هادی حەمەرەشید     
حیزب بۆ ئەوەی بچێتە هەر پرۆسەیەکەوە باشترین میکانیزمی سەرکەوتنی بریتیی ئەبێت لە پشتگیریی ناوخۆیی، خۆ ئەگەر بەر لە هەر هێزێك ئەندامانی خۆی سەپۆرتیان نەکرد، ئیتر دەرئەنجامەکەی ڕوونە، بە چوار پەلی شکاوەوە، لەبری (چوون) (ئەیبەن) و لەبری نەچوون و ئۆپۆزسیۆن بوونیش(ڕێگای پێنادەن)!
تۆپ لەقاچی ئەوانیتردایە، ئەمیش تەنیا چاوەڕێی ڕووی کەرەم و مەرحەمەتیانە!

یەکێتی لە سەرەتای هەشتاکانی سەدەی رابدوودا، بەقەولی تاڵەبانی ((فیلی بە تەقلە لێئەدا)) نەك تەقلەش بەفیل، کەچی کە باری ناوخۆیی نالەباربوو، لەساتی چوونیان بۆ ناو گفتوگۆ(مفوچات) لەگەڵ حکومەتی عێراقیدا، ئەوەندەی ئەندامانی خۆی دژیبوون لەو هەنگاوەدا، نە بەرەی جود و جەوقەد و نە نەیارە سەرسەختەکانیان پێیان نەکرا!
گفتوگۆ تێكچوو، یەکێتیش بەدەستی بەتاڵ لێی هاتەدەرەوە.

نوکتەیەك هەبوو لەو بارەیەوە; کۆمەڵێك لە کادیری ناوەندیی یەکێتی لەو ماوەیەی گفتوگۆدا ئەچنە ئەوروپا و ئەڵێن ئێمە جاشایەتی بەعس ناکەین و بڕوامان بەم پرۆسەیە نیە، کە ئەم کۆمێنتەیان بۆ کاك نەوشیروان ئەگێڕنەوە، ئەویش بە پێکەنینەوە ئەڵێ: ئێ ڕاست ئەکەن، ئەوان پێشمەرگایەتییان بۆ نەکرا، جاشایەتیی هەر ناتوانن!( دیارە ئەو چەند ساڵە ڕژێم جاشەکانی ئەبردە هێڵی پێشەوەی شەڕی ئێران_عێراق و باری سەرشانیان زۆر گران بوو، زۆریان لێ کوژرا و بەدیل گیرا، لەچاو پێشمەرگایەتییدا کە موڕیحتر بوو)

گۆڕان لە ماوەی چەند مانگی دوو هەڵمەتی بانگەشەدا، بەهاری هێنابووە ئەژنۆ، کە پاش هەڵبژاردن بەخێرایی چاکسازیی ناوخۆیی ئەکەین، کۆنفرانسی نیشتیمانیی و نوێبوونەوە و پێکهاتنی ڕەگەزە جیاواز و ناکۆکەکان دەستەبەر ئەکەین، گرد و میدیا ئەگێڕینەوە بۆ گۆڕان و...تاد
وا هەردوو هەڵبژاردن تەواو بوو، جگە لە پێکهێنانی لیژنەی باڵای کۆنفرانس و دیارییکردنی ناوی لیژنە لاوەکییەکان، بەبڕیارێك و قودرەتی قادر، هەموو شتێك ڕاگیرا و کۆنفرانسی گشتییان سپارد بە نادیار و ئەشعاری ئاخر!

گۆڕان لەخراپترین باردایە، هەموو فیلێکی بێ ئەزموونیش تەقلەی پێ لێئەدات، دامودەزگا و ژوور و مەکۆ و میدیاکەی لە وێرانە وێرانەترن، کەچی بەهیوایە لە ڕێگای کۆمەڵێك (بەڵێندەری سیاسیی)ـەوە دۆخی وێرانەی کوردستان بگۆڕێت!

چوون و نەچوون ئامادەکاریی ناوخۆیی ئەوێت کە گۆڕان بۆ هیچ بژاردەیەکیان خۆی ئامادە نەکردووە، لە ئێستادا ڕەهینەی کۆمەڵێك کەسە کە بە توندیی بەرەو حکومەتی ئەبەن، هەموو هێلکەکانی لەسەبەتەی چووندایە، بۆیە تەنانەت بە نەچوونیش خۆکوژیی ئەکات، لەلایەك ناوخۆی حیزبیان بۆ هیچ ئۆپشنێك ئامادە نەکردووە و دڵسۆزترین هەڵسوڕاو و پشتیوانانیان بێ ئومێد کردووە، لەلایەکیتریشەوە کۆمەڵێك تووشی دڵڕەنجان ئەکەن کە بەڵێنی پۆستیان پێدراوە و بۆ پۆست تا ئێستا ماونەتەوە!

ئەوەش ڕوونە بە (چوون)ـیش ملی کامە ڕێگا ئەگرن، حکومەتێك کە لە هەولێر هەموو ئەندام ناوچە و لقێكی پارتی هەمەکارەن، پاراستن و (برا گەورە) حکومەت بەحیزبییتر ئەکەن و لە سلێمانییش هەموو ئەندام کۆمیتە و مەڵبەندێكی یەکێتی بڕیاردەری سەرەتا و کۆتایین لەرێگای چرای سەوزی ماڵباتی تاڵەبانییەوە!

حکومەتێك کە ململانێی پارتی و یەکێتی، زۆنی سەوز و زەرد، لە سەوزدا ململانێی باڵی مام و ماڵی کۆسرەت لە لایەك و پێشبڕکێی ئامۆزاکان(مناڵەکانی شێخ جەنگی و کوڕانی مام)، چەکوشەکانی شاناز و فشارەکانی ماڵی برایم ئەحمەد، لە زەرددا ململانێی جووت ئامۆزا و پێکدادانی میدیایی و تەنانەت ئەگەریتریش لە گۆڕێیە!

لەوەها دۆخێکدا، ئیمکانی چی هەیە بۆ گۆڕان؟! لە پەرلەمان هاوکێشەکان چۆنن؟! حکومەت و پرسی چاکسازیی و گۆڕانکاریی لە سیستمدا بەرەو کوێ ئەبرێت؟!
ڕەنگە باشترین کارێك کە پێی بکرێت; ناو بە ناو دیل بە دیل بۆ کادیرەکانی پارتی و یەکێتی ڕێکبخات لە هەردوو زۆندا!