درەو:
راپۆرتی: وەزارەتی دارایی عێراق
🔻 وەزارەتی دارایی عێراق یەکەم ڕاپۆرتی مانگانەی خۆی بۆ کانونی دووەمی ئەمساڵ بڵاوکردەوە، بەپێی ڕاپۆرتەکە؛
🔹 کۆی داهاتی گشتی وەزارەتی دارایی عێراق بە هەردوو داهاتی (نەوتی و نانەوتییەوە) نزیکەی (8 ترلیۆن و 537 ملیار) دینار بووە، نزیک لە (7 ترلیۆن و 75 ملیار) دیناری بە رێژەی (83%) داهاتی نەوت و زۆرتر (ترلیۆنێک و 462 ملیار) دیناری بە رێژەی (17%) داهاتی نانەوتی بووە و (120 ملیار) دیناریش وەک داهاتی نانەوتی لە هەرێمی کوردستانەوە ڕەوانەی بەغدا کراوە.
🔹 کۆی گشتی خەرجییەکانی وەزارەتەکە بە هەردوو خەرجی (بەگەڕخستن و وەبەرهێنان)ەوە، پتر لە (8 ترلیۆن و 876 ملیار) دینار بووە، کە (94%)ی بۆ خەرجی بەگەڕخستن و (6%) بۆ خەرجی وەبەرهێنان بووە.
🔹 وەزارەتەکە زیاتر لە (ترلیۆن و 28 ملیار) دیناری، بۆ موچەی فەرمانبەران و چاودێری کۆمەڵایەتی و بواری هاریکای و یارمەتی و خەرجی دیکە بۆ هەرێمی کوردستان خەرجکردووە.
🔹 دوای لێدەرکردنی سەرجەم خەرجییەکان لە کۆی داهاتی گشتی وەزارەتی دارایی، بەڕێژەی (4%) خەرجی لە داهات زیاتر بووە و زۆرتر لە (339 ملیار و 597 ملیۆن) دینار و کورتهێنان ڕویداوە.
یەکەم: داهاتی گشتی وەزارەتی دارایی عێراق لە کانونی دووەمی (2026)دا
بەپێی نوێترین ڕاپۆرتی وەزارەتی دارایی عێراق، بۆ مانگی کانونی دووەمی ئەمساڵ، کۆی داهاتی گشتی عێراق بە هەردوو داهاتی (نەوتی و نانەوتییەوە)، بریتی بووە لە (8 ترلیۆن و 537 ملیار و 96 ملیۆن و 769 هەزار و 517) دینار، بەجۆرێک بڕی (7 ترلیۆن و 75 ملیار و 94 ملیۆن و 766 هەزار و 90) دیناری بەڕێژەی (83%)ی لە داهاتی نەوتەوە سەرچاوەی گرتووە، بڕی (ترلیۆنێک و 462 ملیار و 2 ملیۆن و 3 هەزار و 247) دیناری بەڕێژەی (17%)ی داهاتی نانەوتی پێکیهێناوە. (120 ملیار) دیناریش وەک داهاتی نانەوتی لە هەرێمی کوردستانەوە ڕەوانەی بەغدا کراوە.
خشتەی داهاتەکان
دووەم: خەرجی گشتی (بەگەڕخستن و وەبەرهێنان)ی وەزارەتی دارایی عێراق لە کانونی دووەمی (2026)دا
هەر بەپێی بە ڕاپۆرتەکەی وەزارەتی دارایی عێراق، لە مانگی یەکی (2026)، کۆی گشتی خەرجییەکانی وەزارەتەکە بە هەردوو خەرجی (بەگەڕخستن و وەبەرهێنان)ەوە، بریتی بووە لە (8 ترلیۆن و 876 ملیار و 694 ملیۆن و 129 هەزار و 920) دینار، بەجۆرێک بڕی (8 ترلیۆن و 345 ملیار و 781 ملیۆن و 900 هەزار و 593) دیناری بەڕێژەی (94%)ی لە لەبواری خەرجی بەگەڕخستن و بڕی (530 ملیار و 912 ملیۆن و 229 هەزار و 327) دیناری بەڕێژەی (6%)ی بۆ بواری خەرجی وەبەرهێنان تەرخان کراوە.
وەزارەتەکە بڕی (ترلیۆنێک و 28 ملیار و 285 ملیۆن و 545 هەزار و 692) دیناری، بۆ موچەی فەرمانبەران و چاودێری کۆمەڵایەتی و بواری هاریکای و یارمەتی و خەرجی دیکە بۆ هەرێمی کوردستان خەرجکردووە.
خشتەی خەرجییەکان
سێیەم: بەراوردکردنی کۆی داهات و خەرجی وەزارەتی دارایی عێراق لە کانونی دووەمی (2026)دا
وەک ئاماژەمان پێدا کۆی گشتی خەرجییەکانی عێراق بە هەردوو خەرجی (بەگەڕخستن و وەبەرهێنان)ەوە، بریتی بووە لە (8 ترلیۆن و 876 ملیار و 694 ملیۆن و 129 هەزار و 920) دینار.
لە کاتێکدا کۆی داهاتی گشتی عێراق بە هەردوو داهاتی (نەوتی و نانەوتییەوە)، بریتی بووە لە (8 ترلیۆن و 537 ملیار و 96 ملیۆن و 769 هەزار و 517) دینار.
واتە بڕی (339 ملیار و 597 ملیۆن و 360 هەزار و 403) دیناری بەڕێژەی (4%) لە داهاتی گشتی کورتهێنان ڕویداوە.
سەرچاوە؛
ڕاپۆرتی وەزارەتی دارایی عێراق
- حساب الدولة لغایة کانون الثاني لسنة 2026 للموازنە الاتحادیة
https://mof.gov.iq/Budget-implementation-Archive.aspx
