■ نەبەز گۆران
یەكێك لە خێڵە كۆنەكانی هندییە سوورەكان، پەندێكیان هەیە دەڵێت: " نیشتیمان و كەرامەت هی فرۆشتن نییە." ئەو خۆچەمینەوەیەی ئێستا دەستیپێكردوە، خۆ چەمینەوەیەكی گشتی نییە، بەڵكو پەیوەندی بە دوو پارتەكەی دەسەڵاتەوە هەیە، كە مێژووێكیان هەیە بۆ خۆچەمینەوە لەبەردەم ئەویتری بێگانەدا. دوو رووداوەكەی ئەم دوایە، چوون بۆ _بەغداد بۆ راستكردنەوەی هەڵەكان_ بریاردان بۆ داخستنی بارەگای تەڤگەر_ لەسەر داخوازی توركیا، هەردوو رووداوەكە خۆچەمینەوەیەكن بۆ روشاندن و لێدان لەكەرامەتی نەتەوەیی لە پێناو ویستی حیزبی. پێش ئەوەی قسە لەسەر ئەم دوو رووداوە بكەم، باشترە بڵێم: بە درێژایی تەمەنم، نووسینی من بۆ ئەم جۆرە كەسانە نەبووە لەناو رستەی كەوانەكەدا خۆیان دەبیننەوە: ( حەقیقەت بۆ كەسانێك روون ناكرێتەوە، كە پارە وەردەگرن بۆ ئەوەی حەقیقەت نەبینن/ سینكلر.) چونكە زۆرێك هەن، لە حیكایەتە كۆنەكە دەچن. 
"رۆژێك پیرێك بە تەنیشت كەسێكدا تێپەڕی، پیرە لە كەسەی پرسی: ئەوە بیر لەچی دەكەیتەوە؟ كەسەكەش بەم جۆرە وەڵامیداوە: من بیر لە هیچ ناكەمەوە، چونكە خواردنێكی زۆر لەبەردەستمدایە/ ویل دورانت." 
ئەوانەی لەرێگای گیرفانەكان و گەدەیانەوە سەیری دونیا و ژیان و كەرامەت دەكەن، پێویست ناكات هیچكاتێك خۆت ماندووبكەیت لەگەڵیاندا، تا راستییەكیان بۆ باسبكەیت و بتەوێت حەقیقەتێكیان بۆڕونبكەیتەوە، چونكە ئەوانە حەقیقەتیان ناوێت و تەنها ئەوخواردنەیان دەوێت لەبەردەمیاندایە. 
كاتی تێكشكان و هەڵهاتنەكە، ئەفسەرێكی پیر لە نزیك بازگەی _هەولێر_ هاواریكرد (خۆنەچەمێنن) ئەو ئەفسەرە بێگومان لە دڵێكی پاك، لە راستگۆییەوە ئەم قسەیەیكرد، بەڵام ئەو نەیدەزانی نزیكەی هەفتەیەكە بڕیاری هەڵهاتندراوە و لە _زومارەوە تا خانەقین_ دەبێت ئەو هێڵە چۆڵبكرێت، لەو فەزای شیوەنەش تێنەدەگەیشت میدیای فاشی دروستیكردبوو بۆ شاردنەوەی شكستەكە، نەشیدەزانی ئەو هێڵەی بۆ هێزەكەی خۆی و هێزەكەی بەرامبەری دروستكراوە، هیچ لایەك بۆی نییە ئەو هێڵە تێپەڕنێت، بەڵكو وەك ئەفسەرێكی سادە دڵ، كەوتە ناو شیوەنەكەوە و ئەم چەمكی _خۆنەچەمێنن_ زمانی ئەو كرایە كەرەستەیەك بۆ شیوەنەكە و پاشان بۆ هەڵبژاردن و زۆر كەسی پێفریودرا، بەڵام ئێستا سەردەمێكی ترە و ئەو چەمكە كۆتایی هاتووە و چەمكی خۆ بچەمێنە بووەتە كەرەستەی هەوڵەكانی دوو پارتەكە.
با كەمێك لە فەزای مانگەكانی پێشوو دوربكەوینەوە و سەیری ئێستا بكەین. فشارەكانی _توركیا_ بۆ سەر ئابووریی حیزب، دەبێتە ویستێك بۆ ئەوەی پشت لەو كەرامەتە بكرێت و، هەوڵی داخستنی حیزبێك بدرێت، كە ئەو حیزبە لە چوار چێوەی _عێراق_دا كاری سیاسیی خۆی دەكات و مەترسییە بۆسەر شكۆی توركیا. (ئێمە هەرێمێكین لە عێراق، ئەركی ناوەندە مامەڵە لەگەڵ ئەم كەیسانە بكات پەیوەندیان بە داخوازی دەوڵەتانی دراوسێوە هەیە، نەك ئەركی حیزبێت.) ئێمە دەزانین هەرێم هیچ پاییەكی بنەرەتی نییە و ئەوە حیزبە ئاراستەی كۆی دامەزراوەكانی دەكات، بەڵام هیچ لەوە تێناگەین بۆچی دەبێت حیزب هەمیشە رێگای نادروست بگرێتە بەر! گەمارۆ دان و داواكردن بۆ داخستنی بارەگای _تەڤگەر_ تەنها خۆچەمینەوەیەكی حیزبییە بۆ داخوازی دەوڵەتێكی بێگانە، ئەم خۆچەمینەوەیەش پشتكردنە لەو كەرامەتەی پەیوەندی بە كەرامەتی نەتەوەوە هەیە و حیزب لە پێناو رازیكردنی بێگانە كەرامەتەكە لەكەدار دەكات.
چ ئەم جوڵەیەی دژی _تەڤگەر_ دەكرێت، چ ئەو جوڵەی چوون بۆ _بەغداد_ بۆ چاككردنەوەی هەڵەكان، پەیوەندیان بە نەبوونی دامەزراوەی هەرێمییەوە هەیە و، پەیوەندیان بە پشتكردنە لە كەرامەتی نەتەوەیەك لەلایەن حیزبەوە. هەموو نەتەوەیەك كەرامەتی خۆی هەیە، كەرامەتەكانیش بەستراون بە مەعنەویەتێكەوە تەنها بە جوڵەوكردەی نادروست ئەو كەرامەتە بریندار دەبێت. كاتێك ئەم جوڵەو كردانە لەبەر رازیكردنی ئەویتری بێگانە ئەنجامدەدرێن، ئیدی لە پێناو ویستێكی تایبەتی حیزبی، كەرامەتی نەتەوەیەك دەشكێت. ئەشێت بۆ بەشێكی كارەكتەرەكانی حیزب، تەنانەت شكاندنی كەرامەتی نەتەوەیەك _حیكمەت_ بێت! (مەبەستم ئەوانەیە بەردەمیان خۆراكی باشی تیاییە و ئیدی پێویستیان بە بیركردنەوە نییە لەكەرامەت.)
_سپۆنسەر_ دەڵێت: " بەبێ‌ بوونی حوكومەتێكی سەربەخۆ، هیچ كات گەشەكردنی كۆمەڵگەیەك لە ئارادا نییە." ئێمە هەرگیز ناتوانین باس لە حوكومەتی سەربەخۆ بكەین، تا ئێستا ئەو حوكومەتەمان نەبووە سەربەخۆبێت و دەرك بەو سەربەخۆ بوونەی بكەین. هەمیشە ئایدۆلۆژیا و ویست و بەرژەوەندی حیزبی، لەپێش هەموو شتێكەوەبووە. هەمیشە داواكاری بێگانەكان و جێبەجێكردنی داواكانیان لەپێش داواكاری ناوخۆوە بووە. لە مێژووی رابردوودا، هەڵبەتە لە ئایندەشدا بەرچاو روونییەك لەئارادایە، كە ئەم دوو پارتە سیاسییە زۆر بێباكن لە كەرامەت و نیشتیمان. هەركاتێك ویستبێتیان چ نیشتیمانیان فرۆشتووە، چ كەرامەتی نەتەوەیەك. پاشان زۆر بە ئاسانی شیوەنێكیان لە میدیاوە رێكخستووە زۆر كەسی ئایدۆلۆژی كەوتونەتە ناو شیوەنەكەیان و بوونەتە شیوەنگێڕ، بەبێ‌ ئەوەی ئەو شیوەنگێڕانە بۆ جارێكیش هەڵوەستە بكەن بزانن ئەوەی روویداوە لە رابردوودا چیبووە! 
پاش خۆ چەمینەوە بۆ _بەغداد_ ئەشێت كاتی خۆ چەمینەوە هاتبێت بۆ ویستەكانی _توركیا_ چاوەڕواندەكەین بزانین پاشان ویستەكانی _ئێران_ چین و چۆن خۆچەمینەوەیەك دەبینن لەبەرامبەریدا. (ماوەیەكی دیكە ئەم خۆچەمینەوە نوێیانە بیردەچنەوە، زۆرینە كەیفیان بە زیندوو هێشتنەوەی یادەوەری نییە.)
كاتێك لەلایەن حیزبەوە هەموو بەها گەورەكانی كۆمەڵگە و نەتەوەیەك خرانە ناو مامەڵەی حیزبییەوە، دەبێت چاوەڕێی هەموو جۆرە خۆچەمینەوەیەك بكەین. ئەوانەی لەم خۆچەمینەوانەدا ئازاریان بەردەكەوێت، ئەوانە نین لە شیوەنەكاندا شیوەندەگێڕن و ئەوانەش نین لە شاییەكاندا خۆیان ڕادەوەشێنن، بەڵكو ئەوانەن لە جەوهەری كەرامەت و نیشتیمان تێدەگەن و، لە رێگای خواردنەكەی بەردەمیانەوە سەیری دونیا ناكەن و، لەرێگای شكۆو فەزیلەتەوە سەیری مرۆڤ و كۆمەڵگە دەكەن. حەتمەن لەوەڵامی ئەو خۆچەمینەوانەشدا لەشكری _بەڵێ‌_ بیانوی خۆی هەیە، چونكە ئەو لەشكرە هەمیشە بیانوێك دەهێنێتە تا ماهیەتی خۆی لەبیربكات لەپێناو نەبینینی ئەو حەقیقەتانە.