بورزگاربونه‌كا وژدانی....!!
2019-04-24 15:46:43
سەید ئەكرەم
دونیا دبزڤینه‌كا زور بله‌زدایه! نه‌خشه‌یێ گورینكاریێن رۆژهه‌لاتا ناڤین ل گوپیتكێ دایه، كوردستان لبن مه‌ستریا دوژمنكاریا مه‌زن هه‌ناسێ هه‌ل د كێشیتن! نه‌خشه‌رێگایه‌كێ كوردی، كوردستانی تاكه چاره‌سه‌ریه....!!
روژهه‌لاتا ناڤین گرنگیه‌كا دێروكی، شوینه‌واری، كه‌لتوری، ئابوری...بنیاتی هه‌یه بو هه‌می دونیایێ، چ ل چاخێن كه‌ڤن یان ل سه‌رده‌مێ ئه‌م لێ دژین، كوردستان ژی دلێ روژهه‌لاتا ناڤینه و خودانێ خوه سه‌روچاوه‌یێن مروڤی، ئابوری، له‌شكه‌ری و ئه‌منی...هه‌می ئالیه، بونا وێ هه‌رژ كه‌ڤن تاكو روژا نوكه، بویه مه‌یدانا شه‌ره‌نخ و لێكدانێن ناڤدونیایێ و هه‌ڤركیێن دێروكی و شارستانی لێ هه‌لدایه و بوخوه بویه ئاگر و به‌لا و بوخه‌لكی بویه حه‌وینك و سه‌رچاوه‌یێ ژیانێ و باشترین شاهدێن ئه‌ڤێ چه‌ندێ دێروك و شارستانیه‌تا وێ، وه‌كی قودیكه‌كا روناهیێ بویه‌ر و روپه‌لێن رویدانان سه‌روبنك دكه‌تن و ئاشكرا نیشا چاڤان دده‌تن، نوكه ژی بزڤین و رویدانێن دونیا و نه‌خاسم ژلایێ هێزێن مه‌زن و ده‌وله‌تێن ده‌ڤه‌رێ، دیمه‌نێن مه‌سترین رویدان و گه‌رم و گورترین سه‌رپێهاتی خودهه‌لاڤێژن و وێنێن خوه دیار و به‌لی دكه‌ن، بونا ڤێ گرنگه پێشهات و دیتن بهێنه مناقه‌شه و شروڤه‌كرن، نه‌خاسم ژلایێ شاره‌زا و پسپور و كه‌سانێن په‌یوه‌ندیدار...ل گوره‌ی دیتنا خویا كێم، دێ بزاڤێ كه‌م رونڤه‌كرن و شروڤه‌كاریێن خوه ده‌مه دیار كرن، بوێ هیڤیێ خوینه‌وارێ خوشتڤی بابه‌تی زه‌نگین و به‌هره‌مه‌ند بكه‌تن...!!
1- بسه‌ر هه‌ره‌فته‌یا وه‌لاتی(كوردستانێ)دا، رویدان بله‌ز و ئالوزن:-
رۆژهه‌لاتا ناڤین لڤی سه‌رده‌می هه‌م بویه‌جهێ به‌رژه‌وه‌ندیێن ناڤده‌وله‌تی، هه‌م ژی بویه بنگه‌هێ شه‌ره‌نیخ و لێكدانێن ناڤنه‌ته‌وه‌یی و ناڤ ده‌وله‌تی، بگره‌گه دشه‌رێ ئازادیا عێراقێ دا و ژ سه‌ركار لادانا سه‌دام و ده‌ستهه‌لاتا حزبا به‌عس، هه‌ماهه‌نگی و هاریكاریه‌كا ناڤده‌وله‌تیا مه‌زن هه‌بویه پێترێ ژ(36)ده‌وله‌تا به‌شداریا شه‌ری كریه، ئه‌ڤ شه‌ره ئه‌گه‌ر بناڤ لادانا سه‌روكه‌كێ دكتاور و ده‌ستهه‌لاته‌كا خوینرێژ بیتن، بونا ئازادیا گه‌له‌ك و وه‌لاته‌كێ، لێ دناڤه‌روك دا، ده‌ستپێكه‌ك بویه، بو ڤه‌كرنا رێكه‌ك و رێگه‌چاره‌سه‌ریه‌كا دی، بو نه‌خشه‌یه‌كێ به‌رژه‌وه‌ندخازێ ناڤده‌وله‌تی و هه‌رێمی، بونا هه‌لشكافتنا ده‌ڤه‌ره‌كێ و دیزاینكرنه‌كا دی بویه، بونا سه‌ره‌ژنوی رێ وشوێنه‌كێ گونجایی بهێتن خه‌لق كرن و ئاماده‌سازی بو بهێنه كرن، روژهه‌لاتا ناڤین و كوردستان ، ب نه‌خشه‌یه‌كێ دی و سه‌رژنوی دیزاین كرنا ده‌ڤه‌رێ، بونا به‌رژه‌وه‌ندیێن دویرمه‌دا بهێنه بنیات كرن و خێروخێرات بهێنه پشك پشك كرن و ئه‌ڤ پشكه بهێنه گه‌رنتی كرن، چونكی هێزێن ناڤده‌وله‌تی هه‌ر بو ژناڤبرنا سه‌دامی و رژێما وی نه‌هاتبوون، به‌لكی هاتبون تاكو ئه‌وێ بزڤرینن یا نه‌خشه‌یێ سایكس- بیكو و به‌رئه‌نجامێ شه‌رێ جیهانی یێ(ئێك و دوویێ) نه‌شیای ل گوره‌یی به‌رژه‌وه‌ندیێن وان دابین و گه‌ره‌نتی بكه‌تن.
گرنگه ژی ئه‌م ڤان زنجیره رویدان و سه‌رپێهاتیان باش بخوینین، باش شروڤه‌بكه‌ین و خاندنێن زانستی و لوجیكی بو بكه‌ین، رویدانێن(11)سبتێمبه‌رێ ل ئه‌مریكا، گره‌ڤا ته‌ڤگه‌را تالیبان، ئوسامه بن لادن و ئه‌یمه‌ن زه‌واهری و ته‌ڤگه‌را(القاعیده)، بویه‌رێن كه‌شمیر و ئوكرانیا، حزبالله و حه‌ماس، ستراتیژیه‌تا پان ئه‌ردوگانیزم و تیروراداعش(كریزو گرێدانێن وان یێن ستراتیژیك هنه)، جه‌بهه‌ت النوسره‌و فیدایێن زه‌نكی و به‌ره‌یێ تیرورستیێ بناڤ(به‌ره‌یێ رزگاری ل روژئاڤایێ ئاڤا فوراتێ)، گروپ و ته‌ڤگه‌رێن ئیسلامی ل سوریێ و ل عێراقێ بره‌نگه‌كێ گشتی...تیرورا ترسناكا هه‌ی دژی مروڤی، دژی وه‌لاتپارێزیێ، دژی شوناس و دژی شوینه‌وار و كه‌لتورێ ده‌ڤه‌رێ و بنه‌خاسمه‌یی دژی خه‌لك و هه‌بونا كوردستانیان...گرنگیا هێلا ستراتیژیا ئابوری و ئه‌منی(نه‌فت، غاز، هێزا سامانی..)، ژ خه‌لیجێ عه‌ره‌بی بو ده‌ریا سپی ناڤه‌راست، دیسان ژئاسیا روژهه‌لات(ئێكه‌تیا سوڤیه‌تا به‌رێ) بو ده‌ریا سپی...دیسان به‌روڤاژیا وێ..په‌یاده‌كرنا خومالی كرنا رێكا بازرگانیه‌كا سودمه‌ندا كه‌ل و په‌لێن ئه‌مریكی و ئه‌وروپی بو روژهه‌لاتا ناڤین...ئه‌ڤ مژاره زور گرنگ و بهادار بهێنه خاندن و شروڤه كرن..نه‌خسم بریارا پایته‌ختبونا(قودسێ) وه‌كی پایته‌ختێ ده‌وله‌تا ئیسرائیلی، ئێكگرتنا بلنداهیێن جولان دگه‌ل ئاخا ده‌وله‌تا ئیسرائیل، ل ده‌مێ بێتن بباوه‌رم هنده‌ك ده‌ڤه‌رێن دی ژی دێ هێنه سه‌ر ئاخا ئیسرائیل...ئه‌ڤه خاله‌كا جه‌وهه‌ریه و دڤێتن كورد و كوردستانی بگرنگیه‌كا زورا مه‌زن لێ نێرین و خاندنێ بو بكه‌ن و گه‌لك ل سه‌ر براوه‌ستن...نه‌خاسم بلنداهیێن جولان ستراتیژیه‌ته‌كا زورا مه‌زن هه‌یه، ئه‌و ئاخ و مه‌نزلگه‌ها كوران(جانپولا)بوینه، دێروكا وان، خوجهێن وێ سیاره‌كوردێن بجه‌رگ و خودان مالباتی بوین...گه‌لا ئه‌ڤه هه‌له‌كه بو به‌رفرهه‌بونا ده‌وله‌تا ئیسرائیلیا جوهونشین یان ژی كورد و كوردستانیان ژی پشك و شه‌نصه‌كێ وان تێدا هه‌یه....!!
بنگه‌هێ كلتور و روشمبیریێ(بابیلون) ل ئیسرائیل، كو ل سه‌رناڤێ ئیمپراتوریه‌ت(بابل)هاتیه داناندن و ئاڤاكرن، زێده‌ی(250000)دوسه‌دوپێنجی هزار جوهیێن(عێراقی) ل وێره عێراقه‌كا نوی ئاڤا دكه‌ن، گه‌لا ئه‌ڤ عێراقه بو كێیه، كی مفادارێ ئێكێیه! عێراقی یان ژی جوهی و ئیسرائیلا مه‌زن، ئه‌ڤێ ژی راڤه‌كرن و شروڤه‌كاریێن زور پێ دڤێن...!!
2- كوردستان زورا گرنگه، نه‌خشه‌رێگایا سایك- بیكو نه‌مایه، گورینكاریێن مه‌زن و هه‌لگرێ بیڤه‌له‌رزه‌كا هه‌ری بترس چاڤه‌رێنه..!
ئه‌گه‌ر ئه‌م هویرنێرینه‌كێ ل كوگایێن نه‌خشه‌سازیێن ناڤده‌وله‌تی بكه‌ین، دێ بینین نه‌خشه و نه‌خشه‌سازیێن هه‌ری زور هه‌نه و بزاڤێن زور ژی هه‌نه ئه‌ڤ نه‌خشه‌یه ل سه‌ر ئاخێ بهێنه داناندن و بنه‌جهی كرن...هه‌ری بالكێش ئه‌وه، ده‌وله‌تێن عه‌ره‌بی، ئیرانی، توركی...كو داگیركه‌رێن سه‌ركینه ل سه‌ر ده‌ڤه‌رێ و هه‌م ژی سه‌ركێشیا تیرورا ئیسلامی دكه‌ن و به‌رژه‌وه‌ندێن خوه یێن نه‌ته‌وه‌یی دئاڤاهیێ ئیسلامێ دا ئاڤاكرنه و ئبسلام هه‌م كریه مللكێ خوه هه‌م ژی تیرورا ده‌ڤه‌رێ پێ دكه‌ن..ژبه‌رهندێ ئه‌ڤان سێ ده‌وله‌ت نه‌توه‌یه لبه‌رگورینێنه و ئه‌و تێكدانا هه‌یی ژی بده‌ست و هزرێن وانان دهێتن په‌یاده‌كرن..بونا ڤێ نه‌خشه‌یێ گورانكاریێن وان، هه‌م دئالیێ ئایدیوجی و هه‌م ژی دنه‌خه‌شه‌یێ جوگرافی دا، ئاشكرا كار تێدا دهێتن خویا كرن...لڤێره تشتێ هه‌ری روهن و ئاشكرا، ب به‌ر هه‌ستێن مه دكه‌ڤیتن، ئه‌ڤ سێ ده‌وله‌ت نه‌ته‌وه‌یه هه‌ره‌شه‌نه بو سه‌ر ده‌ڤه‌را روژهه‌لاتا ناڤین، هه‌ردیسان هه‌ره‌شه‌نه بو سه‌ر به‌رژه‌وه‌ندیێن ناڤده‌وله‌تی...لێ گه‌لێ چارن(گه‌لێ كورد + كوردستانی) گه‌له‌كێ ئاشتیخواز و مافداره، دستراتیژیه‌تا ناڤده‌وله‌تی دا، نه‌یار نه‌یار نینه و ده‌رفه‌ت بوهه‌یه ماف و ئازادیێن خوه بكاربینیتن...چونكی نه‌خه‌ته‌ره(بڤه‌نینه) لبه‌ر بجهكرنا به‌رژه‌وه‌ندیێن ناڤده‌وله‌تی و ده‌رفه‌تا وێ ژی هه‌یه هه‌م به‌رژه‌وه‌ندیێن خوه بپارێزن و هه‌م ژی به‌رژه‌وه‌ندیێن ناڤده‌وله‌تی بپارێزن، ئه‌و ژی یا راسته ده‌ڤه‌را روژهه‌لاتا ناڤین(بنه‌خاسمه‌یه كوردستان) گرنگیه‌كا زورا ستراتیژیا ئابوری و ژیواری هه‌یه، كوردستان ئه‌و وه‌لاته یێ خه‌لیجێ عه‌ره‌بی دگه‌ل ده‌ریا سپی پێكڤه گرێده‌تن، هه‌ردیسانێ ئاسیا ناڤین و ده‌ریا سپی دیسان پێكڤه گرێده‌تن، ئه‌ڤه پێكڤه‌گرێدانه‌كا زورا گرنگه و كورد و هێزێن كوردستانی دكارن ببنه تاكه ئه‌گه‌ر بو پاراستنا ڤان هه‌می پارسه‌نگ و به‌رژه‌وه‌ندیان.
كوردستان وه‌لاته‌كێ زه‌نگینه، ژئالیێ ئابوری و مروڤی و گه‌له‌ك ئالیێن دی، دیسان ژئالیێ فرهه‌تیا (نه‌ته‌وه‌یی، دینی، مه‌زهه‌بی...)زه‌نگین و هه‌می ره‌نگییه، ئه‌ڤ پرانیا خه‌لكێ ل كوردستانێ ژی دژیتن، گرێدانێن نڤشی، دینی، مروڤایه‌تی دگه‌لك دا هه‌یه، وه‌لات ژی وه‌لاته‌كێ هه‌ڤپشكه و به‌رژه‌وندیدی ژی هه‌م هه‌ڤپشكن و هه‌م ژی تێكئالزی و پێكڤه‌یینه! بوناڤێ ژی سه‌رنجه‌كا ناڤنه‌ته‌وه‌یی و فره‌ئالی هه‌یه، ژبه‌رهندێ ئه‌ڤ فره‌ئالیه‌یه، وێ دخازیتن هه‌ڤكاریه‌ك و پێكڤه‌كاركرنه‌كا هه‌می ئالیی و هه‌ڤپشك هه‌بیتن، ئه‌گه‌ر نه‌‌و! نه‌وه‌لات دهێتن رزگار كرن و نه‌ژی پێكڤه‌ژیانا مروڤی و ئاڤاكرنا ژیانا وه‌ك هه‌ڤی بنه‌جهدبیتن...!!
بونا هه‌رئالیه‌كێ ناڤنه‌ته‌وه‌یی و هه‌رێمی بكاریتن به‌رژه‌وه‌ندیێن خوه ل گوره‌ی خوه ئاڤا بكه‌تن...هه‌رئێك ژوان ل گوره‌ی خوه مایتێكرنا خوه ل گوره‌ی خوه دكه‌تن...ئیران بهه‌می هێزا خوه یا ئه‌منی و له‌شكه‌ری و ئابوری مایتێكرنا خوه دكه‌تن و كاتێكرنا خوه ژی هه‌یه، عێراق تاكو راده‌یه‌كێ زور ئێخستیه بن هه‌ژمونا خوه، نه‌خاسم هێزێن(حه‌شدا شه‌عبی) و هنده‌ك هێز و لایه‌نێن دی، بوخوه كرنه چادره‌ك و پاراستنا خوه پێ دكه‌تن، بگره ل باشور، ژ شنگار و سنورێ ئیبراهیم خه‌لیل تاكو دگه‌هیتن خانه‌قین و حاجی ئومه‌ران هێز و هه‌ژمونا وێ هه‌یه...توركیا دئالیێ له‌شكه‌ری و ئابوری و دبلوماسی و زور ئالیێن دی دا، هێزه‌كا وان یازور هه‌یه( بگره بده‌هان و به‌لكی بسه‌دان بنگه‌هێن له‌شكه‌ری، تیمێن ژانده‌ردرمه‌ری هه‌نه و باشور لبن هه‌ژمونگه‌ریا خوه‌دا خه‌ندقاندیه و نه‌فه‌سا وێ وه‌رپێچایه ناڤا ده‌ستێ خوه و تاكو راده‌یه‌كی ده‌ستهه‌ڤسار كریه...هێزێن دی یێن ناڤده‌وله‌تی و بنه‌خاسمه‌یی(ئه‌مریكا، روسیا، ئه‌وروپا، صین، ئیسرائیل...) بره‌نگه‌كی ژ ره‌نگان كارتێكرن و هه‌ژمونگه‌ریا وان بخورتی هه‌یه....لێ دیسان ده‌رفه‌تێن مه‌زن ل به‌ر كوردا، لبه‌ر كوردستانیان هه‌نه، خزمه‌تا خوه بكه‌ن، دوزا خوه پێش بێخن، هه‌بونا خوه بنیات و ئاڤه‌دان بكه‌ن...لێ تشتێ هه‌ری جهێ مخابنی و گومانێ ئه‌وه هێزێن كوردستانی و نه‌خاسم لباشور دناڤا سیاسه‌ته‌كا نه‌به‌رئاقل و نه‌لوجیكی و نه‌كه‌دواری دا ژیانێ دكه‌ن، بشاشی سیاسه‌تێ دكه‌ن، به‌رژوه‌وه‌ندیێن گه‌ل و وه‌لات راپێچاینه ناڤا كولاتیا به‌رژه‌وه‌ندێن كه‌سان و بنه‌مالان، كه‌ڤتینه ناڤا شه‌رنیخ و هه‌ڤركاتیه‌كا نه‌ره‌وا و نه‌مه‌نتیقی...بویه سیاسه‌ته‌كا سه‌قه‌ت، ئیداره‌دانه‌كا گه‌نده‌ل، حوكمرانیه‌كا ژبه‌ره‌ڤ پێشڤه بو پاشدا دهێن برێڤه‌برن، سه‌ركه‌ڤتن بوینه دوراندن، شانازی ژی بوینه شه‌رم و خه‌ساره‌تی و ملله‌ت و وه‌لات كه‌ڤتیه به‌ر ده‌ڤێ ره‌ڤده‌گور و حه‌فتیارێن هار و برسی و روژ بو روژێ هه‌لامه‌تێ ترسێ و برسێ زێده‌تر راپێچایه ناڤا ته‌هلیكه و مه‌ترسیه‌كا مه‌زنتر و وێرانه‌یترێ...بویه ولات، گه‌ل رزگاربونا وان پێتڤی نه‌خشه و رێگه‌چاره‌سه‌ریێن بله‌ز و تێر و تژیه.
3- كورد و نه‌خشه رێگایه‌كا كوردستانی:-
كورد دبارو زروفێن دێروكی و ناله‌باردا توشی شكه‌ستن و لێدانێ بویه، كوردستان دیسان دكاودانه‌كێ ناڤنه‌ته‌وه‌یی دا هاتیه دابه‌ش كرن و توشی پارچه‌پارچه‌بونه‌كا نه‌ره‌وا و نه‌دادپه‌روه‌ری بویه، ئه‌و كاودان زور دژوار بوینه، دوژمنكاریه‌كا زورا مه‌زن ل سه‌ر گه‌ل و وه‌لاتی هاتیه برێڤه‌برن، ئه‌ڤ دابه‌شبونه نه‌بتنێ دابه‌ش بونا ئاخێ و نه‌ته‌وێ بویه، به‌لكی دابه‌شبونه‌كا دینی، مه‌زهه‌بی، كه‌لتوری، زمانه‌وانی، ئه‌خلاقی و ناڤ و ئه‌رناڤی ژی بویه، سیاسه‌تا په‌رتكه و به‌لاڤ بكه هاتیه په‌یاده‌كرن، سیاسه‌تا قركرنا نڤشی هاتیه په‌یاده‌كرن...بویه برینێن مه‌زن، ئێش و ئازارێن مه‌زن و خه‌تمی كه‌ڤتینه ناڤا جه‌سته‌یێ كورد و كوردستانیان... هه‌ردیسان ئه‌و كاودان، ئه‌و كاریگه‌ری، ئه‌و دوژمنكاریا كولاتیا سالان هه‌یه و به‌رده‌وامه، نه‌خاسم دڤی چه‌رخی دا، كو دبێژینێ چه‌رخێ پێشكه‌ڤتنێ، چه‌رخێ ئه‌نترنێت و ئێك گونداتیێ....ئالاڤ و وه‌سائیلێن دوژمنكاریه‌ك دی ل سه‌ر گه‌ل و وه‌لاتێ مه ژی دیسان دووباره‌یی و چه‌ندیجاری بوینه، هه‌ردچیتن ژی خه‌ته‌ر و بڤاتیا وان زێده و كاریگه‌ر ترێ دبیتن...بویه گه‌لێ مه، ئاخا مه، پێتڤی رزگاریێ نه، رزگاری ژی نابیتن، ئیلا بمه‌رجێ ئاماده‌كرنا رێگه‌چاره‌سه‌ری و گرتهنه‌به‌را پێره‌هه‌كێ گونجایی...ئه‌و رێك و چاره‌سه‌ریێن دبینم گونجاینه بو خه‌باتا ڤێ قوناخێ، بو رزگاری و ده‌سته‌به‌ریا ماف و ئازادیێن خه‌لك و وه‌لاتی، بكورتی دناڤا ڤان خالان دا دبینم:-
أ- كوردستان چار پارچه‌یه، ژبلی پارچا پێنجا...لێ نوكه باشور بویه سه‌نته‌رێ سیاسه‌ت و پیاده‌كرنا ماف و ئه‌ركێن مروڤێ كورد و كوردستنی، چونكی هه‌رێمه‌كا ره‌نگه خوسه‌ر هه‌یه...بویه دهێتن خاست پارت و سیاسه‌تمه‌دارێن باشوری، خوژشكه‌ستنا خوه رزگار بكه‌ن، ده‌ست ژگه‌نده‌لیێ و جاسوسیه‌ت و دووسه‌ری و سێ سه‌ریێ به‌رده‌ن و خوه رزگار بكه‌ن، پروسه‌یه‌كا چاكساسی و پاكسازیێ( ژ سه‌ری بو بنی) په‌یاده‌بكه‌ن، خوسه‌راست بكه‌ن ژ غش و فه‌سادا ئیداری، ئه‌قلێ ناڤ و ناڤه‌روكا خوه باش بشون، سیاسه‌ته‌كا زانستی و وژدانی پیاده‌بكه‌ن و بده‌نه مه‌شاندن، ئه‌و ئیداره‌یا دهێتن كرن، چ بو ئیداره‌دانه‌كا هه‌رێمی یان بو ده‌وله‌تێ بیتن...گه‌ره‌كه خوه سه‌ر راست بكه‌ن، تایبه‌تمه‌ندیا خوه ئاڤا بكه‌ن، ل مالێ ماداریێ بكه‌ن، ل عه‌شائیریێ عه‌شیره‌تگه‌رایی، ل ئیدرێ ئیداره‌دانه‌كا ساخله‌م، لناڤا باره‌گایێ حزبی حزبایه‌تی، لناڤا دائیره‌یا له‌شكه‌ری و ئه‌منی ته‌ناهیا وه‌لاتی و پارساستنا هاولاتیبونێ بهێتن په‌یاده‌كرن، لناڤا دادگه‌هێ یاسا بتنێ سه‌روه‌ر بیتن، هه‌می مایتێكرنێ كه‌سی و حزبی بته‌مامی بهێن پشت گوههاڤێتن، دبلوماسیه‌ته‌كا زانستی و ئالیسه‌نگ، جڤاكه‌كێ ساخله‌م و جڤاكناسیه‌كا سڤیل و ساخله‌م..په‌یوه‌ندیێن كورد و كوردستانیان ل سه‌ر بنگه‌هێن به‌رژه‌وه‌ندیێن هه‌ڤپشك و هه‌می ئالی بهێنه دروست كرن و ره‌چاو كرن.
ب- كونگره‌یه‌ك، كوم جڤینه‌ك، په‌رله‌مانه‌ك، یان هه‌رته‌ڤگه‌ره‌كا دی بهێتن ئاڤاكرن، ئه‌ڤ گرێده‌نه دڤێتن هه‌می پارچێن كوردستانێ، هه‌می ئالیێن گه‌ل و ملله‌ت، چ لناڤ خوه‌یا وه‌لاتی یان ل ده‌رڤه و ل ئاواره‌بونێ...ئه‌و كوم جڤین بهێتن دروست كرن، یا هه‌می كورد( بهه‌می پێكهاته‌یه‌یێ خوه‌یێ سیاسی و جڤاكی دناڤ دا جهدگریتن)، هه‌می ئالیێن دینی و نه‌ته‌وه‌یی و مه‌زهه‌بی و سیاسیێن خه‌لكێ كوردستانێ، بره‌نگه‌كێ ئاره‌زومه‌ندانه و ل گوره‌ی پروژه‌یه‌كێ گشت گیری تێدا به‌شداریێ بكه‌ن و پێكڤه بكارن به‌ره‌ژه‌وه‌ندی و شوپێن خوه یێن نه‌ته‌وه‌یی، دینی، مه‌زهه‌بی، سیاسی، جڤاكی...دناڤێ دا هه‌م جهبگرن و هه‌م ژی پاراستنا خوه تێدا بكه‌ن.
ت- دروست كرنا دو جڤاتان، جڤاتا پاراستنا له‌شكه‌ری و ئه‌منی و جڤاتا دبلوماسی و به‌رژه‌وه‌ندیێن هه‌ڤپشكێن په‌یوه‌ندیێن ده‌رڤه‌یی و ناڤخوه‌یی..دیسان دناڤا ڤان جڤاتان ژی... گه‌ره‌كه هه‌می پێكهاته‌یێ كورد و كوردستانی جهدناڤدا بگریتن و دیسان بكارن بزاڤێن خوه‌یێن گه‌لی ژی بئاوایه‌كێ سڤیل و دیموكراسی په‌یاده و مماره‌سه بكه‌ن.
پ- ئابوری وه‌به‌رهێنانه‌كا زانستی و پشتگیر بو هه‌می ئالیان بێ هه‌ڤرك و بێ هیچ جوداكایه‌ك، بنه‌بر كرنا قورغكاری و ماتێكرنێن نه‌دروست، ئاڤاكرنا ژێرخانه‌یا وه‌لاتی و نه‌خاسم په‌ره‌پێدانا كه‌رتێ كشتوكالی و مه‌رداریێ، بكارئێخستنا كه‌رتێ كه‌شتوگوزاری و پیشه‌سازی و بیناسازی كرنه‌یه‌كا نمونه‌یی...دروست كرنا رێك وپر و به‌نداناڤا و پروژێن كاره‌با نیشتیمانی و كێمكرنا بهایان ل سه‌ر هاوولاتی، نه‌خاسم بهایێن باجا ده‌رامه‌تی و ئه‌رزانكرنا بهایێ( كاره‌بێ، ئاڤێ، بانزینێ، نانی....)، ڤه‌كرنا ده‌رفه‌تێن كاری و خومالی كرنا ته‌ندروستیا هاوولاتی و بته‌ندروستیه‌كا باش و ئازادیا بازاری ببه‌رچاڤگرتنا به‌رژه‌وه‌ندیا هاوولاتی و هه‌می ره‌نگێن جوداكاری و قورغكرنێ ژ ره‌هوریشالان بهێنه كێشان و ده‌ركرن...كه‌سێ مناسب ل جهێ مناسب بهێتن داناندن و دامه‌زراند، ده‌زگایێن چاڤدێریا مالی و دارایی و ئابوری...نه‌خاسم راگه‌هاندنا ئازاد بته‌مامی بهێنه پشتگیری و تایبه‌تمه‌ندی كرن، تاكو بكارن بنه ده‌ستهه‌لات و ئیداره بكه‌ڤیتن بن فشار و بن رێسا و یاسایێن داده‌ڤانی و وژدانی.
4- دوماهیك خال، وه‌سان دبینم، دینه‌مویا گورانكاریان ل باشوره، به‌رپرسیاریی ژی دیسان گشتیه لێ پشكا هه‌ری مه‌زن دیسان لباشوره، لباشور ژی گه‌له‌ك نه‌ته‌وه و دین و مه‌زهه‌ب و ئالیێن سیاسی جڤاكی...هه‌نه، لێ ل گوره‌ی دیتنا من دیسان به‌رپرسیاره‌تا دێروكی، ئه‌خلاقی، سیاسی، جڤاكی، بره‌نگه‌كێ سه‌ركی دكه‌ڤیتن سه‌ر سێ ئالیان(( ئالیێ ئێكێ پارتی و لایه‌نگرێن رێكا مه‌لا مسته‌فا بارزانی، ئالیێ دووێ ته‌ڤگه‌را ئازادی و ئالیگرێن عه‌بدولا ئوجولان، ئالیێ سیێ یه‌كێتی نیشتیمانی و ئالیگرێن(ماجلال و ناوشێروان مسته‌فا)...ئه‌گه‌ر ئه‌ڤه ل سه‌ر ئالیه‌ته‌كا گونجای، ل سه‌ر به‌ركه‌ڤته‌یه‌كا نیشتیمانی رێك بكه‌ڤن، بمن وه‌ره هه‌می ئالیێن دی، دێ دهاریكار و هه‌ماهه‌نگ بن...هه‌ردیسانێ هه‌می ئالیێن ناڤده‌وله‌تی(ئه‌مریكا، روسیا، ئه‌وروپا...)دێ رێزێ لێ گرن و دگه‌ل دا دهاریكار بن، ل وی ده‌می هێزێن هه‌رێمی ژی و نه‌خاسم ده‌وله‌تێن ( عه‌ره‌بی، توركیا، ئیران) دێ مه‌جبور بن خو دگه‌ل ره‌وشا كوردستانیان گونجینن..ل وی ده‌می بیاڤێ ده‌وله‌تبونێ، بیاڤێ ئێكگرتنا چارپارچه‌یان یان خوگونجاندنا وان پارچێن هه‌یی، دێ بره‌نگه‌كێ باش په‌یدا بن و ره‌وش ئێدی دێ هێدی هێدی سروشتی بیتن و خوگونجاندن ژی دێ په‌یدا بیتن.
مایه بێژین كوردا، خه‌لكێ كوردستانێ چه‌ند به‌رژه‌وه‌ندی هه‌یه دگه‌ل عه‌ره‌با، هندی وێ به‌رژه‌وه‌ندی هه‌نه دگه‌ل هه‌رئێكێ ژ تورك و فارسان(مه‌ره‌م ده‌وله‌تێن وان)، بویه هه‌می رێڤه‌چوونه‌ك، هه‌می نه‌خشه و پلانه‌ك پێتڤیه ل سه‌ر بنیاته‌كێ ساخله‌م و ل گوره‌ی به‌رژه‌وه‌ندیێن ئالیسه‌نگ بهێنه پیاده و بینا كرن، بهشمه‌ندیا زانستی، بئیداره‌دانه‌كا خه‌لاقی، بێ غش و عیله‌ت، بده‌ست و داره‌كێ شاره‌زا و ساخله‌م، بئنیه‌ته‌كا مروڤایه‌تی و بوژدانه‌كا ناڤ و ناڤه‌روكی، هه‌رتشت سه‌ر راست و بنه‌جهو دروست دبیتن.
.gif)
.jpg)
.jpg)
.jpg)
.png)
.jpg)
.png)
.png)