درەو: كۆمسیۆنی هەڵبژاردنەكان ئاستی بەشداری لە دەنگدانی تایبەتدا بڵاوكردەوە، بەپێی ئەو ئامارە تا ئێستا سلێمانی بەرزترین ئاستی بەشداری هەیە - دهۆك: 76% - هەولێر: 77% - سلێمانی: 78%

سەلام عومەر لەملا ئازادیت یان لەولا؟ یەکێتی و پارتی بەشێک لە رۆژەکانی بانگەشەی هەڵبژاردنیان بەم بابەتەوە بەسەربرد کە بابەتێکی ژیارییە بۆ هاوڵاتیانی هەرێم، بەتایبەتی ئازادیخوازان و رۆژنامەنووسان و بابەتێکی بەبازاڕکردنی پەتییە بۆ پارتی و یەکێتی لەدەوروبەری هەڵبژاردندا. بۆ ئەوان، ئامانج خوودی ئازادی نییە و شتێکی ترە؛ بۆ ئێمەش خوودی ئازادییە و هیچ شتێکی تر نییە.   بەم بەرەو هەڵبژاردنە بۆ ئەوەی کەمێک لەو بابەتە تێبگەین با گفتوگۆکەمان ببەینەوە خاڵی سەرەتا، دنیا گۆڕاوە و هەرشتێک دەڵێیت پێوانەدەکرێت و حساب و کتابی خۆی هەیە، بە بابەتی ئەم نووسینەشەوە کە ئازادییە. خانەی ئازادی (Freedom House)  دامەزراوەیەکی ئەمریکییە و ساڵی 1941دا دامەزراوە، ساڵانە ریزبەندیی ئازادی لەسەرتاسەری جیهاندا دەخاتەڕوو، بەگوێرەی ریزبەندیی ساڵی 2025، عیراق، بێگومان کە هەرێمی کوردستانیش دەگرێتەوە، ووڵاتێکی "نائازادە"، لە تێکڕای هەڵسەنگاندنەکەدا، عیراق (31) لە (100)ی هێناوە، لە هەڵسەنگاندنی مافە سیاسییەکاندا، (16) لە (40)ی هێناوە و لە ئازادییە مەدەنییەکاندا (15) لە (60)ی هێناوە.   هاوکات، عیراق لە پێوەرەکانی دیموکراسی  (Democracy Index)ی ساڵی 2024دا وەک "دیموکراسی" پۆلێن نەکراوە، بەڵکو بە "ڕژێمێکی دەسەڵاتخواز" وەسفکراوە بەهۆی هۆکارەکانی وەک گەندەڵی، کاریگەریی دەرەکی و لاوازی سەروەری یاسا. لە کاتێکدا کە هەڵبژاردن و نوێنەرایەتیکردن هەن، بەڵام دامەزراوە فەرمییەکان لاوازن و مافەکان پێشێل دەکرێن. جا لە ووڵاتێکدا، کە لە ریزبەندی نائازادەکانە، ئایا هاوڵاتیانی هەرێمی کوردستان لە زۆنی یەکێتی ئازاددترن یان لە زۆنەکەی پارتی، مایەی هەڵوێست لەسەرکردنە.  لەتەوەری مافە سیاسییەکاندا، بەگوێرەی هەڵسەنگاندنەکەی "خانەی ئازادی"، بەتایبەتی لە بابەتی هەڵبژاردن، فرەیی سیاسی و حکومەتی کارادا، عیراق بە هەرێمیشەوە لانی کەم لە بەشێک لە پرسیارەکاندا (2)یان (3) لە (4)هێناوە، بەڵام لە بابەتی وەک ئایا هەڵبژاردنە سیاسییەکانی خەڵک دوورن لە زاڵبوونی هێزگەلێک کە لە دەرەوەی کایەی سیاسین، یان هێزە سیاسییەکان کە ئامرازی بەدەر لە سیاسی بەکاردەهێنن؟ یان ئایا سەرۆکی حکومەت و نوێنەرانی یاسادانانی نیشتمانی کە ئازادانە هەڵبژێردراون، سیاسەتەکانی حکومەت دیاری دەکەن؟ یان ئایا حکومەت بە کراوەیی و شەفافیەت کاردەکات؟ عێراق (1) لە (4)هێناوە. کەمێک پشتڕاستکردنەوە: (سلێمانی، هەولێر): پارتی و یەکێتی کەی وویستیان هەڵبژاردن دەکەن، کەی وویستیان حکومەت پێکدەهێنن، کەی وویستیان بودجە ئەبەن بۆ پەرلەمان؛ واتە هەڵبژاردنە سیاسییەکانی هەردوو زۆنەکە دوورنین لە زاڵبوونی هێزگەلێک کە لە دەرەوەی نوێنەرانی خەڵک رەفتاردەکەن و حکومەت ئازادانە و بە کراوەی کارناکات. منەتی هەڵبژاردن هەزەلییە لەبەرئەوەی هەڵبژاردن لە کۆریای باکور کە (لە هەڵسەنگاندنەکەدا (3) لە (100)ی هێناوە)، ئێران کە (لە هەڵسەنگاندنەکەدا (11) لە (100)ی هێناوە) و روسیا کە (لە هەڵسەنگاندنەکەدا (12) لە (100)ی هێناوە) دواناکەوێت، بە رێکوپێکی لەکاتی خۆیدا بەڕێوەدەچێت، بەڵام پرسیارە گەوهەرییەکە ئەوەیە ئازادن یان نا. یاریکردن بە سازدانی هەڵبژاردن بووە بە خوویەکی نادیموکراتیانە کە ئازادیی بڕیاردانی هەڵبژاردنی لە هاوڵاتیان لە هەردوو زۆنەکە قۆرغکردووە، ئێستا نەک پارتەکان بەڵکو سەندیکا و دامەزراوەکانیش بە ئارەووی خۆیان هەڵبژاردن دەکەن، دواجار کەی بووە بیستوتە کە سەندیکای رۆژنامەنووسان یان پارێزەران هەڵبژاردن بکەن.   هاوکات، بەگوێرەی هەڵسەنگاندنەکە، لە تەوەری ئازادییە مەدەنییەکاندا، بەتایبەتی لە بابەتی ئازادیی رادەربڕن و باوەڕ، مافی رێکخراوەیی و گردبونەوە، سەروەریی یاسا و ئۆتۆنۆمی کەسی و مافی تاک عیراق بە هەرێمیشەوە پلەیەکی خراپی هێناوە و  لە ژمارەیەکی زۆر لە پرسیارەکاندا (سفر)یان (1) لە (4) هێناوە. لە بابەتی ئازادیی رادەربڕندا، لە هەموو پرسیارەکانی وەک ئایا میدیای ئازاد و سەربەخۆ هەیە؟ ئایا تاکەکان ئازادن لە پراکتیزەکردن و دەربڕینی باوەڕی ئایینی یان بێباوەڕی لە کایەی گشتی و تایبەتدا؟ ئایا ئازادیی ئەکادیمی هەیە و ئایا سیستەمی پەروەردە دوورە لە تەڵقینی سیاسیی بەرفراوان؟ یان ئایا تاکەکان بێترس لە چاودێریکردن یان تۆڵەسەندنەوە ئازادن لە دەربڕینی بۆچوونی شەخسی خۆیان لەسەر بابەتگەلی سیاسی یان هەستیاری تر؟ عیراق بە هەرێمیشەوە (1) لە (4)هێناوە. کەمێک پشتڕاستکردنەوە، لە 2025 چی روویداوە لە هەردوو زۆنەکە: (هەولێر): 9ی شوباتی 2025، هێزە ئەمنییەكانی هەولێر، شەپۆلێكی پێشێلكارییان دژ بە رۆژنامەنوسان و كەناڵەكانی راگەیاندن کرد، لەكاتی روماڵكردنی خۆپیشاندانی مامۆستایان لە سنوری دێگەڵە، رێگری لە دەیان رۆژنامەنوس و كەناڵی راگەیاندن كرا روماڵی تەواوەتی بكەن، تیمە رۆژنامەوانییەكانیان روبەڕوی پێشێلكاریی بونەوە. (سلێمانی):52ی شوباتی 2025، لانیكەم 12 رۆژنامەنوس و میدیاكار لە شەش دەزگای راگەیاندن، لەلایەن هێزە ئەمنییەوە پێشێلكارییان بەرامبەر كرا. هێزە ئەمنییەكانی سلێمانی بە جلوبەرگی مەدەنی و سەربازییەوە لێشاوێك لە پێشێلكارییان لە شێوەی دەستگیركردن، پەلاماردان و راوەدونان، رێگریكردن لە روماڵ و ئازاردانیان کردووە، لەوكاتەی رۆژنامەنوسان دەیانویست روماڵی ناڕەزاییەكانی مامۆستایان بكەن دژی پێنەدانی موچەكانیان ئەو پێشێلكارییانە لەسەر رێگای سلێمانی – عەربەت. (هەولێر): 19ی ئابی 2025، دادگای کەتنی بنەسڵاوە سزای چوار ساڵ و پێنج مانگ زیندانیكردنی بۆ رۆژنامەنووس شێروان شێروانی دەركرد، ئەوەش بۆ جاری سێیەم و لەسەر سكاڵای ئەفسەرێكی پاسەوانی چاکسازیی گەورانی هەولێر، گوایا شێروان شێروانی لەناو زینداندا هەڕەشەی "كوشتنی" لێكردووە. (سلێمانی): 22ی ئابی 2025، شارەکە بە بۆنی بارووت و خوێن خەبەری دەبێتەوە، هێزێكی ئەمنی لە سلێمانی تەواوی كەلوپەل و پێداویستییەكانی كەناڵی ئاسمانیی زووم-یان بۆ شوێنێكی نادیار گواستۆتەوە، ئەوەش دوای ئەوەی بە چەك و ئۆتۆمبێلی سەربازییەوە، هەڵیانكوتایە سەر كەناڵەكە و كۆتاییان بە پەخشەكەی هێنا. (سلێمانی): 8ی تشرینی یەکەمی 2025، وەزیری ئاوەدانكردنەوە لەسەر هەواڵێكی ئاسایی (درەو) سكاڵایەكی لەسەر دامەزراوەی میدیایی درەو و  سەرنوسەری درەو (محەمەد رەئوف) تۆماركردووەو داوای بڕی (ملیارێك) دینار دەكات. (دهۆک): 28ی تشرینی یەکەمی 2025، سیروان غه‌ریب، سه‌رنووسه‌ری‌ وێستگه‌نیوز رایگه‌یاند، به‌ تۆمه‌تی‌ تێكدانی‌ ئاسایشی‌ نیشتیمانی هه‌رێمی‌ كوردستان، داواكاریی‌ گشتیی دهۆك سكاڵای‌ یاسایی‌ له‌سه‌ر وێستگه‌نیوز تۆماركرد و ئه‌و سكاڵایه‌ی‌ داواكاری‌ گشتیی دهۆك له‌سه‌ر رووماڵی‌ شه‌ڕی‌ نێوان هه‌ركییه‌كان و هێزه‌ ئه‌منییه‌كانی‌ شاری‌ هه‌ولێره‌ كه‌ له‌ رێکەوتی 8ی‌ 7ی‌ 2025 له‌ قه‌زای‌ خه‌بات روویدا. (سلێمانی) 2ی تشرینی دووەمی 2025: بەهۆی هەوڵدان بۆ پەخشکردنی ئەڵقەیەکی بەرنامەی تاوتوێ کە میوانداریی شاسوار عەبدولواحیدـی سەرۆکی جوڵانەوەی نەوەی نوێی دەکرد، پەخشی کەناڵی NRT ڕاگیرا. هەر بەگوێرەی هەڵسەنگاندنەکە، سەبارەت بە سەروەریی یاسا، لە هەموو پرسیارەکانی وەک ئایا دەسەڵاتی دادوەریی سەربەخۆ هەیە؟ ئایا ئیجرائاتیی یاسایی لە بابەتە مەدەنی و تاوانکارییەکاندا زاڵە؟ ئایا یاسا، سیاسات و پراکتیزەکردنەکان گەرەنتی مامەڵەی یەکسان لەگەڵ توێژە جیاوازەکانی دانیشتوواندا دەدەن؟ عیراق بە هەرێمیشەوە (سفر) لە (4)هێناوە. کەمێک پشتڕاستکردنەوە: (هەولێر): سەرۆکی یەکێتی ساڵێک لەمەوبەر لە دیداری مێریدا لە هەولێر ووتی،"  بۆ رائەکەینە مەحکەمەی بەغا، چونکە مەحکەمەی ئێرە مەحکەمە نییە برا، با سەریحبین لەگەڵ یەکتری، مەحکەمە نییە. مەحکەمە، حاکمی نەگبەت لە ماڵەوە دانیشتووە پەیامێکی بۆ دێت لەدەزگایەکی ئەمنییەوە، لەهەر کامێک لا بێت، ئەڵێ تۆ سبەینێ وائەکەی. ئەڵی بەسەرچاو، چی بکەم، ئێ ئەوە مەحکەمەیە، خەڵک هانبدات بۆ ئەو مەحکەمەیە؟ نەخێر." یەکێتی و پارتی هەڵەیەکی ستراتیژی دەکەن کاتێک هەردوو کەمپەکە وا بەسادەیی بەیەکتر بەراورد دەکەن. چیرۆکەکە لەوە گەورەترە. ئازار و سنورەکانی خوودسانسۆری گەیشتۆتە ئاستێکی تەواو خراپ لای رۆژنامەنوسان، چالاکوانان، نووسەران و هەموو ئەوانەی لەدەرەوەی بازنەی بەهێزی ناو پارتی و یەکێتی بیردەکەنەوە. لە دوایین کتێبیدا، "رایەڵە: مێژوویەکی کورتی تۆڕەکانی زانیاری لە چاخی بەردینەوە تا ژیریی دەستکرد"،  یۆڤاڵ نوح هەراری، دەڵێت، ئەو سەرکردانەی شەیدای دەسەڵاتی رەهان، بۆ گەیشتن بەو ئامانجە، بە هێرشکردنە سەر دادگا و میدیای سەربەخۆ دەستپێدەکەن، هەوڵی کۆنترۆڵکردنی دادگاکان دەدەن لەرێی کڕینی دادوەرەکانەوە و لە گەڵ پوکاندنەوەی دامەزراوەکانی میدیای سەربەخۆ، ماشێنی میدیایی تایبەت بەخۆیان دادەمەزرێنن. وەک ئەو دەڵێت، دواتر ناوەندە ئەکادیمییەکان، شارەوانییەکان، رێکخراوەکانی کۆمەڵگەی مەدەنی و بزنس یان لەبەریەک هەڵدەوەشێنرێن یان دەخرێنە ژێر سانسۆری حکومەتەوە.  ئەو فەیلەسوفە، ئەو دامەزراوانەی ناومانهێنان بە "میکانیزمەکانی خۆڕاستکردنەوە؛ ناودەبات کە مەرجی ژیان و مردنن بۆ دەسەڵاتێکی دیموکرات. ئایا لە هەردوو کەمپەکەی یەکێتی و پارتییدا دادگاکان سەربەخۆن، ئایا ئەو چەند دامەزراوە میدیاییە سەربەخۆیەی هەن بەرەو پوکانەوە ناچن چونکە بەرگەی مونافەسەکردنی ماشێنی میدیای حزبی و شەخسی ناگرن. ئایا ناوەندە ئەکادیمییەکان سەربەخۆن، ئایا حکومەت هەوڵی لاتەریککردنی رێکخراوەکانی چالاکی کۆمەڵگەی مەدەنی نادات، ئایا بۆ راهێنانیکی یەک کاتژمێری لەسەر چۆنیەتی داواکردنی مۆڵەتی نەخۆشی لە دامەزروە میدیایەکەتدا پێویستت بە مۆڵەتی ئاساییش نییە؟ پرسیارێکی کراوەیە. کەمێک پشتڕاستکردنەوە: (سلێمانی):  29ی تشرینی دووەمی 2025، زیاتر لە (50) تۆڕ، ڕێکخراو و کەسایەتی، بانگەوازێکیان بڵاوکردەوە، کە دەڵێت هەنگاوێکی پلان بۆ داڕێژراوە هەیە بۆ دانانی ڕێکخراوە نا حکومییەکانی کۆمەڵگەی مەدەنی لە ژێر کۆنترۆڵدا و بۆ ئەو مەبەستە چەند ساڵێکە ژمارەیەکی بەرچاو لە ڕێکخراوی ناحکومی دامەزراون کە پەیوەندیی ڕاستەوخۆ یان ناڕاستەوخۆیان لەگەڵ حزبە سیاسییە دەسەڵاتدارەکان و کەسایەتییە سیاسییەکاندا هەیە. بەو هۆیەوە لەناو زیاتر لە شەش هەزار ڕێکخراوی نا حکومی لە هەرێمی کوردستان، گروپێک رێکخراو جیاکراونەتەوە و مۆڵک و بودجەی گشتی وەردەگرن، بەبێ میکانیزمێکی ڕوون و بوونی شەفافیەت و لێپرسینەوە. دیارە هەویری ئەوەی لە سلێمانی ئازاددتری یان لە هەولێر ئاو زۆر دەکێشێت. یەکێتی و پارتی ئەوەی ویستویانە بە سەر زەوی و بنزەوی کوردستان کردویانە بۆشیان چۆتە سەر، بەڵام پێناچێت لە هەوڵی قایلکردنمان بەوەی کامیان ئازادیخوازترن سەرکەوتووبن. وادیارە لە پاییزی جێبەجێکردنی بەڵێنەکانی ئازادیدان، ئەگەر پاییزیش مابێت، تا ئاگادارکردنەوەی دواتریش، وەک نوسەر. رامیار مەحمود دەڵێت: ئێمە کۆمەڵێک خەڵکی دەست بەسەرین لە کەمپەکانی پارتی و یەکێتیدا، ئەگەر کەسێک گوێی لە دەنگمانە دەنگمان بگەیەنن.  

(درەو): سبەینێ دەنگدانی تایبەت بۆ هەڵبژاردنی خولی شەشەمی پەرلەمانی عێراق بەڕێوەدەچێت، رۆژی دواتر (11/11) دەنگدانی گشتییە، كۆمسیۆنی هەڵبژاردنەكان بۆ بەرچاوڕوونی، زانیاری لەبارەی تۆماركردنی سكاڵا لەسەر پرۆسەكە بڵاوكردەوە. بەگوێرەی رێنماییەكانی كۆمسیۆن، بەمشێوەیە دەنگدەرو كاندید یاخود بریكاری حزب و هاوپەیمانێتییە سیاسییەكان مافیان هەیە سكاڵا پێشكەش بكەن؛ سەبارەت بە پرۆسەی دەنگدان و جیاكردنەوەو ژماردنی دەستیی دەنگەكان: مەرجەكانی سكاڵا: یەكەم: پێشكەشكردنی سكاڵا لەماوەی دوو رۆژدا، لە كاتژمێری دەستپێكردنی دەنگدانەوە دەستپێدەكات تا كۆتایی دەوامی فەرمی رۆژی دواتری دەنگدان، ئەمە بەگوێرەی فۆرمێك كە بەتایبەت بۆ ئەو مەبەستە ئامادەكراوە لە بنكەكانی دەنگدانی گشتیی و تایبەتی، ئۆفێسی پارێزگاكان، ئۆفێسی دەستەی هەرێم، فەرمانگەی نیشتمانی و بنكەكانی وردبینی. دووەم: دەبێت سكاڵاكان نوسراو بن و ئیمزای سكاڵاكاری لەسەر بێت و ئەم زانیارییانەی خوارەوە لەخۆبگرن: 1-    ناوی سكاڵاكارو ئیمزاكەی، لەگەڵ ناونیشان و زانیاری پێویست بۆ پەیوەندیكردن.  2-    سكاڵاكار دەبێت شایەتحاڵی رووداوەكە بێت و ئەمە لەلایەن بەڕێوەبەری وێستگە یاخود رێكخەری بنكەكەوە لە رۆژی دەنگداندا پشتڕاستبكرێتەوە. خۆ ئەگەر سكاڵاكە پشتیوانی بەڕێوەبەری وێستگە یاخود رێكخەری لەسەر نەبوو، ئەكاتە ئەنجومەن دەسەڵاتی بڕیاردانی هەیە.  پۆلێنكردن و لێكۆڵینەوە یەكەم: ئەنجومەنی كۆمسیارانی كۆمسیۆنی هەڵبژاردنەكان لیژنەكانی پۆلێنكردن پێكدەهێنێت، كە هەریەكەیان تایبەتمەندن بە كۆمەڵێك پارێزگاو یەكێك لە ئەندامانی ئەنجومەنی كۆمسیاران سەرۆكایەتییان دەكەن، بە ئەندامێتیی فەرمانبەرێكی یاسایی لە بەشی سكاڵاو تانەكان و، فەرمانبەرێكی پسپۆر لە كاروباری تەكنیكی بەمەبەستی تەواوكردنی پرۆسەی پۆلێنكردنی سكاڵاكان بەشێوەیەكی وردو خێرا، بەگوێرەی مەترسییان بەمشێوەیە:  ا- سكاڵای زەرد ئەوەیە كە مەرجە شكڵی و بابەتییەكانی تێدا نییەو دەبێت دەستبەجێ رەتبكرێتەوە.  ب- سكاڵای سەوز ئەو سكاڵایەیە كە تێیدا بانگەشەی ئەوە كراوە سەرپێچی كراوە لەلایەن كارمەندانی كۆمسیۆن یان بانگەشەی ئەوە كراوە لە رۆژی دەنگداندا بانگەشەی هەڵبژاردن هەبووە یاخود سەرپێچی رێنماییەكان كراوە لەلایەن یەكێك لەو هێزە ئەمنییانەی كە راسپێردراون بە پاراستنی بنكەكە، بەبێ ئەوەی كاریگەریی لەسەر ئەنجامی هەڵبژاردن هەبێت، ئەمە پێویستی بەوە هەیە لێكۆڵینەوەی لێ بكرێت.  ج- سكاڵای سور ئەو سكاڵایەیە كە بابەتی سەرپێچی مەترسیدار لە خۆدەگرێت، كە رەنگە كاریگەریی لەسەر ئەنجامی هەڵبژاردن هەبێت ئەگەر هاتوو راستییەكی بسەلمێندرێت، ئەم جۆرە سكاڵایانە، لە مامەڵەكردن و بەدواداچووندا ئەولەویەتیان پێدەدرێت.   

درەو: ڕاپۆرتی؛ تۆڕی  نيريج " NIRIJ" ئامادەکردنی؛ سەڵاح حەسەن بابان 🔹 پارەی سیاسی ناپاک وەک سووتەمەنی بۆ هەڵبژاردنەکان بەکاردەهێنرێت، ئەمەش مسۆگەرکردنی هەڵبژاردنی ئەو کەسانەیە، کە پۆستە حکومییەکان بە دەرفەتێک دەبینن بۆ وەرگرتنەوەی تێچووی بانگەشەی هەڵبژاردنەکانیان لەڕێگەی گرێبەستی گوماناوی و گرێبەستی خەیاڵییەوە، ئەمەش سووڕێکی خراپ دروست دەکات: بە پارەی نایاسایی دەسەڵات دەکڕێت، دەسەڵاتیش پارەی نایاسایی زیاتر بەرهەمدەهێنێت. 🔹 ئامارەکان ئاماژە بەوە دەکەن کە بردنەوەی یەک کورسی ئەنجومەنی نوێنەران لە بەشێک لە پارێزگاکاندا (5 ملیۆن) دۆلاری تێدەچێت. واتا لیست یان هاوپەیمانێتییەک کە ئامانجی (10) کورسی بێت، پێویستی بە (50 ملیار) دینار دەبێت، ئەمە لە کاتێکدایە “پێشتر تێچووی هەر کورسییەک لە نێوان (750 ملیۆن) بۆ (یەک ملیار و 500 ملیۆن) دینار بوو. 🔹 شارەزایانی دارایی باس لە خەرجکردنی نزیکەی (3 ملیار دۆلار) دەکەن، لە لایەن هێزو کوتلە سیاسییەکانەوە، ئەمەش بە گەورەترین هەڵمەتی ڕیکلام و بانگەشەی هەڵبژاردن وەسف دەکرێت، کە تا ئێستا عێراق بەخۆیەوە بینیبێتی. 🔹 چاودێرانی هەڵبژاردن لەناو تۆڕەکانی چاودێریکردندا هەڵمەت و بانگەشە بەردەوامەکان بە تایبەتی لە شارە گەورەکاندا بە ئیسرافترین (خەرجی ناپێویست) هەڵمەتەکانی هەڵبژاردن وەسف دەکەن. ئەم خەرجییە ناپێویستانە لە دەیان هەزار وێنە و لافیتە و پۆستەردا دیارە، کە لە شەقام و گۆڕەپانەکاندا نمایشکراون. 🔹 سنووری خەرجی بۆ کاندیدێکی بەهێز لە (یەک ملیۆن) دۆلار تێدەپەڕێت، بۆ چەند سەد هەزارێک دادەبەزێت بۆ کاندیدێک کە چانسی مامناوەندی هەبێت، دەگاتە دەیان هەزار دۆلار بۆ کاندیدێکی لاواز کە هیچ ئاسۆیەکی ڕاستەقینەی نییە. 🔹 بودجەی زیادەڕۆیی و هەڵئاوساوی قەوارەو لیستە بەشداربووەکانی هەڵبژاردنی پەرلەمان یان لە دەستکەوتی نایاسایی- پڕۆژە و داهاتی قاچاخی نەوت و گەندەڵی بازرگانییەوە سەرچاوە دەگرێت- یان لە بودجەی دەرەکیی زلهێزە ناوچەییەکان کە کاریگەریی سیاسی و ئابووری و ئەجێندایان هەیە لە عێراقدا. 🔹 بەهای ئەو هەڵبژاردنانە چییە، کە هیچ هیوایەک بۆ گۆڕانکاری پێشکەش ناکەن، هەڵبژاردنێک کە پێشتر براوەکان ناسراون- ئەو پارتە گەورە و کاریگەرانەی کە هەموو شتێک لە نێوان خۆیاندا دابەش دەکەن، بەپێی ئەوەی ئێستا بە سیستەمی پشکەکان ناسراوە؟ سەرچاوە داراییەکانی هەڵمەتی بانگەشەی هەڵبژاردن چین؟ شارەزایانی ئابووری مەزەندە دەکەن، کە کۆی خەرجی لایەنە سیاسییەکان و قەوارەو کوتلە و کاندیدەکان بە درێژایی قۆناغە جیاوازەکانی بانگەشەی هەڵبژاردن، تا کۆتایی هاتنی لە (8)ی ئەم مانگە، چوار ترلیۆن دیناری عێراقی تێدەپەڕێت. چاودێرانی هەڵبژاردن لەناو تۆڕەکانی چاودێریکردندا هەڵمەتە بەردەوامەکان بە تایبەتی لە شارە گەورەکاندا بە ئیسرافترین (خەرجی ناپێویست) هەڵمەتەکانی هەڵبژاردن وەسف دەکەن. ئەم خەرجییە ناپێویستانە لە دەیان هەزار وێنە و لافیتە و پۆستەردا دیارە، کە لە شەقام و گۆڕەپانەکاندا نمایشکراون، هەروەها گردبوونەوە فراوانەکانی بانگەشەی هەڵبژاردن، کە لەلایەن لیست و کاندیدەکانەوە ئەنجام دەدرێن، لەگەڵ ئاهەنگ و دابەشکردنی دیاری. جگە لەوەش داواکاری لایەنگران و ئەو خەرجییانەی پەیوەستن بە کۆبوونەوەی عەشیرەتییەکانەوە کە بەڕووی کاندیدەکاندا کراوەن. ئەمەش ئەو خەرجییە ناپێویستە بێ سنوورە ڕووندەکاتەوە، توێژەران و سیاسەتمەداران و لایەنەکانی ئۆپۆزسیۆن ئەو پرسیارە دەوروژێنن، سەبارەت بە ژمارەو داتای خەرجییەکان، ئەو تەرخانکردنانەی کە لایەنەکان بۆ ڕیکلامەکانی بانگەشەکانی هەڵبژاردن و پێداویستییەکانی پەیوەست بەوەوە دەیکەن و لە هەمووی گرنگتر ئەوەیە: سەرچاوەی ئەم پارانە لەکوێیە؟ ئەو قەوارە سیاسیانەی بەشداربوون لە هەڵبژاردنەکاندا ئەم هەموو بڕە پارەیەیان لە کوێوە دەستکەوت؟ سەرەڕای نەبوونی وەڵامی فەرمی بۆ ئەم پرسیارانە، لێدوانی سیاسەتمەداران و ئەو زانیاریانەی لە کۆبوونەوەکانیاندا دزەپێدەکەن، سەرچاوەی بەشێک لەو پارانە ئاشکرا دەکەن. ئەم سەرچاوانە دەتوانرێت بەم شێوەیە کورت بکرێتەوە:  لە ڕێگەی پۆستە وەزارییەکانەوە دێن کە لەلایەن لایەنە دیاریکراوەکانەوە کۆنترۆڵ دەکرێن، یان پۆستە کارگێڕییە پلە باڵاکان لە وەزارەتەکان، دامەزراوەکان، یان حکومەتە خۆجێییەکان، جگە لەو پشکانەی کە لایەنە کاریگەرەکان لە پارەی تەرخانکراو بۆ گرێبەستی پڕۆژەی گشتی یان یارمەتی دەرەکی وەریدەگرن. لە ژێر ڕۆشنایی هەموو ئەمانەدا، عەلی موسلیم، ئابووریناس پێی وایە، عێراق هێشتا سیستەمێکی کاریگەری ئاشکراکردنی دارایی نییە، ئەمەش وایکردووە ببێتە یەکێک لە "زۆرترین خەرجکەرەکان و کەمترین وڵاتانی ڕێکخراو لە ناوچەکەدا". سەبارەت بە هەڵبژاردنیش جەخت لەوە دەکاتەوە کە نەبوونی لێپرسینەوەی دارایی “نەک هەر یەکپارچەیی هەڵبژاردن لاواز دەکات بەڵکو متمانەی هاووڵاتیان بە دامەزراوە گشتییەکان تێکدەدات”. هەناسەیەکی قووڵ هەڵدەکێشێت، دەشڵێت؛ “هەمان سیناریۆ پێش هەموو هەڵبژاردنێک دووبارە دەبێتەوە: لێشاوی زۆری پارە بۆ بانگەشەی هەڵبژاردن و پاڵپشتیکردن، دواتر دابەزینی چالاکییە ئابوورییەکان دوای هەڵبژاردنەکان”. دەشڵێت، “لە نەبوونی یاسایەکی تونددا کە خەرجییەکانی هەڵمەتی هەڵبژاردنەکان ڕێکبخات، وڵاتەکە هەروا بەرەوڕووی مەترسییە داراییە بەرچاوەکان دەبێتەوە، کە دواجار قەیرانی ئابووریی پێکهاتەیی عێراق بەبێ هیچ چارەسەرێکی بنەڕەتی بەردەوام دەکات”. هەرچەندە کۆنترۆڵی یاسایی هەیە سەبارەت بە سنووردارکردنی خەرجییەکان کە لە یاسای هەڵبژاردنەکاندا دانراوە، و ئەوانی دیکە کە پەیوەندییان بە یاسای پارتە سیاسییەکانەوە هەیە، کە داوا لە لایەنەکان دەکات سەرچاوەی دارایی خۆیان ئاشکرا بکەن، بەڵام چاودێرییەکی کاریگەر نزیکەی بە تەواوی غیابی هەیە و لەگەڵ ئەوەشدا لێپرسینەوە لە هەردوو سەرچاوە و خەرجییەکان لەدەست دەچێت. لیستە سوننییەکان پێشەنگن لە قەبارەی خەرجکردنییەکانی بانگەشەی هەڵبژاردن ئەو ئامارانەی لەلایەن کاندیدەکانەوە بڵاوکراونەتەوە و خەمڵاندنەکانی چاودێران ئاماژە بەوە دەکەن کە لیستە سوننەکانی هەڵبژاردن لەڕووی تەرخانکردنی بانگەشەی هەڵبژاردنەوە لە پلەی یەکەمدان. ئەمەش دەگەڕێتەوە بۆ شێوازی ڕاکێشانی دەنگەکانیان لە زۆرێک لە ناوچەکانی ڕۆژئاوای وڵات کە پشت بە کۆبوونەوەی خێڵەکی و سەرچاوە داراییەکانی پەیوەست بەوەوە دەبەستن. لیستە شیعەکان بە تایبەتی ئەوانەی لە بەغدا کێبڕکێ دەکەن، لە قەبارەدا بەدوایدا دێت. لە چاوپێکەوتنێکی تەلەفزیۆنیدا، یەزان میشعان ئەلجبوری، سەرۆکی هاوپەیمانی “صقورنا” ئاشکرایکرد، دەستەبەرکردنی کورسییەک لە خولی نوێی پەرلەماندا (5 ملیار) دیناری تێدەچێت. ئاماژەی بەوەشکرد، هاوپەیمانییەک کە ئامانجی (10) کورسی هەبێت پێویستی بە (50 ملیار) دینار دەبێت، ڕوونیشیکردەوە، “پێشتر تێچووی هەر کورسییەک لە نێوان (750 ملیۆن) بۆ (یەک ملیار و 500 ملیۆن) دینار بوو، ئەمەش بەندە بە ناوچەکەو و کەشوهەوای سیاسی و مێژووی هەڵبژاردنەکان و کاندیدەکان”. هاوکات، میشعان الجبوری باوکی، ئەندامی پێشووی پەرلەمان و سیاسەتمەداری سوننەی پارێزگاری سەلاح الدین، بڕی پێویستی بۆ دەستەبەرکردنی کورسی پەرلەمانی بە نزیکەی (10 ملیار) دینار خەمڵاند و هەڵبژاردنەکانی داهاتووی بە "پیستترین هەڵبژاردن لە مێژووی دەوڵەتی عێراق"دا وەسفکرد. کاندیدێکی سوننەی خەڵکی ئەنبار، کە بەشداری هەڵبژاردنی ئەنجوومەنی پارێزگاکانی ساڵی (2023) ی کردووە و پێی باش بووە ناوی ئاشکرا نەکات، ڕایگەیاند کە سنووری خەرجی بۆ کاندیدێکی بەهێز لە (یەک ملیۆن) دۆلار تێدەپەڕێت، بۆ چەند سەد هەزارێک دادەبەزێت بۆ کاندیدێک کە چانسی مامناوەندی هەبێت، دەگاتە دەیان هەزار دۆلار بۆ کاندیدێکی لاواز کە هیچ ئاسۆیەکی ڕاستەقینەی نییە. ڕوونیشیکردەوە، بەشێک لەو پارانە لەلایەن هێزە سیاسییەکانەوە بۆ کاندیدەکان خەرجدەکرێت، ئەمەش بەپێی باری دارایی قەوارەکە، لەکاتێکدا کاندیدەکە ئەو بڕە پارەیەی کە دەمێنێتەوە هەڵدەگرێت، بەو هیوایەی دواتر لەکاتی بردنەوەدا وەریبگرێتەوە. بە گوتەی ئابووریناس مەنار ئەلعوبەیدی، خەمڵاندنە مەیدانییەکان ئاماژە بەوە دەکەن کە خەرجییە ڕاستەقینەکان لانیکەم لە نێوان (3 بۆ 4 تریلیۆن) دیناردایە، "وە ڕەنگە زۆر زیاتر بێت بەهۆی نەبوونی داتای ورد یان ڕاپۆرتی دارایی فەرمی". ئاماژەی بەوەشکرد، "دیمەنی دارایی بانگەشەی هەڵبژاردنەکان لە ژێر کۆنتڕۆڵ دەرچووە. پارەکان بەبێ شەفافیەتێکی ڕوون یان چاودێرییەکی کاریگەر لەلایەن دەسەڵاتە بەرپرسیارەکانەوە خەرج دەکرێن". ئەو ئاماژە بەوە دەکات کە دەسەڵاتە پەیوەندیدارەکان، کۆمیسیۆنی باڵای سەربەخۆی هەڵبژاردنەکان، فەرمانگەی دارایی دژە سپیکردنەوەی پارە و بەرەنگاربوونەوەی تیرۆر لە بانکی ناوەندی، دەستەی دەستپاکی، دیوانی چاودێری دارایی و دەستەی پەیوەندییەکان و میدیا- "بەبێ هەماهەنگییەکی کاریگەر یان بنکەیەکی زانیاری یەکگرتوو کاردەکەن کە ببێتە هۆی بەدواداچوونی سەرچاوەی دارایی و خەرجییەکان." بەگوێرەی یاسای ژمارە (9)ی ساڵی 2020، کۆمسیۆن پابەندە بە وردبینیکردنی سەرچاوە داراییەکانی کاندیدەکان، لەکاتێکدا فەرمانگەی دژە سپیکردنەوەی پارە بەرپرسیارە لە شیکردنەوەی گواستنەوەی گوماناوی لەسەر بنەمای یاسای ژمارە (39)ی ساڵی 2015. بەڵام تا ئێستا هیچ داتایەک بڵاونەکراوەتەوە کە بڕی ئەو پارەیەی، کە لە هەڵمەتی هەڵبژاردنەکاندا دەسوڕێتەوە یان ئەو لایەنانەی پارەیان بۆ دابیندەکەن ڕوون بکاتەوە، ئەمەش وایکردووە ئەم مەلەفە، بە گوتەی پسپۆڕانی پسپۆر، یەکێک بێت لەو مەلەفانەی زۆرترین ناڕوونی تێدایە. مادەی (4/سێیەم) لە یاسای بەرەنگاربوونەوەی سپیکردنەوەی پارەدا هاتووە، یەکێک لە ئەرکەکانی فەرمانگە بریتییە لە "وەرگرتن و شیکردنەوەی ڕاپۆرت و زانیارییەکانی پەیوەست بەو مامەڵانەی کە گومانیان لێدەکرێت پەیوەندییان بە سپیکردنەوەی پارە، پارەدارکردنی تیرۆر، یان هەر تاوانێکی پێشبینیکراوی پەیوەندیدارەوە هەبێت، و گرتنەبەری ڕێوشوێنی گونجاو سەبارەت بەوانە بە هەماهەنگی لەگەڵ لایەنی دادوەری و ئاسایش و ڕێککاریی پەیوەندیدار". دەسەڵاتداران." جگە لەوەش دەستەی دەستپاکی و دیوانی چاودێری دارایی ڕۆڵی چاودێری دەگێڕن لە بەدواداچوونی ئەو سامانە گشتیانەی کە ڕەنگە بۆ مەبەستی سیاسی بقۆزرێتەوە، هاوکات دەستەی ڕاگەیاندن و پەیوەندییەکان چاودێری هەڵمەتەکانی ڕاگەیاندن و ڕیکلام دەکات بۆ دڵنیابوون لە شەفافیەتی پارەدانەکانیان و بەکارنەهێنانی سامانی دەوڵەت تێیدا. کەلێنی نێوان خەرجکردنی یاسایی و ئەرزی واقع لە کاتێکدا سنووری خەرجکردنی یاسایی بۆ هەر دەنگدەرێک بە (250 دینار) دانراوە، بەڵام واقیع کەلێنێکی بەرچاو لە نێوان یاساکە و جێبەجێکردنیدا ئاشکرا دەکات. ڕاپۆرتە مەیدانییەکان تێکڕای خەرجییەکانی بانگەشەی هەڵبژاردن بۆ هەر کاندیدێک بە نزیکەی (ملیارێک و 400 ملیۆن) دینار لە بەغدا و چەند پارێزگایەکی دیکە دەخەمڵێنن، لەکاتێکدا هەندێک لە کاندیدەکان بۆ بانگەشەی هەڵبژاردنەکان دەگاتە (5 ملیار) دینار. بە پشتبەست بەوەی (7 هەزار و 926) کاندید، کە لە هەڵبژاردنەکانی 2025دا خۆیان کاندید کردووە و تێکڕای خەرجییەکانی مەزەندەکراو بە بڕی (1.4 ملیار) دینار، کۆی خەرجییەکانی بانگەشەی هەڵبژاردن دەگاتە نزیکەی (11 تریلیۆن) دینار (8.4 ملیار) دۆلار بە نرخی ئاڵوگۆڕی ((هەزار و 320) دینار بەرامبەر بە یەک دۆلار). بەڵام چاودێرانی بانگەشەی بانگەشەکانی ناو تۆڕەکانی چاودێری هەڵبژاردن پێیان وایە تێکڕای خەرجی زۆرینەی کاندیدەکان ناگاتە (ملیارێک و 400 ملیۆن) دینار، هەرچەندە هەندێک کاندیدی بەهێز چەند هێندە زیاتر لەم بڕە تێدەپەڕێنن. ئەوان ژمارەی ڕکابەرە گەورەکان بە نزیکەی هەزار کاندید دەخەمڵێنن کە لەلایەن هێزە سیاسییە بەهێزەکانەوە پشتگیری دەکرێن، لەکاتێکدا ئەوانی دیکە لە دەرەوەی ڕکابەرییەکانن. لە هەر حاڵەتێکدا، هەڵبژاردن دەبێتە یەکێک لە گەورەترین چالاکییە ئابوورییەکانی وڵات، کە کەرتە خزمەتگوزارییە سەرەکییەکانی وەک خانووبەرە، تەندروستی، و پەروەردە تێدەپەڕێنێت، ئەمەش ئاماژەیە بۆ هەڵاوسانی پارەی سیاسی و گۆڕینی بۆ ئابوورییەکی هاوتەریب لەگەڵ سامانی گشتیدا. بە گوتەی توێژەر و شارەزای دارایی ضرغام عەبدوڵڵا، ڕێوشوێنە دواکەوتووەکانی چاودێریکردن، وەک وردبینیکردنی حیساباتی کۆتایی، بە ناتەواوی دەمێنێتەوە، دەشڵێت، لەژێر سیستمێکی پەرلەمانیدا کە بەرژەوەندیی حزبی بەسەریدا زاڵ بێت، "پارەی سیاسی ناپاک وەک سووتەمەنی بۆ هەڵبژاردنەکان بەکاردەهێنرێت، ئەمەش مسۆگەرکردنی هەڵبژاردنی ئەو کەسانەیە کە پۆستە حکومییەکان بە دەرفەتێک دەبینن بۆ وەرگرتنەوەی تێچووی بانگەشەی هەڵبژاردنەکانیان لەڕێگەی گرێبەستی گوماناوی و گرێبەستی خەیاڵییەوە، ئەمەش سووڕێکی خراپ دروست دەکات: بە پارەی نایاسایی دەسەڵات دەکڕێت، دەسەڵاتیش پارەی نایاسایی زیاتر بەرهەمدەهێنێت". لە 5ی تشرینی یەکەمدا، کۆمیسیۆنی باڵای سەربەخۆی هەڵبژاردنەکان کۆمەڵێک ڕێنمایی سەبارەت بە خەرجکردنی بانگەشەی هەڵبژاردن لەلایەن کاندیدەکان و هاوپەیمانییە سیاسییەکانەوە دەرکرد کە لە هەڵبژاردنی پەرلەمانی ساڵی 2025دا خۆیان کاندید دەکەن. لە ڕێنماییەکاندا هاتووە کە زۆرترین خەرجی بانگەشەی هەڵبژاردن بۆ کاندیدێک بە 250 دینار دیاریکراوە، بە چەند هێندەی ژمارەی دەنگدەرانی ئەو قەزای هەڵبژاردنەی کە خۆی تیایدا کاندید دەکات. سنووری خەرجکردن بۆ لیستی حزبی بە بەکارهێنانی ئەم فۆرمولەیە حیسابی بۆ دەکرێت: (ژمارەی کورسییەکانی پارێزگا × 2 × 250 دینار × ژمارەی دەنگدەر). تا وادەی ئەم ڕێنماییانە، ژمارەی ئەو دەنگدەرانەی زانیارییەکانیان لە بەغدا نوێ کردبووەوە، (4 ملیۆن و 300 هەزار) کەسی تێپەڕاندبوو. ئەمەش بەو مانایەیە کە سنووری خەرجکردنی هەڵمەتی هەڵبژاردن بۆ هەر کاندیدێک لە پایتەخت دەتوانێت بگاتە (یەک ملیار و 70 ملیۆن) دینار. بە تەرخانکردنی (71) کورسی بۆ پارێزگاری بەغدا و هەر لیستێک کە ئەگەری هەیە تا (142) کاندید بخاتە ڕوو، کۆی سنووری خەرجییەکانی بانگەشەی هەڵبژاردن بۆ هەر لیستێک، بەتایبەتی گەورەترەکان، دەتوانێت بگاتە نزیکەی (153 ملیار) دینار.  محەمەد یونس سەعید پسپۆڕی یاسایی ڕایدەگەیەنێت، یاسای پارتە سیاسییەکان ژمارە (36)ی ساڵی 2015، لایەنەکانی ڕاسپاردووە کە سەرچاوەی دارایی خۆیان ئاشکرا بکەن، هەروەها لە بودجەی گشتی سێ ساڵەدا بەخشینێکی دارایی پێنج ملیار دینار بۆ لایەنە سیاسییەکان تەرخانکراوە. بەڵام لایەنە سیاسییەکان هەرگیز سەرچاوەی دارایی خۆیان ئاشکرا ناکەن، "ئەمەش وایان لێدەکات گومانیان هەبێت و گومانیان لەسەر تێوەگلانیان لە گەندەڵی سیاسی یان وەرگرتنی پارەی دەرەکی دروست دەکات، ئەمەش شتێکە کە لە دەستووردا قەدەغەیە". تەحەداکە لە خەرجییە ڕاستەقینەکانی لایەنە کاریگەرەکان و بلۆکە گەورەکاندایە، کە بە گوتەی محەمەد یونس، زۆر لە "سەقفی فەرمی، کە لە ئێستاوە بەرزە" زیاترە. ئەو ئاماژە بەوە دەکات کە ئەم خەرجییە ڕانەگەیەندراوە ئەوەیە کە پێی دەوترێت "پارەی سیاسی شاراوە"، کە "زۆرجار لە پارە تاڵانکراوەکانی گەنجینەی گشتی- گەندەڵی، کۆمیسیۆن و خراپ بەڕێوەبردنی داراییەوە سەرچاوە دەگرێت". بە پشتبەستن بە داتاکانی کۆمسیۆن، کە سنووری خەرجکردن بۆ هەر کاندیدێک بە بەکارهێنانی فۆرمولەی (ژمارەی دەنگدەران x 250 دینار) حیسابی بۆ دەکات، زۆرترین سنووری خەرجکردن لە قەزایەکدا کە بە مەزەندەکردنی (650 هەزار) دەنگدەر، وەک موسەننا، نزیکەی (162 ملیۆن) دینار دەبێت. بڕیارە سنووری خەرجکردنی کاندیدێک لە قەزایەکدا کە ملیۆنێک دەنگدەری هەبێت، وەک سەلاحەدین، نزیکەی (250 ملیۆن) دینار بێت. بەڵام چاودێران جەخت لەوە دەکەنەوە کە کاندیدە سەرەکییەکان چەندین هێندەی ئەم بڕە پارەیە خەرج دەکەن. ئەو ئامارانەی لە بازنە سیاسییەکاندا دەسوڕێنەوە، کە لەلایەن (عصام شاکر) ئەندامی چوارچێوەی هەماهەنگییەوە پشتڕاستکراونەتەوە، ئاماژە بەوە دەکەن کە هەندێک لە کاندیدەکان "تا ئێستا لە نێوان 4 بۆ 5 ملیار دیناریان خەرجکردووە، لەگەڵ چاوەڕوانی زیادبوونی خەرجییەکان دواتر". ئەمەش بەو مانایەیە، کە ئەو پارەیەی خەرج دەکرێت بە دەیان هێندە لە سنوورەکە زیاترە، ئەمەش بەپێی قەبارەی قەزاکە. ئاماژە بەوەش دەکات، لە قەزایەکی بچوک کە نزیکەی 100 هەزار دەنگدەری تێدایە، “سنوری خەرجکردنی یاسایی لە (25 ملیۆن) دیناری عێراقی تێناپەڕێت، هاوکات داتاکان ئاماژە بەوە دەکەن کە هەندێک لە کاندیدەکان نزیکەی (پێنج ملیار) دیناریان خەرجکردووە، واتە نزیکەی (200) هێندەی سنووری دیاریکراو”. سەبارەت بە قەزا مامناوەندەکان، کە نزیکەی (300 هەزار) دەنگدەریان هەیە، دەڵێت “سنوری ڕێگەپێدراو (75 ملیۆن) دینارە، بەمەش خەرجییە ڕاپۆرتکراوەکانی (پێنج ملیار) دینار زیاترە لە نزیکەی شەست و حەوت هێندەی سنوورەکە”. سەبارەت بە بازنە گەورەکانی هەڵبژاردن کە ژمارەی دەنگدەران دەگاتە نیو ملیۆن کەس، "سەقفی یاسایی بە نزیکەی (125 ملیۆن) دینار خەمڵێندراوە، لەکاتێکدا خەرجییە ڕاستەقینەکەش لە ئاستی (پێنج ملیار)یشدا دەمێنێتەوە، کە نزیکەی چل هێندەی سەقفی یاساییە" پارەی پێویست بۆ بنیاتنانی ژێرخان بەراوردە ئابوورییەکان دەریدەخەن، کە کۆی ئەو بڕە پارەیەی کە بۆ بانگەشەی هەڵبژاردنەکان لە عێراق خەرج دەکرێت، یەکسانە بە دابینکردنی بودجە بۆ پڕۆژە خزمەتگوزارییە گەورەکان کە دەتوانن ژێرخانی وڵاتەکە بگۆڕن. توێژەر (عادل کەمال) دەڵێت، بۆ نموونە (چوار تریلیۆن) دینار- بەلانی کەمەوە بۆ ئەو پارەیەی بۆ بانگەشەی هەڵبژاردن خەرج دەکرێت- دەتوانێت یەکێک یان زیاتر لەم پڕۆژانەی خوارەوە دابین بکات: -    (110 هەزار) یەکەی نیشتەجێبوون بە نرخێکی گونجاو، بە گریمانەکردنی تێچووی هەر یەکەیەکی (100 ملیۆن) دینار. -    (هەزار و 860) قوتابخانەی بنەڕەتی ستاندارد، بە تێکڕا (6 ملیار) دینار بۆ هەر قوتابخانەیەک. -    (92) نەخۆشخانەی توانای مامناوەند (150 قەرەوێڵە)، بە تێکڕا (120 ملیار) دینار بۆ هەر نەخۆشخانەیەک. -    (8 هەزار و 400) کیلۆمەتر ڕێگای شارەکان، بە تێکڕا (1.3 ملیار) دینار بۆ هەر کیلۆمەترێک. کەمال ئاماژە بەوە دەکات کە بانگەشەکانی هەڵبژاردن بە شێوەیەکی گشتی کەرتە جیاوازەکان هان دەدەن، لەوانە کۆمپانیاکانی ڕیکلام، چاپکردن، لۆجستی و میدیا، هەروەها فرۆشتنی تاکەکەسی و میوانداری. بەڵام ئەم پەرەسەندنە کاتییە و بەستراوەتەوە بە خودی بانگەشەکانی هەڵبژاردنەوە؛ بۆیە بەرهەمدار نییە بەڵکو بەکاربەرییە. خەرجییە داراییەکان لەم ڕووەوە دابەش دەکات بەسەر سێ ڕێڕەودا: 1.    "ڕیکلام و میدیا، کە بریتییە لە کەمپەینی تەلەفزیۆنی، ڕیکلامی تابلۆی بازرگانی، بەڕێوەبردنی کەمپەینی سۆشیال میدیا، و فێستیڤاڵ و بۆنە گشتیەکان." 2.    "یارمەتی و خزمەتگوزارییە کۆمەڵایەتییەکان، کە هەندێک لایەن پەنا بۆ دابینکردنی سەبەتەی خۆراک یان داپۆشینی پێداویستییەکانی کۆمەڵگا دەبەن بۆ بەدەستهێنانی پشتیوانی دەنگدەران." 3.    "کڕینی دەنگ و دڵسۆزی، کە هەستیارترین لایەنە. ئەمەش بە پێشکەشکردنی پارە، دیاری، یان بەڵێنی پۆست لە بەرامبەر دەستەبەرکردنی دەنگدا دەکرێت، بەتایبەتی لەو بازنانەی کە کێبڕکێیەکی زۆریان لەسەرە". هەروەها ئەمەش ئەو بڕە پارەیە دەگرێتەوە کە دەدرێت بە سەرکردەکانی هۆزەکان و میوانخانەکانیان بۆ دڵنیابوون لە پشتیوانی. جگە لە خەرجییە زەبەلاحەکانی بانگەشەی هەڵبژاردنەکان کە بەرزترین خەرجییە لە مێژووی وڵاتدا، هەڵبژاردنەکان زیانی بەرفراوانیشی بە (١٥) پارێزگا گەیاندووە. بەگوێرەی ڕوانگەی سەوزی عێراق، لە ئەنجامی "بەکارهێنانی بزمار و چیمەنتۆ بۆ چاککردنی پۆستەری هەڵمەتی هەڵبژاردنەکان" نزیکەی (250 هەزار) دار زیانیان بەرکەوتووە. ڕوانگە لە بەیاننامەیەکدا کە لەلایەن دەزگاکانی ڕاگەیاندنەوە بڵاوکراوەتەوە، ڕوونیکردەوە کە "ئەو زیانانە درێژبوونەتەوە بۆ شەقامەکانی هاتوچۆ و سیستەمی ئاودێری و نافورەکان، کە لەژێر قورسایی وێنە و دروشمەکاندا دیارنەماون"، هەروەها "ئەوەی ڕوودەدات ڕەنگدانەوەی ڕێزنەگرتنە لە یاسا تەنانەت پێش ئەوەی سندوقەکانی دەنگدان بکرێنەوە". لەگەڵ نزیکبوونەوەی وادەی دەنگدان، قەبارەی خەرجییەکانی بانگەشەی هەڵبژاردن و سەرچاوەی ئەو پارانە مشتومڕێکی زۆری دروست کردووە، بەغدا لە نێو شارەکانی عێراقدا وەک "گۆڕەپانێکی گەورە و پشێوی خەرجکردن" جیاوازە، بە گوتەی چالاکوان (سەلام موعتەز) دەڵێت؛ بووەتە ناوەندێک بۆ چالاکییە داراییە بەرفراوانەکان کە لەلایەن "لیست و لایەنە سیاسییەکانەوە سەرکردایەتی دەکرێت لەڕێگەی خەرجکردنی بێ وێنە بۆ ڕیکلام، دامەزراندنی هەزاران کارمەندی میدیا و ستافی پشتیوانی، و بەکارهێنانی کۆمەڵێکی بەرفراوانی کرێکار لە ڕێکخستنی بۆنە و خواردن و خواردنەوە و بوارەکانی دیکەدا." ئاماژە بەوە دەکات کە ئەم "شەپۆلە داراییە زەبەلاحە، کە دەگاتە سەدان ملیۆن دۆلار، کاریگەری کاتی لەسەر ئابووری بەغدا هەیە، بەڵام وەرگێڕانی بۆ گەشەسەندن نییە، بە کۆتایی هاتنی ڕۆژی هەڵبژاردن کۆتایی دێت." بەغدا یەکەم، ئەنبار دووەم! بەپێی ئەو خەمڵاندنانەی کە لەلایەن کاندیدەکان و چالاکوانانی چاودێری بانگەشەی هەڵبژاردنەکانەوە بڵاوکراونەتەوە، پارێزگاکانی (زۆرینەی سوننە) پێشەنگن لە خەرجییەکانی بانگەشەی هەڵبژاردنەکاندا. (فەلاح ئەلعانی)، ئابووریناس و ئەکادیمیست هاوڕایە و ئاماژە بەوە دەکات کە لایەنە سوننەکان گەورەترین خەرجکەرن بۆ پڕوپاگەندەی هەڵبژاردن، هەرچەندە ئەمە بەپێی پارێزگاکان جیاوازە و بەندە بە پلەی دابەشبوونی ناوخۆیی سوننە لەناو هەر پارێزگایەکدا. بەگوتەی ئەلعانی، خەرجییەکان بە پلەی یەکەم لە بەغدا چڕبوونەتەوە بەهۆی “ژمارەی بەرچاوی کاندیدەکان لە پایتەخت و ژمارەیەکی زۆری دەنگدەران، هەروەها مەودای هەمەچەشنی خەرجییەکان، لە پارەی نەختینەیی و پۆستەرەوە تا دەگاتە قیرتاوکردنی ڕێگاوبان و پڕۆژەی خزمەتگوزاری، بەتایبەتی لە ناوچەی پشتێنەی بەغدا”. پارێزگای ئەنبار لەڕووی خەرجییەکانەوە لە دوای بەغداوە لە پلەی دووەم دێت، بەتایبەتی دوای هاتنە ناوەوەی حزب و گروپەکانی دیکە، کە کێبڕکێیان لەگەڵ پارتی پێشکەوتن (تەقەدوم) هەیە، کە محەمەد حەلبوسی سەرۆکی پێشووی پەرلەمان سەرۆکایەتی دەکات، کە پارێزگاکە و سەرجەم دامودەزگاکانی کۆنتڕۆڵ دەکات. بەگشتی پارتە سوننەکان زیاتر لە (400 ملیۆن) دۆلاریان خەرج کردووە، "تەرکیزیان لەسەر کڕینی کارتی تۆماری دەنگدەران، بەرتیلدان، بازرگانیکردن بە کاریگەرییەکان، هەڵمەتی خزمەتگوزاری و دەستەبەرکردنی پشتیوانی بۆ کاندیدە بەهێزەکانە." بە گوتەی ئەلعانی. ئەو ئەوەی ئاشکرای دەکات کە ناوی دەنێت “سەیرترین میکانیزمی خەرجکردنی بانگەشەی هەڵبژاردن”، واتە “هەر کاندیدێکی بەهێز لە لایەنی بەرامبەر بکشێتەوە، نزیکەی (500 ملیۆن) دیناری عێراقی وەردەگرێت، هەندێکجار دەگاتە (یەک ملیار) دینار”. هەروەها ئاماژە بە بوونی کاندیدەکان دەکات کە تەنها بۆ “لەکەدارکردنی ناوبانگی کاندیدەکانی تر و دابەشکردنی دەنگەکان لە لیستەکاندا خراونەتە ناو لیستەکانەوە، و بەلایەنی کەمەوە (100 ملیۆن) دیناریان وەرگرتووە”. کوردستان کەمتر خەرج دەکات پارێزگاکانی هەرێمی کوردستان بە بەراورد بە بەغدا و پارێزگاکانی زۆرینەی سوننە و تەنانەت هەندێک لە پارێزگاکانی باشووریش کەمتر خەرجی بانگەشەی هەڵبژاردن دەکەن. ئەمەش دەگەڕێتەوە بۆ ئەوەی، کە بە دابەشبوونی سیاسی هەرێم لە نێوان ناوچەکانی نفوزی یەکێتی نیشتمانی کوردستان و ناوچەکانی نفوزی پارتی دیموکراتی کوردستان وەسف دەکرێت، کە تەنها دوو لیستیان لێ دەردەکەون، کە هەریەکەیان کێبڕکێ لەگەڵ لیستە بچووکەکان دەکەن لە ناوچەکانی نفوزی خۆیاندا. چاودێرانی چالاکییەکانی هەڵبژاردن لە کوردستان ئاماژە بەوە دەکەن، کە بانگەشەکان بە بەراورد لەگەڵ ناوچەکانی دیکە بێدەنگترن. کاریگەری دارایی زیاتر لە ناوچە جێناکۆکەکانی وەک کەرکوک و نەینەوادا بەرچاوە، کە شەڕەکان بۆ کاریگەریی سیاسی تێکەڵ بە ململانێی شوناس و سەربەخۆیی بوون. فەرمان حسێن، توێژەری ئابووری دەڵێ، "تا ئێستا بانگەشەی هەڵبژاردن لە هەرێم کەمترینە، زۆرترین خەرجی لەلایەن لایەنە سەرەکییە کوردستانییەکانەوە لە ناوچە کێشەلەسەرەکان چڕبووەتەوە، بەتایبەتی کەرکوک و نەینەوا، کێبڕکێی توند لەم ناوچانەدا هەیە بەو پێیەی هەردوولا هەوڵدەدەن بۆ پاراستنی بوونی کورد، هەروەها لەبەرئەوەی ئەو ناوچانە نوێنەرایەتی کایەیەکی ڕاستەوخۆی نفوز یان دەسەڵات ناکەن بۆ هیچکام لەو دوو لایەنە سەرەکییە". سەرەڕای ئەمەش، حوسێن پێشبینی دەکات خەرجی هەڵبژاردنەکان زیاد بکات، “لە کۆی خەرجییەکانی سەرجەم لایەنەکان بۆ بانگەشەی هەڵبژاردن، بە خەرجییەکانی کاندید و کەرەستەی بانگەشەی هەڵبژاردنەوە، کە زۆرینەی زۆرینە بۆ ناوچە جێناکۆکەکان تەرخان بکرێت، تێدەپەڕێت”. لە پارێزگاکانی هەرێمی کوردستان نزیکەی (300) کاندید هەن، ئەمە جگە لەوەی نزیکەی (150) کاندید لە پارێزگاکانی دیکەی دەرەوەی هەرێم کە کورد تێیدا ڕکابەری دەکەن، بەتایبەتی لە نەینەوا. ئەم ژمارە تاڕادەیەک کەمەی کاندیدەکان بە واتای خەرجکردنی بەرچاو کەمتر دێت بە بەراورد بە ناوچەکانی دیکەی وڵات. لای خۆیەوە هێڤیدار شەعبان شارەزای ئابوری کورد پێی وایە، کە بانگەشەی هەڵبژاردن لە کوردستان تەنها بۆ هەردوو پارتی دەسەڵاتدار (پارتی دیموکراتی کوردستان و یەکێتی نیشتمانی کوردستان) سنوردارە و کەمترین خەرجی بۆ هەر کاندیدێک لە (20 هەزار) دۆلارەوە دەستپێدەکات و بەو پێیە زیاد دەکات. سەبارەت بە لایەنە ئۆپۆزسیۆنەکانی کوردستان، بە حزبە ئیسلامییەکانەوە، زۆرترین خەرجی بۆ هەر کاندیدێک، بەتایبەتی دیارەکان دەگاتە (30 هەزار) دۆلار. بە گشتی خەرجی حزبی بۆ بانگەشەی هەڵبژاردن لە کوردستان لە (13 ملیۆن) دۆلار تێنەپەڕیوە، بەڵام ئەم ژمارەیە دەتوانێت لە هەفتەی کۆتاییدا سێ هێندە زیاد بکات لەگەڵ چڕبوونەوەی کێبڕکێیەکان، ئەمە شەعبان دووپاتی دەکاتەوە. بەڵام لایەنە ئۆپۆزسیۆنەکان بانگەشەی ئەوە دەکەن کە دوو پارتی دەسەڵاتدار بە شێوەیەکی بەرچاو زیاتر خەرج دەکەن، هەروەها ئەم خەرجییە سنووردار نییە بە وەرزی هەڵبژاردن، بەڵکو چەند مانگێک پێشوەختە لە ڕێگەی دەستەبەرکردنی دڵسۆزی سەرۆک خێڵ و عەشیرەت و کەسایەتییە کۆمەڵایەتییە کاریگەرەکانەوە دەست پێدەکات. سەرچاوەکانی پارەدان بۆ بانگەشەی هەڵبژاردن نووسەر و شرۆڤەکاری سیاسی (عەبدولجەبار جبوری)، خەڵکی موسڵ، هاوڕایە لەسەر ئەوەی “بودجەی زیادەڕۆیی و هەڵئاوساوی قەوارەو لیستە بەشداربووەکانی هەڵبژاردنی پەرلەمان یان لە دەستکەوتی نایاسایی- پڕۆژە و داهاتی قاچاخی نەوت و گەندەڵی بازرگانییەوە سەرچاوە دەگرێت- یان لە بودجەی دەرەکیی زلهێزە ناوچەییەکان کە کاریگەریی سیاسی و ئابووری و ئەجێندایان هەیە لە عێراقدا.” لە درێژەدا دەڵێت، "قەوارە سیاسییەکان ملیارەها دۆلاریان لە هەڵمەتی هەڵبژاردنەکانی کاندیدەکانیان خەرج کردووە، لەوانە ئۆتۆمبێل، کرێی خانوو و ئۆفیس، ڕیکلامی گەورە و کڕینی کارتی دەنگدەر بە بڕە پارەیەکی خەیاڵی، ئەمەش جگە لە خراپ بەکارهێنانی سامانی دەوڵەت و کاریگەری و ئۆتۆمبێل و ترساندنی ئەندامانی هێزەکانی حەشدی شەعبی و پۆلیس و سوپا بۆ دەنگدان بە لیستە تایبەتەکان، کە هەر ئەندامێک پێویستە (15 کارت)ی دەنگدەر یان زیاتر دابین بکات”. لە کۆتاییدا دەڵێت “هەڵمەتەکانی هەڵبژاردن ئەو قەوارە سیاسیانەی ئاشکرا کرد کە لایەنە کاریگەرەکان پاڵپشتییان دەکرد و بڵاوبوونەوەی چەک و کەسایەتییە گەورە گەندەڵەکان، کە کۆنترۆڵی پرۆسەی سیاسی دەکەن”. دەشڵێت، “ئەو بودجەیەی بۆ بانگەشەی هەڵبژاردن تەرخانکراوە گەورەترینە لە مێژوودا، خراپترینە لە مێژوودا بەهۆی پەڵەی سەرچاوەکەیەوە”. وەلاء مستەفا، دەرمانسازێکی تەمەن 37 ساڵە و خەڵکی پارێزگای نەینەوا، نائومێدی گشتی خۆی لە هەڵبژاردنەکان دەردەبڕێت و دەڵێت، “هەموو ئەم پارەیەی خەرج دەکرێت، لەگەڵ ئەوەشدا بێباکی دەنگدەران لەگەڵ هەر خولێکی هەڵبژاردندا زیاتر دەبێت”. هۆکارەکەی، ئەو ڕوونی دەکاتەوە، ئەوەیە کە هەمان قەوارە سیاسییەکان زیاتر لە دوو دەیەیە کێبڕکێ لەسەر پۆست و ئیمتیازات دەکەن. ئەو دەپرسێت، "بەهای ئەو هەڵبژاردنانە چییە، کە هیچ هیوایەک بۆ گۆڕانکاری پێشکەش ناکەن، هەڵبژاردنێک کە پێشتر براوەکان ناسراون- ئەو پارتە گەورە و کاریگەرانەی کە هەموو شتێک لە نێوان خۆیاندا دابەش دەکەن بەپێی ئەوەی ئێستا بە سیستەمی پشکەکان ناسراوە؟" ئەو دووپاتی دەکاتەوە کە بایکۆتی هەڵبژاردن دەکات، "نەک لەبەر ئەوەی باوەڕم بە پرۆسەی دیموکراسی نییە، کە پێویستمانە بۆ خۆمان و داهاتووی منداڵەکانمان، بەڵکو لەبەر ئەوەی نیشانەکانی گەندەڵیەکەی لە بانگەشەکاندا دیارە، کە بێ گومان تێچوونەکانی لە سامانی گشتی ئێمەوە دێت، کە دەبوو بۆ پڕۆژەی خزمەتگوزاری و ژێرخانی خەڵک بەکاربهێنرێت، نەک بۆ ئەوەی کاندیدەکان بۆ پەرلەمان هەڵبژێردرێن!"   

درەو: بافڵ تاڵەبانی سەرۆكی یەكێتیی لە كۆتا وتاری بانگەشەی هەڵبژاردنی حزبەكەیدا لە سلێمانی - غەبغەبە.. جیاوازییەكی تری ئێمەو خەڵكی ترە. جەنابی كام مەسعود داوای بانگەشەیەكی ئارامی كرد، بە قسەیان نەكرد، بۆیە من ئەمڕۆ دێمە جواب. - ئەوانەی دوای ئەنفالی بارزانییەكان، سواری دەبابەی سەدام بوون بۆ خوێنی كورد، ئەوان ئێوە رزگار دەكەن؟ - دوای 31ی ئاب وتیان ئێمەو سەددام دوژمنی یەك نین، ئەوە ئیشارەتی خیانەتە. - 31ی ئاب رۆژێك نییە لە بیر بچێ، دنیا لەبری ناچێتەوە ئەوانەی ئەو جەریمەیان كرد، ئەوانەی تیجارەتی نەوتیان ئەكرد لەگەڵ داعش، ئەوانەی چاویان داخست كە خوشك و برا ئێزیدییەكانمان جینۆساید كرا، ئەوانەی ئەو هەموو رەئیس عەشیرەتەیان كوشت، ئەوانەی ئەو هەموو عەشیرەتەیان مەجبور كرد ببن بە جاش، ئەوانەی كە دەوڵەمەندبوون و بە خوێن و نەوتی ئێوە دەوڵەمەند بوون و غەبغەبەیان بۆ دروست بوو، ئەوانە باسی كوردایەتی بۆ ئێمە ئەكەن؟! - لەم كاتەدا خاكی ئێمە ئەفرۆشن بە توركیا. - یەكێتیی و ئەم شارە ناتوانن بكڕن، ناتوانن تەهدیدمان بكەن. - ئەوانەی سجنەكانمان پڕ دەكەن لە ئەكتیڤیست و رۆژنامەنوس، ئەوان باسی ئازادی بۆ ئێمە دەكەن؟ - سلێمانی بڕبووە لە خەڵك، چەند هەولێری لە زوڵمی ئەوان رایكردووەو ئەمڕۆ لێرەیە، چەند بزنسمان هەولێری بەجێهێشت لەبەر زەریبەی غەبغەیە تا بێت لێرە بیزنس بكات. - خەڵكی كوردستان باش ئەزانن موشكیلەی معاش كێ دروستی كردو كێ چارەسەری كرد. - كە لە ئێران هاتنەوە كێچەكانیان كێچیان هەبوو، ئێستا سەیری بكە 50 قەسریان هەیە، 50 تەیارەیان هەیە، 50 فۆتۆ مۆدێلیان هەیە، داوەشێی بۆ خۆت و كوردایەتییەكەن.

(درەو): شاسوار عەبدولواحید سەرۆكی جوڵانەوەی نەوەی نوێ لە پەیامێكدا لە زیندانەوە بۆ كۆتا رۆژی هەڵمەی بانگەشەی هەڵبژاردنی جوڵانەوەكەی:  🔹یەكێتیی لە ئێستاوە خەمی سەرۆك كۆمارییەتی و نایەوێ دڵی پارتی عاجز بكات.  🔹لێدان لە پارتی لێدانە لە یەكێتیی، چونكە یەكترییان راگرتووە.  🔹لەم زیندانەوە پێتان دەڵێم رۆژی روخانی دەسەڵات نزیكە. وا ئەزانن بە زیندانیكردنی من بەر لە روخانیان دەگرن.  🔹مەسرور بارزانی 7 ساڵە بە ناشەرعی لە پۆستەكەیدایەو خراپترین حەوت ساڵی حوكمڕانییە. 🔹لە تاكە وێنەیەكی ئێمە دەترسن كە لە شەقامەكاندا هەڵمانواسیوە.  🔹پێشنیارمان بۆ هێزەكانی دەرەوەی پارتی كرد حكومەتێك دروستبكەین كە سەرۆكەكەی پارتی نەبێت.  🔹ئەو یەكێتییەی پار خۆی و سەرۆكەكەی بانگەشەی توندیان دەكرد دژی پارتی، جورئەتیان نەبوو بە پێشنیازەكەی نەوەی نوێ رازی بن بۆ ئەوەی سەرۆكی حكومەت لە پارتی بسەنینەوە. دوای هەڵبژاردن رێگەی سەری رەشیان كردبوو بە رێگەی كانی بۆ ئەوەی پۆستی جێگریی و جانتاهەڵگریی وەربگرن بەبێ ئەوەی هیچ دەسەڵاتێكی هەبێت. 🔹بەدیلی راستەقینەی دەسەڵات نەوەی نوێیە. 🔹هەموو جارێك كە خەڵك بایكۆتی كردووە لە بەررژەوەندی دەسەڵات بووە. 🔹هێزە بچوكەكان دەنگیش بهێنن دەنگەكانیان دەفەوتێت.  🔹هەڵبژاردنی ساڵی 2021دا تەنیا لە سنوری سلێمانی 80 هەزار دەنگ فەوتا، چونكە دەنگیان دابوو بە هەندێك حزب و لایەنی بچوك، كە بەشی كورسی نەكردبوو.

درەو: مەسعود بارزانی سەرۆكی پارتی دیموكراتی كوردستان لە هەڵمەتی هەڵبژاردنی حزبەكەی لە هەولێر:  - ئێمە دەزانین لە هەڵبژاردنی ئەمجارەش گۆڕانکاریی بەسەر کورسییەکاندا نایەت چونکە پێشوەخت کورسییەکان دەستنیشان کراون - کاتی نووسینی دەستوورەکەش گوتمان کە دەستوورەکە بێ کەم و کوڕی نییە، بەڵام بەشی ئەوە ئیجابیتی تێدایە کە ئێمە پشتیوانیی دەکەین، ئەگەر جێبەجێ کرابووایە، زۆرێک لەو کێشانەی کە ڕوویاندا، ڕوویان نەدەدا. -  ئەگەر ئەم سێ بنەمایە جێبەجێ کرابووایە و پابەندی بە دەستوور کرا، ئیتر لە زوڵمی مەرکەزییەتی چەوسێنەر ڕزگارمان دەبێت و تەواوی خەڵکی عێراق بە ئاسوودەی ژیان دەباتە سەر. - چیتر کەس ناتوانێت بە ئارەزووی خۆی بە مووچە و بودجەی هەرێم بکات، کە جگە لەوەی زوڵمێکی گەورەیە، ئیهانەیەکی گەورەش بوو بۆ خوێنی شەهیدانی ئێمە کە نابێت ئەمە دووبارە ببێتەوە. -  هیچ ڕەوا نییە کورسییەک لە هەولێر بە 40 هەزار دەنگ بێت، ڕێژەی بەشداربووان 70 بۆ 80 لە سەد بێت، بەڵام لە پارێزگایەکی دیکەی عێراق، لە باشووری عێراق هەمان کورسی بە دوو هەزار دەنگ بێت، ڕێژەی بەشداربووانیش سەدا 20 کەمتر بێت.  - دوای هەڵبژاردنەکانی پەرلەمانی کوردستان، داوامان لە هەموو لایەنە سیاسییەکان کرد حکوومەتێکی بنکە فراوان پێکبهێنن، بەڵام بەشی زۆری لایەنەکان ئۆپۆزسیۆنیان هەڵبژارد، ئێمەش ڕێزیان دەگرین، دواتر لێژنەی باڵای پارتی و یەکێتیی کەوتنە گفتوگۆ بۆ پێکهێنانی کابینەی نوێ. - پارتی و یەکێتیی لەسەر دوو خاڵ گفتوگۆیان کرد، شێوازی حکوومڕانی و دابەشکردنی پۆست، لەسەر خاڵی یەکەم گەیشتنە ڕێککەوتن، لەسەر خاڵی دووەم هەموو نەرمییەکی نواند، بەڵام بەداخەوە یەکێتیی ویستی کات بکوژێت تا دەگاتە هەڵبژاردنی ئەنجوومەنی نوێنەرانی عێراقی، کە چەند ڕۆژێکی کەمی ماوە، بۆ ئەوەی ئەوکات بیر لەوە بکەنەوە بێنە ناو حکوومەت، بەڵام ئەو هەلومەرجەی پێش هەڵبژاردن هەبوو، دوای هەڵبژاردن نامێنیت.   دەقی وتارەكەی مەسعود بارزانی   بە ناوی خوای گەورە و میهرەبان خوشك و برایانی خۆشەویست هەڤاڵانی بەڕێز خۆشحاڵیم وەسف ناكرێ كە ئەمڕۆ لە خزمەتی ئێوەدام، هەمووتان بەخێربێن سەرسەر و سەرچاوان.  خۆشەویستان ئامادەبوونی ئێوە بەم حەماسەتەوە، بەم مەعنەویاتە بەرزەوە هەمیشە ئومێدبەخشە بۆ ئێوە.  هەروەك ئاگادارن سێ چوار رۆژمان ماوە بۆ هەڵبژاردن، هەڵبژاردن راستترین رێگەیە بۆ ئەوەی گەل بڕیار لە چارەنووسی خۆی بدات و رەئی خۆی بدات. بە نسبەتی ئێمە مەسەلەیەكی مەبدەئییە. هەڵبژاردنی ئەمجارەش ئێمە دەزانین گۆڕانكاریی بەسەر كورسییەكاندا نایەت چونكە پێشوەختە كورسییەكان دەستنیشان كراون، بەڵام بەشدار بووین لەبەر دوو هۆی سەرەكی: یەكێكیان، زۆر لە دۆستان و هاوخەباتان لە ناو عەرەبەكانیش و دۆستەكانمان لە دەرەوەش هەموو داوایان كرد كە بەشدار بین و پەیامی زۆر ئەرێنیمان پێ گەیشتن لە زۆر لە دۆستانمان لە هاوخەباتانمان لە بەغدا كە رەنگە ئەم هەڵبژاردنە راستە كورسییەكان ناگۆڕێن بەڵام ڕێگەخۆشكەر دەبێت بۆ ئەوەی پرۆسەی سیاسی لە عێراق بگەڕێنینەوە بۆ سەر ڕێگەی راستی خۆی، كە ئەمە دەرفەتێكی زۆر باشە، بۆیە ئێمە بەشدار بووین و لەگەڵ ئەو دۆستانە، ئەو هاوبیرانەی كە وا بیر دەكەنەوە عێراق پێویستیی بەوەیە چاكسازیی بنەڕەتی تێدا بكرێ، ئێمەش لەگەڵ ئەوان دەست دەخەینە ناو دەست و هەموو هەوڵێك دەدەین. هۆی دووەم، بۆ ئەوەی سەنگی پارتی پیشانی هەموو لایەك بدرێ. بۆیە داواتان لێ دەكەم، هەرچەندە لەو قەناعەتەم كە ئێوە پێویستیتان بە تەوسییە نییە، بەڵام دەنگ بدەن بە لیستی ٢٧٥ بۆ ئەوەی وەڵامێك بێت بۆ هەموو ئەوانەی بە خەیاڵ دەژین. هەڤاڵان پارتی بەرچاوی ڕوونە، پارتی دەزانێ چی دەوێ و دەزانێ چی دەكات، هەروەك گوتم ئەگەر ئەم هەڵبژاردنە ئەو دەرفەتەی رەخساند كە لەگەڵ هاوخەباتان و دۆستانی ترمان بتوانین چارەسەری دۆخەكە بكەین و عەمەلیەی سیاسی بگەڕێتەوە بۆ رێگەی راستی خۆی، ئەمە بەرنامەی پارتی دەبێت، بەرنامەی پارتی دەبێت بۆ داهاتوو: یەك: یاسای هەڵبژاردن دەبێ بگۆڕدرێ و بگەڕێتەوە بۆ یەك بازنەیی لەسەر ئەساسی لیستی حزبی یان لیستی نیمچە كراوە. بەم یاسایەی كە ئێستا هەیە، یاسایەكی ناعادلە، یاسایەكە مافی هەموو لایەك بزر دەكات، تەنها هی چەند لایەنێك كە بە كەیفی خۆیان دایانڕشتووە. لەبەر ئەوە ئەم قانونە بە كەلكی ئەوە نایەت و كارێكی جددی دەكەین بۆ ئەوەی ئەم قانونە بگۆڕدرێ. مەعقول نییە كورسییەك لە هەولێر بە ٤٠ هەزار دەنگ بێت، ڕێژەی بەشداربوان ٧٠ تا ٨٠٪ بێت، بەڵام لە پارێزگایەكی تر لە عێراق و لە باشووری عێراق، هەمان كورسی بە ٢ هەزار دەنگ بێت و ڕێژەی بەشداربوانیش ٢٠٪ كەمتر بێت. دوو: هەوڵدەدەین بۆ دامەزراندنی ئەنجوومەنی فیدراڵی یان مەجلیسی ئیتیحاد كە ئەمە زامنێك دەبێت بۆ مافی هەرێم و مافی پارێزگاكانی تری عێراقیش.  سێ: یاسایەك بەپێی دەستوور بۆ زەریبە و رسوومات دەربچێت. چوار: ماددەی ١٤٠ نە لەبیر دەكرێت، نە وازی لێ دەهێنین، دەبێ جێبەجێ بكرێت. لێرەدا دەمەوێت بەو خوشك و برایانەی لە ناوچەكەی دەرەوەی ئیدارەی هەرێمن پێیان بڵێم، دڵنیا بن ئێوە لەناو دڵی ئێمەدان. پێنج: دەركردنی یاسای نەوت و غاز بە شێوەیەك كە بگونجێ لەگەڵ دەستوور بۆ ئەوەی ئیتر هیچ بەهانەیەك نەمێنێت بەدەست ئەوانەی كە یاریی بە هەموو شتێك دەكەن لە بەغدا. شەش: قەرەبووی زیانلێكەوتوانی ئەنفالكراوان و كیمیاباران و دێهاتە ئەنفالكراوەكان، ئەمە ئەركی حكوومەتی عێراقە و دەبێ جێبەجێی بكات. حەفت: لە هەمووی گرنگتر گەڕانەوەی عێراقە بۆ سەر ئەو سێ بنەمایەی كە لەسەر ئەساسی ئەو سێ بنەمایە عێراقی تازە لە دوای ٢٠٠٣ دروست كرا، ئەویش (هاوبەشی، هاوسەنگی، سازان). لە كۆنفرانسی لەندەن پێشی رووخانی رژێم رێككەوتن كرا لەسەر ئەم سێ بنەمایە و رۆحی دەستوور ئیلهامی لەو سێ بنەمایە وەرگرتووە، ئەگەر بگەڕێینەوە بۆ ئەو سێ بنەمایە ئیتر هیچ موشكیلەیەك نامێنێت لە سەرتاسەری عێراق، نە لە نێوان هەرێم و بەغدا، نە لە پارێزگاكانی تریش.  هەشت: گەڕانەوە بۆ دەستوور، ئێمە پابەندین بە دەستوور، كەس بە قەد ئێمە ماندی نەبووە بەم دەستوورەوە. ئەو وەختەش من گوتم ئەم دەستوورە بێ كەموكوڕی نییە، بەڵام بەشی ئەوە ئیجابیاتی تێدایە كە ئێمە تەئیدی دەكەین و ئەگەر جێبەجێ بكرابا، زۆر لەو مەشاكیلانەی روویان دا، ڕوویان نەدەدا. ئەگەر ئەو سێ بنەمایە گەڕانەوە و ئیلتزام بە دەستوور كرا، ئیتر لە زوڵمی مەركەزیەتی چەوسێنەر نەجاتمان دەبێت و هەموو خەڵكی عێراق بە ئاسوودەیی ژیان دەبەنە سەر و چیتر كەس ناتوانێت بەپێی میزاجی خۆی یاریی بە بودجەی هەرێم و مووچەی خەڵكی هەرێم بكات كە جگە لەوەی زوڵمێكی گەورەیە، ئیهانەیەكی گەورەش بوو بۆ خوێنی شەهیدانی ئێمە كە نابێت ئەمە دووبارە ببێتەوە. هەڤاڵان تەجروبە دەریخستووە، حوكمی عێراق تەنها بە یەك نەتەوە یان بە یەك پێكهاتە ناكرێ، دەبێ بە هاوبەشی بێ، دەبێ شەریك بین، ئەگەر بیانەوێ عێراق ئیستقرار بكات، پێش بكەوێت و مەشاكیلی نەمێنێت، گەڕانەوەیە بۆ هاوبەشی و هاوسەنگی و سازان، ئیتر هەموو جوهدێك خەرج دەكەین بۆ ئەوەی ئەمە جێبەجێ بكرێت. ئەوەی تر هەندێكجار هەڕەشەی هەندێك كەسمان گوێ لێ دەبێت، یان هەندێك كەس وەتەنیات بە خەڵكی تر دەفرۆشن یان دەپرسن ئایا ئێوە ئیلتزامتان بە عێراق هەیە یان نا؟ وەكەئەنەما عێراق موڵكی ئەوانە. لە كۆنفرانسی لەندەن ئەساسی ئەو عێراقەمان دانا و ڕۆڵی سەرەكیمان تێدا بینی، لە رووخاندنی رژێمی دیكتاتۆری پێشمەرگە و خەڵكی كوردستان رۆڵی سەرەكییان بینی، لە دامەزراندنی عێراق و دەستوور خەڵكی كوردستان رۆڵی سەرەكییان بینی، بەڵێ ئێمە لەگەڵ عێراقین، بەڵام عێراقێك كە شەریك بین، هاوسەنگ بین، هاوبەش بین، نەك عێراقێك مەجمووعەیەك مافیا بیانەوێ داگیری بكەن و حوكمی لێ بكەین، ئێمە لەگەڵ عێراقێكی فیدرالی دیموكراتی فرەنەتەوەیی، فرەحزبی، فرەئایینی، فرەمەزهەبین، ئێمە لەگەڵ عێراقی دیكتاتۆری نەبووین و ناشبین.  ئێمە بڕوامان بە پێكەوەژیان هەیە، ئەو فەرهەنگەی بۆ ئێمە ماوەتەوە لە كوردستان، ئێمە پێی سەربەرزین، لە هەموو موناسەباتێكدا، لە هەموو شوێنێك كە باسی فەرهەنگی پێكەوەژیان دەكرێ لە كوردستان، هەست بە سەربەرزییەكی گەورە دەكەین، ئێمە دەبێ ئەو فەرهەنگە بپارێزین و قووڵتری بكەین. ئێمە موشكیلەمان لەگەڵ هیچ نەتەوەیەك نییە، ئێمە و عەرەب برای یەكین، موشكیلەمان لەگەڵ شێوازی حوكمڕانییەكەیە. دوای ٢٠٠٣ ئێمە ڕێككەوتین لەسەر شێوەی حوكمڕانی، دەستوور ڕێگەی نیشانداوە، بۆیە ئێمە داوا دەكەین دەستوور حەكەم بێت لە نێوان ئێمە و هەر كەسێك حاكم بێت لە عێراق.  ئێمە هەموو نەتەوە و ئایین و مەزهەبێك دڵنیا دەكەینەوە لە هەرێمی كوردستان كە بە دڵ و گیان دەیانپارێزین و مافیان پارێزراوە و ئەوەی لە دەستمان بێت بۆ هەموو شوێن و پارچەكانی تری عێراقیش ئێمە بەرگرییان لێ دەكەین. ئامۆژگاریی ئێمە بۆ كاندیدەكانمان هەروەكوو پێشتریش باسم كرد، ئامۆژگاریی ئێمە ئەوەیە كە تەنها خۆیان بە نوێنەری هەرێمی كوردستان نەزانن، بەڵكوو خۆیان بە نوێنەری هەموو پارێزگاكانی عێراق بزانن و لە هەر كوێیەكیش زوڵم لە هەر تاكێكی عێراقی كرا، بەرگریی لێ بكەن هەروەكوو بەرگریی لە یەكێكی هەولێری یان دهۆكی یان سلێمانی یان كەركووكی دەكەن.  ئێمە ئومێدەوارین كە عێراق تێكەڵاوی ئەو ململانێیە نەبێت كە ئەمڕۆ لە ناوچەكە هەیە و خەڵكی عێراق بپارێزرێ و دوور بێ لە هەر ناخۆشی و كارەساتێك و عێراق نەبێتە گۆڕەپانی ململانێ لە نێوان ئەو دەوڵەتانە، ئەمە كارێكی سەرەكییە و ئەوەی ئێمە پێمان بكرێ بۆ ئەم مەبەستە نە درێغیمان كردووە و نە درێغیش دەكەین.  هێشتان هەڕەشەی جددی لەسەر هەرێم و عێراق هەیە، وەك تیرۆر و بیری توندڕەوی تەواو نەبووە و لە زۆر شوێن خۆیان رێك خستووەتەوە و بەرنامەشیان هەیە بۆ كاری تیرۆریستی، ئەوانەی كە بەهاری دڵی خۆیان دەدەن و دەڵێن تیرۆر تەواو بووە، بە حەقیقەت تیرۆر تەواو نەبووە.  مەترسیی دووەم مەسەلەی ماددەی هۆشبەرە كە بە بەرنامەیەكی ڕێكوپێك دەیانەوێ خەڵكی كوردستان تەفروتونا بكەن. مەترسیدارترین پیلان و مەترسیدارترین چەك بەكارهێنانی ئەو ماددە هۆشبەرەیە كە خەریكن ماڵی ئێمە وێران دەكەن، ئێمە دەبێ بە هەموو توانایەك بەرگریی لێ بكەین. هەروەها هەمان بەرنامە بۆ هەموو شوێنەكانی تریش هەبووە، بەڵام یەكێك لە كارە سەرەكییەكانی ئێمە ئەوە دەبێت كە ئەوانەی بازرگانیی بە ماددەی هۆشبەر دەكەن، ئەوانەی كارخانەی ماددەی هۆشبەریان داناوە، چ لە هەرێم و چ لە بەغدا و شوێنەكانی تر، دەبێ بدرێنە دادگا و سزا بدرێن، چونكە تاوانباری وا قەت نابیتەوە. لەسەر دۆخی ناوخۆمان لە هەرێم هەروەكوو بەڕێزتان دەزانن ئەمە ساڵێك بەسەر هەڵبژاردنی هەرێمدا تێپەڕی، هەر دوای ئەوەی كە ئەنجامەكان راگەیاندران، داوامان كرد لە هەموو لایەنەكان بێن حكوومەتێكی بنكەفراوان تەشكیل بكەین، كوردستان موڵكی هەموومانە، هەندێكیان یان ئەكسەریان نەهاتن و موعارەزەیان هەڵبژارد، ئێمە رێزمان هەیە بۆ ئیختیاری ئەوان، مەسەلەكە مایەوە بۆ پارتی و یەكێتی. دوای چەندین كۆبوونەوە لە نێوان وەفدی پارتی و وەفدی یەكێتی، لەسەر دوو میحوەری ئەساسی ئیشیان كرد، یەكێكیان شێوەی حوكمڕانی و ئیدارەی حكوومەت، ئەوەی تر دابەشكردنی پۆست. لەسەر خاڵی یەكەم گەیشتنە ڕێككەوتن، لەسەر خاڵی دووەمیش من تەوسیەی شاندی پارتیم كرد لەگەڵ مەكتەبی سیاسیش كە ئەوپەڕی مروونەت نیشان بدەن بەرامبەر بە یەكێتی، بەڵام بەداخەوە ئەو مەعلووماتەی كە پێشتریش بۆ ئێمە دەهات كە یەكێتی بە تەمایە وەخت بكوژی تاكوو هەڵبژاردنی فیدرالیی عێراق تەواو دەبێت، ئەوسا بیر لەوە بكەنەوە دێنە حكوومەت یان نا، تەبیعی ئەو هەلومەرجەی پێش ئینتیخابات، رەنگە دوای ئینتیخابات ئەو هەلومەرجە وەكوو خۆی نەمێنێت و ناشمینێت.  خۆشحاڵین زۆر كە دەبینین پرۆسەی ئاشتی لە پارچەكانی تری كوردستان ئەوە دەستی پێكردووە، ئەمە زۆر زۆر ئومێدبەخشە و ئێمە بە هەموو توانایەك پشتگیریی لەو پرۆسەیە دەكەین و ئومێدەوارم ئینشائەڵا خوای گەورە نەجاحەت بداتن و ئەو پرۆسەیە بە ئەنجام بگات، بۆ ئەوەی خێری هەموو لایەكی تێدا بێت و جارێكی تریش دەڵێم بێ ئەندازە من خۆشحاڵم بەو پرۆسەی ئاشتییەی كە لە پارچەكانی تر دەستی پێكردووە. ئاییندە هەڤاڵینە من دەمەوێ پێتان بڵێم و مەبەستیشمە ئەوەی كە دەیڵێم، ئاییندە ئومێدەوارە، ئومێدە، ئیرادەیە، بەرچاوڕوونییە، پلانە، ئەمەیە ئاییندەی كە پارتی دەیبینێت و كاری بۆ دەكات. ئومێدمان زۆرە، ئیرادەمان بەهێزە، بەرچاومان روونە و پلانی تۆكمەشمان هەیە، پارتی و حكوومەتی هەرێم، ئومێدەوارین هەموو لایەنەكانی تریش بەشدار بن لەگەڵ ئێمە، بەڵام كاروانی ئاوەدانی بەردەوام دەبێت و وەڵامی هەر كەسێكیش كە پێی ناخۆشە یان حەسادەتە، بە پرۆژە وەڵام دەدرێتەوە بە قسە نا. لێرەدا بە پێویستی دەزانم كە سوپاسی بێپایانی پێشمەرگە و هێزەكانی ئەمنی بكەم بۆ پاراستنی سەقامگیری و ئەمنی كوردستان و دەرفەتیان رەخساند بۆ ئەوەی هەڵبژاردنێكی ڕێكوپێك لە كەشوهەوایەكی ئارامدا بەڕێوە بچێت، زۆر سوپاسیان دەكەم. سوپاس بۆ گەلی كوردستان بۆ خۆڕاگرییان و دڵسۆزییان و بانگەشەیەكی ئارام ئەنجام درا. لێرەدا بە پێویستی دەزانم سوپاسێكی بێپایان بۆ هەموو خەڵكی كوردستان بۆ ئەو خۆڕاگرییەیان كە هەندێك لە بەغدا دەیانویست بە بڕینی مووچە چۆكیان پێدا بدەن و بە حیسابی خۆیان خەڵكەكە ڕاپەڕێت و ئەم هەرێمە تێك بدەن، دەستی هەمووتان و یەك بە یەكتان ماچ دەكەم كە نەتانهێشت پیلانی ناحەزان سەربگرێت. سوپاس و سڵاو بۆ خانەوادەی شەهیدان و ئەنفالكراوان، سوپاس بۆ جێگران و كارگێڕی مەكتەبی سیاسی و مەكتەب سیاسی و كۆمیتەی ناوەندی و هەموو جەماوەر و كادیر و ئەندامانی پارتی بۆ ماندووبوونتان، بۆ شەونخوونیتان و بۆ ئەركی گەورەی كە ئەنجامتان دا، سوپاستان دەكەم.  سڵاو بۆ هەولێر و بۆ هەموو شارەكان، هەموو شارۆچكەكان، هەموو دێهاتی كوردستان، سڵاوی تایبەت بۆ شار و شارۆچكەكانی دەرەوەی ئیدارەی هەرێم كە نە لەبیر دەكرێن، نە بەجێتان دەهێڵین.  جارێكی تر سوپاستان دەكەم هەڤاڵینە، داواتان لێ دەكەم گیانی شەهیدان شاد بكەن، دڵی دڵسۆزان خۆش بكەن، دەنگ بە لیستی ٢٧٥ بدەن بۆ ئەوەی بەرگریتان لێ بكات، بۆ ئەوەی كەرامەتی ئێوە بپارێزێت.  من سەركەوتن و ئاییندەیەكی گەشتر لە چاوەكانی ئێوەدا دەبینم.  لە كۆتاییدا هەزاران سڵاو دەنێرین بۆ گیانی پاكی شەهیدان، ئێوەش هەر شاد و بەختەوەر و سەركەوتوو بن، بژی كورد و بژی كوردستان و بژی پێكەوەژیان. لە كۆتاییدا فەرموودەیەكی ئیمام عەلی هەیە، ئەوە بۆ خۆمانە وەكوو كورد، بۆ عەرەبەكانە بە شیعە و سوننە، بۆ توركمانە، بۆ هەموو كەسێكە، كە دەفەرموێ: لا تَظلِمَنَّ إِذا ما كُنتَ مُقتَدِراً فَالظُلمُ آخره يأتيِكَ بالنَدَمِ تَنامُ عَينُكَ وَالمَظلومُ مُنتَبِهٌ يَدعو عَلَيكَ وَعَينُ اللَهِ لَم تَنَمِ ئەمە بۆ هەموو لایەكە. ئومێدەوارم هەمیشە لە خۆشیدا بتانبینم و دوو سێ ڕۆژمان ماوە، ئیتر حەق و حیساب هەمووی مەعلووم دەبی. ئیتر ئەمانەتی خوای گەورە بن و زۆر سوپاس.  

درەو: ئەمڕۆ لە دامەزراوەی میدیایی درەو گفتوگۆكرا لەسەر (ژینگە، لە کارنامەی حزب و قەواره سیاسییەکاندا) بە ئامادەیی محەمەد ئەبوبەكر بەڕێوەبەری گشتی فەرمانگەی ڕاگەیاندنی ئەنجومەنی نوێنەرانی عێراق  و مەعروف مەجید سەرۆكی رێكخراوی ئاییندە بۆ پاراستنی ژینگە. لە گفتوگۆكەدا كە ژمارەیەك كاندید و شارەزایانی بواری ژینگە ئامادەی بوون، پرسی ژینگە لە كارنامەی لیست و قەوارە سیاسیەكاندا گفتوگۆی لەسەركرا. بەتایبەت لە ئێستادا كە لە هەڵمەتی هەڵبژاردنداین، لیست و قەوارە سیاسیەكان تا چەند پرسی ژینگەیان كردووەتە ئەولەویەتی كارو بەرنامەكەیان. لە گفتوگۆكەدا پرسی  لیژنە هەمیشەییەکانی ئەنجومەنی نوێنەرانی عێراق بەتایبەت لیژنەی ژینگە و تەندروستی، چۆن و بە چی میكانیزمێك كار دەكەن و كاندید دوای دەرچوونی چۆن دەتوانێت كارنامەكەی لەبواری ژینگەدا جێبەجێ بكات.       

د. ئیسماعیل خورماڵی تەنها دوو ڕۆژ ماوە بۆ ڕاگرتنی هەڵمەتی هەڵبژاردنی 11/11/2025.  پێشبینی جۆراوجۆر دەكرێت بۆ ئەنجامەكان. وەك شارەزایەكی بواری هەلبژاردن لە هەفتەی ڕابردوودا، بە سێ بابەتی جیاواز شیكارییم بۆ بازنەكانی هەولێر و سلێمانی و دهۆك كرد. لەسەر بنەمای ئەو شیكارییانە، لێرەدا شیكاریی و پێشبینی خۆم بۆ كورسییەكانی هەرێمی كوردستان دەخەمەڕوو: پێش باسكردن لە داتاكان و شیكاركردنیان پێویستە ئەوە بخەمەڕوو: 1) ئەم شیكارییانە پاڵپشتە بە داتاكانی شەش هەڵبژاردن، كە لە (15) ساڵی ڕابردوودا ئەنجام دراون، هەروەها سیستمی سانتلیگۆ كە كاریگەری هەیە لەسەر لیستەكان. 2) ڕەچاوی ئەو گۆڕانكاریی و ڕوداو و پێشهاتانەی كردووە كە لەماوەی ڕابردوودا هاتنە ئاراوە. 3) تا ئێستا هەڵمەتەكە بەشێوەیەكی ئاسایی بەڕێوە دەچێت، ئەگەر شتی نائاسایی بێتە پێشەوە كاریگەری لەسەر ئەنجامەكان دەبێت. 4) لەم ماوەیەدا كاندیدی لیستە جیاوازەكان چوونەتە پاڵ لیستی تر، ئەگەر ئەم حاڵەتە بەردەوام بێت، بەتایبەت بۆ كەسانی دیار و كاریگەر، ئەنجامەكان دەگۆڕێت. 5) ڕێژەی دەنگدان و هەڵمەتی بایكۆت یەكێكی ترە لە خاڵە گرنگەكانی ئەم هەڵبژاردنە. چەندە ڕێژەی دەنگدان زۆر بێت، هێندە پێشبینیەكان دروستتر دەبن، بەتایبەت بۆ كورسی لیستەكانی دەرەوەی پارتی و یەكێتی. 6) پێویستە ئەوە بخرێتەڕوو، كە لە پاش یەكێتی و پارتی، تاكە هێزێك كە هەڵمەتی هەڵبژاردنی لەیەكەم ڕۆژی هەڵمەتەكەوە بەیەك ڕیتمی بەهێز و گشتگیر لە سەرتاسەری كوردستاندا بەڕێوە بچێت یەكگرتووە. سەرباری ئەمەش سێ سەرۆك لیستی بەهێز و بە ئەزموونی هەیە كە لە بەغداد بوون، سەرەڕای كۆمەڵە كاندیدێكی تری بەهێز و ناسراو. بۆیە چاوەڕوان دەكرێت یەكگرتوو موفاجەئە و باسوخواسی ئەم هەڵبژاردنە بێت. بەلەبەرچاوگرتنی ئەو خاڵانەی سەرەوە باس لە هەرسێ بازنەكە پێكەوە دەكەین. بەگشتی لە هەرێمی كوردستان (3,068,384) كەس مافی دەنگدانیان هەیە، كە (2,844,051) مەدەنین و (224,333) تایبەتن. ئەو ژمارەیە دەنگ دەدەن بۆ یەكلاكردنەوەی (44) كورسی: سلێمانی (18)، هەولێر (15)، دهۆك (11). هەر بازنەیەك تایبەتمەندی خۆی هەیە، لە هەر بازنەیەك لیستێك زۆرینەیە. بەپێی ئەو شیكارییانەی كە پێشتر خرانەڕوو، (باش وایە خوێنەر بگەڕێتەوە بۆ ئەو شیكارییانەی ڕابردوو، تا بزانێت ئەو دابەشكردنە لەسەر چ بنەمایەك كراوە). پێشبینی دەكەم كورسی بازنەكان بەم شێوەیە بن: سلێمانی: یەكێتی (7)، نەوەی نوێ (2)، پارتی (2)، یەكگرتوو (2)، كۆمەڵ (1)، هەڵوێست (1). ئەو سێ كورسیەی كە ماونەتەوە، یەكێتی و پارتیش چانسیان هەیە بۆ بردنی، بەڵام ئەگەری زۆرە زیاتر بۆ لیستەكانی تر بێت. هەولێر: پارتی (7)، یەكێتی (3)، نەوەی نوێ (2)، یەكگرتوو (1)، كۆمەڵ (1)، هەڵوێست (1). دهۆك: پارتی (8)، یەكگرتوو (2)، كورسیەكیش بە هەڵواسراوی دەمێنێتەوە بۆ ئەگەرەكان. ئەگەر یەكێتی بتوانێت دەنگەكانی بگەیەنێتە (40) هەزار دەنگ، ئەوا ئەو كورسیە دەبات. ئەگەر یەكگرتووش بتوانێت دەنگەكانی زیاتر سەر بخات، چانسی بردنی ئەو كورسیەی هەیە، وەگەرنا پارتی دەبێتە خاوەنی. بەگشتی لەسەر ئاستی هەرێمی كوردستان، دەتوانین بڵێین پێشبینی بۆ كورسیەكان بەم جۆرەن: پارتی: 18 بۆ 19 كورسی. یەكێتی: 11 بۆ 12 كورسی. یەكگرتوو: 5 بۆ 7 كورسی. نەوەی نوێ: 4 بۆ 5 كورسی. كۆمەڵ: 2 بۆ 3 كورسی. هەڵوێست: 2 بۆ 3  كورسی. لە كۆتاییدا: پێشبینیەكان بەپێی داتا و زانیاریی و ڕووداو و پێشهاتەكانی ڕابردوو، ئەوەمان بۆ ڕوون دەكەنەوە، كە دابەشبوونی ئەو كورسیانە بەو شێوەیە نزیكە لە واقیعەوە و چاوەڕوانكراوە. لەگەڵ ئەوەشدا، ئەگەری ئەوە هەیە، كە لەم چەند رۆژە كەمەی كە كەلەبەردەستدایە، ڕوداوگەلێك ڕوو بدەن لە قازانجی هەندێ لیست و زیانی هەندێكی تر. لەسەرو هەموو ئەمانەشەوە بایكۆتی هەڵبژاردنەكان و كەمی دەنگدەر، زیانی گەورە بە لیستەكانی ئۆپۆزسیۆن دەگەیەنێت و كورسییەكان كەمتر دەبێت، لەبەرانبەردا بە قازانجی پارتی و یەكێتی كۆتایی دێت و كورسیەكانین هەڵدەكشێت و زیاد دەكات.

  درەو: میدیای فەرمی یەكێتی بڵاویكردەوە، دوو كاندیدی رەوتی هەڵوێست پشتیوانی خۆیان بۆ لیستی (222)ی یەكێتی راگەیاندووەوەو چونەتە ناو یەكێتی. لەبەرامبەردا عەلی حەمەساڵح بڕیاردەری رەوتی هەڵوێست لەپەیجی تایبەتی خۆی بڵاویكردووەتەوە: بە تۆمەتی پەیوەندی لەگەڵ یەکێتی و هەوڵدان بۆ خۆفرۆشی بە یەکێتی، ڕەوتی هەڵوێست دوو کاندیدی دورخستەوە.. یەکێتی بەپارەی قاچاخی و دزی سەرقاڵی خەڵک کڕینە.. ئەو دوو كاندیدەی هەڵوێست كە میدیای یەكێتی وێنەی بڵاوكردوونەتەوە: - یاساناس (رێباز شەهید عەبدوڵا)، كاندیدی ژمارەی (11)ی لیستی (225)ی هەڵوێست لە بازنەی سلێمانی. - مونیرە عەبدوڵا بەرزنجی، كاندیدی ژمارەی (16)ی لیستی (225)ی هەڵوێست لە بازنەی سلێمانی   رەوتی هەڵوێست یەكەمجارە بەشداری لە هەڵبژاردنی پەرلەمانی عێراقدا دەكات و (16) كاندیدی هەیە. هەڵوێست لە هەڵبژاردنی پێشووی پەرلەمانی كوردستان كە لە 2024 بەڕێوەچوو ( 30،699) دەنگی بەدەستهێنا.    

درەو: لە كۆبوونەوەی دوێنێی ئەنجومەنی وەزیرانی عێراق، هیچ وەزیرێك پێشنیازی ناردنی موچەی موچەخۆرانی هەرێمی كوردستانی نەكرد، دوو موچەی تر دەدرێت و دوو موچەی دیكەی ئەمساڵ دەفەوتێت. سەرچاوەیەكی باڵا لە بەغداد بە (درەو)ی راگەیاند: لە كۆبوونەوەكەی دوێنێی ئەنجومەنی وەزیرانی عێراق، كە دوا كۆبوونەوەی پێش هەڵبژاردنی پەرلەمانی عێراقە، هەر وەزیرەو پرۆژەی خۆی خستەڕوو بۆ ناوچەو پارێزگاكانیان، بەڵام هیچ وەزیرێكی كورد پێشنیازی ناردنی موچەی موچەخۆرانی هەرێمی كوردستان نەكرد و لە كۆبوونەوەكەدا بە وشەیەك باسی موچەی موچەخۆران نەكرا.  بەپێی بەدواداچوونەكانی (درەو) چاوەڕوان دەكرێت لەگەڵ موچەی مانگی 11ی موچەخۆرانی عێراق، موچەی مانگی نۆی موچەخۆرانی هەرێمی كوردستان بدرێت و لەگەڵ موچەی مانگی 12ی موچەخۆرانی عێراقیش موچەی مانگی 10ی موچەخۆرانی هەرێمی كوردستان بدرێت، موچەی مانگەكانی (11-12)ی موچەخۆرانی هەرێمی كوردستان دەفەوتێت، جا بەناوی قەرزەوە بیێت بۆ ساڵی نوێ یان پاشەكەوت، بۆیە لەم ساڵدا نادرێت.   لە ئێستادا موچەی مانگەكانی (9-10-11-12) ماوە خەرجبكرێت لەمساڵدا و چاوەڕوان دەكرێت دوو موچەی ئەمساڵ بخرێتە سەر موچە پاشەكەوت و نەدراوەكانی ساڵانی رابردوو كە لە 2015 تا ئێستا (18) موچە نەدراوە، (34) موچە بە پاشەكەوتەوە دراوە، (10) بە لێبڕینی (21%)ەوە دراوە..

شیكاری: درەو  🔹 لە هەڵبژاردنی خولی یەکەمی پەرلەمانی کوردستان لە ساڵی (1992) لە کۆی (ملیۆنێک و 112 هەزار) دەنگدەر (971 هەزارو 953) کەس چونە سەر سندوقەکانی دەنگدان و بە ڕێژەی (87.4%) بەشداری هەڵبژاردنیان کرد. 🔹 لە داواین خولی هەرڵبژاردنی ئەنجومەنی نوێنەرانی عێراق لە (10/10/2021) لەسەر ئاستی سێ پارێزگاکەی هەرێمی کوردستان (3 ملیۆن و 450 هەزار و 773) کەس مافی بەشدارییان هەربوو، بەڵام تەنها (ملیۆنێک و 233 هەزار و 451) دەنگیان داوە بە ڕێژەی (35.7%).  🔹 ئەگەرچی لە هەرێمی کوردستان ساڵی (2024) بۆ هەڵبژاردنی خولی شەشەمی پەرلەمانی کوردستان (3 ملیۆن و 789 هەزار و 360) کەس تەمەنی (18) ساڵییان تێپەڕاندبوو، بە پێی یاسا مافی بەشداریی لە هەڵبژاردن بەدەست دەهێنن، بەڵام بەهۆی ئەوەی سەرجەمیان کارتی بایۆمەترییان نوێ نەکردبوویەوە، تەنها ئەوانە ئەو مافەیان دەستەبەرکرد کە کارتە نوێیەکەیان وەرگرتبوویەوە، ژمارەیان (2 ملیۆن و 899 هەزار و 578) کەس بووە، لەو ژمارەیەش (2 ملیۆن و 85 هەزار و 949) کەس بە ڕێژەی (72%) دەنگیان داوە.  پوختە لەماوەی (32) ساڵی نێوان هەڵبژاردنی خولی یەکەمی پەرلەمانی کوردستان لە ساڵی (1992)ەوە بۆ دواین هەڵبژاردنی پەرلەمانی کوردستان لە (20/10/2024) سیانزە هەڵبژاردنی گشتی بۆ (پەرلەمانی کوردستان، ئەنجومەنی پارێزگاکان و ئەنجومەنی نوێنەران) لە پارێزگاکانی هەرێمی کوردستان بەڕێوە چووە. لە هەڵبژاردنی خولی یەکەمی پەرلەمانی کوردستان لە ساڵی (1992) لە کۆی (ملیۆنێک و 112 هەزار) دەنگدەر (971 هەزارو 953) کەس چونە سەر سندوقەکانی دەنگدان و بە ڕێژەی (87.4%) بەشداری هەڵبژاردنیان کرد. لە داواین خولی هەرڵبژاردنی ئەنجومەنی نوێنەرانی عێراق لە (10/10/2021) لەسەر ئاستی سێ پارێزگاکەی هەرێمی کوردستان (3 ملیۆن و 450 هەزار و 773) کەس مافی بەشدارییان هەربوو، بەڵام تەنها (ملیۆنێک و 233 هەزار و 451) دەنگیان داوە بە ڕێژەی (35.7%). بەم پێیە دوای تێپەڕبوونی نزیکەی (30) ساڵ ڕێژەی ئەوانەی مافی بەشدارییان بەدەستهێناوە (2 ملیۆن و 338 هەزار و 773) کەس ڕێژەی (210%) کەس زیادیان کردووە. بەڵام ژمارەی بەشداری تەنها (261 هەزار و 498) کەس زیادی کردووە بە ڕێژەی (27%). بە مانایەکی دیکە ڕێژەی ئەوانەی لە هەڵبژاردنی یەکەمی پەرلەمانی کوردستانەوە لە ساڵی (1992) بەشداری پرۆسەی هەڵبژاردنە گشتییەکانیان نەکردووە ڕێژەکەیان لە (12.6%)ەوە بەرزبووەتەوە بۆ (64.3%)، بۆ وردەکاری بڕوانەی (خشتەی ژمارە (1)). بەڵام لە ساڵی (2024) بۆ هەڵبژاردنی خولی شەشەمی پەرلەمانی کوردستان لە (20/10/2024)، (3 ملیۆن و 789 هەزار و 360) کەس تەمەنی (18) ساڵییان تێپەڕاندبوو، بە پێی یاسا مافی بەشداریی لە هەڵبژاردن بەدەست دەهێنن، بەڵام بەهۆی ئەوەی سەرجەمیان کارتی بایۆمەترییان نوێ نەکردبوویەوە، تەنها ئەوانە ئەو مافەیان دەستەبەرکرد کە کارتە نوێیەکەیان وەرگرتبوویەوە، ژمارەیان (2 ملیۆن و 899 هەزار و 578) کەس بووە، لەو ژمارەیەش (2 ملیۆن و 85 هەزار و 949) کەس بە ڕێژەی (72%) دەنگیان داوە، تەنها (ملیۆنێک و 882 هەزار و 448) دەنگیان هەژمار کراوەو (206 هەزار و 434) دەنگیان پوچەڵ بووە.  خشتە یەکەم؛ هەڵبژاردنی خولی یەكەمی پەرلەمانی كوردستان 1.    خولی یەكەمی پەرلەمانی كوردستان، لە 19/5/1992 بەرێوەچوو. 2.    لە هەرچوار ناوچەكەی دەنگدان (هەولێر، سلێمانی، دهۆك، كەركوك) لەسەرجەم بنكەكانی هەڵبژاردن (176) بنكە، ژمارەی دەنگدەران (971 هەزار و 953) بووە، واتا لە كۆی (1ملیۆن و 112 هەزار) دەنگدەری چاوەڕوانكراوی كوردستان، كە دەكاتە رێژەی (87.4%)، هاوكات ژمارەی دەنگە بەتاڵەكان (4 هەزار و 724) دەنگ بووە، بەو پێەیەش (971 هەزار و 953 – 4 هەزار و 724 = 967 هەزار و 229) واتا دەنگی راستەقینە دەكاتە (967 هەزار و 229). بەجۆرێک؛ -    لە پارێزگای هەولێر (335 هەزارو 827) کەس بەشداری کردبوو، (2 هەزار و 25) دەنگیش پوچەڵ و کراوەتەوە و کۆی دەنگە دروستەکان بریتی بووە لە (333 هەزار و 802) دەنگ. -    لە پارێزگای سلێمانی (349 هەزارو 164) کەس بەشداری کردبوو، (هەزار و 112) دەنگیش پوچەڵ و کراوەتەوە و کۆی دەنگە دروستەکان بریتی بووە لە (347 هەزار و 952) دەنگ. -    لە پارێزگای دهۆك (198 هەزارو 352) کەس بەشداری کردبوو، (982) دەنگیش پوچەڵ و کراوەتەوە و کۆی دەنگە دروستەکان بریتی بووە لە (197 هەزار و 370) دەنگ. -    لە سنوری پارێزگای کەرکوک (88 هەزارو 610) کەس بەشداری کردبوو، (506) دەنگیش پوچەڵ و کراوەتەوە و کۆی دەنگە دروستەکان بریتی بووە لە (88 هەزار و 114) دەنگ. دووەم؛ هەڵبژاردنی خولی دووەمی پەرلەمانی كوردستان 1.    خولی دووەمی پەرلەمانی كوردستان لە 30/1/2005 بەرێوەچوو. 2.    هەڵبژاردن بە یەک بازنە بەڕێوەچووە. 3.    ( 2 ملیۆن و 290 هەزارو 736) كەس مافی دەنگدانی هەبووە. 4.    (ملیۆنێك و 753  هەزارو 919) كەس دەنگیاندا بەرێژەی (76.6%). 5.    (536  هەزارو 817) كەس بەشداری هەڵبژاردنی ئەم خولەی پەرلەمانی کوردستانیان نەکردووە بەرێژەی (23.4%). سێیەم؛ هەڵبژاردنی خولی یەکەمی ئەنجومەنی پارێزگاكانی هەرێمی کوردستان 1.    هەڵبژاردنی خولی یەکەمی ئەنجومەنی پارێزگاكان لە 30/1/2005 بەڕێوەچوو. 2.    (2 ملیۆن و 290 هەزارو 736) كەس مافی دەنگدانی هەبووە. 3.    (ملیۆنێك و 767 هەزارو 993) كەس دەنگیاندا بەرێژەی (77.2%). بەجۆرێک؛ -    لەسەر ئاستی پارێزگای هەولێر (647 هەزار و 994) کەس بەشداری هەڵبژاردنەکەیان کرد. -    لەسەر ئاستی پارێزگای سلێمانی (736 هەزار و 734) کەس بەشداری هەڵبژاردنەکەیان کرد. -    لەسەر ئاستی پارێزگای دهۆک (383 هەزار و 265)کەس بەشداری هەڵبژاردنەکەیان کرد. 4.    (522  هەزارو 743) كەس بەشداری هەڵبژاردنی ئەم خولەی ئەنجومەنی پارێزگاکانیان نەکردووە بەرێژەی (22.8%). چوارەم؛ هەڵبژاردنی خولی یەكەمی ئەنجومەنی نوێنەرانی عێراق 1.    هەڵبژاردنی خولی یەكەمی ئەنجومەنی نوێنەرانی عێراق لە 30/1/2005 بەرێوەچوو. 2.    (2 ملیۆن و 290 هەزارو 736) كەس مافی دەنگدانی هەبووە. 3.    سەرجەم حزبەكان جگە لە (كۆمەڵی ئیسلامی) لەچوارچێوەی لیستی (هاوپەیمانی كوردستان) بەشدار بوون كە (2 ملیۆن  و 175 هەزارو 551) دەنگیان بەدەستهێنا و (75) كورسی پەرلەمانیان مسۆگەر كرد. 4.    واتە نزیکەی (2 ملیۆن و 176 هەزار) کەس بە ڕێژەی (95%) بەشداری ئەم هەڵبژاردنەیان کردووە، بەرزترین ڕێژەی بەشدارییە کە بەراورد بە هەڵبژاردنەکانی پێش و دوای خۆی تۆمار کرابێت. پێنجەم؛ هەڵبژاردنی خولی سێیەمی پەرلەمانی كوردستان 1.    هەڵبژاردنی خولی سێیەمی پەرلەمانی كوردستان لە 25/7/2009 بەرێوەچوو. 2.    بەپێی یاسای هەڵبژاردنی پەرلەمانی کوردستان هەرسێ پارێزگاکەی هەرێمی کوردستان لە یەک بازنەی هەڵبژاردن پێکهاتبوو. 3.    ( 2 ملیۆن و 518 هەزارو 773) كەس مافی دەنگدانی هەبووە. 4.    (ملیۆنێك و 876  هەزارو 196) كەس دەنگیاندا بەرێژەی (74.5%). 5.    (642  هەزارو 577) كەس بەشداری ئەم خولەی هەرڵبژاردنی پەرلەمانی کورستانی نەکرد بە رێژەی (25.5%). شەشەم؛ هەڵبژاردنی خولی دووەمی ئەنجومەنی نوێنەرانی عێراق 1.    هەڵبژاردنی خولی دووەمی ئەنجومەنی نوێنەرانی عێراق لە 7/3/2010 بەڕێوەچوو. 2.    (2 ملیۆن و 590 هەزارو 274) كەس مافی دەنگدانی هەبووە. 3.     (ملیۆنێك و 938 هەزارو 754) كەس دەنگیاندا بە رێژەی (74.8%). بە جۆریك؛ -    لەسەر ئاستی پارێزگای هەولێر لە کۆی (917 هەزار و 685) کەس (680 هەزار و 408) کەس بەشداری هەڵبژاردنەکەیان کرد بە ڕێژەی (74%). -    لەسەر ئاستی پارێزگای سلێمانی لە کۆی (ملیۆنێک و 98 هەزار و 451) کەس (833 هەزار و 631) کەس بەشداری هەڵبژاردنەکەیان کرد بە ڕێژەی (76%). -    لەسەر ئاستی پارێزگای دهۆک لە کۆی (574 هەزار و 138) کەس (424 هەزار و 715) کەس بەشداری هەڵبژاردنەکەیان کرد بە ڕێژەی (74%). 4.    (651 هەزارو 520) كەس بەشداری ئەم خولەی هەڵبژاردنیان نەکرد بە رێژەی (25.2%). حەوتەم؛ هەڵبژاردنی خولی چوارەمی پەرلەمانی كوردستان 1.    هەڵبژاردنی خولی چوارەمی پەرلەمانی كوردستان لە 21/9/2013 بەرێوەچوو. 2.    هەڵبژاردن لە هەرێمی كوردستان بەیەك بازنە بەرێوە چوو. 3.    (2 ملیۆن و 653 هەزارو 743) كەس مافی دەنگدانی هەبووە. 4.    (ملیۆنێك و 978  هەزارو 382) كەس دەنگیاندا بەرێژەی (74.6%). 5.    (675 هەزارو 361) كەس بەشداری ئەم خولەی هەڵبژاردنیان نەکرد بە رێژەی (25.4%). هەشتەم؛ هەڵبژاردنی خولی سێیەمی ئەنجومەنی نوێنەرانی عێراق 1.    هەڵبژاردنی خولی سێیەمی ئەنجومەنی نوێنەرانی عێراق لە 30/4/2014 بەڕێوەچوو. 2.    (2 ملیۆن و 717 هەزارو 82) كەس مافی دەنگدانی هەبووە. 3.    (2 ملیۆن و 128 هەزارو 167 ) كەس دەنگیاندا بەرێژەی (78.3%). بە جۆرێک؛ -    لەسەر ئاستی پارێزگای هەولێر لە کۆی (936 هەزار و 557) کەس (744 هەزار و 489) کەس بەشداری هەڵبژاردنەکەیان کرد بە ڕێژەی (79%). -    لەسەر ئاستی پارێزگای سلێمانی لە کۆی (ملیۆنێک و 168 هەزار و 859) کەس (893 هەزار و 226) کەس بەشداری هەڵبژاردنەکەیان کرد بە ڕێژەی (76%). -    لەسەر ئاستی پارێزگای دهۆک لە کۆی (612 هەزار و 66) کەس (490 هەزار و 452) کەس بەشداری هەڵبژاردنەکەیان کرد بە ڕێژەی (80%). 4.     (588 هەزارو 915) كەس بەشداری ئەم خولەی هەڵبژاردنیان نەکرد بە رێژەی (21.7%). نۆیەم؛ هەڵبژاردنی خولی دووەمی ئەنجومەنی پارێزگاكان  1.    هەڵبژاردنی خولی دووەمی ئەنجومەنی پارێزگاكان لە 30/4/2014 بەڕێوەچوو. 2.    (2 ملیۆن و 717 هەزارو 82) كەس مافی دەنگدانی هەبووە. 3.    (2 ملیۆن و 161 هەزارو 38) كەس دەنگیاندا بەرێژەی (79.5%). بە جۆرێک؛ -    لەسەر ئاستی پارێزگای هەولێر لە کۆی (936 هەزار و 557) کەس (754 هەزار و 234) کەس بەشداری هەڵبژاردنەکەیان کرد بە ڕێژەی (81%). -    لەسەر ئاستی پارێزگای سلێمانی لە کۆی (ملیۆنێک و 168 هەزار و 859) کەس (906 هەزار و 643) کەس بەشداری هەڵبژاردنەکەیان کرد بە ڕێژەی (78%). -    لەسەر ئاستی پارێزگای دهۆک لە کۆی (612 هەزار و 66) کەس (500 هەزار و 161) کەس بەشداری هەڵبژاردنەکەیان کرد بە ڕێژەی (82%). 4.    (556 هەزارو 44) كەس بەشداری ئەم خولەی هەڵبژاردنیان نەکرد بە رێژەی (20.5%). دەیەم؛ هەڵبژاردنی خولی چوارەمی ئەنجومەنی نوێنەرانی عێراق  1.    هەڵبژاردنی خولی چوارەمی ئەنجومەنی نوێنەرانی عێراق لە 12/5/2018 بەڕێوەچوو. 2.    (3 ملیۆن و 758 هەزارو 896) كەس مافی دەنگدانی هەبووە. 3.    (ملیۆنێك و 799 هەزارو 686) كەس دەنگیاندا بە ڕێژەی (47.9%). بە جۆرێک؛ -    لەسەر ئاستی پارێزگای هەولێر لە کۆی (ملیۆنێک و 314 هەزار و 46) کەس (642 هەزار و 232) کەس بەشداری هەڵبژاردنەکەیان کرد بە ڕێژەی (48.9%). -    لەسەر ئاستی پارێزگای سلێمانی لە کۆی (ملیۆنێک و 395 هەزار و 961) کەس (668 هەزار و 146) کەس بەشداری هەڵبژاردنەکەیان کرد بە ڕێژەی (47.9%). -    لەسەر ئاستی پارێزگای دهۆک لە کۆی (ملیۆنێک و 75 هەزار و 889) کەس (489 هەزار و 308) کەس بەشداری هەڵبژاردنەکەیان کرد بە ڕێژەی (47.5%). 4.    (ملیۆنێک و 959 هەزارو 210) كەس بەشداری ئەم خولەی هەڵبژاردنیان نەکرد بە رێژەی (52.1%). یانزە؛ هەڵبژاردنی خولی پێنجەمی پەرلەمانی كوردستان 1.    هەڵبژاردنی خولی پێنجەمی پەرلەمانی كوردستان لە 30/9/2018 بەڕێوەچوو. 2.    (3 ملیۆن و 85 هەزارو 461) كەس مافی دەنگدانی هەبووە. 3.    (ملیۆنێک و 845 هەزارو 979 ) كەس دەنگیاندا بەرێژەی (59.8%). 4.    هەڵبژاردن لە هەرێمی كوردستان بەیەك بازنە بەرێوە چوو. 5.    (ملیۆنێک و 239 هەزارو 482) كەس بەشداری ئەم خولەی هەڵبژاردنیان نەکرد بە رێژەی (40.2%). دوانزە؛ هەڵبژاردنی پێشوەختی ئەنجومەنی نوێنەران (خولی پێنجەم) 1.    هەڵبژاردنی پێشوەختی ئەنجومەنی نوێنەران (خولی پێنجەم) لە 10/10/2021 بەڕێوەچوو. 2.    (3 ملیۆن و 450 هەزارو 773) كەس مافی دەنگدانی هەبووە. 3.    (ملیۆنێک و 233 هەزارو 451) كەس دەنگیاندا بەرێژەی (35.7%). بەجۆرێک؛ -    لەسەر ئاستی پارێزگای هەولێر لە کۆی (ملیۆنێک و 238 هەزار و 379) کەس (444 هەزار و 253) کەس بەشداری هەڵبژاردنەکەیان کرد بە ڕێژەی (35.7%). -    لەسەر ئاستی پارێزگای سلێمانی لە کۆی (ملیۆنێک و 389 هەزار و 691) کەس (393 هەزار و 194) کەس بەشداری هەڵبژاردنەکەیان کرد بە ڕێژەی (28.3%). -    لەسەر ئاستی پارێزگای دهۆک لە کۆی (822 هەزار و 703) کەس (396 هەزار و 4) کەس بەشداری هەڵبژاردنەکەیان کرد بە ڕێژەی (48.1%). 4.    (2 ملیۆن و 217 هەزارو 322) كەس بەشداری ئەم خولەی هەڵبژاردنیان نەکرد بە رێژەی (64.3%). سیازدە؛ هەڵبژاردنی خولی شەشەمی پەرلەمانی کوردستان 1.    هەڵبژاردنی پەرلەمانی کوردستان (خولی شەشەم) لە 20/10/2024 بەڕێوەچوو. 2.    (2 ملیۆن و 899 هەزارو 578) كەس مافی دەنگدانی هەبووە. 3.    (2 ملیۆن و 85 هەزارو 949) كەس دەنگیاندا بەرێژەی (72%). بەجۆرێک؛ -    لەسەر ئاستی پارێزگای هەولێر لە کۆی (ملیۆنێک و 22 هەزار و 906) کەس (763 هەزار و 19) کەس بەشداری هەڵبژاردنەکەیان کرد بە ڕێژەی (75%). -    لەسەر ئاستی پارێزگای سلێمانی لە کۆی (ملیۆنێک و 87 هەزار و 73) کەس (715 هەزار و 871) کەس بەشداری هەڵبژاردنەکەیان کرد بە ڕێژەی (66%). -    لەسەر ئاستی پارێزگای دهۆک لە کۆی (729 هەزار و 347) کەس (565 هەزار و 388) کەس بەشداری هەڵبژاردنەکەیان کرد بە ڕێژەی (78%). -    لەسەر ئاستی پارێزگای هەڵەبجە لە کۆی (60 هەزار و 252) کەس (41 هەزار و 671) کەس بەشداری هەڵبژاردنەکەیان کرد بە ڕێژەی (69%). 4.    (813 هەزارو 629) كەس بەشداری ئەم خولەی هەڵبژاردنیان نەکرد بە رێژەی (28%). بەشداری بایکوت لە هەڵبژاردنە گشتییەکان 1992 – 2024 (داتا و گرافیک)      

(درەو):  ئاژانسی هەواڵی (رۆیتەرز) لەزاری دوو سەرچاوەوە ئاشكرایكرد" لەم مانگەدا عێراق سێ بار نەوتی خاوی كۆمپانیای (لۆك ئۆیڵ)ی روسی هەڵوەشاندوەتەوە، ئەمەش بەهۆی مەترسییەكانی تایبەت بە سزاكانی ئەمریكاو بەریتانیا دژ بەو كۆمپانیایە.  بەقسەی سەرچاوەكان، كۆمپانیای بەبازاڕخستنی نەوتی عێراق (سۆمۆ)، بارەكانی نەوتی بەرهەمی كۆمپانیای (لۆك ئۆیڵ)ی لە كێڵگەی (خۆرئاوای قوڕنە-2) هەڵوەشاندوەتەوە. ئەم بڕە نەوتانە بڕیار بووە لە رۆژانی 11و 18و 26ی ئەم مانگەدا باربكرێن. هیچ یەكێك لە كۆمپانیای (سۆمۆ)و (لۆك ئۆیڵ) كۆمێنتیان لەسەر ئەم بابەتە نەداوە.  لەم هەفتانەی دوایدا، هەریەكە لە ویلایەتە یەكگرتووەكانی ئەمریكاو بەریتانیا سزایان بەسەر كۆمپانیای (لۆم ئۆیڵ)دا سەپاند، كە دووەم گەورەترین كۆمپانیای نەوتی روسییە؛ ئەمە وایكردووە سەخت بێت كۆمپانیاكە بتوانێت بەشێوەیەكی ئاسایی درێژە بە كارەكانی بدات.  وەزارەتی گەنجینەی ئەمریكاا تاوەكو رۆژی 21ی ئەم مانگە مۆڵەتی بە كۆمپانیاكان داوە بۆ كۆتایهێنان بە هەر جۆرە مامەڵەیەكیان لەگەڵ (لوك ئۆیڵ)و (روسنەفت) كە گەورەترین بەرهەمهێنەكانی نەوتن لە روسیادا.  لەدوای سزاكانی ئەمریكاوە (لوك ئۆیڵ) هەوڵی فرۆشتنی موڵكەكانی دەدات لە دەرەوە، هەفتەی رابردوو ئاشكرایكرد، لە كۆمپانیای (گونڤۆر)ی جیهانییەوە بۆ بازرگانی كاڵا ئۆفەرێكی پێگەیشتووە بۆ كڕینی سەروەت و سامانەكانی لە دەرەوە.   

  نوسینی: سان ساراڤان    لەگەڵ دەستپێکردنی وەرزی ئەنفلۆنزا لە چەندین ویلایەتی ئەمریکا پەتایەک بڵاوبووتەوە، ئەم پەتایەش لەلایەن دەزگا تەندروستییەکانەوە وەک  حاڵەتێکی نائاسایی تەندروستی نێودەوڵەتی ناسێنراوە ، لە مانگی ئۆکتۆبەری ئەم ساڵ  یەکەم کەیسی مردن لە ئەمریکا بە  ڤایرۆسێکی کۆرۆنای نوێ تۆمار کرا ، ئەم ڤایرۆسە  لە ژێر ناوی  سپارسSPARS  ناسێنرا. سەنتەری جۆنز هۆپکینز بۆ ئاسایشی تەندروستی ڕاپۆرتێکی گریمانەیی ئامادەکردوە و تیشکی خستۆتە سەر ( ئاستەنگەکانی پەیوەندیکردن لە بواری تەندروستی گشتیدا) لە کاتی بڵاوبوونەوەی ئەم پەتا ڤایرۆسێیە نوێیەی کە کاریگەری دەکاتە سەر کۆئەندامی هەناسەدان بەناوی  SPARS (سپارس) وە. سەنتەری جۆنز هۆپکینز بۆ ئاسایشی تەندروستی سیناریۆیەکی لەسەر بنەمای گریمانەیی ئامادەکردووەو پێشبینی کردووە کە ئەم پەتایە لە ساڵی ٢٠٢٥ وە دەستپێدەکات و لە کۆتایی ساڵی ٢٠٢٨ بنبڕ دەبێت.  هەموو پێشبینییەکانی لەسەر بنەمایەکی تێکەڵ لە شیکاری ئیندێکتیڤ (هەلهەێنجان و  دەرئەنجامی گشتیەکان لە نموونە تایبەتەکانەوە) و دیدێکتیڤە (هەلهەێنجان و  دەرئەنجامی تایبەتەکان لە نموونە گشتیەکانەوە) ، هەروەها لەسەر بنەمای دەستنیشانکردنی ڕەوتە کۆمەڵایەتیەکان، تەکنەلۆژی و سیاسیی کە کاریگەرییان لەسەر پەیوەندییە تەندروستەکان هەیە.  ئەگەر چی ئامانجەکە پێشبینیکردن نییە، بەڵکو (خستنەڕووی باسێکی واقیعییە )سەبارەت بەو کێشە پەیوەندییە تەندروستییانەی کە ڕەنگە دەسەڵاتدارانی تەندروستی و کۆمەڵگاکان ڕووبەڕووی ببنەوە.لە کاتی بڵاو بوونەوەی ئەم پەتایە  کە بڕیاردەران و پەیوەندیکەرانی تەندروستی تێبگەن لەو ئاڵۆزیی و ئاستەنگیانەی کە لەوانەیە لە حاڵەتە فریاگوزارییە تەندروستییەکاندا سەرهەڵبدەن،  کە پەیوەندییان بە پەرەپێدان، دابەشکردن و وەرگرتنی ڕێوشوێنی بەرپەرچدانەوەی پزیشکیەوە هەیەکە کورتکراوەکەی (MCMs).  شیانی باسە هەر لە ئێستاوە بزوتنەوەی دژە کۆمپانیاکان و دژە ڤایرۆسەکان کەمپینێکی گەورەیان ڕاگەیاندووە دژی ئەم پێشهاتانە لە ئەمریکاو جیهاندا، کە چالاکییەکانیان لە تۆڕە کۆمەڵایەتیەکاندا بە ڕاشکاوی بەیان کردووە و دووپاتی ئەوە دەکەنەوە کە هەموو ئەم دەزگیانە بەرژەوەندخوازن.  https://www.facebook.com/share/v/14KnD9EQHuk/?mibextid=wwXIfr سەنتەری جۆنز هۆپکینز بۆ ئاسایشی تەندروستی ئەم بیڕوڕا  و ئاستەنگیانەی خستۆتە ڕوو لە سیناریۆکەدا:  کەشی گشتی :  •    جیهانێکی پەیوەندیدار دروست دەبێت بەڵام پچڕ جڕ لەیەکتری بە هۆی " " ژووری دەنگدانەوە کە تێرمیکی میدیاییە بۆ بڵاوبوونەوەی زانیاری چەوت و چەواشە پەیڕەودەکرت، لەلایەن ئەو کەسانەی کە بیروبۆچونەکانیان یەکانگیر دەبێتەوە. •    بەکارهێنانی بەربڵاوی تەکنەلۆژیای پەیوەندیکردن دەبێت بەڵام پەیوەندی فرە زمانی و فرە کولتووری لاواز دەبێت لە نێوان دەزگا تەندروستییەکان . •    قەیرانی متمانە لە نێوان دامەزراوە گشتی و تەندروستییەکان بەهۆی ناتەواوی زانیاری و پەیامی ناکۆک ڕودەدات.  چۆنیەتی  بڵاوبوونەوەی ڤایرۆسی SPARS: •    ڤایرۆسێکی کۆرۆنای نوێ کە لە ڕێگەی دڵۆپ و پرژەوە دەگوازرێتەوە، ماوەی گەشەی ڤایرۆسەکە درێژخایەنە کە ڕێگە بە گواستنەوەی هەوکردنەکە دەدات پێش دەرکەوتنی نیشانەکانی.  •    ڕێژەی مردنی سەرەتایی بەرزە (4.7%) دواتر بۆ 0.6% دادەبەزێت.  •    ڤایرۆسەکە مەترسیدارترە بۆ منداڵان و ژنانی دووگیان و ئەو نەخۆشانەی کە نەخۆشی درێژخایەنی هەناسەدانیان هەیە  چارەسەرە ئەگەرییەکان : •    دژە ڤایرۆس کەڵاسوڤێر بەپێی مۆڵەتی فریاگوزاری بەکاردێت، بەڵام کاریگەری لاوەکی نەخۆشی لێدەکەوێتەوە و ڕێگری لە تووشبوون ناکات . •    سەرهەڵدانی دەرمانێکی بەدیل ( VMax ) لە ئەوروپا، خواستی ئەمریکی لەسەری دروست دەکات، سەرەڕای ئەوەی لە ئەمریکا پەسەند نەکراوە . •    پەرەپێدانی ڤاکسینی مرۆڤ لەسەر بنەمای ڤاکسینی ئاژەڵ (GMI)  کە مەترسییەکانی کاریگەرییە لاوەکییەکانی ناسراوە، بەڵام لە پرۆسەیەکی خێراکردندا بەرهەم دەهێنرێت  لەگەڵ پاراستنی یاسایی و  بەرپرسیارێتیدا . قۆناغەکانی چاکبوونەوە :  •    سەرهەڵدانی کاریگەرییە لاوەکییە ڤاکسینەکە، تۆمارکردنی سکاڵا و بەکارهێنانی سندوقی قەرەبووکردنەوەی حکومەت . •    سەرهەڵدانی داتا سەربەخۆکان لەلایەن "بلۆگەرە زانستییەکان" کاریگەری لەسەر ڕای گشتی دەبێت و ئاستەنگی  بۆ داتای فەرمی دروست دەکات . •    هەوڵی بەردەوام بۆ پەیوەندیکردن لەگەڵ خەڵک بە شێوەیەکی شەفاف و ڕوون دەدرێیت سەرەڕای نادڵنیایی زانستی . •     سەرەڕای خەم و زیانی بەکۆمەڵ دەناسێنرێت لە هەمان کاتدا پشتگیریکردن لە هەوڵەکان بەرەو چاکبوونەوە بەردەوامی دەبێی.    دابەشکردنی ڤاکسین :  •    پێشینەدەدرێت بە کوتان بۆ منداڵان و ژنانی دووگیان و گەنجانی تووشبوو بە نەخۆشییە درێژخایەنەکان، ئەمەش ناڕەزایەتی کارمەندانی تەندروستی و گروپەکانی دیکەی لێدەکەوێتەوە . •    بەکارهێنانی تۆمارە تەندروستییە ئەلیکترۆنییەکان (EHRs) بۆ دیاریکردنی گروپە ئامانجدارەکان نیگەرانییەکانی پاراستنی نهێنی دەوروژێنێت . •    پچڕانی پەیوەندییە ئەلیکترۆنییەکان بەهۆی کارەساتی سروشتی (پچڕانی کارەبا) گرنگی پلاندانان بۆ ئامرازە بەدیلەکانی پەیوەندیکردن دەردەخات .  ئاستەنگەکانی پەیوەندی تەندروست : •    پەیامی ناکۆک لە نێوان دەزگا تەندروستییەکان FDA , CDC , NIH  دەبێتە هۆی سەرلێشێواوی گشتی . •    بڵاوبوونەوەی ڤیدیۆی شۆککەر لە سۆشیال میدیا (وەک ڤیدیۆی ڕشانەوەی کوڕەکە دوای وەرگرتنی ڤاکسینی کەڵاسوڤێر و ترس و ڕەتکردنەوە ڕوو دەدات . •    ئاستەنگی و سەختی پەیوەندیکردن و دەستڕاگەیشتن بە  پلاتفۆرمی  UNEQL وەک نموونەیەک، لەلایەن هەندێک گروپەوە، وەک خوێندکارانی زانکۆ و ئەوانەی سەر بە کۆمەڵگە ئەتنی یان ئایینییەکانن .  •    بەرگری زۆر دەبینرێت لەلایەن ئەو گروپانەی کە دژی کوتان بوون بەهۆی نیگەرانییە کولتووری، ئایینیەکانەوە.  •    ژمارەیەکی بەرچاو لە "بزووتنەوەی دژەکان " کە گروپەکانی دژە ڤاکسین و دەرمانن لە سۆشیال میدیادا یەکدەگرن.    پوختەی ڕاپۆرتی  سەنتەری جۆنز هۆپکینز بۆ ئاسایشی تەندروستی لەسەر  پەتای  SPARS کە  پلان و سیناریۆیەکی دارێژراوە بۆ چارەسەرکەرانی مەترسی تەندروستی گشتی         ڕووداوی سەرەکی    ساڵ و مانگ یەکەم حاڵەتی مردن لە ئەمریکا؛ ڤایرۆسی SPARS  ڤایرۆسی کۆرۆنای نوێ دۆزرایەوە .    ئۆکتۆبەری ٢٠٢٥ لەگەڵ دەستپێکردنی وەرزی ئەنفلۆنزا لە چەندین ویلایەتی ئەمریکا حاڵەتەکان بڵاوبوونەتەوە و پەتاکە وەک حاڵەتێکی نائاسایی تەندروستی نێودەوڵەتی ناسێنراوە .    نۆڤەمبەر ٢٠٢٥ بڵاوبوونەوەی لە ٢٦ ویلایەت و وڵاتانی دیکە، بەرزبوونەوەی دڵەڕاوکێی گشتی، هەڵسەنگاندنی دژە ڤایرۆس  کەڵاسوڤێر دەستپێدەکات .    دیسەمبەر ٢٠٢٥ پێدانی مۆڵەتی بەکارهێنانی فریاگوزاری بۆ  Kalocivir(  دژە ڤایرۆسێکە کە بۆ چارەسەرکردنی  )SPARS  بەکاردێت , دەستپێکردنی پەرەپێدانی ڤاکسینێک لەسەر بنەمای ڤاکسینی ئاژەڵ (GMI)    جانیوەری ٢٠٢٦ بڵاوبوونەوەی ڤیدیۆیەکی شۆککەر کاریگەری لەسەر متمانەی گشتی دەبێت (لەگەڵ دەرکەوتنی دەرمانێکی بەدیل VMax ) لە ئەوروپا  (،کەڵاسوڤێر نیگەرانی و گومانی زیاتری  لێدەکەوێتەوە    فێبروەری - مارچ ٢٠٢٦ بە بەشداریی کەسایەتییە ناودارەکان هەڵمەتێکی میدیایی دەستپێدەکات بەڵام بەهۆی لێدوانە مشتومڕاوییەکانەوە ڕووبەڕووی ڕەخنە دەبنەوە .    مەی ٢٠٢٦ پێداچوونەوە بە کاریگەریو کەڵاسوڤێر پەسەندکردنی گۆڕاو و سەرەتایی بۆ ڤاکسینێک کۆرۆڤاکس دەکرێت، مشتومڕ لەسەر ئپێشینەی کوتان و نیگەرانییەکانی پاراستنی نهێنی دروست دەبێت    جوون - جوڵای ٢٠٢٦ بەرگری کۆمەڵگا لەلایەن چەندین گروپەوە وەک (موسڵمانان، ئەمریکییە ئەفریقییەکان، دژە ڤاکسێرەکان)، ڕەتکردنەوەی ڤاکسینەکە لەلایەن ژاپۆنەوە درەست دەبێت    ئۆگەست - سێپتێمبەر ٢٠٢٦ درەستبوونی ناڕەزایەتی خوێندکاران کە داوای دابەشکردنی دادپەروەرانە دەکەن بۆ جیهان     ئۆکتۆبەر - نۆڤەمبەر  ٢٠٢٦ کەمی ئەنتبایۆتیک بۆ چارەسەرکردنی هەوکردنی سییەکانی دوای SPARS ; دەستپێکردنی هەڵمەتی هۆشیاری لەسەر ڕەوایەتی دەرمانە هەڵگیراوەکان .    فێبروەری ٢٠٢٧ سەرهەڵدانی سکاڵا و کاریگەرییە لاوەکییە دەمارییەکانی ڤاکسینەکە لەسەرکۆمپانیای کۆرۆڤاکس، تۆمار کردنی سکاڵای یاسایی وچالاککردنی  سندوقێکی قەرەبووکردنەوە     ئەیپرڵ - مەی ٢٠٢٧ پەتاکە بە فەرمی کۆتایی هاتووە، ڤایرۆسەکە لە ئاژەڵەکاندا بەردەوامە و ئاستەنگی و ئڵەنگاری سیاسی و کۆمەڵایەتی و نادڵنیایی بەردەوامە.     ئۆگەست ٢٠٢٨             خشتەی زاراوە سەرەکییەکان و کورتکراوەکان کورتکراوەی    مانای تەواو SPARS    نەخۆشی توندی هەناسەدانی سانت پاوڵ (ڤایرۆسێکی نوێی کۆرۆنا) MCM    ڕێوشوێنی بەرپەرچدانەوەی پزیشکی CDC    سەنتەری کۆنترۆڵکردن و خۆپاراستن لە نەخۆشیەکان FDA    ئیدارەی خۆراک و دەرمانی ئەمریکا NIH    پەیمانگا نیشتمانییەکانی تەندروستی HHS    وەزارەتی تەندروستی و خزمەتگوزاری مرۆیی WHO    ڕێکخراوی تەندروستی جیهانی ACIP    لیژنەی ڕاوێژکاری بۆ شێوازەکانی کوتان PREP    یاسای ئامادەکاری و وەڵامدانەوەی فریاگوزاری تەندروستی SNS    کۆگاکردنی ستراتیژی نیشتمانی دەرمان و پێداویستییە پزیشکییەکان EHR    تۆماری تەندروستی ئەلیکترۆنی UNEQL    پلاتفۆرمی تۆڕە کۆمەڵایەتیەکان تایبەت بە خوێندکارانی زانکۆ GMI    کۆمپانیای فرەنەتەوەیی بەخێوکردنی ئاژەڵ Kalocivir    دژە ڤایرۆسێکە کە بۆ چارەسەرکردنی  SPARS  بەکاردێت VMax    دژەڤایرۆسێکی بەدیل کە لە ئەوروپا بەکاردێت سەرچاوە سەرەتاییەکان •    سەنتەری جۆنز هۆپکینز بۆ ئاسایشی تەندروستی، ٢٠١٧ . •    ئاماژەی یاسایی و ڕێکخراوەیی وەک یاسای ئامادەکاری و وەڵامدانەوەی فریاگوزاری (PREP یاسای). •    توێژینەوە و بابەتەکانی پێشوو لەسەر پەتاکانی کۆرۆنا (SARS, MERS). •    داتا و ڕاپۆرتەکانی ڕێکخراوی تەندروستی جیهانی (WHO).    

راپۆرتی درەو  🔹 سەرەڕای ئەوەی لە ماوەی (32) ساڵی ڕابردوودا و لە ساڵانی (1992 بۆ 2024)، بڕی گەشەی بەشداری هاوڵاتیان لە هەڵبژاردنە گشتییەکان، لە سنوری پارێزگاکانی هەولێر بۆ دوو هێندەو بە ڕێژەی (99%) زیادی کردووە، بەڵام ژمارەی دەنگەکانی یەکێتی نیشتمانی کوردستان، لە سەروو (148 هەزار) دەنگەوە لە یەکەم هەڵبژاردندا، بۆ نزیک لە (111 هەزار) دەنگ و بە ڕێژەی (25%) دابەزیوە لە دوا هەڵبژاردندا، لە هەندێک هەڵبژاردندا ئاستی دابەزینی دەنگەکانی زۆر لەو ڕێژەیەش زیاتر بووە. یەکەم؛ هەڵبژاردنی خولی یەکەمی پەرلەمانی کوردستان و پێگەی یەکێتی نیشتمانی کوردستان لە پارێزگای هەولێر لە یەکەمین ئەزمونی هەڵبژاردن لە هەرێمی کوردستان لە ڕێکەوتی 19/5/1992، یەکەمین هەڵبژاردنی گشتی بۆ پەرلەمانی کوردستان بەڕێوەچوو، لەم هەڵبژاردنەدا لەسەر ئاستی گشتی پارێزگاکانی هەرێمی کوردستان بە پارێزگای کەرکوک یشەوە، (ملیۆنێک و 112 هەزار) هاوڵاتی مافی دەنگدانی هەبوو، لەو ژمارەیەش (971 هەزار و 953) کەس بە ڕێژەی (86%) بە دروستی دەنگیان دابوو. تەنها لە پارێزگای هەولێر ژمارەی دەنگی پێشبینیكراو بە (340 هەزار) هاوڵاتی خەمڵێندرابوو، بەڵام ژمارەی دەنگدەری راستەقینە (335 هەزار و 827) کەس بوو، بەو پێیە ئاستی بەشداری دەنگدەران لە هەڵبژاردنەکەدا لە پارێزگای هەولێر (98.8%) بوو. تەنها لە سنوری پارێزگای هەولێر، یەکێتی نیشتمانی کوردستان (148 هەزار و 352) دەنگی بەدەستهێنابوو بە ڕێژەی (44%)ی دەنگە دروستەکانی پارێزگاکەو هێزی دووەمی براوەی پارێزگای هەولێر بوو.  دووەم؛ هەڵبژاردنی خولی یەکەمی ئەنجومەنی پارێزگاکان (شارەوانییەکان) و پێگەی یەکێتی نیشتمانی کوردستان لە پارێزگای هەولێر لە یەکەمین ئەزمونی هەڵبژاردنی ئەنجومەنی شارەوانییەکان لە هەرێمی کوردستان، کە لە ڕێکەوتی 30/1/2005 بەڕێوەچوو، لەم هەڵبژاردنەدا لەسەر ئاستی گشتی پارێزگاکانی هەرێمی کوردستان (ملیۆنێک و 767 هەزار و 993) هاوڵاتی دەنگیان دابوو. تەنها لە پارێزگای هەولێر ژمارەی دەنگدەری راستەقینە (647 هەزار و 994) کەس بوو، لەو ژمارەیەش یەکێتی نیشتمانی کوردستان (244 هەزار و 343) دەنگی بەدەستهێنابوو بە ڕێژەی (37.7%)ی دەنگە دروستەکانی پارێزگاکەو هێزی دووەمی براوەی پارێزگای هەولێر بوو (16) کورسی ئەنجومەنەکەی مسۆگەر کرد.  سێیەم؛ هەڵبژاردنی خولی دووەمی ئەنجومەنی نوێنەرانی عێراق و پێگەی یەکێتی نیشتمانی کوردستان لە پارێزگای هەولێر دووەمین خولی هەڵبژاردنی ئەنجومەنی نوێنەرانی عێراق بە شێوەی فرە بازنەیی لەسەر ئاستی (18) پارێزگاکەی عێراق لە ڕێکەوتی 7/3/2010 بەڕێوەچوو، لەم هەڵبژاردنەدا لەسەر ئاستی گشتی پارێزگاکانی هەرێمی کوردستان (2 ملیۆن و 590 هەزار و 274) هاوڵاتی مافی دەنگدانیان هەبوو، بەپێی ڕاگەیەندراوی کۆمسیۆن لەو ژمارەیە (ملیۆنێک و 938 هەزار و 754) کەس بە ڕێژەی (75%) بە دروستی دەنگیان دابوو. تەنها لە پارێزگای هەولێر (917 هەزار و 685) کەس مافی دەنگدانی هەبوو، لەو ژمارەیەش (680 هەزار و 408) کەس بە ڕێژەی (74%) بە دروستی دەنگیان دابوو. لەو ژمارەیەش یەکێتی نیشتمانی کوردستان کوردستان (124 هەزار و 632) دەنگی بەدەستهێنابوو بە ڕێژەی (18%)ی دەنگە دروستەکانی پارێزگاکەو بووە هێزی دووەمی پارێزگای هەولێر لەدوای پارتی دیموکراتی کوردستانەوە.  چوارەم؛ هەڵبژاردنی خولی دووەمی ئەنجومەنی پارێزگاکان و پێگەی یەکێتی نیشتمانی کوردستان لە پارێزگای هەولێر لە هەرێمی كوردستان تا ساڵی 2014 تەنها دوو هەڵبژاردنی ئەنجومەنی پارێزگاكان بەڕێوەچووە، هەڵبژاردنی یەكەم لە 30/كانوونی دووەمی 2005 كرا، بەڵام دووەم هەڵبژاردنی لە 30/4/2014 بەرێوەچوو. بەپێی داتاکانی كۆمسیۆنی باڵای هەڵبژاردنەكان لەو کاتەدا ژمارەی دانیشتوانی پارێزگای هەولێر (ملیۆنێک و 713 هەزارو 461) كەس بوو، لەو ژمارەیەش (975 هەزارو 326) كەس مافی دەنگدانی هەبووە بۆ هەڵبژاردنی ئەنجومەنی پارێزگاكان لە 30/4/2014، ئەنجومەنی پارێزگای هەولێر (30) كورسی بۆ دیاریكرا، لەو ژمارەیە 5 كورسی بۆ كۆتاكان. لەسەر ئاستی پارێزگای هەولێر، كە (754 هەزار و 234) كەس دەنگیان دابوو  (5) لیست توانیان كورسی مسۆگەر بكەن، ئەوانی تر دەنگی پێویستیان نەهێنا، یەکێتی نیشتمانی لەدوای پارتییەوە بە بەدەستهێنانی (168 هەزار و 603) دەنگ و ڕێژەی (22%)ی دەنگە دروستەکانی پارێزگاکە  (6) كورسی مسۆگەر کرد.       پێنجەم؛ هەڵبژاردنی خولی سێیەمی ئەنجومەنی نوێنەرانی عێراق و پێگەی یەکێتی نیشتمانی کوردستان لە پارێزگای هەولێر سێیەمین خولی هەڵبژاردنی ئەنجومەنی نوێنەرانی عێراق بە شێوەی فرە بازنەیی لەسەر ئاستی (18) پارێزگاکەی عێراق لە ڕێکەوتی 30/4/2014 بەڕێوەچوو، لەم هەڵبژاردنەدا لەسەر ئاستی گشتی پارێزگاکانی هەرێمی کوردستان (2 ملیۆن و 717 هەزار و 82) هاوڵاتی مافی دەنگیان هەبوو، لەو ژمارەیە (2 ملیۆن و 128 هەزار و 167) کەس بە ڕێژەی (78%) بە دروستی دەنگیان دابوو. تەنها لە پارێزگای هەولێر (936 هەزار و 557) کەس مافی دەنگدانی هەبوو، لە ژمارەیەش (744 هەزار و 489) کەس بە ڕێژەی (79.5%) بە دروستی دەنگیان دابوو. لەو ژمارەیەش یەکێتی نیشتمانی کوردستان (168 هەزار و 688) دەنگی بەدەستهێنابوو بە ڕێژەی (23%)ی دەنگە دروستەکانی پارێزگاکەو هێزی دووەمی براوەی پارێزگای هەولێر بوو لەدوای پارتی دیموکراتی کوردستانەوە.  شەشەم؛ هەڵبژاردنی خولی چوارەمی ئەنجومەنی نوێنەرانی عێراق و پێگەی یەکێتی نیشتمانی کوردستان لە پارێزگای هەولێر چوارەمین خولی هەڵبژاردنی ئەنجومەنی نوێنەرانی عێراق بە شێوەی فرە بازنەیی لەسەر ئاستی (18) پارێزگاکەی عێراق لە ڕێکەوتی 12/5/2018 بەڕێوەچوو، لەم هەڵبژاردنەدا لەسەر ئاستی گشتی پارێزگاکانی هەرێمی کوردستان (3 ملیۆن و 144 هەزار و 730) هاوڵاتی مافی دەنگیان هەبوو، لەو ژمارەیە (ملیۆنێک و 799 هەزار و 686) کەس بە ڕێژەی (57%) بە دروستی دەنگیان دابوو. تەنها لە پارێزگای هەولێر (ملیۆنێک و 314 هەزار و 46) کەس مافی دەنگدانی هەبوو، لەو ژمارەیەش (642 هەزار و 232) کەس بە ڕێژەی (49%) بە دروستی دەنگیان دابوو. لەو ژمارەیەش یەکێتی نیشتمانی کوردستان (79 هەزار و 945) دەنگی بەدەستهێنابوو بە ڕێژەی (12%)ی دەنگە دروستەکانی پارێزگاکەو هێزی دووەمی پارێزگای هەولێر بوو لەدوای پارتی دیموکراتی کوردستانەوە.  حەوتەم؛ هەڵبژاردنی خولی پێنجەمی ئەنجومەنی نوێنەرانی عێراق و پێگەی یەکێتی نیشتمانی کوردستان لە پارێزگای هەولێر پێنجەمین خولی هەڵبژاردنی ئەنجومەنی نوێنەرانی عێراق بە شێوەی فرە بازنەیی لە ڕێکەوتی 10/10/2021 بەڕێوەچوو، لەم هەڵبژاردنەدا لەسەر ئاستی گشتی پارێزگاکانی هەرێمی کوردستان (3 ملیۆن و 450 هەزار و 773) هاوڵاتی مافی دەنگیان هەبوو، لەو ژمارەیە (ملیۆنێک و 233 هەزار و 451) کەس بە ڕێژەی (36%) بە دروستی دەنگیان دابوو. تەنها لە پارێزگای هەولێر (ملیۆنێک و 238 هەزار و 379) کەس مافی دەنگدانی هەبوو، لەو ژمارەیەش (444 هەزار و 253) کەس بە ڕێژەی (36%) بە دروستی دەنگیان دابوو. لەو ژمارەیەش یەکێتی نیشتمانی کوردستان (65 هەزار و 862) دەنگی بەدەستهێنابوو بە ڕێژەی (15%)ی دەنگە دروستەکانی پارێزگاکەو هێزی سێیەمی پارێزگای هەولێر بوو لەدوای پارتی و  نەوەی نوێ‌وە.  هەشتەم؛ هەڵبژاردنی خولی شەشەمی پەرلەمانی کوردستان و پێگەی یەکێتی نیشتمانی کوردستان لە پارێزگای هەولێر بۆ یەکەمین جار شەشەمین خولی هەڵبژاردنی پەرلەمانی کوردستان بە شێوەی فرە بازنەیی لە ڕێکەوتی 20/10/2024 بەڕێوەچوو، لەم هەڵبژاردنەدا لەسەر ئاستی گشتی پارێزگاکانی هەرێمی کوردستان (2 ملیۆن و 899 هەزار و 578) هاوڵاتی مافی دەنگیان هەبوو، لەو ژمارەیە (ملیۆنێک و 882 هەزار و 448) کەس دەنگەکانیان بە دروستی هەژمار کراو (206 هەزار و 434) دەنگیش پوچەڵ کرایەوە. تەنها لە پارێزگای هەولێر (ملیۆنێک و 22 هەزار و 906) کەس مافی دەنگدانی هەبوو، لەو ژمارەیەش (669 هەزار و 273) کەس بە ڕێژەی (65%) دەنگەکانیان هەژمار کراو بە دروستی دەنگیان دابوو. لەو ژمارەیەش  لە پارێزگای هەولێر یەکێتی نیشتمانی کوردستان (111 هەزار و 102) دەنگی بەدەستهێنابوو بە ڕێژەی (16.6%)ی دەنگە دروستەکانی پارێزگاکەو هێزی دووەم بوو لەدوای پارتی دیموکراتی کوردستانەوە.  ماوەتەوە بوترێت؛ سەرەڕای ئەوەی لە ماوەی (32) ساڵی ڕابردوودا و لە ساڵانی (1992 بۆ 2024)، بڕی گەشەی بەشداری هاوڵاتیان لە هەڵبژاردنە گشتییەکان، لە سنوری پارێزگای هەولێر بۆ دوو هێندەو بە ڕێژەی (99%) زیادی کردووە، بەڵام ژمارەی دەنگەکانی یەکێتی نیشتمانی کوردستان، لە سەروو (148 هەزار) دەنگەوە بۆ نزیکەی (111 هەزار) دەنگ بە ڕێژەی (25%) دابەزیوە، بۆ وردەکاری زیاتر بڕوانە خشتەکەی خوارەوە. خشتە