د.سەروەر عەبدولڕەحمان

رووداوەكانی چەند رۆژی رابردوو لە رۆژئاوا دەری خست كورد چەندە بێكەسە، ئەو وتەیەی بەڕاست خستەوە كە دۆستی راستەقینەی تەنها شاخەكانن، خۆ ئەگەر دوێنێ‌ شۆڕشەكانی لەبەر خیانەت لەباربرابن، ئەمڕۆ لە رۆژئاوا خیانەت نەبوو، ئەگەر راپەڕینەكانی رابردوو لەبەر دواكەوتوویی و ئەقڵی خێلەكی خامۆش كرابن خۆ رۆژئاوا مەدەنی بوو، ئەگەر سەركردەكانی رابردوو باوەڕیان بە دەسەلاتی دامەزراوەیی نەبووبێت خۆ رۆژئاوا دامەزراو و سیستماتیك بوون، ئەگەر جولانەوەكانی رابردوو لەبەر لاوازیی هێزی سەربازی تێكشكابن خۆ رۆژئاوا بەهێزترین سوپاو ئازاترین شەڕڤانی هەبوو، ئەگەر سەرهەڵدانەكانی رابردوو لەبەر گرفتی نێوخۆیی ئایینی و نەگونجانی پێكهاتەكانی ناوخۆی كوردستان لێكترازابن خۆ لەرۆژئاوا یەكڕیزی كورد و عەرەب و ئاسوری، ئیسلام و مەسیحی و ئێزیدی، خواپەرست و عەلمانی لەیەك ریز بوون، ئەگەر لە بزاڤەكانی رابردوودا بالانسی جێندەری رانەگیرابێت و نیوەی كۆمەڵ بەشداریان نەكردبێت، خۆ لە رۆژئاوا ژنان و پیاوان لەپێشبڕكێی بەشداری و قوربانیداندا لەسەرەوە تاخوارەوە هاوتابوون، ئەگەر دوێنێ لەبەر هەر هۆكارێك لەهۆكارەكان سۆزی رای گشتی لەدنیادا لەگەڵ دۆزەكەمان نەبووبێت، خۆ لەرۆژئاوادا سۆزباران كراین، ئاخر لەسەر ئاستی سەرۆكی دەوڵەتان، سیناتۆر و پەرلەمانتار و گەورە نوسەر و بیرمەندان، هونەرمەندان، وەرزشوانان، كەسایەتیە ناسراوەكانی جیهان، هەست و سۆزیان لەگەڵ كچان و كوڕانی رۆژئاوا بوو و سەرسام بوون بە ئازایەتی و قوربانیدان و رەوایەتی خەباتەكەیان، ئەمانە هەمووی راستیی حاشا هەڵنەگر بوون، كەچی سەرەنجام لەسەر مێزی قوماری زلهێزانی بەرژەوەندخوازی سەردەمی دروشمە ساختەكانی دیموكراسی و مافی مرۆڤدا دۆڕاین و كراین بە قوربانیی پارسەنگی بەرژەوەندییەكانیان.  
لەئێستادا كوردستان بە قۆناغێكی سەخت و هەستیاردا تێپەڕ دەبێت، سی ساڵ بەسەر تاوانەكانی جینۆسایدی هەڵەبجەو ئەنفالدا تێپەڕیوە، لە ساڵڕۆژی رودانیاندا شینیان بۆ دەگێڕدرێت، لەسەریان دەنوسرێت، جۆرەها شرۆڤەو لێكدانەوەیان بۆ دەكرێت، هەر لە سەركردەو بنكردەكانەوە تا دەگات بە نوسەران و رۆژنامەنوسان و پیاوانی ئایینی و هەموو چین و توێژەكانی تر. بەلام ئەمڕۆ كە لەبەردەم مەترسی روودانی جینۆسایدێكی ترداین، ئەگەر لەگەڵ خۆمان و خواو ویژدان و مێژووماندا راستگۆبین، تەنها رێگەی دەرباز بوون لەو مەینەتیە موزمینە یەكێتی و یەكگرتن و یەكدەستیی نەتەوەییە، جۆرەها شێوازی خەبات و هەوڵی دروستكردنی لەمپەر هەیە، هەر تنۆكە ئاوەو روبار و دەریای لێ دروستدەبێت، هەر دەنكە زیخ و چەوە شاخ و چیای سەختی لێ پێكدێت، دەتوانین، بەڵێ ئەگەر بمانەوێت دەتوانین، بەمەرجێك تەنها ئیرادەمان هەبێت و كاژی خیانەت لەبەری خۆمان دادڕین و خۆپەرستی و بەرژەوەندی تایبەتی وەلا بنێین، نەسەردەمی گلەییەو نە سەردەمی موزایەدات، نە سەردەمی تەخوین كردنە لەسەر رابردوو و نە خۆ بەپاڵەوانكردن، پێویستە واز لە رابردوو بێنین، مێژووێكی ئەوەندە رازاوەمان نیە تا شەڕی لەسەر بكەین و ئەوەندە جێگەی شانازی بێت، پێویستە داهاتوو ببینین و كار و كۆششی ئەمڕۆمان بۆ سبەینێیەكی رۆشن و پڕ دەستكەوت بێت. خۆ ئەگەر وانەكەین، بەدڵنیاییەوە داگیركەرە شۆڤێنیەكان زاڵتر دەبن، شۆڤینیەتی تورك و عەرەب هاوكار و عەجەمیشیان دەچێتەپاڵ، ئەوكاتە هەموو تاكێكی كوردی، لەهەر ئایین و مەزهەب و تایەفەو حزبێك بێت، لەهەر پارچەیەكی ئەم كوردستانە بێت، جا (باش) بێت یان (جاش)، (ئیماندار) بێت یان (بێباوەڕ)، (سەر سور) بێت یان (سەر ڕەش)، (بەڕێز) بێت یان (بێحورمەت)، (وەزیر) بێت یا (گزیر)، هەموومان لەلایەن داگیركەرانەوە بەیەكچاو سەیر دەكرێین، ئەو كاتە یا دەبێت حاشا لە كوردبوونی خۆمان بكەین، یا لە شالاوی جینۆسایدا بێبەش نابین.