ئەکرەم گولی
دەما نێچیرڤان بارزانی بیە سەروکێ حکومەتێ د دوو کابینێن پێشتر دا بانگەشا وێ چەندێ کر کو هەرێمێ پێدڤیە سەربەخویا ئابوری هەبیت ، ئێدی چاڤێ وێ ل دەستێ بەغدا ومیزانیا بەغدایێ نەبیت ، بێ منەت بیت ، ب بەهانا هندێ بەغدا دوژمنە و هەمی دەما هەرێما کوردستانێ لبن مەترسیێ دایە ، هەر دەما دەستهەلاتدارێن بەغدایێ بڤێن دشێن هەرێما کوردستانێ برسی بکن ، هەرەشا ل هەرێمێ بکن ئەگەر ب دلێ وان کار نەکن ، هەر وەختێ بڤێت دێ هەرێمێ توشی کیشەکا مەزنا ئابوری کن.

سەربەخویا ئابوری یان ئابورەکێ سەربەخو ، مەزنترین و گرانترین بانگەشا نێچیرڤان بازرانی بی وەکو سەروکێ حکومەتێ د وی دەمی دا ، ب هاریکارییا تورکیا بوریەکا نەفتێ کێشا بو بەندەرێ جەیهان و رێکەفتنەکا ڤەشارتی تانوکە ژی کەس ناڤەروکێ نزانیت دگەل تورکیایێ کر ، ل جهێ بەغدا ببیت وێستگەهێ هاتن وچونا نێچیرڤان بارزانی سەروکێ حکومەتا وی دەمی ، ئەنقەرە کرە شوینگرا بەغدایێ ، هوسا خەیال ئاڤاکر ب رێکا ئەنقەرە دێ سەربەخوییا ئابورییا هەرێمێ ژ دایک بیت ، دناڤا هولا نشتەرگەرییا تورکیایێ دا دێ جاڤێن خوە ڤەکەت !

لێ ژ دەرئەنجامێ ڤێ سیاسەتا بێ پلان ، بێ بەرنامە ، بێ شەفافیەت ، ب خرابترین و شکەستی ترین سیاسەتا کارکرنێ ، لبن ڤێ سیاسەتا کارکرنا نێچیرڤان بارزانی هەرێما کوردستانێ کەتە ژێر قەرزێن کەمەرشکێن یێن کومپانیێن نەفتێ ، دەما چوارسالان ب دەهان ملیار دینارێن فەرمانبەران کو مووچە وتاکە ژێدەرێ ژیانا وان بی ، بییە نیڤە و روبع مووچە ، جاران ژی ئەو روبع مووچە چەند هەیڤان نەدا و پاش دئێخست ، ب هزاران کومپانیێن بیانی ژبەر خرابیا رەوشا ئابوری ژ هەرێمێ دەرکەتن ، ب سەدان کومپانیێن ناڤخوە توشی هەرفینێ وئیفلاس بوونێ بین ، وەبەرهێنان گەهشتە نزمترین رێژە ، کار لسەر پروژان ڕاوەستییا ژبەر نەدانا پارێن بەلێندەران ، هەمی کەرت ب تمامی توشی هەرفینێ هاتن ، رێژا بێ کاریێ ئاستەکێ هند مەترسیدار و بلند تومارکر ئێدی حکومەتێ داتایێن رەسمی یێن رێژا بێ کاریێ بەڵاڤ نەدکرن .
. تا ڕیفراندوومێ ژی هێشا ڤێ خەوێ پارتی ونێچیرڤان بارزانی بەرنەدابی ، وان هزردکر تورکیا ئەو دەرگەهە یێ تێرا دەربازببن و خەونا خوە کو ئابورییەکا سەربەخویە بگەهنێ ، لێ پشتی ڕیفراندوومێ ، رەوش هاتە گوهارتن مەترسیەکا مەزن لسەر پێگەهێ پارتی دروست بی ، دەما مەسرور بارزانی وەکو سەروکێ حکومەتێ دەست بکاربی ، دەستپێکا پەیام وگوتنێت وی زڤرین بی بەرەڤ بەغدایێ ، تێگەهشت ئەو ئابورییا سەربەخو یا کو نێچیرڤانی بانگەشە بو دکر بتنێ گوتنەک بێ هەبونا چ ناڤەروکێ بی ، ژبلی دروستکرنا مەترسیێ لسەر پێگەهێ پارتی ، چ ژێ بەرهەم نەهات ، بەرهەمێ وێ بتنێ قەرزداربین بی ب دەهان ملیار دولاران ، دەست برن بو برینا بێ وژدانانە یا مووچێ فەرمانبەران و دروستکرنا کارەساتان و مەزنترین شکەستن.
لەوا ب نەچاری بەروڤاژی پسمامێ خوە وێستگەهێ هاتن و چوونا خوە کرە بەغدا و پشت ل ئەنقەرە کر، باش دزانی گەر بەغدا دهەوارا وی نەهێت ، وی ژ حکومەتەکا شکەستن خاری و قەرزدارا دەهان ملیارا دولارا رزگارنەکت ، ئەو سیاسیەتا بناڤێ سەربەخوییا ئابورییا نێچیرڤانی هاژوتی دێ وی لاواز کت ، دێ حکومرانیەکا ژ جورێ خرابترین نمونە پێشکێش کەت ، ئەڤەژی ئێکەم ئەزمونا وییە وەکو سەروکێ حكومەتێ وی نەڤێت ب چ رەنگان ئەو توشی ڤێ ببیت ودێ هەمی ڕێکان گریت نمونەکا باشتر پێشکێشکەت ، مەسرو بارزانی تێگەهشت گەر رێکا بەغدایێ نەگریت جارەکا دیتر دڤێت مووچی فەرمانبەران ببریت و هەرێما کوردستانێ بکەت د قەیرانەکا دژوارتردا ژوێ یا پسمامێ وی برێڤەبری و هەرێم کرییە تێدا، ئەڤەژی دێ بیت ئەگەرێ دروست بونا خونیشاندانان ، هاتنا خەلکی لسەر جادان ، بلندبونا دەنگێ نەرازی ، توڕەبونا خەلکی ، ب ئارمانج گرتنا کەساتییا وی ژلایێ ڕاگەهاندنا بەرامبەرونەیارا سیاسی ، و دەرئەنجامێ وێ  دروست بونا بەرەیەکێ مەزنێ ئوپزسیونێ ژ لایێ پارتێن دیتر ڤە ، و ئێکەم بەیانناما وان ژی بێگومان داخازا دەست ژکارکێشانا وی یە ژ سەروکاتییا حکومەتێ ، ل دوماهیێ ژی یان دڤێت گورەپانا هەرێمێ بکەت گەرێن خوینێ ب هێزا خوە یا چەکداری و خوینا خەلکێ ب رێژیت ، یان ب نەچاری دەستا ژ کار بکێشیت ، ئەڤە هەردوو بژاردە ژی دێ دوماهیێ ب دەستهەلاتا پارتی دیموکراتی کوردستان ئینن ، ئەو دێ بیت ئەگەرێ نەمانا ڤێ دەستهەلاتێ کو زێدەتری ٧٠ سالانە دەسهەلاتا ئێکجاری هەی، یان دێ گەلەک لاواز کت.

ژبەر ڤێ مەترسیێ مەسرور بارزانی وەکو سەروکێ حکومەتێ ب نەچاری رێکا بەغدا گرت ، شاند ل دیڤ شاندی رەوانەی دەڤەرا کەسکا بەغدایێ کرن ، بشێوەکێ گەلەکێ روهن و ئاشکرا ئنیەتا خوە بو بەغدایێ ئاشکرا کر کو یانێچیرڤان بارزانی کری ئەو ناکت ، ل جهێ ئەنقەرە ئەو بەغدایێ ب مالا مەزن دزانت ، دوماهیک ب وێ سیاسەتا سەربەخوییا ئابوری ئینا یا نێچیرڤان بارزانی ڕاگەهاندنی و ب سالان بانگەشە بوکری ، ئەوژی ب ئیمزاکرنا رێکەفتنا دگەل بەغدا و ڕادەستکرنا نەفتا هەرێمێ ب بەغدا ، کو چ جاران نێچیرڤان بارزانی ئامادەنەبی ڤێ بکت د حوکمرانیکرنا خوە دا وەکو سەروکێ حکومەتێ.