لێگەڕینێک ژ بۆ یەکێتیەکی وندا
بڵاوکراوەتەوە لە : 8 ئەیلوول 2020
قەبارەی دەقەکان
قەبارەی دەقەکان
بڵاوکراوەتەوە لە : 8 ئەیلوول 2020
قەبارەی دەقەکان
قەبارەی دەقەکان
عەبدوڵا دەمیرباش
مژارا ھەری زێدە ئەم تەڤ ل سەرێ داخڤن و دخوازن پێک وەرە، یەکێتیا کورد و کوردستانی یە، لێ بەلێ دەربارێ پێکھاتنا وێ دە فکرەکە مە یا ھەڤپار تونەیە. ئەم ھەر تم ل بەندێ نە کۆ ژ ژۆر دە پێشنیار بێن کرن. ب درووشما ماف بەری زاگۆنانان تێن، ب من دڤێ گەل ڤی مافێ خوە ب کار بینە.
د مژارا یهکێتیا نەتەوەیی دە؛ گەلێ مە یێ ل چار پارچەیان دکارە دەست ب ھن چالاکیان بکە کۆ بکاربن ئێن سەری بکن تەڤگەرێ. ئەز دخوازم فکر و پێشنیارێن خوە بکم ژ بۆ گۆتووبێژ بێ کرن.
چما د ناڤبەرا گەلێ مە یێ چار پارچەیێن کوردستانێ دە دانووستاندنێن جڤاکی، ئابۆری، بازرگانی، چاندی، وەرزیشی و ....ھد. نەیێن کرن! ل گۆری من تو ئاستەنگی ل پێشیا ڤێ تونەیە. ب گەلێن دن رە تێکلیێن مە ھەنە و دڤێ ھەبن ژی. د ناڤبەرا کوردێن چار پارچەیان دە تێکلیێن زەواج، جیرانتی، کریڤاتی و.... ھد. دکارن وەرن بەربەلاڤ و کوورکرن. تەڤلیبوونا ل شین و شاھیان ب ئاوایەکی بھێز بێ زێدەکرن و بەربەلاڤکرن.
چما مرۆڤێن مە یێن ل چار پارچەیان تێکلیێن خوە خورت نەکن و شریکەتێن ھەڤپار ساز نەکن! ئاستەنگیا ل بەر ڤێ چیە؟ ژ بۆ دانووستاندن و تێکلیێن وان ئێن گەرم چێببن، دکارن ژ چار پارچەیان کارکەر و کەدکار ب تایبەتی بێن ھلبژارتن.
ب تایبەتی دڤێ تەڤلیبوونا مە یا داوەت و شینان د ئاستا ھەری ژۆر دە بە. لەورە، ئەڤ رێیەکە گرینگ و ژیانییە ژ بۆ ئەم ریتوالێن خوە یێن ھەڤپار بدۆمینن و قوتبوونا د ناڤبەرا جڤاکا خوە ب داوی بکن. مریشکێن مە و یێن گەلێن دن کەتنە ناڤ ھەڤ لێ ئەز دبێژم مژیشکێن گەلێ مە باش نەکەتنە ناڤ ھەڤ!
ل کێلەکا تێکلیێن د ناڤبەرا باژارێن پارچەیێن مە یێن جودا دە، چما چالاکیێن وەرزیشی، مھرجان نەیێن لدارخستن! مەسەلا، چما د ناڤبەرا تیمێن قامشلۆ، دھۆک، ئامەد و ساقزێ دە پێشبازی نەیێن کرن؟
دکارن پلاتفۆرمێن دیژیتال و رووپەلێن ھەڤپار ساز بکن و تیمێن لیستکان ئاڤا بکن.
ھونەرمەندێن مە یێن ل چار پارچەیان دکارن چالاکیێن ھونەری یێن ھەڤپار ل دار بخن، ئەو بخوە دکارن ئۆرگانیزە بکن، بدن نیشاندان و.... ھد. مەسەلا، وەکی پێشانگەھا وێنەیان ئان ژی مھرجانا شانۆیێ یا ھەڤپار ئا ب بەشداریا چار پارچەیان.
مالباتێن مە یێن ژ چار پارچەیان دکارن ببن مالباتێن خوشک و برا؛ ژ بۆ ڤێ دکارە تەکنۆلۆژیا دیژیتال بێ بکارانین؛ مالبات دکارن تێکلیێن خورت ب ھەڤ رە دەینن؛ زارۆکێن وان دکارن دیالۆگێ ب پێش بخن. د ڤێ مژارێ دە، خەباتێن ئەم ب گەلێن دن رە دکن، دڤێ ئەم د ناڤ خوە دە ژی پێک بینن.
عالمێن مە یێن دینی یێن چار پارچەیان ئێن ژ ئۆل، باوەری و مەزھەبێن جودا دکارن ل ھەڤ بجڤن، داخویانیێن ھەڤپار بدن و ھێزێن سیاسی ژی دکارن دەستەک بدن وان.
ئەڤ گەشەدانێن ژ ئالیێ گەل ڤە تێن دەسپێکرن، دکارن ھەموو پارتی و رێخستنێن کوردستانی ب لڤ تەڤگەر بکن. بێگومان دڤێ ب گەلێن دن رە تێکلیێن وەکھەڤ و ئازاد بێن دانین. ھەر وھا دڤێ گەلێ مە یێ ل چار پارچەیان نێزی ھەڤ ببە و براتیا خوە خورت بکە.
د ڤێ مژارێ دە، دڤێ ھەر کورد و کوردستانی ل سەر پێشنیارێن بەربچاڤ بسەکنە و دڤێ ئەڤ پەیورا مە ھەموویان ئا دیرۆکی یا ھەری گرینگ بە. د سەدسالا 21 ێ دە نابە کۆ ژیانا بێستاتو ببە چارەنووسا مە.
ب کامپانیایا بێ دەستپێکرن ھەر کورد و کوردستانیێ ل پارچەیەکێ، دڤێ ب کەس ئان ژی مالباتێن ل ھەر سێ پارچەیێن دن دژین رە تێکلی دەینە. دبە ھەر کوردێ/ا ژ پارچەیەکێ سێ خوشک/برایێن وی/ێ یێن ژ پارچەیێن دن ھەبن؛ ژ بۆ ڤێ دکارە ب لەزگینی خەبات بێ دەستپێکرن. وێ ب ڤێ یەکێ زمان و ھەستا ھەڤپار ئاڤا ببە. بێگومان وێ تشتێن نەیینی ژی چێببن، لێ بەلێ تو تشتا نەیینی وێ ژ رەوشا نھا یا پارچەبوویی نە خرابتر بە.
خەلکێ مە ژ بۆ کۆ دەبارا خوە بکە، ژ بۆ خەباتێ دچە باژارێن دن و ل وان دەڤەران ژ بەر کۆ ب کوردی داخڤن راستی دەستدرێژی و ھەقارەتان تێن و ب مرنێ رە رووبروو دمینن. تەڤی کۆ ئەردنیگاریا کوردستانێ ئەوقاسی دەولەمەندە و خوەدی وێ پۆتانسیەلێیە کۆ گەلێ مە بکاربە دەبارا خوە لێ بکە. مرۆڤ دکارە ڤێ پۆتانسیەلێ ژ بۆ بەرژەوەندیا گەلێن خوە بدە ب کار بینە.
ئەڤ یەک ژ بۆ براتیا مە یا گەلان ئا ئازاد و وەکھەڤ نە ئاستەنگییە. کەسێ کۆ نکاربە ل مالا خوە براتیێ ساز بکە دێ چاوا بکاربە ب کەسێن دن رە براتیەکە ئازاد و وەکھەڤ پێک بینە.
دڤێ د ناڤبەرا سەندیکا و رێخستنێن جڤاکا سڤیل ئێن ھەموو پارچەیان دە، ب رەنگەکی فەرمی و نە فەرمی تێکلی وەرن دانین. ب تایبەتی ژی ل ڤر ھونەرمەند، خەباتکارێن زمێن، رەوشەنبیر و رێخستنێن سیاسی پشتگریێ بدن ڤێ یەکێ.
ئەڤ پێشنیار دکارن وەرن نیقاشکرن و بەرفرەھکرن ژی؛ دڤێ یهکێتیا کورد و کوردستانێ نەیێ تالۆقکرن. دڤێ ئەم ل ھێڤیا لدارخستنا کۆنگرەیێ نەمینن و دڤێ خەلک زۆرێ بدە کۆ ئەڤ کۆنگرە وەرە لدارخستن. وھا ببە کۆ تو پارتیەکە سیاسی نکاربە خوە ژ بەر ڤێ یەکێ بدە ئالی.
ل گۆری من ئینیسیاتیفا سڤیل ئا ھەری گرینگ دڤێ ل سەر ڤێ بنگەھێ بە. دڤێ ھەر کەس نیقاش بکە، د ھشمەندیا خوە دە ب جھ بکە و پێشنیار/رەخنەیێن خوە پێشکێش بکن. تشتەک ژ ئازادی، وەکھەڤی و یهکێتیا کورد و کوردستانێ گرینگتر نینە.
چما زانیارێن مە کۆنگرەیەکە زانستێ یا کورد و کوردستانێ پێک نەینن! کۆنگرەیەکە وھا د سالڤەگەرا 100مین ئا پەیمانا لۆزانێ دە پێک وەرە، ب ڤێ کۆنگرەیا زانستێ یا کورد و کوردستانی وێ بەرسڤەکە گەلەکی خورت بە ژ بۆ پارچەکرنێ. د ڤێ مژارێ دە زانیار، ئینستووتی و وەقفێن مە دکارن بکەڤن ناڤ لڤ و تەڤگەرێ.
مژارا یهکێتیا کورد و کوردستانێ، د 30 -40 سالێن پێشیا مە دە دێ ب ھووربینی وەرە نیقاشکرن و ئەڤ تشتەکی پێویست و دیرۆکییە. ل سەر ڤێ بنگەھێ من خوەست دەست ب ڤێ نیقاشێ بکم. ئەم ژ نھا ڤە دەست پێ نەکن، دبە کۆ سبێ پر دەرەنگ بە.
