عەلی ئۆرەماری
پشتی چاڤەرێبوونەکا زێدەتر ژ ٦سالان بسەر نەگرێدانا کۆنگرەیێ چارێ و ۹ ساڵان ژ کۆنگرەیێ سێیێ ، دسەقایەکێ نەجهگیردا و ددەمەکێ ئالوزێ عێراق وهەرێم تێدا دەربازدبیت و دگەرمە گەرما لێدوانێن دژبەرێن  چەمسەرێن  نافخۆدا ونەحەزێن دەرڤە دا ، ئێکەتی نشتیمانی کوردستان ل ۲۱ ێ بەرفربارا ئێکێ کۆنگرەیێ خۆ گرێدا و جۆدا ژ سەلیقەیا کۆنگرەیێن ئاسایی دپێنگاڤەکا دەگمەندا، نەکۆمسیوون هاتنە دروستکرن ونەژی ڕاپۆرتێن ڕێکخستنێ و دارایی هاتنە خاندن وهەمی ئەو کارێن گرنگ کۆرتکرن  ب دەنگدانەکا ئەندامێن کۆنگرەی ژبۆ ڕەوانەکرنا بەرنامە وپەیرەوێ نافخۆ بۆ وان ۱۲۱ کەسێن دێ بنە ئەندامێن ئەنجۆمەنێ گشتی ،و بڤێ پێنگاڤێ پشکەکا مەزنا فشار و مەترسیان ژ هۆڵا کۆنگرەی هاتنە دویرئێخستن و،بۆ ڤێ قۆناغا ئێکەتی تێدا دەربازدبیت ئەف پێنگاڤە ب هەوڵەکا سەرکەفتی تێتە ل قەلەم دان ، زێدەباری ڤێ ئێکێ ژی دەربازکرنا سێ خۆدان پۆستێن سیادی (سەرۆک کۆمار،سەرۆکێ پەرلەمانێ کوردستانێ و جێگرێ سەرۆکێ حکۆمەتێ )بتەزکی یا بدەنگ دانا دەست بڵندکرنێ دیسان ئاستەنگەکا دنا مەترسیا تەقینێ ژێ تاتە چاڤەرێکرن هاتە پەسندکرن و بوونە پەندامێن ئەنجۆمەنێ گشتی، وەک تمامکرنەک ژی ئەنجۆمەنێ بالایێ دانایان وبەرژەوەندیێن ئێکەتیێ کۆ بسەرۆکاتیا کاک کوسرەت رەسول وهەشت ئەندامێن بەرێ یێن مەکتەباسیاسی ژلایێ کۆنگرەیڤەهاتە پەسندکرن و ئەو ئاستەنگ لبەردەم ئارمانجێن نۆیکرنا ئێکەتیێ هاتنە ڕاکرن.
هەلبەت درۆژا سێی یا کۆنگرەیدا ئەنجۆمەنێ سەرکردایەتیا گشتی ژێ کۆ ۱۲۱ هاتنە هەلبژاردن وسەرەرای وان ڕەخنەیێن ل شێوازێ هەلبژاردنێ و ئەو دەستێوەردانێن د ئازادیا ئەندامێن کۆنگرەی دا هاتینەکرن و گهۆرینا وژدانا هند ئەندامێن کۆنگرەی کۆ دبەرژەوەندیا هند لیستێن ئامادەکری دەنگ بدەن و دئەنجامدا کەسێن دیار سەرکەفتن بدەست خستن ،لێ دیسان نائێتە ئینکارکرن چ ئەوێن نەدەرکەفتین وچ ئەوێن سەرکەفتین ژی کەسێن دلسۆزێن ڤێ حزبێ نە وجهێ دلخۆشیێ و پیروزلێکرنێ نە.
لێ بدیتنا مە ئەگەر گرێدانا کۆنگرەی سەرکەفتنەک بیت ،تمامکرنا رێکارو هنگافتنا ئارمانجێن کۆنگرەی کۆ خۆ دنۆیکرنێ و بهێزکرنێ دا دبینن خالێن  مەبەستن و ئەڤەیە یا تێکرایی ئەندامێن ئێکەتیێ و بسەدان هزار دوستێن ئێکەتیێ چاڤەرێ دکەن، ئەرێ پشتی تمامبوونا کۆنگڕەی دێ تا چ ڕادە ئێکەتی شێت وی بەرنامەی وپەیرەوێ هاتیە ڕەوانەکرن بۆ ئەنجۆمەنێ گشتی بکریار ئێتە جهگیڕکرن وجێ بەجێکرن ، خالەک باڵکێش و تا ڕەدەیەکێ ژی مەترسیدار مایە ، ئەوژی کی دێ بیت سەرۆک وکینە دێ بنەجێگر وئەرێ لێکتێگەهشتن ورێکەفتنەک هاتیە پێک ئینان کۆ دیارکرنا سەرۆکی نەبیتە گرێکەکا ئاسێ و نەگەهیتە تەقاندنێ یان وەک کا چەوانێ بگێمەکێ سەرکەفتی قۆناغا ئێکێ یا کۆنگرەی بدوماهیک هات بهەمان  نەفەس وێ سەرۆک وجێگر یان جێگرێن سەرۆکی ژی ئێنە دەست نیشانکرن، بیناکرنا هەیکەلێ رێکراوەیێ ئێکەتیێ ژی  دیسان پرسەکا ئاڵوزە ،کۆ ب پێی پەیرەوێ پێشنیازکری ئەنجۆمەنێ سەرکردایەتیا دەڤەران کۆ دبنە حەفت دەڤەر تێنە دروستکرن و ئەو ئەنجۆمەن جهێ شازدە مەڵبەندا دگریت ، ئەرێ جێ بەجێکرنا ڤی بابەتی دێ چەند مەزێخیت و تا چ ڕادە ئەو ستافێن بازنەیان هاتینە  هەلبژاردن کۆ دێ بنە هێڤێنێ وی ئەنجۆمەنێ سەرکردایەتیا دەڤەران دێ دئاستێ شیانادابن و دێ شێن ژیانەکا نۆی و گیانەکێ نۆی دەنە کارێن رێکخستنێ ، ئەڤە بابەتە ئەگەر بۆ دەڤەرێن سەۆز جهێ راوەستیانێ بیت ژخۆ ئەڤە بۆ وان بازنەیێن دکەڤنە هێلا زەرو بەهدینان پتر جهێ سەرنچ وسەر راوەستانێ یە، بوویەژی قۆناغا پشتی کۆنگرەی قۆناغەک هەستیار وئاسێ یە و دڤێت گەلەک ب هویڕکاتی ولسەر خۆ و بهشیاری و ب مجدی کار ژبۆ بێتەکرن .