( درەو میدیا):  بە بەرارود بە هەڵبژاردنی 21/9/2013 دەنگ و كورسیەكانی بزوتنەوەی گۆڕان لە هەڵبژاردنی 30/9/2018 زیاتر لە نیوە دابەزیوە. بزوتنەوەی گۆڕان لە هەڵبژاردنی 30ی ئەیلولی پەرلەمانی كوردستاندا، بەپێی ئەنجامە نافەرمیەكان نزیكەی ( 195 هەزار ) دەنگی بەدەستهێناوە بەرێژەی ( 12%) و 12 كورسی پەرلەمانی بەدەستهێناوە. بەبەراورد بە هەڵبژاردنی رابردوو 2013 بزوتنەوەی گۆڕان كە (476736) دەنگ و بەڕێژەی (24.4% ) و (24) كورسی بەدەستهێناوە ، بەو پێیەش 50% ی كورسیەكانی كەمیكردووەو دەنگەكانیشی (59%) كەمیكردووە بەزیاتر ( 280 هەزار ) دەنگ كەمیكردووە.    

 ( درەو میدیا):  بە بەرارود بە هەڵبژاردنی 21/9/2013 دەنگ و كورسیەكانی یەكگرتووی ئیسلامی كوردستان لە هەڵبژاردنی 30/9/2018 زیاتر لە نیوە دابەزیوە. یەكگرتووی ئیسلامی كوردستان كە لەگەڵ بزوتنەوەی ئیسلامی و رەوتی گەشە بە لیستی ( بەرەو ئیسلاحیان) بەشداری هەڵبژاردنی 30ی ئەیلولی پەرلەمانی كوردستانیانكرد بەڵام بەپێی ئەنجامە نافەرمیەكان نزیكەی ( 83 هەزار ) دەنگیان بەدەستهێناوە بەرێژەی ( 5%) دەنگەكانیان بەدەستهێناوە. بەبەراورد بە هەڵبژاردنی رابردوو یەكگرتووی ئیسلامی كوردستان بەتەنها خۆی بەبێ لایەنەكانی دیكەش  (186741 ) دەنگی بەدەستهێنابوو بەرێژەی ( 9.6%) و ( 10 ) كورسی، لە كاتێكدا بزووتنەوەی ئیسلامیش لە هەڵبژاردنی رابردودا (21834) دەنگ و بەرێژەی ( 1.1% ) و بەدەستهێنانی ( 1 ) كورسی. بەتەنها یەكگرتوو كورسیەكانی 50% كەمیكردووەو دەنگەكانیشی (55%) كەمیكردووە بە نزیكەی ( 103 هەزار ) دەنگ، بەڵام لیستی بەرەو ئیسڵاح كە لە یەكگرتوو بزوتنەوەی ئیسلامی و رەوتی گەشە پێكهاتووە كە ( 83 هەزار ) دەنگ و بەرێژەی 5% و 5 كورسی بەدەستهێناوە كە بە یەكگرتوو بزووتنەوەی ئیسلامی ( 207 هەزار) دەنگیان بەدەستهێنابوو بەرێژەی 11% بەهەردوكیان 11 كورسیان بەدەستهێنابوو واتا 6كورسی كەمیان كردووە و دەنگەكانیشیان ( 124 هەزار ) كەمیكردووە.   

 (درەو میدیا): قسەیەك هەیە دەڵێت" لەسیاسەتدا ئەنجام حسابە" بەم پێوەربێت، هەرچییەك لەبارەی هۆكارەكانەوە بوترێت بەهای نیە و دەچێتە چوارچێوەی پاساوەوە، ئەنجامیش لەسەر زەمینی واقیع دەڵێت" بارزانی یارییەكەی دۆڕاند" و ڕۆیشتن بەرەو كۆشكی سەرۆكایەتی، لەبری سەری ڕەش، بە دەباشاندا تێپەڕی. بەهۆی كورتیهێنانی خوێندنەوەكانی بارزانی بۆ دۆخی عێراق و ناوچەكە، لەماوەی ساڵێكدا دووجار پشتی درا بەزەویدا، هەردوو جارەكەش لەسەر دەستی نەوەكانی تاڵەبانی بوو، ڕەنگە پاساوی "خیانەت" كە زوو زوو لە قاموسی سیاسی كوردا دەردەهێنرێت و پارتی و یەكێتی دەیكێشن بەدەمووچاوی یەكدا، هیچ لە واقیعی ئەو شكستە نەگۆرێت كە بارزانی دووچاری بووە، چونكە ئەگەر "خیانەت" وەك هۆكار بۆ شكستە یەك لەدوای یەكەكانی بارزانی ڕاستبێت، دەبێ ئەوەش لەبەرچاوبگرێت خۆی و پارتەكەی، لەسەر بنەمای 31 ئاب هاوكێشەی هێزیان لە كوردستان گۆڕی و تائێستاش لەسەر ئەو بنەمایە حوكمی كوردستان دەكەن كە  زۆرێك بە "خیانەتی عوزما"ی لەقەڵمدەدەن.    لە پەرلەمانی عێراق چی ڕوویدا؟ "درەو میدیا" لەبەدواداچونێكی ورددا بۆ ڕوداوەكانی پشت پەردەی هەڵبژاردنی سەرۆك كۆماری عێراق و دواین ساتەكانی پێش هەڵبژاردنی بەرهەم ساڵح بەسەرۆك كۆمار و ململانێكانی ناو پەرلەمانی عێراق، كۆمەڵێك زانیاری گرنگی دەستكەوتووە، كە لێرەدا دەیخاتەڕوو. بەپێی زانیارییەكان، پارتی تا دواساتەكان نەیویستووە نیسابی یاسایی لە پەرلەمانی عێراق تەواوبێت، چونكە ترسی جدی هەبووە بەرهەم ساڵح لە فوئاد حسێن بباتەوە، بەڵام یەكێتی جۆرێك لەنەرمی پیشانداوە و بەهاوكاری ئێرانییەكان قەناعەتیان بە پارتی و هاوپەیمانەكانی كردووە كە داخڵی دانیشتنی ئەنجومەنی نوێنەران بن، كاتێك چونەتە دانیشتنەكە توشی شۆك بوون و كورد وتەنی دەستیان لەبنی هەمانەكەوە دەرچووە و، ئەو ڕاستییەیان بۆ ڕونبوەتەوە كە (تیمەكەی یەكێتی) لەسەر چەندین ئاست كاری بۆ دەرچوونی بەرهەم ساڵح كردووە، لەكاتێكدا بارزانی تەنها لەڕێی چەند سەرۆك هێزێكی سوننە و شیعەو و هەڕەشەكردن بەكشانەوە لە پرۆسەی سیاسی عێراق و گەڕانەوە بۆ دوو ئیدارەیی لە یەكێتی، كاری بۆ سەرخستنی فوئاد حسێن كرد، ئەمەش ئەوە دەگەیەنێت متمانەبوونی لەڕادەبەری بارزانی بە پێگەو نفوزی خۆی دووچاری ئەو شكستە گەورەیەی كردووە.  سەرچاوەیەك لە تیمەكەی یەكێتی بە (درەو میدیا)ی وت:" ئێوارەی دوێنێ‌ و لەكاتی توندبونەوەی ململانێكاندا، وەزیری دەرەوەی ئەمریكا بە تەلەفون قسەی لەگەڵ بەرپرسانی تیمەكەی یەكێتی كردووە و دوای لێكردوون بەرهەم ساڵح بكشێننەوە، لەترسی ئاڵۆزبونی دیمەنی سیاسی لەبەغدادو هەرێمی كوردستان، نێچیرڤان بارزانیش پێشنیازی كردووە قوباد تاڵەبانی پۆستی سەرۆكی حكومەتی هەرێم بۆ چوار ساڵی داهاتوو وەربگرێت، بەڵام یەكێتی هەردوو داواكەی ڕەتكردوەتەوە". بەوتەی سەرچاوەكە، پارتی پارەیەكی زۆری بەخشیوەتەوە بەسەر هێزو لایەنە عێراقییەكاندا بۆ دەرچواندنی كاندیدەكەی.   هاوكات سەرچاوەیەك لە تیمەكەی پارتی دیموكراتی كوردستان بە (درەو میدیا)ی، وت" یەكێتی پێشنیازی كردووە دووساڵ بە دووساڵ پۆستی سەرۆك كۆمار وەربگرن، پارتی ئەو پێشنیازەی ڕەتیكردوەتەوە. بەگوێرەی قسەی ئەو سەرچاوەیە لە وەفدی پارتی، بەرپرسەكانی یەكێتی بە پەرلەمانتارانی عێراقیان وتووە، "ئێوە چۆن دەنگ بە كاندیدی یەكێتی نادەن لەكاتێكدا ئێمە بێ شەڕ كەركوكمان ڕادەستكردن، دەنگ بە كاندیدی لایەنێكی تر دەدەن، كە پێوایە كەركوك داگیركراوە". لەبارەی بەخشینەوەی پارەوە، سەرچاوەكەی تیمی پارتی بە (درەو میدیا) وت:" یەكێتی زیاتر لە 5 ملیۆن دۆلاری بەخشیوەتەوە بۆ دەرچواندنی بەرهەم ساڵح".  شكستی شەخسی بارزانییە دەكرێت هەردوو شكستەكە، چی پرۆسەی ڕیفراندۆم و هەم ململانێی پۆستی سەرۆك كۆمار بە شكستی شەخسی بارزانی دابنرێت و، شرۆڤەی ئەوەی بۆ بكرێت كە نەوەكانی تاڵەبانی لە گۆڕەپانی شەڕو ململانێی سیاسیشدا پشتی (مەسعود بارزانی)یان لەزەویدا، بەوپێیەی بارزانی لەهەردوو پرسەكەدا بەشەخسی ئیدارەی ململانێكانی داوەو، زیاتر لە سیاسەتكردن عینادی و بردنە سەری قسەی خۆی، بەسەریدا زاڵبووەو هەرئەوەش توشی هەڵەی گەورەی كردووە، كە ڕەنگە وەك شەخس تەنها لەڕووی مەعنەوییەوە باجەكەی دابێت، لەكاتێكدا لەسەر زەمین وێڕایی پەرتكردنی زیاتری ناوماڵی كورد و دورستكردنی مەترسی جدی لەسەر هەرێمی كوردستان وەك قەوارەی سیاسی، خەڵكی كوردستانیشی دوچاری كارەساتی تراژیدی كردووە. بارزانی ویستی بە وەرگرتنی پۆستی سەرۆك كۆمار شكستی ڕیفراندۆم و هەموو لێكەوتەكانی داپۆشێت و جارێكی تر بەبەهێزی بگەڕێتەوە بەغداد، ئەم دەستكەوتە بخاتە پاڵ ئەو سەركەوتنەی كە لە هەڵبژاردنەكانی هەرێمدا بەدەستیهێناوە، لەو ڕێیەوە وەك بڕیاردەری یەكەم و ڕەها دەربكەوێت و ئەو پەیامەش لەبەغدادەوە بگەیەنێت بەهەموو لایەك، بەڵام ئەنجامی یارییەكە لەبری سەركەوتن بووە شكست و چووە پاڵ شكستەكەی پێشووی لەڕیفراندۆمدا، لەبری ئەوەی ئەو پەیامە بدات بەهەموو لایەك، زۆرینەی شیعەو سوننەكان، تەنات یاریزانە ئیقلیمی و نێودەوڵەتیەكانیش پێیانوت، تۆ تادوێنێ‌ بەتەمابویت عێراق پارچە بكەیت، ئەمڕۆ مافی ئەوەت نیە سەرۆك كۆماری عێراق كە سیمبوڵی و ڕەمزی دەوڵەتە تەعین بكەیت.  

(درەو میدیا): دادگای دادی نێودەوڵەتی لە لاهای بڕیارێكی دەركرد و تێیدا فەرمانیدا بە ئەمریكا تا سزاكانی سەر ئێران هەڵبگرێت، كە لە دوای كشانەوەی واشنتۆن لە رێككەوتنە ئەتۆمییەكە سزاكانی بەسەردا سەپێنراوەتەوە. دادگاكە لە بڕیارەكەیدا رایگەیاندووە سزاكان پێشێلكردنی پەیماننامەی ئیمزاكراوی ساڵی 1956 ەو بونەتە هۆی نەهامەتی بۆ خەڵك. لە بەرامبەرشدا ئەمریكا رایگەیاند دادگاكە دەسەڵاتی ئەو بابەتەی نییە، چونكە زیان بە ئاسایشی نەتەوەیی ئەمریكا دەدات. دادگای دادی نێودەوڵەتی كە بارەگای سەرەكی لە شاری لاهای هۆڵەندایە، بڕیارەكانی مولەزمن، بەڵام هیچ ئامرازێكی نییە بۆ جێبەجێكردنیان و دادگاكە تاكە دامەزراوەی دادوەریی نەتەوە یەكگرتووەكانە بۆ چارەسەركردنی ناكۆكییەكانی نێوان وڵاتانی ئەندام، بەڵام پەیامنێری بی بی سی لە لاهای دەڵێت هەردوو لایەنی دۆسیەكە لە پێشوودا چەندینجار بڕیاری ئەم دادگایەیان پشتگوێخستووە. عەبدولقەوی یوسف سەرۆكی دادگاكە لەكاتی راگەیاندنی بڕیارەكەدا وتی:" دادگا باوەڕی وایە كە پێویستە ویلایەتە یەكگرتووەكان هەموو بەربەرست و تەگەرەیەك لەسەر رێگای هەناردەكردنی ئازای كەلوپەل و شمەك لابدات كە پێداویستییە مرۆییەكانی ئێران پڕدەكەنەوە". مانگی ئایاری رابردوو دۆناڵد ترەمپ سەرۆكی ئەمریكا فەرمانیدا بە گەڕاندنەوەی سزاكان بۆسەر ئێران و بەوەش بەهای دراوی ئێران بەشێوەیەكی بەرچاو دابەزی و دۆخی ئابوری ئەو وڵاتەی سەختكرد. وردەكاری بڕیارەكەی دادگا ئێران دەڵێت گەمارۆی بازرگانی ئەمریكا، پەیماننامەیەكی بازرگانی نێودەوڵەتی پێشێلدەكات كە ساڵی 1955 ئیمزاكراوە و پەیوەستە بە پەیوەندییە ئابورییەكانی نێوان ئێران و ئەمریكا و بەوەش مافی ئەوە بە دادگای دادی نێودەوڵەتی دەدات بڕیار لەسەر ناكۆییەكانی نێوان هەردوو وڵات بدات. هەروەها ئاماژەبەوەشدەدات كە ئەو هۆكارانەی كە دۆناڵ ترەمپ سەرۆكی ئەمریكا بۆ گەڕاندنەوەی سزاكان بانگەشەیان بۆدەكات، هیچ بنەمایەكییان نییە و ئاژانسی نێودەوڵەتی وزەی ئەتۆم چەندینجار جەختیكردوەتەوە كە ئێران پابەندی مەرجەكانی رێككەوتنە ئەتۆمییەكەیە كە ساڵی 2015 لەگەڵ شەش وڵاتی گەورەدا ئیمزایكردووە.

(درەو میدیا): رەزوان فاید ئەو دزە بەناوبانگەی كە مانگی تەمموزی رابردوو بە هێلیكۆپتەر لە زیندانێكی پاریسی پایپتەختی فەرەنسا بە شێوەیەكی دراماتیكی هەڵات، لەلایەن پۆلیسەوە دەستگیركرایەوە. بە گوێرەی ئاژانسەكانی هەواڵ رەزوان فاید لەگەڵ برایەكی و دوو كەسی تریدا لە باكوری پاریسی پایتەخت دەستگیركراوەتەوە. رەزوان فایدی فەرەنسیی بە رەگەز جەزائیری كە تەمەنی 46 ساڵە، خۆی بە یەكێك لە بەناوبانگترین مافیاكانی فەرەنسا دەناسێنێت و مێژوویەكی دووردرێژی لە تاوان ودزی هەیە لە پاریسی پایتەختی فەرەنسادا. رەزوان فاید رۆژی یەكی تەمموزی رابردوو، بە هاوكاری چەند كەسێكی چەكدار توانی لە زیندانێكی باكوری پاریس بە هێلیكۆپتەرێك هەڵبێت و وەزارەتی دادی فەرەنساش دان بەوەدانا كە ئەو زیندانە كەموكوڕی تێدابووە و ئەوەش پرۆسەی هەڵاتنی رەزوان فایدی ئاسان كردووە. رەزوان كە خاوەنی خەیاڵ و فانتازیایەكی كەموێنەیە، بەهۆی تێوەگلانی لە پرۆسەیەكی دزیكردنی شكستخواردوو ساڵی 2010 كە ئەفسەرێكی پۆلیسی فەرەنسای تێدا كوژرا, سزای 25 ساڵ زیندانیكردنی بەسەردا سەپێندرابوو. ئەوە یەكەمجار نەبوو رەزوان فاید لە زیندان هەڵبێت، بەڵكو لە نەوەدەكانی سەدەی رابردووشدا دوای راكردنی لە زیندان سێ‌ ساڵی لە هاتن و چون لە نێوان سویسرا و ئیسرائیل بەسەربردووە بۆئەوەی نەكەوێتە دەست پۆلیس. بەڵام هەڵاتنی مانگی تەمموزی رەزوان لە زیندانێكی باكوری فەرەنسا، زۆر سەرنجڕاكێش و دراماتیكی بوون لە پرۆسەیەكی چەكداریی كە تەنها چەند خولەكێكی خایاند و بەبێ‌ دەستگیركردنی هیچ بارمتەیەك و بێ‌ كوژران و برینداربونی هیچ كەسێك، ژمارەیەك لە ئەندامانی گروپەكەی دەستدەگرن بەسەر هێلیكۆپتەرێكدا و لەناو گۆڕەپانی زیندانەكەدا دەنیشنەوە و رەزوان رزگاردەكەن، گۆڕەپانی زیندانەكە تاكە شوێنە كە بەهۆی ئەوەی بۆ پێشوازیكردن لە میوانە گەورەكان و كەسایەتییە رەسمییەكان تەرخانكراوە تۆڕی دژە تیرۆری تێدا دانەنراوە. وادەردەكەوێت كە هاوكارەكانی رەزوان زۆر بەباشی شارەزای شوێنەكە بوون و لەكاتی گەیشتنیاندا دەستبەجێ‌ بۆمبی دوكەڵیان فڕێداوەتە گۆڕەپانەكە و دەرگایەكی زیندانەكەیان كردوەتەوە و دوو دەرگای تریان شكاندووە و چونەتە ناو هۆڵی زیندانەكەوە لەوێ‌ رەزوان و یەكێك لە براكانی چاوەڕوانیان بوون.   " دزە نوسەرەكە" بە گوێرەی راپۆرتێكی رۆژنامەی " نەهار" رەزوان فاید خاوەنی جەماوەر و رێزێكی زۆرە لە نێو تاوانباران و مافیاكاندا لە ناوچە میللییەكانی فەرەنسادا، هەتا لە نێو دزە پیشەگەرەكانیشدا و پیاوانی پۆلیس نازناوی " دزە نوسەرەكە" یان لێناوە بەهۆی ئەوەی ساڵی 2009 كتێبێكی نوسیوە و تێیدا باس لە ئەزمونی گەشەكردنی دەكات لە كۆڵانە پەراووێزخراو و میللیەكانی پاریسدا، كە تاوان و یاسای دارستان و دەسەڵاتی مافیاكان تێیاندا بڵاوە. رەزوانی دز و تاوانباری نامۆ ناوبانگێكی بەرفراوانتری بەدەستهێنا، كاتێك لە شاشەی زۆربەی تەلەفزیۆنەكانی فەرەنساوە دەركەوت بۆ باسكردنی  كتێبەكەی و ئەزمونی خۆی لە جیهانی تاوانكاریدا  لە نێو پەراوێزخراوەكان و بێ‌ سەرپەرشتانی پاریسدا. رەزوان كە لە دایك و باوكێكی كۆچبەری جەزائیری لەدایكبووە و زۆر كاریگەرە بە سینەما، لە كتێبەكەیدا باس لەوەدەكات كە چۆن هاوشێوەی فیلمێكی سینەمایی دزی لە بانكێك كردووە و چۆن لەسەر شێوازی فیلمی " Reservoir dogs " دزی لە بارهەڵگرەكان كردووە. لە چاوپێكەوتنە تەلەفزیۆنییەكەیدا ئەو دزە شیك پۆشە بانگەشەی ئەوەیكرد كە چیتر ناگەڕێتەوە جیهانی مافیاكان و دزی و تاوان و جەختیشیكردەوە كە داوای لە لێبوردن ناكات لەو تاوانانەی كردونی چونكە ئەوەی رۆی رۆیشت، هەروەها وتیشی كە كارێكی لە بواری بازرگانیدا دەستكەوتووە و ژیانی بۆ كوڕەكەی تەرخاندەكات، بەڵام ئەو بە رێگایەكی زۆر قەناعەتپێكەرانە درۆی كرد، چونكە هەر لە هەمان ساڵدا و بەدیاریكراوی لە 20 ئایاری 2010دا  لە ئوتۆسترادی خێرا خۆی و گروپەكەی دەسترێژی گوللەیان لە كاروانێكی هێزەكانی ئاسایشی فەرەنسا كرد و چەند كەسێكی مەدەنیان برینداركرد، لە نیسانی 2018شدا دادگای بەرایی لەسەر ئەو كردوەیە و هەوڵێكی دزی  كە ئەفسەرێكی پۆلیسی تێدا كوژرا، رەوزانی تاوانبار كرد. هەروەها ساڵی 2017ش دووجار سزای بەسەردا سەپاند، سزای 10 ساڵ زیندانیكردن بەهۆی هەڵاتنی لە زیندانی لیل لە ساڵی 2013 ەو سزای 18 ساڵ زیندانیكردن بەهۆی هێرشكردنەسەر بارهەڵگرێك لە بادو كالیە لە ساڵی 2011دا و ئەویش تانەی لە هەردوو بڕیارەكەی دادگا دا. لە 13ی نیسانی 2013 رەزوان دوای لە نیو كاتژمێردا دوای گرتنی چوار پاسەوان و بەكارهێنانیان وەك قەڵغانی مرۆیی لە زیندانی لیل سكیدان هەڵات و پێنج دەرگای تەقاندەوە پێش ئەوەی بگگاتە ئۆتۆمبیلێك كە چاوەڕوانی دەكرد و هەڵاتنەكەی چەند هەفتەیەكی خایاند. یەكێك لەو پاسەوانانەی كە لە نزیكەوە لە زینداندا رەزوانی ناسیوە دەڵێت لە یەكێك لە گۆشەكانی مێشكیدا رەزوان هەرگیز دەستبەرداری بیرۆكەی هەڵاتن بۆ جیهانی ئازادی و تاوان نەبووە، لە پشت رەفتارەكانی ئەم كەسەوە كە زۆر عاقڵ دەردەكەوێت، هەمیشە گەمە و پلانە جەهەننەمییەكان خۆیان حەشارداوە. هەروەها یەكێك بە شارەزایانی پزیشكی دەروونیی فەرەنسا لە یەكێك لە دادگاییكردنەكانیی رەزواندا ساڵی 2016 وتی كە رەزوان " دڕەندەیەكی كۆمەڵایەتی" یە و سیفاتە كەسییەكان و سیحر زیرەكی و ئازایەتی و كاریگەریی بۆ كۆنترۆڵكردنی كەسانی تر بەكاردەهێنێت ئەوە دەستكەوتنی ئەوەی دەیەوێت و ئارەزووی دەكات.  

(درەو میدیا): رۆژی 2ی ئۆكتۆبەر عادل عەبدولمەهدی سیاسەتمەداری عێراق  لەلایەن بەرهەم ساڵح سەرۆك كۆماری عێراق بە پێكهێنانی كابینەی نوێی حكومەت راسپێردرا.  ئەگەر كابینەكەی  متمانەی پەرلەمان بەدەستبهێنێت، ئەول عەبدولمەهدی دەبێتە چل و نۆیەمین سەرۆك وەزیرانی عێراق لە ساڵی 1920ەوە و پێنجەم سەرۆك وەزیران لە دوای رووخاندنی رژێمی بەعسەوە. پرۆفایلی عادل عەبدولمەهدی: •    ناوی تەواوەتی عادل عەبدولمەهدی مونتەفكییە  و ساڵی  1942 لە ناوچەی بەتاوین لە بەغدای پایتەخت لەدایكبووە و موسوڵمانێكی شیعە مەزهەیە و سیاسەتمەدار و ئابوریناسە و لە خێزانێكی بۆرجوازیی كە لە مونتەفەك ناسریەی ئێستا نیشتەجێبوون و لە بنەچەدا خەڵكی كوتن. •    باوكی لە سەردەمی حوكمی پاشاییەتیدا لە عێراق وەزیر بووە و هەروەها نوێنەری  ناسریە "مونتەفەك" بووە لە ئەنجومەنی ئەعیانی عێراق. •    عادل عەبدولمەهدی لە لاوێتیدا كاریگەر بووە بە بیری ناسیۆنالیزمی عەرەبی و لە منداڵییەوە لەگەڵ ئەحمەد چەلەبی و ئەیاد عەلاویدا هاوڕێ بووە و قۆناغی ئامادەیی خوێندنی لە خوێندنگەی " كۆلێژی بەغداد" لە ناوچەی ئەعزەمییە تەواوكردووە. •    ساڵی 1968 بۆ خوێندن چووەتە فەرەنسا و تا ساڵی 1972 ماوەتەوە، پاشان چووتە سوریا و لوبنان و دوای هێرشی ئیسرائیل بۆسەر لوبنان گەڕاوەتەوە فەرەنسا و هەتا ساڵی 2003 ماوەتەوە و پاشان گەڕاوەتەوە بۆ عێراق. •    سەرەتا كاركردنی لە بواری سیاسەتدا پەیڕوی بیری سۆسیالیستی كردووە و پاشان كاریگەر بووە بە بیری ئیسلامی شیعەی میانڕە. •    یەكێك بووە لە سەركردەكانی ئەنجومەنی باڵای شۆڕشی ئیسلامی كە لە هەشتاكانی سەدەی رابردوودا بەهاوكاری ئێران دامەزرێنراوە. •    لە دوای روخاندنی رژێمی بەعس، بووەتە جێگری عەبدولعەزیز حەكیم لە ئەنجومەنی حوكم و پاشان لە حكومەتی كاتیدا بە سەرۆكایەتی ئەیاد عەلاویی پۆستی وەزارتی دارایی پێسپێدراوە. •    ساڵی 2005 بووەتە جێگری سەرۆك كۆمار و پاشان تا ساڵی 2014 وەزیری نەوت بووە. •    نەیارەكانی بە سیاسییەكی ئینتیهازیی و گەڕان بە دوای پۆستدا تۆمەتباریدەكەن و ئەویش پاساوی بۆ گۆڕانكارییە فیكریی و سیاسییەكانی ئەوەیە كە ئەو كارە 50 ساڵی خایاندووە و ئەوەش ماوەیەكی ئاساییە بۆئەوەی مرۆڤ بگۆڕێت.  

( درەو میدیا): بەپێی ئەنجامی ( 95%)ی دەنگەكانی هەڵبژاردنی 30ی ئەیلولی 2018ی پەرلەمانی كوردستان: پارتی دیموكراتی كوردستان ( 660 هەزار ) دەنگی بەدەستهێناوە بەرێژەی 45% یەكێتی نیشتیمانی كوردستان ( 280 هەزار ) دەنگی بەدەستهێناوە بەرێژەی 19% بزوتنەوەی گۆڕان ( 180 هەزار) دەنگی بەدەستهێناوە بەرێژەی 12% نەوەی نوێ ( 125 هەزار ) دەنگی بەدەستهێناوە بەرێژەی 8.5% كۆمەڵی ئیسلامی كوردستان ( 105 ) هەزار دەنگی بەدەستهێناوە بەرێژەی 7% یەگرتووی ئیسلامی كوردستان ( 80 هەزار ) دەنگی بەدەستهێناوە بەرێژەی 5.5%

راپۆرتی: درەو میدیا  لەكۆتایدا بەرهەم ساڵح یارییەكەی بردەوە و هەموو ئەو بۆمبە چێندراوانەی پارتی و شەخسی بارزانی لەلایەك و، ژمارەیەك كەسایەتی خاوەن پێگە لەناو یەكێتی و لەماڵباتی تاڵەبانی بۆیان چاندبوو، تەقاندەوەو نەیانتوانی ڕێگەی گەیشتن بەكۆشكی سەلامی لێتێك بدەن و، ئەزمونی ساڵی 2014ی، لەگەڵ دووبارە بكەنەوە، ئەمجارە ئەو لەنەیارەكانی  لێزانانەتر یاری خۆی كرد و بەو ڕێگایەدا نەڕۆیشتەوە كە پێشتر تاقیكردبوەوە. ئەو، چوار ساڵ لەمەوپێش چانسی خۆی لەناو زۆرینەی كوردا بۆ گەیشتن بە كۆشكی سەلام تاقیكردەوە، بەڵام نەیانهێشت پێی تێبخات، بۆیە لەم گەڕەدا كە بەدوا هەلی دەزانیی، بڕیاریدا بە هەر نرخێك بێت خۆی نەداتە دەست كورد و، لەڕێی زۆرینەی شیعەو سوننەوە بەختی خۆی بخوێنێتەوە. بەرهەم ساڵح بۆ گەیشتن بە كۆشكی سەلام باجێكی قورسیدا، كە ڕەنگە وەك سێبەری خۆی تا لە ژیاندابێت لێینەبێتەوە، ئەو حزبێكی دامەزراندو كەوتە ڕكابەریكردنی زۆرێك لە هاوڕێ و هاوخەباتەكانی، خۆشی لەو مێژووە دورودرێژەش بێبەری كرد كە لەگەڵیان بەسەری بردبوو، بەڵام كە گەیشتە ئەو بڕوایەی ئەو ڕێگایە نایگەیەنێتە ئامانجە گەورەكەی، ئەمجارەیان بێ ئاوڕدانەوە هاوڕێ تازەكانی بەجێهێشت و بەچاوی نوقاو و گوێیەكی قورسەوە، ڕێگایەكی پڕ لەتانەو تەشەری گرتەبەر و جارێكی تر بەرەو ئامانجە لەمێژینەكەی كەوتەڕێ‌. ئەوەی بەرهەم ساڵح كردی بەهەموو پێوەریك بێ‌ پێشینەبووە، چونكە تائێستا نەبیستراوە  سەرۆكی حزبێك حزبەكەی بەجێبهێڵێت و بچێتە ناو حزبێكی ترەوە، لەكاتێكدا عورف و كلتوری سیاسی باو ئەوەیە ئەندامانی حزب بچنە ناو حزبێكی ترەوە، بەڵام ئەو ئەم عورفەی تێكشاندو مۆدلێكی نوێی لەسەنگەرگواستنەوەی سیاسی داهێنا. دواجار بەرهەم ساڵح بەئاواتەكەی گەیشت، بۆ چوارساڵی داهاتوو لەسەر ئەو كورسییە دادەنیشیت كە پێشتر تاڵەبانی لەسەر دانیشتووە، لەگەڵ ئەوەی یار و نەیار كۆكن كە بەرهەم ساڵح شایستەترین كەسە بۆ دانیشتن لەسەر ئەوكورسییە، بەوپێیەی پیاوێكی لێهاتوو و خاوەن ئەزمونێكی سیاسی باش و ناسراوە لەسەركۆی ئاستەكان و بۆ ناوبانگی كوردیش گرنگە  سیاسییەكی وەك ئەو نوێنەرایەتی كورد لەسەر ئاستی عێراق و هەم نوێنەرایەتی عێراقیش بكات لەسەر ئاستی جیهان، بەڵام هیچكام لەمانە شەفاعەتی ئەوەی بۆناكات چاپۆشی لەو ڕێگایە بكرێت كە بۆ گەیشتن بەكۆشكی سەلام گرتیەبەر. زۆرێك لەنەیارەكانی بەرهەم ساڵح دەڵێن، ئەو جگە لەوەی "هاوڕێی نیوە ڕێگا"و پیاوێكی بەرژوەندخواز و ساحێبی قسەو بەڵێنی خۆی نەبوو، ئاوێكی خراپیشی ڕشت و دەرگایەكی بێپێشینەی بۆ سەنگەرگواستنەوە كردەوە، پاشگەزبونەوەی لەپەیمان و بەڵێن كردە مەسەلەیەكی ئاسایی و، بەچۆڵكردنی بەرەی هێزە نەیارەكانی یەكێتی و پارتی جۆرێك لە نائومێدیشی لەناو خەڵك دروستكرد كە كاریگەریی لەسەر چەندئاست داناوە، هەر لاوازبونی متمانەی هاوڵاتیان بەسیاسییەكانەوە، تا دەگاتە نائومێدكردنیان لە سندوقەكانی دەنگدان و پرۆسەی دیموكراسی لە هەرێمی كوردستان. لەمڕوەوە زۆرێك بەرهەم ساڵح بەنمونەی سیاسییەك وەسفدەكەن كە بۆ پۆست و پلەو پایەو ناوبانگ دەژی بێگوێدانە ئەو ڕێگایەی دەیەگەیەنێتە ئەو ئامانجە وەك ئەو وتە سیاسییەی كە دەڵێت" گەیشتن بەئامانج پاساوە بۆ هەر ڕێگایەك كە بگیرێتەبەر" لەكاتێكدا وەك دەوترێت، سیاسی دەبێت بۆ سیاسەت بژی و سیاسەتیش بۆ چاكەی گشتی بكات، نەك بەرژوەندی شەخسی. لەبەرامبەر ئەم ڕایەدا كە ماوەیەكی زۆر ڕەواجێكی گەورەی پێدرا، لەزۆرێك لە میدیاكان و تۆڕەكانی كۆمەڵایەتیدا، ڕایەكی تر پێیوایە، ئەوەی لەسەر بەرهەم ساڵح دەوترێت قسەكردنە لەسەر دیوێكی وێنە ڕاستەقینەكە، دیوەكەی تری ئەوەیە بەرلەوەی خەڵك لە بەرهەم ساڵح بێئومێدبێت، ئەو لەو حزبە سیاسییانە بێومێد بوو كە سیاسەتی لەگەڵ دەكردن (هێزە ناڕازییەكان)، ئەوان نەئامادەبوون لەگەڵیدا بایكۆتی پرۆسەی سیاسی بكەن و، نە ئامادەشبوون بیكەنە كاندیدی خۆیان بۆ پۆستی سەرۆك كۆماری عێراق، نە متمانەشیان پێەدەكرد، لەكاتێكدا ئەو دەستبەرداری پۆستی جێگری سكرتێی گشتی یەكێتی و هەموو ئیمتیازاتەكانی حزبەكەی ببوو و ڕێگایەكی سەختی گرتبووە بەر.

( درەو میدیا): بەپێی ئەنجامی ( 95%)ی دەنگەكانی هەڵبژاردنی 30ی ئەیلولی 2018ی پەرلەمانی كوردستان: پارتی دیموكراتی كوردستان ( 660 هەزار ) دەنگی بەدەستهێناوە بەرێژەی 45% یەكێتی نیشتیمانی كوردستان ( 280 هەزار ) دەنگی بەدەستهێناوە بەرێژەی 19% بزوتنەوەی گۆڕان ( 180 هەزار) دەنگی بەدەستهێناوە بەرێژەی 12% نەوەی نوێ ( 125 هەزار ) دەنگی بەدەستهێناوە بەرێژەی 8.5% كۆمەڵی ئیسلامی كوردستان ( 105 ) هەزار دەنگی بەدەستهێناوە بەرێژەی 7% یەگرتووی ئیسلامی كوردستان ( 80 هەزار ) دەنگی بەدەستهێناوە بەرێژەی 5.5%  

 (درەو میدیا): پارتی و هاوپەیمانەكانی لە پەرلەمانی عێراق ڕێگرن لەدروستبونی نیسابی یاسایی و، ترسی جدییان هەیە بەرهەم ساڵح لە دەنگداندا بیباتەوە. سەرچاوەیەكی ئاگادار لە پەرلەمانی عێراق تایبەت بە (درەو میدیا)ی، ڕاگەیاند: لە شەوی ڕابردوەوە تائێستا سەرۆكی پەرمانی عێراق بەهۆی تەواونەبونی نیسابی یاسایی دووجار دانیشتنی دواخستوە. وتیشی: دوای ئەوەی نیوەڕۆی ئەمڕۆ سەرۆكی پەرلەمان دانیشتنەكەی بۆ ماوەی نیوكاتژمێر دواخست، تائێستا نیسابی یاسایی بۆ دەستپێكردنی دانیشتنەكە كە تایبەتە بەهەڵبژاردنی  سەرۆك كۆماری عێراق تەواونەبووە. سەرچاوەكەی "درەو میدیا" ئاشكراشیكرد، پارتی و هەندێك هێزی هاوپەیمانی لە فراكسیۆنە شیعی و سوننەكان ڕێگرن لەبەردەم تەواوبونی نیسابی یاسایی چونكە ترسی جدییان هەیە كە بەرهەم ساڵح زۆرینەی دەنگی پەرلەمانتاران بەدەستبهێنێت و بەسەر فوئاد حسێن كاندیدەكەی پارتی دیموكراتی كوردستاندا سەربكەوێت. بەپێی زانیارییەكانی "درەو میدیا" پارتی و  هەندێك لە هێزە سوننی و شیعییەكان كە نایانەوێت دۆستایەتی بارزانی لەدەستبدەن، لەڕێی تەواونەبونی نیسابی یاساییەوە دەیانەوێت كێشە بۆ بەرهەم ساڵح دروستبكەن و یەكێتی ناچار بەڕێككەوتن بكەن یان گۆڕینی بەرهەم ساڵح بە كاندیدێكی تری یەكێتی، كە ڕەنگە لەو حاڵەتەدا پارتی ڕازیبێت بەكشانەوەی كاندیدەكەی بۆ پۆستی سەرۆك كۆماری عێراق.  

( درەو میدیا): نوێنەرەكانی بزوتنەوەی گۆڕان لەپەرلەمانی عێراق كۆتایی بەبایكۆتی دانیشتنەكان دێنن و سوێندی یاسای دەخۆن. كاوە محەمەد كاندیدی دەرچوی بزوتنەوەی گۆڕان لەپەرلەمانی عێراق لەكۆنگرەیەكی ڕۆژنامەوانیدا ڕایگەیاند: پێشتر بەبڕیاڕی بزوتنەوەكەیان بایكۆتی دانیشتنی پەرلەمانی عێراقیان كردووە وەك ڕێزێك بۆ دەنگدەرەكانیان لە پای  ئەو ساختەكارییە زۆرەی لەهەڵبژاردنی ١٢ی ئایاردا لێیانكرا و، ئێستاش بەبڕیاڕی بزوتنەوەكە گەڕاونەتەوە بەغداد و كۆتاییان بەبایكۆت هێناوە و سوێندی یاسای دەخۆن. كاوە محەمەد ئەو دەنگۆیانەشی ڕەتكردەوە كە خۆیان یەكلاكردبێتەوە بۆ دەنگدان بەیەكێك لەكاندیدەكان و وتی: بزوتنەوەكەیان سەرپشكی كردوون لەوەی دەنگ بەچی كاندیدێك دەدەن.  

(درەو میدیا): بڕیارە پاشنیوەڕۆی ئەمڕۆ پەرلەمانی عێراق دانیشتنێكی یەكلاكەرەوە بۆ هەڵبژاردنی سەرۆكێكی نوێ‌ بۆ عێراق ڕێكبخات، ئەوەش دوای شكستهێنانی دانیشتنی شەوی ڕابردووی پەرلەمان كە بەهۆی نەبونی نیسایی یاساییەوە دانیشتنەكە بۆ ئەمڕۆ دواخرا. بەپێی دەستوری عێراق ، سبەی 3ی تشرینی یەكەم دوا وادەی دەستورییە بۆ هەڵبژاردنی سەرۆك كۆماری عێراق، بەوپێیەی كە خولی نوێی پەرلەمان ڕۆژی 3 ئەیلول یەكەم دانیشتنی گرێداوە. زانا ڕۆستایی یاساناس و پەرلەمانتاری خولی پێشوی پەرلەمانی عێراق لەلێدوانێكی تایبەتدا بە(درەومیدیا)ی، ڕاگەیاند: ئەگەر پەرلەمان نەتوانێت لەوادەی دیاریكراوی خۆیدا پۆستی سەرۆك كۆماری عێراق یەكلابكاتەوەو كاندیدێك بۆ ئەو پۆستە هەڵبژێرێت، ئەوا جارێكی تر دەستوری عێراق ڕووبەڕووی پێشێلكاری ڕوون دەبێتەوە.  لە وەڵامی پرسیارێكی (درەو میدیا)دا، لەبارەی ئەگەری شكستهێنانی پەرلەمان لە هەڵبژاردنی سەرۆك كۆمار و كۆتاییهاتنی وادەی دەستوری بۆ هەڵبژاردنی سەرۆك، پەرلەمان ناچار نابێت خۆی هەڵبوەشێنێتەوە، ڕۆستایی وتی: پەرلەمان ناچار نابێت خۆی هەڵبوەشێنێتەوە چونكە دەستەی سەرۆكایەتی خۆی هەڵبژاردووە. سەبارەت بەدەرچەی یاسای ئەو دۆخەش، زانا ڕۆستایی ڕاگەیاند: تاكە چارەسەر ئەوەیە پەرلەمان دانیشتنەكەی بەكراوەیی بهێڵێتەوە و هەركات دانیشتنی پەرلەمانی عێراق ڕێكخرا لەسەر بنەمای هەمان دانیشتنی پێشوو وەك ئەوەی لە هەمان ڕێككەوتدا بێت و بەرنامەی كارەكانی بەڕێوەبەرێت.  ئامادەكارییەكان بۆ ئەو كۆبوونەوە یەكلاكەرەوەی پەرلەمانی عێراق لە كاتێكدایە، تائەم ساتە یەكێتی و پارتی كاندیدی جیایان هەیە بۆ پۆستی سەرۆك كۆمار .  لە تازەترین پێشهاتیشدا، ئەمڕۆ نوسینگەی بەرهەم ساڵح كاندیدی یەكێتی نیشتمانی كوردستان بۆ پۆستی سەرۆك كۆمار ڕەتیكردۆتەوە كە لە كێبڕكێی بەدەستهێنانی ئەو پۆستە كشابێتەوە.  لەگەڵ ئەوەی هەریەك لە پارتی و یەكێتی ئاماژە بەچانسی كاندیدەكەی خۆیان دەكەن بۆ بەدەستهێنانی پۆستی سەرۆك كۆمار، بەپێی ئەو زانیارییانەی (درەو میدیا) لەزیاد لە سەرچاوەیەكی عێراقییەوە دەستیكەتووە، بەرهەم ساڵح زۆرترین چانسی هەیە بۆ بەدەستهێنانی پۆستی سەرۆك كۆمار،  بەڕای ئەوان (یەكێتی وەك و هێز و بەرهەم ساڵح) یش، وەكو كەسایەتیەكی دیار كە لە ناوەندە سیاسەكانی عێراقدا ناسراوە و ئەزمونی هەیە، بەبەراورد بە(پارتی وەكو حزب و فوئاد حسێن وەك كاندیدی بارزانی) لەپێشتر و خوازراوترن، جگە لەڕۆڵی هاوكێشە ئیقلیمییەكان و بەتایبەت ئێران و ئەمریكا كە پێدەچێت هەردوولایان لەسەر بەرهەم ساڵح بۆ وەرگرتنی ئەو پۆستە كۆكبن.     

راپۆرت: فازل حەمەڕەفعەت جوڵانەوەی نەوەی نوێ وەكو یەكەم لایەنی بەشداربووی هەڵبژاردنی 30ی ئەیلولی پەرلەمانی كوردستان بڕیاریدا كاندیدە دەرچووەكانی نەنێرێتە پەرلەمان، ئەگەر ئەنجامەكانی هەڵبژاردن بەشێوەی ئێستا بمێننەوە. بەپێی ئەنجامە بەراییەكانی هەڵبژاردن، نەوەی نوێ كە یەكەمجارە بەشداری هەڵبژاردنی پەرلەمانی كوردستان دەكات، لەنێوان (8 بۆ 9) كورسی بردوەتەوە. لەدوای بڕیارەكەی جوڵانەوەی نەوەی نوێ بۆ بایكۆتكردنی پەرلەمان، پرسیار لەسەر ئەوە دروستبووە ئەگەر نەوەی نوێ كاندیدە دەرچووەكانی نەنێرێتە پەرلەمان، شوێنەكانیان بە بەتاڵی دەمێنێتەوە یاخود بە كاندیدی تر پڕ دەكرێنەوە؟ (درەو میدیا) بە پشتبەستن بە یاسای هەڵبژاردنی پەرلەمانی كوردستان ژمارە (1)ی ساڵی 1992 كە حەوت جار هەمواركراوە، وەڵامی ئەم پرسیارە بۆ خوێنەرەكانی رۆشن دەكاتەوە. ئەندامێتی پەرلەمان چۆن كۆتایی دێت ؟ بەر لەوەی وەڵامی ئەو پرسیارە بدرێتەوە كورسییە بەتاڵەكان چۆن پڕدەكرێتەوە، گرنگە خوێنەر بزانێت لە بنەڕەتەوە، كاندیدی دەرچوو یاخود پەرلەمانتار چۆن ئەندامێتی لەدەستدەدات؟ بەپێی ماددەی (43)ی یاسای هەڵبژاردنی پەرلەمانی كوردستان لە یەكێك لەم حاڵەتانەدا ئەندامێتی پەرلەمان كۆتایی دێت: 1-    كۆتاییهاتنی ماوەی یاسایی پەرلەمان یان هەڵوەشاندنەوەی. 2-    وازهێنانی ئەندام، لە رۆژی قبوڵكردنی لەلایەن پەرلەمانەوە بەزۆرینەی دەنگ كاری پێدەكرێت. 3-    ئەگەر یەكێك لە مەرجەكانی پاڵاوتنی بۆ ئەندامێتی پەرلەمان تێدا نەبوو، پەرلەمانیش بەزۆرینەی دوو لەسەر سێی دەنگی ئەندامە ئامادەبووەكانی بڕیاری لەسەر بدات. 4-    ئامادەنەبوونی ئەندام لە سێ دانیشتنی لەسەریەك بەبێ عوزری مەشروع. 5-    مردنی ئەندام پەرلەمان. ئەوەی لەم یاسایەدا كاندیدە دەرچووەكانی نەوەی نوێ دەگرێتەوە خاڵی (4)ە كە دەڵێ" ئامادەنەبوونی ئەندام لە سێ دانیشتنی لەسەریەك بەبێ عوزری مەشروع" واتە بەپێی ئەم بڕگەیە ئەگەر كاندیدە دەرچووەكانی نەوەی نوێ لە سێ دانیشتن ئامادە نەبن، ئەندامێتی لەدەستدەدەن. مەترسییەك لەسەر نەوەی نوێ ؟ لەبارەی پڕكردنەوەی كورسییە بەتاڵەكان، یاسای هەڵبژاردنی كوردستان ئاماژەی بە چەند حاڵەتێك كردووە. ماددەی (64)ی یاسای هەڵبژاردن دەڵێ" لەحاڵەتی بەتاڵمانی هەر كورسییەك، ئەوا لەلایەن پاڵێوراوانی ئەو قەوارەیەی خاوەن كورسییەكەیە پڕدەكرێتەوە، ئەویش بەبەخشینی بەو پاڵێوراوەی زۆرترین دەنگی بەدەستهێناوە، وە لە حاڵەتی یەكسانبوونی دەنگەكانی پاڵێوراواندا ئەوا پڕكردنەوەی كورسییە بەتاڵەكە بەگوێرەی ئەولەویەتی ریزبەندی ناوەكان لە لیستە بنەڕەتییەكەوە دەبێت". بەپێی ئەم یاسایە ئەگەر كاندیدە دەرچووەكانی نەوەی نوێ لەسەر بڕیاری جوڵانەوەكەیان هیچ یەكێكیان ئامادە نەبوون بچنە ناو پەرلەمان و كورسییەكەیان پڕبكەنەوە، بەئەندامێكی تری لیستەكەی خۆیان پڕدەكرێتەوە. رەنگە ئەمە كێشە بۆ نەوەی نوێ دروستبكات، چونكە ئەگەر كەسێك لەو كاندیدانەی كە دەرنەچوون، بەڵام دەنگی پێویستیان هەیە پەیوەست نەبن بە بڕیاری جوڵانەوەكەیانەوە دەتوانن كورسی هاوڕێ دەرچووەكانیان لە پەرلەمان پڕبكەنەوە. كورسییەكانی نەوەی نوێ بە كێ دەدرێن ؟ لە حاڵەتێكدا ئەگەر هیچ یەكێك لە كاندیدە دەرچووەكانی نەوەی نوێ و ئەو كاندیدانەش كە دەرنەچوون بەڵام دەنگی پێویستیان هێناوە، ئامادەنەبوون بچنە پەرلەمان، ئەوكات بەپێی ماددەی (62)ی یاسای هەڵبژاردنی پەرلەمانی كوردستان كورسییەكانی نەوەی نوێ دەدرێت بە كاندیدی لایەنە براوەكانی تر. دەقی ماددەی (62)ی یاسای هەڵبژاردن لە بڕگەی سێیەمدا دەڵێ" ئەگەر كورسییە بەتاڵەكە هی لیستێك بوو كە پاڵێوراوی نەمابێ، ئەوا كورسییەكە بۆ پاڵێوراوێكی دیكە لە قەوارەیەكی سیاسی دیكە تەرخاندەكرێت كە كەمترین رادەی ژمارەی ئەو دەنگانەی بەدەستهێناوە كە بۆ پڕكردنەوەی كورسییەك پێویستە، بەپێچەوانەش كورسییەكە بەبەتاڵی دەمێنێتەوە". 90 رۆژەكە پڕكردنەوەی یان نەكردنەوەی كورسییەكانی جوڵانەوەی نەوەی نوێ پرۆسەكەیە كە ماوەی (90) رۆژ واتە سێ مانگ دەخایەنێت، بڕگەی پێنجەمی ماددەی (62)ی یاسای هەڵبژادن دەڵێ" لەحاڵەتی سوێندنەخواردنی پاڵێوراوی هەڵبژێردراو بۆ پەرلەمان لەماوەی دیاریكراودا بەبێ هیچ هۆیەكی رەوا، ئەوا دوای (90) رۆژ، ناوبراو مافی ئەندامێتی نامێنێ و پاڵێوراوێكی دیكە بەپێی یاسا شوێنی دەگرێتەوە". واتە بەپێی یاسای هەڵبژاردنی پەرلەمانی كوردستان، ئەگەر كاندیدە دەرچووەكانی نەوەی نوێ بایكۆتی پەرلەمان بكەن، بەپێی یاسا دەبێت سەرەتا شوێنەكانیان بە كاندید لە هەمان لیستی خۆیان پڕبكرێتەوە، ئەگەر ئەم هەنگاوە سەركەوتوو نەبوو، كورسییەكانیان دەدرێت بە كاندیدی لایەنە براوەكانی تر.

(درەو میدیا): وەزارەتی نەوتی عێراق بڕی هەناردەی نەوت و داهاتەكەی بۆ مانگی ئەیلول راگەیاند و لەو مانگەدا رۆژانە بە تێكڕا 3.456 ملیۆن بەرمیل نەوتی هەناردەكردووە و داهاتەكەشی حەوت ملیار و 900 ملیۆن دۆلار بووە. بە گوێرەی بەیاننامەیەكی وەزارەتی عێراق هەناردەی نەوت لە مانگی ئەیلولدا بەبەراورد بە مانگی ئاب كەمیكردووە و هۆكارەكەشی بۆ ئەنجامدانی چاكسازی لە دامەزراوەكان و خراپی كەشوهەوا گەڕاندوەتەوە. وەزارەتی نەوتی عێراق ئاشكرایكردووە لە مانگی ئەیلولدا رۆژانە  3.853 ملیۆن بەرمیل نەوتی لە كێڵگەكانی باشوورەەوە هەناردەی دەرەوە كردووە و هەر بەرمیلێكیش بە 74.91 دۆلار فرۆشراوە و كۆی داهاتی ئەو مانگەش حەوت ملیار و 900 ملیۆن دۆلار بووە.

(درەو میدیا): (درەو میدیا) لە چەند سەرچاوەیەكەوە ناوی بەشیك لە كاندیدە دەرچوەكانی پارتی دیموكراتی كوردستانی دەست كەوتووە كە بەپێی ئەنجامی بەرایی هەڵبژاردن دەنگی زۆریان هێناوەو چانسی سەركەوتنیان هەیە بۆ پەرلەمانی كوردستان. لە هەڵبژاردنی ساڵی 2013دا پارتی 38 كورسی پەرلەمانی كوردستان هەبووەو لە هەڵبژاردنی 30 یئەیلولیشدا پێشبینی بەدەسهێنانی ( 42 بۆ 44 ) كورسی هەیە   ناوی ئەو كاندیدانەی پارتی كە چانسی سەركەوتنیان هەیە: 1-    هێمن هەورامی  زیاتر لە 60 هەزار دەنگی بەدەستهێناوە و پلەی دووەمی ئاستی كوردستانی بەدەستهێناوە  2-    جەلال پەرێشان  3-    هێڤیدار ئەحمەد 4-    پێشەوا هەورامی  5-    ئومێد خۆشناو  6-    شەعبان عەلی شەعبان  7-    ڤالا فەرید  8-    لیزا فەلەكەدین  9-    سەروان هەركی