محەمەد گردش

لەم چەند ساڵەی ڕابردوودا ، ئەم شتەی ناوی لەخۆی ناوە حکومەتی هەرێم  ( بەگشتی ) موچەخۆرانی فەرمانگەکانی هەرێمی خستبووە نێوان بەرداشی قانون و ئەخلاق و پاشەکەوتەوە .

  بەوپێیەی لەڕووی یاساییەوە ئەگەر فەرمانبەر پابەند نەبێ بە دەوام کردنەوە ( هەروەک وتەبێژی حکومەت دەیوت ) بە مەفصول حیسابە و لەو موچەیەش بێبەریی دەکرا  ، وە کە موچەشیان پێ ئەدا ، بە چل یان پەنجا ڕۆژ جارێک  چــارەکە موچەیەکیان ئەدا ، لەم کاتەشدا ئەگەر فەرمانبەر لەبەر کەم دەرامەتی دەوامی نەکردایە ئەوا بەرپرسیارێتی ئەخلاقیان دەخستە سەرشان ، گوایە حکومەت لەژێر باری قەرز و کەمیی داهات و شەڕی داعشدایەو ، فەرمانبەرەکانی پشتیوانی نین .
    هەرچەندە ( هەندێک ) لە پاڕلەمانتارە بەویژدانەکان هاواریان دەکرد کە ئەمە سیستەمی ستەمە نەک پاشەکەوت ، چونکە داهات بەشی موچەی تەواو هەیە ، نەک هەرئەوە بەڵکو بەهۆی شەڕی داعشەوە داهاتی حکومەت زیادی کردووە ، لەبەرئەوەی هێزەکانی پێشمەرگە توانیویانە بە خوێنی خۆیان زۆر لەو خاکە کوردستانیانەی  ژێردەسی داعش ڕزگار بکەن کە کێڵگەی نەوتین و بەوهۆیەشەوە نەوتێکی زۆرتر لەوەی هەرێم کەوتۆتە بەردەسی حکومەتی هەرێم .

لەگەڵ ئەوەشدا مانگ لەدوای مانگ چارەکە موچەکەش دوائەکەوت و فەرمانبەری گیرخواردووش  لەلایەک ئیشی دووەمی لەدەست داوە بەهۆی کەم بوونەوەی پارەوەو ، لەلایەکیش قەرزو قۆڵەو کرێ و قیست تەنگی پێ هەڵچنیوە . بەڵام هێشتا فەرمانگەکانی حکومەت کاریان تێدا دەکراو ، فەرمانبەران نەیانهێشتبوو کاری هاوڵاتیان و حکومەت پەکی بکەوێت .

واتا مێـژوو دوبارە بووەوە ، هەمان ئەو موچەخۆرانەی کاتی خۆی حکومەتی بەعس نانبڕاوی کردن بەڵام بەدەنگێکی دلێر ئەیانووت : سەری بەرز بۆ موچە نەوی ناکەین ، هەرئەوان و نەوەکانیان ئەمجارەش پێیان لەجەرگی خۆیان نابوو ، قەرزیان دەکرد تا کرێی هاتۆچۆی ڕێگەی فەرمانگەکانیان دابین بکەن و بێنە سەرکارەکانیان ، ئەرکی قانونی و ئەخلاقی خۆیان بەجێ بهێنن .

هەرچەندە فەرمانبەران بوونە هەڵگریی بارگەی خەمی میللەت و کۆڵەکەی ڕاگرتنی حکومەت ، بەڵام وادیارە ئەم ڕەنجەی خەڵکیش بە  با چوو ، هەروەک چۆن خوێنی هەزاران پێشمەرگەو ، نیوەی خاکی کوردستان لەدەسچوو .

بەڵام بۆ دەبێ تەنیا هاوڵاتی ئەرکی ئەخلاقیی بەجێ بهێنێ ، ئەی حکومەتی هەرێم هێج جۆرە ئەرکێکی ئەخلاقیی ناکەوێتە سەرشان ؟! یان ئەم حکومەتە هەمان هەربێنەکەی جارانە !!؟

ئێستاش دوای ئەوەی( بەهەرجۆرێک بێت ) موچە خەریکە ئاسایی ئەبێتەوە ، کەچی فەرمانبەران بێجگە لەو سێ بەرداشە کەوتوونەتە بەر هەڕشە و هەروەها  add  و  remove یشەوە . داوای دەوامی ئاسایی و یاسایی دەکرێ ، بەڵام ئەمانە بەکام پێوەر ؟! بۆ ئەم چەن ساڵەی کە گوزەشت ، ئاسایی بوون و یاسایی بوونی پێوە دیاربوو بۆ موچەخۆران ؟!

   ئەوەتا ( بۆ نمونە) وەزیری تەندروستی بە بڕیاری ژمارە (٣٥٤٩ ) ی بەرواری ( ١٩ــ٣ــ٢٠١٩) داوایەکی وا دەگشتێنێ کە دەوام ئاسایی بکرێتەوە و سەعاتەکانی دەوام زیاد بکرێت ، کە ئەم جۆرە بڕیارانەش سەرئێشەو ئیحراجیەکی زۆری بۆ بەڕێوەبەرەکان دروسکردووە . وەک ئەوەی ( بۆ نمونە) بەڕێوەبەرێکی یەکێک لە نەخۆشخانە گەورەکانی سلێمانی کە تازە دەس بەکاربووە ، هەڵدسێ بە دانانی گروپێکی ڤایبەر بۆ نەخۆشخانەکە و کارمەندەکان دەبنە ئەندامی گروپەکە ، بەڵام سەیر لەوەدایە بەزمانێکی هەڕەش ئامێز لە مێسجێکدا ئەڵێ : یەک کەس لێرە موناقەشە نەکا ! 

 لێرە ، مەبەستی گەوپەکەیە ، ئەو کارمەندانەش کە قسە و بۆچونەکانی بەدڵی خۆی نەبێ خێرا remove ئەکرێن لەگروپ ، ئاخر جەنابی بەڕێوەبەر ، خۆت ئەزانی شەبەکەی تەواصولی ئیجتیماعی بووەتە سەرئێشە بۆ زۆرێک لە پۆستدارەکان ، کە بەڕێزت تەحەمولی موناقەشەی ( لابدّ مِنهُ ) ناکەیت و ناتەوێ گوێ لەو کارمەندانەت بگری کە ساڵانێکە بە سکی خاڵیی و گیرفانی بەتاڵ دەوام ئەکەن ئیتر بۆ دەرگای فەزای ئازاد بەڕویاندا ئەکەیتەوە ؟! 

  لەبەرئەوە ، ئەم حکومەتەی کە خودی خۆی نائاساییەوە لەدنیادا نمونەی نیە ، چۆن داوای شتی ئاسایی و یاسایی دەکات ، یان چۆن لەڕووی هەڵدێ بەرپرسیارێتی ئەخلاقی بخاتە سەرشانی موچەخۆرانی ؟! لەولاشەوە بەڕێوەبەرەکانی سەرپشک بکا بە هەڕەشەو گوڕەشە .

  موچە ئاسایی بکەنەوە با خەڵک ڕێی هات و نەهاتی ئیجە بگرێتەوە بەر ، چونکە هەر هیچ نەبێ لەوێ چارەنوس مەعلومە ، یان خنکان یان پەڕینەوە . بەڵام لەم ئەرزی خوایەی پێی دەوترێ هەرێم ، هیچ شتێ مەعلوم نیە نە قانون نە ئەخلاق نە پاشەکەوت نە بەرداشەکانی تر .