بەپێی ئەنجامە بەراییەكانی هەڵبژاردنی پەرلەمانی عێراق، لیستی نەوەی نوێ دوو كورسی لە هەولێر و دوو كورسی لە سلێمانی هێناوە، لە پارێزگای سلێمانی نەوەی نوێ:( 61 هەزار و 638 ) دەنگ و لە پارێزگای سلێمانی (69 هەزار و 123 ) دەنگی بەدەستهێناوە. بە گوێرەی ئەنجامەكانی كۆمسیۆن ئەم چوار كاندیدەی نەوەی نوێ دەرچوون: لە پارێزگای  هەولێر رابوون مەعروف سەرۆكی لیستی نەوەی نوێ (  ٤٣ هەزارو ٧٦١ )دەنگی بەدەستهێناوە، كاوە عەبدولقادر (٢ هەزار و ٦٧ )دەنگی بەدەستهێناوە. لە سلێمانیش سەركەوت شەمسەدین سەرۆكی لیست( ٢٤ هەزار و ٥٦٧ )دەنگی بەدەستهێناوە، سیروان بابان( ٤ هەزار و ١٣١ ) دەنگی بەدەستهێناوە. .................. بەشێك لە زانیاریەكان لە سایتی ئێن ئاڕتی وەرگیراوە 

(درەو میدیا): قەرەچەكانی هەرێمی كوردستان لە هەڵبژاردنی ئەنجومەنی نوێنەرانی عێراق دەنگیان بۆ پارتی دیموكراتی كوردستان داوە. یونس زاهیر سەرۆك هۆزی قەرەچەكان لە هەرێمی كوردستان و پارێزگای نەینەوا ئاشكرایكرد" هەموو ئەندامانی هۆزەكەیان دەنگیان بە پارتی دیموكراتی كوردستان داوە، لە پارێزگای كەركوكیش وەكو پشتیوانی لە هەڵوێستی پارتی كە پرۆسەی هەڵبژاردنی بایكۆت كرد، ئەوان دەنگیان نەداوە". یونس زاهیر لە لێدوانێكدا بۆ سایتی سۆمەریەنیوز، لەبارەی هۆكاری دەنگدانیان بە لیستی پارتی دیموكراتی كوردستان دەڵێت" پارتی بایەخ بە قەرەچەكان دەدات و هەوڵ بۆ باشكردنی ژیانیان دەدات. باسی لەوەشكردووە، ئێستا هۆزی قەرەچ ئامادەكاری دەكات بۆ سازدانی ئاهەنگ بەبۆنەی سەركەوتنی لیستی پارتی دیموكراتی كوردستانەوە. قەرەچ یاخود (دۆم) كە بە عەرەبی پێیان دەوترێت (كاولی) بەگوێرەی هەندێك سەرچاوەی مێژویی ریشەیان دەگەڕێتەوە بۆ هیندستان، ئەم هۆزە زمان و سەمای تایبەت بەخۆیان هەیە، وەك باس دەكرێت تاوەكو ساڵی 2005 ژمارەیان لە عێراق (50 هەزار) كەس بووە، قەرەچەكان زۆربەیان لە گوندو دەوروبەری شارەكان دەژین. لە چەندین شاری عێراقی قەرەچەكان بونیان هەیە، دوای روخانی رژێمی سەددام لە 2003، لە باشوری بەغدادی پایتەخت بە دوری 100 كیلۆمەتر شارۆچكەیەك هەبوو بەناوی (كاولی) زۆربەی دانیشتوانەكەی قەرەچ بوون، بەڵام بە بەهانەی ناپەسەندی رەوشتەوە، سوپای مەهدی سەربە رەوتی سەدر هێرشی كردەسەر ئەو شارۆچكەیەو وێرانی كرد.

درەو میدیا:  لە پارێزگای هەولێر كە 15 كورسی هەیەو ژمارەی ئەو كەسانەی دەنگیانداوە(570463) كەسە بەو پێیەش بەهای كورسیەك(38030). دابەشكردنی دەنگەكانی پارێزگای هەولێر بەپێی شێوازی سانتلیگۆی هەموار كراو كە كۆی دەنگەكان دابەشی  ( 1.7 ، 3 ، 5 ، 7 .....) كراوە، بۆیە بە پێی ئەو خشتەیەی كە درەو میدیا لە كۆمسیۆنی باڵای هەڵبژاردنەكانەوە دەستی كەوتووە،  پارتی  دیموكراتی كوردستان ( 316001 ) دەنگی بەدەستهێناوەو 8 كورسی و ( 18588 ) ماوەیە، یەكێتی نیشتیمانی كوردستان ( 77792 ) دەنگی بەدەستهێناوەو  دەنگەكانی 2 كورسی و( 15558 ) ماوە بزوتنەوەی گۆڕان كە ( 23417 ) دەنگی بەدەستهێناوە 1 كورسی و ( 13269 ) دەنگی ماوەیە یەكگرتوو ئیسلامی كە ( 23933 ) دەنگی بەدەستهێناوەو دابەشی 1.7 كراوەو ( 14078 ) ی دەردەچێت و كورسی بەرناكەوێت   كۆمەڵی ئیسلامی كە ( 35741 ) دەنگی بەدەستهێناوەو 1 كورسی و ( 11913 ) ماوەیە،  هاوپەیمانی كە ( 49266 ) دەنگی بەدەستهێناوەو 1 كورسی و ( 16422 ) ماوەیە،  نەوەی نوێ( 69123 ) دەنگی بەدەستهێناوەو 2 كورسی و ( 13824 ) ماوەیە،

(درەو میدیا):  لە پارێزگای سلێمانی كە 18 كورسی هەیەو ژمارەی ئەو كەسانەی دەنگیانداوە( 700474 ) كەسە بەو پێیەش بەهای كورسیيەك ( 38915 ). دابەشكردنی دەنگەكانی سلێمانی بەپێی شێوازی سانتلیگۆی هەمواركراو كە كۆی دەنگەكان دابەشی ( 1.7 ، 3 ، 5 ، 7 ...) كراوە، بۆیە بە پێی ئەو خشتەیەی كە (درەو میدیا) لە كۆمسیۆنی باڵای هەڵبژاردنەكانەوە دەستی كەوتووە،  * یەكێتی نیشتیمانی كوردستان ( 262128 ) دەنگی بەدەستهێناوەو دەنگەكانی 8 كورسی و ( 15 هەزار دەنگ باقیەكەیەتی)  * بزوتنەوەی گۆڕان كە ( 149930 ) دەنگی بەدەستهێناوە 4 كورسی و ( 16658 ) دەنگی ماوەیە * یەكگرتوو ئیسلامی كە ( 29161 ) دەنگی بەدەستهێناوەو 1 كورسی و ( 9720 ) ماوەیە. * كۆمەڵی ئیسلامی كە ( 49343 ) دەنگی بەدەستهێناوەو 1 كورسی و ( 16447 ) ماوەیە.  * هاوپەیمانی كە ( 44976 ) دەنگی بەدەستهێناوەو 1 كورسی و ( 14992 ) ماوەیە.  * نەوەی نوێ( 61638 ) دەنگی بەدەستهێناوەو 2 كورسی و ( 12327 ) ماوەیە. * پارتی ( 46567 ) دەنگی بەدەستهێناوەو 1 كورسی و ( 15522 ) ماوەیە.  

(درەو میدیا): بە پێی زانیارییەكانی (درەو میدیا) راگەیاندنی ناوی كاندیدە سەركەوتووەكانی هەڵبژاردنی پەرلەمانی عێراق دوادەكەوێت بەهۆی دەرنەوچونی بەشێك لە سەركردە سیاسیيەكانی عێراق و هەوڵدان بۆ گۆڕینی دەنگەكانیان تا ئاستی دەرچوون. بەپێی زانیاریيەكانی (درەو میدیا) كە لە كۆمسیۆنی باڵای هەلبژادرنەكانی عێراقەوە دەستی كەوتووە، لە ئێستادا هەوڵێك هەیە بۆ دەستكاریكردنی دەنگی كاندیداكان لە بەرژەوەندی بەرپرسە سیاسيیە دەرنەچووەكان، كە لەم هەڵبژاردنەدا ژمارەیەكی زۆری سەركردە دیارەكانی عێراق دەرنەچوون و دەیانەوێت هەر لە لیستەكەی خۆیان دەستكاری دەنگەكانیان بۆ بكەن و دەریان بچێنن. كازم شەمەری سەرۆكی كوتلەی هاوپەیمانی نیشتیمانی ئەیاد عەلاوی رایگەیاندووە كە فشاری زۆر لەسەر كۆمسیۆنی هەڵبژاردن هەیە بۆ دەستكاریكردنی ئەنجامی دەنگی لیستەكەیان لە پارێزگای بەغداد،  دیارترین ئەو سەركردانەی كە دەنگی پێویستیان نەهێنا:. * سەلیم جبوری سەرۆكی پەرلەمانی عێراق، لە هاوپەیمانی نیشتیمانی ئەیاد عەلاوی، كە دەنگی پێویستی بەدەستنەهێناوە. * حەنان فەتلاوی سەرۆكی لیستی ئیرادە دەنگی پێویستی بەدەست نەهێناوە * عەباس بەیاتی و هەیسەم جبوری و عەلی عەلاق و  جاسم محەمەد جەعفەر.. لەم هەڵبژاردنەدا سەرەڕای سزادانی حزبەكان بەوەی رێژەی هەڵبژاردن كۆی گشتی عێراق 44% بوو، هاوكات زۆرینەی سەركردەو سیاسیيە پۆپۆلیستەكانی عێراق و هەرێمی كوردستانی سزادران دەنگی كەمیان بەدەستهێنا. 

بەهای كورسیەكانی پارێزگاكانی هەرێمی كوردستان جیاوازن  پارێزگای هەولێر ژمارەی ئەو كەسانەی دەنگیانداوە: 570463  ژمارەی كورسیەكان : 15 كورسی و یەك كورسی كۆتا  بەهای كورسیەك : 38030  پارێزگای سلێمانی: ژمارەی ئەو كەسانەی دەنگیانداوە: 700474  ژمارەی كورسیەكان : 18 كورسی    بەهای كورسیەك : 38915  پارێزگای دهۆك: ژمارەی ئەو كەسانەی دەنگیانداوە: 544226  ژمارەی كورسیەكان : 11 كورسی    بەهای كورسیەك : 49475 لە رۆژنامەی ئاوێنە وەرگیراوە 

(درەو میدیا ) بۆ یەكخستنی ناوماڵی شیعەكان و تاوتوێكردنی پرسی پێكهێنانی حكومەتی نوێی عێراق، ژەنەراڵ قاسم سولەیمانی فەرماندەی فەیلەقی قودسی سوپای پاسدارانی كۆماری ئیسلامیی ئێران گەیشتە بەغداد. سایتی " غەد پرێس" لەسەر زاری چەند سەرچاوەیەكی ئاگادارەوە بڵاویكردەوە، ئەمڕۆ سێشەممە 15ی ئایار سولەیمانی گەیشتوەتە بەغداد و گفتوگۆی لەگەڵ لایەنە شیعەكاندا دەستپێكردووە، بۆئەوەی گەورەترین كوتلەی پەرلەمانی بۆ پێكهێنانی كابینەی نوێی حكومەت پێبكهێنن. سەردانەكەی سولەیمانی بۆ بەغداد لە كاتێكدایە كە كۆمسیۆنی باڵای سەربەخۆی هەڵبژاردنەكانی عێراق ئەنجامی زیاتر لە 90%ی هەڵبژاردنی پەرلەمانی عێراقی راگەیاندووە و هاوكاتیشە لەگەڵ ئەوەی باسدەكرێت كە سعودیە پشتگیری لە هاوپەیمانی " سائرون"ی موقتەدا سەدر دەكات بۆئەوەی هاوپەیمانێتییەك لەگەڵ سوننەكان پێكبهێنێت بۆ سەرۆكایەتیكردنی كابینەی نوێی حكومەت. چەند سەرچاوەیەكیش ئاشكرایانكردووە دەوڵەتی یاسا بە سەرۆكایەتی نوری مالیكی بەنیازە لەگەڵ هاوپەیمانی فەتحی هادی عامری و نیشتمانیی بە سەرۆكایەتی ئەیاد عەلاوی هاوپەیمانێتی پێكبهێنێت.  

درەو میدیا  لە پارێزگای سلێمانی دەنگی لیستەكان گۆڕانكاری بەسەردا هاتووە لە نێوان هەڵبژاردنی 2014 بۆ 2018 : لە هەڵبژاردنی 30ی نیسانی یەكێتی نیشتیمانی كوردستان (294265) دەنگ و ( 6 ) كورسی بەدەستهێنابوو بەڵام لە هەڵبژاردنی 12ی ئایاری 2018 دا (262128 ) و ( 8 ) كورسی بەدەستهێناوە بەو پێیەش یەكێتی (32137 ) دەنگ كەمیكردووە بەڵام  ( 2 ) كورسی زیادی كردووە. لیستی گۆڕان لە هەڵبژاردنی 30ی نیسانی 2014 دا  (347799) دەنگ و (7) كورسی پەرلەمانی بەدەستهێنا،بەڵام لە هەڵبژاردنی 12ی ئایاری 2018 دا (149930 ) دەنگ و ( 4 كورسی بەدەستهێناوە بەو پێیەش 3 كورسی و (197869 ) دەنگ كەمیكردووە   ، لیستی پارتی دیموكراتی كوردستان لە هەڵبژاردنی 30ی نیسانی 2014 دا  (93410) دەنگ و (2) كورسی بەدەستهێنا، بەڵام لە هەڵبژاردنی 12ی ئایاری 2018 دا (46567) دەنگ و ( 1 )  كورسی بەدەستهێناوە بەو پێیەش 1 كورسی و (46843) دەنگ كەمیكردووە   ، لیستی یەكگرتووی ئیسلامیی لە هەڵبژاردنی 30ی نیسانی 2014 دا  (81392) دەنگ و ( 2 ) كورسی بەدەستهێنابوو، بەڵام لە هەڵبژاردنی 12ی ئایاری 2018 دا (29161) دەنگ و ( 1 )  كورسی بەدەستهێناوە بەو پێیەش 1 كورسی و (52231) دەنگ كەمیكردووە   لیستی كۆمەڵی ئیسلامیی لە هەڵبژاردنی 30ی نیسانی 2014 دا  (57102) دەنگ و  (1) كورسی بەدەستهێنابوو بەڵام لە هەڵبژاردنی 12ی ئایاری 2018 دا (49343) دەنگ و ( 1 )  كورسی بەدەستهێناوە بەو كورسیەكەی وەك خۆیەتی بەڵام  كورسی و (7759) دەنگ كەمیكردووە   

(درەو میدیا): دەنگی لایەنەكان لە پارێزگای سلێمانی كە لەلایەن كۆمیسیۆنی باڵای سەربەخۆی هەڵبژاردنەكانی عێراقەوە راگەیەندرا: * یەكێتی نیشتمانیی كوردستان: 262 هەزار و 128 دەنگ * بزووتنەوەی گۆڕان: 149 هەزار و 930  * نەوەی نوێ: 61 هەزار و 638 دەنگ * كۆمەڵی ئیسلامی: 49 هەزار و 343 * پارتی دیموكراتی كوردستان: 46 هەزار و 567 * هاوپەیمانی دیموكراسی و دادپەروەی: 44 هەزار و 976 * یەكگرتووی ئیسلامی كوردستان: 29 هەزار و 161

(درەو میدیا): دەنگی لایەنەكان لە پارێزگای هەولێر كە لەلایەن كۆمیسیۆنی باڵای سەربەخۆی هەڵبژاردنەكانی عێراقەوە راگەیەندرا:  پارێزگای هەولێر: * پارتی دیموكراتی كوردستان: 316 هەزار و 1 دەنگ * یەكێتیی نیشتمانیی كوردستان: 77 هەزار و 792 دەنگ * نەوەی نوێ: 69 هەزار و 123 دەنگ * هاوپەیمانی دیموكراسی و دادپەروەری: 49 هەزار و 266 دەنگ  * بزووتنەوەی گۆڕان: 39 هەزار و 809 دەنگ * كۆمەڵی ئیسلامی: 35 هەزار و 534 دەنگ * یەكگرتووی ئیسلامی كوردستان: 23 هەزار و 933  

(درەو میدیا): لەم خشتەیەدا دەنگی لیستەكان بەشێوازی سانتلیگۆ دیاریكراوە، بەڵام ئەگەری گۆڕانكاری كەم لە كورسيیەكاندا هەیە * پارتی لە هەولێر 8 كورسی لە سلێمانی 1 كورسی لە دهۆك 10 كورسی لە موسڵ 4 كورسی لەگەڵ 3 كورسی كۆتاكان 26 كورسی بەدەستهێناوە  * یەكێتی  لە هەولێر 2 كورسی لە سلێمانی 7 كورسی لە كەركوك 6 كورسی لە موسڵ 1 كورسی  لە دیالە  1 كورسی و كۆی گشتی 17  كورسی بەدەستهێناوە  * گۆڕان   لە هەولێر 1 كورسی لە سلێمانی 4 و كۆی گشتی 5  كورسی بەدەستهێناوە چاوەڕوان دەكرێت ببێتە 6 كورسی  * یەكگرتوو   لە سلێمانی 1 و و لە دهۆك 1 كورسی و  كۆی گشتی 2  كورسی بەدەستهێناوە  * كۆمەڵ  لە سلێمانی 2 و و لە هەولێر 1 كورسی و  كۆی گشتی 3  كورسی بەدەستهێناوە  * هاوپەیمانی  لە سلێمانی 1 و و لە هەولێر 1 كورسی و  كۆی گشتی 2  كورسی بەدەستهێناوە  * نەوەی نوێ  لە سلێمانی 2 و و لە هەولێر 2 كورسی و  كۆی گشتی 4  كورسی بەدەستهێناوە  كۆی گشتی كورسی لیستە كوردیەكان دەكاتە 59 كورسی.

(درەو میدیا): ئەمشەو كۆمسیۆنی هەڵبژاردنەكان ئەنجامی بەرایی هەڵبژاردن لە هەرسێ پارێزگای (هەولێر- سلێمانی- دهۆك) رادەگەیەنێت. سەرچاوەیەكی باڵا لە كۆمسیۆنی باڵای سەربەخۆی هەڵبژاردنەكانی عێراق بە (درەو میدیا)ی راگەیاند، ئەمشەو كۆمسیۆن ئەنجامی بەرایی هەڵبژاردنی ئەنجومەنی نوێنەران لە هەرسێ پارێزگاكەی هەرێمی كوردستان رادەگەیەنێت. ئەو سەرچاوەیە كە خۆی داوایكرد ناوەكەی بڵاونەكرێتەوە وتی: راگەیاندنی ئەنجامی بەرایی هەڵبژاردنی ئەنجومەنی نوێنەرانی عێراق دوادەكەوێت بۆ كاتێكی تر. راگەیاندنی ئەنجامی بەرایی هەڵبژاردن لە پارێزگاكانی هەرێمی كوردستان لەكاتێكدایە هەشت لایەنی سیاسی هەرێم گلەیی هەیە لە پرۆسەی هەڵبژاردن لە پارێزگای سلێمانی و دەڵێن ساختەكاری كراوە.

(درەو میدیا): موقتەدا سەدر رێبەری رەوتی سەدرو سەرۆكی لیستی براوەی یەكەمی هەڵبژاردنی ئەنجومەنی نوێنەرانی عێراق رایگەیاند، حكومەتێكی تەكنۆكرات پێكدەهێنن كە حزبایەتی تێدا نەبێت. لە تویتێكدا لە تۆڕی كۆمەڵایەتی تویتەر، سەدر ئاماژەی بەوەكرد، ئەوان وەكو هاوپەیمانی (سائیرون) بە دانایی و نیشتیمانپەروەرییەوە ئیرادەی گەل مەبەستیانەوە و نەوەیەكی نوێ پێكدەهێنن بۆ ئەوەی گۆڕانكاری ببینن بە ئاڕاستەی چاكسازیدا. بەپێی ئەو ئەنجامە بەراییانەی هەڵبژاردن كە كۆمسیۆنی هەڵبژاردنەكان بڵاویكردەوە، هاوپەیمانی سائیرون بە سەرۆكایەتی موقتەدا سەدر لەسەر ئاستی عێراق لە پلەی یەكەمدایە. حەیدەر عەبادی سەرۆك وەزیرانی عێراق و سەرۆكی هاوپەیمانی (النصر) كە دەیەوێت بۆ ویلایەتی دووەم لە پۆستەكەیدا بمێنێتەوە، ئەمڕۆ ئامادەیی خۆی نیشاندا بۆ كاركردن و هەماهەنگی لەگەڵ هەموو لایەنەكان بەمەبەستی پێكهێنانی كابینەی نوێی حكومەت. هەوڵی حەیدەر عەبادی بۆ وەرگرتنەوەی پۆستی سەرۆك وەزیران لەكاتێكدایە هەفتەی رابردوو موقتەدا سەدر لە وەڵامی پرسیاری یەكێك لە لایەنگرەكانیدا ئاشكرایكرد، هاوپەیمانی سائیرون كاندیدی خۆی دەبێت بۆ پۆستی سەرۆك وەزیران.  

(درەو میدیا):  چەند رۆژێكە تەواوی سەرنج و نیگای چاودێرانی سیاسی ڕوو لە ئێرانە، بەو پێیەی ئەم ناوچەیە قوڵایی ستراتیژی ئێرانە، سەركێشیكردن لە بڕیارەكانی تاران لەم دەڤەرە، وەكو هەڕەشە بۆسەر ئاسایشی نەتەوەیی ئێران ئەژماردەكرێت، بۆیە هەر سەركێشییەك بەبێ باجدان تێناپەڕێت. هەموو لایەنە سیاسییەكان دوور و نزیك پەیوەندیان لەگەڵ تاران هەیە، ریشەی ئەم پەیوەندیانە هەندێكیان بۆ سەردەمی شاخ و شۆڕش دژی رژێمی بەعس دەگەرێنەوە، هەندێكی تریان لە سەردەمی ژیانی شاردا دروستكراون. ئێرانییەكان ئەم دەڤەرە وەكو گۆڕەپانی پارێزگاری لە ئاساییشی نەتەوەیی خۆیان تەماشادەكەن، ئەم ئاسایشەش بە پلەی یەكەم لە ڕێگەی جێگیركردنی هێزێكی سیاسی لە دەسەڵاتدا بەدی دێت، كە ئەو هێزە هەماهەنگی جدی لەگەڵ تاران هەبێت. هەڵبژاردن شا رێگەیە بۆ ئیرانییەكان بۆ ئەوەی بەبێ بەكارهێنانی هێزی سەربازی و لە ڕێگەی هێزی دیپلۆماسییەوە كە پێی دەوترێت (هێزی نەرم) ئەو ئامانجەی خۆیان بەدی بهێنن، بۆ ئەوەش ئێرانییەكان لە هەموو هەڵبژاردنەكانی هەرێم و عێراقدا وەك تەماشاكەر نەوەستاون،  بەپێی زانیارییەكانی (درەو میدیا) كە لە چەند سەرچاوەیەكی ئاگادارەوە دەستی كەوتووە، ئێستا قاسمی سولەیمانی لە هەرێمی كوردستانە، بونی قاسمی سلێمانی لە كاتێكدایە كە ئەنجامی هەڵبژاردن لە هەرێم كێشەی گەورەی دروستكردووە، شەش لایەنی سیاسی یەكێتی نیشتیمانی كوردستان تۆمەتبار دەكەن بە دەستكاریكردنی ئەنجامی هەڵبژاردنەكان و ناڕاستەوخۆش پەنجەی تۆمەت بۆ ئێران رادەكێشن كە لەم پرۆسەیەدا هاوكاری یەكێتییان كردووە. بەڵام بەپێی زانیارییەكانی (درەو میدیا) پێناچێت ئێرانییەكان هەموو هێلكەكانی خۆیان بخەنە سەبەتەكەی یەكێتییەوە، بەو پێیەی لەئێستادا (240) سندوقی دەنگدان ئەنجامەكانیان یەكلانەكراوەتەوەو بەپێی زانیارییەكان هەر لە بنەرەتەوە یەكلانەكردنەوەی ئەنجامی ئەم سندوقانە بۆ دانوستان و رەواندنەوەی نیگەرانی لایەنەكانی تر بەجێهێلراوە، ئەوەش بۆ گۆڕانكاری لە كورسی لایەنەكان. زانیارییەكان باس لەوە دەكەن، لەم هەڵبژاردنەدا ئێرانییەكان ئەنجامی هەڵبژاردنیان لە دوو ناوچە زۆر بەلاوە گرنگ بووە، یەكەم: هەڵەبجە، ئەم شارە دەكەوێتە سنوری ئێران، ئێرانییەكان وەكو ناوچەی جێ هەژمونی خۆیان تەماشای دەكەن و دەیانەوێت هێزێك لە هەڵەبجە باڵادەست بێت كە رەچاوی بەرژەوەندی و ئاسایشی نەتەوەیی ئێران بكات، لە دوای هەڵەبجە، لە پلەی دووەمدا كەركوك بۆ ئیرانییەكان جێگەی بایەخە، لەلایەك كەركوك هێڵی تەماسە لەگەڵ عەرەبە سوننەكانی عێراق و لەلایەكی تر هەندێك وای دەبینن لە كەركوك دەبوو لەم هەڵبژاردنەدا ئێرانییەكان پاداشتی یەكێتی نیشتیمانی بدەنەوە لەبەرامبەر رووداوەكانی 16ی ئۆكتۆبەر. ئێرانییەكان لەم هەڵبژاردنەدا پشتیوانی یەكێتی نیشتیمانی كوردستانیان كرد بەو پێیەی رەنگە هیچ هێزێك نەیتوانیبێت وەك یەكێتی ئەو رۆڵە بەرجەستە بكات كە ئێرانییەكان لەم قۆناغەدا دەیانەوێت، زانیارییەكان ئاماژە بەوەش دەكەن، ئێرانییەكان هەر لە بنەڕەتەوە تێبینیان لەسەر چەند هێزێك هەبووە لەوانە:. یەكەم/ ئێرانییەكان لەگەڵ دروستكردنی لیستی ئیسلامی نەبوون لە نێوان (یەكگرتوی ئیسلامی، كۆمەڵی ئیسلامی، بزوتنەوەی ئیسلامی)، زانیارییەكان دەڵێن، ئێرانییەكان بەڕوونی بەسەركردایەتی ئەو سێ لایەنەیان راگەیاندووە ئەگەر ئەو لیستە دروستبكەن بەتوندی دژایەتیان دەكەن، بەڵام (یەكگرتووی ئیسلامی و بزووتنەوەی ئیسلامی) لیستەكەیان دروستكردو سەركێشی بڕیاری تارانیان كردو باجەكەیاندا، كۆمەڵی ئیسلامیش كە سەركێشی بڕیارەكەی تارانی نەكرد، سەرباری تۆمەتباركردنی لەلایەن شەقامی ئیسلامییەكانی كوردستانەوە بەوەی یەكڕیزی ئیسلامی تێكداوە، بەڵام پارێزگاری لە دەنگەكانی خۆی كرد لە هەڵبژاردندا.  دووەم/ لایەنی دووەم كە ئێرانییەكان هەر لە بنەڕەتەوە تێبینیان لەسەر دروستكردنی هەبوو، هاوپەیمانی بۆ دیموكراسی و دادپەروەرییە كە دكتۆر بەرهەم ساڵح سەرۆكایەتی دەكات، بەپێی زانیارییەكان هەر لە سەرەتای هەوڵەكانی بەرهەم ساڵح بۆ جیابوونەوە لە یەكێتی، ئێرانییەكان هەوڵیانداوە رێگری لێبكەن و لەناو یەكێتی بیهێڵنەوە، بەڵام بەرهەم ساڵح سەركێشی بڕیارەكەی تارانی كردو لە هەڵبژاردنیشدا باجی سەركێشییەكەی وەرگرتەوە. سەرباری ئەوەی بەرهەم ساڵح توانایەكی بەهێزی لە كاری دیپلۆماسی و پەیوەندیدا هەیە و لەگەڵ هەموو جەمسەرەكان پەیوەندی دەكات، بەڵام لەلای ئێرانییەكان وەكو پیاوێكی ئەمریكی تەماشا دەكرێت و یەكلانەبوەتەوە بۆ تاران. سێیەم/ بزوتنەوەی گۆڕان هەر لە سەرەتای دروستبوونییەوە كێشەی لە پەیوەندییە دیپلۆماسییەكانیدا هەبووە، بەپێی زانیارییەكانی (درەو میدیا)، لەدوای كۆچی دوایی نەوشیروان مستەفاوە ئێرانییەكان چەندینجار هەوڵی پەیوەندیكردنیان لەگەڵ گۆڕان داوە، بەڵام لێپرسراوانی گۆڕان ئامادەنەبوون هیچ جۆرە رێككەوتنێك لەگەڵ ئێران بكەن، تەنانەت ئامادە نەبوون لەسەر داوای دەسەڵاتدارانی ئەو وڵاتە وەفدێك بۆ تاران بنێرن، گۆڕان سەركێشی كرد و باجی سەركێشییەكەی لە هەڵبژاردن وەرگرتەوە. نیگەرانی ئێرانییەكان لە بزووتنەوەی گۆڕان بەتایبەتی لە دوو هەڵوێستدا دەركەوت:  ا: گۆڕان خواستی ئێرانییەكان و تەنانەت كۆمەڵگەی نێودەوڵەتی پشتگوێ خست بۆ دواخستنی كۆبونەوەی پەرلەمانی كوردستان لە 19ی ئابی 2015 لەبارەی چارەسەركردنی كێشەی سەرۆكایەتی هەرێم، كە دواتر بە رێگریكردن لە سەرۆكی پەرلەمان و دەركردنی وەزیرەكانی گۆڕان كۆتایی هات و كوردستان كەوتە ناو قەیرانێكی سیاسییەوە. ب: ساڵی 2017 ئێرانییەكان بەتایبەت خودی قاسمی سولەیمانی داوایان لە بزوتنەوەی گۆڕانكرد، سەرۆكی پەرلەمان و وەزیرەكانی بگەڕێنێتەوە بۆ هەولێر، لەم هەڵوێستەدا ئەمریكیەكان هاوڕای ئێرانییەكان بوون، خودی برێت مەكگۆرك بەڵێنی بە بزوتنەوەی گۆڕاندا خۆی سەرۆكی پەرلەمان بباتەوە هەولێر، پارتی لەسەر ئەم داوایەی تاران و واشنتۆن رازی بوو، بەڵام گۆڕان سەركێشی بڕیاری تاران و واشنتۆنی كرد.  بەپێی زانیارییەكانی (درەو میدیا)، هۆكاری سوربونی ئێرانییەكان تەنانەت ئەمریكییەكانیش لە گەڕانەوەی سەرۆكی پەرلەمان بۆ هەولێر، ئەنجامدانی كۆبونەوەی پەرلەمانی كوردستان بووە بە ئامانجی دواخستنی پرۆسەی ریفراندۆم، بەڵام بزوتنەوەی گۆڕان هەرچەندە دڵنیابووە لەوەی پارتی و یەكێتی چونەتە ژێر فشاری تاران و واشنتۆن بۆ دواخستنی ریفراندۆم، بەڵام سەركێشی نەكردووە بۆ ئەوەی سەركردایەتی ئەو هەنگاوە بكات، كە بۆ مێژوو وەكو پەڵەیەك لەسەر شانی دەمایەوە. چوارەم/ پارتی دیموكراتی كوردستان وەكو لایەنێكی بەهێزی هەرێمی كوردستان 25ی ئەیلول ریفراندۆمی كرد و سەركێشی بڕیارەكانی تارانی كرد، ریفراندۆم شكستیهێنا، بەڵام پارتی لەبری توندكردنەوەی سەنگەر لەدژی تاران، سەنگەری خۆی لەبری خۆرئاوا بەرەو تاران و مۆسكۆ گواستەوە، بۆیە سەرباری نیگەرانی دەسەڵاتدارانی ئێران لە هەڵوێستەكانی ئەمدواییەی پارتی، بەڵام گۆڕینی ئاڕاستەی سیاسەتی پارتی لە خۆرئاواوە بەرەو روسیا و ئێران، هەندێك دڵنیایی بۆ ئێرانییەكان گەڕاندەوە، پارتی لەم هەڵبژاردنەدا كە چاوەڕوان دەكرا گورزی ئێرانی بەركەوێت، بەڵام بەو دیپلۆماسیەتە نەرمە خۆی پاراست لە رق و توڕەیی تاران. پێنجەم/ یەكێتی نیشتیمانی كوردستان كە هەر لە بنەڕەتەوە پەیوەندییەكانی خۆی لەگەڵ تاران هاوسەنگ كردبوو، لە ریفراندۆمەكەی 25 ی ئەیلولدا سەركێشی بڕیاری تارانی كرد و چووە پاڵ پارتی، بەڵام سەركردەكانی یەكێتی نەیانهێشت سەركێشەییەكە بەردەوام بێت، رۆژی 16ی ئۆكتۆبەر بە كشاندنەوەی هێزی پێشمەرگە لە كەركوك قەرەبووی تارانی كردەوە. هەموان چاوەڕوانی ئەوەبوون لەبەرامبەر كشانەوەی پێشمەرگە لە كەركوك، لەم هەڵبژاردنەدا یەكێتی چەند كورسییەك لە كەركوك لەدەستبدات، بەڵام بەپێچەوانەی پێشبینییەكانەوە یەكێتی پارێزگاری لە قەبارەی خۆی كرد، لەمەشدا فەزڵەكە بۆ ئێرانییەكان دەگەڕێندرێتەوە. رەنگە هۆكاری سەرەكی پشتیوانیكردنی ئێران لە سەركەوتنی یەكێتی لە كەركوك بۆ ئەوە بگەڕێتەوە لە كەركوك هیچ هێزێك هێندەی یەكێتی ناتوانێت پارێزگاری لە ستراتیژیەتی ئێران بكات. شەشەم/ نەوەی نوێ ئەگەرچی بەهۆی ئەوەی هێزێكی نوێیە زانیاری وورد نیە لەسەر پەیوەندیەكانی، بەڵام بەهۆی دژایەتی بۆ ریفراندۆم و سەركردایەتی بەرەی نەخێر، لەگەڵ روانین و هەڵوێستەكانی ئێرانی یەكدی دەگرتەوە، بۆیە ئێرانیەكان كەمتر دژایەتی دەكەن، ئەگەرچی نەوەی نوێ خۆی بە هێزێكی نزیك لە ئەمریكاو رۆژئاوا لەقەڵەم دەدات.  

(درەو میدیا):  سەرچاوەیەك لە كۆمسیۆنی باڵای هەڵبژاردنەكانەوە بە (درەو میدیا)ی راگەیاند، لە پارێزگای سلێمانی  لیستی یەكێتی نیشتیمانی كوردستان (6) كاندیدی دەرچووەو هێشتا كورسی حەوتەم یەكلا نەبۆتەوە. بەپێی زانیارییەكانی (درەو میدیا) لە لیستی یەكێتی، ( د. میران محەمەد پلەی یەكەمی بەدەستهێناوە )، بەپێی ئەم زنجیرەیەی خوارەوە ، لە لیستی یەكێتیدا (3) ژن دەرچوون، ئەوانیش (د. جوان احسان، بڵێسە جەبار  فەرمان، ئارەزو مەحمود)ن،  بەوەش كۆتای ژنی بۆ لیستەكانی دیكە كەمكردەوە و بەپێی دەنگەكان نزیكەی (7) كورسی بەدەستهێناوە. یەكێتی لەم هەڵبژاردنەدا ( 219010 ) دەنگی بەدەستهێناوە ، لە كاتێكدا لە هەڵبژاردنی رابردوو لە پارێزگای سلێمانی ( 294265) دەنگی بەدەستهێنابوو.  1-    د. میران محەمەد  46317 دەنگ 2-    د. جوان احسان  22554 دەنگ  3-    بڵێسە جەبار فەرمان  21592 دەنگ  4-    بەختیار جەبار عەلی  17055 دەنگ  5-    ئارەزو مەحمود  15000 دەنگ  6-    حەسەن ئالی احمد ئالی 14983 دەنگ  7-    تەها حمدامین  13346 دەنگ  شیروان میرزا بە ( 5138 ) دەنگ لە پلەی هەشتەم و رێزان دلێر  بە ( 4258 ) دەنگ لە پلەی نۆیەم و ئاراس فەریق  بە ( 3848 )دەنگ لە پلەی دەیەمدایە