی ئه‌لیکترۆنی بێ بوونی کتێبخانه‌یه‌کی ئه‌لیترۆنیی باش، به‌تایبه‌ت بۆ خوێندنی زانکۆیی، سه‌رکه‌توو نابێت. ئه‌نجام خوێندنی ئه‌لیکترۆنی له‌ هه‌ر شوێنێک جێبه‌جێ بکرێت، لایه‌نی باش و خراپی هه‌یه‌ و به‌کارهێنه‌ر ڕووبه‌ڕووی چه‌ند ئالنگارییه‌ک ده‌بێته‌وه‌. له‌سه‌ر ئاستی باڵاتریش، واته‌ حکومه‌ت، چه‌ندین گرفت دروست ده‌بن، به‌ڵام ئه‌و گرفتانه‌ چاره‌ ده‌بن ئه‌گه‌ر لێزانانه‌ هه‌نگاوی بۆ بنرێت. وڵاتان به‌پێی توانای خۆیان و گونجاندنی ژینگه‌ی په‌روه‌رده‌یی، ئابووری، کۆمه‌ڵایه‌تی، ده‌روونی و… هتد؛ هه‌نگاو ده‌نێن و که‌م وڵات هه‌یه‌ ئه‌زموون و سیستمی وڵاتێکی تر وه‌کوو ئه‌وه‌ی هه‌یه‌ جێبه‌جێ بکات. بۆ ڕووبه‌ڕووبوونه‌وه‌ی کۆرۆنا، وڵاتان هه‌وڵی زۆریان داوه‌ پڕۆسه‌ی په‌روه‌رده‌ و فێرکردن په‌کی نه‌که‌وێت و له‌ هه‌مان کاتدا ژیانی خوێندکاران و مامۆستایانیش پارێزراو بێت، هه‌ر بۆیه‌ بیریان له‌ خوێندنی ئه‌لیکترۆنی کردووەته‌وه‌ وه‌کوو جێگره‌وه‌یه‌ک بۆ خوێندنی ناو پۆل و زۆربه‌ی که‌ره‌سته‌ و ئامێره‌ پێویسته‌کان و ئینته‌رنێتیان بۆ مامۆستایان و خوێندکاران دابین کردووه‌. ڕاسپارده بۆ سه‌رخستنی پڕۆسه‌ی په‌روه‌رده‌ و فێرکردن، پێوسته‌ حکومه‌تی هه‌رێمی کوردستان کار بۆ دابینکردنی که‌ره‌سته‌ و ئامێره‌ ئه‌لیکترۆنییه‌کان و ئینته‌رنێت بکات، ئه‌مه‌ش پاش دابینکردنی شایسته‌ داراییه‌کانی مامۆستایان و فه‌رمانبه‌رانی وه‌زاره‌ته‌کانی په‌روه‌رده‌ و خوێندنی باڵا و توێژینه‌وه‌ی زانستی و دایك و باوكی خوێندکاران. سه‌رباری ئه‌مه‌ش، بڵاوکردنه‌وه‌ی هۆشیاری له‌مه‌ڕ په‌تای کۆرۆنا و خوێندنی ئه‌لیکترۆنی. پێویسته‌ وه‌زاره‌تی په‌روه‌رده‌ و خوێندنی باڵا و توێژینه‌وه‌ی زانستی، به‌رنامه‌ی تایبه‌ت به‌ خوێندنی ئه‌لیکترۆنییان هه‌بێت. ده‌بێت وه‌زاره‌تی په‌روه‌رده‌، به‌پێی ئاست و ته‌مه‌نی منداڵ، وانه‌ و ڤیدیۆ و وێنه‌ په‌روه‌رده‌ییه‌کان دیزاین بکات و زۆر جار گه‌مه‌ و بابه‌تی سه‌رنجڕاکێشی تێ بکات، نه‌ک ته‌نها مامۆستایه‌ک له‌لای بۆردێکی سپی وانه‌ بڵێته‌وه‌. هه‌روه‌ها ده‌بێت به‌رنامه‌ فێرکاری و په‌روه‌رده‌ییه‌کان به‌ شێوه‌یه‌کی ئاسان دروست بکرێن، تا مامۆستایان و خوێندکاران و دایك وباوكی خوێندکاران بتوانن به‌کاری بهێنن. سه‌باره‌ت به‌ وه‌زاره‌تی خوێندنی باڵا و توێژینه‌وه‌ی زانستی، ده‌بێت زانکۆکان ده‌سه‌ڵاتی ته‌واویان پێ بدرێت تا سوود له‌ سه‌کۆ و وێبسایته‌ جیاوازه‌کان ببینن. هه‌روه‌ها کردنه‌وه‌ی خولی ڕاهێنانی ئه‌لیکترۆنی بۆ کۆی مامۆستایانی گشت قۆناغه‌ جیاوازه‌کانی خوێندن پێویست و گرنگه‌. ده‌بێت حکومه‌تی هه‌رێمی کوردستان به‌ هه‌ماهه‌نگی له‌گه‌ڵ کۆمپانیاکانی په‌یوه‌ندیکردن، کار بکات بۆ دابینکردنی ئینته‌رنێتی باش به‌خۆڕایی بۆ ئه‌و خوێندکار و مامۆستایانه‌ی کۆمپیوته‌ر و ئایپاد و تابلێتیان هه‌یه‌. هه‌روه‌ها سیمکارت بۆ خوێندکاران و مامۆستایان بکات به‌ خۆڕایی، تا ده‌ستیان به‌ ئینته‌رنێت ڕابگات. به‌شێک له‌و کۆمپانیایانه‌ باجێکی زۆریان له‌لایه‌ و هێشتا نه‌دراوه‌ بە حکومه‌ت، ده‌كرێ حکومه‌ت له ‌ڕێی دابینکردنی ئینته‌رنێتی باش و سیمکارت بەخۆڕایی؛ له‌ به‌شێک له‌و باجانه‌ خۆش ببێت. مەرج نییە حکومه‌تی هه‌رێمی کوردستانی عێراق ئه‌زموونی وڵاتانی تر وه‌کوو خۆی تاقی بكاتەوە و له‌سه‌ر مامۆستایان و خوێندکارانی هه‌رێم جێبەجێی بکات، به‌ڵکوو به‌ خوێندنه‌وه‌ی وردی ڕ‌ەهه‌ندی ئابووری و کۆمه‌ڵایه‌تیی دانیشتووانی هه‌رێم؛ سیستمێک بۆ خوێندنی ئه‌لیکترۆنی دابنرێت. دروستکردنی ژێرخانی ئه‌لیکترۆنی بۆ هه‌رێمی کوردستان پێویسته‌،‌ ئه‌گه‌ر له‌ کات و سه‌رده‌مێکی تر مرۆڤایه‌تیی دووچاری په‌تایه‌کی تر بووه‌وه‌ یان چاره‌ی په‌تای کۆرۆنا نه‌دۆزرایه‌وه‌، ئه‌وکات مامۆستایان و خوێندکارانی هه‌رێم وه‌کوو ئێستا ون نابن. ‌  گۆڤاری ئایندەناسی، ژمارە 4ی تشرینی دووه‌می 2020   سه‌رچاوه‌کان: [1] United Nations. (2020). Policy Brief: Education during COVID-19 and beyond. [2] https://www.europeandataportal.eu/en/impact-studies/covid-19/education-during-covid-19-moving-towards-e-learning   [3] Wicks, M. 2010. A national primer on K–12 online learning. Version 2. http://www.inacol.org/ research/docs/iNCL_NationalPrimerv22010-web.pdf. [4] Gunawardena, C. N., & McIsaac, M.S. (2004). Distance education.  In D. Jonassen (Ed.), The handbook of research on education communications and technology (2nd ed., pp. 355-395). Mahwah, NJ: Lawrence Erlbaum.   [5] Gunawardena, C. N., & McIsaac, M.S. (2004). Distance education.  In D. Jonassen (Ed.), The handbook of research on education communications and technology (2nd ed., pp. 355-395). Mahwah, NJ: Lawrence Erlbaum.   [6]  https://en.unesco.org/covid19/educationresponse/solutions [7]  https://www.europeandataportal.eu/en/impact-studies/covid-19/education-during-covid-19-moving-towards-e-learning [8] The World Bank. (2020). How countries are using edtech (including online learning, radio, television, texting) to support access to remote learning during the COVID-19 pandemic. https://www.worldbank.org/en/topic/edutech/brief/how-countries-are-using-edtech-to-support-remote-learning-during-the-covid-19-pandemic [9]  Sahni, U. (2020). COVID-19 in India: education disrupted and lessons learned. https://www.brookings.edu/blog/education-plus-development/2020/05/14/covid-19-in-india-education-disrupted-and-lessons-learned/ [10]  Kumar, R. (2020). Lockdown is disrupting a generation’s education. What can be done? https://thewire.in/education/coronavirus-lockdown-education-students [11]  Sahni, U. (2020). COVID-19 in India: education disrupted and lessons learned. https://www.brookings.edu/blog/education-plus-development/2020/05/14/covid-19-in-india-education-disrupted-and-lessons-learned/   [12] The World Bank. (2020). How countries are using edtech (including online learning, radio, television, texting) to support access to remote learning during the COVID-19 pandemic. https://www.worldbank.org/en/topic/edutech/brief/how-countries-are-using-edtech-to-support-remote-learning-during-the-covid-19-pandemic [13] https://www.globalpartnership.org/where-we-work/bangladesh [14]  Nath, J.; Chowdhury, A. F.; &  Nath, A.  K. (2020). Analyzing COVID-19 challenges in Bangladesh. DOI: 10.20944/preprints202007.0129.v1 [15]  The World Bank. (2020). How countries are using edtech (including online learning, radio, television, texting) to support access to remote learning during the COVID-19 pandemic. https://www.worldbank.org/en/topic/edutech/brief/how-countries-are-using-edtech-to-support-remote-learning-during-the-covid-19-pandemic [16] https://www.bhp.com/sustainability/community/community-news/2020/06/strengthening-digital-education-in-chile/ [17] Paulina Sepulveda-Escobar, P. & Morrison, A. (2020). Online teaching placement during the COVID-19 pandemic in Chile: challenges and opportunities. European Journal of Teacher Education, 43(4), 587-607. https://doi.org/10.1080/02619768.2020.1820981 [18]  The World Bank. (2020). How countries are using edtech (including online learning, radio, television, texting) to support access to remote learning during the COVID-19 pandemic. https://www.worldbank.org/en/topic/edutech/brief/how-countries-are-using-edtech-to-support-remote-learning-during-the-covid-19-pandemic [19]  UNICEF (2020). COVID-19 in Egypt: Protecting children and young people in a time of crisis. UNICEF Egypt Data Snapshot – Issue 5, June 2020. https://www.unicef.org/egypt/media/5831/file/COVID19%20Data%20Snapshot%20EN.pdf [20]  The World Bank. (2020). How countries are using edtech (including online learning, radio, television, texting) to support access to remote learning during the COVID-19 pandemic. https://www.worldbank.org/en/topic/edutech/brief/how-countries-are-using-edtech-to-support-remote-learning-during-the-covid-19-pandemic [21] Välimaa, Raili; Kannas, L.; Lahtinen, E.; Peltonen, H.; Tynjälä, J. & Villberg, Jari. (2008). Finland: innovative health education curriculum and other investments for promoting mental health and social cohesion among children and young people. In: Social cohesion for mental well-being among adolescents (pp.91-102). Copenhagen, WHO Regional Office for Europe. [22] Neittaanmäki, P. & Takefuji, Y. (2020). Global digital school under covid-19. JYU UNESCO-CCE Online Conference: Embrace the Creativity amidst COVID-19 Crisis.  https://www.researchgate.net/publication/340967538_Global_digital_school_under_covid-19   [23]  The World Bank. (2020). How countries are using edtech (including online learning, radio, television, texting) to support access to remote learning during the COVID-19 pandemic. https://www.worldbank.org/en/topic/edutech/brief/how-countries-are-using-edtech-to-support-remote-learning-during-the-covid-19-pandemic   [24] The World Bank. (2020). How countries are using edtech (including online learning, radio, television, texting) to support access to remote learning during the COVID-19 pandemic. https://www.worldbank.org/en/topic/edutech/brief/how-countries-are-using-edtech-to-support-remote-learning-during-the-covid-19-pandemic.    

  راپۆرت: فازل حەمەرەفعەت – محەمەد رەئوف زیاتر لە (100) پەرلەمانتاری عێراق ئیمزایان لەسەر پرۆژەیاسایەك كردووە كە داوا دەكات موچەی فەرمانبەرانی هەرێمی كوردستان راستەوخۆ لەلایەن حكومەتی عێراقەوە بدرێت، ئایا حكومەتی مستەفا كازمی بە تێپەڕینی ئەم یاسایە لە پەرلەمان ئامادەیە موچەی فەرمانبەرانی هەرێم بگرێتەئەستۆو لەم كاتەدا كە لە قەیرانێكی دارایی سەختدایە؟ ئایا حكومەتی هەرێم لەڕووی ئابورییەوە سودمەند دەبێت یان زەرەرمەند ئەگەر بەغداد راستەوخۆ موچەی فەرمانبەران بدات ؟ لەم راپۆرتەدا وردەكاری زیاتر لەبارەی ئەم هەوڵەى پەرلەمانتاران  بڵاودەكەینەوە كە چەند رۆژی داهاتوو دەخرێتە بواری جێبەجێكردن. كۆكردنەوەی ئیمزا لە پەرلەمانی عێراق جوڵەیەكی نوێ دەستی پێكردووە بۆ ئەوەی بەفەرمی‌و لەچوارچێوەی یاسایەكی نوێدا موچەی فەرمانبەرانی هەرێمی كوردستان راستەوخۆ لەلایەن وەزارەتی دارایی عێراقەوە، دابەش بكرێت. (درەو) زانیویەتی، ژمارەیەك پەرلەمانتار رەشنوسی پرۆژەیەكیان ئامادەكردووە‌و ئیمزای پێویستی پەرلەمانتارانیان بۆ كردوەتەوە بۆ ئەوەی ئاڕاستەی سەرۆكایەتی پەرلەمانی عێراقی بكەن‌و دواتر ئاڕاستەی لیژنەی پەیوەندیدارەكان بكرێت بەمەبەستی پەسەندكردنی. بەگوێرەی ئەو زانیارییانەی كە دەست (درەو) كەوتوون، پرۆژەكە داوا دەكات: •    موچەی فەرمانبەرانی هەرێمی كوردستان بەشێوەیەكی راستەوخۆ لەلایەن بەغدادەوە دابەش بكرێت‌و هاوشێوەی فەرمانبەرانی عێراق، هەر فەرمانبەرێكی هەرێم ژمارە حسابییەكی تایبەتی خۆی لە بانك بۆ بكرێتەوە‌و مانگانە وەزارەتی دارایی عێراق موچەكەی لەو ژمارە حسابییەدا بۆ دابنێت.  پرۆژە یاساكە ناوی لێنراوە "دابەشكردن‌و بەحساب بانكیكردنی موچەی فەرمانبەرانی هەرێم"، لەناو ئەو پەرلەمانتارانەی كە سەرقاڵی پرۆژەكەن، بیرۆكەیەك هەیە بڕگەیەكی تر بۆ رەشنوسی پرۆژەیاساكە زیادبكرێت، بڕگەكە بریتییە لەوەی: •    فەرمانبەرانی هەرێم بژاردەیان لەبەردەمدایە‌و هەر فەرمانبەرێك ئەگەر نەیویست راستەوخۆ موچەكەی لەلایەن بەغدادەوە بدرێت، سەرپشك بكرێت لەنێوان حكومەتی هەرێم‌و حكومەتی بەغداددا یەكێكیان هەڵبژێرێت. لە چەند رۆژی داهاتوودا، دوای تەواوكردنی پرۆسەی كۆكردنەوەی ئیمزای پەرلەمانتاران، پرۆژە یاساكە لە كۆنگرەیەكی رۆژنامەوانیدا لەناو پەرلەمانی عێراقدا رادەگەیەندرێت‌و دواتر ئاڕاستەی سەرۆكایەتی پەرلەمان دەكرێت. كێ پشتیوانی پرۆژەكە دەكات ؟ (درەو) زانیویەتی، جگە لە پەرلەمانتارانی فراكسیۆنی پارتی‌و یەكێتی، زۆربەی پەرلەمانتارانی كورد لە پەرلەمانی عێراق ئیمزایان لەسەر پرۆژەیاساكە كردووە.  فراكسیۆنی پارتی بەتەواوەتی دژی پرۆژەیاساكەیە، ئەوان پەسەندكردنی پرۆژەیەكی لەمجۆرە لە پەرلەمانی عێراق وەك لێدان لە پێگەی حكومەتی هەرێمی كوردستان تەماشای دەكەن، كە حزبەیان سەرۆكایەتی ئەو حكومەتە دەكات. وا دەردەكەوێت فراكسیۆنی یەكێتی پاڵپشتی پرۆژەكە دەكەن، بەڵام بەهۆی ئەوەی لە هەرێمی كوردستان لەگەڵ پارتیدا لە حكومەت هاوبەشن، ئیمزایان لەسەر پرۆژەكە نەكردووەو ترسی كاردانەوەی پارتییان هەیە. بەڵام فراكسیۆنی گۆڕان كە بزوتنەوەكەیان هاوشێوەی یەكێتی لە هاوبەشی پارتییە لە حكومەتی هەرێمی كوردستاندا، زۆربەیان ئیمزایان لەسەر پرۆژەكە كردووە، فراكسیۆنی گۆڕان لە پەرلەمانی عێراق لە كێشەدایە لەگەڵ سەركردەكانی بزوتنەوەكەیدا، دیارە ئیمزاكەیان بە فەرمی گوزارشت لە سیاسەتی بزوتنەوەی گۆڕان ناكات، بەوپێیەی هەڵوێستی رێكخەری گشتی بزوتنەوەكەیان لەمبارەیەوە روونە‌و پێشتر لە چەند بۆنەیەكدا گوزارشتی لەوە كردووە كە ئەو ترسی لەناوچوونی قەوارەی هەرێمی كوردستانی هەیە.  ئەوانەی سەرقاڵی كۆكردنەوەی ئیمزان بۆ پرۆژە یاساكە باسلەوە دەكەن، لەناو فراكسیۆنە شیعەو سوننەكانیشدا پاڵپشتی گەورە هەیە بۆ پرۆژەكە‌و زۆرێكیان ئیمزایان لەسەر كردووە، لەناو حكومەتی عێراقیشدا چەند بەرپرسێكی باڵا پشتیوانی خۆیان راگەیاندووە، رەنگە هۆكاری ئەم پاڵپشتییە عەرەبییە لە پەرلەمان‌و حكومەت بۆ ئەوە بگەڕێتەوە بەشێك لەوانە پێیانوایە ئەو پارەیەی كە حكومەتی عێراق مانگانە بۆ فەرمانبەرانی هەرێمی دەنێرێت ناگاتە دەستی فەرمانبەران. كێ خاوەنی پرۆژەكەیە ؟ خاوەنی سەرەكی بیرۆكەی گواستنەوەی موچەی فەرمانبەرانی هەرێم بۆسەر بەغداد ئەو قەیرانە داراییە بوو كە لە كابینەی هەشتەمدا روبەڕووی حكومەتی هەرێم بووەوە، ئەوكات فەرمانبەرانی دژی دواكەوتن‌و لێبڕینی موچەكانیان رژانە سەرشەقام‌و بیرۆكەی گواستنەوەی موچەكانیان بۆسەر حكومەتی عێراق گەڵاڵەكرد. دوای گەڵاڵەبوونی بیرۆكەكە لە شەقام، فراكسیۆنی گۆڕان لە پەرلەمانی عێراق پرۆژەیەكی ئامادەكرد بۆ ئەوەی لەڕێگەی حكومەتی ناوەندی عێراقەوە لامەركەزیەتی ئیداری بۆ پارێزگای سلێمانی بچەسپێنێت. كرۆكی پرۆژەكەی فراكسیۆنی گۆڕان كە ساڵی 2016 كاری لەسەر كرد ئەوە بوو، حكومەتی ناوەندی عێراق لە یاسای بودجەدا راستەوخۆ مامەڵە لەگەڵ پارێزگاكاندا بكات، مەبەستی گۆڕان لەم پرۆژەیە ئەوە بوو شایستەی دارایی پارێزگایەكی وەكو سلێمانی راستەوخۆ رادەستی پارێزگای سلێمانی بكات نەك حكومەتی هەرێم لە هەولێر، ئەوكات پارتی، بزوتنەوەی گۆڕانی لە سەرۆكایەتی پەرلەمان‌و حكومەت وەدەرنا بوو، گۆڕان‌و پارتی پەیوەندییەكانیان تێكچوو بوو، دواكەوتن‌و پاشەكەوتكردنی موچەی فەرمانبەرانیش هەستێكی وای لەناو فەرمانبەرانی سلێمانیدا دروستكردبوو كە دەسەڵاتی هەولێر ستەمیان لێدەكات‌و خوازیارن بەغداد راستەوخۆ خۆی موچەكانیان پێبدات نەك حكومەتی هەرێم، چونكە بەغداد كێشەی موچەی نییە‌و لەوادەی خۆیدا موچە دابەش دەكات‌و موچەی فەرمانبەران نابڕێت. فراكسیۆنی گۆڕان لە پەرلەمانی عێراق ئەم پرۆژەیەی بردە بەردەم حەیدەر عەبادی سەرۆك وەزیرانی ئەوكاتی عێراق، عەبادی پرۆژەكەی رەتكردەوە، بەبەهانەی ئەوەی یاسای بودجە یاسایەكی فیدراڵییە‌و ناتوانرێت دەستكاری بكرێت، حكومەتی ئەوكات ترسی هەبوو، هاوشێوەی سلێمانی، پارێزگاكانی تری عێراق لەوانە بەسرەو ئەنبارو ناوچەكانی تریش داوای لامەركەزیەتی دارایی بكەن. لەو پرۆژەیەدا بزوتنەوەی گۆڕان خوازیاری ئەوە بوو، داهاتەكانی سلێمانی بگەڕێندرێتەوە بۆ بەغداد‌و حكومەتی ناوەندیش پشكی سلێمانی رادەستی ئەنجومەنی پارێزگا بكات، بە موچەی فەرمانبەرانیشەوە، ئەو پرۆژەیە لەبارچوو، هیچ ئاكامێكی نەبوو، هەرچەند دەوترێت نەوشیروان مستەفا رێكخەری كۆچكردووی بزوتنەوەكە ئەوكات پاڵپشتی لە پرۆژەكە كردووە‌و لەبەرامبەریشدا هەندێك لە سەركردەكانی بزوتنەوەكە لەوانە عومەر سەید عەلی كە ئێستا رێكخەری گشتی بزوتنەوەی گۆڕانە دژی پرۆژەكە بوون‌و وەكو مەترسی لەسەر قەوارەی سیاسی هەرێمی كوردستان ناویان بردووە. ئەمە هەوڵی یەكەمی گواستنەوەی موچەی فەرمانبەرانی هەرێم بوو بۆسەر بەغداد كە لەسەردەمی دواین كابینەی نێچیرڤان بارزانیدا رویدا، هەوڵی دووەم ئەم هەوڵەیە كە ئێستا لە بواری جێبەجێكردندایە. هەوڵی دووەم  كە كابینەی نۆیەمی حكومەتی هەرێم بە سەرۆكایەتی مەسرور بارزانی دەستبەكاربوو، جارێكی تر حكومەت دوچاری قەیرانی دارایی بووەوە، دابەشكردنی موچەی فەرمانبەران دواكەوت‌و چەند مانگێكە حكومەت بە لێبڕینەوە موچەی فەرمانبەران دابەش دەكات. سەرەتای قەیرانی موچە لە كابینەی مەسرور بارزانیدا لەمانگی ئایار ئەمساڵدا دەستی پێكرد، لەو مانگەدا ژمارەیەك مامۆستا‌و فەرمانبەر، بە نوێنەرایەتی موچەخۆران چونە نوسینگەی پەرلەمانی عێراق لە سلێمانی‌و داوایان لە پەرلەمانتاران كرد میكانیزمێك بدۆزنەوە بۆ ئەوەی موچەكانیان بخرێتەسەر حكومەتی ناوەندیی عێراق، چونكە وەكو خۆیان دەیانوت ئەوان متمانەیان بە حكومەتی هەرێم نییە بتوانێت موچەكانیان بۆ دابین بكات.  لە مانگی حوزەیراندا رێبوار كەریم مەحمود پەرلەمانتاری سەربە پارێزگای سلێمانی لە كۆنگرەیەكی رۆژنامەوانیدا پرۆژەیەكی راگەیاند بۆ گواستنەوەی موچەی فەرمانبەرانی هەرێم بۆسەر بەغداد، ئەمە هەوڵی دووەمی گواستنەوەی موچە بوو لەدوای هەوڵەكەی بزوتنەوەی گۆڕان لە ساڵی 2016دا. كرۆكی پرۆژەكەی رێبوار كەریم مەحمود بۆ گواستنەوەی موچەی فەرمانبەرانی هەرێم بۆسەر بەغداد بەمشێوەیە بوو:  •    حكومەتی هەرێم لیستی بایۆمەتری ناو و داتای سەرجەم موچەخۆرانی هەرێم بدات بە حكومەتی فیدراڵ كە بەپێی قسەی حكومەتی هەرێم ژمارەی موچەخۆرانی هەرێم (ملیۆنێك‌و 256 هەزارو 850) كەسە‌و حكومەتی فیدراڵ گومانی لەم ژمارەیە هەیە. •    لەڕێگەی بانكێكی حكومی عێراقەوە ئەژمارێكی بانكیی بۆ هەموو موچەخۆرانی هەرێم بكرێتەوە‌و هاوشێوەی فەرمانبەرانی عێراق كارتی زیرەك "ماستەر كارد" بۆ موچەخۆرانی هەرێم دروستبكرێت‌و بەكارهێنانی ئەو كاراتانە لەرێگەی پەنجەمۆرەوە بێت، ئەژمارەكان بەسەر دوو بەشدا دابەشبكرێت، بەشی یەكەم ئەژماری بانكیی (فەرمانبەران)ی هەرێم كە ژمارەیان (753 هەزارو 880) فەرمانبەرە، بەشی دووەمیش ئەژماری بانكیی (خانەنشین‌و چاودێری كۆمەڵایەتی‌و شەهیدو زیندانیانی سیاسی) لە هەرێم كە ژمارەیان (502 هەزارو 970) كەسە. •    حكومەتی هەرێم‌و بەغداد رێككەوتنێك بكەن، بەپێی ئەم رێككەوتنە حكومەتی هەرێم بڕی (250 هەزار) بەرمیل نەوتی رۆژانە‌و نیوەی داهاتی (5) دەروازە سنورییە سەرەكییەكەی بدات بە بەغداد، لەبەرامبەر ئەمەدا حكومەتی فیدراڵ تەنیا ئەركی پێدانی موچەی فەرمانبەرانی هەرێم بگرێتە ئەستۆ كە ژمارەیان (753 هەزارو 880) كەسە‌و راستەوخۆ لەلایەن حكومەتی هەرێمەوە موچەكانیان بۆ بخرێتەسەر ژمارە حسابییەكانیان لە بانك، بەڵام موچەی (خانەنشینی‌و چاودێری كۆمەڵایەتی‌و شەهید‌و زیندانیانی سیاسی) كە ژمارەیان (502 هەزارو 970) كەسە، هەر لەلایەن حكومەتی هەرێمەوە دابین بكرێت. •    لە بەغدادەوە چاودێری ئەژماری بانكیی هەموو موچەخۆران بكرێت‌و لەماوەی (30) رۆژدا هەر كەسێك سەردانی ئەژمارە بانكییەكەی نەكردو بە پەنجەمۆری خۆیەوە موچەكەی رانەكێشا، ژمارە بانكییەكەی بخرێتە ژێر چاودێرییەوە، لەدوای تێپەرینی (15) رۆژ بەسەر خستنەژێر چاودێری ژمارە بانكی هەر موچەخۆرێك، ئەو ئەژمارەی بە پەنجەمۆری خۆی موچەكەی رانەكێشاوە، ئەژمارەكەی رابگیرێت، بەمشێوەیە لەكۆتایدا هەموو موچەی فەرمانبەرانی هەرێم بە شارستانی‌و سەربازییەوە لەچوارچێوەی رێككەوتنێكی نوێ‌و یاسای بودجەی عێراقدا بخرێتەسەر بەغداد. رێبوار كەریم مەحمود ئەم پرۆژەیەی خستەبەردەم حكومەتی حكومەتی عێراق، حكومەتی عێراق بەفەرمی هیچ وەڵامێكی ئەو پەرلەمانتارەی نەدایەوە، بەڵام وەكو خۆی دەڵێ بە نافەرمی وەڵامی دراوەتەوە كە دەبێت ئەم بابەتە بە یاسا لە پەرلەمانی عێراقەوە پەسەندبكرێت بۆ ئەوەی حكومەت پابەند بێت بە جێبەجێكردنییەوە. ئەوەی ئێستا روودەدات لەناو پەرلەمانی عێراق‌و ئیمزای بۆ كۆدەكرێتەوە، هەمان بیرۆكەكەی پەرلەمانتار رێبوار كەریم مەحمودە، بەڵام بە رەشنوسێكی نوێوە، هەرچەندە ئەو پەرلەمانتارە خۆی دەڵێ" چیتر ئەمە وەكو پرۆژەی تایبەتی ئەو نەماوەتەوە‌و هەر پەرلەمانتارێك پاڵپشتی لێبكات دەبێت بە پرۆژەی ئەو پەرلەمانتارەش". ئاكامی هەوڵە نوێیەكە  ئەم هەوڵە نوێیەی كە بۆ گواستنەوەی موچەی فەرمانبەرانی هەرێم بۆسەر حكومەتی عێراق دەستی پێكردووە، بەپێی قسەی پەرلەمانتاران، زیاتر لە (110) پەرلەمانتاری عێراق ئیمزایان لەسەر كردووە، ئەمە لەكاتێكدایە پێشكەشكردنی پرۆژەیاسا لە پەرلەمانی عێراق تەنیا پێویستی بە واژۆی (50) پەرلەمانتار هەیە، ئەم پاڵپشتییە زۆرەی كە پەرلەمانتاری فراكسیۆنە عێراقییەكان لە پرۆژەكەی دەكەن، وایكردووە پێشبینی ئەوە بكرێت پرۆژەكە بەزۆرینەی دەنگ لە پەرلەماندا تێپەڕێندرێت. رێبوار كەریم خاوەنی پرۆژەی گواستنەوەی موچەی فەرمانبەرانی هەرێم بۆسەر بەغداد باسلەوە دەكات، سەرباری ئیمزای پەرلەمانتاران، ئیمزای زیاتر لە (150 هەزار) فەرمانبەرانی هەرێمی كوردستانیان لەبەردەستدایە كە پاڵپشتی ئەوە دەكەن موچەكانیان بخرێتەسەر حكومەتی عێراق‌و زۆرینەی ئەوانەی ئیمزاكانیان كردووە فەرمانبەرانی سنوری پارێزگای هەولێرو دهۆكن.  هەندێك لەوانەی ئیمزایان لەسەر پرۆژەیاساكە كردووە‌و (درەو) قسەی لەگەڵدا كردوون ئەم پرۆژە بە پرۆژەیەكی واقعی نازانن‌و پێیانوایە تەنیا هەوڵێكە پێناچێت بچێتە بواری جێبەجێكردنەوە، چونكە جێبەجێبوونی ئەم پرۆژەیە بەر لە هەموو شتێك پێویستی بەوەیە حكومەتی هەرێم لیستی موچەخۆرەكانی بدات بە بەغداد، بەڵام حكومەتی هەرێم ئامادە نییە لیستی موچەخۆران رادەستبكات، لە یاسای بودجەی فیدراڵی ساڵی 2019ی عێراقدا بەفەرمی‌و بەپێی یاسا داوا لە حكومەتی هەرێم كراوە لیستی موچەخۆرانی بنێرێت، بەڵام حكومەتی هەرێم نەینارد، ئەمە لەكاتێكدا بوو ئەوكات سەرۆكی لیژنەی دارایی پەرلەمانی عێراق ئەحمەد سەفاری پەرلەمانتاری پارتی بووە‌و وەزیری دارایی ئەوكاتیش فوئاد حسێن بووە كە هەر سەربە پارتی بووە، بۆیە پێناچێت بۆ داهاتووش حكومەتی هەرێم لیستی راستەقینەی ژمارەی موچەخۆرەكانی بۆ بەغداد بنێرێت، پییانوایە چارەسەری راستەقینەی موچەی فەرمانبەرانی هەرێم بەوە دەبێت موچە لە عێراق‌و هەرێمی كوردستان پێكەوە بە سیستمێكی نوێی بانكیی رێكبخرێتەوە. لەبەرامبەردا ئەوانەی بەسەرسەختی پاڵپشتی لە پرۆژەكە دەكەن‌و پێیانوایە ئومێدێكی نوێیە بۆ ئەوەی چارەسەری بنەڕەتی كێشەی موچەی فەرمانبەرانی هەرێم بكات دەڵێن، پەسەندكردنی ئەم پرۆژەیاسایە لە پەرلەمانی عێراق كۆتایی گەمەكە نییە‌و ئەوان ئەم پرۆژەیاسایە لە بودجەی 2021ی عێراقدا وەكو بڕگەیەك جێگیر دەكەن، ئەمە ئیتر حكومەتی هەرێم پابەند دەكات بەوەی ملبدات بۆ گواستنەوەی موچەی فەرمانبەرانی هەرێم بۆسەر حكومەتی ناوەند. بەگوێرەی ئەو زانیارییانەی كە (درەو) كە لە هەندێك لەو پەرلەمانتارانەوە دەستی كەوتووە كە پاڵپشتی لەم پرۆژەیە دەكەن، عەلی عەلاوی وەزیری دارایی عێراق پێی راگەیاندوون، ئەگەر بەیاسا موچەی فەرمانبەرانی هەرێم بخرێتەسەر بەغداد، ئەو ئامادەیە دوو هێندەی ئەو پارەیەی ئێستا مانگانە بە هەرێم دەدرێت كە (320 ملیار) دینارە، بۆ فەرمانبەرانی هەرێم خەرج بكات.  ئێستا لە نوسراوە فەرمییەكانی عێراقدا ژمارەی فەرمانبەرانی هەرێم (682 هەزارو 849) فەرمانبەرە، بەڵام بەگوێرەی نوسراوە فەرمییەكانی حكومەتی هەرێم ژمارەی فەرمانبەرانی هەرێم (753 هەزارو 880) فەرمانبەرە لە كۆی (ملیۆنێك‌و 256 هەزار) موچەخۆر. ئەگەر حكومەتی عێراق بەگوێرەی لیستی حكومەتی هەرێم موچەی فەرمانبەرانی هەرێم دابین بكات كە ژمارەیان زیاتر لە (753 هەزار) فەرمانبەرە، ئەوا مانگانە زیاتر لە (700 ملیار) دینار خەرجی موچەی فەرمانبەرانی هەرێم لەسەر خەرجییەكانی حكومەتی ناوەند زیاد دەكات، ئێستا حكومەتی بەغداد مانگانە (320 ملیار) دینار بۆ فەرمانبەرانی هەرێم دەنێرێت، بەڵام ئەگەر موچەی فەرمانبەرانی هەرێم بگرێتەئەستۆ، دەبێت مانگانە (380 ملیار) دیناری تر بۆ خەرجی موچەی فەرمانبەرانی هەرێم زیاد بكات. ئایا لەدۆخێكی وەكو ئێستادا كە حكومەتی مستەفا كازمی بۆ پڕكردنەوەی كورتهێنانی دارایی قەرز دەكات، ئامادەیە ئەم خەرجییە زیادەیە بخاتە سەرشانی خۆی ؟ لەكاتێكدا حكومەتی هەرێم مانگانە بە بڕێكی زۆر كەمتر لەم پارەیە قایلە‌و مانگانە تەنیا (320 ملیار)ی دەوێت بۆ پڕكردنەوەی خەرجی موچەی فەرمانبەران. لەبەرامبەردا ئایا بۆچی حكومەتی هەرێم دژی ئەوەیە موچەی فەرمانبەرانی هەرێم بچێتەسەر بەغداد ؟ بۆ حكومەتی هەرێم كە بەپلەی یەكەم پارتی سەرۆكایەتی حكومەتەكە دەكات، رادەستكردنی موچە بەواتای لێدان دێت لەسەروەریی قەوارەی فیدراڵی هەرێم لە عێراقدا، ئەگەر حكومەتی عێراق راستەوخۆ موچەی فەرمانبەرانی هەرێم دابەش بكات هیچ واتایەك بۆ حكومەتی هەرێم لەڕووی كارگێڕییەوە نامێنێتەوە. بەڵام ئایا گواستنەوەی موچەی فەرمانبەرانی هەرێم بۆسەر بەغداد لەڕووی ئابورییەوە بە زیان لەسەر حكومەتی هەرێم دەشكێتەوە یان سودمەند دەبێت لێی ؟ ئەگەر حكومەتی بەغداد مانگانە موچەی تەنیا فەرمانبەرانی هەرێم خەرج بكات بەپێی ئەو لیستەی كە لای حكومەتی هەرێم هەیە، مانگانە نزیكەی (700 ملیار) دینار خەرجی موچە لە كۆڵی حكومەتی هەرێم دەبێتەوە، كە ئەم پارەیە دوو هێندە زیاترە لەو پارەیەی كە بەغداد ئێستا مانگانە بە حكومەتی هەرێمی دەدات كە (320 ملیار)ە، لەم حاڵەتەدا حكومەتی هەرێم تەنیا خەرجی موچەی خانەنشینان‌و چاودێری كۆمەڵایەتی‌و شەهیدان لەسەر شان دەمێنێتەوە كە مانگانە نزیكەی (200 ملیار) دینارە. خۆئەگەر بەغداد بەمەرجی رادەستكردنی (250 هەزار) بەرمیل نەوتی رۆژانە‌و نیوەی داهاتی ناوخۆ ئامادەبێت موچەی فەرمانبەرانی هەرێم بدات، ئەوا دەبێت هەرێم مانگانە بەتێكڕا (150 ملیۆن) دۆلار وەكو داهاتی نەوت‌و نیوەی داهاتی ناوخۆ بۆ بەغداد بگێڕێتەوە، لەم حاڵەتەدا هێشتا حكومەتی هەرێم لەو داهاتانەی مانگانە دەستی دەكەوێت بە یارمەتییە داراییەكەی هاوپەیمانانیشەوە، مانگانە زیاتر لە (250 ملیۆن) دۆلاری بۆ دەمێنێتەوە‌و بەم پارەیە دەتوانێت موچەی خانەنشینان‌و شەهیدان‌و چاودێری كۆمەڵایەتی‌و خەرجییەكانی تریشی دابین بكات. ئەم پرۆژەیاسایە ئەگەر لە پەرلەمانی عێراق پەسەندبكرێت، پێشبینی ناكرێت بەمزوانە بخرێتە بواری جێبەجێكردنەوە، بەڵام دەبێت بە كارتێكی فشاری نوێ لەسەر حكومەتی هەرێم كە دەكرێت لە هەر كاتێكدا لەناوخۆی هەرێم یاخود لە بەغدادەوە دەستی بۆ ببرێت.

درەو: راپۆرتی: kirkuknow   "کەرکوک گەورەترین خاڵی وەرچەرخانە بەرەو توندوتیژی زیاتر..."، جۆ بایدن، سەرۆکی هەڵبژێردراوی ئەمریکا پێش یانزە ساڵ وایوت، ئەوەش دوای سەردانێكی بۆ پارێزگای كەركوك و كۆبونەوە لەگەڵ تەواوی پێكهاتەكان. لە كۆبونەوەكەدا لەسەر یەكنەگرتویی پێكهاتەكانی پارێزگاكە جۆ بایدن وتی "ئێمە عیراق جێدەهێڵین، ئەوکات ئەگەر دیکتاتۆرێک لە سەدام خراپتریش بێت هەقمان نییە، مادام پڕۆژەیەکتان نییە بۆ پێکەوەژیان". بایدن كە هەم بۆ گوێگرتن هەم بۆ ئامۆژگاری نەتەوە و ئایینە جیاوازەكان سەردانی كەركوكی كردبوو، بە نیگەرانییەوە پارێزگاكەی بەجێهێشتووە، كاتێك هەستیكردووە بۆچونی پێكهاتەكان بۆ ئایندەی پارێزگاكە لەیەكترەوە دورە. ئەو لە كۆبونەوەكەدا داوای لێكردون لەسەر "یەك بەرنامە رێكبكەون و پێكەوە شكۆمەندی بۆ خەڵكی كەركوك بگەڕێننەوە"، تا ئەویش بتوانێت لەگەڵ بەغدا بۆ ئەو مەبەستە قسە بكات. کۆبونەوەکە لە 13ی كانونی دووەمی 2009 لە فڕۆکەخانەی کەرکوک بەڕێوەچوو، کە ئەوکات بایدن سیناتۆر بوو، هاوکات پاڵێوراویش بوو بۆ جێگری سەرۆکی ئەمریکا (باراک ئۆباما)، سەردانەکە هاوكات بوو لەگەڵ مقۆمقۆی ئەنجامدانی هەڵبژاردنی ئەنجومەنی پارێزگاکانی عیراق کە 31ی هەمان مانگ بۆ بەڕێوەچونی دیاریكرابوو بە پارێزگای کەرکوکیشەوە، بەڵام ئەوكات زۆرترین ململانێی هەولێر و بەغدا لەسەر چۆنیەتی بەشداربونی كەركوك بوو لەو هەڵبژاردنە. سەردانەكە هاوكاتیش بوو لەگەڵ ناكۆكی توندی نوری مالیكی، سەرۆك وەزیرانی ئەوكاتی عیراق و مەسعود بارزانی، سەرۆكی پێشوی هەرێمی كوردستان، كە كەركوك خاڵێكی ناكۆكییەكەیان بوو. كەركوك/ 13ی كانونی دووەمی 2009/ گەیشتنی جۆ بایدن بۆ فڕۆکەخانەی کەرکوک، لای راستی وێنەكە ئەحمەد عەسكەری و محەمەد كەمال - ئەوكات ئەندامی ئەنجومەنی پارێزگای كەركوك بون-. دیارنییە کە ئایا ئەمە یەکەم سەردانی بایدن بووە بۆ کەرکوک یان نا، بەڵام ئەحمەد عەسکەری ئەندامی ئەنجومەنی هەڵوەشاوەی پارێزگای کەرکوک، کە لەو کۆبونەوەیەدا بەشداربووە، بە (كەركوك ناو)ی وت "جۆبایدن یەکێک بوو لەو سەرکردە ئەمریکییانەی دواتر زۆرترین سەردانی عیراق و کەرکوکی کردووە، خوێندنەوەیەکی وردی لەسەر رەوشی ناوچەکە هەبوو و پەیوەندی تایبەتیشی لەگەڵ کەسایەتییەکانی کورد، عەرەب و تورکمانەکاندا هەبوو". ئەحمەد عەسکەری، کە لە نزیکەوە لەگەڵ جۆ بایدندا گفتوگۆی کردبوو، وتی "بایدن و هاوەڵانی زیاتر وەکو ئامۆژگاریکار رۆڵیان گێڕاوە و باسیان لە گرنگی پێگەی جوگرافی کەرکوک کردووە، ئاماژەشیان بەوەکردووە کە حکومەتی بەعس ساڵانێکی زۆر هەوڵیداوە ئەم نەتەوانە لەیەک بکات". بایدن كە سەرەتای ئم مانگە بووە سەرۆكی نوێی ئەمریكا، لە كۆبونەوەكەی 11 ساڵ لەمەوبەر، وتویەتی "ئێمە داواکارین ئێوە بگەڕێنەوە بۆ رابردوتان کە بە ئارامی ژیاون، ئێمە دەمانەوێت ئەم شکۆمەندییە بگەڕێنینەوە بۆ خەڵکی کەركوك. دەمانەوێت ئێوە لەسەر بەرنامەیەک بۆ کەرکوک رێککەون و ئێمەش لەگەڵ حکومەتی عیراق قسە دەکەین و هاوکارتان دەبین"، ئەحمەد عەسكەری وایوت. داواکارین ئێوە بگەڕێنەوە بۆ رابردوتان کە بە ئارامی ژیاون، دەمانەوێت ئەم شکۆمەندییە بگەڕێنینەوە بۆ خەڵکی کەركوك عەبدولڕەحمان مستەفا، پارێزگاری ئەوكاتی كەركوك، راکان سەعید، جێگری پارێزگار، رێبوار تاڵەبانی جێگری سەرۆكی ئەوكاتی ئەنجومەن لە كۆبونەوەكەدا بەشداربون، لەگەڵ هەریەكە لە ئەحمەد عەسكەری و محەمەد كەمال وەكو نوێنەری كورد، عەبدوڵا سامی عاسی و جواد جەنابی وەكو نوێنەری عەرەب، تەحسین ساری کەهیە و حەسەن تۆران لە بەرەی تورکمانی و سلڤانا بویا وەکو نوێنەری كریستیانەكان. لەپاڵئەوانەشدا، جەمال تاهیر فەرماندەی ئەوكاتی پۆلیسی كەركوك و ژمارەیەك فەرماندە و لێپرسراوی تری پارێزگاكەش بەشداربون. بەپێی سەرچاوەکانی (كەركوك ناو)، ئەو بەرنامەیەی نوێنەری پێکهاتەکان لە کەرکوک پێشکەشی جۆ بایدنیان كرد، ناوەڕۆکەکانیان لەیەكەوە دوربون، كورد داوای دەكرد كەركوك بە تەواوی بخرێتە سەر هەرێمی كوردستان، عەرەب بە خاكی عیراقیان دەزانی و داوایان دەكرد هەر وەكو خۆی بمێنێتەوە، هەرچی توركمان بوو ئەوكات پێداگری دەكرد بكرێتە هەرێمێكی سەربەخۆ. "لە کۆبونەوەکەدا هەموو پێکهاتەکان بانگەشەکانی هەڵبژاردنیان بەیەکتر دەفرۆشتەوە"، ئەحمەد عەسکەری، كە ئێستا ئەندامی سەركردایەتی یەكێتییە بۆ (کەرکوک ناو) وایوت. محەمەد کەمال، ئەندامی ئەنجومەنی هەڵوەشاوەی پارێزگای کەرکوک و ئەندامی سەركردایەتی پارتی دیموكراتی كوردستان، بە (كەركوك ناو)ی وت "پێش هاتنی بایدن، دەمانزانی دێت بۆ گفتوگۆ و چارەسەر، بۆیە ئێمە وەکو لیستی برایەتی – زۆرینە كورد بون- پێشوەختە کۆبونەوەی خۆمان گرێداو نوسراوێکی رەسمیمان ئامادەکرد و پێشکەشمان کرد... کاتێک بایدن داوایکرد هەموو پێکهاتەکان پیکەوە پڕۆژەمان هەبێت. ئێمە ئامادەییمان دەربڕی، بەڵام دواتر نەكرا". كەركوك/ 13ی كانونی دووەمی 2009/ كۆبونەوەی جۆ بایدن، لەگەڵ پێكهاتەكانی كەركوك وتیشی "بایدن لە یەکنەگرتویی پێکهاتەکانی کەرکوک نیگەران بووە"، محەمەد كەمال زیاتر وتی "بایدن وتی ئێمە عیراق جێدەهێڵین، ئەوکات ئەگەر دیکتاتۆرێک لە سەدام خراپتریش بێت هەقمان نییە، مادام ئێوە پڕۆژەیەکتان نییە بۆ پێکەوەژیان". لە كۆتایی كۆبونەوەكەدا راكان سەعید، پارێزگاری كەركوك بەوەكالەت - ئەوكات جێگری پارێزگار بوو-، بە جۆ بایدنی وتووە "تۆ هەر ئەو کەسە نیت کە پڕۆژەیەکت هەیە بەناوی پڕۆژەی بایدنەوە؟". لەوەڵامدا بایدن وتویەتی "ئەوە میدیا وام پێدەڵێن، بەڵام ئەو پڕۆژەیە من خاوەنی نەماوم و بووە بە پڕۆژەیەکی ئەمریکیی و بەناوی منەوە لە ئەنجومەنی سیناتۆرەکانی ئەمریکا لەسەر رەفەکان ماوە و 75 دەنگی لە کۆی 100 دەنگ بەدەستهێناوە... ئەو پڕۆژەیە چارەسەرێکی باشبوو بۆ عیراق". محەمەد كەمال ئەو گفتوگۆیەی نێوان راكان سەعید و جۆ بایدنی بۆ (كەركوك ناو) گێڕایەوە. راكان سەعید، بە جۆ بایدنی وت تۆ هەر ئەو کەسە نیت کە پڕۆژەیەکت هەیە بەناوی پڕۆژەی بایدنەوە پڕۆژەكە خۆی لە دابەشكردنی عیراق بۆ سێ ناوچەی كوردی، شیعە و سوننە دەبینییەوە. بەپێی راپۆرتێکی رۆژنامەی (نیوۆرک تایمز)، کە لە 24ی نۆڤەمبەری 2009دا بڵاوکراوەتەوە، مەبەستی سەرەکی سەردانەکەی بایدن بۆ کەرکوک، هەوڵدان بووە بۆ چارەسەری کێشەکانی هەڵبژاردن و تێگەیشتن لە هۆکاری سەختی ململانێیەکان لەسەر ئەو پارێزگایە. لە راپۆرتەكەدا هاتووە "سەردانەكە بۆ لە نزیكەوە ئاگاداربون بووە لە رەوشی کەرکوک لە نێوان هەوڵەکانی مەسعود بارزانی، سەرۆکی پێشوی هەرێمی کوردستان لە ئەنجامدانی ریفراندۆم و لەگەڵ نوری مالیکی، سەرۆک وەزیرانی پێشوی عیراق کە دەیویست رێگری بکات". لە سەروەختی هاتنی بایدن بۆ عیراق لە ساڵی 2009، مەسعود بارزانی لەهەوڵی ئەوەدا بووە ناكۆكییەكان لەسەر هەڵبژاردنەکان بکات بە دەرفەتێک بۆ ئەنجامدانی ریفراندۆم کە کەرکوکیشی دەگرتەوە. بەڵام عەرەب لە کەرکوک بەربەستی دروستدەكرد و ناڕازی بوو، بەتایبەت لە بەكارهێنانی ئاماری دەنگدەران و دانیشتووانی كەركوك بۆ رەتکردنەوەی ئەم هەوڵانە. ئەمەش بە یەکێک لەو هۆکارانە دادەنرێت کە تیایدا بایدن سەردانی کەرکوکی کرد. هەر لە هەمان راپۆرتدا، ئاماژە بەوە کراوە کە سەردانی بایدن بۆ کەرکوک لە کاتێکدابووە کە گرژییەکانی نێوان عەرەب و کورد بە رێژەیەکی گەورە زیادیکردبوو. "هیچ نیشانەیەک لە بەرەوپێشچونی رەوشی کەرکوک نەبوو کە کوردەکان بە بەشێکی دانەبڕاو لە ناسنامەی خۆیان دەیانبینی و هاوکات ژمارەیەکی زۆری عەرەب و تورکمانیش بانگەشەی خاوەنداریان دەکرد". ڤیدیۆ: كۆبونەوەی جۆ بایدن و پێكهاتەكانی كەركوك  نیوۆرک تایمز دەنوسێت "8.5 ملیار بەرمیل نەوتی یەدەگی کەرکوکیش وایکردووە کە ئەم شارە ببێتە خەڵاتێک کە هیچ کەسێک نەیەوێت پاشگەزبێتەوە و سازشی لەسەر بكات". هەروەها بەپێی ئەو زانیارییانەی كە لەهەمان راپۆرتدا ئاماژەی پێکراوە، بەرپرسە عیراقییەکان خوازیاربون بایدن وەكو ناوبژیوان یان لایەنی سێیەم بێتەناوەوە بۆ چارەسەری کێشەکانیان، کە كەركوك خاڵی سەركی كێشەكان بوو. نوری مالیکی، سەرۆك وەزیرانی ئەوكاتی عیراق، داواکاربوو کە بایدن فشاربخاتە سەر مەسعود بارزانی، سەرۆکی ئەوكاتی هەرێمی کوردستان بۆ دواخستنی پلانی ریفراندۆم لە دەستوری هەرێمی كوردستاندا. لە 20ی هەمان مانگدا، پاش هەفتەیەک لە سەردانەکەی بۆ عیراق  و کۆبونەوەکەی لە کەرکوک، جۆ بایدن بە فەرمی وەکو جێگری سەرۆکی ئەمریکا دەستبەكاربوو. لە میدیا ئەمریکییەکان و لەناویاندا "سی ئێن ئێن"، ئاماژە بەوە کراوە کە بایدن پاش گەڕانەوەی بۆ واشنتن ترسی گەورەی هەبووە و نەیشاردۆتەوە لە زیادبونی گرژیی و ململانێیەکان لە کەرکوک، ئەوەش بەهۆی رکابەرییەکانی هەرێم و بەغدا. بایدن پاش گەڕانەوەی بۆ واشنتن ترسی گەورەی هەبووە و نەیشاردۆتەوە لە زیادبونی گرژیی و ململانێیەکان لە کەرکوک هەر بۆیە دوای سەردانەكە، پەیوەندی تەلەفۆنی لەگەڵ کریستۆڤەر هیل، باڵیۆزی ئەوکاتەی ویلایەتە یەکگرتوەکان لە عیراق و جەنەڕاڵ ئۆدرینۆ، فەرماندەی هێزەکانی ئەمریکا ئەنجامداوە. هەروەها لە پەیوەندی بەردەوامدابووە لەگەڵ مالکی و بارزانی و کەسایەتییە فەرمانڕەواکانی تر. "بایدن فشاری خستەسەر مالکی بۆ ئەوەی بەپێی پلانەکان بڕوات و سەردانی هەرێمی کوردستان بکات، هەروەها فشاریشی خستە سەر بارزانی کە ریفراندۆم دوابخات و داوای لە هەریەکێکیان كرد بوەستن لە باسکردنی یەکتر وەکو دوژمنی ئاشتی"، بەپێی نیوۆرک تایمز.  قوباد تاڵەبانی کە ئەوکات نوێنەری حکومەتی هەرێم بووە لە ئەمریکا، بە رۆژنامەی نیوۆرک تایمز دەڵێت کە ئەوکات بایدن بە بارزانی  وتووە "بێ هودەیە" ئەگەر لەم کاتەدا کورد سەربەخۆیی رابگەیەنێت. بەو هۆیەی کە توڕەیی عەرەب لە کوردەکان لە کەرکوک، دەبێتەهۆی دروستبونی توندوتیژیی و ململانێ. پاش چەند مانگێک لە سەردانەکەی بۆ كەركوك و لە 2ی حوزەیرانی 2009، بایدن لە چاوپێکەوتنێکدا لەگەڵ ئاژانسی ئەی بی سی، لە وەڵامی پرسیارێکی جۆرج ئۆپۆلۆسی رۆژنامەنوس دەڵێت "نەتەوە یەکگرتوەکان دەستیانکردووە بە پڕۆژەیەک بۆ مامەڵەکردن لەسەر ناوچەكانی جێناكۆك لە عیراق، کەرکوک دەکرێت گەورەترین خاڵی وەرچەرخان بێت بەرەو توندوتیژی زیاتر...  سەرکردەکانی عیراق خۆیان داوایان لێکردم کە قسە لەگەڵ سەرکردایەتی کوردی بکەم و پێیان بڵێم کە پەسەندكردنی دەستوورەکەیان لەلایەن پەرلەمانی کوردستانەوە زۆر هاوکاریان نابێت، هەروەها داوایانكرد رێگری بکەم لە زیادبونی ململانێیەكان". کەرکوک دەکرێت گەورەترین خاڵی وەرچەرخان بێت بەرەو توندوتیژی زیاتر... بەپێی میدیا ئەمریکییەکان، بایدن ئەوكات سەرکەوتووانە توانی بەغدا و هەرێم بگەیەنێتە رێککەوتن و لە 31ی كانونی دووەمی 2009 هەڵبژاردنی ئەنجومەنی پارێزگاكانی عیراق بەڕێوەبچێت، بەڵام كەركوك لەو هەڵبژاردنە دەركرا. دوابەدوای ئەم سەردانەی ساڵی 2009، جۆ بایدن چەند جارێکی تر سەردانی عیراقی کردەوە، بەڵام بەپێی وتەی ئەحمەد عەسکەری، هیچ پەیامێکی تایبەتی بایدنیان لە دوای سەردانی ساڵی 2009وە لەبارەی كەركوكەوە پێنەگەیشتووە. جۆ بایدن، كاندیدی دیموكراتەكان سەرەتای ئەم مانگە توانی بەسەر دۆناڵ ترەمپ-ی ركابەریدا سەربكەوێت و ببێتە 46ەمین سەرۆكی ئەمریكا. ئەحمەد عەسكەری وتی "ئومێدمان بەوە هەیە کە دەستبەکاربونی بایدن وەکو سەرۆکی ئەمریکا، هاوکاربێت لە پێشخستنی رەوشی کەرکوک و کێشەکانی نێوان بەغدا و هەرێم". "ئەوکات کە سەردانی کەرکوکی کرد تەنیا سیناتۆرێک بوو، پاشانیش بوو بە جێگری سەرۆک، رەنگە هێندە بڕیارەکانی نەڕۆیشتبێت، بەڵام ئێستا سەرۆکە، هەمومانیش دەزانین سەرۆک چ دەسەڵاتێکی هەیە. لەوانەیە بتوانێت هەندێك کێشە چارەسەر بکات"، عەسكەری وایوت.

 راپۆرت: محەمەد رەئوف- فازل حەمەڕەفعەت دوای (7 ساڵ) لە ئیمزاكردنی هێشتا پەرلەمانی كوردستان‌و رایگشتی هەرێم بەدوای ناوەڕۆكی رێككەوتنی پەنجا ساڵەی نێوان نێچیرڤان بارزانی‌و ئەردۆغاندا وێڵن، ئەم رێككەوتنە تەنیا بۆ كورد ناڕوون نییە، لە توركیاش وەكو چەنگیز چاندار دەڵێ:" تەنیا نەفەرو نیوێك" دەیزانن، ئەم راپۆرتە هەوڵێكە بۆ گەڕان بەدوای ناوەڕۆكی ئەو رێككەوتنەدا كە جگە لە پارتی‌و نەوەی نوێ، پەرلەمانتارانی كوردستان لە فراكسیۆنە جیاوازەكان داوای ئاشكراكردنی دەكەن. رێككەوتنەكە لە كۆبونەوەی سێ سەرۆكایەتییەكەدا بەرەبەیانی رۆژی 12ی ئەم مانگە كاتێك خەڵكی عێراق‌و هەرێمی كوردستان لەخەودابوون، پەرلەمانی عێراق یاسای پڕكردنەوەی كورتهێنانی دارایی پەسەندكرد كە هەندێك كەس بە یاسای "قەرزكردن" ناوی دەبەن. لەم یاسایەدا بڕگەیەك بەزۆرینەی دەنگی پەرلەمانتارانی شیعە‌و سوننە تێپەڕێندرا كە هەرێمی كوردستان ناچار دەكات بەشێك لە نەوتەكەی رادەستی حكومەتی ناوەندی بكات لەبەرامبەر وەرگرتنی پشكی خۆی لە داهاتەكانی عێراق. سێ رۆژ دوای تێپەڕاندنی یاساكەی پەرلەمانی عێراق، سێ سەرۆكایەتییەكەی هەرێمی كوردستان (سەرۆكایەتی پەرلەمان، سەرۆكایەتی هەرێم، سەرۆكایەتی حكومەت) كۆبونەوە، ئەم كۆبونەوە بۆ ئەوە بوو هەرێمی كوردستان بزانێت چۆن لەگەڵ ئەو یاسایەدا مامەڵە بكات، ئایا ئەگەر هەرێم بەپێی یاساكە بەشێك لە نەوتەكەی رادەست نەكات، حكومەتی كازمی چیتر (320 ملیار) دینارەكەی موچەی فەرمانبەرانی هەرێم نانێرێت ؟ بەپێی ئەو زانیارییانەی كە لە چەند سەرچاوەیەكی بەشدار لەو كۆبونەوەیە دەست (درەو) كەوتووە، بەشداربووانی كۆبونەوەكە بە ئەرێنی تەماشای یاساكەیان كردووە‌و پێیانوا بووە یاساكە هێشتا دەرفەتی ئەوەی تێیدایە حكومەتی هەرێم‌و بەغداد بگەنە رێككەوتن‌و موچەی فەرمانبەرانی هەرێم جارێكی تر زیانی بەرنەكەوێت.  پرسیارێكی گرنگی ناو كۆبونەوەكە لەبارەی پرسی نەوتەوە لە هەرێمی كوردستان، رێواز فایەق سەرۆكی پەرلەمانی كوردستان وروژاندی، رێواز رووی لە نێچیرڤان بارزانی سەرۆكی هەرێم كرد‌و پرسیاری لێكرد لەبارەی ئەوەی ئایا "رێككەوتنی پەنجاساڵەی بواری وزە لەنێوان هەرێمی كوردستان‌و توركیا نابێتە رێگر لەبەردەم ئەوەی هەرێمی كوردستان بەشێك لە نەوتەكەی رادەستی حكومەتی ناوەندی بكات ؟". "دڵنیاتام دەكەمەوە رێككەوتنە پەنجا ساڵییەكە بەهیچ شێوەیەك رێگر نییە لەبەردەم ئەوەی هەرێم نەوت رادەستی بەغداد بكات" نێچیرڤان بارزانی كە خۆی ئەندازیاری ئیمزاكردنی رێككەوتنە پەنجا ساڵییەكەی نێوان هەرێم‌و توركیایە بەمشێوەیە وەڵامی رێواز فایەقی داوەتەوە. پرسیاری رێواز فایەق لەبارەی رێككەوتنە پەنجا ساڵییەكە ئەم رۆژانە یەكێكە لە پرسیارە سەرەكییەكانی حزبەكەی (یەكێتی نیشتمانی)، سەركردەكانی یەكێتی دەڵێن ئاگاداری وردەكاری ئەو رێككەوتنە نین، دەیانەوێت بەم قسەیە پارتی دیموكراتی كوردستان تۆمەتبار بكەن بەوەی لەناو حكومەتدا لەگەڵ یەكێتی شەفاف نییە‌و زانیاری دەشارێتەوە. رێككەوتنی پەنجا ساڵە تەنیا لە یەكێتی شاراوە نییە، پارتە سیاسییەكانی تری هەرێمی كوردستانیش شتێكی ئەوتۆی لەبارەوە نازانن، دەقی ئەو رێككەوتنە هێشتا روناكی نەبینیوە. لەبارەی رێككەوتنی پەنجا ساڵەوە ئەم رێككەوتنە لە ساڵی 2013 لە ئەنكەرە لەنێوان نێچیرڤان بارزانی سەرۆك وەزیرانی پێشووی هەرێمی كوردستان‌و رەجەب تەیب ئەردۆغان سەرۆك وەزیرانی پێشووی توركیا‌و سەرۆكی ئێستا توركیا ئیمزا كراوە، ئاشتی هەورامی وەزیری پێشووی سامانە سروشتییەكان‌و یاریدەدەری ئێستا مەسرور بارزانی سەرۆكی حكومەتی هەرێم ئامادەی ساتی ئیمزاكردنی رێككەوتنەكە بووە. دوای ئیمزاكردنی رێككەوتنەكە، جگە لە نێچیرڤان بارزانی‌و ئاشتی هەورامی كەس وردەكاری رێككەوتنەكە نازانێت، ئەم رێككەوتنە تا ئەم ساتە نەخراوەتە بەردەم پەرلەمانی كوردستان‌و رایگشتی، تەنانەت یەكێتی نیشتمانی كە ساڵی 2013 هاوبەشی سەرەكی پارتی بووە لە حكومەت ئاگاداری وردەكاری رێككەوتنەكە نییە، ساڵی 2013 كە ئەم رێككەوتنە ئیمزا كرا، عیماد ئەحمەد لە پشكی یەكێتی جێگری سەرۆك وەزیران بوو، ئەوكات چەند بەرپرسێكی باڵای یەكێتی رایانگەیاند حزبەكەیان ئاگاداری ئەو رێككەوتنە نییە. دوای (7 ساڵ) لە ئیمزاكردنی ئەو رێككەوتنە، ئێستا جارێكی تر قسەوباس لەبارەی كرۆكی رێككەوتنەكە هاتوەتە ئاراوە، دوێنێ (32) پەرلەمانتاری كوردستان لە هەموو فراكسیۆنەكان جگە لە فراكسیۆنی پارتی‌و نەوەی نوێ، ئیمزایان لەسەر نوسراوێك كرد‌و ئاڕاستەی دەستەی سەرۆكایەتی پەرلەمانیان كرد، لە نوسراوەكەیاندا داوا دەكەن لایەنی پەیوەندیدار لە حكومەتی هەرێم بێتە بەردەم پەرلەمان‌و لەبارەی رێككەوتنە پەنجا ساڵییەكەی توركیا زانیاری بە پەرلەمان بدات. بەگوێرەی بەدواداچونەكانی (درەو)، لە خولی پێشووی پەرلەمانی كوردستاندا جارێك نێچیرڤان بارزانی كە ئەوكات سەرۆكی حكومەت بووە، بەڵێنی بە سەرۆكایەتی پەرلەمان داوە لە كۆبونەوەیەكدا لەگەڵ سەرۆكی فراكسیۆنەكان باسی ناوەڕۆكی رێككەوتنی پەنجا ساڵەی نێوان هەرێم‌و توركیا بكات، بەڵام رووداوی داخستنی پەرلەمانی كوردستان، ئەو نهێنیەشی تاوەكو ئەمڕۆ لەگەڵ خۆیدا ون كرد. چی لەبارەی رێككەوتنەكەوە دەزانرێت ؟ رێككەوتنی نەوتیی بۆ 25 یان 50 ساڵ دەكرێت، چونكە ئەمانە پرۆژەی دورمەودان، ئەوەی نێچیرڤان بارزانی لەگەڵ ئەردۆغان كردویەتی بۆ (50 ساڵە)‌و جگە لە رەهەندە ئابورییەكەی، رەهەندی سیاسی گەورەی هەیە. بەپێی ئەو زانیارییانەی كە لە چەند سەرچاوەیەكی ئاگادارەوە دەست (درەو) كەوتوون، ئەوەی تائێستا لەبارەی ناوەڕۆكی رێككەوتنەكەوە دەزانرێت، بەمشێوەیەیە: •    ئەولەویەتی نەوتی هەرێم دەدرێت بە كۆمپانیا توركییەكان كە لە هەرێمی كوردستان كاردەكەن. •    تا پەنجا ساڵی تر هەر بەرمیلێك نەوتی هەرێم بڕی (1) دۆلاری بۆ توركیا دەبێت. •    پارەی نەوتی هەرێمی كوردستان لە (هاڵك بانك)ی توركیا دادەنرێت‌و ئاڵۆگۆڕی پێوە دەكرێت. •    بۆری نەوتی هەرێم لەلایەن توركیاوە پاسەوانی دەكرێت‌و كرێی پاسەوانی لە پارەی نەوتی هەرێم دەدرێت. •    (7) خەزانی گەورەی نەوت لە بەندەری جەیهانی توركی بە كرێ دەدرێت بە حكومەتی هەرێم‌و دەبێت لە پارەی نەوتی هەرێم كرێكەی بدرێت. •    هەندێك سەرچاوەی تر هەن باسلەوە دەكەن رێككەوتنەكە هەرێم ناچار دەكات ئەگەر لە داهاتوودا غازی سروشتی هەناردەی دەرەوەی كرد، ئەو كارە بەتەنیا لەڕێگەی توركیاوە بكات، توركیا ئێستا غاز لە روسیا دەكڕێت، نرخی غازەكەی روسیا بۆ توركیا زۆرەو دەسەڵاتدارانی ئەنكەرە بەدوای سەرچاوەی تردا دەگەڕێت جگە لە روسیا، بەڵام ئەم زانیارییە لەلایەن هەندێك لە سەرچاوەكانی ترەوە رەتدەكرێتەوە‌و باسلەوە دەكرێت رێككەوتنەكە تەنیا بۆ نەوتە. •    لەڕووی ئەمنییەوە دەوترێت رێككەوتنەكە چوارچێوەی داناوە بۆ پەیوەندییەكانی هەرێمی كوردستان لەگەڵ رۆژئاوای كوردستان‌و پارتی كرێكارانی كوردستان (پەكەكە). •    ئەوانەی رەخنەیان لە رێككەوتنەكە هەیە دەڵێن رەهەندی سیاسی ئەم رێككەوتنە پەنجا ساڵییە، بۆ پاراستنی دەسەڵاتی پارتی دیموكراتی كوردستان‌و درێژەدانە بە حوكمڕانی سەركردەكانی لە هەرێمی كوردستان بە پاڵپشتی ئەنكەرە. •    زانیاری نافەرمی هەیە لەبارەی ئەوەی خێزانی ئەردۆغان سودمەندی یەكەمن لە داهاتەكانی ئەم رێككەوتنە لە توركیا. نەفەرو نیوەكەی جەنگیز چاندار لە پرۆسەی بەدواداچونمان بۆ كۆكردنەوەی زانیاری لەبارەی رێككەوتنی پەنجا ساڵەی نێوان هەرێم‌و توركیا، بەرپرسێكی باڵای هەرێمی كوردستان پێی وتین، كرۆكی ئەو رێككەوتنە نەك بۆ ناوخۆی هەرێمی كوردستان، لەناوخۆی توركیاش بابەتێكی شاراوەیە‌و كەس ئاگاداری نییە. وەكو خۆی باسی كرد، ئەو بەرپرسە جارێك لەگەڵ (جەنگیز چاندار) گەورە نوسەرو رۆژنامەنوسی توركیا باسی ئەم بابەتەی كردووە‌و لە چانداری پرسیوە ئایا ئێوە لە توركیا هیچ لەبارەی رێككەوتنی پەنجا ساڵییەوە دەزانن، چاندار وتویەتی:" لە توركیا تەنیا نەفەرو نیوێك ناوەڕۆكی ئەو رێككەوتنە دەزانن، یەكەمیان ئەردۆغانە‌و نیو نەفەرەكەش تەنەر یەڵدز وەزیری پێشووی وزەی توركیایە". هەمان گوزارشتی جەنگیز چاندار بە كەمێك دەستكارییەوە بۆ هەرێمی كوردستانیش راستە، ئەوە زانیاری تەواوەتی لەبەردەستدایە نێچیرڤان بارزانییە، ئاشتی هەورامیش وەكو نیو نەفەرەكەی توركیا هەندێك سەرەداوی رێككەوتنەكە دەزانێت، بەڵام پێناچێت نێچیرڤان بارزانی وەكو ئەوەی وردەكاری رێككەوتنەكەی لە پەرلەمان شاردووەتەوە، لە مەسعود بارزانی مامی شاردبێتەوە. پشكی توركیا لە نەوتی هەرێم      ساڵی رابردوو، داهاتی نەوتی هەرێمی كوردستان (8 ملیار و 438 ملیۆن) دۆلاربووە، لەم پارەیە (ملیارێك‌و 104 ملیۆن) دۆلاری بۆ توركیا چووە‌و تەنیا (2 ملیارو 647 ملیۆن) دۆلاری گەڕاوەتەوە بۆ وەزارەتی دارایی هەرێم كە موچەی مانگانەی موچەخۆرانی پێ دابینكراوە.  واتە ساڵانە رێژەی (70%)ی داهاتی نەوتی هەرێم بۆ خەرجی‌و قەرزی كۆمپانیاكان دەچێت‌و تەنیا (30%)ی بۆ خەزێنەی حكومەتی هەرێم دەگەڕێتەوە. بەگوێرەی راپۆرتی كۆمپانیای "دیلۆیت" بۆ وردبینی بەرهەمهێنان‌و هەناردەكردن‌و داهات‌و خەرجی نەوتی هەرێمی كوردستان، لە ساڵی 2019دا: •    لە كۆی (8 ملیارو 438 ملیۆن) دۆلاری داهاتی نەوتی هەرێم (5 ملیارو 791 ملیۆن) دۆلاری بۆ قەرزو خەرجی كۆمپانیاكان چوەو تەنیا (2 ملیارو 647 ملیۆن) دۆلاری بۆ خەزێنەی حكومەتی هەرێم گەڕاوەتەوە. •    (610 ملیۆن) دۆلاری داهاتی نەوتی هەرێم بۆ دانەوەی قەرزی كۆمپانیای نێودەوڵەتی نەوتی توركیا بووە. •    (494 ملیۆن) دۆلاری بۆ كۆمپانیای وزەی توركی بووە بۆ كرێی بۆری. هەرێمی كوردستان لەسەر كەناراوەكان نییە‌و ناتوانێت راستەوخۆ نەوتەكەی بگەیەنێتە دەستی كڕیارەكان، ناچارە لەڕێگەی عێراق یان توركیا یاخود ئێرانەوە هەناردەی دەرەوە بكات، حكومەتی هەرێم توركیا بۆ ئەم كارە هەڵبژاردووە، توركیا هاوسنورە لەگەڵ ناوچەكانی ژێر دەسەڵاتی پارتیدا، حكومەتی هەرێم لەم ناوچەیە بۆری نەوتی دروستكردووە تاوەكو سەر سنوری توركیا، ئەم بۆرییە كە دەكەوێتە ناو خاكی هەرێمی كوردستان رێژەی (40%)ی موڵكی كۆمپانیای (كار)ەو رێژەی (60%)ی موڵكی كۆمپانیای رۆزنەفتی روسییە، حكومەتی هەرێم ساڵانە بۆ گواستنەوەی نەوت بە بۆرییەكەی كۆمپانیای كارو رۆزنەفت، بڕی (644 ملیۆن) دۆلار بەو دوو كۆمپانیایە دەدات، لەبەرامبەر گواستنەوەی نەوتی هەرێمی بەبۆری خۆیدا لەسەر سنوری هەرێمەوە بۆ بەندەری جەیهان، توركیا ساڵانە بڕی (494 ملیۆن) دۆلار لە حكومەتی هەرێم وەردەگرێت، واتا كرێی گواستنەوەی نەوتی هەرێم بە بۆرییەكەی ناوخۆ زیاتری تێدەچێت لە بۆرییەكەی توركیا. بۆری نەوتی كوردستان بۆ توركیا ساڵی 2013 دروستكراوە، بەر لە دروستكردنی ئەم بۆرییە نەوتی هەرێم بە تانكەر دەگواسترایەوە بۆ ئێران‌و توركیا، هەوڵ هەبوو بۆ ئەوەی هەرێم بەبۆری نەوتی خۆی بۆ ئێران بگوازرێتەوە، بەڵام سزا ئابورییەكانی ئەمریكا بۆسەر ئێران ئەم هەوڵەی لەباربرد، بۆیە ئێستا نەوتی هەرێمی كوردستان لە چنگی توركیادایە. تەنیا ساڵی رابردوو، كۆمپانیای وزەی توركی (Turkish Energy Company) بۆ گواستنەوەی یەك بەرمیل نەوت بڕی (3.117) دۆلاری لە داهاتی نەوتی هەرێم وەرگرتووە، بەتێكڕا ساڵی رابردوو ئەم كۆمپانیا توركییە بڕی زیاتر لە (494 ملیۆن) دۆلاری لە حكومەتی هەرێم دەستكەوتووە. سەرباری ئەمە، تەنیا ساڵی رابردوو حكومەتی هەرێم بڕی (610 ملیۆن) دۆلار قەرزی بۆ دوو كۆمپانیای توركی گەڕاندوەتەوە كە بریتین لە كۆمپانیاكانی: •    كۆمپانیای وزەی توركی •    كۆمپانیای نەوتی نێودەوڵەتیی توركیا ئەمە ئەو پارانەیە كە كابینەی هەشتەمی حكومەتی هەرێمی كوردستان لەسەردەمی قەیرانی دارایدا بۆ دابینكردنی موچەی فەرمانبەران لەو دوو كۆمپانیا توركییە قەرزی كردووە‌و بەپێی لیستێكی فەرمی كە لەبەردەستی (درەو)دایە، كۆی قەرزی دەرەی حكومەتی هەرێم كە زۆربەی هی توركیایە بڕكەی (4 ملیارو 288 ملیۆن) دۆلارە، ئەمە لەكاتێكدایە مانگانە رێژەی 16%ی كۆی گشتی داهاتی نەوتی هەرێم بۆ پێدانەوەی ئەو قەرزانە رۆیشتووە. كۆمپانیای وزەی توركیا بەدوو شێوەی جیاواز سودمەند بووە لە داهاتی نەوتی هەرێم، یەكێكیان پارەی بۆری گواستنەوەی نەوتی هەرێمەو ئەوی تر پارەی قەرزە كە بە حكومەتی هەرێمی داوە‌و مانگانە لێی وەردەگرێتەوە. نەوتی هەرێم لەنێوان بەغداد‌و ئەنكەرەدا ئەو داهاتە زۆرەی كە توركیا ساڵانە لە نەوتی هەرێمی دەستی دەكەوێت وایكردووە زۆر كەس گومانی ئەوە بكەن نەوتی هەرێم بووە بە بارمتەی توركیا‌و رادەستكردنی بە حكومەتی عێراق لە ئایندەیەكی نزیكدا كارێكی ئەستەمە. بەڵام بەرپرسانی حكومەتی هەرێم باسلەوە دەكەن ئەوان ئامادەن دۆسیەی نەوت بە تەواوەتی رادەستی حكومەتی عێراق بكەن، بەمەرجێك حكومەتی عێراق خۆی دۆسیەی قەرزی كۆمپانیاكان یەكلابكاتەوە‌و خەرجییەكەی لەسەر شانی حكومەتی هەرێم نەبێت.  بەگوێرەی زانیارییەكانی (درەو)، لە كۆبونەوەكەی رۆژی 15ی ئەم مانگەی سێ سەرۆكایەتییەكەی هەرێمدا، بەرپرسانی حكومەتی هەرێم ئامادەییان دەربڕیوە هەموو داهاتی نەوتی هەرێم رادەستی بەغداد بكەن لەبەرامبەر ئەوەدا بەغداد بەشە بودجەی هەرێم بەبێ لێبڕین بنێرێت كە مانگانە بڕەكەی دەگاتە (900 ملیار) دینار، مەبەستی بەرپرسانی حكومەت لە رادەستكردنی داهاتی نەوت، ئەو داهاتەیە كە دوای لێدەركردنی كرێی بەرهەمهێنان‌و گواستنەوەی نەوت‌و قەرزی كۆمپانیاكان بۆ وەزارەتی دارایی حكومەت دەمێنێتەوە، كە بڕەكەی ئێستا (270 ملیار) دینارە، واتە حكومەتی هەرێم ناتوانێت دەستبەرداری گەڕاندنەوەی پارەی قەرزەكانی توركیا ببێت‌و دەیەوێت لە حكومەتی عێراق زامنی گەڕاندنەوەی ئەو پارانە بكات. بە كورتی حكومەتی هەرێم دەیەوێت مانگانە بڕی (270 ملیار) دینار بۆ بەغداد وەكو داهاتی ناوخۆ بگەڕێنێتەوە‌و لەبەرامبەردا بڕی (900 ملیار) دینار وەربگرێَت، ئەمە پێشنیازێكە كە قبوڵكردنی لەلایەن حكومەتی مستەفا كازمییەوە لەئێستادا كارێكی ئەستەمە، بەتایبەت كە كابینەی مستەفا كازمی بەدەست قەیرانی داراییەوە دەناڵێنێت‌و بۆ پڕكردنەوەی كورتهێنانی دارایی پەنای بۆ وەرگرتنی قەرزی ناوخۆیی‌و دەرەكی بردووە، بۆیە پێشبینی دەكرێت حكومەتی كازمی تاوەكو پەسەندكردنی بودجەی 2021 بەردەوام مانگانە بڕی (320 ملیار) دینار وەكو موچەی فەرمانبەران بۆ هەرێمی كوردستان بنێرێت، بەڵام بەمزوانە حكومەتی هەرێم جارێكی تر توشی هەمان كێشە دەبێتەوە كاتێك بودجەی 2021 دەگاتە پەرلەمانی عێراق.  لەبارەی كێشەی نەوتی هەرێمی كوردستانەوە، توركیا چاوی لە ئیمزاكردنی رێككەوتنێكی نوێیە لەگەڵ حكومەتی عێراق، ئامادەیە لەچوارچێوەی ئەو رێككەوتنەدا كۆتایی بە مامەڵەی خۆی لەگەڵ هەرێمی كوردستان بهێنێت. حكومەتی عێراق لەسەردەمی حەیدەر عەبادیدا لەسەر كەیسی فرۆشتنی نەوتی هەرێمی كوردستان بەبێ رەزامەندی بەغداد، لە دادگای نێودەوڵەتی لە پاریس سكاڵای لەسەر توركیا تۆماركردووە، داوای (26 ملیار) دۆلار قەرەبوو لە توركیا دەكات، دۆسیەكە لە دادگا لە یەكلایبوونەوەی نزیكبوەتەوە، عادل عەبدولمەهدی كە پۆستی سەرۆك وەزیرانی عێراقی وەرگرت، بڕیاری دادگای پاریسی راگرت‌و دەرفەتێكی نوێی دا بە توركیا‌و هەرێمی كوردستان، بەڵام كەیسەكە دانەخراوە‌و هەڕەشەیە لەسەر توركیا، بەرپرسانی توركیا دەیانەوێت هەر بڕیارێك لەسەر نەوتی هەرێمی كوردستان ببەستنەوە بە چارەسەری ئەو كەیسەوە لەگەڵ عێراق، توركیا دەیەوێت لەبەرامبەر رادەستكردنی نەوتی هەرێمی كوردستان بە بەغداد، حكومەتی عێراق لەچوارچێوەی رێككەوتنێكی نوێدا سكاڵاكەی لە دادگای نێودەوڵەتی لە پاریس لەسەر توركیا بكێشێتەوە‌و رێككەوتنێكی فراوانتر لەنێوان هەردوولا بكرێت كە كەیسی پارتی كرێكارانی كوردستان (پەكەكە)‌و چەندین دۆسیەی تر نێوان هەردوو وڵات لەخۆی بگرێت.        

(درەو):  ماوەیەكە قاچاخچێتی لەنێوان سنوری ئیدارەی هەرێمی كوردستان‌و حكومەتی عێراق لە نزیك قەزای كفری سەربە ئیدارەی گەرمیان، سەریهەڵداوەتەوە. سەرچاوەیەكی ئاگادار لە گەرمیان بە (درەو)ی راگەیاند، كۆمەڵێك چەكدار كە هەندێكیان پلەی سەربازییان هەیە، ماوەیەكە لە گوندی (حەمكوڵ) لەودیو قەزای كفری، لەبەرامبەر بڕی (75 هەزار) دینار، ئۆتۆمبیلە بارهەڵگرەكان لە سنوری هەرێمەوە دەپەڕێننەوە بۆ ناو سنوری ئیداریی حكومەتی عێراق. ئەم جموجوڵە نوێیە دوای ئەوەدێت ماوەیەكە حكومەتی عێراق لە بازگەی "كارێز" لە نزیك كفری رێگری لە هاتوچۆی ئۆتۆمبیلە بارهەڵگرەكان دەكات كە لە هەرێمی كوردستانەوە دەڕۆن.  بەگوێرەی زانیارییەكانی (درەو)، چەند شەوێك لەمەوبەر، هێزێكی ئاسایش چونەتە گوندی حەمكوڵ بەمەبەستی كۆنترۆڵكردنی ئەو چەكدارانە، هێزەكە تا كاتژمێر (2)ی شەو لەناوچەكە بووە‌و چەكدارەكانی نەبینیوە، بەڵام هەر كە هێزەكەی ئاسایش ناوچەكەیان چۆڵكردووە، چەكدارەكان سەرلەنوێ گەڕاونەتەوە.  ئەو بارانەی كە لە هەرێمی كوردستانەوە رەوانەی ناوچەكانی عێراق دەكرێت زۆربەی بریتین لە كەلوپەلی بیناسازی، حكومەتی عێراق رێگری لە رۆیشتنی ئەو بارانە دەكات، چەكدارەكان بەرێگەی قاچاخ، ئەو بارانەی بە پشتی بارزگەكەی حكومەتی عێراقدا دەرباز دەكەن.   

درەو:  ئامادەکردن و وەرگێڕان: هێمن محمد قادر- گۆڤاری ئاییندە ناسی   بەرایی لەم توێژینەوەیەدا هەوڵ دراوە كە کار بۆ ڕوونکردنەوە و هەڵسەنگاندنی سیاسەتی دەرەوەی تورکیا و ئایندەی پەیوەندییەکانی لە ڕۆژهەڵاتی دەریای ناوەڕاست بکرێت. چوارچێوەی گشتیی ئەم توێژینەوەیە، کارکردنە لەسەر سیاسەتی دەرەوەی تورکیا لەسەر ئاستەكانی ئاسایش، ئابووری، پەیوەندیی مێژوویی و کولتووری لە ڕۆژهەڵاتی دەریای ناوەڕاست. گرنگیی هەڵکەوتە و پێگەی جوگرافیی ناوچەکانی ڕۆژهەڵاتی دەریای ناوەڕاست لە ڕووی جیوپۆلەتیك و جیۆستراتیژییەوە، بەتایبەتی بە هۆی بەردەوامیی ڕکابەری و گرژی و ئاڵۆزییەکانی کێشەی قوبرس، سووریا، لیبیا و ئیسرائیل/فەڵەستین، دەوڵەمەندیی ناوچەکە بە سەرچاوەکانی وزەی وەک نەوت و غازی سروشتی و کاریگەریی لەسەر ئاسایش و ئابووریی تورکیا، وای کردووە حکومەتی ئەنقەرە لە ئەجێنداکانی سیاسەتی دەرەوەیدا گرنگی و بایەخێکی ئێجگار زۆر بەم ناوچەیە بدات. بەردەوامیی جموجووڵ و چالاکییەکانی تورکیا بۆ پاراستنی بەرژەوەندییەکانی و کارکردن بۆ چەسپاندنی هێز و دەسەڵاتی خۆی لە ڕۆژهەڵاتی دەریای ناوەڕاست، چ لە ڕووی دەستتێوەردان لە کاروباری نێوخۆی دەوڵەتانی ناوچەکە وەک ئەنجامدانی لەشکرکێشیی سەربازی بۆ سەر خاکی سووریا، ناردنی هێزی سەربازی بۆ لیبیا، چ لە ڕووی بەردەوامیدان بە کاری هەڵکەندن و گەڕان بەدوای سەرچاوەکانی وزەدا لە ئاوەکانی ڕۆژهەڵاتی دەریای ناوەڕاستدا، بووەتە هۆی ئەوەی ئەم وڵاتە لەسەر ئاستی هەرێمی نێودەوڵەتی لە ئێستا و ئایندەدا ڕووبەڕووی ڕەخنەی توند و چەندین گرفت و ئالنگاری ببێتەوە. زەمینە زۆرێک لە توێژەران کۆکن لەسەر پرسی دیاریکردنی سنوورەکانی ڕۆژهەڵاتی دەریای سپیی ناوەڕاست. گرنگترین ئەو دەوڵەتانەی کە دەکەونە ئەم ناوچەیە، بریتین لە ئەلبانیا، چیای ڕەش (قەرەداغ)، یۆنان، لیبیا، ئیسرائیل، میسڕ، تورکیا، بۆسنە، سووریا، فەڵەستین و تونس. سەرباری ئەوەی دەریای سپیی ناوەڕاست تەنیا لە ١%-ی کۆی ڕووبەرە ئاوییەکانی جیهان پێک دەهێنێت، بەڵام لەگەڵ ئەوەشدا بە هۆی هەڵکەوتەی جوگرافی و پێگە ستراتیژییەکەیەوە، نزیکەی یەک لەسەر سێی کۆی کەشتییە بارهەڵگرەکانی جیهان لە گواستنەوەی وزە و کاڵادا بەم دەریایەدا تێدەپەڕن. لە پڕۆسەی ئاڵوگۆڕی بازرگانی لەنێوان وڵاتانی هەناردەکاری وزە و وڵاتە بەرهەمهێن و پێشکەوتووەکانی جیهاندا کە بۆ پڕکردنەوەی پێداویستییەکانیان پشت بە وزەی دەوڵەتانی ئەم ناوچەیە دەبەستن، دەستبەرداربوون لەم ڕێگایە، چ لە ئێستادا و چ لە ئایندەدا کارێکی ئاستەم و نەکردەیە. لە لایەکی دیکەوە گرنگیی جیۆستراتیژیی ڕۆژهەڵاتی دەریای ناوەڕاست وەک پردێک لە پێکەوەبەستنی ڕۆژهەڵاتی ناوەڕاست و کیشوەری ئەورووپا بە درێژایی چەندین سەدە لە بواری ئاڵوگۆڕی بازرگانی، گەشەسەندن و پێشکەوتنی تەکنیکەکانی گەڕان و پشکنین بەدوای سەرچاوەکانی وزەدا و دۆزینەوەی چەندین کێڵگەی دەوڵەمەند بە نەوت و غازی سروشتی لە ڕۆژهەڵاتی دەریای ناوەڕاست لە سەرەتای ئەم سەدەیەدا، وای کردووە ئەم ناوچەیە بەبەردەوامی ببێتە جێگەی گرنگیپێدان و ململانێی هێزە هەرێمی و نێودەوڵەتییەکان.(1) لەگەڵ گەشەسەندنی گرنگیپێدانی زیاتر بەم ناوچەیە لەلایەن هێزە هەرێمی و نێودەوڵەتییەکانەوە، لە ئێستادا تورکیاش وەک دەوڵەتێکی هەرێمیی بەهێز؛ گرنگیی زیاتر بەم ناوچەیە دەدات. دەکرێت لێرەدا ئاماژە بۆ چەند فاکتەرێکی جیاواز بکرێت کە کاریگەریی ڕاستەخۆیان لەسەر ئایندەی ئاڕاستەی سیاسەتی دەرەوەی تورکیا لە ڕۆژهەڵاتی دەریای ناوەڕاست هەیە. هۆکاری سەرەکیی گرنگیپێدانی زیاتری تورکیا بەم ناوچەیە لە ئێستادا، زیاتر بۆ لایەنی ئەمنی و ئابووری دەگەڕێتەوە. فاکتەرێكی تر کە پاڵ بە تورکیاوە دەنێت تا گرنگیی زیاتر بەم ناوچەیە بدات، بریتییە لە ناسەقامگیریی بارودۆخی ناوچەکە و بەردەوامیی ڕکابەری و ململانێ و پێکدادانەکانی( لیبیا، سووریا، ئیسرائیل/فەڵەستین، کێشەی قوبرس) و گرژی و ئاڵۆزییەکانی ئەم دواییەی میسڕ و لوبنان و کاریگەریی بۆ سەر ئاسایش و ئابووریی تورکیا لە ئایندەدا. لە لایەکی دیکەوە پێویستە ئەوە لەبیر نەکەین کە سیاسەتی هێزە نێودەوڵەتییەکانی وەک ئەمەریکا، ڕووسیا و یەکێتیی ئەورووپا لە ڕۆژهەڵاتی دەریای ناوەڕاست، بە شێوەیەکی ڕاستەوخۆ یاخود ناڕاستەوخۆ کاریگەرییان بۆ سەر ئایندەی سیاسەت و پەیوەندییەکانی تورکیا هەیە لە ناوچەکەدا. لەم ڕوانگەیەوە پێویستە تورکیا لە داڕشتن و دیاریکردنی ئایندەی ئاڕاستەی سیاسەتی دەرەوەی وڵاتەکەیدا لە هەریەک لە لیبیا و سووریا، سیاسەتی دەرەوەی هێزێکی نێودەوڵەتیی وەک ڕووسیا، لە یەکلاییکردنەوەی ئایندەی کێشەکانی فەڵەستین، سووریا، لیبیا و ڕۆژهەڵاتی دەریای ناوەڕاستدا هەڵوێست و سیاسەتەکانی هێزێکی نێودەوڵەتیی وەک ویلایەتە یەکگرتووەکانی ئەمەریکا کە بۆ ماوەی چەندین دەیەیە باڵادەستیی خۆی بەسەر ڕۆژهەڵاتی ناوەڕاستدا سەپاندووە، لەبەرچاو بگرێت. بۆ زیاتر ڕوونکردنەوەی ئەم بابەتە، دەتوانین ئاماژە بۆ هەڵوێستی توندی هەریەک لە ویلایەتە یەکگرتووەکانی ئەمەریکا و فەڕەنسا بکەین بەرامبەر سیاسەتی دەرەوەی تورکیا لە پرسی یەکلاییکردنەوەی کێشەی قوبرس لەگەڵ هەریەک لە قوبرسی یۆنانی (کۆماری باشووری قوبرس) و یۆناندا لە ڕۆژهەڵاتی دەریای ناوەڕاست بە هۆی ئەندامێتیی هەریەک لەم دوو وڵاتە لە یەکێتیی ئەورووپادا. لە لایەکی دیکەوە بەشێک لە توێژەران کە شیکردنەوە و هەڵسەنگاندن بۆ ئایندەی سیاسەتەکانی تورکیا لە ڕۆژهەڵاتی دەریای ناوەڕاست دەکەن، پێیان وایە یەکێکی دیکە لەو فاکتەرانەی کە بایەخێکی گرنگی هەیە و پێویستە لەبەرچاو بگیرێت، فاکتەری ئابوورییە. گرنگی و بایەخی ئەم هەرێمە بە هۆی دەوڵەمەندی بە سەرچاوەکانی وزەی وەکوو نەوت و غازی سروشتی و ڕۆڵی لە پڕکردنەوەی پێداویستییە ناوخۆییەکانی تورکیا لە ئایندەدا، پاڵ بە حکومەتی ئەنقەرەوە دەنێت تا گرنگیی زیاتر بەم ناوچەیە بدات، بەتایبەتی لە ئێستادا کە تورکیا ناچارە بۆ دەستخستنی وزەی پێویست پشت بە وڵاتانی دەرەکی ببەستێت. تورکیا لە ڕێگەی دۆزینەوەی سەرچاوەکانی وزەوە لە ئاوە نێودەوڵەتییەكانی خۆی لە ئایندەدا، یاخود لە ڕێگەی بەدەستهێنانی سەرچاوەکانی وزە لەو هێزە وەبەرهێنەرانەی کە ئەگەری هەیە لە ئایندەدا لە ناوچەکەدا دەربکەون، دەتوانێت لە بابەتی دابینکردنی غازی سروشتی بۆ وڵاتەکەی، خۆی لە پاشکۆیەتیی دەوڵەتانی وەک ڕووسیا ڕزگار بکات.  پێویستە ئاماژە بۆ ئەوە بکەین جگە لە فاکتەرەکانی ئاسایش و ئابووری، نزیکەی تەواوی ئەو دەوڵەتانەی کە کەوتوونەتە ئەم ناوچەیەوە، لە ڕووی مێژوویی و کولتوورییەوە پەیوەندییەکی نزیک و هاوبەشیان لەگەڵ تورکیادا هەیە. بۆیە یەکێک لە ئامانجە سەرەکییەکانی تورکیا لە ئێستا و ئایندەدا، کارکردنە بۆ دووبارە تازەکردنەوە و بەهێزکردنەوەی ئەو پەیوەندییانە بە مەبەستی پاراستنی بەرژەوەندییەکانی لە ناوچەكەدا. بەڕێوەبردنی تەواوی ئەو دەوڵەتانەی کە دەکەونە ئەم ناوچەیەوە، بە درێژایی چەندین سەدە لە ئەستەنبوڵی پایتەختی دەوڵەتی عوسمانییەوە، فاکتەرێکی گرنگە بۆ بونیادنانی پەیوەندییەکی بەهێز لەنێوان دەوڵەتانی ئەم ناوچەیە و تورکیادا. بۆیە هۆکاری لە نزیکەوە چاودێریکردن و دەستتێوەردانی ڕاستەوخۆ یاخود ناڕاستەوخۆی تورکیا لە جەنگ و پێکدادانە ناوخۆییەکانی سووریا، لیبیا، کێشەکانی ئیسرائیل/ فەڵەستین و میسڕ، بۆ ئەو پەیوەندییە مێژوویی و کولتوورییە دێرینە دەگەڕێتەوە کە لەنێوان هەردوو لادا هەیە. لەم توێژینەوەیەدا هەوڵ دراوە تیشک بخرێتە سەر پەیوەندییە هەرێمی و نێودەوڵەتییەکانی تورکیا، سیاسەتی تورکیا لە ڕۆژهەڵاتی دەریای سپیی ناوەڕاست لە ڕوانگەی ئاسایش، ئابووری، پەیوەندیی مێژووی-کولتووری، شیکردنەوەی هەڵوێست و سیاسەتی هێزە هەرێمی و نێودەوڵەتییەکان سەبارەت بە سیاسەتەکانی تورکیا لەم ناوچەیە. ئاسایش گرنگیی پێگەی ڕۆژهەڵاتی دەریای ناوەڕاست لە ڕووی جیۆستراتیجی و جیۆپۆلەتیکییەوە، بە یەکێک لە گرنگترین ئەو فاکتەرانە دادەنرێت کە پاڵ بە تورکیا دەنێت تا لە ڕوانگەی سیاسەتی ئاسایشی نیشتمانیی تورکیاوە چ لە ئێستادا یاخود لە ئایندەدا گرنگیی زیاتر بەم ناوچەیە بدات. بۆ تێگەیشتن لە گرنگیی ئەم ناوچەیە لە ڕووی جیۆستراتیژییەوە، هێندە بەسە کە تەماشای ململانێی نێوان هێزە هەرێمی و نێودەوڵەتییەکان بکەین بۆ سەپاندنی دەسەڵات و نفوزی خۆیان لە ڕۆژهەڵاتی دەریای ناوەڕاستدا. زۆرێک لە هێزە نێودەوڵەتی و هەرێمییەکانی وەک ئەمەریکا، ڕووسیا، فەڕەنسا، بەریتانیا، ئیتاڵیا، ئەڵمانیا، تورکیا، یۆنان، ئیسرائیل، میسڕ، ئیمارات و عەرەبستانی سعودی بەشێکن لەو دەوڵەتانەی کە بەشدارن لە ململانێکانی ناوچەکەدا. لە ڕووی جوگرافییەوە هاوبەشیی چەندین دەوڵەتی دەوڵەمەند بە سەرچاوەکانی وزە لە کەناراوەکانی ڕۆژهەڵاتی دەریای ناوەڕاستدا، هەبوونی کەناڵێکی ئاویی وەک نۆکەندی سوێس کە بە یەکێک لە گرنگترین ڕێگا ئاوییەکانی جیهان دادەنرێت لەم ناوچەیەدا، بەردەوامیی کێشە و ململانێکانی نێوان ئیسرائیل و فەڵەستین لەم جوگرافیایەدا، هاندانی ئەمەریکا بۆ سەپاندنی باڵادەستیی خۆی بەسەر ناوچەکەدا لەلایەن لۆبی ئیسرائیلییەوە، خەونی کلاسیکیی گەیشتن بە ئاوە گەرمەکان لەلایەن ڕووسیاوە، خەونی زیندووکردنەوەی باڵادەستیی سەردەمی ئیمپڕاتۆری لەلایەن بەریتانیا، ڕووسیا و فەڕەنساوە، بەرداوامیی گەڕان و پشکنینەکانی تورکیا بۆ دۆزینەوەی سەرچاوەکانی وزە، هۆکارە بۆ ئەوەی ڕۆژهەڵاتی دەریای ناوەڕاست لە ڕووی جیۆستراتیژی و جیۆپۆلەتیکەوە بە یەكێک لە گرنگترین ناوچەکانی جیهان دابنرێت.  ململانێ هەرێمی و نێودەوڵەتییەکان بۆ کۆنترۆڵکردنی کەنداوی سوێس، دابینکردنی ئەمن و ئاسایشی ئیسرائیل، گەیشتن بە ئاوە گەرمەکان، بەدەستهێنانی بەشێک لە سەرچاوەکانی وزە لە سووریا، وای کردووە دەستبەسەرداگرتن و کۆنترۆڵکردنی لیبیا و قوبرس گرنگییەکی زیاتر بەدەست بهێنێت. لە ئەنجامی ئەو گۆڕانکارییە خێرایەی کە ناوچەکە بەخۆیەوە بینیوە لەم ماوانەی دواییدا، پەیوەندییە هەرێمی و نێودەوڵەتییەکانیش تا ڕادەیەک گۆڕانکارییان بەسەردا هاتووە. بێگومان تورکیاش وەک هێزێکی هەرێمیی گرنگ، لە ڕێگەی پیادەکردن سیاسەتێکی سەربەخۆوە کار بۆ پاراستن و بەدیهێنانی بەرژەوەندییەکانی لە ڕۆژهەڵاتی دەریای ناوەڕاست دەکات. سیاسەتی دەرەوەی تورکیا لە چوارچێوەی ئەم ململانێیانەدا وای کردووە ئەو وڵاتە چ لەسەر ئاستی هەرێمی یاخود نێودەوڵەتی ڕووبەڕووی چەندین گرفت ببێتەوە، بە جۆرێک لە ئێستادا کار بۆ گەمارۆدان و فشارخستەسەر ئەم وڵاتە دەکرێت لە ڕۆژهەڵاتی دەریای ناوەڕاست. لێرەدا هەوڵ دەدەین بەکورتی ئاماژە بۆ هەندێک لەو گرفتانە بکەین، لەوانە:  قوبرس بە یەکێک لە گرنگترین ئەو ناوچانە دادەنرێت کە لە ئەجێنداکانی سیاسەتی دەرەوەی تورکیادا لە ڕۆژهەڵاتی دەریای ناوەڕاست گرنگی و بایەخێکی تایبەتی هەیە. پاش دامەزراندنی کۆماری قوبرس لە ساڵی ١٩٦٠دا، کێشە و ململانێکانی نێوان تورکیا و یۆنان لەسەر ئەم ناوچەیە تا ئێستا بەرداوامیی هەیە. ئەم کۆمارە گەرچی لە سەرەتادا بە شێوەیەک دامەزراێنرا کە نوێنەرایەتیی هەردوو نەتەوەی (تورک، یۆنانی) بکات، بەڵام پاش تێپەڕینی ماوەیەکی کەم بەسەر دامەزراندنیدا، یۆنانییەکان لە ڕێگەی ئەنجامدانی چەند پەلامارێکی خوێناوییەوە بۆ سەر تورکەکان لە ساڵی ١٩٦٣دا، هەوڵیان دا گۆڕانکاری لە کۆمارەکەدا بکەن و بیگۆڕن بۆ کۆمارێکی یۆنانی. وەک کاردانەوەیەک لەبەرامبەر ئەم کارەدا، تورکیا پلانی دانا دەستتێوەردان لە بارودۆخی نێوخۆی قوبرسدا بکات، بەڵام بە هۆی دژایەتییەکانی ئەمەریکاوە، تورکیا نەیتوانی ئەم پلانە جێبەجێ بکات. تەنانەت دوای کودەتاکەی ساڵی ١٩٧٤یش، ئەمەریکا بۆ ڕێگریکردن لە دەستتێوەردانی تورکیا، بۆ ماوەی سێ ساڵ دوورگەی قوبرسی وەک ناوچەیەکی لە چەک داماڵراو ڕاگەیاند(1). پاش قبووڵکردنی ئەندامێتیی یۆنان لە یەکێتیی ئەورووپا لە ساڵی١٩٨١دا، وە پاشانیش قبووڵکردنی بەئەندامبوونی قوبرسی یۆنانی (کۆماری باشووری قوبرسی یۆنانی) لە ١/٥/٢٠١٤دا وەک نوێنەری هەموو قوبرس لە یەکێتیی ئەورووپا، هەریەک لە ئەمەریکا و یەکێتیی ئەورووپا لە پرسی چارەسەرکردنی کێشەی قوبرسدا، بەتایبەتی لە پرسی دیاریکردنی سنووری ڕووبەرە ئاوییەکانی ناوچەکە و چەسپاندنی دەسەڵات تیایدا کە بە گرنگترین کێشە لە ڕۆژهەڵاتی دەریای ناوەڕاست دادەنرێت، زیاتر وەک لایەنگری یۆنان و قوبرسی یۆنانی دەردەکەون لەبەرامبەر تورکیادا. سەرباری ئەوەی تورکیا لە پێشەنگی ئەو دەوڵەتانە دێت کە خاوەنی درێژترین کەناراوی ئاوین لە ڕۆژهەڵاتی دەریای ناوەڕاست، بەڵام لەگەڵ ئەوەشدا هەوڵ بۆ سنووردارکردنی دەسەڵاتی تورکیا دەدرێت بەسەر پانتاییە ئاوییەکانی ناوچەکەدا، بەتایبەتی لە ڕۆژهەڵاتی دەریای ناوەڕاست و دەریای ئیجەدا (2). بە مەبەستی ڕێگریکردن لە هەوڵەکانی یۆناندا بۆ مامەڵەکردن لەگەڵ دوورگەکانی میس، ڕۆدۆس، کاشۆت و دوورگەی کریت وەک بەشێک لە خاکی خۆی، تورکیا لە ساڵی ٢٠١٠دا ڕێککەوتننامەیەکی ڕێگەپێدانی لەگەڵ قوبرسی تورکی (کۆماری باکووری قوبرسی تورکی) ئەنجام دا. لە ڕێگەی ئەم پەیماننامەیەوە، تورکیا لەدوای ساڵی ٢٠١٠-ەوە توانیی هێزە دەریاییەکانی لەنزیک دوورگەی قوبرس جێگیر بکات و کاری پشکنین و گەڕان بەدوای سەرچاوە سروشتییەکانی وەک نەوت و غازدا لە پانتاییە ئاوییەکانی ناوچەکە ئەنجام بدات(3). لە درێژەی ململانێ و ڕکابەرییەکانی ناوچەکەدا، هێزە دەریاییەکانی تورکیا لە ٩/٢/٢٠١٦دا هەستان بە ڕێگریکردن لە کەشتییەکی سەر بە کۆمپانیای نەوتی ئیتاڵی (ENI)، بە تۆمەتی ئەوەی بەنیاز بووە کاری گەڕان و پشکنین بوو لە ڕووبەرە ئاوییەکانی کۆماری قوبرسی تورکی ئەنجام بدات. بەردەوامیی تورکیا لە هەنگاوەکانی کاری گەڕان و پشکنین لەنزیک کەناراوەکانی قوبرس و یۆنان لە ڕۆژهەڵاتی دەریای ناوەڕاست و گوێنەدان بە ناڕەزایەتییە نێودەوڵەتییەکان لەم بارەیەوە، ئاڵۆزبوونی پەیوەندییەکانی لەگەڵ قوبرسی یۆنانی و یۆناندا، بەتایبەت پاش تۆمەتبارکردنی دەوڵەتی قوبرس بە گرتنەبەری هەنگاوی تاک لایەنە و پێدانی مۆڵەت بە کۆمپانیا نێودەوڵەتییەکان بە مەبەستی گەڕان و پشکنین بەدوای سەرچاوە سروشتییەکانی ناوچەکەدا بەبێ لەبەرچاوگرتنی مافەکانی هاوڵاتیانی تورک لە باکووری قوبرس، وای کردووە تورکیا لەسەر ئاستی هەرێمی و نێودەوڵەتی دووچاری تێکچوونی پەیوەندییەکانی بێت لەگەڵ هەریەکە لە دەوڵەتانی یۆنان، قوبرسی یۆنانی، ئەمەریکا و فەڕەنسادا. یەکێکی دیکە لەو ناوچانەی کە لە ئەجێندای سیاسەتی دەرەوەی تورکیادا گرنگی و بایەخێکی زۆری پێ دەدرێت و وەک بە بەشێک لە پرسی ئەمن و ئاسایشی نیشتمانیی ئەنقەرە سەیر دەکرێت، بریتییە لە کێشەی لیبیا لە ڕۆژهەڵاتی دەریای ناوەڕاستدا. تورکیا بە ئامانجی فراوانکردن و پاراستنی بەرژەوەندییەکانی لە ناوچەکەدا، هەستا بە ئەنجامدانی یاداشتنامایەکی لێکتێگەیشتن لە ٢٧/١١/ ٢٠١٩ لەگەڵ حکومەتی ویفاقی نیشتمانی لە (تەرابلوس/لیبیا) بە سەرۆکایەتیی سەراج، بە مەبەستی دیاریکردنی سنووری دەسەڵات بەسەر ڕووبەرە ئاوییەکانی نێوان هەردوو وڵاتدا. جگە لەوەش تورکیا بە مەبەستی ئەنجامدانی کاری هاوبەش لە بواری ئەمنی و سەربازی، ڕێککەوتننامەیەکی دیکەی لەگەڵ حکومەتی ویفاقی نیشتمانی ئەنجام دا. بەگوێرەی ئەم ڕێککەوتننامەیە و لەسەر بانگهێشتی حکومەتی ویفاقی نیشتمانیی تەرابلوس، تورکیا هەستا بە ڕەوانەکردنی هێزی سەربازی بە مەبەستی یارمەتیدانی هێزەکانی سەر بە حکومەتی ویفاقی نیشتمانی لە پێکدادانە نێوخۆییەکانی ئەو وڵاتەدا، بێگومان ئەمەش بوو بە هۆی ئاڵۆزبوون و تێکچوونی پەیوەندییەکانی لەگەڵ سوپای نیشتمانیی لیبیادا بە سەرۆکایەتیی خەلیفە حفتەر. سڵنەکردنەوەی تورکیا لە دەستتێوەردانی ڕاستەوخۆ لە کاروباری نێوخۆی لیبیا و ڕەوانەکردنی هێزی سەربازی بۆ ئەو وڵاتە لە پێناو پاراستنی بەرژەوەندییەکانی و چەسپاندنی هێز و دەستەڵاتی خۆی لە ڕۆژهەڵاتی دەریای ناوەڕاست، کاردانەوەی توندی هێزە هەرێمی و نێودەوڵەتییەکانی بەدوای خۆیدا هێناوە و ڕەنگە لە ئایندەیەکی نزیکدا ئەم وڵاتە ناچار بە پاشەکشەکردن بکات لە خاکی لیبیا. یەکێکی دیکە لەو ڕەهەندانەی کە ئەنقەرە لە ئەجێندای ساسیەتی دەرەوەیدا لە ناوچەکە گرنگییەکی زۆری پێ دەدات و کاری بۆ دەکات، بریتییە لە هەوڵدان بۆ سەرلەنوێ زیندووکردنەوە و بەهێزکردنەوەی پەیوەندییەکانی لە ڕووی سیاسی، ئابووری، مێژوویی و کولتوورییەوە لەگەڵ ئەو دەوڵەتانەی کە لەژێر دەستەڵاتی عوسمانییەکاندا بوون. بەتایبەتی لە ماوەی فەرمانڕەوایەتیی پارتی داد و گەشەپێداندا، تورکیا هەوڵی داوە پەیوەندییەکانی لەگەڵ ئەو دەوڵەتانەی کە دەکەونە سەر حەوزی دەریای سپیی ناوەڕاست وەک سووریا، میسڕ، لیبیا و فەڵەستین بەهێز بکات و پەرەی پێ بدات. لەگەڵ سەرهەڵدانی شۆڕش و ڕاپەڕینەکانی بەهاری عەرەبی لەلایەن گەلانی میسڕ، لیبیا و سووریا دژ بە سیستمە دیکتاتۆرییەکانی وڵاتەکانیان بەئومێدی کۆتاییهێنان بە دیکتاتۆری و بەدیهێنانی دیموکراسی لە وڵاتەکانیان، تورکیا هەر لە سەرەتای ئەم شۆڕش و یاخیبوونانەوە پاڵپشتیی خۆی بۆ گەلانی ناوچەکە ڕاگەیاندووە بە جۆرێک کە بگونجێت لەگەڵ ئەجێنداکانی سیاسەتی دەرەوەیدا. لەم چوارچێوەیەدا پاش سەرکەوتنی شۆڕشی گەلی میسڕ، وە بەتایبەتی پاش بردنەوەی پارتی ئیخوان موسلمین و هاتنەسەرکاری محەمەد مورسی لە ڕێگەی دەنگدان و بەدەستهێنانی زۆرینەی دەنگی هاوڵاتیانی ئەو وڵاتەوە، تورکیا پاڵپشتی و پشتیوانیی خۆی بۆ حکومەتەکەی محەمەد مورسی ڕاگەیاند. بە هەمان شێوەی میسڕ، تورکیا لە ڕێگەی پاڵپشتیی یارمەتیدانی هێزە ئۆپۆزسیۆنەکانی نزیک لە خۆی لە سووریادا، دژایەتیی خۆی بۆ حکومەتەکەی بەشار ئەسەد ڕاگەیاند. هەڵوێست و جموجووڵەکانی تورکیا لەسەر ئاستی سیاسەتی دەرەوە لە ڕۆژهەڵاتی دەریای ناوەڕاست، هەر لە ڕەتکردنەوەی کودەتا سەربازییەکەی سیسی لە میسڕ، دەستتێوەردانی کاروباری نێوخۆی سووریا و ئەنجامدانی لەشکرکێشی بۆ سەر خاکی ئەو وڵاتە، ناردنی هێزی سەربازی بۆ لیبیا و دەستتێوەردان لە کاروباری ناوخۆی ئەو وڵاتە، پێکدادانی بەرژەوەندییەکانی لەگەڵ بەرژەوەندیی ژمارەیەک لە دەوڵەتە هەرێمی و نێودەوڵەتییەکاندا و ناڕەزایی و هەڵوێستوەرگرتنی ئەو دەوڵەتانە دژ بە جموجووڵ و چالاکییەکانی تورکیا لە ناوچەکە، وای کردووە پەیوەندییەکانی دەرەوەی ئەو وڵاتە چ لەسەر ئاستی هەرێمی یاخود نێودەوڵەتی، تووشی گرفت و لاوازی  ببێت. لەم چوارچێوەیەدا هەریەک لە وڵاتانی ئیمارات، ئیسرائیل، ئەمەریکا، فەڕەنسا، ڕووسیا و عەرەبستانی سعودی، هەنگاوەکانی ئەنقەرە بۆ پاراستنی بەرژەوەندییەکانی و زیادکردنی دەسەڵات و نفوزی خۆی لە ڕۆژهەڵاتی دەریای ناوەڕاست، وەک مەترسییەک بۆ سەر بەرژەوەندییەکانی خۆیان دەبینین و کار بۆ سنووردارکردن و کەمکردنەوەی هێز و دەسەڵاتی تورکیا لە ناوچەکە دەکەن. لە ئێستادا لەسەر ئاستی هەرێمی بەرەیەکی هاوبەش لەنێوان وڵاتانی ئیمارات، میسڕ و عەرەبستانی سعودی دروست بووە، بە مەبەستی ڕێگریکردن لە هێز و نفوزی تورکیا لە ناوچەکەدا بە سەرۆکایەتیی پارتی داد و گەشەپێدان. وەک دەبینرێت لە ئێستادا ئەم بەرەیە کۆکن لەسەر گرتنەبەری هەنگاوی هاوبەش لە کێشەی لیبیا و دیاریکردنی سنووری دەسەڵاتی دەریایی لە ڕۆژهەڵاتی دەریای ناوەڕاست لەبەرامبەر تورکیادا، لەبەرامبەر پشتیوانی و هاوکارییەکانی وڵاتانی ئیمارات، میسڕ و عەرەبستانی سعودی بۆ هێزەکانی سوپای نیشتمانیی لیبیا بە سەرۆکایەتیی خەلیفە حفتەر. بەڵام لەسەر ئاستی نێودەوڵەتی بە هۆی ڕکابەری و پێکدادانی بەرژەوەندیی دەوڵەتە زلهێزەکان، تا ئێستا نەتوانراوە بەرەیەکی هاوبەش لەبەرامبەر تورکیادا دروست بکەن، بۆ نموونە  هەریەک لە فەڕەنسا و ڕووسیا بەگوێرەی بەرژەوەندییە تایبەتەکانیان سیاسەتێکی جیاواز و دژیەک لە سووریادا پیادە دەکەن، بەڵام لە لیبیادا هەردوو وڵات لە یەک بەرەی هاوبەشدان و پشتیوانی لە حکومەتەکەی خەلیفە حفتەر دەکەن. لە درێژەی هەوڵەکانیاندا بۆ گەمارۆدان و لاوازکردنی تورکیا لە ڕۆژهەڵاتی دەریای ناوەڕاست، پێویستە ئاماژە بۆ سیاسەتی دەوڵەتی ئیسرائیل و کاریگەریی دیار و بەرچاوی لۆبی ئەو وڵاتە لە ئاڕاستەکردنی سیاسەتی دەرەوەی ویلایەتە یەکگرتووەکانی ئەمەریکادا لە ناوچەکە بکەین. لەگەڵ گەشەسەندنی تواناکانی تورکیا لە ڕووی ئابووری و سەربازییەوە لە ماوەی فەرمانڕەوایەتیی پارتی داد و گەشەپێداندا بە سەرۆکایەتیی ڕەجەب تەیب ئۆردۆغان، حکومەتی ئەو وڵاتە هەوڵەکانی خۆی چڕ کردووەتەوە بۆ گرتنەبەری سیاسەتێکی سەربەخۆ لە کاروباری ناوخۆ و دەرەوەیدا، هەر لە داننان بە بزووتنەوەی حەماسی فەڵەستینی وەک نوێنەری ڕاستەقینەی هاوڵاتیانی فەڵەستین، بەتایبەت پاش بردنەوەی هەڵبژاردنەکانی ساڵی ٢٠٠٦-ی ئەو وڵاتە، پێشوازیکردن لە خالید مەشعەلی سەرۆکی ئەو بزووتنەوەیە لە ئەنقەرەی پایتەخت و دەربڕینی ناڕەزایی بەرامبەر گەمارۆکانی سەر کەرتی غەزە لەلایەن دەوڵەتی ئیسرائیلەوە، حکومەتی تەلئەبیبی لە ئەنقەرە نیگەران کردووە. بەردەوامیی هەڵوێستەکانی تورکیا لەبەرامبەر کێشەی فەڵەستین، وەستانەوە دژ بە سیاسەتەکانی ئیسرائیل لە ناوچەکە و بەردەوامیی چالاکییەکانی لە ڕۆژهەڵاتی دەریای ناوەڕاست وای کردووە ئیسرائیل هەوڵەکانی تورکیا وەک مەترسی بۆ سەر خۆی ئەژمار بکات، بێگومان ئەم دۆخەش کاریگەریی ڕاستەوخۆی بۆ سەر هەڵوێست و سیاسەتەکانی واشنگتۆن دەبێت لەبەرامبەر تورکیادا. زیادەڕۆیی نییە گەر بڵێین مەترسی و نیگەرانییەکانی دەوڵەتی ئیسرائیل لەبەرامبەر تورکیادا بە جۆرێک زیادی کردووە کە لە ڕووی سیاسی، ئابووری و میدیاییەوە پەنا بۆ سوودبینین لە تواناکانی لۆبی خۆی بەرێت لە وڵاتانی ڕۆژئاوا، بە مەبەستی دژایەتیکردن و لاوازکردنی دەوڵەتی تورکیا(4). ئابووری یەکێکی دیکە لەو فاکتەرانەی کە پێویستە لە هەڵسەنگاندنی سیاسەتی دەرەوەی تورکیا لە ڕۆژهەڵاتی دەریای ناوەڕاست لەبەرچاو بگیرێت، بریتییە لە گرنگیی ئەم ناوچەیە لە ڕووی ئابوورییەوە بۆ دەوڵەتی تورکیا. ڕۆژهەڵاتی دەریای ناوەڕاست لە پەیوەندییە ناوخۆیی و دەرەکییەکانی تورکیادا خاوەنی پێگەیەکی ئێجگار گرنگ و ستراتیجییە، هەم بە هۆی دەوڵەمەندیی بە سەرچاوە سروشتییەکانی وەک نەوت و غاز و هەم بە هۆی گرنگیی پێگەکەی لە پەیوەندیی ئابووری و بازرگانیی دوولایەنەی نێوان تورکیا و دەوڵەتانی ناوچەکە. تورکیا لە ڕێگەی بەهێزکردنی نفوزی خۆیەوە لەم ناوچەیە، لە لایەکەوە کار بۆ ئەوە دەکات کە لە بابەتی دابینکردنی وزەی پێویست بۆ وڵاتەکەی، پەیوەستبوونی خۆی بە وزەی دەرەکی کەم بکاتەوە، لە لایەکی دیکەوە دەیەوێت پەیوەندییە ئابووری و بازرگانییەکانی لەگەڵ دەوڵەتانی ناوچەکە و جیهان زیاتر پەرە پێ بدات. گەر لەم سۆنگەیەوە لە چوارچێوەی سیاسەتی دەرەوەی تورکیا لە ڕۆژهەڵاتی دەریای ناوەڕاست بڕوانین، بۆمان دەردەکەوێت کە سەرباری ئەوەی تورکیا لە ئێستادا بە شێوەیەکی چڕ سەرقاڵی کاری گەڕان و پشکنینە بەدوای نەوت و غازدا لە ناوچەکەدا، لە هەمان کاتدا کار بۆ جێبەجێکردنی پلانی گواستنەوە و گەیاندنی غازی سروشتیی ناوچەکە دەکات لە ڕێگەی خاکی خۆیەوە بۆ بازاڕەکانی ڕۆژئاوا(5). بەگوێرەی لێکۆڵینەوەکان، بڕی غازی سروشتی لە کێڵگەکانی ڕۆژهەڵاتی دەریای ناوەڕاستدا یەکسانە بە  ٤,٥%-ی کۆی یەدەگی غازی سروشتی لە جیهاندا. لێکۆڵینەوەکان سەلماندوویانە بەشێکی گرنگی کێڵگەکانی غازی سروشتی لەم هەرێمە لە ناوچەی تامار و لێڤیاتان-ەوە لە خاڵی بەیەکگەیشتنی کەناراوەکانی قوبرس، میسڕ و ئیسرائیلەوە تا ڕۆژئاوای دەلتای نیل لە کەناراوەکانی میسڕ درێژ دەبێتەوە. گەورەترین کێڵگەکانی غازی سروشتی کە دەکەونە سەر ئەم هێڵە، بریتییە لە کێڵگەکانی: 1. تامار: ٣١٨ ملیار مەتر سێجا 2. لێڤیاتان: ٦٠٥ ملیار مەتر سێجا 3. ئافرۆدیت: ١٢٩ ملیار مەتر سێجا 4. کالیپسۆ: ٢٣٠ ملیار مەتر سێجا 5. زۆهر کە ٨٥٠ ملیار مەتر سێجا غازی سروشتی لەخۆ دەگرێت. هەروەها پێشبینی دەکرێت ناوچەکانی نێوان لەڤانت و دەلتای نیل، بڕی ٨,٩ ملیار مەتر سێجا غازی سروشتی لەخۆ بگرێت(6). لەگەڵ ئەوەشدا جگە لە لێکۆڵینەوەکانی ناوچەی لەڤانت و حەوزی ڕۆژئاوای ڕووباری نیل، تا ئێستا نەتوانراوە کاری گەڕان و پشکنین بە شێوەیەکی چڕ لە ئاوە کیشوەرییەکانی باشووری ڕۆژئاوای کەناراوەکانی تورکیاوە تا کەناراوەکانی ناوچەی ڕۆژهەڵاتی لیبیا و ڕۆژئاوای میسڕ ئەنجام بدرێت. هەر چەندە تورکیا لەم ماوانەی دواییدا لە ڕێگەی کڕینی چەند کەشتییەکی تایبەت بەم بوارە، دەستی کردووە بە کاری گەڕان و هەڵکەندن لە ناوچەکەدا. سەرەڕای ئەوەش بە هۆی ناکۆکی و ململانێکانی لەگەڵ یۆناندا سەبارەت بە دیاریکردنی ڕووبەری دەسەڵاتی دەریایی نێوانیان لە دەریای ئیجە، تا ئێستا نەیتوانیوە بە شێوەیەکی چڕ کاری گەڕان و هەڵکەندن بەدوای سەرچاوەکانی وزەدا لەم ناوچەیە ئەنجام بدات. جێگەی باسە کێڵگەکانی غازی سروشتی لە ڕۆژهەڵاتی دەریای ناوەڕاست بەتەنیا ناکەونە قووڵایی ئاوی دەریاوە، بەڵکوو لێکۆڵینەوەکان سەلماندوویانە هەندێک ناوچە لە سنووری کەناراوەکانی لیبیا و میسڕدا دەوڵەمەندن بە لەخۆگرتنی بڕێکی زۆر لە غازی سروشتی. وڵاتی لیبیا لە ڕێگەی خاوەندارێتیکردنی چەندین کیڵگەی دەوڵەمەند بە غازی سروشتی وەک کێڵگەکانی وەفا و بۆری، کە بڕی ٥,١ ملیار مەتر سێجا غازی سروشتی لەخۆ دەگرێت، لەسەر ئاستی دونیا لە پلەی 22 دایە. هەر چی وڵاتی میسڕە، بە خاوەندارێتیکردنی کێڵگەکانی زوهر، دەلتای نیل و ئاتۆڵ، کە بڕی ٢,٢ ملیار مەتر سێجا غازی سروشتی لەخۆ دەگرێت، لەسەر ئاستی دونیا لە پلەی 16 دایە (7). بۆیە جێگەی خۆیەتی لێرەدا ئاماژە بۆ ئەوە بکەین کە هۆکاری سەرەکی لە نزیکەوە گرنگیپێدانی ژمارەیەکی زۆر لە هێزە هەرێمی و نێودەوڵەتییەکان بە کاروباری نێوخۆی لیبیا و دەستێوەردان لە جەنگی نێوخۆی ئەو وڵاتەدا، بۆ دەوڵەمەندیی ئەو وڵاتە بە سەرچاوەکانی وزە دەگەڕێتەوە. لەپاڵ دەوڵەمەندیی ڕۆژهەڵاتی دەریای ناوەڕاست بە غازی سروشتی، ئەم ناوچەیە لە هەمان کاتدا دەوڵەمەندە بە سەرچاوەکانی دیکەی وزە، لە چەشنی نەوت و پێکهاتەکانی. لە ئەنجامی بەردەوامیی گەڕان و پشکنینەکاندا تا ئێستا توانراوە بڕی ٦٤ ملیار بەرمیل نەوت لە کۆی گشتیی ڕووبەری دەریایی و وشکانییەکانی ناوچەکە بدۆزرێتەوە. دۆزینەوەی ئەم بڕە لە نەوتی خاو لە ڕۆژهەڵاتی دەریای ناوەڕاستدا، وا دەکات کە ئەم ناوچەیە نزیکەی ٧,٣ %-ی کۆی کێڵگە نەوتییەکانی جیهان لەخۆ بگرێت (8). لیبیا خاوەندارێتیی نزیکەی ٤,٤٨ ملیار بەرمیل نەوتی خاو دەکات، کە نزیکەی ٢,٣ %-ی کۆی کێڵگە نەوتییەکانی جیهان دەکات، لەپاڵ لیبیادا وڵاتی میسڕیش خاوەندارێتیی نزیکەی ٣,٣ ملیار بەرمیل نەوتی خاو دەکات لە جیهاندا(9). وەک دەبینین دەوڵەمەندیی ناوچەکانی ڕۆژهەڵاتی دەریای ناوەڕاست بە سەرچاوەکانی وزەی وەکوو نەوت و غازی سروشتی، لە ڕووی ئابوورییەوە گرنگی و بایەخێکی ئێجگار زۆری هەیە بۆ دەوڵەتێکی هاوردەکاری وزەی وەک تورکیا، کە ناچارە لە دابینکردنی بڕی وزەی پێویست بۆ وڵاتەکەی پشت بە دەوڵەتانی دەرەکی ببەستێت. لە کاتێکدا ئامانجی سەرەکیی تورکیا، دۆزینەوەی نەوت و غازە لە سنووری دەسەڵاتی دەریای تایبەت بە خۆیدا، هاوکات کار بۆ ئەوە دەکات کە لە ڕێگەی بەدەستهێنانی ڕێگەپێدانی تایبەتەوە لە دەوڵەتانی دەوڵەمەند بە سەرچاوەکانی وزەی وەک لیبیا، کاری وەبەر‌هێنان لە بواری وزە لە ناوچەکە ئەنجام بدات. بەم جۆرە حکومەتی ئەنقەرە دەتوانێت هەم پێداویستییە نێوخۆییەکانی خۆی لە بواری وزەدا لە چەند سەرچاوەیەکی جیاوازەوە دابین بکات لەبریی پشتبەستن بە دەوڵەتێکی دیاریکراوەوە، هەم دەتوانێت ببێتە پردی گواستنەوەی وزە لەنێوان ڕۆژهەڵاتی دەوڵەمەند بە سەرچاوەکانی وزە و بازاڕەکانی وڵاتانی ڕۆژئاوادا کە زۆر پێویستیان بەو سەرچاوانە هەیە. بەم جۆرە تورکیا دەتوانێت ئامانجە ستراتیژییەکانی خۆی لەسەر ئاستی سیاسەتی دەرەوە لە ڕۆژهەڵاتی دەریای ناوەڕاست بپێکێت و پێگەی خۆی لەسەر ئاستی هەرێمی و نێودەوڵەتی زیاتر بەهێز بکات. خشتەی ژمارە (١)، بڕی وزەی هاوردەکراو لەلایەن تورکیاوە لەنێوان ساڵانی (٢٠١٠-٢٠٢٠)(10) وەک لەم خشتەیەدا دیارە، تورکیا بۆ پڕکردنەوەی پێداویستییەکانی لە بواری وزەدا، ناچارە پشت بە وڵاتانی دەرەوە ببەستێت و ساڵانە برێکی زۆر وزە لە وڵاتان هەناردەکار بکڕێت. بۆیە لە ئێستادا تورکیا لە ڕۆژهەڵاتی دەریای ناوەڕاست، کار بۆ ئەوە دەکات بەردەوامی بە کاری گەڕان و هەڵکەندن بدات بە مەبەستی دۆزینەوەی سەرچاوەکانی وزە، تاکوو بتوانێت لە ئایندەدا لە ڕێگەی دەرهێنانی سەرچاوەکانی وزەی ئەم ناچەیەوە هەم لە ڕووی ئابوورییەوە سوودمەند بێت، هەم خۆی لە پەیوەستبوونی دەرەکی ڕزگار بکات. لەم چوارچێوەیەدا تورکیا پاش ئەنجامدانی ڕێککەوتننامەیەک لە ساڵی ٢٠١١دا لەگەڵ کۆماری قوبرسی تورکی و ئەنجامدانی ڕێککەوتننامەیەکی دیکە لە ساڵی ٢٠١٩ لەگەڵ حکومەتی ویفاقی نیشتمانی لە لیبیا، لە ڕێگەی کەشتیی تایبەت بە هەڵکەندن و لەرزاندن بۆ دۆزینەوەی سەرچاوەکانی وزە، لە سنووری ئاوە هەرێمی و نێودەوڵەتییەكان ناوچەکەدا دەستی کردووە بە ئەنجامدانی کاری گەڕان و هەڵکەندن.  تورکیا لەپاڵ هەریەکە لە کەشتییەکانی تایبەت بە کاری هەڵکەندن بە ناوەکانی فاتیح و یاوز، کەشتیی گەڕانی لەرزێنەری (سیسمیک) بە ناوەکانی باربارۆس خەیرەدین پاشا، کەشتیی لێکۆڵینەوەی لەرزێنەری ئێم تی ئەی ئۆروچ ڕەیس، بە مکوڕی و سووربوونەوە لە ئاوەکانی دەریای ناوەڕاستدا، درێژە بە چالاکییەکانی گەڕان و هەڵکەندن دەدات و لەم ڕێگەیەوە توانیویەتی بچێتە ڕیزی ئەو دەوڵەتانەی جیهان کە توانای ئەنجامدانی کاری گەڕان و ‌هەڵکەندنیان هەیە لە دەریادا(11). جگە لەو کەشتییانە، لە سەرەتای ساڵی ٢٠٢٠دا کەشتیی “قانوونی” تایبەت بە کاری هەڵکەندن لەلایەن تورکیاوە خراوەتەوە کار (12). بە مەبەستی پاراستن و دەستەبەرکردنی ئاسایش بۆ ئەو کەشتییانەی کە لە سەرەوە ناویان هێنرا، لە کاتی جێبەجێکردنی ئەرکەکانیاندا لە دەریای ناوەڕاست، جگە لە ناردنی هێزی دەریایی بۆ هاوڕێیەتیکردن و پاراستنیان، تورکیا لە ڕێگەی ئەنجامدانی مانۆڕی دەریایی و بەکارهێنانی فڕۆکە بێفڕۆکەوانەکانیەوە لە دوورگەی قوبرس، بەمکوڕییەوە کار بۆ پاراستنی بەرژەوەندییە سیاسی و ئابوورییەکانی خۆی لە ڕۆژهەڵاتی دەریای ناوەڕاست دەکات(13). جگە لەوە ناوچەی ڕۆژهەڵاتی دەریای ناوەڕاست بۆ وڵاتێکی وەک تورکیا کە ئامانجی ئەوەیە بچێتە ڕیزبەندیی ١٠ بەهێزترین وڵاتانی خاوەن ئابووریی جیهان، لە ڕووی چالاکی و جموجووڵی ئابووری و بازرگانییەوە ناوچەیەکی ئێجگار هەستیار و گرنگە. گەر بێتوو تەماشای قەبارەی ئاڵوگۆڕی بازرگانیی نێوان تورکیا و وڵاتانی درواسێی بکەین لە ماوەی فەرمانڕەوایەتیکردنی پارتی داد و گەشەپێدان لەنێوان ساڵانی ٢٠٠٢-٢٠٢٠دا، ئەوا بۆمان دەردەکەوێت کە قەبارەی ئاڵوگۆڕی بازرگانی ساڵ لەدوای ساڵ بە شێوەیەکی بەرچاو زیادبوونی بەخۆیەوە بینیوە. بۆ نموونە، قەبارەی ئاڵوگۆڕی بازرگانیی نێوان تورکیا و هەشت لەو دەوڵەتانەی کە دەکەونە سەر دەریای ناوەڕاست، لەنێوان ساڵانی ٢٠٠٢-٢٠٢٠دا پێنج هێندە زیادی کردووە. دەتوانین بڵێین ئەم زیادبوونەش بە شێوەیەکی گشتی زیادبوونی قەبارەی هەناردەکردنی کاڵا بووە لەلایەن تورکیاوە بۆ ئەو دەوڵەتانە، بەشێوەیەك كە قەبارەی هەناردەکردنی کاڵا لە ساڵی ٢٠١٢ لەلایەن تورکیاوە بۆ ئەو وڵاتانە تەنیا، ٦, ٢ ملیار دۆلار بووە، ئەوا لە ساڵی ٢٠١٥دا قەبارەی هەناردەکردنی کاڵا بۆ ٣,١٥ ملیار دۆلار بەرزبوونەوەی بەخۆیەوە بینیوە. هەر لەم ماوەیەدا قەبارەی ئاڵوگۆڕی بازرگانی بەتایبەتی لەگەڵ میسڕ و لیبیادا، بۆ دە هێندە زیاتر بەرزبوونەوەی بەخۆیەوە بینیوە.   خشتەی ژمارە (٢)، بەراوردی گەشەسەندنی قەبارەی ئاڵوگۆڕی بازرگانیی لەنێوان تورکیا و وڵاتانی ڕۆژهەڵاتی دەریای ناوەڕاست لەنێوان ساڵانی (٢٠٠٢- ٢٠١٩/ملیۆن دۆلار)(14)   پەیوەندیی مێژوویی و کولتووری   یەکێکی دیکە لەو بوارانەی کە تورکیا لە ئەجێنداکانی سیاسەتی دەرەوەی خۆیدا لە ناوچەکانی ڕۆژهەڵاتی دەریای ناوەڕاست بەوردی کاری لەسەر دەکات بۆ زیاتر بەهێزکردنی پێگەی خۆی و پاراستنی بەرژەوەندییەکانی لە ناوچەکە، بریتییە لە هەوڵدان بۆ زیندووکردنەوە و بەهێزکردنی پەیوەندییە مێژوویی و کولتوورییەکانی لەگەڵ دەوڵەتانی ئەم ناوچەیە. بەتایبەتی لە ماوەی فەرمانڕەوایی پارتی داد و گەشەپێداندا، حکومەتی ئەنقەرە زیاتر گرنگیی بەم پرسە دەدات و کار بۆ جێبەجێکردنی دەکات. لەم ڕووەوە ئەوەی یارمەتیی تورکیا دەدات و ئاسانکاریی بۆ دەکات، پەیوەندیی لەمێژینەی مێژوویی و کولتووریی گەلانی ئەم ناوچەیە لەگەڵ دەوڵەتی عوسمانی-تورکیادا. جگە لە ماڵتا و ناوچەکانی باکوور و ڕۆژئاوای کەناراوەکانی دەریاکانی ئەدریاتیک، تەواوی ئەو ناوچانەی کە دەکەونە ڕۆژهەڵاتی دەریای ناوەڕاستەوە، بە درێژایی چەندین سەدە لەژێر دەسەڵاتی ئیمپڕاتۆریای عوسمانیدا بوون.  بۆیە دەتوانین بڵێین زۆرێک لەو دەوڵەتانەی دەکەونە ئەم ناوچەیە، هەر لە تونسەوە بۆ باڵقان، لە ناوچەی لەڤانتەوە بۆ کەناراوەکانی میسڕ و لیبیا، بە شێوەیەکی گشتی لە ڕووی مێژوویی و کولتوورییەوە پەیوەندییەکی نزیکیان لەگەڵ تورکیادا هەیە. زۆرێک لەو دەوڵەتانەی کە دەکەونە کەناراوەکانی ڕۆژهەڵاتی دەریای ناوەڕاست، وەک میسڕ بۆ ماوەی ٣٦٥ ساڵ، لیبیا ٣٦٠ ساڵ، تونس ٣٢٣ ساڵ، چیای ڕەش ٣٩٩ ساڵ، ئەلبانیا ٤٤٥ ساڵ، سووریا، فەڵەستین/ئیسرائیل و لوبنان بۆ ماوەی ٤٠٢ ساڵ، لەلایەن ئیمپڕاتۆریەتی عوسمانییەوە بەڕێوە براون. لەبەر ئەوە بەشێکی گرنگی مێژووی ئەم گەلانە کە ماوەی زیاد لە سێ سەدە بۆ چوار سەدەی خایاندووە، لە هەمان کاتدا بەشێکە لە مێژووی ئیمپڕاتۆریەتی عوسمانی. سەرباری ئەوە لە بەشێکی گرنگی ئەم جوگرافیایە کە بەشێک بووە لە جوگرافیا/مێژووی ئیمپڕاتۆریەتی عوسمانی، چەندین کەمینەی بە ڕەگەز تورک ژیاون. لە هەمان کاتدا تا ئێستا وەک میراتێکی سەردەمی دەوڵەتی عوسمانی ژمارەیەکی زۆر لە موسوڵمان لە ناوچەکانی باڵقان درێژە بە ژیان دەدەن، بۆ نموونە لە وڵاتانی وەک ئەلبانیا و بۆسنە هەرسک موسوڵمانان زۆرینەی دانیشتووانی وڵات پێک دەهێنن، تەنانەت لە یۆنان و مەقدۆنیا ژمارەیەکی گرنگ لە هاوڵاتیانی تورک و موسوڵمان دەژین. ئەم نزیکایەتییە کولتوورییە کە مێژووی هاوبەش لەگەڵ خۆیدا هێناویەتی، خاڵێکی گرنگە بۆ گەشەپێدان و پێشخستنی پەیوەندیی دوولایەنەی نێوان تورکیا و دەوڵەتانی ڕۆژهەڵاتی دەریای ناوەڕاست. حکومەتی ئەنقەرە هەر لە سەردەمی تورگوت ئۆزاڵ و نەجمەدین ئەربەکانەوە تا دەگاتە ڕەجەب تەیب ئۆردۆغان، گرنگییەکی زۆری بەم بابەتە داوە و بە بەرنامە کاری بۆ پێشخستنی پەیوەندییەکانی لەگەڵ ناوچەکانی باڵقان، لەڤانت و باکووری ئەفەریقا کردووە و دەکات، ئەمەش وای کردووە هێزە نێودەوڵەتییەکانی وەک ئەمەریکا، فەڕەنسا، بەریتانیا، ڕووسیا، بەنیگەرانییەوە لە هەوڵەکانی حکومەتی ئەنقەرە بڕوانن لە ناوچەکەدا، کە ئامانج لێی گەڕانەوەیە بۆ جوگرافیای سەردەمی دەوڵەتی عوسمانی لە ڕێگەی پەرەپێدان و بەهێزکردنی پەیوەندییەکانی لەگەڵ دەوڵەتانی ڕۆژهەڵاتی دەریای ناوەڕاستدا. جێگەی ئاماژەپێدانە، تورکیا بە درێژایی چەندین دەیە هیچ گرنگییەکی ئەوتۆی بەم جوگرافیایە نەداوە کە جێگەی باس بێت، بۆیە دەتوانین بڵێین سەرەتای گەڕانەوە و گرنگیپێدانی تورکیا بەم جوگرافیایە، بە شێوەیەکی کرداری بۆ کۆتاییەکانی ساڵی ٢٠٠٠ دەگەڕێتەوە، بەتایبەتی پاش ئەوەی حکومەتی ئەنقەرە ئاڕاستەی سیاسەتی دەرەوەی خۆی لە ڕۆژئاواوە بەرەو ناوچەکانی ڕۆژهەڵاتی ناوەڕاست و باکووری ئەفەریقا وەرچەرخاند. بۆ ئەم مەبەستەش لە سەرەتادا لە ڕێگەی پیادەکردنی سیاسەتی “گەیشتن بە ڕۆژهەڵاتی ناوەڕاست” و دواتریش لە ڕێگەی پیادەکردنی سیاسەتی “عوسمانیی نوێ”وە، هەوڵی داوە ئامانجەکانی سیاسەتی دەرەوەی خۆی لە ناوچەکەدا بپێکێت(15). ئەنجام هەڵکەوتە و پێگەی جوگرافیی ڕۆژهەڵاتی دەریای سپیی ناوەڕاست لەسەر ڕێگای تێپەڕینی کاروانە بازرگانییەکان لە ئۆقیانووسی هیندەوە بەرەو ئەورووپا، تێپەڕینی هێڵەکانی گواستنەوەی وزە لە ڕۆژهەڵاتی ناوەڕاستەوە بۆ وڵاتانی ڕۆژئاوا، گواستنەوەی نەوتی قەوقاز لە ڕێگەی هێڵی بۆریی باکۆ-جیهان و گواستنەوەی وزە و کاڵا بە ڕێگای دەریایی لە ڕێگەی لە نۆكەندی سوێسەوە، پێگەی دوورگەی قوبرس وەک ناوەندێکی سەربازی، دۆزینەوەی چەندین کێڵگەی دەوڵەمەند بە نەوت و غازی سروشتی لە ڕۆژهەڵاتی دەریای سپیی ناوەڕاست، وای کردووە ئەم ناوچەیە لە  ڕووی ستراتیژییەوە نەک تەنیا پێگە و گرنگیی مێژووی خۆی بپارێزێت، بەڵکوو لە سۆنگەی سیاسەتی هێزە هەرێمی و نێودەوڵەتییەکانەوە پێگە و گرنگیی مێژووی خۆی بپارێزێت. دۆزینەوەی سەرچاوەکانی وزە و زیادبوونی گرنگیی ستراتیژیی ناوچەکە، لەگەڵ پەرەسەندنی ململانێ و ڕکابەریی نێوان ئەو دەوڵەتانەی کە دەکەونە سەر ئەم دەریایە بۆ دەستبەسەرداگرتن و چەسپاندنی ‌هێزی خۆیان، ڕۆڵی تورکیاش وەک هێزێکی چالاک لە ناوچەکە زیادی کردووە. لە ڕاستیدا هۆکاری بنەڕەتیی گرنگیدانی تورکیا بە پێشخستنی پەیوەندییەکانی لەگەڵ وڵاتێکی وەکوو لیبیادا، بۆ ستراتیژیی ئەو وڵاتە لە ڕۆژهەڵاتی دەریای سپیی ناوەڕاست دەگەڕێتەوە. گۆڕینی ئاڕاستەی سیاسەتی دەرەوەی لە ڕۆژئاواوە بۆ ڕۆژهەڵات و خواست و خولیای تورکیا بۆ بەهێزکردنی پێگەی دەسەڵات و نفوزی خۆی لە ناوچەکانی ڕۆژهەڵاتی دەریای ناوەڕاست و دووبارە زیندووکردنەوەی پەیوەندییە مێژوویی و کولتوورییەکانی لەگەڵ هەریەکە لە دەوڵەتانی لیبیا، سووریا و فەڵەستین و کۆی دەوڵەتانی ناوچەکە بە مەبەستی پاراستنی بەرژەوەندییەکانی لە چوارچێوەی ئایدۆلۆژیای سیاسەتی دەرەوەیدا لە ناوچەکە، بووەتە مایەی دروستکردنی نیگەرانی و مەترسی بۆ سەر بەشێک لە هێزە هەرێمی و نێودەوڵەتییەکان. لەبەر ئەوە لە ئێستادا ژمارەیەک لە هێزە هەرێمییەکانی وەک ئیمارات، میسڕ، عەرەبستانی سعودی و یۆنان و هێزە نێودەوڵەتییەکان وەک ئەمەریکا، فەڕەنسا و ڕووسیا، کەوتوونەتە جموجووڵ و چالاکی دژ بە خواست و سیاسەتی دەرەوەی تورکیا لە ناوچەکە. بەردەوامی و سووربوونی حکومەتی ئەنقەرە لە درێژەدان بە سیاسەتی دەرەوەی وڵاتەکەی لە ڕۆژهەڵاتی دەریای ناوەڕاست و گوێنەدان بە ناڕەزایەتییە هەرێمی و نێودەوڵەتییەکان، دوور نییە لە ئایندەیەکی نزیکدا بە زیانی خۆی بشکێتەوە بە هۆی زیادبوونی فشارەکان لەسەر ئەو وڵاتە.   بۆ ھیچ کەس، دەزگا و لایەنێک نییە، بەبێ ئاماژەدان بە ناوی گۆڤاری ئایندەناسی، ژمارە و رۆژی دەرچوونی ئەم بابەتە بڵاوبکاتەوە. _________________________________________________________ سەرچاوەکان   Yaycı, C. ‘Doğu Akdeniz’de Deniz Yetki Alanlarının Paylaşılma Sorunu ve Türkiye’. Bilge Strateji, 4:6, 2012, ss.1-72. Kemal İnat, “Türkiye’nin Kıbrıs Politikasının Dönüşümü”, Bilgi, Sayı: 2, (2005), s. 44-45. Nasıh Sarp Ergüven, “Adaların Deniz Alanı Sınırlandırmasına Etkisi ve Doğu Akdeniz”, Doğu Akdeniz Sorunu ve Türkiye, der. Kemal İnat, Muhittin Ataman ve Burhanettin Duran, SETA, İstanbul Nurşin Ateşoğlu Güney, “Türk Dış Politikasını Anlamak: Doğu Akdeniz Stratejisi”, Yeni Şafak, 3 Şubat 2020. Burhanettin Duran, “NATO’nun ‘Güncellenmesi ve Doğu Akdeniz Hamlesi?”, Sabah, 3 Aralık 2020; Burhanettin Duran, “Doğu Akdeniz’de Üç Kritik Adım”, Sabah, 28 Aralık 2019. Deniz İstikbal ve Hacı Mehmet Boyraz, “Doğu Akdeniz Enerji Kaynaklarına Ekonomi-Politik Bir Yaklaşım”, Kıbrıs Araştırmaları ve İncelemeleri Dergisi, Cilt: 3, Sayı: 5, (2019), s. 69-86. Yunus Furuncu, “Doğu Akdeniz’de Türkiye Dışındaki Ülkelerin Hidrokarbon Arama ve Sondaj Faaliyetleri”, Doğu Akdeniz Sorunu ve Türkiye, ed. Kemal İnat, Muhittin Ataman ve Burhanettin Duran, (SETA, İstanbul: 2020). International Energy Statistics”, EIA, www.eia.gov/international/data/world, (Erişim tarihi: 25 Mart 2020. “Oil Data: Upstream”, OPEC, www.opec.org/opec_web/en, (Erişim tarihi: 25 Mart 2020). “BP Statistical Review of World Energy, 2019 68th Edition”, BP, bp.com/content/dam/bp/business-sites/en/global/corporate/pdfs/energy economics/statistical-review/ bp-stats-review-2019-full-report.pdf, (Erişim tarihi: 25 Mart 2020. Doğal Gaz Piyasası Yıllık Sektör Raporları”, EPDK, www.epdk.org.tr, (Erişim tarihi: 25 Mart 2020); “Petrol Piyasası Yıllık Sektör Raporları”, EPDK, www.epdk.org.tr, (Erişim tarihi: 25 Mart 2020); “2018 Kömür Sektör Raporu”, TKİ, www.enerjiportali.com, (Erişim tarihi: 25 Mart 2020). Büşra Zeynep Özdemir, “Uluslararası Deniz Hukuku Perspektifinden Türkiye’nin Doğu Akdeniz Politikası”, Doğu Akdeniz Sorunu ve Türkiye, ed. Kemal İnat, Muhittin Ataman ve Burhanettin Duran, (SETA, İstanbul: 2020); Barış Şimşek, “Türkiye Gemileri Dörtlüyor”, Sabah, 17 Temmuz 2019. “Sondaj Gemisi ‘Kanuni’ Türkiye’de”, TRT Haber, 15 Mart 2010. “Doğu Akdeniz-2019 Davet Tatbikatı Tamamlandı”, TRT Haber, 20 Kasım 2019; “Fatih’i, Yavuz’u Milli Savaş Gemileri Koruyor”, Akşam, 27 Haziran 2019. Kaynak: TÜİK verilerinden derlenmiştir. Burhanettin Duran, “Türk Dış Politikası Ortadoğululaşıyor mu?”, Ortadoğu Yıllığı 2008, (Küre, İstanbul: 2009), s. 385-402.   گۆڤاری ئایندەناسی ژماره(4‌)تشرینی دووەمی 2020

درەو: یاسین ته‌ها- گۆڤاری ئاییندە ناسی   بەرایی هەڵبژاردنی پێشوەختە؛ بڕگەی یەكەمی كارنامەی حكومەتی ئێستای مستەفا كازمییە، بەو پێیەی ئەم حكومەتەی ئێستا شەرعیەتی لە خۆپیشاندانەكانی مانگی تشرینی 2019 وەرگرتووە كە بە “شۆڕشی تشرین” بەناوبانگە و  هەڵبژاردن یەكێكە لە داواكارییە سەرەكییەكانی. ئەم هەڵبژاردنە چاوەڕوانكراوە لەجیاتیی وادەی دەستووریی ئاسایی خۆی كە ئایاری (2022)ە، بڕیارە لە حوزەیرانی 2021 بەڕێوە بچێت، واتە سێ ساڵ پاش كۆتا هەڵبژاردن (ئایاری 2018) كە ئەم خولەی ئێستای ئەنجوومەنی نوێنەرانی لێ بەرهەم هات، لە هەناوی ئەویشەوە حكومەتی عادل عەبدولمەهدی دەرچوو كە پاش ساڵێك كاركردن، لەژێر گوشاری خۆپیشاندانە خوێناوییەكاندا دەستی لە كار كێشایەوە وەك یەكەم پێشینە لە “كۆماری 2003”. لەم توێژینەوەیەدا لەسەر ئەگەرەكانی بەردەم ئەو هەڵبژاردنە و نەخشەی چاوەڕوانكراوی ئەو جومگە گرنگە هەڵوێستە دەكەین، لەسەر هەردوو ئاستی سوننە و شیعە لە عێراق. ئەگەرەكانی ئەنجامدانی هەڵبژاردن سەرۆكوەزیران لە زۆربەی دیدار و لێدوان و فەرمانەكانیدا، جەخت لە سازكردنی هەڵبژاردنی پێشوەختە دەكاتەوە و لە ڕووی ڕێكارەكانیشەوە هەندێ هەنگاوی بۆ ناوە([1])، بەڵام گومان و قسەوباسی زۆر هەن لەسەر بەئاكامگەیشتنی ئەم پڕۆسەیە و تەنانەت هەندێ جار سازكردنی بە “وەهم”  ناو دەبرێت([2])، هۆكاری ئەم گومانەش دەگەڕێتەوە بۆ ئەو هەنگاوانەی كە ئەنجامدانی هەڵبژاردن پێویستی پێیەتی و لە دەقی كارنامەی حكومەتیشدا جێگیر كراوە، وەك: تەواوكردنی یاسای هەڵبژاردن، كاراكردنی كۆمسیۆنی هەڵبژاردن، جێبەجێكردنی تەواوەتیی یاسای حیزبەكان بۆ مسۆگەركردنی پاكوبێگەردیی پڕۆسەكە([3])، لەبەر ئەوەی یاساكەش فرەبازنەیە و لەجیاتیی 18 جاران، 83 بازنەیە، لە ڕووی تەكنیكییەوە ئامادەكاریی زۆری پێویستە. هەندێكیش قبووڵكردنی میدیایی هێزە سیاسییەكان بە ئەنجامدانی هەڵبژاردنی پێشوەختە بە جۆرێك لە پۆپۆلیزم دەبینن، كە بڕیاری ڕاستەقینەی دڵی سەركردەكان و نوخبەی بڕیاردەری ڕاستەقینەیان نییە، ئەمانە پێیان وایە هەر كات ڕێكارەكان كەوتنە سەر پێ، ئەوان دەبنە ڕێگر و ناهێڵن ببێتە ڕاستی و بچێتە بواری جێبەجێكردنەوە([4])،  بەڵام بەو پێیەی لە سەرەتای قەیرانی ئەم دواییەی عێراقەوە مەرجەعی باڵای شیعەكان عەلی سیستانی هەڵبژاردنی پێشوەختەی (دوور لە هەژموونی چەك) بە تاقە چارەسەری دەرچوون لە تەنگەژە زانیوە([5])، هەروەها هەندێك لە هێزە سیاسییە كاریگەرەكان هەمان بیروڕایان هەیە، لەپێش هەموویانەوە موقتەدا سەدر([6])، لەگەڵ چالاكانی شۆڕشی تشرین و هەندێك لە هێزە سیاسییە كاریگەرەكانی تر([7])، ئەگەری ئەنجامدانی لە ئەنجامنەدانی زاڵتر و زیاترە بە لەبەرچاوگرتنی ئەوەی مەرج نییە لە مانگی حوزەیرانی 2021دا ئەنجام بدرێت كە حكومەت وەك وادەیەك بڕیاری لێ داوە، بەتایبەت كە ئەو وادەیە لە بنەڕەتدا كێشەی تێدایە، یەكێك لەوانەش گەرمای وەرزەكەیە لە ناوەڕاست و باشووری عێراق، ئەمە جگە لە زۆر گومان و لەمپەری تر، وەك: ئامادەنەبوونی پەرلەمانتاران بۆ دەستبەرداربوونی ئەم خولە بەئاسانی، كێشەی زۆری هونەری پەیوەست بە دابەشكردنی بازنەكان، كۆتای ژنان، نەبوونی شارەزایی زۆر لەلایەن ئەم كۆمسیۆنە نوێیە و… هتد([8]). لایەنی جێبەجێكاری هەڵبژاردنیش كە كۆمسیۆنە، پێنج مەرجی داناوە بۆ سازكردنی هەڵبژاردن: (یاسای تایبەت، پێكهێنانی دادگای فیدراڵی، بودجە، تەواوكردنی میلاكی كۆمسیۆن، پاڵپشتی نێودەوڵەتی)([9])، كە سەرجەمیان كات و تێچوونی زۆریان هەیە بۆ ئەم دۆخەی عێراق. گۆڕانكارییە چاوەڕوانكراوەكان هەندێك پێیان وایە هەڵبژاردنی داهاتوو دۆخەكە قڵپ دەكاتەوە بەسەر هێزە دەسەڵاتدارەكانی ئێستا، بەو پێیەی یاسای هەڵبژاردن بازنەییە و دەرفەتی هەڵمەتی تایفی و مەزهەبیی تێدا نییە وەك جاران، بەڵكوو خەمە ناوچەییەكان و گوتارە گرووپبەندییەكان یەكلایی دەكەنەوە([10])، هەندێكی تر گرەو لەسەر كاریگەریی نەجەف و چاودێریی نێودەوڵەتی دەكەن لە كەمكردنەوەی هەژموونی هێزە چەكدارە باڵادەستەكان، بەتایبەت پاش ئەوەی سیستانی جەختی لە گرنگیی چاودێریی نێونەتەوەیی كردووەتەوە، ئەوەش لە مەزاجی نەجەف دەخوێنرێتەوە كە تووڕە بێت لە میلیشیا شوێنكەوتەكانی ئێران([11])، هەشن زیاتر دەڕۆن و ئەو هەڵبژاردنە بەكابووسێك دەبینن بۆ هێزە چەكدارەكان، بەتایبەت پاش ئەوەی لە هەندێ شاری باشووری عێراق بنكە و بارەگاكانیان كەوتە بەر ڕقی خۆپیشاندەران و سووتێنران، لە كاتێكدا پێشتر بە پیرۆز تەماشا دەكران([12]). بەڵام بەلای زۆرێكی ترەوە ئەگەری گۆڕانكاریی زیاتر وەك جۆرێك خۆشبینی دێنە بەرچاو، لە سایەی كۆنترۆڵكردنی سەرجەم جومگە گرنگەكانی سیاسەت و حوكمڕانی و دارایی دەوڵەت لەلایەن حیزب و هێزە ئایینی و مەزهەبییەكانەوە كە توانای خۆگونجاندن و سواربوونی هەموو شەپۆلێكیان هەیە([13])، بەتایبەت كە خۆپیشاندەران و گۆڕەپانەكانی ناڕەزایەتی تا ئێستا هیچ قەوارە و هێزێكی سیاسیی ئەوتۆیان پێك نەهێناوە تا بتوانێت نوێنەرایەتییان بكات، لە غیابی ئەم قەوارەیەشدا ئەوە هەر هێزە ڕێكخراوەكان چانسی بردنەوە و دووبارە شەرعیەت وەرگرتنەوەیان زیاترە، وەك ئەوەی كە لە ژیانی سیاسیی عێراقی پاش 2003دا بووە بە شتێكی تا ڕادەیەك نەگۆڕ و باو([14]). لە دەرەوەی ئەم دوو بۆچوونە، هەندێك هۆكاری تر كاریگەریی زۆریان هەیە لەسەر مەزاجی دەنگدەر و دەشێت لەنێوان هەڵبژاردنی ئایاری 2018 و ئەوەی داهاتوودا گۆڕانكاریی دروست بكەن. بۆ نموونە كاتێك هەڵبژاردنی پێشوو كرا، تازە عێراق لە هەناوی شەڕی داعش هاتبوویە دەرەوە، هێزەكانی حەشدی شەعبی بە هەموو باڵەكانیەوە (عێراقی و ئێرانی) وەك فریادڕەس تەماشا دەكران و خوێنی قوربانییەكان و وێنەی كوژراوەكانیان باڵی بەسەر كۆی دیمەنەكەدا كێشابوو، بەڵام بەم دواییانە كێشە و گومان و كێشەی زۆر لەسەر ناوبانگی ئەو هێزانە دروست بوون، بەتایبەت پاش سەرهەڵدانی ناكۆكی لە ڕیزەكانیان و بەریەككەوتنیان لەگەڵ گرووپە چەكدارەكانی سەر بە مەرجەعیەتی نەجەف([15])، هەر لەم میانەیەشدا زۆرێك لە بارەگای ئەو هێزانەی لایەنگری ئێرانن؛ كەوتە بەر سووتاندن و هێرش و پەلاماری خۆپیشاندەران([16]).  جگە لەوەش گرەوەكان لەسەر ئەوەن مەرجەعی باڵای شیعە عەلی سیستانی، هانی خەڵك بدات زۆرترین بەشداری لە هەڵبژاردنەكاندا بكەن بە مەبەستی گێڕانەوەی شەرعیەت و متمانە بۆ پڕۆسەی هەڵبژاردن لە لایەك و ڕێگرتن لە كاری ساختەكاری و پڕكردنەوەی كارتەكانی دەنگدان لە لاكەی تر([17]). لەمەش گرنگتر، باوەڕێك لەلای مستەفا كازمی و دەوروبەرەكەی هەیە كە 60%ی عێراق لە گەنجان پێك دێت، ئەوانیش سۆشیال میدیا و تەكنیك ئاڕاستەیان دەكات و وەك جاران پابەند نین بە بیروباوەڕە تەقلیدییەكانەوە([18]). ئەوانەی بڕوایان بە گۆڕانكاری هەیە لە هەڵبژاردنی داهاتوودا، باس لەوە دەكەن هێزە سیاسییە تەقلیدییەكانی عێراق بۆ پاراستنی پێگەی ئێستایان و ڕێگرتن لەو گۆڕانكارییە، تەنها دوو بژاردەیان لەبەر دەستە: ڕەتكردنەوەی یاسای نوێی هەڵبژاردن، بەتایبەت ئەگەر لە بەرژەوەندیی گەنجانی تازەپێگەشتوو و ناڕەزایەتییەكان بێت بەپێی سیستمی فرەبازنەیی، لەگەڵ پەكخستنی سازكردنی هەڵبژاردنی پێشوەختە بە هەر ڕێگایەك بێت و لەمپەر بۆ دروستكردنی، ئەمەش بە واتای خۆسەپاندن بە زەبری هێز دێت و دژی خواستی نەجەف و سیستانی و نەتەوە یەكگرتووەكانە([19]) كە پێناچێت بیانەوێت خۆیان بخەنە ئەو گێژاوەوە، بەتایبەت پاش ئەوەی سیستانی لە دیداری نوێنەری تایبەتی سكرتێری گشتیی نەتەوە یەكگرتووەكان لە عێراق، جنینن بلاسخارت (ئەیلوولی 2020) زیاتر لە جاران جەختی لە گرنگیی هەڵبژاردنی پێشوەختە كردەوە بۆ دەرچوون لە قەیرانی ئێستا([20]).         نەخشەی گریمانكراوی هەڵبژاردن لەسەر ئاستی شیعە: سەرباری ئەوەی هەڵبژاردنی پێشوەختەی داهاتوو جێگەی مشتومڕە و لە بەرداشی ئەگەر و نەگەردایە، بەتایبەت وادەی سازكردنەكەی، بەڵام نەخشەی هێزە بەشدارەكانی لە ئێستاوە خەریكە تانوپۆی ڕوون دەبێتەوە. خۆپیشاندانەكانی تشرینی 2019، وێستگەیەكی گرنگ بوون لە گۆڕینی نەخشەی سیاسیی هێز و ڕاسپاردنی مستەفا كازمی بۆ پێكهێنانی ئەم كابینەیەش بە دانپێدانانی خۆی هەر بەرەنجامی ئەم وێستگە گرنگە بووە كە دەوروبەری 600 كوژراو و هەزاران برینداری لێ كەوتووەتەوە([21]). خۆپیشاندانەكان هێزە سیاسییەكانی شیعەیان بەش كردووە بۆ دوو ڕەوتی سەرەكی، كە پشتیوانانی خۆپیشاندەران و لایەنگران و شوێنكەوتووانی هێزە سیاسییە ئیسلامییە تەقلیدییەكانی شیعەن([22])، هەندێ نووسەری ڕاستڕەوی شیعەش ئەم دوو بەرەیەیان ناو ناوە “شیعەی حەشد” و “شیعەی جۆكەر”([23])، كە ئەوەی دووەم ئەدەبیاتی هێزە توندڕەو و نزیكەكانی ئێرانە دەرهەق بە خۆپیشاندەرانی تشرین كە گوایە زادە و دەرهاویشتەی كولتووری فیلمی ئەمەریكیی جۆكەرن (Joker)، ئەم فیلمەش كە ساڵی 2019 بەرهەم هێنراوە و وێنەی پاڵەوانەكەی جاربەجار لە خۆپیشاندانەكانی عێراقدا دەبینرا، پاڵەوانەكەی “خواكین فینیكس”ە، باس لە كەسێكی دەروون نەخۆش دەكات كە پاش تێوەگلانی لە كوشتن و بڕین وەها تەماشا دەكرێت كە دەیەوێ تۆڵە لە چینی پایەدار و دەستڕۆیشتوو و دەوڵەمەندی وڵات بكاتەوە و وەك پاڵەوان ناوی دەڕوات([24]). لەنێوان ئەم دوو ڕەوتەشدا، هێزگەلی شیعە هەن كە تا ڕادەیەك لە ناوەڕاستدان، لە چەشنی ڕەوتی سەدر كە لە خۆپیشاندانەكاندا چووە ناو گۆڕەپانەكان و پاڵپشتیی خۆپیشاندانەكانی ڕاگەیاند و خۆی وەك عاشقی “شۆڕشی تشرین ناساند”([25])، بەڵام لە ئێستادا كێشەی قووڵ كەوتووەتە نێوان خۆپیشاندەرانی گەنج و خودی موقتەدا سەدر بە جۆرێك سەنگەری خۆی جیا كردووەتەوە لێیان([26])، نەك هەر ئەوە، بەڵكوو وەك پلارێك بە “تشرینییەكان” ناویان دەبات و باس لەوە دەكات لە ڕیزەكانی ئەواندا هەڵگری بیری “لادەر – منحرف” هەن و مەیلی داعش و بەعس هەن([27]). قورسایی ڕەوتی سەدر لە هەڵبژاردنەكاندا لەوەدایە كە جەماوەریترین تەوژمی ناو شیعە هەژارەكانە، 30 كورسیی لە یەكەم هەڵبژاردنی 2005 بەدەست هێناوە، لە 2010دا كورسییەكانی بەرز كردووەتەوە بۆ 39 كورسی([28])، لە 2014دا گەیشتووەتە 36 كورسی و لە 2018دا لە ڕێگای هاوپەیمانێتیی سائیرون بە بەدەستهێنانی 54  كورسی بە پلەی یەكەم هات لەناو هەموو لیستە بەشدارەكانی هەڵبژاردن([29])، هاوكات لەگەڵ ئەمەشدا ڕەوتی سەدر خاوەن شوناسێكی سیاسیی دیاریكراو و كۆنكرێتی نییە و لە یەك كاتدا ئایین و سیاسەت و كۆمەڵایەتیی تێكەڵاو كردووە و هەمیشە لە ناوچەی خۆڵەمێشیدایە([30])، هەر لەبەر ئەمەش پێی وتراوە “پیاوی سوپرایز و خۆگونجاندن لەگەڵ دژیەكییەكان”([31])، هەروەها هەندێكی تر زیاتر ڕۆیشتوون و ناویان ناوە “سەرۆكی دژیەكییەكان”([32])، وەك ئاماژەیەك بۆ ئەوەی لەسەر هیچ ئۆقرە ناگرێت و ئەگەری دروستكردنی سوپرایزی هەیە، بەتایبەت زۆر دەوترێت كە جارێكی تر بەتەمای یەكەمی و كۆنترۆڵكردنی دیمەنەكەیە. بە هۆی هەستكردنی هێزە سیاسییە تەقلیدییەكانی شیعەشەوە بە كۆنبوونی گوتار و سووتانی ناوەكانیان، هەندێكیان لە هەوڵی دروستكردنی ڕووكار و داتاشینی ناونیشانی نوێدان بۆ قەوارەكانیان، بۆ ئەوەی لە لایەك خۆیان ڕزگار بكەن لە میراتی حوكمڕانیی خراپی ساڵانی ڕابردوو، لە لایەكی ترەوە دەستكراوەتر بن لە درووشم و بانگەشە و بەر دیواری ئایدۆلۆژیا و پێداگریی پیشوویان نەكەون، لەم میانەیەشدا هەست بە چالاكیی زۆری وەزیری پێشووی كاروباری كۆمەڵایەتی؛ محەمەد شیاع سوودانی دەكرێت كە دەوترێت بەتەمای دامەزراندنی حزبێكی نوێ بێت وەك ڕووكارێك بۆ حیزبی دەعوە یان پاش ئەوەی لە سەروبەندی كاندیدبوونیدا بۆ سەرۆكوەزیران، وازهێنانی لەم حیزبە ڕاگەیاند([33])، هەمان گومان و ئەگەریش بۆ سەلاح عەرباوی بەڕێوەبەری پێشووی نووسینگەی عەمار حەكیم ڕاستە، كە پاش كشانەوەی لە ڕەوتی حیكمە لە ئایاری 2020، بە پاساوی خۆئازادكردن لە هەندێ كۆتوبەند([34])، دوای چوار مانگ بزووتنەوەیەكی گەنجانەی بە ناوی (هۆشیاریی نیشتمانی – الوعي الوطني) ڕاگەیاند كە بە قسەی خۆی ئامانج لێی گۆڕینی حوكمڕان و پەرەپێدانی حوكمڕانییە([35]) . جگە لەوانەش، هادی عامری سەرۆكی ڕێكخراوی بەدر گوتارێكی میانڕەوانەتری لە سەركردە چەكدارەكانی شیعە گرتووەتە بەر و بەدوای ڕووكارێكی مەدەنیدا دەگەڕێ بۆ هێزە چەكدارییەكەی. ماليكى لە ڕێگەی “یاسر سخیڵی” زاوایەوە ئیش لەسەر گەنجان دەكات و گرووپە چەكدارەكانی حەشدیش بەرەو گوتاری جیهادی و نیشتمانیی عێراقچیانە دەڕۆن([36]). لەسەر ئاستی سوننە: هێشتا ئاسەوار و لێكەوتەی شەڕی داعش سێبەری بەسەر هێزە سوننەكانەوە ماوە، ئاوارەبوون و دابڕان و بزربوونی خەمی گشتی لەسەر ئاستی تایفەكەیان؛ دەرگای بۆ دەركەوتنی تەوژم و هێزی لۆكاڵیی نوێ كردووەتەوە. سیمای سەرەكیی ژیانی سیاسی لەناو سوننەی عێراقدا دوو خاڵی سەرەكییە، كە بریتین لە: بزربوونی دەسەڵاتێكی ناوەندی و ئاوابوونی كێشەی هاوبەش كە بزاوتی عەرەبی سوننە ئاڕاستە بكات، لەگەڵ دابەشبوون و كەرتبوونی سەركردایەتی و شوناسی هێزە سوننەكان بۆ هێزی لۆكاڵی كە هەریەك گوزارشت لە پارێزگایەك یان دەڤەرێكی جوگرافی دەكات و هەریەك لەو هێزانەش یان سیاسیی ناسراو یان سەرۆكهۆز یان سەرمایەدار ئاڕاستەیان دەكات([37])، سەرباری ئەم پەرتەوازەییەش هەمیشە ئەو هێزە سوننەیەی كە جڵەوی بەدەست بێت لە بەغدا یان جۆرێك لە مەركەزیەت و كاریگەریی زیاتر وەردەگرێت([38])، هەر لەم سۆنگەیەشەوە دەركەوتووترینیان لەناو هێزە لۆكاڵییەكانی سوننەشدا لە میدیاكاندا تەوژمی ئەنبارە كە محەمەد حەلبوسی ڕێبەرایەتی و نوێنەرایەتیی دەكات كە لە هەوڵی تێپەڕاندنی شارەكەی خۆیشیدایە و لە تكریت و موسڵ و دیالە هەوڵی دروستكردنی بنكە و پێگە و لایەنگر دەدات([39])، لەم میانەیەشدا ناوبراو لافیتە و پۆستەری لە بەعقوبە بڵاو كردووەتەوە كە پاڵپشتی لە گەنجان دەكات بە وێنەی خۆیەوە، لە كاتێكدا دیالە بە پێگەی سەلیم جبوری سەرۆكی پێشووی پەرلەمان لەقەڵەم دەدرێت([40]). ڕكابەری سەرەكیی حەلبوسی لە پێگەی خۆیدا، حیزبی ئیسلامیی تەقلیدیی ڕەگوڕیشە ئیخوانییە لەگەڵ تەوژمی خەمیس خەنجەر كە لەلایەن ئەنقەرەوە پاڵپشتی دەكرێت و پەیوەندییشی لەگەڵ قەتەردا زۆر باشە، بەو پێیەی ئەنقەرە و دەوحە لەسەر یەك هێڵی سیاسین([41]). لە پەنا ئەم هێزانەشدا، گرووپی تری لۆكاڵیی سوننە زۆرن، لە چەشنی ئەبو مازن لە سەلاحەدین و نوجێفییەكان و خالید عوبێدی لە موسڵ و مشعان جبوری و ساڵح موتڵەگ لە دەوروبەری تكریت و ناوەڕاستی عێراق، سەرجەم ئەمانەش لە ئێستادا سەرقاڵی جموجووڵن بۆ یەكلاییكردنەوەی چۆنیەتیی بەشداریكردنیان لە هەڵبژاردنەكان و هەڵوێست و لێدوانەكانیان لە هەڵمەتی پێشوەختەی هەڵبژاردندا. سوننەكان نەیانتوانی لە چەشنی شیعە و كورد لەم خولەی پەرلەماندا (2018-2022) هاوپەیمانێتییەكی یەك ڕیز پێك بهێنن، باوەڕ وەهایە ئەم پەرتەوازەییەش درێژە بكێشێت بۆ هەڵبژاردنی چاوەڕوانكراو و بەسەر پەرلەمانی داهاتووشدا زاڵ ببێت. كۆڵەكەی هێزە سوننەكان لە ئێستادا حەلبوسی (40 كورسی)، پاشان خەمیس خەنجەر و نوجێفی پێك دێت، هەریەك لەم لایەنانەش قووڵاییەكی هەرێمایەتییان هەیە و لە كاتێكدا خەنجەر و نوجێفی بەئاشكرا لە ئەنقەرەوە نزیكن، محەمەد حەلبوسی بەوە تۆمەتبارە كە نوێنەرایەتیی “سوننەی ئێران” دەكات([42])، لە دەرەوەی ئەمانەش سەركردەكانی وەك ئەحمەد جبوری (ئەبو مازن)ی پارێزگاری پێشووی ئەنبار، پەیوەندییەكی باشی لەگەڵ هێزە شیعەكانی حەشد هەیە و بڕوا وەهایە چاوپۆشیكردن لە دۆسیە یاساییە زۆرەكانی، پەیوەندیی بەو ڕێككەوتنە نهێنییەوە هەبێت كە لەگەڵ شیعەی حوكمڕاندا كردوویەتی لەدوای قۆناغی داعش، بەتایبەت هاوپەیمانێتیی فەتح و هێزەكانی حەشد([43]). سیناریۆكانی بەردەم هەڵبژاردنی ئایندە لەبەر ڕۆشنایی ئەو پێدراوانەی سەرەوە، دەكرێت پێشبینیی ئەم سیناریۆ و پێشهاتانە بكرێت بۆ هەڵبژاردنی ئایندەی عێراق. – ئەگەر ڕێگری دروستكردن و پەكخستنی هەموو كاتێك هەیە، بەتایبەت ئەگەر یاساكە بە جۆرێك بێت كە لە بەرژەوەندیی هێزە تەقلیدییەكان نەبێت، ئەوانەی لە فرەبازنەیی زەرەرمەند دەبن و كوتلەی دەنگدەری گەورە و كۆیان نییە (دەوڵەتی یاسای مالیكی) و دەنگدەرەكانیان پەرشوبڵاوە و بەردەوام دژی دەوەستنەوە، بەڵام ئەگەری سازكردنی زیاترە بە هۆی گوشاری سیستانی و پاڵپشتیی نەتەوە یەكگرتووەكان. – نەخشەی هێزە سیاسییەكانی بەشدار لە هەڵبژاردنی عێراق، لەسەر سێ ئاڕاستە بنەڕەتی دەبێت، هێزە كۆمەڵایەتی و گەنجانەكانی خۆپیشاندەر كە هێشتا بەتەواوەتی نەخەمڵیون، هێزە تەقلیدییەكانی پاڵپشتی خۆپیشاندەر، هێزە نەیار و ڕكابەرەكانی خۆپیشاندان، لەم نێوانەشدا هەندێ لە هێزە كۆنەكان هەوڵی خۆنمایشكردن دەدەن لە قاڵبی هێز و لەژێر نوێدا. – پرسیار و ئەگەر و شیكار و لێكدانەوەی جیاجیا هەیە لەسەر پێگەی سەرۆكوەزیران لە هەڵبژاردنی داهاتوودا، ئایا لیست دروست دەكات؟ ئەگەر دروستی كرد، لە كێ پێك دێت؟ ئەگەر دروستی بكات، ئەگەری سەركەوتنی چەندە؟ ئەگەریش دروستی نەكات، ئایا چانسی هەیە بمێنێتەوە؟ ئەم دۆسیەیە تا ئێستا بەفەرمی بێدەنگیی لێ دەكرێت، بەڵام ئەگەر كازمی لیستی ڕاستەوخۆش دروست نەكات -ئەگەرێكی دوورە-، بێگومان ناڕاستەوخۆ دەچێتە پشت هەندێ لەو هێزە مەدەنی و كۆمەڵایەتییە نوێیانەی لە هەناوی خۆپیشاندانەكانەوە لەدایك دەبن، هەر هیچ نەبێ بۆ مسۆگەركردنی دۆزینەوەی پێگەیەكی پەرلەمانی بۆ خۆی لە خولی داهاتوودا. – ئەگەری گۆڕانكاری؛ ئەگەرێكی بەهێزە بە هۆی فرەبازنەیی، گۆڕانی مەزاج، دەركەوتنی هێزی نوێ و لە هەمووشی گەورەتر لێكەوتەكانی كۆرۆنا، بەڵام ئەوەی دەوترێت ئەو گۆڕانە ڕیشەیی بێت و دۆخی عێراق قڵپ بكاتەوە، ناگونجێت لەگەڵ توانا و پاڵپشتیی ناوخۆیی و دەرەكی و هێزە چەكدارەكان و میلیشیا مەزهەبییە دەسەڵاتدارەكان. – بە هۆی یاسای هەڵبژاردنەوە كە فرەبازنەییە و هەڵبژاردن جۆرێك لە خۆكاندیدكردنی تاكەكەسییە، پێشبینیی پەرەسەندنی پۆپۆلیزم و گوتاری ناوچەیی و هەڵكشانی خەڵكانی بێ باكگراوەند بەهێزە لەگەڵ كارابوونی ڕۆڵی بازنە كۆمەڵایەتییەكانی چەشنی عەشیرەت و هۆز، كە توانای یەكلاییكردنەوەی زۆر كورسیی هەڵبژاردنیان هەیە. – ئەگەریش هەڵبژاردن سەری گرت بەو سیستمی فرەبازنەییە، ئەوە كێشەی قووڵتر و گەورەتر بۆ دروستكردنی زۆرینەی سیاسی لە پەرلەمانی داهاتوودا دروست دەبێت، بە هۆی پەرتەوازەیی كورسییەكان و بەئەستەم لیستی پەرلەمانی زۆرینە دروست دەبێت كە (50+1) كورسییەكانی هەبێت تا كاندیدی سەرۆكوەزیران پێشكەش بكات. بۆ ھیچ کەس، دەزگا و لایەنێک نییە، بەبێ ئاماژەدان بە ناوی گۆڤاری ئایندەناسی، ژمارە و رۆژی دەرچوونی ئەم بابەتە بڵاوبکاتەوە ______________________________________________________________________ سه‌رچاوه‌كان    ([1])  الصباح (4/10/2020) الكاظمي يوجه بتسريع التسجيل البايومتري، https://alsabaah.iq/32179/%D8%A7%D9%84%D9%83%D8%A7 (متاح: 10/10/2020)  ([2])  فرهاد علاء الدین (10/8/2020)، وهم الانتخابات المبكرة في العراق، https://www.washingtoninstitute.org/ar/fikraforum/view/earl (متاح:9/10/2020)  ([3])  ناس نیوز (24/9/2020)، المنهاج الوزاري لحكومة المكلف مصطفى الكاظمي، https://www.nasnews.com/view.php?cat=29702 (متاح: 4/10/2020)  ([4])  يحيى الكبيسي (6/8/2020)، العراق: عن الانتخابات المبكرة التي لن تحدث!، https://www.alquds.co.uk/%D8%A7%D9%84%D8%B9%D8%B1%D8%A7%D9%82- (متاح: 3/10/2020)  ([5])  أندبندت عربیة (20/12/2020)، السيستاني: الانتخابات المبكرة الحل الوحيد للأزمة… والأحد مهلة جديدة لتكليف شخصية بتشكيل الحكومة، https://www.independentarabia.com/node/80236/ (متاح: 10/10/2020) مقتدى السيد محمد الصدر (3/10/2020)، تغريدة على تويتر، https://twitter.com/Mu_AlSadr/status/1312135731700137984 (متاح: 1/10/2020)  ([6])  مقتدى السيد محمد الصدر (3/10/2020)، تغريدة على تويتر، https://twitter.com/Mu_AlSadr/status/1312135731700137984 (متاح: 9/10/2020)  ([7])  العربي الجدید (7/5/2020)، الانتخابات المبكرة… ورقة الكاظمي للتعامل مع الاحتجاجات العراقیة https://www.alaraby.co.uk/%D8%A7%D9%84%D8%A7%D9%86 (متاح: 10/10/2020)  ([8])  الصباح (8/8/2020)، القانونية النيابية تحدد عوائق إجراء الانتخابات المبكرة، https://alsabaah.iq/28432/%D8%A7%D9%84%D9%82%D8%A7%D9%86%D9%88%D9  (متاح: 5/10/2020)  ([9])  ألترا عراق (14/9/2020)، المفوضية تعلّق على بيان السيستاني: مستعدون بـ5 شروط، https://ultrairaq.ultrasawt.com/%D8%A7%D9%84%D9%85%D9%81%D9%88%D8%B6 (متاح: 5/10/2020)  ([10])  أمير المفرجي (9/9/20)، لغز الانتخابات المبكرة في العراق، https://www.alquds.co.uk/%D9%84%D8%BA%D8%B2-  (متاح:9/10/2020)  ([11])  المدى (5/10/2020)، معهد كارنيغي: مزاج النجف بدأ يميل لمعارضي التدخلات الإيرانية، https://almadapaper.net/view.php?cat=230474 (متاح: 1/10/2020)  ([12])  العرب الدولیة (8/10/2020)، غضب الشارع العراقي يقلّل حظوظ الميليشيات في تجديد حضورها بالبرلمان، https://alarab.news/%D8%BA%D8%B6%D8%A8- (متاح: 7/10/2020)  ([13])  صادق الطائي (8/12/2019)، إحذروا فخ الانتخابات المبكرة في العراق، https://www.alquds.co.uk/%D8%A5%D8%AD%D8%B0%D8%B1%D9%88%D8%A7- (متاح: 7/10/2020)  ([14])  زیاد ولید (23/12/2019)، الانتخابات المبكرة بين المرجعية والدستور والجدوى، https://ultrairaq.ultrasawt.com/%D8%A7%D9%84%D8%A7%D9%86%D8%AA%D8%AE (متاح: 7/10/2020)  ([15])  المدى، معهد كارنیغی… مصدر سابق  ([16])  الحرة (22/8/2020)، جنوب العراق يشتعل غضبا.. هدم وإحراق مقرات أحزاب موالية لإيران، https://www.alhurra.com/iraq/2020/08/22/%D8%AC%D9%86%D9%88%D8% (متاح: 8/10/2020)  ([17])  العرب (4/10/2020)، “فتوى” من السيستاني لإنجاح الانتخابات المبكرة في العراق، https://alarab.co.uk/%D9%81%D8%AA%D9%88%D9%89-%D9%85%D9%86- (متاح: 6/10/2020)  ([18])  ناس نیوز (3/10/2020)، الكاظمي يتحدث عن مرحلة التكليف والعلاقة مع الولايات المتحدة، https://www.nasnews.com/view.php?cat=41867 (متاح: 7/10/2020)  ([19])  أخبار الخليج (6/10/2020)، النجف تساند الحراك الشعبي وخياران للأحزاب الدينية للاحتفاظ بالسلطة، http://www.akhbar-alkhaleej.com/news/article/1223689 (متاح: 3/10/2020)  ([20])  موقع السیستاني، استقبال سماحة السيد (دام ظلّه) الممثلة الخاصة للأمين العام للأمم المتحدة، https://www.sistani.org/arabic/archive/26461/ (متاح: 3/10/2020)  ([21])  ناس نیوز (3/10/2020)، الكاظمي يتحدث عن مرحلة التكليف والعلاقة مع الولايات المتحدة، https://www.nasnews.com/view.php?cat=41867 (متاح: 11/10/2020)  ([22])  المسلة نيوز (4/10/2020)، محللون: الساحة الشيعية منشطرة، http://almasalah.com/ar/NewsDetails.aspx?NewsID=198574 (متاح: 11/10/2020) سلیم الحسني (4/10/2020)، شیعة الحشد وشیعة الجوكر، https://t.me/saleemalhasani  ([23])  المسلة نيوز (4/10/2020)، محللون: الساحة الشيعية منشطرة، http://almasalah.com/ar/NewsDetails.aspx?NewsID=198574 (متاح: 11/10/2020) سلیم الحسني (4/10/2020)، شیعة الحشد وشیعة الجوكر، https://t.me/saleemalhasani (متاح: 3/10/2020)  ([24])  عربي بوست (7/10/2019)، 9 أشياء يجب أن تعرفها عن الفيلم الذي أقلق شرطة نيويورك، https://arabicpost.net/%D9%81%D9%86- (متاح: 4/10/2020)  ([25])  مقتدى السيد محمد الصدر (2/2/2020)، تغريدة على تويتر، https://twitter.com/Mu_AlSadr/status/1224026664063115267/photo/1  (متاح: 2/10/2020)  ([26])  عمر ستار (19/2/2020) هل انتهى التحالف “السرياليّ” بين المدنيّين والصدر؟ https://www.al-monitor.com/pulse/ar/contents/articles/originals/2020/02/iraq-protests-sadrists- (متاح: 3/10/2020)  ([27])  مقتدی السید محمد الصدر (6/ 10/2020)، تغریدة علی تویتر، https://twitter.com/Mu_AlSadr/status/1313520652872232961 (متاح: 8/10/2020)  ([28])  السوداني، مناف محمد(2011)، الانتخابات والأحزاب السياسية، التفسير المكاني للانتخابات 2005-2010 البرلمانية في العراق انموذجاً، دار الكتب والوثائق، بغداد، 68-69.  ([29])  سی ان ان العربیة، مصدر سابق؛ بی ب سی العربیه (19/5/2018): تحالف الصدر يفوز بالانتخابات البرلمانية في العراق، موقع بي بي سي عربي، https://www.bbc.com/arabic/middleeast-44178665 (تاريخ الزيارة: 4/3/2020).  ([30])  حارث حسن (28/3/2008)، “التيار الصدري: بين الشعبية والشعبوية”، مجلة الحوار المتمدن الإلكترونية، العدد 2234، http://www.ahewar.org/debat/show.art.asp?aid=129588&r=0 (متاح: 25/2/2020).  ([31])  محيى الدين حسين (24/10/2017): مقتدى الصدر.. رجل المفاجآت والتكيف مع التناقضات!، https://www.dw.com/ar/%D9%85%D9%82%D8%AA%D8%AF%D9%89- (متاح: 11/10/2020)  ([32])  الحرة (4/10/2020)، “زعيم المتناقضات”.. مقتدى الصدر يحيّر العراقيين ببيان “انتفاضة تشرين والأحزاب الفاسدة”، ttps://www.alhurra.com/iraq/2020/10/04/%D8%B2%D8%B9%D9%8A%D9% (متاح: 10/10/2020)  ([33])  المدى (9/8/2020)، خريطة متوقعة للأحزاب المتنافسة في انتخابات 2021: ثلاثة اتجاهات محورها قوى تشرين، https://www.almadapaper.net/view.php?cat=229140 (متاح: 6/10/2020)  ([34])  ناس نیوز (5/5/2020)، صلاح العرباوي يكشف سبب انسحابه من تيار الحكمة، https://www.nasnews.com/view.php?cat=30062 (متاح:6/10/2020)  ([35])  صلاح العرباوی (19/9/2020)، تغريدة على تويتر، https://twitter.com/salahalarbawi/status/1307339911020806144 (متاح: 11/10/2020)  ([36])  مركز الإمارات للسياسات (30/9/2020)، استعدادات القوى الشيعية للانتخابات المقبلة في العراق، https://epc.ae/ar/brief/preparations-of-shiite-factions-for-upcoming-elections-in-iraq (متاح: 12/10/2020)  ([37])  ريناد منصور (3/3/2016), المأزق السنَّي في العراق، https://carnegie-mec.org/2016/03/03/ar-pub-62945  ([38])  نون بوست (6/1/2018)، سُّنة العراق.. خريطة معقدة وتفتيت يهددهم ومشاركة انتخابية مشروطة، https://www.noonpost.com/content/21502 (متاح: 12/10/2020)  ([39])  صباح ناهي (21/9/2020)، قراءة مبكرة لمسار التأهل للانتخابات العراقية المقبلة، https://www.independentarabia.com/node/153331/%D8%B3%D9%8A%D8%A7%D8%B3%D8%A9/%D8% (متاح: 12/10/2020)  ([40])  المدى، خریطە متوقعة… مصدر سابق.  ([41])  صباح ناهي، مصدر سابق.  ([42])  ناس نیوز (30/9/2019)، تقرير أميركي عن خارطة حراك الزعامات السنّيّة في العراق: صراع على السلطة والنفوذ!، https://www.nasnews.com/view.php?cat=19365 (متاح: 12/10/2020)  ([43]) عراق ألترا (15/6/2019)، عبر سلم “الدماء والأموال”.. “عراب” بيع المناصب في كركوك والأنبار!، https://ultrairaq.ultrasawt.com/%D8%B9%D8%A8%D8%B1- (متاح: 12/10/2020)   گۆڤاری ئایندەناسی ژماره(4‌)تشرینی دووەمی 2020

درەو: بەپێی راپۆرتێكی فەرمانگەی وردبینی لە پارێزگای سلێمانی كە سەر بە دیوانی چاودێری داراییە و راپۆرتەكە لەسەر زانكۆی پۆلیتەكنیكی سلێمانییە، پارەیەكی زۆر لەلایەن ئەو زانكۆیەوە بەدەر لە رێنمایی خەرجكراوە، چەندین "كەموكوڕیی گەورە و جێی گومان"یش لە رێكارە كارگێڕی و ژمێریاری و یاساییەكانی زانكۆكەدا هەن.   پارەی حكومەت لەلای زانكۆیە   بەگوێرەی راپۆرتەكە لێژنەیەكی فەرمانگەی وردبینی لە رۆژی 12/3/2019 دەستی بە وردبینی لە كارەكانی ئەو زانكۆیە كردووە و رۆژی 14/5/2019 كارەكانی تەواو بوون.   بەپێی راپۆرتەكە، خەرجیی زانكۆكە لە بودجەی ئاسایی 15 ملیار و 630 ملیۆن و 417 هەزار دینار بووە، خەرجییەكانی لەسەر سندوقی داهاتی خۆیشی 4 ملیار و 360 ملیۆن و 649 هەزار دینار بووە، داهاتی زانكۆكەش لەسەر سندوقی داهات 4 ملیار و 689 ملیۆن و 426 هەزار دینار بووە.    راپۆرتەكە دەڵێت: زانكۆكە ژمارەیەكی زۆر پسوولەی پارە وەرگرتنی بەسەر كۆلێژ و پەیمانگەكاندا دابەشكردووە، بەڵام دەوروتەسلیم نەكراوە. لە ساڵانی پێش 2017ـش تۆمارگەی كەلوپەلیان راگرتووە، داوا كرا بەپێی رێنماییەكان كاری لەسەر بكرێت، بەڵام كاری لەسەر نەكرا، ئەمەش بەپێی یاسای ژمارە 2ـی ساڵی 2008 بە "سەرپێچیی دارایی" دادەنرێ.   تێبینییەكانی دیوانی چاودێریی دارایی لەبارەی داهاتی زانكۆكە ئەمانەن: ملیارێك و 9 ملیۆن و 365 هەزار دینار بەشی خەزێنەی حكومەت بووە لە سندوقی داهاتی ساڵەكانی 2016 و 2017، بەڵام تا كۆتایی كاری لیژنەكە، بۆ وەزارەتی دارایی نەنێردراوە.    لەبارەی خەرجییەكانی بودجەی ئاسایی زانكۆكەش، لە راپۆرتی لیژنەكەدا هاتووە: "دوو ملیۆن و 320 هەزار دینار بۆ چاككردنەوەی ئۆتۆمبێل تەرخانكراوە، بەڵام مامەڵەی دوو پسولە بەبێ واژۆ راییكراون و وردبینیشیان تێدا نەكراوە، جیاوازییەكی زۆریش لە واژۆی ئەندامانی لیژنەكە لەسەر زۆربەی پسولەكان هەیە. 14 ملیۆن و 444 هەزار دیناریش بۆ كڕینی گاز و بەنزینی ئۆتۆمبێلەكانی سەرۆكایەتی زانكۆ لەلایەن لیژنەی سووتەمەنییەوە خەرجكراوە، كە سەرۆكی لیژنەكە شوفێری سەرۆكی زانكۆیە و بڕوانامەی نییە".   دەرماڵە بەدەر لە رێنمایی دراوە   لەبارەی دەرماڵەكانیش، بڕی 100 هەزار دینار بۆ لێپرسراوی هۆبەكان "بەپێچەوانەی یاسای خزمەتی راژەی زانكۆیی" خەرجكراوە. بەپێی یاساكە، پارەكە بۆ لێپرسراوی بەشە كارگێڕییەكان خەرج دەكرێت نەك هۆبەكان "هەروەها 25%ی دەرماڵەی مەترسی بۆ ئەو فەرمانبەرانەی ناونیشانی تەكنیكی پیشەییان هەیە خەرجكراوە، كە بەپێی رێنمایی وەزارەتی دارایی دەبێت 20% بێت. 100% دەرماڵەی خۆتەرخانكردنی زانكۆیی بۆ فەرمانبەران بە ناونیشانەكانی (راگەیاندنكار، پڕۆگرامساز، راهێنەری وەرزشی) خەرجكراوە لە كاتێكدا ئەو ناونیشانانە لە لیستی یاسای خزمەتكردنی زانكۆییدا نین. 100% دەرماڵەی خۆتەرخانكردنی زانكۆیی بۆ چەند فەرمانبەرێكیش بە ناونیشانی (موعید) خەرجكراوە كە دەبێت ئەو فەرمانبەرانە لە بەشەكانی خۆیان بەشداریی وانەی پراكتیكی بكەن، بەپێچەوانەوە شایستەی وەرگرتنی 75%ی دەرماڵەكەن".   خەرجییەكانی سندووقی داهات   دیوانی چاودێری دارایی تێبینی لەسەر خەرجییەكانی سندوقی داهاتیش هەیە كە زانكۆ لیژنەیەكی سێ كەسی بۆ پێكهێناوە "بەڵام ئەو كەسانە جێی گومانن". چونكە سەرۆكی لیژنەكە بەڕێوەبەری نووسینگەی سەرۆكی زانكۆیە، كاری لەنێو سەرۆكایەتی و لەگەڵ سەرۆكی زانكۆیە، لەكاتێكدا سەرۆكایەتی ئەو لیژنەیە پێویستی بە كاتێكی زۆرە بۆ راپەڕاندنی كارەكانی. ئەندامێكی لیژنەكەش لێپرسراوی خزمەتگوزارییە و كاری دیكەی هەیە، میلاكیشی لەسەر پەیمانگای تەكنیكی سلێمانییە و بەشێوەی تەكلیف لە سەرۆكایەتی زانكۆكە كاردەكات.   هەر لەبارەی خەرجییەكان "بڕی 131 ملیۆن و 176 هەزار دینار پاكتاوكراوە بەمەبەستی نۆژەنكردنەوەی سەرۆكایەتی زانكۆ، بەڵام فەرمانی زانكۆیی بۆ نۆژەنكردنەوە و خەرجی دەرنەكراوە، لەكاتێكدا هەر بڕە پارەیەك لە سندوقی داهات خەرج بكرێ، پێویستە فەرمانی خەرجكردنی لە ئاستی وەزارەت یان زانكۆ هەبێت، دەرخستەش بۆ دەستنیشانكردنی پێویستییەكان و نرخەكانیان نەبووە، بەڵكو پشت بە پسولەی خەرجییەكان و پاكتاوكردنیان بەستراوە، واتە راستەوخۆ كارەكە كراوە و كۆنووسی وەرگرتن بۆ وەرگرتنی پارەكە رێكنەخراوە".   پاداشتی فەرمانبەران   لە پێداچوونەوەی كۆتایی داهاتدا دەركەوتووە 95 ملیۆن 948 هەزار دینار بۆ پاداشتی فەرمانبەرانی سەرۆكایەتی زانكۆ و كۆلێژ و پەیمانگاكان خەرجكراوە "ئەمەش پێچەوانەی بڕگەی 6 لە رێنمایی دارایی ژمارە (4) لە 18/1/2017ـیە كە ئاماژەی بە راگرتنی خەرجكردنی پاداشت و هاوكارییەكان داوە".   هەر لە راپۆرتەكەدا ئاماژە بە خەرجكردنی 27 ملیۆن و 322 هەزار دینار بۆ چاككردن و سەوزكردنی باخچەكانی كەمپی كۆلێژە تەكنیكییەكانی (تەندروستی، كارگێڕی، ئەندازیاری، ئینفۆرماتیك) پاكتاوكراوە، بەڵام بۆ خەمڵاندن و دەستیشانكردنی پێداویستی باخچەكان دەرخستەیەك نییە.   بە گوێرەی راپۆرتەكەی دیوانی چاودێری دارایی "ئیستیغلالكردنێكی بەرچاو بەپێچەوانەی رێنماییە داراییەكان" لە خەرجییەكانی سندوقی داهات كراوە وەك دەستنیشانكردنی مووچەی سەرۆك و ئەندامانی ئەنجوومەنی زانكۆ، فەرمانبەر و مامۆستایان بۆ دەوامی ئێواران و كرێی وانەبێژی، لەوانەش زانكۆ لە دوو نووسراودا بۆ وەزارەتی خوێندنی باڵا مووچەی ئەمیندار، سەرۆك و یاریدەدەرانی سەرۆك، ئەندامانی ئەنجومەنی زانكۆی دەستنیشان كردووە، لەكاتێكدا بەپێی بڕیاری ژمارە (86)ی ساڵی 2016 و رێنمایی ژمارە (7)ی وەزارەتی دارایی هیچ مووچەیەكیان بۆ دەستنیشان نەكراوە.   مامۆستا و فەرمانبەرانی ستافی ئێوارانیش بەپێچەوانەی رێنمایی ژمارە (7)ی وەزارەتی دارایی مووچەیان بۆ خەرجكراوە، زانكۆكە لە وەڵامی یاداشتێكی دیوانی چاودێری دارایی دەڵێ رەزامەندی وەزارەتی دارایی وەرنەگیراوە، بەڵام رێككەوتن لەگەڵ وەزارەتی خوێندنی باڵا بۆ خەرجكردنی مووچەكە كراوە، لیژنەكەش داوای رێككەوتنەكەی كردووە، بەڵام وەڵامیان نەدراوەتەوە. لیژنەكەی دیوانی چاودێری دارایی لە راپۆرتەكەدا دوو خشتەی خەرجكردنی ئەو پارانەی داناوە كە بڕەكەی 44 ملیۆن 500 هەزار دینارە.   زانكۆكە بەبێ رەزامەندی وەزارەتی دارایی زیاتر لە 78 ملیۆن دیناریشی بۆ مووچەی تەكلیفكردنی سەرۆك و یاریدەدەری سەرۆكی زانكۆ، راگری كۆلێژ و پەیمانگاكان بۆ ساڵی 2016 و 2017 بە مووچە و دەرماڵەی تەواوی بێ پاشەكەوت لەسەر سندوقی داهات خەرجكردووە.    لە مەراسیمی بەخاكسپاردنی مام جەلالیشدا بەبێ فەرمانی خەرجكردن بڕی 985 هەزار دیناری بۆ كڕینی گوڵ و نانخواردنی سەرۆك، ئەندام و فەرمانبەرەكانی خەرج كردووە، لەكاتێكدا پسولەكان واژۆی هیچ لیژنەیەكیان لەسەر نەبووە. بڕی 585 هەزار دیناریش بۆ نانخواردن خەرجكراوە كە بەڕای لیژنەكە ئەوە "ئیستیغلالە"، بۆیە یاداشتێكیان ئاراستەی بەڕێوەبەری ژمێریاری، وردبینی، بەڕێوەبەری نووسینگەی سەرۆكی زانكۆ كردووە، بەڵام وەڵامیان نەداونەتەوە.   لەبارەی ئەو پارانەش كە بۆ بەشە ناوخۆییەكان خەرجكراوە، لە راپۆرتەكەدا هاتووە: حەوت ملیۆن دینار پاكتاوكراوە بۆ چاككردنەوەی دوو بۆیلەری بەشە ناوخۆییەكانی كەمپی چوارچرا، كە هیچ بەراییەكی هاوپێچ نەكراوە و پسولەی تێچووی چاككردنەكەشی نەبووە.    10 ملیۆن دینار وەك پێشینە بۆ پەیمانگای تەكنیكی سلێمانی بەمەبەستی چاككردنی تاقیگەكان خەرجكراوە، بەڵام بەشی ژمێریاری پسولەی نەداوە بە لیژنەكە. هەروەها 46 ملیۆن و 600 هەزار دینار بۆ كڕینی 100 كەنتۆری دووتاكیی تەختە و 200 قەرەوێڵەی دووقات بۆ بەشەناوخۆییەكان خەرجكراوە، بەڵام هەڵسەنگاندنی كواڵیتی نەكراوە، لێپرسراوی گەنجینە و سەرۆكی لیژنەش نەیانبینیوە.   زانكۆی پۆلیتەكنیكی سلێمانی 5 ملیۆن و 460 هەزار دیناری بۆ دوو سیمیناری مەلا بەختیار و سەعدی ئەحمەد پیرە لە هۆتێل ئاشوور خەرج كردووە، لیژنەكەی دیوانی چاودێری دارایی دەڵێت: بۆ كۆڕەكەی مەلا بەختیار دوو جار و دوو پسولەی جیاواز كراوە، ئاماژە بە ناونیشانی هیچ كۆڕێك نەكراوە و پەیوەندیی ئەو كۆڕانە بە زانكۆوە نەخراوەتەڕوو.   زانكۆ بڕی 36 ملیۆن و 824 هەزار دیناریشی بۆ نۆژەنكردنەوە و كڕینی پێداویستیی كۆلێژی تەكنیكی، راگرایەتی پەیمانگای تەكنیكی سلێمانیی بەیانیان و ئێواران خەرج كردووە، بەڵام كۆنووسێك بۆ پێداویستی شوێنەكان و خەرجییەكان رێكنەخراوە، بەڵكو دواتر بە نووسراوێكی كۆلێژی تەكنیكی و راگرایەتی پەیمانگای تەكنیكی سلێمانی ئاماژەی پێدراوە، بەڵام هیچ نووسراوێك ژمارە و رێكەوتی لەسەر نەبووە و 2 ملیۆن و 245 هەزار دیناریش لە نۆژەنكردنەوەكە زیاد خەرجكراوە. زانكۆ پارەیەكی زۆری بۆ چەند كۆلێژ، پەیمانگا و سەنتەرێك خەرج كردووە كە خۆیان داواكارییان پێشكەش نەكردووە، لەوانەش 14 ملیۆن و 305 هەزار دینار بۆ كڕینی پێداویستیی كۆمپیوتەر بۆ بەشی راگەیاندنی پەیمانگای تەكنیكی سلێمانی، 4 ملیۆن و 745 هەزار دینار بۆ كڕینی (بلیارد، دووگۆڵیی دەست، تێنس و رەكتە) بۆ سەنتەری رۆشنبیری، 3 ملیۆن و 750 هەزار دینار بۆ بۆیاخكردنی بەشی ناوخۆیی كچان لە كەمپی چوارچرا، 136 ملیۆن و 153 هەزار دینار بۆ كڕینی كەلوپەل و پێداویستی كۆلێژ و پەیمانگاكان كە بەشێكیان كەلوپەلەكانیان هەر وەرنەگرتووە یان بە تێكەڵ و پێكەڵی وەرگیراون، بەشێكیشیان چوونیەك نەبوون لەگەڵ ئەو مواسەفاتانەی ئاماژەیان بۆ كراوە.   سەرۆكی زانكۆ و چەكی بانك   بەپێی راپۆرتەكەی دیوانی چاودێری دارایی 850 ملیۆن دینار بە چەكی بانكی دراوە بە سەرۆكی زانكۆ، بەڕێوەبەری ژمێریاری بە 3 خاڵ وەڵامی یاداشتی لیژنەكەی داوەتەوە كە: 1- بەمەبەستی كڕینی ئۆتۆمبێل. 2- بانكی كوردستان رێگەی نەداوە هەفتانە بڕی 50 ملیۆن زیاتر رابكێشرێت. 3- سەرۆكی لیژنە ئامادە نەبووە ئەو بڕە پارە زۆرە وەربگرێت.    لیژنەی چاودێری داراییش وەڵامی پاساوەكان ئاوا دەداتەوە: 1- كڕینی ئۆتۆمبێل لەدەسەڵاتی سەرۆكایەتی ئەنجومەنی وەزیران و وەزارەتی داراییە نەك سەرۆكی زانكۆ. 2- سەرۆكی زانكۆ هەرجارە و لە یەك رۆژدا بڕی 200 تا 250 ملیۆن دیناری لە هەمان بانك راكێشاوە. 3- سەرۆكی زانكۆ هیچ ئیلتیزامێكی دارایی نییە بۆ راكێشانی پارە.   بێجگە لەوەش دوو ملیۆن و 260 هەزار دینار بۆ كڕینی خەزنەیەك لە ژووری سەرۆكی زانكۆ خەرجكراوە، تاوەكو 10/9/2017 بڕی 400 ملیۆن دینار دراوە بە سەرۆكی زانكۆ بەبێ بوونی خەزنە، لەوبارەیەوە لیژنەكە یاداشتی لەبارەی شوێنی دانانی ئەو پارەیە ئاراستەی بەڕێوەبەری ژمێریاری كردووە، بەڵام وەڵامی نەداوەتەوە.   پرۆژە بێ‌ تەندەرەكان   دوای بومەلەرزەكەی دەربەندیخان، زانكۆ 501 ملیۆن و 503 هەزار دیناری بۆ نۆژەنكردنەوەی پەیمانگای تەكنیكی دەربەندیخان و بەشەناوخۆییەكان خەرج كردووە، لیژنەكە دەڵێ نۆژەنكردنەوەكە بەبێ رەزامەندی وەزارەتی دارایی كراوە، لەبەرئەوەی بڕی پارەكەش لە 100 ملیۆن دینار زیاتر بووە، دەبوو بەڕێگەی تەندەر و بانگێشتی كۆمپانیاكان بووایە، هیچ لیژنەیەكیش پێكنەهێنراوە بۆ بەدواداچوونی جێبەجێكردنی نۆژەنكردنەوەكە.   لەلایەكی دیكەوە زانكۆ 363 ملیۆن و 496 هەزار دیناری بۆ كڕینی پێداویستی (كۆمپیوتەر، فۆتۆكۆپی، داتاشۆ، پرینتەر) بۆ سەرۆكایەتی زانكۆ، كۆلێژ و پەیمانگاكان خەرج كردووە، بەڵام لیژنەكە دەڵێ بۆ دەربازبوون لە رێكارە یاساییەكان، كڕینەكان بەش بەش كراون، لەكاتێكدا بڕی پارەكانیان لە 350 ملیۆن دینار زیاتر بووە، بەبێ ئەوەی رەزامەندی وەزارەتی دارایی وەرگیرابێت، سەرۆكی لیژنەكەش لەبەرئەوەی شارەزای بواری ئەلیكترۆنی نەبووە، واژۆی لەسەر پسولەكان نەكردووە.    زانكۆكە 123 ملیۆن و 34 هەزار دیناریشی بەمەبەستی كڕینی كەلوپەل و پێداویستی بۆ پەیمانگای تەكنیكی سلێمانی خەرج كردووە، بەڵام لێپرسراوی گەنجینەی پەیمانگا زۆربەی كەلوپەلەكانی نەبینیوە و بەهۆی ئەوەی سەنەدی دەرچووی گەنجینەی سەرۆكایەتی زانكۆشی نەبووە، هاتووی گەنجینەیان پێنەكراوە.   دابینكردنی سووتەمەنی یەكێكی دیكەیە لەو خەرجیانەی لیژنەكە گومانی لەسەر هەبووە، چونكە 173 ملیۆن و 936 هەزار دینار بۆ كڕینی 283 هەزار لیتر گاز بۆ موەلیدەكانی كەمپی چوارچرا، سەنتەری زمان، چیلەر و بۆیلەری بەشە ناوخۆییەكان خەرجكراوە، بەڵام لیژنە بۆ وەرگرتنی بڕی گازی كڕدراو پێكنەهاتووە، راستەوخۆ بە تەنكەر لە بەنزینخانەوە خراوەتە نێو خەزانەكان، لەكاتی سەرفكردنی گازیش كار بە خەزانەكان نەكراوە، ژمارەی سەعاتی كاركردنیشیان تۆمار نەكراوە.   دۆسیەی فەرمانبەران   سەبارەت بە بەشی كارگێڕی و دۆسیەی كەسی زانكۆكەش، لە بەدواداچوونی لیژنەكەدا دەركەوتووە چەند فەرمانبەرێك لە بەشە جیاوازەكانی سەرۆكایەتییەكە و كۆلێژەكانی (تەندروستی، ئینفۆرماتیك، ئەندازیاری) كار دەكەن كە پسپۆڕییان لەگەڵ كاری بەشەكان ناگونجێ، بۆ نموونە كەسێك ناونیشانەكەی یاریدەدەری بەڕێوەبەری هونەرییە، بەڵام لە بەشی كارگێڕیی زانكۆكە كاری سكانكردنی نووسراوە هاتووەكانە، هەروەها فەرمانی كارگێڕی دابەشكردنی كار لە كۆلێژی تەكنیكی كارگێڕی دەرنەكراوە بەمەبەستی دەستنیشانكردنی ئەركی فەرمانبەران و دڵنیابوونەوە لە شایستە داراییەكانیان.   هەر بەپێی راپۆرتەكە، فەرمانبەرێك بە ناونیشانی یاریدەدەری بەڕێوەبەری گشتی كراوە بە لێپرسراوی هۆبەی كارگێڕیی كۆلێژی تەكنیكی ئینفۆرماتیك، بەپێچەوانەی رێنمایی دارایی ژمارە 7326 لە 22/6/2004، كە پێویستە لە پێكهاتەی رێكخستندا ئەو شوێنە بەڕێوەبەرایەتی گشتی بێت، ئینجا دەتوانرێت ناونیشانی ناوبراو كاری تێدا بكات، بۆیە لیژنەكە داواكارە كاری یاسایی بكرێت بۆ گواستنەوەی فەرمانبەرەكە بەهۆی نەگونجانی ناونیشانی لەگەڵ پەیكەری رێكخستنی كۆلێژەكە. هەروەها سێ فەرمانبەری پەیمانگای تەكنیكی سلێمانی ماوەی چەند ساڵێكە بەشێوەی تەكلیف و بەردەوام لە سەرۆكایەتی زانكۆكە دەوام دەكەن، هیچ رێنمایی و یاسایەك نییە رێگە بدات بە تەكلیفكردن لەوێ بمێننەوە، یەكێكیان ناونیشانەكەی لە پەیمانگا شوفێرە، بەڵام لە سەرۆكایەتی زانكۆ لێپرسراوی خزمەتگوزاری و ئەندامی لیژنەی هەنووكەیی و راپەڕاندنی زۆربەی كارەكانی سەرۆكایەتی زانكۆیە. فەرمانبەرێكیش لە بەشی دارایی پەیمانگا ناونیشانی ژمێریارە، بەڵام لە سەرۆكایەتی زانكۆكە كاری راپەڕاندنی كارە داراییەكانە و رێگەپێدراوە بۆ وەرگرتنی پارە لە بانك.   لە كۆتایی راپۆرتەكەشدا ئاماژە بە ناوی 10 فەرمانبەر كراوە كە لە رێكخراوەكانەوە گواستراونەتەوە بۆ كۆلێژەكان، ئەو مووچانەی بۆیان دەستنیشانكراوە لەگەڵ بڕوانامە و ساڵانی خزمەتیان ناگونجێ. بۆ نموونە هەندێك لەوانە بە "سەرۆكی تێبینەران" دامەزراون. لە كاتێكدا دەرچووی زانكۆ بە (یاریدەری تێبینەر) دادەمەزرێ‌ و دەبێ‌ هەشت ساڵ خزمەتی هەبێ‌، ئینجا دەبێ‌ بە "سەرۆكی تێبینەران".   راپۆرتەكە داوا دەكات لیژنەیەك بۆ پێداچوونەوە بە دۆسیەی ئەو فەرمانبەرانەدا بكات و بەپێی بڕوانامە و ساڵانی خزمەت، مووچەكانیان راستبكرێتەوە.   لیژنەكەی دیوانی چاودرێری دارایی لە زۆربەی بڕگەكانی راپۆرتەكەیدا داوا دەكات لەسەر ئاستی وەزارەتی خوێندنی باڵا و بە نوێنەرایەتی ئەندامی داواكاری گشتی لیژنەی لێكۆڵینەوە بۆ ئەو "سەرپێچی"یانەی زانكۆی پۆلیتەكنیكی سلێمانی پێكبهێنرێ‌ و فەرمانبەری بەرپرس دەستنیشان بكرێت و ئیجرائاتی یاسایی لەگەڵ بكرێت.   زانكۆ لێژنە پێكدێنێ‌   د.ئالان فەرەیدوون، سەرۆكی زانكۆی پۆلیتەكنیكی سلێمانی بە (رووداو)ی راگەیاند: "ئێمە 16 هەزار خوێندكار و 700 مامۆستامان هەیە، ساڵانە پارەیەكی زۆر بۆ وانەگوتنەوەی مامۆستاكان و سووتەمەنی و زۆر پێداویستی دیكە خەرجدەكرێ، راستە خەرجییەكی زۆر كراوە، بەڵام ئێمە شانازی بەو خەرجییە زۆرەوە دەكەین، چونكە بەپێی رانكی نیشتمانی وەزارەتی خوێندنی باڵا، زانكۆی پۆلیتەكنیكی سلێمانی زۆر بەرەوپێش چووە".    د.ئالان دەشڵێ: "لیژنەیەكمان بەسەرۆكایەتی یاریدەدەری سەرۆكی زانكۆ بۆ كاروباری دارایی و كارگێڕی و چەند ئەندامێك پێكهێناوە بۆ وەڵامدانەوەی ئەو تێبینیانەی لە راپۆرتەكەی دیوانی چاودێری داراییدا هاتوون".   رووداو

راپۆرتی: پەیمانگەی كوردی بۆ هەڵبژاردن KIE بە پێی سیستمی نوێی هەڵبژاردن هەریەک لەو ئەنجامانەی حزبەکان لەسەرەوە بەدەستیانهێناوە زیادو کەمدەکات، ئەویش بە رەچاوکردنی ئەم گریمانانە: {کۆتای ئافرەتان ، بوونی کاندیدی سەربەخۆ ، بایکۆتی هەڵبژاردنەکە ، بوونی کاندیدی بەهێزو خاوەن پێگە ، دروستکردنی هاوپەیمانێتی فەرمی ، ئاڕاستەکردنی ژێربەژێری دەنگدەری لایەنێک بۆ لایەنێکی تر، بوونی ناکۆکی ناوخۆی حزبەکان}.     پوختەی جێبەجێکار ئەم راپۆرتە ده‌نگەکانی‌ (پارتی، یەکێتی، گۆڕان، نەوەی نوێ، کۆمەڵ و یەکگرتوو) له‌ هه‌ڵبژاردنی خولی پێنجه‌می په‌رله‌مانی كوردستان وەگەڕدەخاتەوە، تا بزانێت هەر حزبێک لەسەر ئاستی ١٢ بازنەکەی هەرێمی کوردستان چەند کورسی لە هه‌ڵبژاردنی داهاتووی ئه‌نجومه‌نی نوێنه‌رانی عێراقدا بەردەکەوێت.    پێشه‌كی  یاسای نوێی هه‌ڵبژاردنی ئه‌نجومه‌نی نوێنه‌رانی عێراق واقیعێکی تازەی هێناوەتە ئاراوە، کە پێویستی بە داتاو زانیاری تازە هەیە بۆئەوەی بتوانرێت خوێندنەوەی تازە بۆ لێکەوتەو دەرهاویشتەکانی بکرێت.  ئەوەی هەتا ئێستا لە هەڵبژاردنەکانی هەرێمی کوردستاندا کێشەیەکی باوە ئەوەیە کە ئەنجامەکانی هەڵبژاردن لەسەر ئاستی یەک بازنەی هەرێم یان لەوپەڕی حاڵەتدا لەسەر ئاستی بازنەی پارێزگاکان راگەیاندراون، هەربۆیە ئەم راپۆرتە چارەسەرکردنی ئەو کێشەیە بە خاڵێکی گرنگی خۆی دەزانێت و دەنگی حزبە بەشداربووەکانی هەڵبژاردنی پەرلەمانی کوردستانی لەسەر ئاستی ئەو دوانزە بازنەی هەڵبژاردنە شیکارکردووە، کە قەبارەی هەریەکەیان لە دوو بۆ پێنج قەزا پێکهاتووە، بەو جۆرەی لە یاسای نوێی هەڵبژاردنی ئەنجومەنی نوێنەرانی عێراقدا دەقنوسکراوە.  ئەم راپۆرتە هەوڵدەدات ئەو جیاوازییه‌ بدۆزێتەوە کە بەسەر ژمارەی کورسییەکانی حزبە بەشداربووەکانی هەڵبژاردندا دێت بەهۆی هەریەک لە بچوککردنەوەو زیادکردنی ژمارەی بازنەکانی هەڵبژاردن و شێوەی مامەڵەکردنی حزبەکان لەگەڵ ژمارەی کاندیدەکان و چۆنایەتی کاندیدەکان و هاتنەناوەوەی کاندیدی سەربەخۆ، کە ئەوانە هەمووی زادەی گۆڕینی سیستمی هه‌ڵبژاردنەکەیە لە "لیستی نوێنەرایەتی رێژەیی"یەوە بۆ سیستمی "زۆرینەی یەک دەنگی نەگوێزراوە". ئەم راپۆرتە ئاوێنەیەکە بۆ حزبەکانی هەرێمی کوردستان تا لە رێیەوە خاڵە لاوازو بەهێزەکانی خۆیانی لەسەر ئاستی هەر بازنەیەکی هەڵبژاردندا تێدا ببیننەوەو هاوکات رێنیشاندەریشیان دەبێت بەوەی چۆن لە ١٢ بازنەکەی هەڵبژاردنی داهاتوی ئەنجومەنی نوێنەرانی عێراقدا مامەڵەیەکی وردو عەقلانی بکەن بۆ ئەوەی بە باشترین شێوه دەنگە بەدەستهاتووەکانیان لە هەر بازنەیەکدا وەگەڕبخەن.  نکۆڵی لەوە ناکرێت کە زۆربەی زۆری حزبە بەشداربووەکانی هەڵبژاردنی خولی پێنجەمی پەرلەمانی کوردستان لە رێگەی لیستی سەد کەسییەوە ئەو ئەنجامانەیان بەدەستهێناوە، کە لەم راپۆرتەدا هاتووە، هەربۆیە کاتێک لە هەڵبژاردنی داهاتوودا ژمارەی کاندیدەکان کەمدەبنەوە بۆ چارەکی ئەو ژمارەیەو هەرێمی کوردستان لە یەک بازنەوە دەبێتە دوانزە بازنەو کاندیدی سەربەخۆ، وەک بکەرێکی نوێ، دێتە ناو کێبڕکێی هەڵبژاردنەکەوە، لەوکاتەدا بە دڵنیاییەوە. ئەنجامەکانیش وەکخۆیان نامێننەوەو کەم و زۆر گۆڕانیان بەسەردا دێت! بەڵام بۆئەوەی راپۆرتەکە بتوانێت لەو ئەنجامانەی حزبەکان وێنەیەکی نزیک دەستبخات، ئەنجامەکانی لە بازنە بچوکە نوێیەکاندا بە سیستمی (لیستی نوێنەرایەتی رێژەیی / دابەشکاری هەڵبژاردن/ باقی الاقوی) شیکارکردووەو دواتر لەبەر رۆشنایی ئەو کورسییانەی هەر حزبێک لەو بازنەیەدا بەو سیستمە بەریکەوتووه، سیستمی (زۆرینه‌ی یه‌ك ده‌نگی نه‌گوێزراوه)ی بەشێوەیەکی گریمانەیی و مەرجداری بەسەردا تاقیکردۆتەوه. ماوەتەوە بڵێین ئەو ئەنجامانەی لەم راپۆرتەدا حزبەکان لە هەڵبژاردنی داهاتوودا (٢٠٢١) لەسەر ئاستی هەر سێ پارێزگاکەی هەرێمی کوردستان بەدەستیدەهێنن، ئەنجامێکی گریمانەییەو بە رەچاوکردنی چەند فاکتەرێکی گۆڕاوی وەک (بوونی کاندیدی سەربەخۆ ، کۆتای ئافرەتان ، بایکۆتی هەڵبژاردنەکە، بوونی کاندیدی بەهێزو خاوەن پێگە، دروستکردنی هاوپەیمانێتی فەرمی، ئاڕاستەکردنی ژێربەژێری دەنگدەری لایەنێک بۆ لایەنێکی تر، بوونی ناکۆکی ناوخۆی حزبەکان) ئەگەری زیادبوون یان کەمبوونی کورسی بۆ هەریەک لەو حیزبانە لە ئارادایە.   بازنه‌كانی پارێزگای هه‌ولێر كۆی ژماره‌ی دانیشتوانی پارێزگای هه‌ولێر: 1.903.609 كه‌س كۆی ژماره‌ی ده‌نگده‌ر (1,193,516) دەنگدەر کۆی ژمارەی بنکەی دەنگدان: 498 بنکە کۆی ژمارەی وێستگەی دەنگدان(2563)  وێستگە كۆی ژماره‌ی كورسی: 15 كورسی/ 4 كورسی بۆ كۆتای ژنان پێكهاته‌ی مه‌سیحی: 1 كورسی ژماره‌ی بازنه‌ی هه‌ڵبژاردننەکانی پارێزگاری هەولێر : 4 بازنه‌، به‌م شێوه‌یه‌ی خواره‌وه‌:  o    بازنه‌ی یه‌كه‌م: به‌شی رۆژهه‌ڵاتی‌ قه‌زای ناوه‌ندی هه‌ولێر  o    بازنه‌ی دوه‌م: به‌شی رۆژئاوای قه‌زای ناوه‌ندی هه‌ولێر o    بازنه‌ی سێیه‌م: سۆران + مێرگەسۆر + ره‌واندز + چۆمان +  شەقڵاوە o    بازنه‌ی چواره‌م: دەشتی هەولێر+ کۆیە + خەبات   خشته‌ی دوه‌م:  ئه‌نجامی ده‌نگی به‌ده‌ستهاتوی پارته‌ سیاسییه‌كان و ئەو کورسیانەی بە سیستمی  (لیستی نوێنەرایەتی رێژەیی/ دابەشکاری هەڵبژاردن/ زۆرترین ده‌نگی ماوه‌) بەریاندەکەوێت. دەرهێنانی ئەنجامەکان به ‌سیستمی نوێی هه‌ڵبژاردن: له‌به‌ر رۆشنایی ئه‌و ئه‌نجامانه‌ی سه‌ره‌وه‌ له‌ بازنه‌ی یه‌كه‌می پارێزگای هەولێردا، ئه‌نجامی بردنه‌وه‌ی كورسی پارته‌ سیاسییه‌كان، به سیستمی زۆرینه‌ی یه‌ك ده‌نگی نه‌گوێزراوه‌،  به‌م شێوه‌ گریمانه‌ییه‌ی خواره‌وه‌ ده‌بێت: - پارتی دیموكراتی كوردستان ده‌توانێت له‌م بازنه‌یه‌دا ته‌نها دوو كاندیدی هه‌بێت بۆئه‌وه‌ی ئه‌گه‌ری بردنه‌وه‌ی دوو كورسی مسۆگه‌ر بكات، له‌بارێكدا ئه‌گه‌ر سێ كاندید یان زیاتری هه‌بێت ئه‌وا ‌ریسك به‌ ده‌نگه‌كانیه‌وه‌ ده‌كات و له‌م باره‌دا ئه‌گه‌ری ئه‌وه‌ی هه‌یه‌ كورسییه‌ك  له ‌ده‌ست بدات. - ئه‌گه‌ر یه‌كێتی نیشتیمانی كوردستان ته‌نها یه‌ك كاندیدی له‌م بازنه‌یه‌دا هه‌بێت ئه‌وا ئه‌گه‌ری ده‌رچونی مسۆگه‌ره‌، به‌ڵام ئه‌گه‌ر زیاتر له‌ یه‌ك كاندیدی هه‌بێت ئه‌وا ریسك به‌ ده‌نگه‌كانیه‌وه‌ ده‌كات، خۆ ئه‌گه‌ر تاكه‌ كاندیده‌كه‌ی ئافره‌ت بێت، ئه‌وا ئه‌گه‌ری ده‌رچونی مسۆگه‌ر تره‌. - جوڵانه‌وه‌ی نه‌وه‌ی نوێ ده‌بێت ته‌نها یه‌ك كاندیدی هه‌بێت بۆئه‌وه‌ی ئه‌گه‌ری بردنه‌وه‌ی  یه‌ك كورسی هه‌بێت، خۆ ئه‌گه‌ر كاندیده‌كه‌ی ئافره‌ت بێت ئه‌وا ئه‌گه‌ری بردنه‌وه‌ی كورسی كۆتای ژنانی زیاتره‌. - كۆمه‌ڵی ئیسلامی له‌م بازنه‌یه‌دا مه‌حكومه‌ به‌وه‌ی ته‌نها یه‌ك كاندیدی هه‌بێت، خۆ ئه‌گه‌ر كاندیده‌كه‌ی ئافره‌ت بێت ئه‌وا ئه‌گه‌ری بردنه‌وه‌ی كورسی كۆتای ژنانی زیاتره‌. - بزوتنه‌وه‌ی گۆڕان له‌م بازنه‌یه‌دا مه‌حكومه‌ به‌وه‌ی ته‌نها یه‌ك كاندیدی هه‌بێت، خۆ ئه‌گه‌ر كاندیده‌كه‌ی ئافره‌ت بێت ئه‌وا ئه‌گه‌ری بردنه‌وه‌ی كورسی كۆتای ژنانی زیاتره‌. - یه‌كگرتوی ئیسلامی له‌م بازنه‌یه‌دا ئه‌گه‌ری بردنه‌وه‌ی كورسی نیه‌، ته‌نها ئه‌گه‌ری ئه‌وه‌ی له‌به‌رده‌مدایه‌ كه‌ ده‌نگه‌كانی ئاراسته‌ی كاندیدی لایه‌نێكی تر بكات به ئامانجی ئه‌وه‌ی ئه‌و لایه‌نه‌ش له‌ بازنه‌یه‌كی تردا قه‌ره‌بو‌ی ده‌نگه‌كانی یه‌كگرتو بكاته‌وه‌. - له‌بارێكدا ئه‌گه‌ر له‌م بازنه‌یه‌دا كاندیدی سه‌ربه‌خۆی به‌هێز لەدەرەوەی ئەو لایەنانەدا هه‌بوو، ئه‌وا ئه‌گه‌ری گۆڕینی ئه‌نجامه‌كانی سه‌ره‌وه‌ دێته‌ ئاراوه‌. ‌    خشته‌ی دوه‌م: ئه‌نجامی ده‌نگی به‌ده‌ستهاتوی پارته‌ سیاسییه‌كان و ئەو کورسیانەی بە سیستمی  (لیستی نوێنەرایەتی رێژەیی/ دابەشکاری هەڵبژاردن/ زۆرترین ده‌نگی ماوه‌) بەریاندەکەوێت. له‌به‌ر رۆشنایی ئه‌و ئه‌نجامانه‌ی سه‌ره‌وه‌ له‌ بازنه‌ی دووه‌می پارێزگای هەولێردا، ئه‌نجامی بردنه‌وه‌ی كورسی پارته‌ سیاسییه‌كان، به سیستمی زۆرینه‌ی یه‌ك ده‌نگی نه‌گوێزراوه‌،  به‌م شێوه‌ گریمانه‌ییه‌ی خواره‌وه‌ ده‌بێت: - پارتی دیموكراتی كوردستان ده‌توانێت له‌م بازنه‌یه‌دا ته‌نها دوو كاندیدی هه‌بێت بۆئه‌وه‌ی ئه‌گه‌ری بردنه‌وه‌ی دوو كورسی مسۆگه‌ر بكات، له‌بارێكدا ئه‌گه‌ر سێ كاندید یان زیاتری هه‌بێت ئه‌وا ‌ریسك به‌ ده‌نگه‌كانیه‌وه‌ ده‌كات و له‌م باره‌دا ئه‌گه‌ری ئه‌وه‌ی هه‌یه‌ كورسییه‌ك له‌ده‌ست بدات. - یه‌كێتی نیشتیمانی كوردستان مه‌حكومه‌ به‌وه‌ی له‌م بازنه‌یه‌دا ته‌نها یه‌ك كاندیدی هه‌بێت،  خۆ ئه‌گه‌ر تاكه‌ كاندیده‌كه‌ی ئافره‌ت بێت، ئه‌وا ئه‌گه‌ری ده‌رچونی مسۆگه‌ر تره‌. - جوڵانه‌وه‌ی نه‌وه‌ی نوێ ده‌بێت ته‌نها یه‌ك كاندیدی هه‌بێت بۆئه‌وه‌ی ئه‌گه‌ری بردنه‌وه‌ی یه‌ك كورسی هه‌بێت، خۆ ئه‌گه‌ر كاندیده‌كه‌ی ئافره‌ت بێت ئه‌وا ئه‌گه‌ری بردنه‌وه‌ی كورسی كۆتای ژنانی زیاتره‌. - كۆمه‌ڵی ئیسلامی له‌م بازنه‌یه‌دا مه‌حكومه‌ به‌وه‌ی ته‌نها یه‌ك كاندیدی هه‌بێت، خۆ ئه‌گه‌ر كاندیده‌كه‌ی ئافره‌ت بێت ئه‌وا ئه‌گه‌ری بردنه‌وه‌ی كورسی كۆتای ژنانی زیاتره‌. - بزوتنه‌وه‌ی گۆڕان له‌م بازنه‌یه‌دا مه‌حكومه‌ به‌وه‌ی ته‌نها یه‌ك كاندیدی هه‌بێت، خۆ ئه‌گه‌ر كاندیده‌كه‌ی ئافره‌ت بێت ئه‌وا ئه‌گه‌ری بردنه‌وه‌ی كورسی كۆتای ژنانی زیاتره‌. - یه‌كگرتوی ئیسلامی له‌م بازنه‌یه‌دا ئه‌گه‌ری بردنه‌وه‌ی كورسی نیه‌، ته‌نها ئه‌گه‌ری ئه‌وه‌ی له‌به‌رده‌مدایه‌ كه‌ ده‌نگه‌كانی ئاراسته‌ی كاندیدی لایه‌نێكی تر بكات به ئامانجی ئه‌وه‌ی ئه‌و لایه‌نه‌ش له‌ بازنه‌یه‌كی تردا قه‌ره‌بو‌ی ده‌نگه‌كانی یه‌كگرتو بكاته‌وه‌. - له‌بارێكدا ئه‌گه‌ر له‌م بازنه‌یه‌دا كاندیدی سه‌ربه‌خۆی به‌هێز لەدەرەوەی ئەو لایەنانەدا هه‌بوو، ئه‌وا ئه‌گه‌ری گۆڕینی ئه‌نجامه‌كانی سه‌ره‌وه‌ دێته‌ ئاراوه‌. ‌    خشته‌ی دوه‌م: ئه‌نجامی ده‌نگی به‌ده‌ستهاتوی پارته‌ سیاسییه‌كان و ئەو کورسیانەی بە سیستمی  (لیستی نوێنەرایەتی رێژەیی/ دابەشکاری هەڵبژاردن/ زۆرترین ده‌نگی ماوه‌) بەریاندەکەوێت.   دەرهێنانی ئەنجامەکان به ‌سیستمی نوێی هه‌ڵبژاردن: له‌به‌ر رۆشنایی ئه‌و ئه‌نجامانه‌ی سه‌ره‌وه‌ له‌ بازنه‌ی سێیە‌می پارێزگای هەولێردا، ئه‌نجامی بردنه‌وه‌ی كورسی پارته‌ سیاسییه‌كان، به سیستمی زۆرینه‌ی یه‌ك ده‌نگی نه‌گوێزراوه‌،  به‌م شێوه‌ گریمانه‌ییه‌ی خواره‌وه‌ ده‌بێت: - پارتی دیموكراتی كوردستان ده‌توانێت له‌م بازنه‌یه‌دا ته‌نها سێ كاندیدی هه‌بێت بۆئه‌وه‌ی ئه‌گه‌ری بردنه‌وه‌ی سێ كورسی مسۆگه‌ر بكات، له‌بارێكدا ئه‌گه‌ر سێ كاندید یان زیاتری هه‌بێت ئه‌وا ‌ریسك به‌ ده‌نگه‌كانیه‌وه‌ ده‌كات و له‌م باره‌دا ئه‌گه‌ری ئه‌وه‌ی هه‌یه‌ كورسییه‌ك  له‌ده‌ست بدات. - یه‌كێتی نیشتیمانی كوردستان مه‌حكومه‌ به‌وه‌ی له‌م بازنه‌یه‌دا ته‌نها یه‌ك كاندیدی هه‌بێت،  خۆ ئه‌گه‌ر تاكه‌ كاندیده‌كه‌ی ئافره‌ت بێت، ئه‌وا ئه‌گه‌ری ده‌رچونی مسۆگه‌رتره‌. - بزوتنه‌وه‌ی گۆڕان له‌م بازنه‌یه‌دا مه‌حكومه‌ به‌وه‌ی ته‌نها یه‌ك كاندیدی هه‌بێت،  خۆ ئه‌گه‌ر كاندیده‌كه‌ی ئافره‌ت بێت ئه‌وا ئه‌گه‌ری بردنه‌وه‌ی كورسی كۆتای ژنانی زیاتره‌. - جوڵانه‌وه‌ی نه‌وه‌ی نوێ ده‌بێت ته‌نها یه‌ك كاندیدی هه‌بێت بۆئه‌وه‌ی ئه‌گه‌ری بردنه‌وه‌ی یه‌ك كورسی هه‌بێت، خۆ ئه‌گه‌ر كاندیده‌كه‌ی ئافره‌ت بێت ئه‌وا ئه‌گه‌ری بردنه‌وه‌ی كورسی كۆتای ژنانی زیاتره‌. - كۆمه‌ڵی ئیسلامی له‌م بازنه‌یه‌دا ئه‌گه‌ری بردنه‌وه‌ی كورسی كه‌مه‌، ته‌نها ئه‌گه‌ری ئه‌وه‌ی له‌به‌رده‌مدایه‌ كه‌ ده‌نگه‌كانی ئاراسته‌ی كاندیدی لایه‌نێكی تر بكات به ئامانجی ئه‌وه‌ی ئه‌و لایه‌نه‌ش له‌ بازنه‌یه‌كی تردا قه‌ره‌بو‌ی ده‌نگه‌كانی یه‌كگرتو بكاته‌وه‌. - یه‌كگرتوی ئیسلامی له‌م بازنه‌یه‌دا ئه‌گه‌ری بردنه‌وه‌ی كورسی نیه‌، ته‌نها ئه‌گه‌ری ئه‌وه‌ی له‌به‌رده‌مدایه‌ كه‌ ده‌نگه‌كانی ئاراسته‌ی كاندیدی لایه‌نێكی تر بكات به ئامانجی ئه‌وه‌ی ئه‌و لایه‌نه‌ش له‌ بازنه‌یه‌كی تردا قه‌ره‌بو‌ی ده‌نگه‌كانی یه‌كگرتو بكاته‌وه‌. - له‌بارێكدا ئه‌گه‌ر له‌م بازنه‌یه‌دا كاندیدی سه‌ربه‌خۆی به‌هێز لەدەرەوەی ئەو لایەنانەدا هه‌بوو، ئه‌وا ئه‌گه‌ری گۆڕینی ئه‌نجامه‌كانی سه‌ره‌وه‌ دێته‌ ئاراوه‌. ‌    خشته‌ی دوه‌م: ئه‌نجامی ده‌نگی به‌ده‌ستهاتوی پارته‌ سیاسییه‌كان و ئەو کورسیانەی بە سیستمی  (لیستی نوێنەرایەتی رێژەیی/ دابەشکاری هەڵبژاردن/ زۆرترین ده‌نگی ماوه‌) بەریاندەکەوێت.   دەرهێنانی ئەنجامەکان به ‌سیستمی نوێی هه‌ڵبژاردن: له‌به‌ر رۆشنایی ئه‌و ئه‌نجامانه‌ی سه‌ره‌وه‌ له‌ بازنه‌ی چوارەمی پارێزگای هەولێردا، ئه‌نجامی بردنه‌وه‌ی كورسی پارته‌ سیاسییه‌كان، به سیستمی زۆرینه‌ی یه‌ك ده‌نگی نه‌گوێزراوه‌،  به‌م شێوه‌ گریمانه‌ییه‌ی خواره‌وه‌ ده‌بێت: - پارتی دیموكراتی كوردستان ده‌توانێت له‌م بازنه‌یه‌دا ته‌نها دوو كاندیدی هه‌بێت بۆئه‌وه‌ی ئه‌گه‌ری بردنه‌وه‌ی دوو كورسی مسۆگه‌ر بكات، له‌بارێكدا ئه‌گه‌ر سێ كاندید یان زیاتری هه‌بێت ئه‌وا ‌ریسك به‌ ده‌نگه‌كانیه‌وه‌ ده‌كات و له‌م باره‌دا ئه‌گه‌ری ئه‌وه‌ی هه‌یه‌ كورسییه‌ك له‌ده‌ست بدات. - ئه‌گه‌ر یه‌كێتی نیشتیمانی كوردستان ته‌نها یه‌ك كاندیدی له‌م بازنه‌یه‌دا هه‌بێت ئه‌وا ئه‌گه‌ری ده‌رچونی مسۆگه‌ره‌، به‌ڵام ئه‌گه‌ر زیاتر له‌ یه‌ك كاندیدی هه‌بێت ئه‌وا ریسك به‌ ده‌نگه‌كانیه‌وه‌ ده‌كات، خۆ ئه‌گه‌ر تاكه‌ كاندیده‌كه‌ی ئافره‌ت بێت، ئه‌وا ئه‌گه‌ری ده‌رچونی مسۆگه‌رتره‌. - جوڵانه‌وه‌ی نه‌وه‌ی نوێ ده‌بێت ته‌نها یه‌ك كاندیدی هه‌بێت بۆئه‌وه‌ی ئه‌گه‌ری بردنه‌وه‌ی یه‌ك كورسی زۆربێت، خۆ ئه‌گه‌ر كاندیده‌كه‌ی ئافره‌ت بێت ئه‌وا ئه‌گه‌ری بردنه‌وه‌ی كورسی كۆتای ژنانی زیاتره‌. - بزوتنه‌وه‌ی گۆڕان له‌م بازنه‌یه‌دا مه‌حكومه‌ به‌وه‌ی ته‌نها یه‌ك كاندیدی هه‌بێت، خۆ ئه‌گه‌ر كاندیده‌كه‌ی ئافره‌ت بێت ئه‌وا ئه‌گه‌ری بردنه‌وه‌ی كورسی كۆتای ژنانی زیاتره‌. - كۆمه‌ڵی ئیسلامی له‌م بازنه‌یه‌دا ئه‌گه‌ری بردنه‌وه‌ی كورسی زۆر كه‌مه‌، ته‌نها ئه‌گه‌ری ئه‌وه‌ی له‌به‌رده‌مدایه‌ كه‌ ده‌نگه‌كانی ئاراسته‌ی كاندیدی لایه‌نێكی تر بكات به ئامانجی ئه‌وه‌ی ئه‌و لایه‌نه‌ش له‌ بازنه‌یه‌كی تردا قه‌ره‌بو‌ی ده‌نگه‌كانی یه‌كگرتو بكاته‌وه‌. - یه‌كگرتوی ئیسلامی له‌م بازنه‌یه‌دا ئه‌گه‌ری بردنه‌وه‌ی كورسی نیه‌، ته‌نها ئه‌گه‌ری ئه‌وه‌ی له‌به‌رده‌مدایه‌ كه‌ ده‌نگه‌كانی ئاراسته‌ی كاندیدی لایه‌نێكی تر بكات به ئامانجی ئه‌وه‌ی ئه‌و لایه‌نه‌ش له‌ بازنه‌یه‌كی تردا قه‌ره‌بو‌ی ده‌نگه‌كانی یه‌كگرتو بكاته‌وه‌. - له‌بارێكدا ئه‌گه‌ر له‌م بازنه‌یه‌دا كاندیدی سه‌ربه‌خۆی به‌هێز لەدەرەوەی ئەو لایەنانەدا هه‌بوو، ئه‌وا ئه‌گه‌ری گۆڕینی ئه‌نجامه‌كانی سه‌ره‌وه‌ دێته‌ ئاراوه‌. ‌    دەقی راپۆرتەكە file:///D:/444/%D8%B1%D8%A7%D9%BE%DB%86%D8%B1%D8%AA-6-%D9%87%DB%95%DA%B5%D8%A8%DA%98%D8%A7%D8%B1%D8%AF%D9%86%DB%8C%DB%8C%20%D9%86%D9%88%DB%8E%20%D9%88%20%D8%B3%DB%8C%D8%B3%D8%AA%D9%85%DB%8C%20%D9%86%D9%88%DB%8E%20-2021-%20%DA%A9%DB%86%D8%AA%D8%A7%DB%8C%DB%8C.pdf

ئاراس فەتاح – مەریوان وریا قانع  (دووشەممەی هەموو هەفتەیەك تایبەت بۆ درەو دەینوسن) وەک بەشێکی گەورەی جیھان، ھەرێمی کوردستانیش ڕووبەڕووی ھەڕەشە و مەترسییەکانی ڤایرۆسی کۆرۆنا بوەتەوە. ژمارەیەکی زۆر لە دانیشتوانی ھەرێمەکە تووشی ڤایرۆسەکە بوون و کەسانێکی زۆریش گیانیان لەدەستداوە.  ئاستی تووشبوونیش بە ڤایرۆسەکە ڕۆژانە لە هەڵکشاندایە. ھەموو ئەمانەش بوونەتە هۆکاری پەککەوتنی چەندان دەرکەوتی تایبەتیی سەرەکیی و بنەڕەتیی، لە ژیانی گشتییدا. ئەوەی جێگای تێڕامانە، بە پێچەوانەی زۆر شوێنی تری جیھانەوە، لە هەرێمی کوردستاندا شتێک بەناوی بیرکردنەوە و خۆئامادەکردن بۆ ”دنیای دوای کۆرۆنا“، بوونی نییە. لانی ھەرەکەمی سەرقاڵبوون بە چارەسەرکردنی ئەو کەلێن و نوقسانییە گەورانەوە لەئارادا نییە کە کۆرۆنا لە زیاد لە دەرکەوتێکی ژیانی ئەو کۆمەڵگایەدا نیشانیداوە. نەک ھەر ئەمە، بەڵکو ھەمان بێباکیی و ھەمان نابەرپرسیارێتیی و ھەمان شێوازی حوکمڕانیی سوڵتانیی بەردەوامە.  بۆ نموونە، ئەگەر لە بەشێکی گرنگی وڵاتە ئەوروپییەکاندا گفتوگۆی ھەمەلایەن دەربارەی دەستکاریکردن و سەرلەنوێ داڕشتنەوەی پەیوەندییەکانی نێوان دەوڵەت و بازاڕ بکرێت و باس لە زیندوکردنەوە و بەھێزکردنەوەی ”دەوڵەتی خۆشگوزەرانیی“ و سنووردارکردنی لۆژیکی نیولیبرالیزم بکرێت؛ ھاوکات بیر لە گەڕاندنەوەی بڕێکی زۆری خزمەتگوزارییە سەرەکییەکان بۆ ژێر دەسەڵاتی دەوڵەت بکرێتەوە، پلانی کڕین و بەکارھێنانی ڤاکسینی دژە کۆرۆنا و کوتانی هاونیشتیمانیانی ئەو وڵاتانە دابنرێت، واتە، بە مانایەک لە ماناکان، بیر لە کۆتاییھێنان بە سەردەمێکی مەترسییدار بۆ سەر ئاساییشی تەندروستیی و دروستکردنی سەردەمێکی نوێ بکرێتەوە، ئەوا لە دونیای ئێمەدا ھیچ یەکێک لەو بابەتانە نابینرێن و ھیچ پرسیارێک بەو ئاراستەیەدا بوونی نییە. بێپلانیی و گوێپێنەدان و خەمساردییەکی کەموێنە لە بەڕێوەبردنی وڵات و لە پاراستنی ژیانی ئینسانی ئێمەدا، لەئارادایە. ھاوکات هەموو داتا و هێماکان پێماندەڵێن کە دەسەڵات لە هەرێمی کوردستاندا مەترسییەکی گەورەیە بۆ سەر ئاساییشی تەندروستیی و کۆمەڵایەتیی و سیاسیی کۆمەڵگاکە خۆی. لە ڤایرۆسەکە ترسناکتر ئەو عەقڵیەتی حوکمڕانیی و مۆدێلی دەسەڵاتەیە کە لەگەڵ ئەو ڤایرۆسەدا دەرگیرن. دۆخەکە لای ئێمە ڕێک وەک ئەوە وایە کۆرۆنا ڕێی نەکەوتبێتە ناو ئەو کۆمەڵگایەوە، ھیچ کێشە و تەحەدایەکی دروستنەکردبێت، چەندان کەلێن و نووقسانیی و کورتھێنانی ترسناکی ئاشکرانەکردبێت. لەڕاستییدا لەپاڵ ھاتنی کۆرۆنادا چەندان قەیرانی ئابوریی و سیاسیی گەورە و قووڵتر ھاتونەتە کایەوە کە بەیەکەوە پڕوکانێکی دەستەجەمعیی و ئیفلاسێکی ھەمەلایەن، لە زیاد لە بوارێکدا، بەرجەستەدەکەن. بە ھیچ یەکێکیش لەو قەیرانانە نەک تەنھا وەڵامێکی ڕاستەقینە، بەڵکو ئەگەری وەڵامێکیش، بوونی نییە. ئەوەی لەناو ئەو پڕوکانە گەورەیەدا دەیبینین ھەمان ئەو دەموچاوانەیە کە نزیکەی سی ساڵە وڵاتەکە لەم قەیرانەوە بۆ ئەو قەیران دەگوازنەوە و بێباکانە بەناو ئەو کارەساتانەدا تێدەپەڕن کە خۆیان دروستکەر و بەرھەمھێنەرین.  بۆ نموونە، ئەو سیستەمە تەندروستییەی لە ھەرێمەکەدا دروستکراوە و ئەو فەرامۆشکردنە نابەرپرسیارانەیەی بەرامبەر بە سێکتەری تەندروستیی و کارمەندانی هەیە، نەک لە ئاستی بەرەنگاربوونەوەی ڤایرۆسەکەدا نییە، بەڵکو ھەڵگریی لانی ھەرەکەمی ئەو یەکسانییەش نییە کە پێویستە سیستەمی تەندروستیی ھەڵگریبێت و بەھۆیەوە خزمەتگوزاریی تەندروستیی بۆ ھاوڵاتیان مەیسەر بکات. پلان و عەقڵییەتی بەکۆمپانیاکردنی سیستەمی تەندروستیی زیانێکی گەورەی بە ئاساییشی تەندروستیی کۆمەڵگاکە گەیاندوە و ئەم خزمەتگوزارییە بنەڕەتییەی گۆڕیوە بۆ بازرگانییەکی ڕووت، بازرگانییەکی پڕ گەندەڵیی و گەڕۆک بەدوای قازانجی خێرادا. بەجۆرێک خەڵکانێکی زۆر دروستبوون کە پارەی تێچونی پشکنینە سەرەتاییەکانی ڤایرۆسی کۆرۆنایان نییە و نائومێدانە لەناو ماڵەکانی خۆیاندا دەمرن. پرۆسەی بەتایبەتیکردنی کەرتی تەندروستیی لە ھەرێمدا و دروستکردنی ئەو ھەموو نەخۆشخانە تایبەتە گرانبەھایانە، شەپازلەیەکی گەورەیە لە ڕوخساری ئەم کەرتە و وێرانکردنێکی ھەمەلایەنەی ئەو پرنسیپە ئەخلاقیی و سیاسییە گرنگەیە کە پێ لەسەر دەستەبەرکردنێکی یەکسانانەی ئەم خزمەتگوزارییە بۆ کۆمەڵگا، دادەگرێت. گۆڕینی نەخۆشخانەکان بۆ کۆمپانیا یەکێکە لە تاوانە گەورەکانی ئەم مۆدێلە سوڵتانییە کوردییە لە حوکمڕانیی. کەرتی خزمەتگوزاریی پەروەردە و فێربوونیش، لە ھەموو ئاستەکاندا، لە باخچەی ساوایانەوە تا زانکۆکان، بەناو ھەمان پرۆسەی بەتایبەتیکردن و بەکۆمپانیاکردن و وێرانکردندا تێپەڕیوە. کایەی پەروەردە، یەکێکە لەو سێکتەرە گرنگانەی خزمەتگوزاریی کە پێویستە بە یەکسانیی لەبەردەمی سەرجەم منداڵانی کوردستاندا کراوەبێت. پێویستە وەک ”سەرەتایەکی یەکسان“ و بێجیاوازیی زۆر لە کۆمەڵگاکەدا ئامادەبێت. بەڵام بەهەمان شێوەی کایەی تەندروستیی، سێکتەری پەروەردەش گۆڕاوە بۆ بزنسێکی تایبەت و لۆژیکی کۆمپانیا ئاراستەی دەکات. بەجۆرێک ھێڵێکی شاقوڵیی نایەکسانیی لە نێوان منداڵانی خێزان و چینە دەستڕۆشتوەکانی وڵاتەکە و لە نێوان زۆرینەی منداڵانی سەر بەچینەکانی خوارەوەدا، کێشاوە. بەکۆمپانیاکردنی خوێندن تاوانێکی گەورەی تری ئەم نوخبە سوڵتانییە حوکمڕانەیە.  لە بوارێکی گرنگی دیکەدا، کە بواری کارەبایە، حکومەتەکەی ھەرێم لەم سەردەمی کۆرۆنایەدا، سەرقاڵی بەتایبەتیکردنی خزمەتگوزاریی ئەم بوارەشە لە ھەرێمدا. بەمەش یەکێکی تر لە پێداویستییە سەرەکییەکانی ژیانی ڕۆژانە لە ژێر دەستی دەوڵەت دەردەھێنرێت و دەبەخشرێت بە کەرتی تایبەت، کە ئەم کەرتە لە هەرێمی کوردستاندا لە دەرەوەی لانیکەمی بوونی یاسا و چاودێریکرن و لێپرسینەوەدایە. لەزۆر ڕووشەوە کەرتێکی تەواو مۆنۆپۆڵکراوە بۆ پارەدارە گەورەکانی وڵاتەکە، کە زۆرینەی ھەرە زۆریان ئەندام و دۆستی خێزان و بنەماڵە سیاسییە حوکمڕانەکانن، یان موڵکی ئەو کۆمپانیایانەن کە حیزبە حوکمڕانەکان بۆ خێزانە سیاسییەکانی خۆیانیان دروستکردوە.  ئەو سێ نموونەیەی سەرەوەی دۆخی بەتایبەتیکردنی خزمەتگوزارییە سەرەکییەکانی کۆمەڵگا، کە بێگومان ھەموو نموونەکان نییە، نیشاندەری دۆخێکی تۆقێنەرە و ھاتنی کۆرۆناش ڕوکارە ترسناکەکانی ئەم بە کۆمپانیاکردنەی بەئاشکرا بە ھەمووان نیشانداوە. نەخۆشخانە گشتییەکان پشتگوێخراون و موچەی کارمەندانیان دابینناکرێت. خەڵکانێکی زۆر پارەی کڕینی خزمەتگوزارییە تەندروستییەکانیان لە نەخۆشخانە تایبەتەکاندا نییە، بۆیە رۆژانە ژمارەی تووشبوان زیاتر و ژمارەی مردووانیش زۆرتر دەبن. بڕێکی زۆری منداڵانیش، توانای ھەبوونی کۆمپیوتەری لاپتۆپ و سمارتفۆنی مۆبایلیان نییە، توانای خوێندنی ئۆنڵانیان نییە کە کراوە بە فۆرمی سەرەکیی خوێندن لە وڵاتەکەدا. ئەمەش وایکردوە ژمارەیەکی ھێجگار گەورە لە منداڵانی هەرێم لە خوێندنی گشتیی بێبەش ببن. لەسەر ھەمان لۆژیک ئەگەر خزمەتگوزاریی کارەباش بدرێتە کەرتی تایبەت، ئەوا ئەگەری ئەوەی خەڵکانێکی زۆر بۆ سەردەمی چرا و لۆکس بگەڕێنەوە، ئەگەرێکی گەورەیە، بەتایبەتی لە دۆخی وێرانبوونی تەواوی ئابوریی نەوت لە ھەرێمدا و لەدۆخی بێتوانیی حکومەت لە دابینکردنی موچەی مانگانەی موچەخۆرانی ھەرێمدا.  تێکچوونی پەیوەندییەکانی نێوان بەغدا و حکومەتی هەرێم، لەسەر مەسەلەی داھاتی نەوت و داھاتەکانی تریش، کە زۆرینەیان لەڕێگای کۆمپانیا حیزبیەکانەوە دەچێتە گیرفانی حوکمڕانان و بنەماڵەکانیانەوە، دۆخەکە کارەساتبارتر و کێشەکان سەختتر و قەیرانەکان قووڵتر دەکاتەوە.  لە ھەمولەرجێکی مێژوویی لەو بابەتەدا، ئەوەی لەبەردەم کۆمەڵگای ئێمەدا ماوەتەوە ڕێگرتنە لە بەردەوامبوونی ئەم مۆدێلە ترسناکەی حوکمڕانیکردن. کۆتاییھێنانە بەم لۆژیکە ترسناکەی تێگەیشتن لە ئابوریی و ئەم ڕوانینە نابەرپرسانە لە چییەتی خزمەتگوزارییە سەرەکیی و بنەڕەتییەکان و چۆنیەتی دابینکردنیان. بەبێ ئەم ڕێگرییە دەبێت ھەمووان لە چاوەڕوانی کارەسات و کەوتن و پڕوکاندنی زیاتردا بن، نەک تەنھا ژیانی ئەوانەی ئەمڕۆکە لەو وڵاتەدا دەژین دەکەوێتە مەترسییەوە، مەترسییەکی ڕاستەقینە، بەڵکو ژیانی ئەوانەش کە ھێشتا لەدایکنەبوون. سەرچاوەی ھەرەسەرەکیی بەشێکی گەورەی ئەم کێشانەش لەناو چۆنیەتی ئیدارەدان و بەکارھێنانی ئابوریی نەوتدایە، کە تاریکترین کەرتی ئابوریی وڵاتەکەیە. ساڵانێکی زۆرە ئابوریی هەرێم بەشێوەیەکی ڕێکخراو لەناو سیستەمێکی چەتەگەرییدا چنراوە. ئەوەی سەروەرکراوە ئابوریی فەرھودە، ئابوریی تاڵانیی و چەتەگەرییە کە خێزانە سیاسییە فەرمانڕەواکان ھێڵە سەرەکییەکانی دادەڕێژن و ھەر ئەوانیش بەڕێوەیدەبەن.  بێگومان ئەم ئابوریی فەرھودە، ئابوریی ژیاندنی کۆمەڵگا، ئابوریی دابینکردنی بژێو و کەرامەت، ئابوریی بەخشینی بەشی یەکسانی خزمەتگوزاریی بە دانیشتوانی ھەرێمەکە نییە، بەڵکو ئابوریی بەئەبەدیکردنی دەسەڵاتی خێزان و بنەماڵە حوکمڕانەکانە، کە ھەم وڵاتەکە و ھەم داهات و ھەم سامانی سەرزەمین و ژێرزەمینی و ھەم دانیشوانەکەشی، بە موڵکی شەخسیی خۆیان دەزانن. ئەو تێزەی دەڵێت ڤایرۆسی کۆرۆنا لەناو دەسەڵاتدارێتییە دەسەڵاتگەرەکاندا باشتر کۆنترۆڵدەکرێت، لە هەرێمی کوردستاندا نەک هەر ڕاست نییە، بەڵکو پێچەوانەکەی ڕاستە.  

درەو: شرۆڤە: د.هەردی مەهدی میکە - پێش ئەوەی کەش و پۆلە ئۆنلاین و ئۆفلاینە پەروەردەییەکان ببنە ڕکابەری پۆلە فیزیکییەکان، پێویستە وەک تەواوکار و بەشدار لە سیستم و پڕۆسەی ڕوودانی فێربووندا جێیان بکەینەوە، گەرنا بەو ژێرخانە یاسایی، پەروەردەیی و تەکنەلۆجییەی هەرێمی کوردستانەوە؛ هەردوو بارەکە لەدەست دەردەچن و هەردوو مۆدێلەکە وەک دوو ڕکابەر دۆخەکە لە فێرخواز ئاڵۆزتر و ناپەروەردەیی دەکەن.  جۆرەکانی خوێندنی ئۆنلاین و ئەلیکترۆنی و پاکێجی، لەو مۆدێلانەن لە بنەڕەتەوە بۆ هاوکاریی و فراوانکردنی ڕوودانی فێربوون. لە کوردستان و عێراقدا، ساڵانێکی زۆرە دڵسۆزان و پسپۆڕانی پەروەردەیی هاواریان بوو کە هەم لە یاسا بچەسپێت، هەم بکرێتە بەشێکی نەریت و ڕێکخستنی خوێندن و لە سیاسەتی پەروەردەییشدا جێی بکرێتەوە، بەڵام هێشتا هەم یاسا و هەم بڕیاردەران و نەریتی پەروەردەیی کلاسیکی و هەم پاشخانی ئەلیکترۆنی ڕێگەی ئەم پێشڤەچوونە گرنگەیان نەداوە و وا ئێستا ناچار و درەنگوەخت، دەبێت بە پەلەکاری ئەو دنیا تازەیەی خوێندن (کە لای وڵاتان وا دەبێتە دێرین) بەچەقێنینە ناو ڕێکارە پەروەردەیی و فێرکارییەکان. چیتر لە سەردەمی کۆرۆنا و پۆست کۆرۆناشدا ئیتر هەریەک لە جۆرەکانی خوێندنی ئۆنلاین، ئۆفلاین و پاکێجیی یان هاوبەشی پۆلەکانن. لە ڕاستیدا ئەوەی هەڕەشەی لەسەرە؛ پۆلەکانن نەک خوێندنی ئۆنلاین و ئۆفلاین و پاکێجە ئەلیکترۆنییەکان. ئیتر ئێرە سەردەمێکە و ژێرخانی تەکنەلۆجی و ئینتەرنێتی لە گریمانە و ئەگەری بەشداری لە ڕوودانی پڕۆسەی فێربووندا کردە واقیعێکی داسەپاو. کۆمپانیا و دنیای سەرمایەدارییش لە قۆستنەوەی ئەو هەلەدا دەستهەڵگر نین و جۆرەکانی خوێندنی سەرهێل و پشت هێڵ لە ئۆفلاین و ئۆنلاین دەبنە کاڵای بەکارهێنەران و لە مامۆستا و تۆمارکردنی وانەکانیەوە بیگرە تا دەگاتە پڕۆگرامی سەرەکی و هاوکار و جۆری گرێبەستی مامۆستایان کڕین و فرۆشتنیان پێوە دەکرێت. پێشتر ئەمە هەبووە، بەڵام بەشێک نەبووە لە پەروەردەی فەرمی بۆ وڵاتێکی وەک کوردستان و یاسابەرکارەکانیش ڕێگر بوون، بەڵام لێرە بەدوا یاسا و دەزگاکان بەدوایاندا دەگەڕێن و دەیانکەنە هاوبەش. بۆیە دوور نییە ئەم دۆخە تازەیە مامۆستایانی دامەزراو و جۆری گرێبەستەکانیان نەخاتە مەترسییەوە و لە ئایندەشدا بە جۆرێک بکەوێتەوە فێرخواز خۆی ئارەزوومەندانە ئەو مامۆستایە لە هەر جێیەکی جیهاندا هەڵدەبژێرێت کە دەیەوێت، نەک ئەوەی خوێندنگایەک بەسەریدا دەسەپێنێت. ئەمەش کێبڕکێی هەم سەرمایەداری و هەم زانستی گەرمتر دەکات. مەترسییە ئاییندەییەکانی پاکێجە ئەلیکترۆنییەکان پەروەردە و پەروەردەی ڕەخنەگرانە هەم بە پرۆگرام و هەم بە خوێندکار-تەوەریی لە پرۆسەکەدا دەبێت هانی هەمەڕەنگی و ئازادیی و بەشداریی خوێندکار بدات، جۆن دیوی وتەنی دیموکراسیەتی کۆمەڵگە لە دیموکراسیەتی بچووکی پۆلەکانەوە وەدی دێت، بەڵام درێژەکێشانی وانەی تەلەفزیۆنی و یەکمامۆستایی ئەلیکترۆنی و یەک ستایڵی و قسەکەری مامۆستا و بێدەنگی خوێندکار، ئاییندەیەکی مەترسیداریی کولتووریی و زەینی دەسازێنێت گەر بە وریاییەوە هەمەڕەنگ و فرە ئەگەر و گریمانە نەکرێت، چونکە هەم مەترسی لەسەر ئازادیی کۆمەڵگە و هەم لەسەر ئەو تاکانەش کە ڕەخنەگرانە پەروەردەنەکراون دروست دەکات. بۆیە ناکرێت لە سیاسەتی پەروەردەییدا، تەنها لە دیوی خۆشبینییەوە لە ئۆنلاینکردن و وانە ئامادەکراوە ئەلیکترۆنییەکان بڕوانین، چونکە دواجار پاکێجی گشتگیر و یەکدەستیی ئەلیکترۆنی مەترسی بۆ دروستکردنی یەکزیهنی و کۆمەڵگەی شموولی و یەکڕەنگیی مەعریفی دەسازێنێت و بە جۆرێک هەر دەسەڵاتێک دەتوانێت لە ڕێی گوتاری پەروەردەیی و بایۆدەسەڵاتە کولتوورییەکانی نێو پەروەردەی پاکێجی ئینتەرنێتییەوە مەترسیی نادیار لەسەر ئازادی و تاکگەرایی بسازێنێت. پرۆسەیەکی نادڵنیا ئێستا دۆخی پەروەردە بەنیمچەکراوەیی کار دەکات و هاوتا لەگەڵ نیگەرانی و ناڕوونی لە چۆنێتیی بەڕێوەبردنی دۆخەکەشدا دیارە، گۆڕینی بڕیارەکان و میکانیزمەکانی جێبەجێکردن لە هەردوو وەزارەتی خوێندنی باڵا و پەروەردەدا؛ ڕاڕایی لە شێوەی بەڕێوەبردن ڕوونتر دەکەنەوە. لە چەند مانگی ڕابردوودا دوو کەشی پەروەردەیی و دوو مۆدێلمان بەنیوەچڵی و بەنیگەرانییەوە لە هەرێمی کوردستاندا ئەزموون کرد، هەروەها  وەرزێکی داخراویی هۆڵەکانی خوێندن و دەستپێکی وەرزی نوێی نیوە ئۆنلاین و نیوە ئامادەیی نێو پۆلەکان گوزەرا، بەڵام هێشتا دڵنیایی نەداوەتە بەرپرسان و حکومەت و تەندروستی کە کام ڕێگا و شێواز دەتوانێت زانستی، تەندروستی و واقیعییش بێت! بەڵام لانیکەم لەوە تێگەیشتین، کۆمەڵگە و حکومەتیش بەناچارییش بێت ئەوەیان پەسەند کرد کە سیستمی پەروەردە بە سوودوەرگرتن لە تەکنەلۆجیای هاوچەرخ لە سەردەمی کۆرۆنا و بگرە پۆست کۆرۆناشدا زیانبارە و پێویستە هەر چی زووە ژێرخانی پەروەردەیی و تێکەڵکردنی خوێندنە هاوچەرخەکان و سوودوەرگرتن لە تەکنەلۆجیای هاوچەرخ و پەرەدان بە فێرکردنی خودی و خێزانی لە ئەرکە لەپێشینەکان بێت. لە ئێستادا خوێندنی ڕەسمییش هاوتا لەگەڵ خێزان و هێڵەکانی ئینتەرنێت و تۆڕە کۆمەڵایەتییەکان هاوبەش و بەشداری پڕۆسەکەن، تەنها لە دەستی وەزیر و وەزارەت و مامۆستایاندا قەتیس نەماوە. بۆیە هەم یاسا بەرکارەکان و هەم ڕێکارەکانی پڕۆسەی فێربوون پێویستیان بە جێکردنەوەی هاوبەشە نوێکانی پڕۆسەکە هەیە و بەڕەسمی دانیان پێدا بنێت و ئەرک و هەنگاوەکانیشیان دیاری بکات. بڵاوبوونه‌وه‌ی په‌تای كۆڤید 19 وه‌كوو په‌تایه‌كی ڤایرۆسیی جیهانی، كاریگه‌ریی له‌سه‌ر هه‌موو سێكته‌ره‌كانی ژیان دروست كرد و لێكه‌وته‌كانی تا ماوه‌یه‌كی درێژخایەن بەردەوام دەبن و كاریگه‌رییش له‌سه‌ر شێواز و چۆنێتیی مامه‌ڵه‌ له‌گه‌ڵ كردنیدا ده‌بێت، چونكه‌ ڕه‌فتاری ڤایرۆسه‌كه‌ و نه‌بوونی وەڵام و چارەسەرێکی زانستیی یەکلاکەرەوە‌ له‌ لایه‌ك ئاسۆی لێڵ كردووه‌، له‌ لایه‌كی تر كاریگه‌ریی گه‌وره‌ی له‌سه‌ر ئه‌رك و ڕۆڵه‌كان دروست كردووه‌ و بڕیاردانی له‌سه‌ر ئاینده‌ی هه‌ر سێكته‌رێك سەخت کردووە تا ملكه‌چی هه‌ڵسه‌نگاندنه‌ ته‌ندروستییه‌كان بێت، ژینگه‌ی سایكۆلۆجیای كاركردن و بڕیاردانی به ‌شێوه‌یه‌ك له‌ شێوه‌كان وەرچەرخاندووە‌. كه‌رتی په‌روه‌رده ‌و ته‌ندروستی له جیهان به‌گشتی و له‌ كوردستان به‌تایبه‌تی، له‌ژێر كاریگه‌ریی ئه‌م دۆخه‌ تازه‌یه‌دا ڕووبه‌ڕووی چەندین بەربەست بووەتەوە کە شایەنی هه‌ڵوه‌سته‌له‌سه‌ركردنن‌. یاسازی بۆ واقیعێکی نوێ كه‌رتی  خوێندنی باڵا و په‌روه‌رده‌ی هه‌رێم به‌سه‌ر كه‌رتی گشتی و كه‌رتی تایبه‌تدا دابه‌ش بووه، به‌ دوو یاسای جیاواز په‌یكه‌ره‌ كارگێڕی و داراییه‌كانیان دیاری كراوه‌، له‌و چوارچێوه‌یه‌دا یاسا سیستمی خوێندنی ئه‌م دوو كه‌رته‌ی ڕێك خستووه، هه‌ردوو كه‌رته‌كه‌ له‌ژێر چه‌تری چاودێریی یاسا و ڕێنماییه‌كانی ئه‌م دوو وه‌زاره‌ته‌دا ئاڕاسته‌ ده‌كرێن. سیستمی فێركردن و یاساکانی له‌ كوردستاندا لە ماوەی ڕابردوودا خۆی له‌ پشتیوانی و پشتئه‌ستووربوون به‌ ته‌كنه‌لۆجیای فێركاریی ئه‌لیكترۆنی لە دوورەوە (التعلیم عن بعد) به‌دوور گرتووه‌، ئه‌مه‌ش له‌ لایه‌ك به‌ هۆی ئاسته‌نگه‌ یاساییه‌كانیەوەیەتی، بۆ نموونه‌ وه‌زاره‌تی خوێندنی باڵا پشتئه‌ستووره‌ به‌ یاسای ژماره‌ (10)ی ساڵی 2008 کە تا ئێستا هه‌موار نه‌كراوەتەوە‌، هه‌روه‌ها یاسای ژماره‌ (2)ی ساڵی ٢٠١٣ی زانكۆ تایبه‌ته‌كان، گۆڕانكارییه‌ خێراكانی بواری ته‌كنه‌لۆجیای بۆ پڕۆسەی فێربوونی ئۆنلاین و "لە دوورەوە"ی ڕەچاو نەکردووە‌، لە کاتێکدا لە‌ خوێندنی مۆدێرندا وه‌ك سه‌رچاوه‌یه‌كی سه‌ره‌كی و پاڵپشتكار له‌ ڕوودانی فێربوون و گواستنه‌وه‌ی مه‌عریفە و ئاڵوگۆڕی زانیاریدا چەسپاوە. بەڵام بەپێچەوانەوە، فێربوونی ئۆنلاین و لە دوورەوە به‌پێی یاسا و ڕێنماییه‌ به‌ركاره‌كان له‌ هه‌رێمی كوردستاندا و بەتایبەت لە ئانی یه‌كسانكردن و متمانەدان بە بڕوانامه و فێرگەکان‌ دەچێتە ژێر پرسیارەوە، جیا لە ڕێگرییە یاساییەکانی،‌ لاوازیی ژێرخانی ته‌كنه‌لۆجیا و خراپیی هێڵەکان و توانای مرۆیی بۆ سوودوەرگرتن لە تەکنەلۆجیای هاوچەرخ؛ هۆكارێكی ترە بۆ کەمیی بەکارهێنانی كلیل و زمانه‌ سه‌ره‌كییه‌كانی ئەم بوارە و سوودلێوەرگرتنی، وەک بەشێک لە چارەسەر، بەپێچەوانەوە خودی پڕۆسەی بەکارهێنانەکە وا خەریکە دەبێتە بەشێک لە کێشەکە. بۆیە گرنگە بیرێک لە زەمینەی هاوبەش و تەواوکار بۆ هەردوو مۆدێلەکە بسازێنرێت، کە ببنە تەواوکاری یەکدی و هاوکات ڕەچاوی ناوەرۆک و دنیای ئازادی و ئەخلاقی و زانستیی کۆمەڵگە و فێرخوازیش بکرێت.  

راپۆرت: فازڵ حەمەرەفعەت – محەمەد رەئوف ئەمڕۆ (236) ساڵ تێدەپەڕێت بەسەر دروستكردنی شاری سلێمانیدا، ئەم شارە كە لەدوای دروستكردنییەوە مەڵبەندی میرایەتی بابان بووە، ئێستا خراپترین رۆژەكانی مێژووی خۆی بەڕێدەكات، چیتر سلێمانی نە لەڕووی سیاسی‌و نە لەڕووی رۆشنبیری‌و خزمەتگوزاریی ‌و ئابورییەوە پێشەنگ نییە، ژمارەكان ئاماژە بەوە دەكەن ئێستا لە زۆر رووەوە سلێمانی لەدوای هەولێرو دهۆكەوەیە، ئەمە لەكاتێكدایە ماوەی (6 ساڵە) قوباد تاڵەبانی بە نوێنەرایەتی سلێمانی جێگری سەرۆكی حكومەتی هەرێمی كوردستانە‌و حزبەكەشی هاوبەشی سەرەكی دەسەڵاتە.   وزە لە سلێمانی كەرتی وزە لە سلێمانی كەوتووە، لە ساڵی 2005وە دوای یەكخستنی حكومەت، بڕیار لەسەر كێڵگەكانی نەوت‌و غازی ئەم ناوچەیە لە هەولێرو لەژێر كۆنترۆڵی ئاشتی هەورامیدا بووە، بەرپرسانی یەكێتی لە حكومەت لەبەرامبەر پشكێكدا كە لە داهاتی نەوت مانگانە پێیاندراوە، بێدەنگ بوون لە چۆنیەتی بەڕێوەبردنی ئەم كەرتە. كەرتی وزە لە سلێمانی پەرەپێدانی گەورەی بەخۆوە نەبینیوە، دەسەڵاتدارانی حكومەت لە هەولێر كۆمپانیا بیانییەكانیان ناچاركردووە ئۆفێس لە سلێمانی نەكەنەوە‌و تەنیا لەرێگەی هەولێرو حكومەتی هەرێمەوە مامەڵەكانیان بكەن، بۆیە ئۆفێسی گەورە كۆمپانیاكانی بواری نەوت لە سلێمانی نابینرێت. ئەو كۆمپانیا بیانیانەی لە سنوری سلێمانیدا كار دەكەن بریتین لە كۆمپانیای (كازپرۆمی روسی، ویسترن زاگرۆسی كەنەدی، گەنەڵ ئینێرجی كە كۆمپانیایەكی هاوبەشی بەریتانی توركییە، دانەغازی ئیماراتی، پیت ئۆیل-ی توركی)، ئەوانەی كە لەم سنورەدا نابینرێن كۆمپانیا گەورەكانی ئەمریكاو بەریتانیان. ئەوانەی چاویان لە هەستانەوەی سلێمانییە دەڵێن غازەكەی سلێمانی هێشتا پەرەی پێنەدراوە‌و دەسەڵاتدارانی هەولێر رێگری دەكەن، چونكە بەوتەی ئەوان لەدوای قەتەر، سلێمانی لەسەر ئاستی ناوچەكە لەبواری غازدا یەكەمە‌و ئەگەر غازەكەی بدرێت بە كۆمپانیایەكی بیانی‌و بەشێوەیەكی باش وەبەرهێنانی تێدا بكرێت، دەتوانێت پێداویستی غازی هەموو عێراق دابین بكات، قسەوباس هەیە لەبارەی ئەوەی بەمدواییە حكومەتی عێراق چاوی بڕیوەتە غازەكەی سلێمانی‌و دەیەوێت پێداویستی ناوخۆی پێ پڕبكاتەوە. سەبارەت بە نەوتیش، ئەوەی لە سنوری سلێمانی بەرهەم دەهێنرێت رۆژانە (40 بۆ 45 هەزار) بەرمیلە لە رۆژێكدا ئەمەش بەبەراورد بە بڕی نەوتی هەناردەكراوی هەرێمی كوردستان بڕێكی زۆر كەمە، ئەوانەی چاودێری دۆخی نەوت لە سنوری سلێمانی دەكەن دەڵێن، ئەگەر رێگری نەكرێت‌و بەشێوەیەكی باش كێڵگەكانی نەوت وەبەرهێنانیان تێدا بكرێت، لەماوەی چەند ساڵێكدا لەرێگەی فراوانكردنی كێڵگەكان‌و پەرەپێدانیانەوە دەتوانرێت ئاستی وەبەرهێنانی نەوت رۆژانە بۆ (500 بۆ 700 هەزار) بەرمیل زیاد بكرێت. قوباد تاڵەبانی جێگری سەرۆكی حكومەت، یەكێك لە پاڵپشتیكارە سەرسەختەكانی ئاشتی هەورامی بووە لە سیاسەتە نەوتییەكانیدا لە ناوچەی سلێمانی. دارایی لە سلێمانی لە سلێمانی تائێستا لقی بانكی ناوەندی عێراق نەكراوەتەوە، بەڵام بانكەكە لە هەولێر لقی هەیە‌و لەڕێگەی ئەو لقەوە حكومەتی عێراق مانگانە موچەی فەرمانبەران دەخاتەسەر ژمارە حسابی حكومەتی هەرێم، نەبوونی لقی بانكی ناوەندی عێراق لە سلێمانیی، لەڕووی دارییەوە گورزێكی گەورەیە بۆ سلێمانی. بەگوێرەی ئەو زانیارییانەی دەست (درەو) كەوتوون، مانگانە داهاتی ناوخۆی پارێزگای سلێمانی كە بۆ حكومەتی هەرێم دەگەڕێتەوە دەگاتە نزیكەی (100 ملیار) دینار، ئەمە داهاتی گومرگ‌و فەرمانگەكانە، ئەم داهاتە دەچێتە بانكی (هەرێم) كە بانكێكی سەربە حكومەتی هەرێمە‌و لەوێ كۆدەكرێتەوە‌و تۆماردەكرێت‌و دەنێردرێت بۆ وەزارەتی دارایی‌و ئابوری. بەپێی ئەوەی باسدەكرێت، لەدوای دەستبەكاربوونی كابینەی مەسرور بارزانییەوە، لەڕێگەی وەزارەتی داراییەوە كاركراوە بۆ ئەوەی بانكی هەرێم هەڵوەشێندرێتەوە، ئەمەش وەكو گورزێكی گەورەی دارایی بۆ سلێمانی تەماشا دەكرێت، بەوپێیەی ئەگەر ئەو بانكە هەڵوەشێندرێتەوە، چیتر سیولەی دراو "نەخیتە" لە سلێمانی نامێنێت‌و داهاتەكانی سلێمانی راستەوخۆ بە ئۆتۆمبیل دەگوازرایەوە بۆ هەولێر. بەرپرسانی ئیدارەی خۆجێی سلێمانی دەڵێن، لە چەند لایەكەوە دەستوەردان كراوە‌و رێگری لە داخستنی ئەو بانكە كراوە، بۆیە وەزارەتی دارایی پلانەكەی راگرتووە، ئەمە بەلای یەكێتییەوە بەر لەوەی بابەتێكی دارایی بێت، وەكو بابەتێكی سیاسی تەماشاكرا‌وە، بۆیە رێگری لێكراوە. لەبارەی ئەوەی ئایا مانگانە لەو (100 ملیار) دینارەی كە سلێمانی وەكو داهات بۆ حكومەتی هەرێمی دەگەڕێنێتەوە، چەندی بۆ سلێمانی خەرج دەكرێتەوە هیچ زانیارییەكی فەرمی لەبەردەستدا نییە، بەڵام هەندێك لەبەرپرسان دەڵێن ئەوەی دەگەڕێتەوە بۆ سلێمانی كەمترە لە رێژەی 10%ی داهاتەكەیە. لە كابینەی پێشووی حكومەتدا كە نێچیرڤان بارزانی سەرۆكایەتی دەكرد، دەسەڵاتی خەرجكردنی هەندێك پارە لە داهاتەكانی سلێمانی درابوو بە قوباد تاڵەبانی جێگری سەرۆك وەزیران، بەڵام مەسرور بارزانی لەم كابینەیەدا ئەو دەسەڵاتەشی لە قوباد تاڵەبانی وەرگرتوەتەوە‌و ئەوەی فەرمانی خەرجكردنی پارە دەدەت تەنیا سەرۆكی حكومەت خۆیەتی. كەرتی وەبەرهێنان‌و بارزگانی لە سلێمانی ساڵانی رابردوو لەژێر كۆنترۆڵی كۆمپانیای (نۆكان)ی یەكێتیدا بوو، ئەم كۆمپانیایە ئێستا لاواز بووە‌و بەشێكی زۆری پشەكانی داوە بە كۆمپانیای تر كە بەرپرسانی لە پشتیەوەیە، دارایی كۆمپانیاكەش لەنێوان بەرپرسانی حزبدا بەشێكی زۆری ون بووە، بەمدواییە هاوسەرۆكە نوێیەكانی یەكێتی لیژنەیەكی داراییان دروستكردووە‌و دەیانەوێت ئابورییەكی نوێ بۆ حزبەكەیان دروست بكەن‌و داهاتە ونبووەكەی حزب كۆبكەنەوە، دارایی یەكێتی‌و بەرپرسەكانی بەجۆرێك تێكەڵ بووە، بەئاسانی جیاناكرێتەوە، رۆژانە لەسنوری سلێمانی كۆمپانیای نوێ سەردەردەهێنێت، بەشی زۆری ئەم كۆمپانیایانە بەرپرسانی حزبییان لە پشتەوەیە، شەڕو ململانێ لەسەر كۆنترۆڵكردنی بازاڕ دەرفەتی كاركردنی بۆ ئەو كۆمپانیایانە نەهێشتوەتەوە كە پاڵپشتی سیاسییان نییە، نائارامی دۆخی ئەمنی بۆ سەرمایەداران، وایكردووە بەشێكیان سەرمایەكانیان بگوازنەوە بۆ هەولێرو دەرەوەی وڵات، سەرباری زۆری ژمارەی كۆمپانیاكان، بەڵام گەشەی ئابوری بە بازاڕەوە نابینرێت. كارەبا لە سلێمانی بەگوێرەی بەدواداچوونەكان، ئێستا پارێزگای سلێمانی بە هەڵەبجە‌و ئیدارەكانی گەرمیان‌و راپەڕینەوە رێژەی 33%ی كۆی گشتی كارەبای بەرهەمهاتووی هەرێمی كوردستان وەردەگرێت، ئەمە لەكاتێكدایە پارێزگاری هەولێر كە ژمارەی دانیشتوانەكەی لە سلێمانی كەمترە، رێژەی 39%ی كارەبای هەرێم دەبات، پارێزگای دهۆكیش رێژەی 28%. بەیار عومەر نوسەری كتێبی "ناعەدالەتی جوگرافی" كە كار لەسەر ئەم دۆسیەیە دەكات بە (درەو)ی وت:" نا عەدالەتی لە كارەبای سلێمانیدا لەكاتێكدایە بەنداوی دوكان‌و دەربەندیخان لە سنوری پارێزگای سلێمانیدان، بەڵام دەسەڵاتی دابەشكردنی پشكی كارەبا لە وەزارەتی كارەبایە لە هەولێر". ئێستا دۆخەكە گۆڕاوە، چیتر بەنداوی دوكان‌و دەربەندیخان سەرچاوەی سەرەكی بەرهەمهێنانی كارەبا نین لە هەرێمی كوردستان‌و كارتە بەهێزەكەی دەستی سلێمانی نین، ئێستا غاز كارتی بەهێزی سلێمانییە، چونكە زۆرینەی وێستگەكانی بەرهەمێنانی كارەبا بە غازی سروشتی كاردەكەن، غازی ئەو وێستگانە لە سنوری پارێزگای سلێمانییەوە دابین دەكرێت. وەبەرهێنان لە سلێمانی لە بەڕێوەبەرایەتی وەبەرهێنانی سلێمانی (200) فەرمانبەر هەیە، نەسریەی مانگانەی ئەم بەڕێوەبەرایەتییە (4 ملیۆن) دینارە، بەڵام هەمان بەڕێوەبەرایەتی لە هەولێر كە (100) فەرمانبەری هەیە، نەسریەكەی (8 ملیۆن) دینارە، فەرمانگەكە لە دهۆك (50) فەرمانبەری هەیە، بەڵام نەسریەكەی (10 ملیۆن) دینارە. ئەوانەی رەخنەیان هەیە لەم جیاوازییە دەڵێن، كەمكردنەوەی نەسریەی فەرمانگەیەكی لەم شێوەیە لە سلێمانی كاریگەری لەسەر كارەكانی فەرمانگەكە دەبێت بەدیاریكراویش لە چاودێكردن‌و سەرپەرەشتیكردنی پرۆژەكانی وەبەرهێنان لە سنوری پارێزگاكەدا. سەرباری ئەمە بەڕێوەبەرایەتی وەبەرهێنانی سلێمانی دەسەڵاتی پێدانی مۆڵەتی بە پرۆژەكان‌و خەرجكردنی پارەی پرۆژەكانی نییە‌و هەموو ئەم بڕیارانە ئێستا لەلایەن ئەنجومەنی وەزیران‌و بەدیاریكراویش لەلایەن سەرۆكی حكومەتەوە دەدرێن. نەسریەی مانگانەی پارێزگاری سلێمانی بۆ بەڕێوەبردنی كارەبارەكانی پارێزگا تەنیا (17 ملیۆن‌و 500 هەزار) دینارە. فڕۆكەخانەی سلێمانی فڕۆكەخانەكان لە هەرێمی كوردستان بەپێی دەستوری عێراق دامەزراوەی فیدراڵین‌و سەربە حكومەتی ناوەندن، بەڵام لەناوخۆی هەرێمدا فڕۆكەخانەی سلێمانی سەربە وەزارەتی گواستنەوە‌و گەیاندنە، ئەمە لەكاتێكدایە فڕۆكەخانەی نێودەوڵەتی هەولێر تاوەكو كەریم سنجاری وەزیری ناوخۆ بووە، واتە لە كابینەی پێشووی حكومەتدا، سەربە وەزیری ناوخۆ بووە‌و بەهیچ جۆرێك نەگەڕاوەتەوە بۆ وەزارەتی گواستنەوە لە بڕیارەكانیدا، ئێستا كە كەریم سنجاری لە پۆستی وەزیری ناوخۆ لابراوە، فڕۆكەخانەی هەولێر راستەخۆ سەربە ئەنجومەنی وەزیرانە. ئەوانەی سكاڵایان هەیە لە پاشەكشێی دۆخی سلێمانی دەڵێن، ئەگەر فڕۆكەخانەی نێودەوڵەتی سلێمانی كێشەیەكی هەبێت، وەزارەتی گواستنەوە بە شەش مانگ وەڵامیان دەداتەوە، بەڵام فڕۆكەخانەی هەولێر بەهۆی ئەوەی راستەوخۆ سەربە ئەنجومەنی وەزیرانە كاروبارەكانی لەناو حكومەت راناوەستێت. رێكەوت زەكی ئەندامی فراكسیۆنی یەكێتی لە ئەنجومەنی پارێزگای سلێمانی یەكێك لەو كەسانەیە كە كار لەسەر چەسپاندنی لامەركەزیەتی ئیداریی‌و دارایی بۆ سلێمانی دەكات، ئەو بە (درەو)ی راگەیاند، لە رۆژی 26/11/2019وە فڕۆكەخانەی سلێمانی بە نوسراو داوای هەندێك دەسەڵاتی لە حكومەتی هەرێم كردووە، بەڵام حكومەت دوای چوار مانگ‌و بەدیاریكراوی لە مانگی 3/2020دا وەڵامی داوەتەوە‌و بەبەراورد بە كابینەی پێشوو دەسەڵاتەكانی دابەشی سێ كردووە‌و ناردویەتییەوە بۆ فڕۆكەخانە. ساڵی رابردوو فڕۆكەخانەی سلێمانی مانگانە (200 ملیۆن) دینار نەسریەی هەبووە، بەڵام فڕۆكەخانەی هەولێر سەرباری ئەم (200 ملیۆن) دینارە، مانگانە (300 هەزار) دۆلاریشی پێدراوە، ئەمساڵ ژمارەكان گۆڕانكارییان بەسەردا هاتووە، ئێستا مانگانە فڕۆكەخانەی سلێمانی (175 ملیۆن) دینار لەگەڵ (30 هەزار) دۆلار نەسریەی هەیە، بەڵام فڕۆكەخانەی هەولێر (125 ملیۆن) دینار لەگەڵ (250 هەزار) دۆلار نەسریەی هەیە، واتە هێشتا نەسریەی فڕۆكەخانەی هەولێر زۆر زیاترە لە سلێمانی.    ئاو لە سلێمانی بەپێی زانیارییەكانی ساڵی 2018 بڕی (یەك ملیار) دینار دابین كراوە بۆ بەڕێوەبەرایەتی ئاوی هەولێر، بەڵام لەو ساڵەدا بەڕێوەبەرایەتی ئاوی سلێمانی هیچ بڕە پارەیەكی لەلایەن حكومەتەوە بۆ دابین نەكراوە، ساڵی 2015 دوای ئەوەی بەرپرسانی ئاوی سلێمانی سكاڵایان كردووە لە نەبوونی پارە، نێچیرڤان بارزانی سەرۆكی ئەوكاتی حكومەتی هەرێم بەڵێنیداوە بڕی (400 هەزار) دۆلار بۆ بەڕێوەبەرایەتی ئاوی سلێمانی خەرج بكات، دوای ساڵێك‌و لە 2016دا بەڕێوەبەرایەتی ئاوی سلێمانی نوسراوی كردووە‌و رایگەیاندووە هێشتا ئەو پارەیەی بەدەست نەگەیشتووە، بەڵام ئەوەی جێگەی سەرەنجە لە ساڵی 2018دا كابینەی نێچیرڤان بارزانی نوسراوی بۆ بەڕێوەبەرایەتی ئاوی سلێمانی كردووە‌و داوای پاكنوسی خەرجكردنی (400 هەزار) دۆلارەكەی كردووە، ئەمە لەكاتێكدایە پارەكە خەرج نەكراوە. لە هەولێر لەناو شەقامی شەست مەتریدا بەردەوام ئاوی ماڵان هەیە‌و كێشەی نییە، لە دەرەوەی شەست مەتریی دوو رۆژجارێك ماوەی (6 كاتژمێر) ئاو هەیە، بەڵام لە سلێمانی لەماوەی دوو رۆژدا (2 كاتژمێر) ئاو هەیە. رێژەی 20%ی دانیشتوانی سلێمانی تۆڕی ئاویان نییە‌و بە تانكەر ئاویان بۆ دەڕوات، لە فولكەی تانجەرۆوە بۆ "دارەڕەش" لە سنوری قەرەداغ كە سەربە بەڕێوەبەرایەتی ئاوی دەوروبەری سلێمانیە (5 هەزارو 700 خیزان) هەن، ئەم خەڵكە ئاوی خواردنەوەیان نییە‌و تائێستا بە تانكەر ئاویان بۆ دابین دەكرێت، فەرمانگەی ئاوی دەوروبەری سلێمانی (69) تانكەری هەیە كە ئاو بۆ ئەو ماڵانە دەگوازێتەوە، ئێستا (39) تانكەریان لەكاركەوتوون. سەرباری ئەمە، بەمدواییە لەڕێگەی پێوەری زیرەكی ئاوەوە، بەتەواوەتی ئاوی سلێمانی بەستراوەتەوە بە هەولێرەوە. پۆلیس لە سلێمانی لە عێراق پۆلیسی نێودەوڵەتی هەیە كە بە "ئینتەرپول" ناسراوە، پۆلیسی نێودەوڵەتی بە پۆلیسی سلێمانی وتووە هەرچیەكتان ویست ئاگادارمان بكەن ئێمە هاوكاریتان دەكەین، بەڵام لە هەولێرەوە پۆلیسی نێودەوڵەتی ئاگاداركراوە لەوەی بۆیان نییە هیچ هاوكارییەكی پۆلیسی سلێمانی بكەن‌و دەبێت كارەكانیان هەموو لە رێگەی وەزارەتی ناوخۆ‌و لە هەولێرەوە بكەن. ئاگركوژێنەوە لە سلێمانی نەسریەی مانگانەی فەرمانگەی ئاگركوژێنەوەی سلێمانی (6 ملیۆن) دینارە، بەڵام هەمان فەرمانگە لە هەولێر نەسریەكەی (10 ملیۆن) دینارە. بەرپرسانی ئیداریی باسلەوە دەكەن، بەڕێوەبەرایەتی ئاگركوژێنەوەی سلێمانی دوو ئەفسەری ناردووە بۆ بەریتانیا بۆ ئەوەی خولی راهێنان ببینن، كاتێك خولەكانیان تەواو كردووە، رێگەیان نەداوە بگەڕێنەوە بۆ سلێمانی‌و لە هەولێر ئیغرایان كردوون‌و پەیمانگایەكیان بۆ كردونەتەوە بۆ ئەوەی لەوێ خول بە ئەفسەرانی ئاگركوژێنەوە بڵێنەوە، ئەوان هەموو ئەو كارانە وا لێدەدەنەوە دەسەڵاتدارانی هەولێر دەیانەوێت لە پێگەی سلێمانی بدەن. فەرمانگەكانی وەزارەتی ناوخۆ لە سلێمانی لە ساڵی 2020دا خەرجكردنی نەسریەی فەرمانگەكانی سەربە وەزارەتی ناوخۆ راوەستاوە، بەڵام لە خەرجكردنی ئەم پارەیە لە هەولێرو دهۆك هەر بەردەوام بووە، ئەوانەی ئاگادارن دەڵێن رابەر سدیق بریكاری وەزیری دارایی لەسەر پشكی پارتی بە بەرپرسانی هەولێرو دهۆكی وتووە نەسریە لەسەر حسابی 2019 خەرج بكەن، بەڵام ئەمەی بە فەرمانگەكانی سەربە وەزارەتی ناوخۆ لە سلێمانی نەوتووە‌و فەرمانگەكانی سلێمانی (8) مانگ دوای فەرمانگەكانی هەولێرو دهۆك دەستیان بە خەرجكردنی پارە كردووە. بەرپرسانی خۆجێی سلێمانی سكاڵا دەكەن لەوەی نوسراوەكانیان لە هەولێر وەڵامنادرێتەوە، یەكێك لە بەرپرسانی خۆجێی سلێمانی بە (درەو)ی وت، لە وەزارەتی ناوخۆ لە هەولێر ژورێك هەیە بەناوی "خۆجێی"، بەڕێوەبەری ئەم ژورە بەمدواییە خانەنشین بووە، دوای ئەوەی بەڕێوەبەری نوێ لە شوێنەكەی دەستبەكاربووە، ژمارەیەكی زۆر نوسراویان لە ژورەكەیدا دۆزیوەتەوە كە وەڵامنەدراونەتەوە، رێژەی 70%ی ئەو نوسراوانە ئەوانە بوون كە لە سلێمانییەوە نێردراون، ئەمە لەكاتێكدایە یەكێتی‌و گۆڕان وەكو دوو هێز كە بنكەی جەماوەریان لە سلێمانییە، دوو بریكاریان لە وەزارەتی ناوخۆدا هەیە. رۆشنبیری لە سلێمانی سلێمانی كە نازناوی پایتەختی رۆشنبیری پێدراوە، ساڵانێكە بە كردەوە ئەم نازناوەی لەدەستداوە، ئێستا كە شارەكە یادی (236 ساڵەی) دامەزراندنی دەكاتەوە، بەشێكی زۆری دامەزراوە رۆشنبیرییەكانی داخراون یاخود چالاكییان نەماوە لەوانە: •    دەزگای سەردەم  •    دەزگای حەمدی •    بنكەی ئەدەبی‌و روناكبیری گەلاوێژ  •    تیپی مۆسیقای سلێمانی  •    تیپی نواندنی سلێمانی •    زۆربەی دەزگا چاپەمەنییەكانی داخراون •    تیپە شانۆییەكان زۆربەیان راوەستاون •    دەیان گروپی شێوەكاری هەڵوەشاونەتەوە  •    كۆڕو كۆبونەوە هونەرییەكان زۆر كەمیان كردووە  •    هۆڵەكان زۆربەی داخراون •    ڤیستیڤاڵە هونەرییەكان راوەستاون •    ڤیستیڤاڵی نێودەوڵەتی شانۆ لە سلێمانی راوەستاوە ساڵی 2013 وەزارەتی دارایی هەرێمی كوردستان بڕی (20 ملیار) دینار لەژێر ناوی "بنیادنانی ژێرخانی رۆشنبیری شاری سلێمانی" بۆ سلێمانی خەرجكرد، ئەم پارەیە بەگوێرەی راپۆرتی چاودێری دارایی كە پێشتر (درەو) كرۆكی راپۆرتەكەی بڵاوكردەوە، بەهەدەردانی زۆری تێدا كراوە، بڕیاربوو لیژنەی لێكۆڵینەوە لە ئەنجومەنی پارێزگای سلێمانی لەبارەی ئەم كەیسەوە بڕیار بدات، بەڵام كەیسەكە داخرا، بەڕێوەبەری پێشووی رۆشنبیری سلێمانی (بابەكر دڕەیی) دەستی لەكاركێشایەوە، ئێستا بزوتنەوەی گۆڕان لە شوێنەكەی كەسێكی تری بۆ پۆستی بەڕێوەبەری رۆشنبیری سلێمانی كاندید كردووە كە (موحسین ئەدیب)ە‌و بڕیارە دوای دەرچوونی فەرمانەكەی لەلایەن حكومەتەوە دەستبەكارببێت. خاكی سلێمانی ئێستا كە یادی (236 ساڵەی) دامەزراندنی سلێمانی دەكرێتەوە، هەڵمەتێكی نوێی داگیركردن‌و فرۆشتنی زەوییەكانی سلێمانی دەستی پێكردووە، رۆژانە بەبەرچاوی بەرپرسانی حزب‌و حكومەتە سەدان پارچە زەوی دابڕ دابڕ دەكرێن‌و دەفرۆشرێن. بەگوێرەی نوسراوی پەرلەمانتار عەلی حەمەساڵح، هەڵمەتی داگیكردنی زەوییەكانی سلێمانی ئەمجارە ئەم ناوچانەی گرتوەتەوە: •    ئاوبارە •    رێگای ئاوبارە (سوتاندنی سنەوبەرەكان كە روبەرەكەی زیاتر لە 120 دۆنم زەوییە) •    تەنیشت‌و پشتی قەبرستانی عەواڵ •    بەرامبەر وێستگەی كارەبا كە زیاتر لە هەزار دۆنمە •    بەرامبەر سەناعەی بەكرەجۆ •    تەنیشت فڕۆكەخانەی سلێمانی •    تەنیشت دەواجنەكان •    كانی گۆمە تاوەكو تانجەرۆ •    زەوییە كشتوكاڵییەكانی خوار بەكرەجۆ •    خەلیفاوا سیاسەت لە سلێمانی ئەوانەی خۆیان بە خاوەنی سلێمانی ئەزانن، نازانن چی لەم شارە بكەن، رۆژێك دەیانەوێت لامەركەزیەتی بۆ زامن بكەن، رۆژێك دەیانەوێت بیكەن بە هەرێمی سەربەخۆ، شارەكە لەناو ئەم كێشمەكێشە سیاسییەدا تادێت لەهەموو بوارەكاندا پاشەكشێ دەكات. بەپێی ئەوەی هەندێك لە بەرپرسانی یەكێتی باسی دەكەن، هاوسەرۆكەكانی یەكێتی تا كۆتایی ئەمساڵ دەرفەتیان بۆ پارتی داناوە، ئەگەر دەسەڵاتی ئیداری‌و دارایی ناوچەی سلێمانی نەگەڕێتەوە بۆ سلێمانی، ئەوا یەكێتی بەشێوەیەكی تاكلایەنە جیابونەوەی خۆی رادەگەیەنێت‌و چیتر فەرمانەكانی حكومەت لە هەولێر جێبەجێ ناكات‌و خۆی ئیدارەی ناوچەكەی خۆی دەدەت. یەكێتییەكان هۆكاری پاشەكشێی سلێمانی بۆ دەسەڵاتی ناوەندی پارتی لە هەولێر دەگێڕنەوە‌و حكومەت‌و بەرپرسەكانی خۆیان لەناو حكومەت بە كەمتەرخەم دەزانن، لەحاڵێكدا كێشمەكێشە ناوخۆییەكانی یەكێتی كاریگەرییەكانی لەسەر پاشەكشێی سلێمانی كەمتر نەبووە لە پەراوێزخستنەكەی لەلایەن حكومەتەوە لە هەولێر. لە سنوری سلێمانی حزب‌و بەرپرسان دەستیان بەسەر بەرزاییەكاندا گرتووە‌و كردویانە بە بارەگای حزبی، داهاتی دەروازە سنورییەكان بەشێكی زۆری بەهۆی كاری قاچاخچێتییەوە بەفڕۆ دەڕوات‌و ناگەڕێتەوە بۆ پرۆژە خزمەتگوزارییەكان لە شارەكەدا.  سلێمانی لەرووی سیاسیەوە بەرادەیەك دواكەوتووە كە چیتر بەشدار نیە لە گەڵاڵەكردنی بڕیارە سیاسیەكان لە هەرێمی كوردستان و خەریكە ووردەووردەوە لەسەر نەخشەی سیاسی عێراق و ناوچەكە دەسڕێتەوە، وەفدە عێراقی و بیانیەكان دەمێكەوە لە سلێمانی تۆراون و بەتایبەتیش كە زانیان بڕیاری كۆتایی هەرێم لە هەولێر. ئەوەی ئێستا بۆ سلێمانی ماوەتەوە تەنیا ناڕەزایەتییە، ئەمەش ئێستا ئیتر لە شەقامدا نەماوە‌و كەوتوەتە ناو روپەڕی تۆڕە كۆمەڵایەتییەكان‌و پاشەكشێی گەورەی كردووە. ئەوەی نوێنەرایەتی سلێمانی دەكات لە حكومەتدا قوباد تاڵەبانی جێگری سەرۆكی حكومەتی هەرێمی كوردستانە، هەندێك وەكو سەرۆكی حكومەتی ناوچەی سلێمانی ناوی دەبەن، ئەویش ماڵەكەی بردووەتە هەولێرو لە رێگەی تۆڕی كۆمەڵاییەتیەوە یادی سلێمانی دەكاتەوە.