درەو: هاوپەیمانی "سەردەم" بەسەرۆكایەتی عەبدوڵا حاجی مەحمود پێكهێندرا، "هاوپەیمانی كوردستانی" بەسەرۆكایەتی محەمەد حاجی مەحمود پێكدەهێندرێت. لە ئۆفیسی هەولێری كۆمسیۆنی هەڵبژاردنەكان هاوپەیمانی "سەردەم" پێكهێندرا لە نێوان ( پارتی پارێزگارانی كوردستان بە سەرۆكایەتی نەجات عومەر سورچی، پارتی كرێكاران و رەنجدەرانی كوردستان بەسەرۆكایەتی باپیر كامەلا، یەكێتی نەتەوەیی دیموكراتی كوردستان بەسەرۆكایەتی غەفور مەخموری) پێكهێندراو بڕیارە عەبدوڵا حاجی مەحمود سەرۆكی هاوپەیمانێتیەكە بێت. لە ئێستاشدا لە شاری هەولێر (حزبی شیوعی كوردستان و حزبی زەحمەتكێشانی كوردستان و پارتی سۆسیال دیموكراتی كوردستان) هاوپەیمانی كوردستانی پێكدەهێنن و بڕیارە محەمەد حاجی مەحمود سەرۆكایەتی هاوپەیمانێتیەكە بكات، ئەو سێ حزبە پارێزگای سلێمانی و هەڵەبجەیان بۆ سۆسیال دیموكرات داناوەو پارێزگای هەولێر بۆ حزبی شیوعی و پارێزگای دهۆك بۆ زەحمەتكێشان دانراوە. ئەمڕۆ دوا وادەیە بۆ تۆماركردنی هاوپەیمانێتی بۆ هەڵبژاردنی خولی شەشەمی پەرلەمانی كوردستان.    

درەو: لاهور شێخ جەنگی بەلیستی سەربەخۆی "بەرەی گەل" و بەبێ هاوپەیمانێتی بەشداری لە هەڵبژاردنی پەرلەمانی كوردستاندا دەكات و (درەو) لۆگۆی لیستەكە بڵاو دەكاتەوە كە خۆرێكەو بەرەی گەلی لەسەر نوسراوە. دوێنێ لەشاری هەولێر حزبی "بەرەی گەل" كۆنگرەی خۆی بەست و تیایدا (160) ئەندام بەشداربوون و سەرۆك و (13) ئەندامی سەركردایەتی حزبەكەی هەڵبژارد، سەرۆكی حزبەكە ناوی (فەرهاد عومەر) هاوسەری ژینۆ محەمەد ئەندامی پێشووی سەركردایەتی یەكێتیە. “بەرەی گەل" لە هەرێمی كوردستان و لە كۆمسیۆنی باڵای هەڵبژاردنەكانی عێراق تۆماركراوەو ئێستا حزبێكی یاساییە. بەپێی مەرج و رێنماییەكانی كۆمسیۆنی هەڵبژاردنەكان دەبێت ئەو كەسانەی بە لیست بەشداری دەكەن دەبێت حزب و رێكخراوێكی سیاسی تۆماركراویان هەبێت. لاهور شێخ جەنگی بۆ یەكەم جار بە لیستی سەربەخۆ بەشدار دەبێت لەسەر ئاستی چوار بازنەكەی هەرێمی كوردستان بۆ هەڵبژاردنی خولی شەشەمی پەرلەمانی كوردستان.    

درەو: شیوعی و زەحمەتكێشان و پارتی سۆسیال دیموكرات "هاوپەیمانی كوردستانی" پێكدەهێنن و محەمەد حاجی مەحمود سەرۆكی هاوپەیمانێتییەكە دەبێت. لە ئێستادا حزبی شیوعی كوردستان و حزبی زەحمەتكێشان و پارتی سۆسیال دیموكراتی كوردستان لە كۆبوونەوەدان بۆ درووستكردنی هاوپەیمانێتییەك بۆ هەڵبژاردنی خولی شەشەمی پەرلەمانی كوردستان. بەپێی بەدواداچوونەكانی (درەو) ئەو سێ حزبە رازی بوون بەیەكەوە هاوپەیمانێتییەك پێكبهێنن بەناوی ( هاوپەیمانی كوردستانی) و سەرۆكی هاوپەیمانێتیەكەش محەمەد حاجی مەحمود دەبێت. لە هەڵبژاردنی خولی پێنجەمی پەرلەمانی كوردستان كە لە ساڵی 2018 بەڕێوەچوو: •    پارتی سۆسیال دیموكراتی كوردستان لە هەڵبژاردنی خولی پێشوو هاوپەیمانێتیەكی پێكهێنا لە نێوان (سۆسیالیست و پارتی كرێكاران و رەنجدەرانی كوردستان و یەكێتی نەتەوەیی) بەناوی لیستی سەردەم بەشداربوون تیایدا (15 هەزارو 434) دەنگی بەدەستهێنا، عەبدوڵای حاجی مەحمود بووە پەرلەمانتاری كوردستان دواتر عەبدوڵا حاجی مەحمود بووە وەزیری شەهیدان و باپیر كامەلا بووە پەرلەمانتار. •    حزبی شیوعی كوردستان بەناوی لیستی ئازادی بەشداربوو (8 هەزارو 63) دەنگی بەدەستهێنا و كورسیەكی پەرلەمانی مسۆگەركرد بۆ (د. محێدین حەسەن) ئەوان تەركیزیان لەسەر ئەوەیە پێكەوە بەو هاوپەیمانێتیە بتوانن دوو كورسی بەدەستبهێنن، كورسیەك لە سلێمانی بۆ پارتی سۆسیال دیموكرات و كورسیەك لە هەولێر بۆ حزبی شیوعی. ئەمڕۆ 14/3/2024 دواوادەیە بۆ تۆماركردنی هاوپەیمانێتی بۆ خولی شەشەمی پەرلەمانی كوردستان.  

راپۆرتی: درەو 🔻 وزەی بەرهەمی ناوخۆ و هەناردەکراو بۆ تۆڕی نیشتمانی هەرێمی کوردستان و عێراق) لە ساڵانی (2020 - 2023)؛ 🔹 لە ساڵی (2023) بە تێکڕا ئاستی بەرهەمی کارەبا گەیشتووە بە (3 هەزار و 486) مێگاوات، بەرزترین ئاستی بەرهەمهێنان لە مانگی شوباتدا بووەو گەیشتووە بە بڕی (3 هەزار و 896) مێگاوات و کەمترین ئاستیش لە مانگی تشرینی دووەمدا بەرهەمهێنراوەو بڕەکەی بریتی بووە لە (3 هەزار و 45) مێگاوات. 🔹 بەرهەمی وزەی کارەبای هەرێم لە (2023)دا بڕەی (782) مێگاواتی بە رێژەی (22%) هەناردەی عێراق کراوەو بڕی (2 هەزار و 704) مێگاواتیشی بە ڕێژەی (78%) خراوەتە نێو تۆڕی کارەبای نیشتمانی هەرێمی کوردستانەوە. 🔹 لە ساڵی (2020)دا، بە تێکڕا ئاستی بەرهەمی وزەی کارەبا بریتی بووە لە (3 هەزار و 68) مێگاوات، لە (2021)دا گەیشتووە بە (3 هەزار و 373) مێگاوات، لە ساڵی (2022)دا بریتی بووە لە (3 هەزار و 304) مێگاوات، لە (2023)شدا (3 هەزار و 486) مێگاوات بووە. 🔹 لە ساڵی (2020)، بە تێکڕا بڕی هەناردەی کارەبا بۆ نێو تۆڕی کارەبای نیشتمانی عێراق بریتی بووە لە (268) مێگاوات، بەڵام لە ساڵی (2023) گەیشتووە بە (782) مێگاوات، بڕی (514) مێگاوات بە ڕێژەی (192%) زیادی کردووە. دەستپێک بەپێی داتاو ڕاپۆرتەکانی (بەڕێوەبەرایەتی کۆنترۆڵی ناوەندی وەزاراتی کارەبای حکومەتی هەرێمی کوردستان)، کە فەرمانگەی نابراو ساڵانە ڕاپۆرتی خۆی لەبارەی (وزەی بەرهەمی ناوخۆ و هەناردەکراو بۆ تۆڕی نیشتمانی هەرێمی کوردستان و عێراق بە مێگاوات) بڵاودەکاتەوە، بە گوێرەی ڕاپۆرەتەکانی بەردەست کە بۆ ساڵانی (2020 - 2023) بڵاو کراونەتەوە، ئاستی بەرهەمهێنانی کارەبا گەشەکردنێکی ئەوتۆی بەخۆوە نەبینیوە، بۆ نمونە بە تێکڕا کۆی ئاستی بەرهەمهێنانی کارەبا لە ساڵی (2020) بریتی بووە لە (3 هەزار و 68) مێگاوات، بەڵام لە ساڵی (2021) دا ئاستەکە بەرزبووتەوە بۆ (3 هەزار و 373) مێگاوات، لە ساڵی (2022)دا بە تێکڕا ئاستی بەرهەمی کارەبا دابەزیوەتەوە بۆ (3 هەزار و 304) مێگاوات، لە ساڵی (2023) بە تێکڕا ئاستی بەرهەمی کارەبا گەیشتووە بە (3 هەزار و 486) مێگاوات و بەردەوام هەناردەکردن کارەبا بۆ نێو تۆڕی کارەبای عێراق رووی لە هەڵکشان کردووە. یەکەم؛ وزەی بەرهەمی ناوخۆ و هەناردەکراو بۆ تۆڕی نیشتمانی هەرێمی کوردستان و عێراق بۆ ساڵی 2023 بە مێگاوات بەپێی داتاکانی بەڕێوەبەرایەتی کۆنترۆڵی ناوەندیی وەزارەتی کارەبای حکومەتی هەرێمی کوردستان، لە ساڵی (2023)دا، لە تەواوی ساڵەکە بە تێکڕا ئاستی بەرهەمی وزەی کارەبا بریتی بووە لە (3 هەزار و 486) مێگاوات، لەو بڕەش (782) مێگاواتی بە رێژەی (22%) هەناردەی عێراق کراوەو بڕی (2 هەزار و 704) مێگاواتیشی بە ڕێژەی (78%) خراوەتە نێو تۆڕی کارەبای نیشتمانی هەرێمی کوردستانەوە. هەر بەپێی زانیارییەکان، بەرزترین ئاستی بەرهەمهێنانی وزەی کارەبا لە ساڵی (2023) لە مانگی شوباتدا بووەو کۆی بەرهەم گەیشتووە بە بڕی (3 هەزار و 896) مێگاوات و کەمترین ئاستی بەرهەمهێنان لە مانگی تشرینی دووەمدا بەرهەمهێنراوەو بڕەکەی بریتی بووە لە (3 هەزار و 45) مێگاوات. وزە (کارەبا)ی بەرهەمی ناوخۆ و هەناردەکراو بۆ تۆڕی نیشتمانی هەرێمی کوردستان و عێراق، وەک لە چارتی ژمارە (1)دا هاتووە، بەردەوام ئاستی هەناردەکردنی وزەی کارەبا بۆ نێو تۆڕی نیشتمانی عێراق زیادی کردووە و لە مانگی (کانونی یەکەمی 2023) دا گەیشتووە بە (هەزار و 171) مێگاوات کارەبا بە ڕێژەی (32%)ی کۆی بەرهەمی کارەبای هەرێم.   دووەم؛ بەرهەمی کارەبای ناوخۆی هەرێمی کوردستان بڕو رێژەی گەشە )بە مێگاوات( 2020 - 2023 پاڵپشت بە داتاکانی بەڕێوەبەرایەتی کۆنترۆڵی ناوەندیی وەزارەتی کارەبای حکومەتی هەرێمی کوردستان لە ساڵی (2020)، بە تێکڕا ئاستی بەرهەمی وزەی کارەبا بریتی بووە لە (3 هەزار و 68) مێگاوات. لە ساڵی (2021)دا، بە تێکڕا ئاستی بەرهەمی وزەی کارەبا گەیشتووە بە (3 هەزار و 373) مێگاوات، واتە بەراورد بە ساڵی (2020) بڕی (305) مێگاوات بە ڕێژەی (10%) زیادی کردووە. بەڵام لە ساڵی (2022)دا، بە تێکڕا ئاستی بەرهەمی وزەی کارەبا بریتی بووە لە (3 هەزار و 304) مێگاوات، واتە بەراورد بە ساڵی (2021) بڕی (69) مێگاوات بە ڕێژەی (2%) کەمی کردووە. لە ساڵی (2023)دا، بە تێکڕا ئاستی بەرهەمی وزەی کارەبا بریتی بووە لە (3 هەزار و 486) مێگاوات، واتە بەراورد بە ساڵی (2022) بڕی (182) مێگاوات بە ڕێژەی (6%) زیادی کردووە. بڕوانە (خشتەو چارتی ژمارە (1)).   سێیەم؛ بری کارەبا بۆ نێو تۆڕی کارەبای نیشتمانی هەرێم بڕو رێژەی گەشە )بە مێگاوات( 2020 - 2023 وەک داتاکانی بەڕێوەبەرایەتی کۆنترۆڵی ناوەندیی وەزارەتی کارەبای حکومەتی هەرێمی کوردستان هاتووە، لە ساڵی (2020)، بە تێکڕا بڕی کارەبا بۆ نێو تۆڕی کارەبای نیشتمانی هەرێم بریتی بووە لە (2 هەزار و 800) مێگاوات. لە ساڵی (2021)دا، بە تێکڕا ئاستی بڕی کارەبا بۆ نێو تۆڕی کارەبای نیشتمانی هەرێم گەیشتووە بە (2 هەزار و 875) مێگاوات، واتە بەراورد بە ساڵی (2020) بڕی (75) مێگاوات بە ڕێژەی (3%) زیادی کردووە. بەڵام لە ساڵی (2022)دا، بە تێکڕا ئاستی کارەبا بۆ نێو تۆڕی کارەبای هەرێم بریتی بووە لە (2 هەزار و 674) مێگاوات، واتە بەراورد بە ساڵی (2021) بڕی (201) مێگاوات بە ڕێژەی (7%) کەمی کردووە. لە ساڵی (2023)دا، بە تێکڕا ئاستی کارەبا بۆ نێو تۆڕی کارەبای هەرێم بریتی بووە لە (2 هەزار و 704) مێگاوات، واتە بەراورد بە ساڵی (2022) تەنها بڕی (30) مێگاوات بە ڕێژەی (1%) زیادی کردووە. بڕوانە (خشتەو چارتی ژمارە (2)).   چوارەم؛ هەناردەی کارەبای هەرێم  بۆ نێو تۆڕی کارەبای نیشتمانی عێراق بڕو رێژەی گەشە )بە مێگاوات( 2020 - 2023 هەر بە پێی ئامارەکانی بەڕێوەبەرایەتی کۆنترۆڵی ناوەندیی وەزارەتی کارەبای حکومەتی هەرێمی کوردستان، لە ساڵی (2020)، بە تێکڕا بڕی هەناردەی کارەبا بۆ نێو تۆڕی کارەبای نیشتمانی عێراق بریتی بووە لە (268) مێگاوات، بەڵام لە ساڵی (2023) گەیشتووە بە (782) مێگاوات، بڕی (514) مێگاوات بە ڕێژەی (192%) زیادی کردووە. بە مانایەکی تر؛ لە ساڵی (2021)دا، بە تێکڕا ئاستی هەناردەی بڕی کارەبا هەرێم بۆ نێو تۆڕی کارەبای نیشتمانی عێراق گەیشتووە بە (498) مێگاوات، واتە بەراورد بە ساڵی (2020) بڕی (230) مێگاوات بە ڕێژەی (86%) زیادی کردووە. هەروەها لە ساڵی (2022)دا، بە تێکڕا ئاستی هەناردەی کارەبا بۆ نێو تۆڕی کارەبای عێراق بریتی بووە لە (630) مێگاوات، واتە بەراورد بە ساڵی (2021) بڕی (132) مێگاوات بە ڕێژەی (27%) زیادی کردووە. لە ساڵی (2023)دا، بە تێکڕا ئاستی هەناردەی کارەبای هەرێم بۆ نێو تۆڕی کارەبای عێراق گەیشتووە بە )782) مێگاوات، واتە بەراورد بە ساڵی (2022) جارێکی تر بڕی (152) مێگاوات بە ڕێژەی (24%) زیادی کردووە. بڕوانە (خشتەو چارتی ژمارە (3)).       سەرچاوەکان 1.    وەزارەتی پلاندانان، دەستەی ئاماری هەرێم، بەشی ئامارەکانی پیشەسازی، وزرەی بەرهەمی ناوخۆو هەناردەکراو بۆ تۆڕی نیشتمانی هەرێمی کوردستان و عێراق بۆ ماوەی مانگەکانی ساڵی (2020) بە مێگاوات؛ https://bitly.ws/34cFt 2.    وەزارەتی پلاندانان، دەستەی ئاماری هەرێم، بەشی ئامارەکانی پیشەسازی، وزرەی بەرهەمی ناوخۆو هەناردەکراو بۆ تۆڕی نیشتمانی هەرێمی کوردستان و عێراق بۆ ماوەی مانگەکانی ساڵی (2021) بە مێگاوات؛ https://bitly.ws/34cFx 3.    وەزارەتی پلاندانان، دەستەی ئاماری هەرێم، بەشی ئامارەکانی پیشەسازی، وزرەی بەرهەمی ناوخۆو هەناردەکراو بۆ تۆڕی نیشتمانی هەرێمی کوردستان و عێراق بۆ ماوەی مانگەکانی ساڵی (2022) بە مێگاوات؛ https://bitly.ws/34cFD 4.    وەزارەتی پلاندانان، دەستەی ئاماری هەرێم، بەشی ئامارەکانی پیشەسازی، وزرەی بەرهەمی ناوخۆو هەناردەکراو بۆ تۆڕی نیشتمانی هەرێمی کوردستان و عێراق بۆ ماوەی مانگەکانی ساڵی (2022) بە مێگاوات؛ https://bitly.ws/3fxGN  

(دره‌و): دادگای فیدراڵی سه‌ره‌تا به‌ دورخستنه‌وه‌ی هۆشیار زێباری له‌ پۆستی سه‌رۆك كۆمار ده‌ستیپێكردو دواجاریش ده‌سه‌ڵاتی پێدانی موچه‌ی له‌ حكومه‌تەكەی مه‌سرور بارزانی وه‌رگرته‌وه‌و كورسی "كۆتا"ی پێكهاته‌كانی هه‌ڵوه‌شانده‌وه‌، له‌م نێوانه‌دا چه‌ندین بڕیاری تری ده‌ركردووه‌ كه‌ پارتی تێیدا زه‌ره‌رمه‌ند بووه‌، یه‌كه‌م كاردانه‌وه‌ كشانه‌وه‌ی دادوه‌ره‌كه‌ی هه‌ولێر بوو له‌ دادگای فیدراڵی، كۆتا كاردانه‌وه‌ش ده‌بێت كشانه‌وه‌ی ته‌واوه‌تی پارتی بێت له‌ به‌غداد، ئایا پارتی ده‌كشێته‌وه‌ ؟ ورده‌كاری له‌م راپۆرته‌دا كورد لەناو ناكۆكییەكانی شیعەدا هەرێمی كوردستان لەبەردەم شەپۆلێك بڕیاری دادگای باڵای فیدراڵی عێراقدا خەریكە  بەتەواوەتی لە  پەلوپۆ دەخرێت. سەرەتای جوڵەكانی دادگای فیدراڵی دژی هەرێمی كوردستان لەوكاتەوە دەستیپێكرد كە بۆ یەكەمجار لە مێژووی عێراقی دوای كەوتنی سەددامدا، پارتی‌و یەكێتی وەكو دوو لایەنی دەسەڵاتداری هەرێمی كوردستان بوون بە بەشێك لە كێشەو ناكۆییەكانی ناو ماڵی شیعە. ئۆكتۆبەری 2021 هەڵبژاردنی پێشوەختەی پەرلەمانیی لە عێراق بەڕێوەچوو، ئەنجامی ئەم هەڵبژاردنە ماڵی شیعەی دابەشكرد بەسەر  دوو جەمسەردا، جەمسەری (موقتەدا سەدر) وەكو براوەی یەكەمی هەڵبژاردن‌و  جەمسەری لایەنەكانی چوارچێوەی هەماهەنگیی (مالیكی+ عامری+ خەزعەلی+ فالح فەیاز+ عەممار حەكیم+ حەیدەر عەبادی)، جەمسەری یەكەم بە ئاڕاستەی دووركەوتنەوە لە ئێران‌و رۆیشتن بەرەو خولگە عەرەبییەكە، جەمسەری دووەمیش كه‌ هاوپەیمانی نەریتی ئێران‌ بوون، له‌سه‌ر هێڵه‌ كۆنه‌كه‌ی خۆیان مانه‌وه‌. دابەشبوونەكەی ناو ماڵی شیعە، هەزوو كوردیشی دابەشكرد، پارتی لەگەڵ سەدرو یەكێتیش لەگەڵ لایەنەكانی چوارچێوەی هەماهەنگیی رۆیشتن. لەسەروبەندی ئەو جەمسەرگیرییەدا كە پرۆسەی سیاسی لە عێراق پەكخستبوو، دادگای باڵای فیدراڵی زیاتر رۆڵی ده‌ركه‌وت،  له‌وكاته‌وه‌ ژماره‌یه‌ك بڕیاری ده‌ركردووه‌ كه‌ تێیدا پارتی دیموكراتی كوردستان زه‌ره‌رمه‌ند بووه‌و به‌هۆی پارتیشه‌وه‌ به‌شێك له‌و بڕیارانه‌ زیانیان به‌ قه‌واره‌ سیاسییه‌كه‌ی هه‌رێمی كوردستان گه‌یاندووه‌. پارتی و بڕیاره‌كانی دادگا دیارترین ئه‌و بڕیارانه‌ی دادگای فیدراڵی كه‌ له‌ 2022ه‌وه‌ ده‌رچوون و تێیدا پارتی زه‌ره‌رمه‌ند بووه‌، ئه‌مانه‌ن: •    رۆژی 25/1/2022 دادگای فیدراڵی ئەو تانە یاساییانەی رەتكردەوە كە لەبارەی نادەستوریبوونی دانیشتنی یەكەمی پەرلەمان تۆماركرابوون، دادگا دانیشتنەكەی بەدەستوریی ناوبرد، ئەم بڕیارەی دادگا لە بەرژەوەندی هاوپەیمانی سێقۆڵی (سەدر+ بارزانی+ حەلبوسی)‌و لە دژی لایەنەكانی چوارچێوەی هەماهەنگی (مالیكی+ عامری+ خەزعەلی+ فالح فەیاز+ عەبادی+ حەكیم) شكایەوە، هاوپەیمانی سێقۆڵی دەستەی سەرۆكایەتی پەرلەمانی نوێی كۆنترۆڵ كرد، به‌هۆی ئه‌م بڕیاره‌وه‌ پارتی پۆستی جێگری دووه‌می سه‌رۆكی په‌رله‌مانی وه‌رگرت (شاخه‌وان عه‌بدوڵا ئێستا له‌ پۆسته‌كه‌دایه‌).   •    رۆژی 3/2/2022 دادگا فیدراڵی تانەیەكی پەرلەمانتارانی چوارچێوەی هەماهەنگی لەبارەی دەستنیشانكردنی كوتلەی گەورەی پەرلەمانی عێراق رەتكردەوە، دادگا رایگەیاند، بەگوێرەی دەستور كوتلەی گەورە لەدوای هەڵبژاردنی سەرۆك كۆمار دیاری دەكرێت، ئەم بڕیارەش لە بەرژەوەندی هاوپەیمانی (سەدر+ بارزانی+ حەلبوسی)‌و لە زیانی لایەنەكانی چوارچێوەی هەماهەنگی بوو، چونكە لە دانیشتنی یەكەمی پەرلەماندا لایەنەكانی چوارچێوەی هەماهەنگی لیستی ناوی پەرلەمانتارانی خۆیان وەكو كوتلەی گەورە پێشكەشی سەرۆكایەتی پەرلەمان كرد، بەڵام بەهۆی ئەم بڕیارەی دادگاوە لیستەكەیان رەتكرایەوە، كوتلەی زۆرینە بەواتای ئەو هاوپەیمانێتییە دێت كە مافی پێكهێنانی كابینەی نوێی حكومەتی پێدەسپێردرێت. •    هەر لە حوكمەكەی رۆژی 3/2/2022دا دادگای فیدراڵی كەیسێكی تری یەكلاكردەوە لەبارەی پرسی چۆنیەتی هەڵبژاردنی سەرۆك كۆماری عێراق، دادگا نیسابی یاسایی بۆ كۆبونەوەی پەرلەمان لەدانیشتنی تایبەت بە هەڵبژاردنی سەرۆك كۆمار، بە (دوو لەسەر سێ) دیاریكرد، بەگوێرەی ئەم حوكمەی دادگا لەدانیشتنی تایبەت بە هەڵبژاردنی سەرۆك كۆماردا دەبوو لەكۆی (329) پەرلەمانتار، (220) پەرلەمانتار ئامادەبن ئینجا نیسابی كۆبونەوە تەواو دەبێت، ئەم بڕیارە لە زیانی هاوپەیمانی سێقۆڵی (سەدر+ بارزانی+ حەلبوسی) بوو، بەدیاریكراویش بارزانی كە دەیویست بەزۆرینەی سادە پۆستی سەرۆك كۆمار لەبەرژەوەندی خۆی یەكلابكاتەوە، ئەم بڕیارەی دادگا (پلپ المعگل- یەك لەسەر سێی پەكخەر)ی دروستكرد، وایكردووە هیچ لایەك بەبێ ئەوەی تر نەتوانێت نیسابی یاسایی كۆبونەوەی پەرلەمان تەواو بكات بۆ هەڵبژاردنی سەرۆك كۆمار. •    رۆژی 6/2/2022 دادگای فیدراڵی لەسەر سكاڵای سێ پەرلەمانتاری یەكێتیی نیشتمانی‌و پەرلەمانتارێكی سەربەخۆ، رێوشوێنەكانی كاندیدبوونی هۆشیار زێباری ئه‌ندامی مه‌كته‌بی سیاسی پارتی بۆ پۆستی سەرۆك كۆمار راگرت بەهۆی ئەو تۆمەتانەی گەندەڵی كە لەسەری بوو، ئەمە گورزێكی گەورە بوو بۆ بارزانی، هاوكات بۆ هاوپەیمانی سێقۆڵی (سەدر+ بارزانی+ حەلبوسی)، دۆسیەكەی زێباری هێندە كاریگەر بوو، تەنانەت سەدری هاوپەیمانی بارزانیش بەرگری لێنەكرد‌و داوای لە پەرلەمانتارەكانی كرد، دەنگی پێنەدەن، پارتییه‌كان له‌وكاته‌وه‌ ئیتر ناڕه‌زایه‌تییه‌كانیان دژ به‌ دادگای فیدراڵی زیاتر بوو. •    دوای راگرتنی رێوشوێنەكانی كاندیدبوونی هۆشیار زێباری، رۆژی 13/2/2022 دادگای فیدراڵی كاندیدبوونی هۆشیار زێباری بۆ پۆستی سەرۆك كۆمار رەتكردەوە، ئەمە بارزانی توشی گێرمەو كێشەی دیاریكردنی كاندیدێكی نوێ كرد، سەرباری ئەمه‌ش لەڕووی سیاسییەوە هۆشیار زێباری گورزێكی لە ناوبانگی هاوپەیمانی سێقۆڵی (سەدر+ بارزانی+ حەلبوسی)دا. •    دوای دروستبوونی كێشە لە نیسابی یاسایی دانیشتنی پەرلەمان‌و هەڵنەبژاردنی سەرۆك كۆمار، دادگای فیدراڵی رۆژی 13/2/2022 بڕیاریدا بەوەی بەرهەم ساڵح لە پۆستی سەرۆك كۆمار بەردەوام دەبێت تا ئەوكاتەی سەرۆك كۆماری نوێ هەڵدەبژێردرێت. •    رۆژی 15/2/2022 دادگای فیدراڵی حوكمی خۆی لەبارەی سكاڵایەكی یاسایی راگەیاند كە ساڵی 2012 وه‌زاره‌تی نه‌وتی عێراق لەسەر وه‌زاره‌تی سامانه‌ سروشتییه‌كانی هه‌رێم تۆماریكردبوو، له‌م حوكمه‌دا دادگای فیدراڵی یاسای نەوت‌و غازی هەرێمی نادەستوریی ناوبردو هه‌ڵیوه‌شاندە‌وه‌، هه‌رێمی پابه‌ندكرد به‌وه‌ی دەبێت نەوت‌و غازی خۆی رادەستی حكومەتی ناوەند بكات، ئەم حوكمەش گورزێكی گەورە بوو لە هاوپەیمانی سێقۆڵی (سەدر+ بارزانی+ حەلبوسی)، حوكمەكە ئه‌وكات بارزانی كردە ئامانج، له‌دوای كه‌وتنی سه‌ددام و دروستبوونی عێراقی نوێ ئه‌مه‌ قورسترین بڕیار بوو كه‌ دادگای فیدراڵی دژی هه‌رێمی كوردستان ده‌ریبكات، سه‌ره‌تا پارتی پابه‌ند نه‌بوو به‌ بڕیاره‌كه‌وه‌، وه‌كو ئاڵنگارییه‌ك بۆ ئه‌و بڕیاره‌، پارتی له‌رێگه‌ی په‌رله‌مانی كوردستانه‌وه‌ یاسای نه‌وت و غازی هه‌موار كرده‌وه‌، به‌ڵام دواجار قایل بوو له‌ هه‌ڵوه‌شاندنه‌وه‌ی یاسای نه‌وت و غاز به‌ مه‌رجی ئه‌وه‌ی یاسای نه‌وت و غازی فیدراڵ ده‌ربچێت، ئه‌و یاسایه‌ش تائێستا ده‌رنه‌چووه‌و به‌وهۆیه‌وه‌ دۆسیه‌ی نه‌وتی هه‌رێم پاڵپشتی یاسایی له‌ده‌ستداوه‌.  له‌دوای ئه‌م بڕیارانه‌ی دادگاوه‌، موقته‌دا سه‌در وه‌كو براوه‌ی یه‌كه‌می هه‌ڵبژاردن له‌ پرۆسه‌ی سیاسی كشایه‌وه‌، په‌رله‌مانتاره‌كانی كه‌ (73) كه‌س بوون ده‌ستیان له‌كاركێشایه‌وه‌، ئه‌وكات وه‌كو باسده‌كرا، سه‌در بۆ ئه‌م بڕیاره‌ ته‌نانه‌ت پرس و رای له‌گه‌ڵ هاوپه‌یمانه‌كانیشی (بارزانی+ حه‌لبوسی) نه‌كردبوو، سه‌در به‌م كشانه‌وه‌یه‌ بارزانی هاوپه‌یمانی به‌ لاوازی له‌به‌رده‌م لایه‌نه‌كانی چوارچێوه‌ی هه‌ماهه‌نگیدا به‌جێهێشت، بارزانی دواجار قایل بوو له‌چوارچێوه‌ی رێككه‌وتنێكی نوێدا بچێته‌ ناو شه‌راكه‌تی حوكمڕانییه‌وه‌ له‌گه‌ڵ لایه‌نه‌كانی نزیك له‌ ئێران (چوارچێوه‌ی هه‌ماهه‌نگیی)، ئه‌مه‌ به‌و ئومێده‌ی پارێزگاری له‌ پێگه‌ی حزبه‌كه‌ی بكات دوای هه‌ڵگه‌ڕانه‌وه‌ی دۆخی ناوخۆی شیعه‌كان، به‌ڵام ئه‌م هاوپه‌یمانێتییه‌ ده‌ستی دادگای فیدراڵی نه‌به‌ست و دادگاكه‌ چه‌ند بڕیارێكی تری له‌دژی هه‌رێمی كوردستان ده‌ركرد كه‌ به‌ زیان بۆ پارتی شكایه‌وه‌، له‌وانه‌: •    30/5/3023 دادگای فیدراڵی درێژكردنه‌وه‌ی ته‌مه‌نی په‌رله‌مانی كوردستانی هه‌ڵوه‌شانده‌وه‌، زه‌ره‌رمه‌ندی ئه‌م بڕیاره‌ پارتی بوو، چونكه‌ پارتی له‌رێگه‌ی په‌رله‌مانه‌وه‌ به‌بێ ره‌زامه‌ندی یه‌كێتیی و به‌پشتبه‌ستن به‌و زۆرینه‌ی كه‌ به‌ هاوكاری (11) كورسی "كۆتا"ی پێكهاته‌كان هه‌بوو، كۆمسیۆنی هه‌ڵبژاردن و راپرسی هه‌رێمی كوردستانی كاراكرده‌وه‌، به‌ڵام به‌هۆی بڕیاری دادگای فیدراڵی هه‌ڵوه‌شاندنه‌وه‌ی درێژكردنه‌وه‌ی ته‌مه‌نی په‌رله‌مان و هه‌ڵوه‌شاندنه‌وه‌ی هه‌موو ئه‌و یاساو بڕیارانه‌ی له‌ماوه‌ی درێژكراوه‌دا ده‌ریكردبوون، كاراكردنه‌وه‌ی كۆمسیۆنی هه‌ڵبژاردن هه‌ڵوه‌شایه‌وه‌و پارتی ناچاركرد بۆ به‌ڕێوه‌بردنی هه‌ڵبژاردنی خولی شه‌شه‌م (كه‌ بڕیاره‌ 10ی حوزه‌یرانی ئه‌مساڵ به‌ڕێوه‌بچێت)، مل بۆ كۆمسیۆنی هه‌ڵبژاردنه‌كانی عێراق بدات كه‌ ئێستا دادوه‌رێكی پارێزگای سلێمانی سه‌رۆكایه‌تی ده‌كات  دڵخوازی پارتی نییه‌. •    24/9/2023 دادگای فیدراڵی درێژكردنه‌وه‌ی ته‌مه‌نی ئه‌نجومه‌نی پارێزگاكانی هه‌رێمی كوردستان هه‌ڵوه‌شانده‌وه‌، تائێستا هه‌رێم پابه‌ند نه‌بووه‌و به‌م بڕیاره‌و ئه‌نجومه‌نه‌كان به‌رده‌وامن له‌كاركردنی خۆیان، به‌ڵام به‌مدواییه‌ له‌ كۆبونه‌وه‌یه‌كی ئه‌نجومه‌نی وه‌زیرانی هه‌رێمدا تاوتوێی میكانیزمه‌كانی مامه‌ڵه‌كردن له‌گه‌ڵ ئه‌و بڕیاره‌دا كرا، به‌ڵام ده‌ره‌نجامه‌كه‌ی بۆ رایگشتی بڵاونه‌كرایه‌وه‌. •    21/2/2024 دادگای فیدراڵی عێراق له‌سه‌ر بنه‌مای سكاڵایه‌كی یه‌كێتیی نیشتمانی كوردستان (11) كورسییه‌كه‌ی "كۆتا"ی پێكهاته‌كانی له‌ په‌رله‌مانی كوردستان هه‌ڵوه‌شانده‌وه‌و ژماره‌ی كورسییه‌كانی په‌رله‌مانی كرد به‌ (100) كورسی، له‌پاڵ ئه‌مه‌دا سیسته‌می هه‌ڵبژاردنی كوردستانی له‌ (یه‌ك بازنه‌)ییه‌وه‌ گۆڕی بۆ (فره‌ بازنه‌)و كوردستانی دابه‌شكرد به‌سه‌ر چوار بازنه‌ی هه‌ڵبژاردندا (هه‌ولێر- سلێمانی- دهۆك- هه‌ڵه‌بجه‌)، 100 كورسییه‌كه‌شی دابه‌شكرد به‌سه‌ر چوار بازنه‌كه‌دا، ئه‌مه‌ش گورزێكی تر بوو كه‌ به‌ر پارتی دیموكراتی كوردستان كه‌وت، چونكه‌ ئه‌م گۆڕانكارییه‌ له‌ یاسای هه‌ڵبژاردن وا ده‌كات پارتی نه‌توانێت هاوشێوه‌ی خولی پێجه‌م به‌ پشتیوانی كورسی "كۆتا"ی پێكهاته‌كان رێژه‌ی 50+1ی په‌رله‌مان كۆنترۆڵ بكات و بڕیاره‌كانی خۆی تێپه‌ڕێنێت. •    هه‌مان رۆژ واتا 21/2/2024 دادگای فیدراڵی عێراق دابه‌شكردنی موچه‌ی فه‌رمانبه‌رانی هه‌رێمی له‌ حكومه‌تی هه‌رێم سه‌نده‌وه‌ كه‌ پارتی سه‌رۆكایه‌تی حكومه‌ته‌كه‌ ده‌كات، دادگا وه‌زاره‌تی دارایی عێراقی پابه‌ند كرد به‌وه‌ی له‌رێگه‌ی بانكه‌ فیدراڵییه‌كانه‌وه‌ موچه‌ی فه‌رمانبه‌رانی هه‌رێم دابین بكات، ئه‌مه‌ش گورزێكی تر بوو كه‌ له‌سه‌روبه‌ندی هه‌ڵبژاردنی په‌رله‌مانی كوردستاندا به‌ر پێگه‌ی سیاسی پارتی كه‌وت له‌ ناوخۆی هه‌رێمدا. پارتی له‌ به‌غداد ده‌كشێته‌وه‌؟ ئه‌مڕۆ دادوه‌ر عه‌بدولڕه‌حمان زێباری كه‌ له‌سه‌ر پارێزگای هه‌ولێرو دهۆك بۆ دادگای باڵای فیدراڵی عێراق كاندید كرابوو، له‌ ئه‌ندامێتیی دادگاكه‌ كشایه‌وه‌، له‌دوای ئه‌و زنجیره‌ بڕیارانه‌ی كه‌ دادگاكه‌ له‌دژی پارتی له‌ 2022وه‌ ده‌ریكردوون، ئه‌مه‌ یه‌كه‌م كاردانه‌وه‌ی جددی پارتی بوو. له‌ناو پارتیدا قسه‌وباس گه‌رم بووه‌ له‌باره‌ی ئه‌گه‌ری كشانه‌وه‌ی ته‌واوه‌تی له‌ پۆسته‌كانی به‌غداد، ئه‌گه‌ر پارتی بكشێته‌وه‌، ده‌بێت ئه‌م پۆستانه‌ چۆڵ بكات: •    فوئاد حسێن- جێگری سەرۆكی ئەنجومەنی وەزیران و وەزیری دەرەوە •    بەنگین رێكانی- وەزیری ئاوەدانكردنەوە •    شاخەوان عەبدوڵا- جێگری سەرۆكی پەرلەمان •    مەسعود حەیدەر- بریكاری وەزارەتی دارایی عێراق •    حەمدی شەنگالی- جێگری بەڕێوەبەری كۆمپانیای سۆمۆ •    ئارام سەباح- راوێژكاری ئابوری ئەنجومەنی نوێنەرانی عێراق •    ئەمینداری گشتی ئەنجومەنی نوێنەرانی عێراق •    31 ئەندامی پەرلەمانی عێراق پێشبینی كراو نییه‌ پارتی به‌بێ یه‌كێتیی له‌م بارودۆخه‌دا به‌ته‌واوه‌تی له‌ به‌غداد بكشێته‌وه‌، به‌ڵام پێشبینی كراوه‌ بۆ دروستكردنی فشار له‌سه‌ر ده‌سه‌ڵاتدارانی به‌غداد قۆناغ به‌ قۆناغ هه‌ندێك هه‌نگاو به‌ ئاڕاسته‌ی كشانه‌وه‌ هه‌ڵبگرێت، له‌مه‌شدا به‌ پله‌ی یه‌كه‌م ده‌یه‌وێت رایگشتی جیهان به‌دیاریكراویش ئه‌مریكا له‌ نیگه‌رانییه‌كانی سه‌باره‌ت به‌ مامه‌ڵه‌ی به‌غداد ئاگادار بكاته‌وه‌. به‌ڵام ره‌نگه‌ جموجوڵه‌كانی پارتی له‌ كورت مه‌ودادا كاریگه‌ریی له‌سه‌ر چاره‌نوسی هه‌ڵبژاردنی 10ی حوزه‌یران به‌جێبهێڵێت و هه‌ڵبژاردنه‌كه‌ دوابكه‌وێت، به‌تایبه‌تیش كه‌ هاوكات له‌گه‌ڵ كشانه‌وه‌ی دادوه‌ره‌كه‌ی هه‌ولێر له‌ دادگای فیدراڵی، حزبه‌ توركمان و سریانییه‌كان بایكۆتی پرۆسه‌ی هه‌ڵبژاردنیان كردو بارزانیش ئاماژه‌ به‌وه‌ ده‌كات پێكهاته‌كان به‌بێ كۆتا ناتوانن كورسی په‌رله‌مان به‌ده‌ستبهێنن، هه‌موو ئه‌مانه‌ ئاماژه‌ن به‌وه‌ی پارتی نه‌ به‌ كۆمسیۆنه‌كه‌ی عێراق و نه‌ به‌یاسای هه‌ڵبژاردن دوای ده‌ستكاریكردنی له‌لایه‌ن دادگای فیدراڵییه‌وه‌ ئاماده‌ نییه‌ بچێته‌ ناو هه‌ڵبژاردنه‌وه‌. ره‌نگه‌ تێكچوونی په‌یوه‌ندییه‌كانی پارتی له‌گه‌ڵ به‌غداد، ئه‌و ده‌رفه‌ته‌ دروست بكات هه‌ڵبژاردنی په‌رله‌مانی كوردستان دوابخرێت و پارتی ده‌ره‌چه‌یه‌كی نوێ بۆ سازدانی هه‌ڵبژاردن له‌ڕووی یاساییه‌وه‌ بدۆزێته‌وه‌.  

درەو: موچەی وەزارەت و دەستەو فەرمانگەكانی هەرێمی كوردستان دوای وردبینیكردن لەلایەن وەزارەتی دارایی عێراقەوە: •    وەزارەتی پەروەردە: 147 ملیارو 585 ملیۆن دینار •    وەزارەتی ناوخۆ (كارمەند): 75 ملیارو 360 ملیۆن دینار •    وەزارەتی تەندروستی: 52 ملیارو 681 ملیۆن دینار •    وەزارەتی خوێندنی باڵا: 45 ملیارو 576 ملیۆن دینار •    وەزارەتی كارەبا: 17 ملیارو 373 ملیۆن دینار •    وەزارەتی شارەوانی و گەشتوگوزار: 16 ملیارو 303 ملیۆن دینار •    وەزارەتی ئەوقاف و كاروباری ئایینی: 7 ملیارو 677 ملیۆن دینار •    وەزارەتی دارایی و ئابوری: 10 ملیارو 848 ملیۆن دینار •    وەزارەتی كشتوكاڵ سەرچاوەكانی ئاو: 8 ملیارو 566 ملیۆن دینار •    وەزارەتی داد: 4 ملیارو 905 ملیۆن دینار •    وەزارەتی كاروكاروباری كۆمەلایەتی: 4 ملیارو 328 ملیۆن دینار •    وەزارەتی رۆشنبیری و لاوان: 4 ملیارو 246 ملیۆن دینار •    وەزارەتی گواستنەوەو گەیاندن: 3 ملیارو 826 ملیۆن دینار •    ئەنجومەنی باڵای دادوەری: 3 ملیارو 858 ملیۆن دینار •    وەزارەتی بازرگانی و پیشەسازی: 2 ملیارو 80 ملیۆن دینار •    وەزارەتی سامانە سروشتییەكان: 1 ملیار و 880 ملیۆن دینار •    دەزگای گشتی مین: 422 ملیۆن دینار •    وەزارەتی پلاندانان: 684 ملیۆن دینار •    دەستەی دەستپاكی: 356 ملیۆن دینار •    دەستەی گشتی ناوچە كوردستانیەكان: 117 ملیۆن دینار •    دیوانی چاودێری دارایی: 805 ملیۆن دینار •    نوسینگەی نیشتمانی كۆمسیۆنی هەڵبژاردن: 350 ملیۆن دینار •    فەرمانگەی هەولێری كۆمسیۆنی هەڵبژاردن: 60 ملیۆن دینار •    فەرمانگەی سلێمانی كۆمسیۆنی هەڵبژاردن: 66 ملیۆن دینار •    فەرمانگەی دهۆك كۆمسیۆنی هەڵبژاردن: 64 ملیۆن دینار •    فەرمانگەی هەڵەبجە كۆمسیۆنی هەڵبژاردن: 63 ملیۆن دینار •    سەرۆكایەتی پەرلەمانی كوردستان: 1 ملیارو 222 ملیۆن دینار •    سەرۆكایەتی دیوانی ئەنجومەنی وەزیران: 70 ملیۆن دینار •    ئەكادیمی كوردی لە ئەنجومەنی وەزیران: 33 ملیۆن دینار •    فەرمانگەی هەماهەنگی و بەدواداچوون: 53 ملیۆن دینار •    فەرمانگەی تەكنەلۆجیاو زانیاری: 32 ملیۆن دینار •    ئەنجومەنی خدمەی گشتی: 15 ملیۆن دینار •    فەرمانگەی میدیاو زانیاری: 16 ملیۆن دینار •    فەرمانگەی پەیوەندییەكانی دەرەوە: 19 ملیۆن دینار •    وەزارەتی ئاوەدانكردنەوەو نیشتەجێكردن: 232 ملیۆن دینار •    دەستەی پاراستنی ژینگە: 229 ملیۆن دینار •    دەستەی سەربەخۆی مافی مرۆڤ: 219 ملیۆن دینار •    كۆی گشتی: 429 ملیارو 256 ملیۆن دینار •    موچەی خانەنشینی سەربازی و مەدەنی: 119 ملیارو 139 ملیۆن دینار •    موچەی چاودێری كۆمەلایەتی: 10 ملیارو 967 ملیۆن دینار •    موچەی شەهیدان و ئەنفالكراوان: 859 ملیۆن دینار كۆی گشتی موچە: 560 ملیارو 221 ملیۆن دینار  

جیهانگیر سدیق گوڵپی ماوه‌یه‌كه‌ گوزارشتی (وردبینیی لیستی موچه‌) بوه‌ته‌ كلیله‌وشه‌ و سه‌رباسی باسان، زۆربه‌ی ڕاگه‌یاندنه‌كان و په‌یامنێران و به‌رپرسان و نوێنه‌ران و شرۆڤه‌كارانمان ڕه‌زیلی ناكه‌ن له‌به‌كارهێنانیدا و به‌وپه‌ڕی ده‌سبڵاویه‌وه‌ نه‌ك پێنج فه‌رزه‌ و سێ ژه‌مه‌ به‌ڵكو هه‌مو سه‌ره‌ سه‌عات و له‌گه‌ڵ هه‌مو خوله‌كێكدا ئاوی گوێچكه‌مانی پێ ده‌ده‌ن.  ئه‌و حه‌شاماته‌ی ئێمه‌ ده‌بو خه‌ریكی كارێكی تربوان و زیاتر له‌خه‌می بابه‌ته‌كه‌دا بوان، نه‌ك  به‌و جۆره‌ هه‌ر خه‌ریكی وتنه‌وه‌ی به‌ندێكی بێمانای ئه‌و گۆرانیه‌ هه‌ڵخه‌ڵه‌تێنه‌ره‌ بن كه‌ خراوه‌ته‌ سه‌ر زاریان. ڕه‌حمه‌ت له‌ پێشینانمان كه‌ ده‌یانوت ئاش ئیشی خۆی ده‌كات و چه‌قچه‌قه‌ش سه‌ری خۆی ده‌ئێشێنی.  ئه‌وان هه‌ر ده‌یڵێن و ده‌یڵێنه‌وه‌؛ هه‌رێم لسیت بنێرێت به‌غدا وردبینی ده‌كات و موچه‌ ده‌نێرێت.  به‌بێ ئه‌وه‌ی بزانن و پێمان بڵێن ناوه‌ڕۆك و ڕه‌هه‌ند و گرێوگۆڵه‌كانی ئه‌و بابه‌ته‌ چین و چ لایه‌نێك له‌به‌غدا ئه‌و كاره‌ ده‌كات و چۆن و به‌چ پێوه‌ر و له‌سه‌ر چ بنه‌ماو ڕێسایه‌كه. به‌هه‌رحاڵ باكه‌مێك ناوه‌رۆك و ده‌قی ئه‌و گۆرانیه‌ سواوه‌ شی بكه‌ینه‌وه‌؛ هه‌مو لیستێكی موچه‌ی فه‌رمانبه‌رانی حكومی كه‌ له‌بودجه‌ی گشتیه‌وه‌ خه‌رج ده‌كرێت، به‌رله‌ خه‌رج كردن له‌ دو وێستگه‌ و له‌لایه‌ن  دوو لایه‌نی جیاوازه‌وه‌ وردبینی ده‌كریت و پاش خه‌رج كردنیش ملكه‌چه‌ بۆ پێداچه‌ونه‌وه‌ی چاودێری دارایی. وێستگه‌ی یه‌كه‌می وردبینی له‌ یه‌كه‌ی وردبینی ناوخۆیی فه‌رمانگه‌كاندایه‌ و نابێته‌ گرفت، به‌ڵام ئه‌و وردبینیه‌ی كه‌ گوایه‌ به‌غدا له‌ وێستگه‌ی دوه‌مدا بۆ لیستی موچه‌ی فه‌رمانبه‌رانی هه‌رێم ئه‌نجامی ده‌دات دیار نیه‌ چ لایه‌نێك ئه‌نجامی ده‌دات و چۆن ئه‌نجام ده‌درێت و له‌سه‌ر بنه‌مای چ دۆكیۆمێنت و به‌چ پێوه‌رێك ئه‌نجام ده‌درێت. به‌غدا لایه‌نی یه‌كه‌مه‌ كه‌ ئه‌ركی جێبه‌جێكردنی بڕیاره‌كه‌ی دادگای له‌ئه‌ستۆیه‌، تاكو ئیستا هیچ هه‌نگاوێكی فه‌رمی و ڕێكخراوی نه‌گرتۆته‌ به‌ر بۆ پرۆسه‌ی (توطین)، هیچ هه‌نگاوێكی فه‌رمیشی نه‌ناوه‌ بۆ دیاریكردن و ڕێكخستنی ڕێكاره‌كانی ووردبینی لیستی فه‌رمانبه‌رانی هه‌رێم. پێناچی تا ئێستایش له‌ هیچ كه‌س و لایه‌نێكی خۆمانه‌وه‌ به‌فه‌رمی داوای ڕونكردنه‌وه‌ و دیاریكردنی ئه‌و میكانیزمه‌یان كردبێت و گرێ و ئاڵۆزیه‌كانیان خستبێته‌ به‌رچاو و ڕێكاری به‌دیلیان پێشكه‌شكردبێ، كه‌ پێویست بو بیكه‌ن و به‌رچاوی خه‌ڵكیش له‌ سیناریۆ و ئه‌گه‌ره‌كانی داهاتو ڕون بكه‌نه‌وه‌. ئاخر ئه‌وان جارێ هه‌ر خه‌ریكی وتنه‌وه‌ی ئه‌و گۆرانیانه‌ن كه‌ به‌سه‌رپێی و به‌ده‌م ڕێگاوه‌ ده‌ستیان به‌ تێكست و ئاوه‌زه‌كه‌ی ده‌گات، گه‌وره‌ترین هه‌وڵی زۆربه‌یان هه‌ر ئه‌وه‌یه‌ كه‌ ناوبه‌ناو سۆراخی موچه‌ له‌لای به‌رپرسه‌كانی به‌غدا ده‌كه‌ن و ئه‌وانیش به‌زاره‌كی وسه‌رپێی وه‌ڵامێكیان ده‌ده‌نه‌وه‌ و ئه‌مانیش ده‌یكه‌نه‌ گۆرانیی سه‌رزار و خۆراكی ڕاگه‌یاندنه‌كان. باسه‌كه‌ باسی وردبینیی لیستی موچه‌یه‌ و گۆرانیه‌كه‌یش هه‌ر له‌سه‌ر ئه‌وه‌، كه‌چی دیار نیه‌ بۆ ئه‌م مانگه‌ و مانگه‌كانی داهاتویش ووردبینی ئه‌و لیستان چۆن ده‌كرێت و كی ده‌یكات؟ ئه‌گه‌ر ئه‌ڵێن دیوانی چاودێری دارایی ده‌یكات به‌و پێیه‌ی له‌ بڕیاری دادگا ناوی هاتوه، وه‌ك هه‌ندێك له‌ چاوپێكه‌وتن و لێدوانه‌كانیان واده‌ڵێن،‌ ئه‌وه‌ من پێم وایه‌ وردبینی لیستی موچه‌ پێش خه‌رج كردن كاری دیوانی چاودێری دارایی نیه‌ و پێیشی ناكرێت، كاری دیوانی چاودێری پێش خه‌رج كردن ڕونه‌ كه‌ چه‌ند سنوردار و دیاریكراوه‌ به‌پێی یاساكه‌ی و به‌پێی سروشتی ئیشه‌كه‌یشی كه‌ چاودێریه‌ نه‌ك جێبه‌جێكردن، دیوانی چاودێری دارایی فه‌رمانگه‌یه‌كی سه‌ر به‌ وه‌زاره‌تی دارایی نیه‌ تاكو ئه‌و كاره‌ جێبه‌به‌جیكاریه‌ ئه‌نجام بدات.                                                                                                                   ئه‌گه‌ر ئه‌ڵێن له‌ فه‌رمانگه‌ی ژمێركاری ( دائرة المحاسبة)ی سه‌ر به‌وه‌زاره‌تی دارایی ده‌كرێت، ئه‌وه‌ من پێم وایه‌ زه‌حمه‌ته‌ و، موچه‌ له‌ له‌فه‌رمانگه‌كانی ته‌مویلی مه‌ركه‌زی كه‌ ئه‌وانه‌ی هه‌رێم و زۆربه‌ی ئه‌وانه‌ی عێراقیش له‌وجۆره‌ن ده‌چێته‌ خانه‌ی ئه‌و حسابانه‌ی كه به‌ ‌سیسته‌می ژمێریاری مه‌ركه‌زی كاریان له‌سه‌ر ده‌كرێت و گونجاونیه‌ له‌ دائیره‌ی موحاسه‌به‌ بكرێت. ئه‌گه‌ر ده‌ڵێن گه‌نجینه‌كان وردبینی بۆده‌كه‌ن، ئه‌مه‌یش هه‌م گرانه‌ و هه‌م هیچ به‌رچاو ڕونیه‌ك نیه‌ كه‌ به‌غدا ئاماده‌كاریی ئه‌وه‌ی كردبێت و ئه‌و ئیشه‌ كار و كاتی زۆری ده‌وی.. ئه‌گه‌ر ده‌ڵێن وه‌ك جاران وه‌زاره‌تی دارایی هه‌رێم خۆی به ‌پرۆسه‌ی وردبینیه‌كه‌ هه‌ڵسێت ئیدی ئێستا ئه‌م وردبینیه‌ی پێش خه‌رجكردن چیه‌ له‌لایه‌ن به‌غداوه‌؟؟؟ ئه‌گه‌ر بڕیاریشه‌ هیچ ڕێوڕه‌سم وڕێسا و ڕێكارێكی ژمێریاری و وردبینی ڕه‌چاو نه‌كرێت و كاره‌كه‌یش بچێته‌سه‌ر ئه‌وه‌یان جیایه‌!!! ئه‌مه‌ ته‌نها سه‌باره‌ت به‌ دیاریكردنی ئه‌و لایه‌نه‌ی كه‌ ووردبینیه‌كه‌ ده‌كات، سه‌باره‌ت به‌چۆنیه‌تی ووردبینیه‌كه‌یش گرفته‌كه‌ قوڵتر و ئاڵۆزتره‌. گریمان موعجیزه‌ ئاسا له‌م مانگه‌دا یان له‌چه‌ند مانگی داهاتو هه‌مو گرفته‌كانی دیاریكردنی لایه‌نی ووردبینیكار چاره‌سه‌ركران. ئه‌ی چۆن وردبینیه‌كه‌ ئه‌نجام ده‌درێت؟؟   كاتێك لیستی موچه‌ ده‌درێته‌ به‌غدا بۆ ووردبینی پێویسته‌ پوخته‌ی لیستی مانگی پێشوی په‌سه‌ندكراو له‌گه‌ڵ لیستی گۆڕانه‌كانی مانگیی پێشوی په‌سه‌ندكراو له‌گه‌ڵ لیستی گۆڕانه‌كانی ئه‌م مانگه پێش په‌سه‌ند كردن‌ به‌هاوپێچی هه‌مویان پێكه‌وه‌ بدرێنه‌ به‌غدا بۆ ووردبینی و په‌سه‌ند كردن. لیستی موچه‌ی مانگه‌كانی پێشو هه‌روه‌ها لیستی گۆڕانه‌كانی مانگه‌كانی پێشویش له‌لایه‌ن به‌غدا ووردبینی نه‌كراون و په‌سه‌ند نه‌كراون تاكو ببنه‌ پێوه‌ر و بنه‌ما بۆ وردبینیی لیستی گۆرانكاریه‌كانی ئه‌م مانگه‌ و مانگه‌كانی داهاتو، ئاخر زیاد و كه‌مبونی موچه‌ و ده‌رماڵه‌ی هه‌ر فه‌رمانبه‌رێك له‌ یه‌كه‌م ڕۆژی دامه‌زراندنیه‌وه‌ تاكو خانه‌نشین بونی وه‌ك ئه‌لقه‌ی پێكه‌وه‌ گرێدراو له‌ چوارچێوه‌ی زنجیره‌یه‌كدایه‌ و ئه‌ڵقه ‌به‌ئه‌ڵقه‌ ده‌بێ به‌ فلته‌ری ئه‌و ووردبینیانه‌دا تێپه‌ڕێ. گریمان به‌بێ بونی ئه‌م پێشینه‌ دامه‌زراوه‌یی و ڕێساییه‌ و به‌بێ له‌به‌رچاوگرتنی پێداویستیه‌كانی ئه‌وكاره‌ به‌غدا ده‌یه‌وێت ده‌سبكات به‌ ووردبینی لیستی موچه‌ی فه‌رمانبه‌رانی هه‌رێم، له‌مانگی داهاتوه‌وه‌ فه‌رمانگه‌كان ڕاسته‌وخۆ لیسته‌كانی موچه‌ و لیستی گۆڕانه‌كان و دۆكیۆمێنته‌ پێویسته‌كان له‌ فه‌رمان و نوسراوه‌كانی په‌یوه‌ست به‌ زیاد و كه‌می موچه‌و ده‌رماڵه‌ به‌هاوپێچ بۆی ده‌نێردرن. ئایا چۆن ووردبینیه‌كه‌ ئه‌نجام ده‌دات؟؟  با ئه‌وه‌یشی بێته‌ سه‌ر كه‌ هه‌مو فه‌رمان و نوسراوه‌كانی هاوپێچی لیسته‌كه‌ كه‌ تایبه‌تن به‌زیاد و كه‌مكردنی موچه‌، به‌هه‌زاران دانه‌ن و به‌زمانی كوردین و پاڵپشتن به‌سه‌دان ڕێنمایی تایبه‌ت به‌و بوارانه‌ كه‌ له‌ماوه‌ی 30 ساڵدا حكومه‌تی هه‌رێم ده‌ری كردون و كاری له‌سه‌ر كردون. ئایا به‌غدا پشت به‌ چ لیستێك ده‌به‌ستێت وه‌ك بناغه‌ بۆ ووردبینی ئه‌و لیسته‌ی كه‌ بۆی ڕه‌وانه‌ ده‌كرێت؟ ئه‌ی چۆن مامه‌ڵه‌ له‌گه‌ڵ ئه‌و فه‌رمان و نوسراو ڕێنماییانه‌ ده‌كات كه‌ هه‌رێم موچه‌و ده‌رماڵه‌یان پێ كه‌موزیاد ده‌كات به‌سه‌دان و هه‌زاران لاپه‌ڕه‌ن؟ له‌وانه‌یه‌ هه‌ندێك پێیان وابێت كه‌ ووردبینی لیستی موچه‌ ته‌نها گه‌ڕانه‌ به‌شوین ناوی دوباره‌دا!!  بێئاگا له‌وه‌ی كه‌ بابه‌ته‌كه‌ زۆر له‌وه‌یش ئاڵۆزتره‌ كه‌ باسمكرد، به‌ڵام نامه‌وێت له‌وه‌ زیاتر ماندوتان كه‌م. ده‌بێ گوناهی ئێمه‌ چی بێ لێره‌ خه‌ڵك ئه‌كه‌ین به‌ به‌رپرس  و هه‌ندێكیش ده‌نێرین بۆ به‌غدا تاكو مافه‌كانی خه‌ڵكی هه‌رێم به‌ده‌ست بهێن كه‌چی گه‌وره‌ ترین كاری هه‌مویان  وتنه‌وه‌ی ئه‌و جۆره‌ قسه‌ بێسود و بێ ناوه‌رۆكانه‌یه‌. ساڵانی ڕابوردو به‌یتوبالۆره‌كان جۆرێكی تربون: ساڵانێك به‌رده‌وام هه‌ر ده‌یان ووت و ده‌یان وته‌وه‌ با هه‌رێم پابه‌ندبێت به‌یاسای بودجه‌وه‌ ئیتر به‌غدا به‌مسۆگه‌ری پشكی هه‌رێم به‌ سه‌روزیاده‌وه‌ ده‌نێرێ، ئیمه‌ ئه‌وكاتیش به‌رده‌وام ده‌مان نوسی و هاوارمان ده‌كرد كه‌ ئه‌و یاسایانه‌ به‌جۆرێكن هه‌ركات وه‌ك خۆیان جێبه‌جیی بكرێن ئه‌وه‌ هه‌رێم به‌هه‌ر چوارپه‌ل ده‌كه‌وێته‌ ناو ته‌ڵه‌كه‌وه‌، ئه‌گه‌ر جێبه‌جێشیان نه‌كات ئه‌وه‌ تاوانبار ده‌كرێت به‌سه‌ر پێچی، به‌رده‌وامیش باسی ته‌ڵه‌ی خه‌رجیی فیعلیمان ده‌كرد، به‌ڵام ئه‌وده‌میش ئه‌و جۆره‌ ژاوه‌ژاوانه‌ ئه‌وه‌ند بڵند و زۆر بون نه‌یانده‌هێشت كه‌س گوێی له‌ چركه‌ی كاتژمێره‌كه‌ی ئێمه‌ بێت. سه‌ره‌نجام پاش نۆساڵ كاتیك یاساكه‌ی بودجه‌ جێبه‌جێكرا ئینجا زانیان كه‌ ئه‌و یاسایانه‌ی بودجه‌ له‌2015 وه‌ له‌به‌غدا ده‌رچون هه‌رخۆیان كۆسپ و كاره‌ساتن بون و شیاوی جێبه‌جێكردن نه‌بون و سته‌می گه‌روه‌یان تێدابوو‌ ده‌رهه‌ق به‌هه‌رێم . سه‌باره‌ت به‌ ڕاده‌ستكردنی نه‌وتیش به‌هه‌مانشێوه‌ چه‌ند ساڵیك زۆرترین قسه‌ ئه‌وه‌بو كه‌ با هه‌رێم خۆی نه‌وت هه‌نارده‌ نه‌كات و ڕاده‌ستی بكات ئیتر هه‌رێم سه‌رڕیژده‌كرێت له‌پشكی بودجه‌ی عێراق، به‌ڵام نزیكه‌ی ساڵێكه‌ هه‌رێم ناتوانێت نه‌وت هه‌نارده‌ بكات و ئاماده‌یه‌ راده‌ستی به‌غدای بكات و به‌پیی یاسای بودجه‌یش ده‌بێ وابێ، به‌ڵام به‌غدا نه‌ نه‌وته‌كه‌ی لێ وه‌رده‌گرێ و نه‌ پشكی بودجه‌شی بۆ ده‌نێرێ...    

درەو: تا ئێستا وەزارەتی دارایی عێراق بڕیاری لەسەر زیاتر لە (130) ملیار دینار داوەو بەپێی تەواوكردنی ووردبینی لە لیستەكاندا موچە رەوانەی هەرێمی كوردستان دەكات، ئەو پارەیەی لەبەغدادەوە دەنێردرێت (623) ملیار دینارەو (320) ملیار دینار دەمێنێت بۆ موچە كە دەبێتە لەداهاتی ناوخۆ دابینبكرێت. وەزارەتی دارایی عێراق دەڵێت موچەی بەڕێوەبەرایەتی پاراستنی كۆمەڵایەتی، خانەنشینانی مەدەنی و سەربازی،  كاروباری شەهیدان و ئەنفالكراوانیان رەوانەی هەرێمی كوردستان كردووە. بەپێی نوسراوەكانی وەزارەتی دارایی عێراق. بۆ موچەی خانەنشینانی سەربازی و مەدەنی بڕی: (119 ملیارو 139 ملیۆن) دینار بۆ موچەی پاراستنی كۆمەڵایەتی: (10 ملیارو 967 ملیۆن) دینار بۆ موچەی كاروباری شەهیدان و ئەنفالكراوان: (859 ملیار) دینار (دیوانی وەزارەتی شەهیدان) كۆی گشتی زیاتر لە (130) ملیار دینار دەكات تا ئێستا ووردبینی ئەو  سێ دامەزراوەیە تەواو بووە بۆیە تەنیا موچەی ئەو سێ دامەزراوەیە رەوانە كراوە، كە لە كۆی (944) ملیار دیناری كۆی موچەخۆرانی هەرێم تەنیا (130) ملیار دینار  رەوانەكراوە، چاوەڕوان دەكرێت ئەو پارەیەی لە بەغدادەوە دەنێردرێت بڕی (623) ملیار دینار دەبێت و بڕی (320) ملیار دیناری تر دەمێنێتەوە دەبێت لە داهاتی ناوخۆ حكومەتی هەرێم خۆی دابینی بكات. هەفتەی رابردوو وەزارەتی دارایی هەرێمی كوردستان لیستی موچەی موچەخۆرانی رەوانەی بەغدادكرد، جگە لە كەرتی ئەمنی و سەربازی، بەپێی بەدواداچوونەكانی (درەو) ئەو لیستەی نەنێردراوە موچەكەی زیاتر لە (300) ملیار دینارە، بەو پێیەی ئەوانەی لە سلكی هێزی ئەمنی هەرێمدا موچە وەردەگرن (433) هەزار كەسەو بڕی موچەی مانگانەكەی (450) ملیار دینارە، بەڵام لەسلكی ئەمنی و سەربازی وەزارەتی دارایی هەرێم كارمەندە مەدەنییەكان و كارمەندانی هاتووچۆو خانەنشینی سەربازی ناردووە بۆ بەغداد، بۆیە ئەوانەی لە سلكی سەربازیدا كاردەكەن و لیستەكانیان رەوانە نەكراوە نزیكەی (300) ملیار دینارە. ئەمەش ئەوە دەگەیەنێت كە وەزارەتی دارایی عێراق بەپێی لیستەكان موچە دەنێرێت بۆ وەزارەتی دارایی هەرێم و ئەو بەشەی تریش پێویستە حكومەتی هرەێم لە داهاتی ناوخۆ دابینی بكات. "موچەی مانگی ئازاری فەرمانبەرانی هەرێمی كوردستان خەرج ناكەین تا پرۆسەی بە نیشتمانیكردنی موچەی فەرمانبەران تەواو نەبێت" لە نوسراوێكدا بۆ دادگای فیدراڵی، وەزارەتی دارایی عێراق وا دەڵێ. وەزارەتی دارایی عێراق ئەمڕۆ فەرمانیداوە بڕی زیاتر لە 130 ملیار دینار بۆ موچەی خانەنشیان و چاودێری كۆمەڵایەتیی لە هەرێمی كوردستان خەرج بكرێت. وەزارەتی دارایی فیدراڵ سێ نوسراوی سێ نوسراوی ئاڕاستەی یەكەی سیستەمی پێدانی پارە لە وەزارەتەكەی كردووە، لە یەكێك لە نوسراوەكاندا داوا دەكات بە فەرمانی سەرۆك وەزیران و بە رەزامەندی وەزیری دارایی و لەسەر بنەمای بڕیاری دادگای فیدراڵی، بڕی زیاتر لە (10 ملیار) دینار بخاتەسەر حسابی حكومەتی هەرێمی كوردستان بۆ خەرجكردنی شایستەی دارایی خاوەن پێداویستییە تایبەتەكان لە بەڕێوەبەرایەتییەكانی تۆڕی پاراستنی كۆمەڵایەتی. لە نوسراوی دووەمیشدا داوا دەكات زیاتر لە (119 ملیار) دینار بخاتەسەر حسابی حكومەتی هەرێمی كوردستان وەكو شایستەی خانەنشینانی مەدەنی و سەربازی. لە نوسراوی سێیەمدا بری زیاتر لە (859 ملیۆن) دیناری تەرخانكردووە بۆ شایستەی دارایی شەهیدان و ئەنفالكراون و گرێبەستەكان لە هەرێمی كوردستان. وەزارەتی دارایی ئاماژەی بەوەكردووە، ئەم بڕە پارانە تەنیا بۆ موچەی مانگی شوباتە. لە نوسراوەكەدا، وەزارەتی دارایی فیدراڵ، دادگای فیدراڵی ئاگاداركردوەتەوە لەوەی، موچەی مانگی شوبات بۆ هەرێمی كوردستان دەنێرێت، بەڵام بەهۆی ئەوەی میكانیزمی بەنیشتمانیكردنی موچەی فەرمانبەرانی هەرێم پێویستی بەكاتە، ئەم پارەیە تەنیا بۆ مانگی شوبات دەبێت و موچەی مانگی ئازار بۆ فەرمانبەرانی هەرێم نانێرێت تا ئەوكاتەی پێداویستییەكانی بە نیشتمانیكردنی موچەی فەرمانبەران لەلایەن هەرێمەوە تەواو دەكرێت. واتا تا ئەو كاتەی پرۆسەی كردنەوەی حساب بانكی بۆ فەرمانبەرانی هەرێم لە بانكە فیدراڵییەكان تەواو دەبێت.  

(دره‌و): "موچه‌ی مانگی ئازاری فه‌رمانبه‌رانی هه‌رێمی كوردستان خه‌رج ناكه‌ین تا پرۆسه‌ی به‌ نیشتمانیكردنی موچه‌ی فه‌رمانبه‌ران ته‌واو نه‌بێت" له‌ نوسراوێكدا بۆ دادگای فیدراڵی، وه‌زاره‌تی دارایی عێراق وا ده‌ڵێ.  وه‌زاره‌تی دارایی عێراق ئه‌مڕۆ فه‌رمانیداوه‌ بڕی زیاتر له‌ 130 ملیار دینار بۆ موچه‌ی خانه‌نشیان و چاودێری كۆمه‌ڵایه‌تیی له‌ هه‌رێمی كوردستان خه‌رج بكرێت.  وه‌زاره‌تی دارایی فیدراڵ سێ نوسراوی سێ نوسراوی ئاڕاسته‌ی یه‌كه‌ی سیسته‌می پێدانی پاره‌ له‌ وه‌زاره‌ته‌كه‌ی كردووه‌، له‌ یه‌كێك له‌ نوسراوه‌كاندا داوا ده‌كات به‌ فه‌رمانی سه‌رۆك وه‌زیران و به‌ ره‌زامه‌ندی وه‌زیری دارایی و له‌سه‌ر بنه‌مای بڕیاری دادگای فیدراڵی، بڕی زیاتر له‌ (10 ملیار) دینار بخاته‌سه‌ر حسابی حكومه‌تی هه‌رێمی كوردستان بۆ خه‌رجكردنی شایسته‌ی دارایی خاوه‌ن پێداویستییه‌ تایبه‌ته‌كان له‌ به‌ڕێوه‌به‌رایه‌تییه‌كانی تۆڕی پاراستنی كۆمه‌ڵایه‌تی.  له‌ نوسراوی دووه‌میشدا داوا ده‌كات زیاتر له‌ (119 ملیار) دینار بخاته‌سه‌ر حسابی حكومه‌تی هه‌رێمی كوردستان وه‌كو شایسته‌ی خانه‌نشینانی مه‌ده‌نی و سه‌ربازی. له‌ نوسراوی سێیه‌مدا بری زیاتر له‌ (859 ملیۆن) دیناری ته‌رخانكردووه‌ بۆ شایسته‌ی دارایی شه‌هیدان و ئه‌نفالكراون و گرێبه‌سته‌كان له‌ هه‌رێمی كوردستان. وه‌زاره‌تی دارایی ئاماژه‌ی به‌وه‌كردووه‌، ئه‌م بڕه‌ پارانه‌ ته‌نیا بۆ موچه‌ی مانگی شوباته‌.  له‌ نوسراوه‌كه‌دا، وه‌زاره‌تی دارایی فیدراڵ، دادگای فیدراڵی ئاگاداركردوه‌ته‌وه‌ له‌وه‌ی، موچه‌ی مانگی شوبات بۆ هه‌رێمی كوردستان ده‌نێرێت، به‌ڵام به‌هۆی ئه‌وه‌ی میكانیزمی به‌نیشتمانیكردنی موچه‌ی فه‌رمانبه‌رانی هه‌رێم پێویستی به‌كاته‌، ئه‌م پاره‌یه‌ ته‌نیا بۆ مانگی شوبات ده‌بێت و موچه‌ی مانگی ئازار بۆ فه‌رمانبه‌رانی هه‌رێم نانێرێت تا ئه‌وكاته‌ی پێداویستییه‌كانی به‌ نیشتمانیكردنی موچه‌ی فه‌رمانبه‌ران له‌لایه‌ن هه‌رێمه‌وه‌ ته‌واو ده‌كرێت.  واتا تا ئه‌و كاته‌ی پرۆسه‌ی كردنه‌وه‌ی حساب بانكی بۆ فه‌رمانبه‌رانی هه‌رێم له‌ بانكه‌ فیدراڵییه‌كان ته‌واو ده‌بێت.  رۆژی 21ی شوبات، دادگای باڵای فیدراڵی عێراق له‌سه‌ر بنه‌مای ئه‌و سكاڵایانه‌ی له‌باره‌ی موچه‌وه‌ تۆماركرابوون، بڕیاریدا به‌وه‌ی له‌مه‌ودوا حكومه‌تی فیدراڵی عێراق موچه‌ی فه‌رمانبه‌رانی هه‌رێم بدات، ئه‌مه‌ش له‌رێگه‌ی حساب بانكییه‌وه‌ له‌ بانكه‌ فیدراڵییه‌كان، به‌م بڕیاره‌ دادگا ده‌سه‌ڵاتی پێدانی موچه‌ی فه‌رمانبه‌رانی له‌ حكومه‌تی هه‌رێم وه‌رگرته‌وه‌.  وه‌زاره‌تی دارایی عێراق به‌رپرسیارێتیی یاسایی له‌ دروستی زانیاری و تۆماری موچه‌خۆران له‌به‌رده‌م ده‌سته‌كانی چاودێریكردندا، ده‌خاته‌ ئه‌ستۆی حكومه‌تی هه‌رێمی كوردستان. هه‌ر له‌و نوسراوه‌دا، وه‌زاره‌تی دارایی داوا له‌ كۆمپانیای به‌بازاڕخستنی نه‌وتی عێراق "سۆمۆ" ده‌كات زانیاری پێبدات له‌باره‌ی ئه‌وه‌ی ئایا هه‌رێمی كوردستان تا چه‌ند پابه‌ندبووه‌ به‌ جێبه‌جێكردنی مادده‌كانی (11) و (12)ی یاسای بودجه‌، سه‌باره‌ت به‌ بڕی نه‌وتی هه‌نارده‌كراو و راده‌ستكراو له‌لایه‌ن حكومه‌تی هه‌رێمه‌وه‌ به‌شێوه‌ی مانگانه‌. به‌پێی یاسای بودجه‌، ده‌بێت حكومه‌تی هه‌رێم مانگانه‌ بڕی (400 هه‌زار) به‌رمیل نه‌وت هه‌نارده‌ی ده‌ره‌وه‌ بكات و له‌رێگه‌ی كۆمپانیای سۆمۆوه‌ بیفرۆشێت، داهاتی ئه‌م نه‌وته‌ش راسته‌وخۆ بگه‌ڕێته‌وه‌ بۆسه‌ر ژماره‌ حسابی وه‌زاره‌تی دارایی عێراق له‌ بانكی ناوه‌ندیی.  یاسای بودجه‌ی عێراق ئه‌وه‌ی له‌به‌رچاو گرتووه‌ كه‌ له‌ 25ی ئازاری 2023وه‌ به‌هۆی بڕیاری دادگای ناوبژیوانی پاریسه‌وه‌ هه‌نارده‌ی نه‌وتی كوردستان راوه‌ستاوه‌، بۆیه‌ هه‌رێمی پابه‌ندكردووه‌ به‌وه‌ی، ئه‌گه‌ر هه‌نارده‌كردن بۆ ده‌ره‌وه‌ی ده‌ستی پێنه‌كرده‌وه‌، ده‌بێت هه‌رێم رۆژانه‌ ئه‌و (400 هه‌زار) به‌رمیله‌ راده‌ستی وه‌زاره‌تی نه‌وتی عێراق بكات بۆ پڕكردنه‌وه‌ی پێداویستی ناوخۆ، دوای به‌ركاربوونی یاسای بودجه‌ له‌ كۆتاییه‌كانی حوزه‌یرانی 2023، بۆ ماوه‌ی چه‌ند مانگێك حكومه‌تی هه‌رێم بڕی (85) هه‌زار به‌رمیل نه‌وتی رۆژانه‌ی راده‌ستی وه‌زاره‌تی نه‌وتی عێراق ده‌كرد، به‌ڵام ئه‌مه‌ش راوه‌ستاو به‌هۆی ئه‌وه‌ی حكومه‌تی عێراق خه‌رجی به‌رهه‌مهێنانی نه‌وته‌كه‌ی بۆ هه‌رێم دابین نه‌ده‌كرد.  ده‌قی نوسراوه‌كان: 

مەریوان وریا قانع تایبەت بە (درەو) هەفتەی پێشو ئەنجومەنی داوەریی هەرێمی کوردستان کۆمەڵێک ئاماری گرنگ و سەرنجڕاکێشی لەسەر بارودۆخی دروستکردنی خێزان و جیابوونەوە لە ھەرێمی کوردستاندا، بڵاوکردەوە. ئامارەکان وێنەیەکی گشتیمان لەسەر ئەم دیاردەیە لە دە ساڵی نێوان (٢٠١٤-٢٠٢٣)دا، لە ھەرێمدا نیشائەدات. یەکێک لەو بابەتە سەرەکییانەی ئامارەکان  ھۆکارەکانی جیابوونەوەن لە ھەرێمی کوردستاندا. بەپێی ئامارەکان لە نێوان ساڵانی (٢٠١٤-٢٠٢٣) دا، رۆژانە (١٢٩) مارەبڕین لە دادگاکانی هەرێمی کوردستاندا تۆمارکراون. وەکچۆن لە ھەمان ماوەدا هەموو رۆژێک زیاتر لە (٢٦) حاڵەتی تەڵاقدان و جیابوونەوە تۆمارکراون. بە مانایەکی دیکە ٢٠% ، لە سەدا بیستی، ئەو ھاوسەرگیریانەی لەو دە ساڵەدا دروستکراون، بە جیابوونەوە کۆتاییان ھاتووە، واتە لە ھەر ٥ ھاوسەرگیرییەک کە دروستکراون، یەکێکیان ھەڵوەشاوەتەوە. یەکەمین تێبینیەک بکرێت لەم ئاستەدا لەسەر ئەم ئامارانە بیڵێین، نزیکبوونەوەی ژمارەی جیابوونەوەکانە لەو ژمارانەی کە لە وڵاتە ئەوروپییەکاندا ھەن، بۆ نموونە لە ھۆڵەندادا. ئاستی جیابوونەوە لە هۆڵەندادا لە سەدەی بیستەمدا گۆرانکاریی گەورەی بەسەرداھاتووە و لەگەڵ تێپەرینی ساڵەکانی سەدەکەدا ژمارەی جیابوونەوەکان زیادیکردوە. لەسەرەتای سەدەی بیستەمدا ژمارەی جیابوونەوە لە ھۆڵەندادا لە ھەر ھەزار کەسێک تەنھا ٢ کەس بووە، بەڵام لە نێوان ساڵانی شەستەوە بۆ ناوەڕاستی ساڵانی ھەشتا، ئەم ژمارەیە بەرزبۆتەوە بۆ ١٠ جیابوونەوە لە هەر هەزار ھاوسەرگیرییەک. لە سەرەتای ساڵانی ٢٠٠٠ یشەوە ئەم رێژەیە زۆر زیاتر بەرزدەبێتەوە و لە هەر ٤ هاوسەرگیرییەک کە دروستدەبن یەکێکیان هەڵدەوەشێتەوە. بە مانایەک لە ماناکان ئاستی جیابوونەوە لە کوردستاندا نزیکە لە ئاستی جیابوونەوە لە وڵاتێکی وەک ھۆڵەندایە. دەشێت ئەم لێکچونە وەک یەکێک لە دەرەنجامەکانی دیاردەی بەجیھانیبوون و گۆڕانی خواست و چاوەڕوانیی و سایکۆلۆژیای مرۆڤەکان ببینین، کە لە زیاد لە بەشێک لە بەشە جیاوازەکانی جیھاندا، بە تایبەتی لەلای نەوە گەنجەکان، دروستبووە و ئامادەیە. ئامارەکان نیشانیئەدەن زۆرترین حاڵەتی جیابوونەوە لای نەوە گەنجەکان ڕوئەدات، ئەوانەی تەمەنیان لە نێوان ١٥ بۆ٤٠ ساڵە. ژمارەی جیابوونەوەش لای ئەو کەسانەی کە تەمەنیان ٥٠ ساڵ و بەرەوژوورە، بە ڕادەیەکی بەرچاو کەمتر و نزمترە. ئەمەش بەرەو ئەوەمان دەبات کە بڵێین دیاردەی جیابوونەوە لە ھەرێمدا، بە پلەی یەکەم، دیاردەی بەشە گەنجەکەی کۆمەڵگاکەیە. ھۆکارەکانی جیابوونەوەش وەک لە ڕاپۆرتەکەدا ھاتووە بریتین لە: - نەگونجان لەگەڵ یەكتری: ٢٥% - جیاوازی تەمەن: ١٤% - خیانەتی زەوجی: ١٣% - نەبوونی ماڵی جیا: ١٠% - مۆبایل و ئینتەرنێت: ١٠ % - هۆكاری نەزۆكی: ٩ % - هۆكاری كۆمەڵایەتی:  ٩ % - ژنهێنانی دووەم: ٤ % - هۆكاری ئابوری:٣ % - هۆكاری دیكە: ٣ % بەڵام ”مەسەلەی نەگونجان لەگەڵ یەکتری“ و ”جیاوازی تەمەن“ و ”نەبوونی ماڵی جیا“ و ”مۆبایل و ئینتەرنێت“، ”ھۆکاری ئابوریی“ کە بەسەریەکەوە نزیکەی ٦٢% لەسەدی ھۆکارەکانە، چیمان پێدەڵێن؟ خوێندنەوەیەکی وردی ھۆکارەکان نیشانیئەدەن بەشی زۆریان، بە پلەی یەکەم، پەیوەندییان بە ژیانی نەوە گەنجەکانەوە ھەیە. ئەگەرچی جیابوونەوە ڕووداوی ناو ھەموو تەمەنێکە، چ لای ژنان و چ لای پیاوان، بەڵام شیکردنەوەیەکی وردی ئەو ئامارانە نیشانیئەدەن کە دیاردەکە لە دونیای ئێمەدا دیاردەی بەشە گەنجەکەی کۆمەلگاکەیە. ئەوانەی کە بەیەکەوە ناگونجێن، جیاوازی تەمەن بەلایانەوە مەسەلەیەکە، ماڵی تایبەتیان نییە، مۆبایل و ئینتەرنێت بەشێوەیەکی بەردەوام بەکاردەھێنن، لە ڕووی ئابووەییەوە لاوازن، دیسانەوە بەشە گەنجەکەی کۆمەڵگاکەیە. بەڵام چۆن ئەم دیاردەیە بنرخێنین؟ لای ھەندێک، جیابوونەوە هێمایە بۆ تێکچوونی ئەخلاق و کەمبوونەوەی بەرپرسیارێتیی و هەڵوەشاندندوەی خێزان، دیاردەیەکی خراپ و نالەباری ناو کۆمەڵگایە، زۆرجاریش بە دوورکەوتنەوە و لادان لە دین و بە تەسلیمبوون بە چێژ و شەھوەتی دنیاییەوە، گرێئدەرێت. ئەوانەی ئەم ڕوانینەیان بۆ دیاردەکە ھەیە، ئەو بەشەی کۆمەڵگان کە دەکرێت بە مۆرالیست، یان ئەخلاقگەرا ناوببرێن. ئەمانە کەم تا زۆر ئەو بەشەی کۆمەڵگاکەن کە کۆنەپارێز و سونەتیین. جیابوونەوە مەرجنییە دیاردەیەکی خراپ بێت، بەپێچەوانەوە دەشێت چەندان رووکاری ئەرێنی پۆزەتیڤی هەبێت. بۆ نموونە دەتوانێت ئامرازی ئازدکردن و رزگارکردنی ژیانی دووکەس لەیەکتری بێت کە توانای بەیەکەوەژیانیان نەبێت، یان ژیانی یەکتریان تاڵکردبێت و کەش و ھەوایەکی تەواو خراپ و ناتەدروستیان بۆیەکتریی و دەوروبەرکەیان، دروستکردبێت. جیابوونەوە دەشێت ئامرازی بەخشینی هەلیتری ژیان بە کەسەکان بێت، کۆتاییهێنانبێت بەو کەش و هەوا ناوەکییە بیمارەی دەشێت لە ژیانی ناو ھاوسەرگرییەکدا دروستبووبێت. بەڵام جیابوونەوە دەشێت کێشە و دڵشکانی گەورەشی لێبکەوێتەوە، بەتایبەتی گەر منداڵ لە ئارادابێت. لەم دۆخانەدا زۆرجار جیابوونەوە منداڵ دەخاتە ناو دۆخێکی دەرونیی و مادی سەختەوە، ھەروەھا بۆ ئەو خانمانەیش کە ناتوانن بژێوی خۆیان دابینبکەن و ژیانێکی تازە بۆخۆیان دروستبکەن. بە بۆچونی من زیادبوونی ژمارەی جیابوونەوە، بە تایبەتی لای ئەو بەشەی کۆمەڵگا کە گەنجن، بۆ دووجۆر گۆڕانکاریی دەگەرێتەوە کە لە دوای ڕاپەڕیندا دروستبووە. یەکەمیان کۆمەڵێک گۆڕانکاریی کولتوریی و بەھایی و ئەخلاقییە. دووھەمیان کۆمەڵێک گۆڕانکاریی مادیی و ئابورییە. لە یەکەمیاندا ئێمە لە بەردەم کۆمەڵگایەکداین کە گۆڕانی گەورە لە سیستمی بەھاکانیدا دروستبووە. دۆخێکی بەھایی ھاتۆتەکایەوە کە من لە چەند نووسنێکدا ناوی ”شڵەژانی پێوانەیی“م لێناوە. شڵەژانی پێوانەیی ھێما بۆ ئەو دۆخە تایبەتە دەکات کە بەھا سونەتییەکان قورسایی جارانیان نەماوە و بەھا تازەکانیش ھێزی تەواویان نییە نە چەسپاون. جۆرێک لە شڵەژان ئامادەیە کە تیایدا جیاکردنەوەی باش لە خراپ و دەشێت لە ناشێت و دروست لە نادروست، بەو ئاسانییەی جاران لەئارادانییە. ھاوکات لەم کۆمەڵگایەدا پرۆسەی جیاوازی بەتاکەکەسبوون و دروستبوونی شێوازی نوێی کەسایەتیی و لەدایکبوونی فۆرمی تازەی خودسازیی، ھاتۆتەکارەوە. ھەم فۆرمی نوێی ژنبوون و ھەم فۆرمی تازەی پیاوبوون ھاتونەتەکایەوە، کە تیایاندا ھەستکردن بە شوناس و نرخ و مانای تاکەکەسییانەی ژیانی ھەریەکێکیان، بە بەراورد بە قۆناغە کۆنەکان، لە ئاستێکی رێژەیی بەرزدایە. بە تایبەتی لەدایکبوونی زیاد لە نەوەیەکی گەنج لە ژینگەیەکدا کراوە بەسەر ئەزموونی جیاوازی گەنجبوون و ژنبوون و پیاوبوون و بەسەر شێوازی تری ژیاندا، جیاواز لەوانەی ڕۆژگارێکی درێژ لە کۆمەڵگای ئێمەدا باڵادەستبوون. ئەم نەوە گەنجانە جۆرێک لە بەهاو نرخی کۆمەڵایەتییان لا دروستبووە جیاواز لەوەی لای نەوەکانی بەر لە خۆیان هەبووە و جیاواز لەو بەها و نرخە سونەتیی و تەقلیدییانەیش کە ڕۆژگارێکی درێژ، لە دونیای ئێمەدا باڵادەستبوون. ئەمە جگە لە مەسەلەی بەخوێندەواربوون و ئاگادارتربوون لە جیهان، لەڕێگای بوونی توانایەکی گەورەی فێربوون و پەیوەندیکردن لە رێگای تەکنۆلۆژیای پەیوەندیکردنی تازەوە.   ھەموو ئەو گۆڕانکارییانە وایانکردوە تاکەکەسێک لەدایکببێت کە ھەستێکی تایبەتی بەتاکبوونی خۆی لەناودا دروستبووبێت و پرۆسەیەکی تایبەتی خودسازییش ئاراستەیبکات، وابکات حەز و خواست و داواکاریی و ئومێد و ئارەزوی شەخسیی ھەبێت و چاوەروانیی تایبەتیشیی لەخۆی و لە ژیان و لە ھاوسەرگیریی و بەیەکەوەەژیان لەگەڵ کەسێکی دیکەدا، هەبێت. رێزنەگەرتنی ئەم شتانە، وادەکات کەسەکان نەتوانن بە ئاسانی بەیەکەوە بژین.   جگە لەو گۆڕانکارییە نەوەعیانە، خودی کۆمەڵگاکە خۆیشی، جیابوونەوەی ھاوسەرەکان لەیەکتری، وەک جاران، بە کێشەیەکی گەورە نازانێت و وەک جۆرێک لە حەیاچوون و دابەزینی نرخی کۆمەڵایەتیی، نایبینێت. ئەو ئیدانەکردن و نزم تەماشاکردنەی جاران بۆ جیابوونەوە هەبوو، لە ئێستادا بەو جۆرە و بەو مانایانەی جاران، نەماوە. ھاوکات نە گەرەک بەو فۆرمانەی جاران بوونی ماوە، نە ژیانی ناو ئاپارتمانە گەورەکان ژیانی ناو کۆڵان و گەڕەکەکانی جارانە. فۆرمەکانی دراوسێیەتیی و بەیەکەوەبوون گۆڕانی گەورەیان بەسەردا ھاتووە. جۆرێک لە دوورەپەرێزیی کۆمەڵایەتی دروستبووە کە بەرھەمی خۆخەریککردنی کەسەکانە بە ژیانی تایبەتی خۆیانەوە و ھەندەسەی تازەی یەکە نیشتەجێەکانی ناو شارەکانیش لە قازانجی ئەم دوورەپەرێزیی و دابڕانانەدایە. ئەمە جگە لەوەی کە کارکردنی ژن و پیاو لەم ڕۆژگارەدا هەمان بەها و نرخیان هەیە و بڕێکی بەرچاو لە ژنان دەتوانن خاوەنی سەرچاوە و داهاتی تایبەت بەخۆیان بن. ھەڵکشانی دیاردەی جیابوونەوە شتێکیشمان لەسەر خودی خێزان خۆی وەک دەزگایەکی تەقلیدیی ناو دونیای ئێمە پێدەڵێت، نیشانمانئەدات ئەم دەزگایە ئەو هێز و مانا و قورساییەی نەماوە کە نیو سەدە لەمەوپێش هەیبووە. دەتوانین زیادبوون و ھەڵکشانی دیاردەی جیابوونەوە بەو دۆخە گشتییەی پارچەپارچەبوونی کۆمەڵایتیەوە گرێبدەین، کە لە دونیای دوای ڕاپەڕیندا دروستبووە. نەمان یان لاوازبوونی هاوبەشی کۆمەڵایەتیی و ھاوبەشی فەرهەنگیی، ڕۆل دەبینن لە دابەشبوون و پارچەپارچەبوون و هەڵوەشاندنەوەی یەکە کۆمەڵایەتییەکاندا، لەناویشیاندا خێزان. بە کورتییەکەی، یەکێک لە ئەگەرەکان ئەوەیە کە دیاردەی جیابوونەوە یەکێک لە دەرەنجامەکانی پرۆسەی بەتاکەکەسبوون بێت کە چەند دەیەیەکە لە دونیای ئێمەدا بە خەستی لای بەشێکی کۆمەڵگاکە ئامادەیە. جیابوونەوەکان دەشێت وەک ھەوڵدانێک بۆ هەڵبژاردنی جۆری تر لە ژیان وێنابکرێن کە نەکرێت لەناو چوارچێوەی خێزاندا، بە تایبەتی لە چوارچێوە تەقلیدییەکانی خێزاندا، جێیانببێتەوە. بۆیە بە بیماریکردن و ویناکردنی دیاردەی جیابوونەوە، وەک نەخۆشییەکی کۆمەڵایەتیی، یان وەک هەڕەشەیەکی ئەخلاقیی، یان کورتکردنەوەی کۆی دیاردەکە بۆ پیلانی دەرەکیی و ناوەکیی، و قسەکردن لەسەر ئەم دیاردەیە بەم زمانە، بەشێکە لە گوتاری هێزە تەقلیدیی و سونەتییەکانی ناو دونیای ئێمە. ئەو ھێزانەی کە توانای بینینی گۆڕانکارییەکان و توانای قبووڵکردنیانی، نییە.  

(دره‌و): "هیچ زانیارییه‌كمان سه‌باره‌ت به‌ به‌رهه‌مهێنان و هه‌نارده‌ی نه‌وتی هه‌رێم نییه‌و كۆمپانیاكان به‌ره‌و دادگای ناوبژیوانی نێوده‌وڵه‌تیی ده‌ڕۆن، ئه‌مه‌ش كێشه‌ی هه‌رێمه‌" وه‌زیری نه‌وتی عێراق وا ده‌ڵێ.   ئاریان تاوگۆزی ئه‌ندامی فراكسیۆنی نه‌وه‌ی نوێ له‌ په‌رله‌مانی عێراق ئه‌مڕۆ حه‌یان عه‌بدولغه‌نی وه‌زیری نه‌وتی عێراقی بینیوه‌. تاوگۆزی رایگه‌یاند، وەزیری نەوتی عێراق وتویه‌تی هیچ زانیاریەکمان سەبارەت بە بەهەرمهێنان و هەناردەکردنی نەوتی هەرێم نیەو تائێستا سۆمۆ یەک بەرمیل نەوتی لە هەرێم وەرنەگرتوە. وه‌زیری نه‌وتی عێراق ئاماژه‌ی به‌وه‌كردووه‌" هەندێک لەو کۆمپانیا نەوتیانەی لە هەرێم کاردەکەن، دەیانەوێت بەرەو تەحکیمی نێودەوڵەتی بڕۆن و ئەوەش کێشەی هەرێمە" ئه‌مه‌ به‌گوێره‌ی قسه‌ی تاوگۆزی. جێگری وەزیری نەوتی عێراقیش قسه‌ی كردووه‌و باسی له‌وه‌كردووه‌" هەرێم ڕێگا بە تیمەکانی وەزارەتی نەوتی عێراق نادەن سەردانی دامەزراوە نەوتییەکانی هەرێم بکەن".  ئاریان تاوگۆزی ده‌ڵێ" ئەو کێشانەی کە لەنێوان هەرێم و حکومەتی ناوەند هەیە سەبارەت بە نەوت لەسەر تێچوی دەرهێنانی نەوتە، لە عێراق نرخی دەرهێنانی هەر بەرمیلێک نەوت لە نێوان ٨ هەزار بۆ ٩ هەزار دیناری عێراقییەو لە هەرێم بڕی ٢٠ دۆلاری بۆ دیاریکراوە، هەروەها لە عێراق بڕی یەک دۆلارو بیست سەنت دانراوە بۆ گواستنەوەی هەر بەرمیلێک، بەڵام لە هەرێم بڕی ٦ دۆلار بۆ گواستنەوەی دانراوە، کە ئەمانەش پێچەوانەی یاسای بودجەی گشین و عێراق ناتوانێت پێیانەوە پابەندبێت".

(دره‌و):  (شیوعی و سۆسیال دیموكرات و زه‌حمه‌تكێشان و باپیر كامه‌لاو نه‌جات سورچی و خه‌فور مه‌خموری و مام خدر روسی) گفتوگۆیه‌كیان ده‌ستپێكردووه‌ بۆ دروستكردنی هاوپه‌یمانێتی هه‌ڵبژاردن، بڕیاریانداوه‌ تا رۆژی 12ی ئه‌م مانگه‌ هاوپه‌یمانێتییه‌كه‌ یه‌كلابكه‌نه‌وه‌، ئه‌گه‌ر ئه‌مه‌ سه‌ركه‌وتوو بێت، ده‌بێت به‌ یه‌كه‌م هاوپه‌یمانێتیی له هه‌ڵبژاردنی 10ی حوزه‌یرانی په‌رله‌مانی كوردستاندا. حزبی شیوعی كوردستان ده‌ستپێشخه‌ریی كردووه‌ بۆ دروستكردنی هاوپه‌یمانێتییه‌ك، بۆ به‌شداربوون له‌ هه‌ڵبژاردنی په‌رله‌مانی كوردستان. باره‌گای مه‌كته‌بی سیاسی شیوعی له‌ هه‌ولێر دوێنێ كۆبونه‌وه‌یه‌كی تێدا كرا، به‌شداربوانی كۆبونه‌وه‌كه‌ بریتی بوون له: •    محەمەد حاجی مەحمود- سەرۆکی پارتی سۆسیال دیموکراتی کوردستان  •    کاوە مەحمود- سەرۆکی حزبی شیوعی کوردستان  •    بەڵێن عەبدوڵا- سکرتێری حزبی زەحمەتکێشانی کوردستان •    باپیر کامەلا- سکرتێری پارتی کرێکاران و رەنجدەرانی کوردستان  •    نەجات سورچی- سەرۆکی پارتی پارێزگارانی کوردستان •    غەفور مەخموری- سکرتێری یەکێتی نەتەوەی دیموکراتی کوردستان •    مام خدر ڕوسی- سکرتێری بزوتنەوەی دیموکراتی گەلی کوردستان. به‌پێی به‌دواداچوونه‌كان، له‌م كۆبونه‌وه‌یه‌دا سه‌رۆك و سكرتێری ئه‌و (7) لایه‌نه‌ سیاسییه‌ گفتوگۆیان كردوه‌ له‌باره‌ی دروستكردنی هاوپه‌یمانێتییه‌ك بۆ به‌شداریكردن له‌ هه‌ڵبژاردنی خولی شه‌شه‌می په‌رله‌مانی كوردستان كه‌ بڕیاره‌ 10ی حوزه‌یرانی ئه‌مساڵ به‌ڕێوه‌بچێت.  رۆژی 21ی شوبات، دادگای باڵای فیدراڵی له‌سه‌ر بنه‌مای سكاڵایه‌كی یه‌كێتیی نیشتمانی، یاسای هه‌ڵبژاردنی په‌رله‌مانی كوردستانی گۆڕی، شێوازی هه‌ڵبژاردنی له‌ كوردستان له‌ (یه‌ك بازنه‌یی)ه‌وه‌ گۆڕی بۆ (فره‌ بازنه‌)و هه‌رێمی دابه‌شكرد به‌سه‌ر چوار ناوچه‌ی هه‌ڵبژاردندا (هه‌ولێر- سلێمانی- دهۆك- هه‌ڵه‌بجه‌).  شێوازی فره‌بازنه‌یی هه‌ڵبژاردن حزبه‌ سیاسییه‌ بچوكه‌كان نیگه‌ران كردووه‌، چونكه‌ له‌م شێوازه‌دا ده‌نگی هه‌ر حزبێك له‌ناو بازنه‌یه‌كی هه‌ڵبژارندا قه‌تیس ده‌بێت و ئه‌گه‌ر كۆی ده‌نگه‌كان نه‌توانێت له‌و بازنه‌یه‌دا كاندیدێك سه‌ربخات بۆ په‌رله‌مان، ئه‌وا ده‌نگه‌كان ده‌فه‌وتێت و ناگوازرێته‌وه‌ بۆسه‌ر ده‌نگی كاندیدێكی تر له بازنه‌یه‌كی تر.  ئه‌م حزبانه‌، پێشترو له‌به‌ر رۆشنایی شێوازی یه‌ك بازنه‌یی هه‌ڵبژاردندا، هه‌ندێكیان یان به‌ یه‌كه‌وه‌ ده‌یانتوانی یه‌ك كاندید بۆ په‌رله‌مان سه‌ربخه‌ن، به‌ڵام ئه‌مجاره‌ كه‌ شێوازه‌كه‌ بووه‌ به‌  (فره‌ بازنه‌یی)، ده‌رفه‌تی به‌رده‌میان لاوازه‌.  ئه‌مه‌ هۆكاره‌كه‌یه‌، كه‌ به‌ر له‌ هه‌ڵوه‌شاندنه‌وه‌ی درێژكردنه‌وه‌ی ته‌مه‌نی په‌رله‌مانی كوردستان له‌لایه‌ن دادگای فیدراڵییه‌وه‌، له‌ دانوستانه‌كانی چۆنیه‌تی هه‌مواركردنه‌وه‌ی یاسای هه‌ڵبژاردندا، شیوعی و سۆسیال دیموكرات و بزوتنه‌وه‌ی ئیسلامی و لایه‌نه‌كانی تریش دژی شێوازی فره‌بازنه‌یی هه‌ڵبژاردن بوون. ئه‌و حه‌وت حزبه‌ی كه‌ ئێستا تاوتوێی دروستكردنی هاوپه‌یمانێتیی ده‌كه‌ن بۆ هه‌ڵبژاردن، له‌ خولی پێنجه‌می په‌رله‌ماندا به‌ هه‌موویانه‌وه‌ ته‌نیا (2) كورسییان هه‌بووه‌، كورسییه‌كه‌ی حزبی شیوعی و كورسییه‌كی شه‌راكه‌تی نێوان سۆسیال دیموكرات و حزبه‌كه‌ی باپیر كامه‌لا.  سه‌رچاوه‌یه‌كی ئاگادار له‌ گفتوگۆ سیاسییه‌‌كه‌ به‌ (دره‌و)ی راگه‌یاند، حه‌وت حزبه‌كه‌ رۆژی یه‌كشه‌ممه‌ی داهاتوو جارێكی تر كۆده‌بنه‌وه‌و بڕیاردراوه‌ هه‌ریه‌كێك له‌ لایه‌نه‌كان پێشنیازو میكانیزمی خۆی له‌باره‌ی چۆنیه‌تی دروستكردنی هاوپه‌یمانێتییه‌كه‌ بخاته‌ڕوو، رۆژی 12ی ئه‌م مانگه‌ وه‌كو دوا واده‌ بۆ گفتوگۆكردن و یه‌كلاكردنه‌وه‌ی پرسه‌كه‌ دیاریكراوه‌، چونكه‌ رۆژی 14ی مانگ دواین واده‌یه‌ بۆ وه‌رگرتنی ناوی هاوپه‌یمانێتییه‌كان له‌لایه‌ن كۆمسیۆنی باڵای سه‌ربه‌خۆی هه‌ڵبژاردنه‌كانی عێراقه‌وه‌.  ئه‌م (7) حزبه‌ ئه‌گه‌ر بڕیار بده‌ن پێكه‌وه‌و به‌ هاوپه‌یمانێتیی بچنه‌ ناو هه‌ڵبژاردنه‌وه‌، ده‌بێت له‌سه‌ر چۆنیه‌تی دابه‌شكردنی بازنه‌كانی هه‌ڵبژاردن له‌نێو خۆیاندا رێكبكه‌ون و لیستێكی هاوبه‌شی كاندیده‌كانیان بۆ به‌شداری له‌ هه‌ڵبژاردن ئاماده‌ بكه‌ن.  كۆمسیۆنی هه‌ڵبژاردنه‌كانی عێراق له‌ رۆژی 5ی ئه‌م مانگه‌وه‌ ده‌رگای بۆ تۆماركردنی ناوی ئه‌و هاوپه‌یمانێتییانه‌ كردوه‌ته‌وه‌ كه‌ ده‌یانه‌وێت به‌شداری هه‌ڵبژاردنی كوردستان بكه‌ن، جگه‌ له‌م ده‌ستپێشخه‌رییه‌ی حزبی شیوعی بۆ هاوپه‌یمانێتیی، هیچ هه‌وڵێكی جددی تر بۆ دروستكردنی هاوپه‌یمانێتیی نییه‌، یه‌كگرتووی ئیسلامیش ده‌ستپێشخه‌رییه‌كی هه‌یه‌ بۆ دروستكردنی هاوپه‌یمانێتیی له‌گه‌ڵ "به‌ره‌ی ناڕازیی خه‌ڵك" به‌ڵام تائێستا شتێكی ئه‌وتۆی لێ سه‌وز نه‌بووه‌.  به‌پێی زانیارییه‌كانی (دره‌و)، لاهور شێخ جه‌نگیش له‌ماوه‌ی رابردوودا له‌گه‌ڵ چه‌ند لایه‌نێكی ده‌ره‌وه‌ی پارتی و یه‌كێتیی به‌دیاریكراوش ناڕازییه‌كان و ئه‌وانه‌ی بۆ یه‌كه‌مجاره‌ به‌نیازن به‌شداری هه‌ڵبژاردن بكه‌ن، هه‌وڵی بۆ دروستكردنی هاوپه‌یمانێتیی هه‌بووه‌، به‌ڵام هه‌وڵه‌كانی بێئاكام بووه‌.    

درەو: 🔻 پاڵپشت بە داتاو ئامارەکانی ئەنجومەنی دادوەری هەرێمی کوردستان لە ماوەی نێوان ساڵانی (2014 - 2023)، واتە لە ماوەی (10) ساڵی ڕابردوودا؛ 🔹 لە ساڵی 2023 زۆرترین هاوسەرگیری لە پارێزگای سلێمانی و جیابوونەوە لە پارێزگای هەولێر بووە، لە دوای نەگونجان و جیاوازی تەمەن خیانەتی هاوسەری گەورەترین هۆکار بووە بۆ حاڵەتەکانی جیابوونەوە. 🔹 بەپێی داتاکان ژمارەی لێکجابوونەوەکان بەراورد بە تۆمارکردنی گرێبەستی هاوسەرگیری لە دادگاکانی هەرێم لە ساڵی (2014) لە رێژەی (18%)ەوە بۆ ساڵی (2023) بەرزبووتەوە بۆ (27%). 🔹 لەماوەی سالانی (2014 - 2023) لە دادگاکانی هەرێمی کوردستان (472 هەزار و 581) پرۆسەی هاوسەرگیری تۆمارکراوە کە (446 هەزار و 234) حاڵەتیان ڕاستەوخۆ لە دادگاکان تۆمار کراون (26 هەزار و 347) حاڵەتیان مارەبڕینی دەرەکی بوونەو لە دادگا پەسەندکراون. واتە بە تێکڕا؛ ساڵانە (47 هەزار و 258) حاڵەت، مانگانە (3 هەزار و 938) حاڵەت و رۆژانە (129) مارەبڕین تۆمارکراون. 🔹 لە ماوەی (10) ساڵی ڕابردوودا (96 هەزار و 44) خێزان هەڵوەشاونەتەوە، واتە؛ بە تێکڕا؛ ساڵانە (9 هەزار و 604) حاڵەت، مانگانە (800) حاڵەت و هەموو رۆژێک زیاتر لە (26) حاڵەتی تەڵاق تۆمارکراوە. ساڵی (2023) بەرزترین رێژەی تەڵاقی تێدا تۆمارکراوە. 🔹هۆكارەكانی جیابوونەوە لە هەرێمی كوردستان "خیانەتی زەوجی، مۆبایل و ئینتەرنێت، نەگونجان، نەزۆكی، ماڵی جیا"   یەکەم؛ هاوسەرگیری و هەڵوەشانەوەی خێزان لەسەر ئاستی هەرێمی کوردستان لە ساڵی 2023 ئەنجومەنی دادوەری هەرێمی کوردستان رۆژی (4/3/2024) داتاو ئامارو دادبینییە تۆمارکراوەکانی خۆی لە ماوەی (1/1/2023 – 31/12/2023) لە سەر ئاستی پارێزگاکانی هەرێمی کوردستان و ئیدارەی گەرمیان، بڵاوکردەوە، بەپێی ئامارەکان؛ ئامارەکانی هاوسەرگیری لەسەر ئاستی هەرێمی کوردستان (53 هەزار و 87) پرۆسەی هاوسەرگیری ئەنجامدراوەو زۆرترین رێژەی هاوسەرگیری لە پارێزگای سلێمانی بووە، وەک لە  (چارتی ژمارە (1)) هاتووە، بە جۆرێک؛ 1.    لە سنوری پارێزگای هەولێر: (17 هەزار و 543) پرۆسەی مارەبڕین ئەنجام دراوە بە رێژەی (33%). 2.    لە سنوری پارێزگای سلێمانی: (20 هەزار و 407) پرۆسەی مارەبڕین ئەنجام دراوە بە رێژەی (38%). 3.    لە سنوری پارێزگای دهۆک: (12 هەزار و 499) پرۆسەی مارەبڕین ئەنجام دراوە بە رێژەی (24%). 4.    لە سنوری ئیدارەی گەرمیان: (2 هەزار و 618) پرۆسەی مارەبڕین ئەنجام دراوە بە رێژەی (5%).   ئامارەکانی لێکجیابوونەوە و تەڵاق لەسەر ئاستی هەرێمی کوردستان (14 هەزار و 312) حاڵەتی جیابوونەوە تۆمارکراوە، وەک لە (چارتی ژمارە (2)) دا هاتووە بەرزترین رێژەی جیابوونەوە لە پارێزگای هەولێر بووە، بە جۆرێک؛ 1.    لە سنوری پارێزگای هەولێر: (5 هەزار و 857) حاڵەتی جیابوونەوە بە رێژەی (41%) تۆمار کراوە. 2.    لە سنوری پارێزگای سلێمانی: (5 هەزار و 438) حاڵەتی جیابوونەوە بە رێژەی (38%) تۆمار کراوە. 3.    لە سنوری پارێزگای دهۆک: (2 هەزار و 164) حاڵەتی جیابوونەوە بە رێژەی (15%) تۆمار کراوە. 4.    لە سنوری ئیدارەی گەرمیان: (853) حاڵەتی جیابوونەوە بە رێژەی (6%) تۆمار کراوە.       دووەم؛ داتاو ئامارەکانی هاوسەرگیری و هەڵوەشانەوەی خێزان لەسەر ئاستی هەرێمی کوردستان 2014 – 2023 هاوسەرگیری (مارەبڕین) پاڵپشت بە داتاو ئامارەکانی ئەنجومەنی دادوەری هەرێمی کوردستان لە ماوەی (10) ساڵی ڕابردوودا سەرجەم ئەو گرێبەستانەی بەمەبەستی هاوسەرگیری لە دادگاکانی هەرێمی کوردستان بە فەرمی تۆمار کراون ژمارەیان (446 هەزار و 234) گرێبەست بوونەوە بەزترین ئاستی ژمارە مارەبڕین لە ساڵی (2022) تۆمار کراوە کە بریتی بووە لە (55 هەزارو 896) حاڵەت، کەمترین مارەبڕینیش لە ساڵی (2016) تۆمار کراوە کە ژمارەکەی بریتی بووە لە (31 هەزار و 183) حاڵەت. (خشتەی ژمارە (1) و چارتی ژمارە (4)). هاوکات هەر بەپێی داتاکان (پەسەندکردنی مارەبڕینی دەرەکی) کە بریتین لەو مارەبڕینانەی لە دەرەوەی دادگا ئەنجامدراون و دواتر لە دادگاکان تۆمار کراون لە ماوەی ساڵانی (2014 - 2023) ژمارەیان بریتی بووە لە (26 هەزار و 347) حاڵەت بۆ وردەکاری بڕوانە (خشتەی ژمارە (1) و چارتی ژمارە (5)). کەواتە سەرجەم ئەو مارەبڕینانەی لە ناو و دەرەوەی دادگا ئەنجام دراون پێکەوە ژمارەیان (472 هەزار و 581) مارەبڕین بووەو، بە تێکڕای ساڵانە دەکاتە (47 هەزار و 258) حاڵەت و مانگانەش دەبێتە (3 هەزار و 938) حاڵەتی مارە بڕین و بە تێکڕای رۆژانەش (129) حاڵەت دەبێت. وەک لە خشتەی ژمارە (1) رونکراوەتەوە.         جیابوونەوە (تەڵاق) بەپێی داتاکان لە ماوەی (2014 - 2023) ژمارەی هەڵوەشانەوەی خێزان بریتی بووە لە (96 هەزار و 44) حاڵەتی جیابوونەوەو کە  بە تێکڕا؛ ساڵانە (9 هەزار و 604) حاڵەت، مانگانە (822) حاڵەت و هەموو رۆژێک زیاتر لە (26) حاڵەتی تەڵاق تۆمارکراوە. (وەک لە خشتەی ژمارە (1))دا هاتبووە. هەر بەپێ ئامارەکان ساڵی (2023) بەرزترین ڕێژەی جیابوونەوەی تێدا تۆمارکراوە کە ژمارەکەی گەیشتووە بە (14 هەزار و 312) حاڵەت. (چارتی ژمارە(6)). کەواتە هەر بەپێی داتاکان ژمارەی لێکجابوونەوەکان بەراورد بە تۆمارکردنی گرێبەستی هاوسەرگیری لە دادگاکانی هەرێم لە ساڵی (2014) لە رێژەی (18%)ەوە بۆ ساڵی (2023) بەرزبووتەوە بۆ (27%).   ڕێگەپێدان بە هێنانی ژنی دووەم پاڵپشت بە داتاکان لە (10) ساڵی ڕابردوودا (967) حاڵەت؛ بە تێکڕا؛ ساڵانە (97) حاڵەت، مانگانە (8) حاڵەت و هەموو سێ رۆژ جارێک پیاوێک ڕێگەی پێدراوە ژنی دووەم بهێنێت. بەرزترین حاڵەتی ڕێگەدان بە هێنانی ژنی دووەم لە ساڵی (2016) تۆمارکراوە کە (239) حاڵەت و کەمترینیشی لە ساڵی (2017) بووە کە (41) حاڵەتی تێدا تۆمار کراوە. بڕوانە (خشتەی ژمارە (1) و چارتی ژمارە (7))   سێیەم؛ داتاو ئامارەکانی هاوسەرگیری و هەڵوەشانەوەی خێزان لەسەر پارێزگاکانی هەرێم 2014 – 2023 هاوسەرگیری (مارەبڕین) بەپێی داتاکان لە ماوەی (10) ساڵی ڕابردوودا پارێزگای هەولێر (166 هەزار و 875) حاڵەتی مارەبڕین و پارێزگای سلێمانی لە دوای پارێزگای هەولێر دێت و (153 هەزار و 12) حاڵەت و پاشان پارێزگای دهۆک بە (113 هەزار و 112) حاڵەتی تۆمارکراو دێت. لە دوای ئەوانیش بەپێی ئەو داتایانەی ئەنجومەنی دادوەری بڵاوی کردووەتەوە کە ساڵانی (2015 - 2020)ی تێدا نیە (13 هەزار و 235) حاڵەتی مارەبڕین لە ئیدارەی گەرمیان تۆمار کراوە. بۆ وردەکاری (بڕوانە خشتەی ژمارە (2) و چارتی ژمارە (8 - 11)) جیابوونەوە و تەڵاق بەپێی داتاکان لە ماوەی ساڵانی (2014 - 2023) پارێزگای هەولێر (37 هەزار و 859) حاڵەتی تەڵاقی تێدا تۆمار کراوەو پارێزگای سلێمانیش بەرزترین رێژەی تەڵاقی تێدا تۆمارکراوە کە بریتی بووە لە (38 هەزار و 799) حاڵەت و پاشان پارێزگای دهۆک بە (15 هەزار و 405) حاڵەتی تۆمارکراو دێت. لە دوای ئەوانیش بەپێی ئەو داتایانەی ئەنجومەنی دادوەری هەرێم بڵاوی کردووەتەوە کە ساڵانی (2015 - 2020)ی تێدا نیە (3 هەزار و 981) حاڵەتی جیابوونەوەی تێدا تۆمار کراوە. بۆ وردەکاری (بڕوانە خشتەی ژمارە (2) و چارتی ژمارە (8 - 11)). پەسەندکردنی مارەبڕینی دەرەکی لە (10) ساڵی ڕابردوودا پارێزگای هەولێر زۆرترین حاڵەتی مارەبڕینی دەرەکی تێدا تۆمارکراوە کە (10 هەزار و 570) حاڵەتی مارەبڕینی دەرەکی و پارێزگای سلێمانی لە دوای پارێزگای هەولێر دێت و بە (8 هەزار و 76) حاڵەت و پاشان پارێزگای دهۆک بە (7 هەزار و 484) حاڵەتی تۆمارکراو دێت. لە دوای ئەوانیش بەپێی ئەو داتایانەی ئەنجومەنی دادوەری هەرێم بڵاوی کردووەتەوە کە ساڵانی (2015 - 2020)ی تێدا نیە تەنها(217) حاڵەتی مارەبڕینی دەرەکی تێدا تۆمار کراوە. بۆ وردەکاری (بڕوانە خشتەی ژمارە (2) و چارتی ژمارە (8 - 11))             بەپێی ئاماری ئەنجومەنی دادوەری لە هەرێمی كوردستان  هۆكارەكانی جیابوونەوە (تەڵاق) بەمشێوەیەیە: -    نەگونجا لەگەڵ یەكتری: 25% -    جیاوازی تەمەن: 14% -    خیانەتی زەوجی: 13% -    نەبوونی ماڵی جیا: 10% -    مۆبایل و ئینتەرنێت: 10% -    هۆكاری نەزۆكی: 9% -    هۆكاری كۆمەڵایەتی: 9% -    ژنهێنانی دووەم: 4% -    هۆكاری ئابوری:3% -    هۆكاری دیكە: 3% -    هۆكاری ئایینی: 0%  

درەو: 🔹كەمال محەمەد, وەزیری سامانە سروشتیەكانی هەرێم بەوەكالەت, رایگەیاند: حكومەتی هەرێمی كوردستان, هیچ كێشەیەكی نیە لە بەرامبەر دەستپێكردنەوەی هەناردەی نەوتی خاو لەڕێی كۆمپانیای سۆمۆ و, دانانی داهاتەكانی لە خەزێنەی دەوڵەتی عێراق, لە بەرامبەر زامنكردنی پشكی دارایی هەرێمی كوردستان. 🔹وەزیری سامانە سروشتیەكانی هەرێم بەوەكالەت لە لێدوانێكی رۆژنامەوانیدا وتیشی: بڕیارەكەی دەستەی ناوبژیوانی سەربە ژووری بازرگانی نێودەوڵەتی لە پاریس, چواربابەت لەخۆدەگرێت, ئەوانیش: دەرهێنان و ئیدارەی نەوت و گواستنەوەو عەمباركردن و فرۆشتنە, لەچواریاندا دەكرێت بڵێین, لە بەرژەوەندی هەرێمی كوردستانە, تەنها پرسی فرۆشتن نەبێت, كە دەسەڵاتی وەزارەتی نەوتی فیدراڵیەو لەڕێی كۆمپانیای سۆمۆوە هەناردە دەكرێت. 🔹كێشەكە پەیوەستە بە تێچووی دەرهێنانی بەرمیلی نەوت, چونكە جیاوازی هەیە لە نرخی تێچوو لەنێوان هەرێم و بەغداد, عێراق ملیارەها دۆلار خەرج دەكات لەو پرۆسەیە, لەكاتێكدا هەرێم وەبەرهێنانی كردووە لەڕێی كۆمپانیاكانەوە لەو بوارەدا. 🔹لەسەرەتای ئەمساڵەوە, دوو لیژنە پێكهێنراوە لەلایەن سەرۆك وەزیرانی عێراقەوە, یەكێكیان وزاریەو ئەوی تریشیان پەرلەمانیە, بەدواداچونیان بۆ كاری ئەو (11) كۆمپانیا نەوتییە كردووە لە هەرێمی كوردستان كاردەكەن, هەردوو لیژنەكە گەیشتووەنەتە قەناعەت لەبارەی تێچووی دەرهێنانی بەرمیل نەوت. 🔹لەبارەی دەستپێكردنەوەی هەناردەی نەوتی كوردستانیش, وەزیری سامانە سرووشتیەكان رایگەیاند: پرسەكە پەیوەستە بە بەغداد, ئێمە هەموو كاتێك ئامادەین بۆ دەستپێكردنەوەی هەناردەی نەوت.

راپۆرت: دره‌و دوای زیاتر له‌ 8 مانگ تاوتوێكردن و دادبینی، دواجار دادگای فیدراڵی عێراق بڕیاری خۆی له‌باره‌ی یاسای هه‌ڵبژاردنه‌كانی هه‌رێمی كوردستان راگه‌یاند، به‌پێی ده‌قی بڕیاره‌كه‌، بریكاری سه‌رۆك و سه‌رۆك وه‌زیرانی هه‌رێم هه‌وڵیداوه‌ دادگا سكاڵاكه‌ی یه‌كێتیی ره‌تبكاته‌وه‌، له‌ قۆناغێكی تردا دوو كه‌س وه‌كو نوێنه‌ری پێكهاته‌كان هه‌وڵیانداوه‌ دادگا داخڵی ناو دۆسیه‌كه‌یان بكات، بریكاری سه‌رۆكی په‌رله‌مانیش داوای ئه‌وه‌ی كردووه‌ سكاڵاكه‌ دوابخرێت تا ئه‌وكاته‌ی په‌رله‌مانی كوردستان هه‌ڵده‌بژێردرێت، به‌ڵام دادگا هه‌موو گه‌ڵاڵه‌نامه‌و داواكارییه‌ دژه‌كانی ره‌تكردوه‌ته‌وه‌و بڕیاری خۆی ده‌ركردووه‌، بڕیارێك كه‌ تێیدا جگه‌ له‌ گۆڕینی شێوازی هه‌ڵبژاردنی كوردستان بۆ فره‌بازنه‌یی و هه‌ڵوه‌شاندنه‌وه‌ی 11 كورسییه‌كه‌ی "كۆتا"ی پێكهاته‌كان، سه‌یركردنی تانه‌كانی هه‌ڵبژاردنیشی له‌ ده‌سته‌ دادوه‌رییه‌كه‌ی هه‌رێم سه‌ندوه‌ته‌وه‌و به‌خشیویه‌تی به‌ ده‌سته‌ی دادوه‌ریی له‌ عێراق. ورده‌كاری دۆسیه‌كه‌ له‌م راپۆرته‌دا.   یه‌كێتیی له‌ سكاڵاكه‌یدا چی ده‌ڵێ ؟  دادگای باڵای فیدراڵی عێراق ده‌قی بڕیاری رۆژی 21ی شوباتی خۆی له‌باره‌ی یاسای هه‌ڵبژاردنه‌كانی كوردستان بڵاوكرده‌وه‌.  سكاڵاكاری سه‌ره‌كی ئه‌م دۆسیه‌یه‌‌ (زیاد جه‌بار) ئه‌ندامی سه‌ركردایه‌تیی یه‌كێتیی نیشتمانی كوردستانه‌ (ئه‌وكاته‌ی سكاڵاكه‌ی تۆماركرد سه‌رۆكی فراكسیۆنی یه‌كێتیی بوو له‌ په‌رله‌مانی كوردستان)، سه‌رباری ئه‌وه‌ی (ئامانج نه‌جیب شه‌معون) ئه‌ندامی ئه‌نجومه‌نی پارێزگای سلێمانی به‌هه‌مان شێوه‌ له‌سه‌ر مادده‌یه‌كی یاسای هه‌ڵبژاردنی كوردستان سكاڵای تۆماركردووه‌و دادگا سكاڵاكه‌ی له‌گه‌ڵ ئه‌وه‌ی زیاد جه‌بار یه‌كخستوه‌، به‌ڵام زیاتر سكاڵاكه‌ وه‌كو سكاڵای یه‌كێتیی ده‌ناسرێت.  زیاد جه‌بارو ئامانج نه‌جیب شه‌معون سكاڵاكانیان له‌سه‌ر (سه‌رۆكی په‌رله‌مانی كوردستان- سه‌رۆكی هه‌رێم- سه‌رۆك وه‌زیرانی هه‌رێم) تۆماركردووه‌. زیاد جه‌بار له‌ سكاڵاكه‌یدا له‌ڕێگه‌ی بریكاره‌كه‌یه‌وه‌ باسی له‌وه‌كردووه‌، به‌ره‌ی كوردستانی وه‌كو نوێنه‌ری بزوتنه‌وه‌ی رزگاریخوازی گه‌لی كوردستان و ده‌سه‌ڵاتی ئه‌مری واقع، له‌چوارچێوه‌ی هه‌وڵه‌كانیدا بۆ ئاڵوگۆڕی دیموكراتی له‌رێگه‌ی هه‌ڵبژاردنه‌وه‌، یاسای هه‌ڵبژاردنی په‌رله‌مانی كوردستان- عێراق ژماره‌ (1)ی ساڵی 1992ی ده‌ركردووه‌، كه‌ په‌رله‌مانی كوردستان چه‌ندجارێك هه‌مواری كردوه‌ته‌وه‌، له‌ هه‌ندێك له‌ مادده‌كانی یاساكه‌دا پێشێلكاری ده‌ستوریی هه‌یه‌، پێشێلكارییه‌كانیش ئه‌مانه‌ن:  •    مادده‌ی (یه‌كه‌م) له‌ به‌شی یه‌كه‌می یاساكه‌ ده‌ڵێ:" په‌رله‌مانی كوردستانی عێراق له‌ 111 كورسی پێكدێت"، لێره‌دا تێبینی ئه‌وه‌ ده‌كرێت یاسادانه‌ر پشتی به‌ هیچ پێوه‌رێكی یاسایی نه‌به‌ستووه‌ له‌ دیاریكردنی ژماره‌ی كورسییه‌كاندا، وه‌كو ئه‌وه‌ی له‌ ده‌ستوری عێراقدا له‌ مادده‌ی (49/یه‌كه‌م)دا هاتووه‌، به‌وه‌ی كه‌ (ئه‌نجومه‌نی نوێنه‌ران له‌ ژماره‌یه‌ك ئه‌ندام پێكدێت به‌رێژه‌ی یه‌ك كورسی بۆ هه‌ر سه‌د هه‌زار كه‌سێك له‌ ژماره‌ی دانیشتوانی عێراق، كه‌ له‌رێگه‌ی ده‌نگدانی گشتی راسته‌وخۆی نهێنییه‌وه‌ هه‌ڵده‌بژێردرێن و نوێنه‌رایه‌تیی سه‌رجه‌م پیكهاته‌كانی گه‌لی تێدا له‌به‌رچاوده‌گیرێت)، ده‌ستوری عێراق پشتی به‌ پێوه‌ری دانیشتوان  به‌ستووه‌ له‌ دیاریكردنی كورسییه‌كانی په‌رله‌ماندا، به‌جۆرێك گونجاو بێت له‌گه‌ڵ پێوه‌ره‌ كارپێكراوه‌ نێوده‌وڵه‌تییه‌كان، به‌ڵام په‌رله‌مانی كوردستان پشتبه‌ستنی به‌م بنه‌مایه‌ پشتگوێ خستوه‌. ئه‌گه‌ر به‌گوێره‌ی مادده‌ی (49/ یه‌كه‌م)ی ده‌ستوری عێراق ژماره‌ی كورسییه‌كانی په‌رله‌مانی كوردستان ئه‌ژماربكرێت، ئه‌وا به‌ تێكڕا ده‌بێت به‌ (44) كورسی به‌مشێوه‌یه‌: 18 كورسی بۆ پارێزگای سلێمانی، 15 كورسی بۆ پارێزگای هه‌ولێر، 11 كورسی بۆ پارێزگای دهۆك، به‌ڵام ئه‌گه‌ر مادده‌ی (یه‌كه‌م)ی یاسای هه‌ڵبژاردنی په‌رله‌مانی كوردستان جێبه‌جێ بكرێت ژماره‌ی كورسییه‌كان ده‌بێت به‌ (111) كورسی به‌مشێوه‌یه‌: 45 كورسی بۆ پارێزگای سلێمانی، 39 كورسی بۆ پارێزگای هه‌ولێر، 11 كورسی بۆ پارێزگای دهۆك، لێره‌دا تێبینی ئه‌وه‌ ده‌كرێت كه‌ هیچ پێوه‌رێكی بابه‌تی نییه‌ بۆ ئه‌م نایه‌كسانی و زیادبوونه‌ی     ژماره‌ی كورسییه‌كان و، سه‌رپێچییه‌كی روونی مادده‌ی (49/ یه‌كه‌م)ی ده‌ستوره‌، ده‌بوو یاسادانه‌ر له‌ په‌رله‌مانی كوردستان پشت به‌و پێوه‌رانه‌ ببه‌ستێت كه‌ له‌ ده‌ستوری ساڵی 2005ی كۆماری عێراقدا هاتووه‌ یان له‌ ده‌ركردن و هه‌مواركردنی یاسای هه‌ڵبژاردنه‌كاندا پشت به‌ پێوه‌ره‌ نێوده‌وڵه‌تییه‌كان ببه‌ستێت بۆ دیاریكردنی ژماره‌ی كورسییه‌كان، به‌تایبه‌تیش كه‌ هه‌رێمی كوردستان ده‌ستوری نییه‌.  •    مادده‌ی (9) له‌ به‌شی دووه‌می یاسای هه‌ڵبژاردنی په‌رله‌مانی كوردستان ده‌ڵێ (هه‌رێمی كوردستانی عێراق به‌ یه‌ك ناوچه‌ی هه‌ڵبژاردن داده‌نرێت...)، به‌وپێیه‌ش ده‌ره‌نجامه‌كانی هه‌ڵبژاردنی په‌رله‌مانی كوردستان له‌ ساڵی 2018دا ئه‌نجامی نادادپه‌روه‌رانه‌ی بۆ پشكی پارێزگاكانی هه‌رێم لێكه‌وته‌وه، پارێزگای سلێمانی له‌ بری (45) كورسی پشكی خۆی (37) كورسی به‌ركه‌وت به‌گوێره‌ی ئاماره‌كانی وه‌زاره‌تی پلاندانانی فیدراڵ، پارێزگای هه‌ولێر (44) كورسی برد له‌بری پشكی خۆی كه‌ (39) كورسی بوو، پارێزگای دهۆكیش (30) كورسی برد له‌بری پشكی خۆی كه‌ (27) كورسی بوو، ئه‌مه‌ پێچه‌وانه‌ی مادده‌كانی (16و 20)ی ده‌ستوره‌ كه‌ جه‌خت له‌سه‌ر بنه‌مای ده‌رفه‌تی یه‌كسان بۆ سه‌رجه‌م عێراقییه‌كان و مافی به‌شداریكردنیان له‌ كاروباری گشتیی و مافه‌ سیاسییه‌كانیان ده‌كات له‌وانه‌ مافی ده‌نگدان و هه‌ڵبژاردن و خۆكاندیدكردن. •    له‌ مادده‌ی (15)ی یاسای هه‌ڵبژاردنی په‌رله‌مانی كوردستاندا هاتووه‌ (بۆ هەرێمی كوردستان، تۆماری دەنگدەران بۆ دەنگدان، بەپێی مەركەزەكانی هەڵبژاردن ئامادە دەكرێن‌و بە ریزبەندی پیتە ئەبجەدییەكان رێكدەخرێن كە پیشەو ناونیشان‌و بەروارو جێگەی لەدایكبوونیان تێدا تۆماركراوە. ئەگەر لەتوانادا نەبوو ئەوە بكرێ، ئەوكاتە دەستەی باڵا بۆی هەیە رێگەیەكی تری لەبارتر بۆ وەدیهێنانی مەبەستی پێویست دیاری بكات)، یاسادانه‌ر لێره‌دا پشتی به‌و تۆماره‌ فه‌رمییانه‌ نه‌به‌ستووه‌ كه‌ له‌لایه‌ن وه‌زاره‌تی بازرگانی یاخود پلاندانانه‌وه‌ ده‌رچوون، به‌وپێیه‌ی تاكه‌ لایه‌نن كه‌ تۆماری وردی هه‌موو دانیشوانی عێراقیان هه‌یه‌ له‌ سه‌رجه‌م پارێزگاكان، به‌مه‌ش تۆماری ده‌نگده‌ران ورد نییه‌و تۆماری فه‌رمی پشتپێبه‌ستراوی نییه‌، ئه‌مه‌ پێچه‌وانه‌ی ده‌قی مادده‌ی (20)ی ده‌ستوره‌، چونكه‌ ئه‌و هاوڵاتییه‌ی كه‌ ناوی له‌ تۆماری ده‌نگده‌راندا نه‌هاتووه‌ بێبه‌ش ده‌كات له‌ مافی هه‌ڵبژاردن، ئه‌مه‌ش به‌هۆكاری ئه‌وه‌یه‌ كه‌ تۆماری ده‌نگده‌ران ورد نییه‌.  •    له‌ مادده‌ی (36)ی یاسای هه‌ڵبژاردنی په‌رله‌مانی كوردستاندا هاتووه (یه‌كه‌م: پێنج كورسی بۆ كلدان ‌و سریان‌و ئاشوری تەرخان دەكرێ پاڵێوراوانی ئەو پێكهاتەیە كێبركێی لەسەر دەكەن، دووه‌م پێنج كورسی بۆ توركمان تەرخان دەكرێت، پاڵێوراوانی ئەو پێكهاتەیە كێبركێی لەسەر دەكەن، سێیه‌م: یەك كورسی بۆ ئەرمەن تەرخان دەكرێت، پاڵێوراوانی ئەو پێكهاتەیە كێبركێی لەسەر دەكەن)، ئه‌مه‌ پێچه‌وانه‌ی مادده‌ی (16)ی ده‌ستوره‌ كه‌ جه‌خت له‌سه‌ر ده‌رفه‌تی یه‌كسان ده‌كاته‌وه‌ بۆ سه‌رجه‌م عێراقییه‌كان، به‌هۆی ئه‌وه‌ی تۆماری فه‌رمی ورد له‌به‌رده‌ستدا نییه‌ كه‌ پشتی پێببه‌سترێت، یاسادانه‌ر له‌ دیاریكردنی كۆتای پێكهاته‌كاندا ورد نه‌بووه‌، یه‌كێك له‌ لێكه‌وته‌كانی كه‌ له‌گه‌ڵ بنه‌مای ده‌رفه‌تی یه‌كساندا نایه‌ته‌وه ئه‌وه‌یه‌،‌ پێكهاته‌ی مه‌سیحی و توركمان له‌ پارێزگای سلیمانی له‌ هه‌موو خوله‌كانی هه‌ڵبژاردندا له‌  كوردستان نوێنه‌رایه‌تییان نه‌بووه‌، ده‌بوو یاسادانه‌ر له‌ دابه‌شكردنی كۆتا به‌سه‌ر پارێزگاكاندا، هه‌مان ئه‌و بنه‌مایانه‌ په‌یڕه‌و بكات كه‌ ئه‌وانه‌ په‌یڕه‌ویان كردووه‌ كه‌ ده‌ستوریان  نوسیوه‌ته‌وه‌ . •    له‌مادده‌ی (22)ی یاسای هه‌ڵبژاردنی كوردستاندا له‌ (بڕگه‌ی یه‌كه‌م)دا هاتووه‌: ((هەر كیانێكی سیاسی لە هەرێمی كوردستان- عێراقدا بۆی هەیە لیستێكی تایبەت بەناوی پاڵیوراوەكانی خۆی لەسەر ئاستی هەرێمی كوردستان- عێراق پێشكه‌ش بكات كە رێژەیەك ئافرەتی تێدا بێت كە لە (30%) كەمتر نەبێت‌و، ناوی پاڵێوراوەكانیش بەشێوەیەك ریزبەندكرابن كە نواندی رێژەی ناوبراوی ئافرەتان لە پەرلەمان زامن بكات، بەمەرجێ ژمارەی پاڵێوراوەكان لە هەر لیستێكی هەڵبژاردندا لە (3) پاڵێوراو كەمتر نەبن))، ئه‌مه‌ رێگری له‌ خۆكاندیدكردنی تاكه‌كه‌سیی (فردی) ده‌كات له‌وانه‌ خۆكاندیدكردنی سه‌ربه‌خۆكان بۆ په‌رله‌مانی كوردستان، پێچه‌وانه‌ی مادده‌ی (20)ی ده‌ستورو بڕیاره‌كانی دادگای باڵای فیدراڵییه‌ به‌ ژماره‌ (12/ فیدراڵی/2010)و (36/ فیدراڵی/ 2013)و (18/ فیدراڵی 2021). •    هه‌موو ئه‌و هه‌موارانه‌ی كه‌ له‌ یاسای هه‌ڵبژاردنی كوردستاندا كراون له‌و كاتانه‌دا بووه‌ كه‌ ته‌مه‌نی په‌رله‌مانی كوردستان درێژكراوه‌ته‌وه‌، ئه‌مه‌ش سیفه‌تێكی ناده‌ستوریبوون به‌ هه‌مواره‌كان ده‌دات، له‌به‌ر رۆشنایی بڕیاری دادگای باڵای فیدراڵی عێراقدا بۆ هه‌ڵوه‌شاندنه‌وه‌ی درێژكردنه‌وه‌ی ته‌مه‌نی په‌رله‌مانی كوردستان له‌ ساڵی 2022دا.  له‌سه‌ر بنه‌مای ئه‌م روونكردنه‌وانه‌، نوێنه‌ره‌كه‌ی یه‌كێتیی داوای له‌ دادگای باڵای فیدراڵی عێراق كردووه‌ مادده‌كانی (1-9-15-22-36)ی یاسای هه‌مواركراوی هه‌ڵبژاردنی په‌رله‌مانی كوردستان هه‌ڵبوه‌شێنێته‌وه‌.  بریكاری سه‌رۆكی هه‌رێم چی ده‌ڵێ ؟  له‌سه‌ر بنه‌مای سكاڵاكه‌ی یه‌كێتیی (زیاد جه‌بار)، دادگای باڵای فیدراڵی عێراق ده‌رگای دادبینی كردوه‌ته‌وه‌و هه‌ریه‌كه‌ له‌ سه‌رۆكی په‌رله‌مانی كوردستان و سه‌رۆكی هه‌رێم و سه‌رۆك وه‌زیرانی هه‌رێمی له‌ سكاڵاكه‌ ئاگاداركردووه‌، به‌ڵام ته‌نیا سه‌رۆكی هه‌رێم پارێزه‌ره‌كه‌ی خۆی (ئه‌یاد ئیسماعیل) ناردووه‌ بۆ دادگا، پارێزه‌ره‌كه‌ی نێچیرڤان بارزانی سه‌رۆكی هه‌رێم داوای له‌ دادگا كردووه‌ سكاڵاكه‌ی زیاد جه‌بار ره‌تبكاته‌وه‌، ئه‌مه‌ش له‌ گه‌ڵاڵه‌نامه‌یه‌كدا خستوه‌ته‌ڕوو كه‌ رۆژی 11/6/2023 پێشكه‌شی كردووه‌و تێیدا ده‌ڵێ (سكاڵاكار به‌شێوه‌یه‌كی كه‌سیی سكاڵاكه‌ی به‌رزكردوه‌ته‌وه‌و نوێنه‌رایه‌تی هیچ لایه‌نێكی فه‌رمی ناكات و مه‌رج و پێوه‌ره‌ یاساییه‌كانی تێدا نییه‌- كه‌ له‌مادده‌ی چواری یاسای دادگاو مادده‌ی 20ی په‌یڕه‌وی ناوخۆی دادگاو مادده‌ی 6ی یاسای دادبینییه‌ مه‌ده‌نییه‌كاندا هاتووه‌ سه‌باره‌ت به‌و به‌رژه‌وه‌ندییه‌ی كه‌ وا ده‌كات ببێت به‌ سكاڵاكار له‌به‌رامبه‌ر سه‌رجه‌م سكاڵالێكراوه‌كاندا- به‌ سه‌رۆكی هه‌رێمیشه‌وه‌ كه‌ من بریكاری ئه‌وم). بریكاره‌كه‌ی سه‌رۆكی هه‌رێم پشتبه‌ست به‌ مادده‌ی (20/ سێیه‌م)ی په‌یڕه‌وی ناوخۆی دادگای فیدراڵی كه‌ ده‌ڵێ (نابێت سكاڵاكار سودی له‌و ده‌قه‌ وه‌رگرتبێت كه‌ سكاڵای لێكردووه‌)، باسله‌وه‌ ده‌كات سكاڵاكار (زیاد جه‌بار) سه‌رۆكی فراكسیۆنی یه‌كێتییه‌ له‌ په‌رله‌مانی كوردستان و خۆی به‌شێوه‌ی كه‌سیی سودمه‌ند بووه‌ له‌و ده‌قه‌ یاساییانه‌ی كه‌ سكاڵای له‌سه‌ر كردوون، چونكه‌ كورسی خولی پێنجه‌می په‌رله‌مانی كوردستان به‌ده‌ستهێناوه‌‌و لیستی حزبه‌كه‌شی (یه‌كێتیی) سودمه‌ند بووه‌و (21) كورسی ئه‌و خوله‌ی بردووه‌. پارێزه‌ری سه‌رۆكی هه‌رێم په‌نای بۆ به‌ڵگه‌یه‌كی تر بردووه‌ بۆ رێگریكردن له‌ هه‌ڵوه‌شاندنه‌وه‌ی ئه‌و ماددانه‌ی یاسای هه‌ڵبژاردن كه‌ زیاد جه‌بار سكاڵای له‌سه‌ر تۆماركردون، ئاماژه‌ به‌وه‌ ده‌كات به‌گوێره‌ی حوكمه‌كانی مادده‌ی (141)ی ده‌ستور (كاركردن به‌و یاسایانه‌ به‌رده‌وام ده‌بێت كه‌ له‌ ساڵی 1992وه‌ له‌ هه‌رێمی كوردستان ده‌رچوون، هه‌روه‌ها ئه‌و بڕیارانه‌ به‌ركارن كه‌ حكومه‌تی هه‌رێم ده‌ریكردون به‌ بڕیاره‌كانی دادگاو گرێبه‌سته‌كانیشه‌وه‌، ئه‌گه‌ر به‌گوێره‌ی یاساكانی هه‌رێمی كوردستان هه‌موار نه‌كرابن یاخود هه‌ڵنه‌وه‌شێندرابنه‌وه‌و پێچه‌وانه‌ی ده‌ستور نه‌بن)، زیادكردنی‌ ئه‌و مادده‌یه‌ بۆ یاسای هه‌ڵبژاردنی كوردستان كه‌ تانه‌ی لێدراوه، به‌ر له‌وه‌ بووه‌ ده‌ستوری عێراق بكه‌وێته‌ بواری جێبه‌جێكردنه‌وه‌، بۆیه‌ له‌ڕووی ده‌ستورییه‌وه‌ نابێت تانه‌ی لێبدرێت، هه‌روه‌ها له‌ ده‌ستوری عێراقدا ده‌قێك نییه‌ كه‌ ژماره‌ی كورسییه‌كان بۆ هه‌رێمی كوردستان دیاری بكات و ئه‌وه‌ی هه‌یه‌ تایبه‌ته‌ به‌ حكومه‌تی فیدراڵییه‌وه‌و بابه‌تی دابه‌شكردنی كورسییه‌كان به‌گوێره‌ی ژماره‌ی ده‌نگده‌راندا بابه‌تێكی رێگه‌پێدراوه‌ به‌ڵام پابه‌ندكه‌ر نییه‌. پارێزه‌ره‌كه‌ی سه‌رۆكی هه‌رێم ده‌ڵێ: بۆچوونی سكاڵاكار ئه‌وه‌یه‌ ژماره‌ی كورسییه‌كانی په‌رله‌مانی كوردستان (54 بۆ 55) كورسی بێت، له‌كاتێكدا به‌گوێره‌ی مادده‌ی (یه‌كه‌م)ی یاسای هه‌ڵبژاردن (111) كورسییه‌و هه‌ر كاتێك ژماره‌ی كورسییه‌كان زیاتر بێت ئاستی نوێنه‌رایه‌تی گشتگیرترو وردترو به‌رهه‌مدارتر ده‌بێت و نزیكتر ده‌بێت له‌ ده‌نگده‌رانه‌وه‌، به‌و مه‌رجه‌ی زیادبوونی كورسییه‌كان گونجاو بێت و زیاده‌ڕۆیی تێدا نه‌كرابێت، بۆیه‌ لێره‌دا دژبه‌یه‌كی له‌ بۆچونی سكاڵاكاردا ده‌رده‌كه‌وێت سه‌باره‌ت به‌ مادده‌ی (یه‌كه‌م)ی یاسای هه‌ڵبژاردن و هیچ په‌یوه‌ندییه‌كی به‌ مادده‌ی (9) نییه‌ كه‌ سكاڵای له‌سه‌ر كراوه‌، هه‌روه‌ها بنه‌مای ره‌خساندنی ده‌رفه‌تی یه‌كسان هه‌رگیز په‌یوه‌ندی به‌وه‌وه‌ نییه‌ سیسته‌می هه‌ڵبژاردن یه‌ك بازنه‌ یان فره‌ بازنه‌ بێت. له‌باره‌ی مادده‌ی (15)ی یاسای هه‌ڵبژاردنیش، بریكاری سه‌رۆكی هه‌رێم ئاماژه‌ی به‌وه‌كردووه‌، ئه‌و مادده‌یه‌ كه‌ په‌یوه‌ندی به‌ ئاماده‌كردنی تۆماری ده‌نگده‌رانه‌وه‌ هه‌یه‌، به‌ده‌رچوونی یاسای كۆمسیۆنی هه‌ڵبژاردن و راپرسی هه‌رێمی كوردستان ژماره‌ (4)ی ساڵی 2014 هه‌ڵوه‌شاوه‌ته‌وه‌و مادده‌ی شه‌شه‌م (یه‌كه‌م/ ا)ی ئه‌و یاسایه‌ ده‌ڵێ: دروستكردن و نوێكردنه‌وه‌و پێداچوونه‌وه‌ به‌ تۆماری ده‌نگده‌ران له‌رێگه‌ی ئامرازه‌ نوێیه‌كانه‌وه‌ له‌ ده‌سه‌ڵاتی ئه‌نجومه‌نی كۆمسیاراندایه‌. پارێزه‌ره‌كه‌ باسی له‌وه‌كردووه‌، مادده‌ی (15) كه‌ تانه‌ی لێدراوه‌ پشتبه‌ست به‌ مادده‌ی (بیسته‌م)ی یاسای كۆمسیۆن به‌ هه‌ڵوه‌شاوه‌ ئه‌ژمارده‌كرێت، هه‌روه‌ها تانه‌دان له‌ مادده‌ی (36)ی یاسای هه‌ڵبژاردن دروست نییه‌، به‌وپێیه‌ی ده‌ڵێ ده‌بێت گره‌نتی پشكی پێكهاته‌كانی هه‌رێمی كوردستان بكرێت به‌ (11) كورسی له‌كۆی (111) كورسی، كه‌ رۆڵه‌كانی ئه‌و پێكهاتانه‌ كێبركێی له‌سه‌ر بكه‌ن، مادده‌كه‌ باسی له‌ دابه‌شكردنی جوگرافی نه‌كردووه‌و وه‌كو ئه‌وه‌ی سكاڵاكار ده‌ڵێ مه‌سیحی و توركمانه‌كان له‌ پارێزگای سلێمانی نوێنه‌رایه‌تییان نییه‌، ئه‌مه‌ به‌هۆی ئه‌وه‌ی هه‌رێمی كوردستان یه‌ك بازنه‌یه و ده‌نگی كاندیدی هه‌ر پێكهاته‌یه‌ك ئه‌ژمارده‌كرێت و ئه‌و كه‌سه‌ی زۆرترینی هێنا ئه‌وه‌ سه‌رده‌كه‌وێت بۆ په‌رله‌مان‌. له‌باره‌ی مادده‌ی (22)ی یاسای هه‌ڵبژاردن كه‌ یه‌كێتیی سكاڵای له‌سه‌ر كردووه‌، پارێزه‌ره‌كه‌ی سه‌رۆكی هه‌رێم وتویه‌تی: ئه‌م مادده‌یه‌ رێگری له‌وه‌ ناكات خه‌ڵك به‌شێوه‌ی فه‌ردی خۆیان كاندید بكه‌ن یاخود سه‌ربه‌خۆكان كاندید بن، به‌ڵكو یاساكه‌ ئه‌وه‌ی چه‌سپاندووه‌ هه‌موو كاندیدێكی سه‌ربه‌خۆ كه‌ ده‌یه‌وێت به‌شداری هه‌ڵبژاردن بكات ده‌بێت قه‌واره‌یه‌كی سیاسی بێت و‌ لانی كه‌م له‌ سێ كه‌س كه‌متر نه‌بێت و یه‌كێكیان ژن بێت له‌پێناو گره‌نتیكردنی نوێنه‌رایه‌تی "كۆتا"ی ژنان، ئه‌مه‌ش جێبه‌جێكردنێكی دروستی ده‌ستوره‌. نوێنه‌ری په‌رله‌مان داوای دواخستنی كردووه‌ ! دوای وه‌رگرتنی بۆچوونی پارێزه‌ری سه‌رۆكی هه‌رێمی كوردستان، دادگای فیدراڵی هه‌ردوو سكاڵاكه‌ی له‌سه‌ر یاسای هه‌ڵبژاردنه‌كانی كوردستان (سكاڵاكه‌ی زیاد جه‌بارو سكاڵاكه‌ی ئامانج نه‌جیب شه‌معون)ی یه‌كخستووه‌، به‌ڵام سكاڵاكه‌ی زیاد جه‌باری كردووه‌ به‌ بنه‌ما.  دواتر فه‌رمانبه‌ری یاسایی (شه‌رمین خزر به‌هجه‌ت) به‌ڕێوه‌به‌ری كاروباری یاسایی له‌ په‌رله‌مانی كوردستان وه‌كو بریكاری سه‌رۆكی په‌رله‌مان چوه‌ته‌ به‌رده‌م دادگاو له‌سه‌ر داوای دادگا كۆپییه‌كی په‌یڕه‌وی ناوخۆی په‌رله‌مانی كوردستانی خستوه‌ته‌ڕوو، دادگا په‌یڕه‌وه‌كه‌ی خستوه‌ته‌ ناو په‌ڕاوی سكاڵاكه‌و هاوكات بریكاربوونی فه‌رمانبه‌ره‌ یاساییه‌كه‌شی قبوڵكردووه‌، بریكاره‌كه‌ی سه‌رۆكی په‌رله‌مان داوای كردووه‌ سكاڵاكه‌ دوابخرێت بۆ ئه‌وكاته‌ی په‌رله‌مانی كوردستان هه‌ڵده‌بژێردرێت (چونكه‌ له‌و كاته‌دا به‌ بڕیاری دادگای فیدراڵی درێژكردنه‌وه‌ی ته‌مه‌نی په‌رله‌مان هه‌ڵوه‌شێندرابووه‌و په‌رله‌مان له‌كاركه‌وتبوو)، دادگا ئه‌م داواكارییه‌ی بریكاره‌كه‌ی سه‌رۆكی په‌رله‌مانی ره‌تكردوه‌ته‌وه، به‌وپێیه‌ی داواكارییه‌كه‌ی هیچ پاڵپشتییه‌كی یاسایی نه‌بووه‌و یه‌كلاكردنه‌وه‌ی سكاڵاكه‌ له‌سه‌ر هه‌ڵبژاردن و پێكهێنانه‌وه‌ی په‌رله‌مانی كوردستان راناوه‌ستێت‌، سه‌رباری ئه‌مه‌ بریكاره‌كه‌ی سه‌رۆكی په‌رله‌مان له‌ رۆژی 6/8/2023دا گه‌ڵاڵه‌نامه‌یه‌كی پێشكه‌شكردووه‌و داوای ره‌تكردنه‌وه‌ی سكاڵاكه‌ی یه‌كێتیی كردووه‌، بۆ ئه‌مه‌ش هه‌مان ئه‌و هۆكارانه‌ی خستوه‌ته‌ڕوو كه‌ بریكاره‌كه‌ی سه‌رۆكی هه‌رێم پێشكه‌شی كردووه‌، دادگا گه‌ڵاڵه‌نامه‌كه‌ی ئه‌میشی هاوپێچی دۆسیه‌ی سكاڵاكه‌ كردووه‌.  پاشان بریكاری مه‌سرور بارزانی سه‌رۆك وه‌زیرانی هه‌رێم كه‌ هه‌مان بریكاری نێچیرڤانی بارزانی سه‌رۆكی هه‌رێمه‌، واتا پارێزه‌ر(ئه‌یاد ئیسماعیل)، گه‌ڵاڵه‌نامه‌یه‌كی پێشكه‌ش كردووه‌، گه‌ڵاڵه‌نامه‌كه‌ی هیچ جیاوازییه‌كی له‌گه‌ڵ گه‌ڵاڵه‌نامه‌كه‌ی سه‌رۆكی هه‌رێم و سه‌رۆكی په‌رله‌ماندا نه‌بووه‌، بۆیه‌ دادگای ئه‌م گه‌ڵاڵه‌نامه‌یه‌شی له‌ دۆسیه‌ی سكاڵاكه‌ هاوپێچ كردووه‌.  هێنانه‌ ناوه‌وه‌ی كۆمسیۆنی هه‌ڵبژاردن دوای وه‌رگرتنی گه‌ڵاڵه‌نامه‌ی سكاڵالێكراوان (سه‌رۆكی په‌رله‌مانی كوردستان- سه‌رۆكی هه‌رێم- سه‌رۆكی حكومه‌تی هه‌رێم)، دادگا بڕیاریداوه‌ كه‌سی سێیه‌م بهێنێته‌ ناو دۆسیه‌كه‌وه‌ كه‌ كۆمسیۆنی باڵای سه‌ربه‌خۆی هه‌ڵبژاردنه‌كانی عێراقه‌، ئه‌مه‌ به‌مه‌به‌ستی وه‌رگرتنی روونكردنه‌وه‌ له‌باره‌ی ئه‌وه‌ی ئایا كۆمسیۆن له‌كاتی سازدانی هه‌ڵبژاردنی په‌رله‌مانی كوردستاندا پشت به‌ كام تۆماری ده‌نگده‌ران ده‌به‌ستێت ؟ ئایا پشت به‌ تۆماری په‌رله‌مانی عێراق ده‌به‌ستێت یاخود پشت به‌ رێوشوێنی تر ده‌به‌ستێت بۆ ئاماده‌كردنی تۆماری ده‌نگده‌ران؟ ئایا ئه‌و رێگایانه‌ چین كه‌ كۆمسیۆن پشتی پێده‌به‌ستێت بۆ دابه‌شكردنی هه‌رێمی كوردستان به‌سه‌ر چه‌ند بازنه‌یه‌كی هه‌ڵبژاردندا ؟ ئایا كورسییه‌كانی په‌رله‌مان چۆن دابه‌ش ده‌كات به‌سه‌ر بازنه‌كانی هه‌ڵبژاردندا ؟ ئه‌و میكانیزمانه‌ چین كه‌ ده‌یانگرێته‌به‌ر بۆ گره‌نتیكردنی كۆتای (30%)ی ژنان له‌ په‌رله‌مانی كوردستان ئه‌گه‌ر هاتوو پشت به‌سترا به‌ كاندیدی تاكه‌كه‌سی "فردی" ؟ كۆمسیۆنی هه‌ڵبژاردنه‌كانی عێراق رونكردنه‌وه‌ی به‌ دادگای فیدراڵی داوه‌ سه‌باره‌ت به‌وه‌ی، بنه‌ڕه‌تی مادده‌ی (9)ی یاسای هه‌ڵبژاردنی كوردستان به‌وشێوه‌یه‌یه‌ كه‌ هه‌رێمی كوردستان دابه‌شبكرێت به‌سه‌ر ژماره‌یه‌ك ناوچه‌ی هه‌ڵبژاردندا به‌و مه‌رجه‌ی له‌ چوار ناوچه‌ كه‌متر نه‌بێت، به‌ڵام ئه‌م مادده‌یه‌ به‌گوێره‌ی مادده‌ی چواری هه‌مواری یاسای هه‌ڵبژاردن له‌ 2004دا هه‌ڵوه‌شێندراوه‌ته‌وه‌و هه‌رێمی كوردستان كراوه‌ به‌ یه‌ك ناوچه‌ی هه‌ڵبژاردن. له‌باره‌ی ئه‌وه‌ی ئایا ئه‌گه‌ر ئه‌م هه‌موار هه‌ڵوه‌شێندرایه‌وه‌و هه‌رێمی كوردستان له‌ یه‌ك بازنه‌ی هه‌ڵبژاردنه‌وه‌ كرا به‌ چوار بازنه‌ی هه‌ڵبژاردن كۆمسیۆن چی ده‌كات؟ نوێنه‌ری كۆمسیۆن كه‌ ناوی (ئه‌حمه‌د حه‌سه‌ن عه‌بد) بووه‌ به‌ دادگای راگه‌یاندووه‌، كۆمسیۆن پشت به‌ تۆماری بایۆمه‌تری ده‌نگده‌رانی فیدراڵ ده‌به‌ستێت (واتا تۆماره‌كه‌ی عێراق نه‌ك هه‌رێمی كوردستان)، سه‌باره‌ت به‌ چۆنیه‌تی دابه‌شكردنی كورسییه‌كانیش به‌سه‌ر بازنه‌كانی هه‌ڵبژاردندا، نوێنه‌ره‌كه‌ی كۆمسیۆن ئاماژه‌ی به‌وه‌كردووه‌ ئه‌گه‌ر په‌نا بۆ یاسای هه‌ڵبژاردنه‌كانی ئه‌نجومه‌نی نوێنه‌رانی عێراق ژماره‌ (12)ی ساڵی 2018ی هه‌مواركراو له‌ 2018دا ببرێت، ئه‌وا تێكڕای كورسی پارێزگاكانی هه‌رێم (44) كورسی ده‌بێت كه‌ 18 كورسی بۆ پارێزگای سلێمانی ده‌بێت و هه‌ولێر 15 كورسی و دهۆكیش 11 كورسی به‌رده‌كه‌وێت، به‌ڵام ئه‌گه‌ر یاسای په‌رله‌مانی كوردستان له‌به‌رچاوبگیرێت، ئه‌وا تێكڕای ژماره‌ی كورسییه‌كان (111) كورسییه‌و سلێمانی (41) كورسی و هه‌ولێر (34) كورسی و دهۆك (25) كورسی به‌رده‌كه‌وێت، ئه‌مه‌ له‌حاڵێكدا ئه‌گه‌ر هه‌رێم بكرێت به‌ سێ بازنه‌ی هه‌ڵبژاردن. سه‌باره‌ت به‌ مادده‌ی (36)ی یاسای هه‌ڵبژاردن، نوێنه‌ری كۆمسیۆن وتویه‌تی: ئه‌م مادده‌یه‌ كورسی كۆتای پێكهاته‌كانی دابه‌ش نه‌كردووه‌ به‌سه‌ر پارێزگاكانداو هه‌رێمی كوردستانی به‌ یه‌ك بازنه‌ داناوه‌، بۆیه‌ ئه‌گه‌ر هه‌رێمی كوردستان دابه‌شبكرێت به‌سه‌ر سێ بازنه‌دا، ئه‌وا (11) كورسی كۆتای پێكهاته‌كان به‌مشێوه‌یه‌ به‌سه‌ر بازنه‌كاندا دابه‌شده‌بن، (4) كورسی بۆ سلێمانی، (4) كورسی بۆ هه‌ولێرو (3) كورسی بۆ دهۆك، واتا سلێمانی دوو كورسی مه‌سیحی و دوو كورسی توركمانی به‌رده‌كه‌وێت، هه‌ولێریش به‌ هه‌مان شێوه‌، دهۆكیش یه‌ك كورسی مه‌سیحی و یه‌ك كورسی  توركمان و یه‌ك كورسی ئه‌رمه‌ن. سه‌باره‌ت به‌ چۆنیه‌تی گره‌نتیكردنی رێژه‌ی 30%ی ژنان له‌ په‌رله‌مانی كوردستان، نوێنه‌ری كۆمسیۆنی هه‌ڵبژاردن وا وه‌ڵامی دادگای داوه‌ته‌وه‌ كه‌ مادده‌ی 22ی یاسای هه‌ڵبژاردنی په‌رله‌مانی كوردستان واجبی كردووه‌ كه‌ قه‌واره‌ سیاسییه‌كان له‌ناو لیستی كاندیده‌كانیاندا 30%ی ژنان دابنێن و ناوی كاندیده‌كانیش به‌وشێوه‌یه‌ رێزبه‌ند ده‌كرێن كه‌ گره‌نتی نوێنه‌رایه‌تی ژنان له‌ په‌رله‌مان بكات هه‌روه‌ها كۆمسیۆن كه‌ رێنمایی بۆ هه‌ڵبژاردنی كوردستان ده‌رده‌كات واده‌كات لایه‌نه‌كان پابه‌ند بن به‌وه‌ی له‌كۆی هه‌ر سێ كاندیدێك یه‌كێكیان ژن دابنێن، ره‌تیكردوه‌ته‌وه‌ پرسی كاندیدی فه‌ردی هیچ په‌یوه‌ندییه‌كی به‌ بابه‌تی كۆتای ژنانه‌وه‌ هه‌بێت. له‌ كۆتایی رونكردنه‌وه‌كانیدا، نوێنه‌ری كۆمسیۆنی هه‌ڵبژاردنه‌كانی عێراق پرسی به‌ چوار بازنه‌كردنی هه‌ڵبژاردنی كوردستانی وروژاندووه‌، ئه‌مه‌ش له‌رێگه‌ی باسكردن له‌ پارێزگای هه‌ڵه‌بجه‌ وه‌كو پارێزگایه‌كی نوێ له‌ هه‌رێمی كوردستان، نوێنه‌ره‌كه‌ ئاماژه‌ی به‌وه‌كردووه‌ له‌ هه‌ڵبژاردنی 10ی ئۆكتۆبه‌ری 2021ی په‌رله‌مانی عێراقدا هه‌ڵه‌بجه‌ بازنه‌ی سه‌ربه‌خۆ نه‌بووه‌و له‌چوارچێوه‌ی بازنه‌كانی هه‌ڵبژاردنی  سنوری پارێزگای سلێمانیدا بووه‌، به‌ڵام ئه‌گه‌ر بۆ هه‌ڵبژاردنی په‌رله‌مانی كوردستان هه‌رێم بكرێت به‌ چوار بازنه‌، ده‌كرێت هه‌ڵه‌بجه‌ بكرێت به‌ بازنه‌یه‌كی هه‌ڵبژاردن و (3) كورسی پێبدرێت، ئه‌مه‌ له‌پاڵ گره‌نتیكردنی كۆتای ژنان له‌و پارێزگایه‌.  داوای نوێنه‌ری پێكهاته‌كانی وه‌رنه‌گرت ! دوای وه‌رگرتنی بۆچوونی كۆمسیۆنی هه‌ڵبژاردنه‌كانی عێراق، دادگای فیدراڵی بڕیاریداوه‌ نوێنه‌ری كۆمسیۆن له‌ دۆسیه‌كه‌ بكاته‌ ده‌ره‌وه‌، به‌ڵام له‌ رۆژانی 26-27ی كانونی یه‌كه‌می 2023دا دوو كه‌س وه‌كو نوێنه‌ری پێكهاته‌كان له‌ كوردستان داوایان پێشكه‌شی دادگا كردووه‌ بۆ ئه‌وه‌ی وه‌كو لایه‌نی سێیه‌م داخڵی ناو دۆسیه‌كه‌یان بكات، ئه‌وانه‌ی داواكه‌یان پێشكه‌ش كردووه‌ بریتی بوون له‌ هه‌ریه‌كه‌ له‌ (یه‌عقوب گۆرگیس یاقو/ نوسینگه‌ی سكرتێری بزوتنه‌وه‌ی دیموكراتی ئاشوری)و (محه‌مه‌د سه‌عده‌دین ئه‌نوه‌ر/ سه‌رۆكی حزبی گه‌شه‌پێدانی توركمانی)، دادگای فیدراڵی داوای ئه‌م دوو كه‌سه‌ی ره‌تكردوه‌ته‌وه‌. كۆمسیۆن هۆشداری داوه‌ ! دواتر و له‌ 14ی شوباتی ئه‌مساڵدا كۆمسیۆنی باڵای هه‌ڵبژاردنه‌كانی عێراق نوسراوێكی بۆ دادگا كردووه‌و تێیدا ئه‌وه‌ی به‌بیر هێناوه‌ته‌وه‌ كه‌ ته‌مه‌نی یاسایی كۆمسیۆن له‌ 7ی ته‌موزی 2024دا كۆتایی دێت‌، بۆیه‌ داوای له‌ دادگا كردووه‌ له‌ ده‌ركردنی بڕیاردا سه‌باره‌ت به‌ هه‌ڵبژاردنی په‌رله‌مانی كوردستان ئه‌مه‌ له‌به‌رچاو بگرێت، دادگا ته‌ماشای ئه‌م نوسراوه‌شی كردووه‌و به‌هه‌مان شێوه‌ی ئه‌وانه‌ی پێشوو هاوپێچی دۆسیه‌كه‌ی كردووه‌.  دادگا چۆن بڕیاریدا ؟ دادگای فیدراڵی له‌سه‌ر بنه‌مای سكاڵاكه‌ی یه‌كێتیی بڕیاریدا به‌ هه‌ڵوه‌شاندنه‌وه‌ی شێوازی یه‌ك بازنه‌یی هه‌ڵبژاردن له‌ كوردستان و یاساكه‌ی برده‌وه‌ بۆسه‌ر ده‌قه‌ ئه‌سڵییه‌كه‌ی ساڵی 1992 كه‌ هه‌رێمی كوردستانی دابه‌شكردووه‌ به‌سه‌ر (4) ناوچه‌ی هه‌ڵبژاردندا، بۆ ئه‌مه‌ش باسی له‌ لایه‌نه‌ ئه‌رێنی و نه‌رێنییه‌كانی شێوازی یه‌ك بازنه‌یی و فره‌ بازنه‌یی كردووه‌.  دادگا ده‌ڵێ فره‌ بازنه‌یی پێگه‌یه‌كی گه‌وره‌ی له‌ بنیادنانی دیموكراتیه‌تدا هه‌یه‌، به‌وپێیه‌ی توانای ئه‌وه‌ هه‌یه‌ هه‌موار بكرێت یان گۆڕانكاری تێدا بكرێت به‌گوێره‌ی ئه‌و گۆڕانكارییانه‌ی كه‌ به‌سه‌ر بارودۆخی سیاسی و ژماره‌ی دانیشتواندا دێن، به‌ڵام شێوازی یه‌ك بازنه‌یی واتا هه‌رێمێك له‌ ناو ده‌وڵه‌تدا به‌ تێكڕا یه‌ك بازنه‌ی هه‌ڵبژاردنه‌و ده‌نگده‌ران ده‌توانن ده‌نگ بۆ هه‌ر كاندیدێك بده‌ن ته‌نانه‌ت ئه‌گه‌ر له‌ ده‌ره‌وه‌ی شاره‌كه‌ی خۆشیان بیت، هه‌ندێك كه‌س وای ده‌بینن یه‌ك بازنه‌یی هه‌ڵبژاردن وه‌كو ئه‌نجامدانی راپرسییه‌ له‌ به‌رژه‌وه‌ندی حكومه‌تدا، سه‌رباری ئه‌وه‌ی شێوازی یه‌ك بازنه‌یی ده‌بێته‌ هۆی به‌هێزبوونی یه‌كڕیزی نیشتمانی، به‌وپێیه‌ی تێیدا كاندیده‌كان ده‌توانن پرۆژه‌و به‌رنامه‌ بۆ سه‌رتاسه‌ری وڵات بخه‌نه‌ڕوو، به‌ڵام له‌لایه‌كی تره‌وه‌ ئه‌م شێوازه‌ له‌ڕووی په‌یوه‌ندی نێوان كاندیدو ده‌نگده‌ره‌وه‌ لاوازه‌و تییدا لایه‌نداری كاندید بۆ ئه‌و حزبه‌ ده‌بێت كه‌ كاندیدی ده‌كات و له‌ پرۆسه‌ی هه‌ڵبژاردندا پشتیوانی لێده‌كات، ئه‌مه‌ش واده‌كات كاندیده‌كان ئیراده‌یان به‌سترابێته‌وه‌ به‌ بڕیاری حزبه‌كه‌یانه‌وه‌، له‌پێناو گره‌نتیكردنی ئه‌و پاره‌ی كه‌ هه‌ڵمه‌تی بانگه‌شه‌ی هه‌ڵبژاردن پێویستیان پێیه‌تی..  دادگا ئاماژه‌ به‌وه‌ ده‌كات، شێوازی یه‌ك بازنه‌یی هه‌ڵبژاردن وا ده‌كات سه‌رجه‌م پارێزگاكانی هه‌رێم نه‌توانن به‌گوێره‌ی ژماره‌ی دانیشتوانیان نوێنه‌رایه‌تی دادپه‌روه‌رانه‌یان له‌ په‌رله‌ماندا هه‌بێت، ئه‌مه‌ش لێدانه‌ له‌ بنه‌مای ده‌رفه‌تی یه‌كسان بۆ هه‌مووان.  دادگا له‌ بڕیاره‌كه‌یدا كۆمسیۆنی هه‌ڵبژاردنه‌كانی عێراقی به‌ لایه‌نی تایبه‌تمه‌ند داناوه‌ له‌ دانانی سیسته‌م و رێنمایی هه‌ڵبژاردن و راپرسییه‌كان له‌ عێراق و له‌ هه‌رێمی كوردستانیش، ئه‌مه‌ به‌وپێیه‌ی كۆمسیۆنه‌كه‌ ده‌سته‌یه‌كی سه‌ربه‌خۆیه‌ له‌ڕووی دارایی و ئیدارییه‌وه‌، هه‌روه‌ها ده‌سه‌ڵاتی به‌لاداخستنی ناكۆكییه‌كانی له‌باره‌ی ئاماده‌كردن و جێبه‌جێكردنی هه‌ڵبژاردن له‌ عێراق و هه‌رێمی كوردستان و پارێزگاكان به‌خشیوه‌ به‌ ئه‌نجومه‌نی كۆمسیارانی كۆمسیۆنی هه‌ڵبژاردنه‌كانی عێراق، له‌پاڵ ئه‌مه‌دا ئه‌و بڕگه‌ی یاسای هه‌ڵبژاردنی په‌رله‌مانی كوردستانی هه‌ڵوه‌شاندوه‌ته‌وه‌ كه‌ باس له‌ پێكهێنانی كۆمسیۆنی هه‌ڵبژاردن و راپرسی هه‌رێمی كوردستان ده‌كات و كۆمسیۆنی هه‌ڵبژاردنه‌كانی عێراقی له‌ شوێنه‌كه‌ی داناوه‌، ئه‌مه‌ش به‌جۆرێك له‌ جۆره‌كان وه‌كو هه‌ڵوه‌شاندنه‌وه‌ی كۆمسیۆنه‌كه‌ی كوردستانه‌، ئه‌و كۆمسیۆنه‌ی كه‌ ساڵی 2017 پرۆسه‌ی ریفراندۆمی سه‌ربه‌خۆیی كوردستانی به‌ڕێوه‌برد. له‌لایه‌كی تره‌وه‌، دادگا له‌ بڕیاره‌كه‌یدا بڕگه‌ی (چواره‌م)ی له‌ مادده‌ی (شه‌شه‌م)ی یاسای هه‌ڵبژاردنی په‌رله‌مانی كوردستان هه‌ڵوه‌شاندوه‌ته‌وه‌، ئه‌م بڕگه‌یه‌ ده‌ڵێ ((ده‌سته‌یه‌كی دادوه‌ریی له‌ دادگای پێداچوونه‌وه‌ی هه‌رێمی كوردستان- عێراق له‌ سێ دادوه‌ریی ناته‌رخان پێكده‌هێنرێت بۆ سه‌یركردنی ئه‌و تانانه‌ی كه‌ كه‌ له‌لایه‌ن ده‌سته‌ی هه‌ڵبژاردنه‌كان یان له‌لایه‌ن تاكه‌ تاكه‌ی خه‌ڵك یان كیانه‌ زه‌ره‌رمه‌نده‌كانه‌وه‌ بۆی ده‌نێردرێت و تانه‌یان له‌ بڕیاره‌كانی كۆمسیۆن داوه‌، بڕیاره‌كانیش بنبڕ ده‌بن))، به‌ هه‌ڵوه‌شاندنه‌وه‌ی ئه‌م بڕگه‌یه‌، دادگای فیدراڵی بڕیاردانی له‌باره‌ی تانه‌كانی هه‌ڵبژاردن له‌ ده‌سته‌ی دادوه‌ریی هه‌رێمی كوردستان سه‌ندوه‌ته‌وه‌و راده‌ستی ده‌سته‌ی دادوه‌ریی ئه‌نجومه‌نی دادوه‌ریی عێراقی كردووه‌، به‌پێی زانیارییه‌كانی (دره‌و)، به‌مدواییانه‌و به‌ر له‌ ده‌رچوونی بڕیاری دادگا له‌باره‌ی یاسای هه‌ڵبژاردن، پارتی دیموكراتی كوردستان هه‌وڵێكی له‌رێگه‌ی كۆمسیۆنی هه‌ڵبژاردنه‌كانی عێراقه‌وه‌ هه‌بووه‌ بۆ ئه‌وه‌ی بڕیاردان له‌ تانه‌كانی هه‌ڵبژاردن له‌لای ده‌سته‌ دادوه‌رییه‌كه‌ی هه‌رێم بمێنێته‌وه‌، به‌ڵام دادگا ئه‌و هه‌وڵه‌ی بێ ئاكام كرد.  كورته‌ی بڕیاری دادگای فیدراڵی له‌باره‌ی یاسای هه‌ڵبژاردنی په‌رله‌مانی كوردستان، به‌مشێوه‌یه‌:  •    ده‌سته‌واژه‌ی 11 كه‌ له‌ مادده‌ی یه‌كه‌می یاسای هه‌ڵبژاردنی هه‌ڵبژاردنی كوردستاندا ژماره‌ (1)ی ساڵی 1992ی هه‌مواركراودا هاتووه‌ ناده‌ستورییه‌و ده‌قه‌كه‌ به‌مشێوه‌ی لێ دێت:"په‌رله‌مانی كوردستان له‌ 100 ئه‌ندام پێكدیت". به‌مشێوه‌یه‌ دادگای فیدراڵی (11) كورسی "كۆتا"ی پیكهاته‌كانی هه‌ڵوه‌شانده‌وه‌. •        ده‌سته‌واژه‌ی "به‌گوێره‌ی حوكمه‌كانی بڕگه‌ی 4 له‌ مادده‌ی 2ی یاسای كۆمسیۆنی باڵای سه‌ربه‌خۆی هه‌ڵبژاردنه‌كان ژماره‌ 11ی ساڵی 2007 تا كاتی پێكهێنانی ده‌سته‌یه‌ی باڵای هه‌ڵبژاردن و راپرسی كوردستانی عێراق" كه‌ له‌ مادده‌ی شه‌شه‌می دووباره‌كراوه‌ی یه‌كه‌م له‌ یاسای هه‌ڵبژاردنی په‌رله‌مانی كوردستانی عێراق ژماره‌ 1ی ساڵی 1992ی هه‌موار كراودا هاتووه‌، ناده‌ستورییه‌و ده‌قه‌كه‌ به‌مشێوه‌ی لێ دێت" له‌م یاسایه‌دا كۆمسیۆنی باڵای سه‌ربه‌خۆی هه‌ڵبژاردنه‌كان شوێنی ده‌سته‌ی باڵای هه‌ڵبژاردنه‌كانی په‌رله‌مانی كوردستانی عێراق ده‌گرێته‌وه‌ بۆ سه‌رپه‌ره‌شتیكردنی هه‌ڵبژاردنه‌كانی په‌رله‌مان و به‌ڕێوه‌بردنی. بڕگه‌ی چواره‌م له‌ مادده‌ی شه‌شه‌می یاساكه‌ ناده‌ستورییه‌". به‌پێی ئه‌م بڕیاره‌ دادگای فیدراڵی عێراق كۆمسیۆنی هه‌ڵبژاردن و راپرسی هه‌رێمی كوردستانی به‌یه‌كجاری هه‌ڵوه‌شانده‌وه‌، كۆمسیۆنێك كه‌ ساڵی 2014 په‌رله‌مانی كوردستان دروستیكردو له‌ماوه‌ی 10 ساڵی ته‌مه‌نی خۆیدا ته‌نیا سەرپەرشتی ڕاسییەکی گشتی بۆ سەربەخۆیی کوردستان لە 25ی ئه‌یلولی 2017و یەک هەڵبژاردنی پەرلەمانی کوردستانی له‌ 30ی ئه‌یلولی 2018دا كردووه‌.  •    مادده‌ی 9ی یاسای هه‌مواركراوی هه‌ڵبژاردنی په‌رله‌مانی كوردستان ناده‌ستورییه هه‌روه‌ها جێبه‌جێكردنی ده‌قی پێشوو كه‌ به‌گوێره‌ی مادده‌ی چواره‌می هه‌مواری سێیه‌می ساڵی 2004 هه‌ڵوه‌شێندرایه‌وه‌، ‌به‌جۆرێك ده‌قی جێبه‌جێكراو به‌مشێوه‌یه‌ بێت" هه‌رێمی كوردستان دابه‌شده‌كرێت به‌سه‌ر ژماره‌یه‌ك ناوچه‌ی هه‌ڵبژاردندا كه‌ له‌ چوار ناوچه‌ كه‌متر نه‌بێت". •    مادده‌ی سێیه‌م له‌ یاسای ژماره‌ 15ی ساڵی 2013ی یاسای هه‌مواری حه‌وته‌می هه‌ڵبژاردنی په‌رله‌مانی كوردستان ناده‌ستورییه‌، كه‌ به‌پێی ئه‌م مادده‌یه‌ مادده‌ی حه‌ڤده‌یه‌می یاسای ناوبراو هه‌ڵوه‌شاوه‌ته‌وه‌، ده‌بێت كار به‌ مادده‌ی ناوبراو بكرێته‌وه‌ كه‌ ده‌ڵێ: هه‌موو هاوڵاتییه‌ك كه‌ ته‌مه‌نی 18 ساڵی ته‌واو كردبێت فه‌رمانگه‌ی باری شارستانی كارتی ده‌نگدانی پێده‌دات به‌پێی چوارچێوه‌یه‌ك كه‌ دیاریده‌كرێت، به‌مه‌رجێك ده‌نگده‌ر له‌كاتی ده‌نگداندا ناسنامه‌ی خۆی بسه‌لمێنێت".  •    هه‌ردوو ده‌سته‌واژه‌ی " له‌سه‌ر ئاستی كوردستانی عێراق" هه‌روه‌ها ده‌سته‌واژه‌ی "به‌مه‌رجێك ژماره‌ی كاندیدی هه‌ر لیستێكی هه‌ڵبژاردن له‌ سێ كاندید كه‌متر نه‌بێت" كه‌ له‌ مادده‌ی بیست و دووی له‌ یاسای هه‌ڵبژاردندا هاتووه‌ ناده‌ستورییه‌و ده‌قه‌كه‌ به‌مشێوه‌ی لێدێت" هه‌موو قه‌واره‌یه‌كی سیاسی له‌ كوردستانی عێراق بۆی هه‌یه‌ لیستی تایبه‌ت پێشكه‌ش بكات كه‌ ناوی كاندیده‌كانی له‌خۆبگرێت و رێژه‌ی ژنان له‌ناو لیسته‌كه‌دا له‌ 30% كه‌متر نه‌بێت، ریزبه‌ندی ناوی كاندیده‌كان به‌وشێوه‌یه‌ ده‌بێت كه‌ گره‌نتی رێژه‌ی ناوبراوی ژنان بكات له‌ په‌رله‌ماندا". به‌گوێره‌ی ئه‌م ئه‌م بڕیاره‌ی دادگای فیدراڵی بۆ هه‌ڵبژاردنه‌كانی په‌رله‌مانی كوردستان ئیتر هه‌موو هاوڵاتییه‌ك ده‌توانێت له‌ ده‌ره‌وه‌ی لیستی حزبه‌كان، وه‌كو كاندیدی تاكه‌كه‌سیی "فردی" خۆی بۆ په‌رله‌مانی كوردستان كاندید بكات.        بۆ بینینی ده‌قی بڕیاره‌كه‌ كلیك له‌سه‌ر (PDF) بكه‌