هەواڵ
سەرۆكی وەفدی ئەمریكاو ئێران شكستی دانوستانەكانیان راگەیاند؛ بۆ داهاتوو چی روودەدات،سێ سیناریۆ لە ئارادایە، بەردەوامی دانوستان وگەیشتن بە رێككەوتن، یا دەستپێكردنەوەی جەنگ، یاخود كۆتاییهاتنی جەنگ بەبێ رێككەوتن.
بڵاوکراوەتەوە لە : 12 نیسان 2026
قەبارەی دەقەکان
قەبارەی دەقەکان
درەو:
دوای 21 كاتژمێر لە دانوستان و گفتوگۆی نێوان وەفدی ئەمریكا و ئێران لە ئیسلام ئاباد، جەی دیڤانس جێگری سەرۆكی ئەمریكا شكستی دانوستانەكانی راگەیاند: نەگەیشتینە رێككەوتن، بەبێ رێككەوتن دەگەڕێینەوە واشنتۆن، محەمەد باقر قالیباف سەرۆكی وەفدی دانوستانكاری ئێرانیش وتی " ئەمریكا نەیتوانی متمانەی شاندی ئێران لەم خولەی دانوستانەدا بەدەست بهێنێت"، بەڕونی سەرۆكی هەردوو وەفدی دانوستانكار (ئەمریكا - ئێران) شكستهێنانی دانوستانەكانیان راگەیاند:
لەگەڵ ئەوەی ئاگربەست بۆ دوو هەفتەیە، بەڵام دوای شكستهێنانی گفتوگۆكان روون نیە بارودۆخەكە بە چی ئاراستەیەكدا دەڕوات، دەستپێكردنەوەی جەنگ یان بەردەوامی ئاگربەست؟ یاخود كۆتاییهێنان بە جەنگ بەبێ رێككەوتن؟
ڕۆژنامەی تێلیگراف، بە لەبەرچاوگرتنی ئاڵۆزیی بارودۆخەکەو شكستهێنانی دانوستانەكانی نێوان وەفدی ئەمریكا و ئێران، سێ سیناریۆی سەرەكی خستووەڕوو بۆ ئەوەی لە داهاتوودا چی ڕوودەدات:
یەکەم: دەستپێکردنەوەی دانوستانەکان لەژێر فشاردا
کشانەوەی شاندی ئەمریکا لەوانەیە هەنگاوێکی تاکتیکی بێت بۆ ناچارکردنی ئێران تا سازشی زیاتر بکات، بەڵام ئەم ڕێگەیە ڕەنگە ببێتە هۆی قەیرانێكی درێژخایەن و بەردەوامبوونی ئەو بنبەستەی ئێستا.
دووەم: گەڕانەوە بۆ پەرەسەندنی سەربازی
ئەم سیناریۆیە ئەگەری دەستپێکردنەوەی جەنگ بە تەواوی یان ئەنجامدانی ئۆپەراسیۆنی سنووردار دەگرێتەوە، بەتایبەتی لە گەرووی هورمز. مەترسییەکانی ئەم بژاردەیە لەوەدایە کە دەبێتە هۆی پەکخستنی بازاڕەکانی وزەی جیهانی و بەرزبوونەوەی ڕێژەی هەڵاوسان، جگە لە زیادبوونی فشارە سیاسییە ناوخۆییەکان لەسەر ئیدارەی ئەمریکا.
سێیەم: کۆتاییهێنان بە جەنگ بەبێ ڕێککەوتن
ئەگەری هەیە سەرۆکی ئەمریکا بڕیار بدات کۆتایی بە ئۆپەراسیۆنە سەربازییەکان بهێنێت، بەبێ گەیشتن بە ڕێککەوتنێکی فەرمی. بەڵام ئەم بژاردەیە ڕەنگە وەک شكست و پاشەکشەی ئەمریکا لێکبدرێتەوە و کێشە بنەڕەتییەکان بە هەڵواسراوی بهێڵێتەوە، کە گرنگترینیان دۆسیەی ئەتۆمییە.
