واز لە موزایدە بهێنن بەرپرسیاریەتی هەڵبگرن!

2021-07-02 19:09:26

دییە عەلی

کۆبونەوەی ۲۸ و ۲۹ـ٦ـ۲٠۲۱ پەرلەمانی کوردستان کۆبونەوەیەکی جیاوازبوو لە هەموو کۆبونەوەکانی پێشتر، بۆ یەکەمجار بوو پارتی دیموکراتی کوردستان هێرشێکی توند بکاتە سەر بەرپرسانی حوکمەت، بەڕادەیەک کە هەریەک لە وەزیری دارایی و وەزیری سامانە سروشتیەکان و وەزیری هەرێم بۆ کار و باری دانوستان پرسیار باران بکرێن وەک ئەوەی ئۆپۆزسیۆن بن ئەمەش وایکرد کە پەرلەمان شێوەیەکی جیاواز وەربگرێت لەوەی پێشتر کە هەبوو.

دەبوو لایەنەکانی حکومەت بەتایبەتی یەکێتی و گۆڕان پێشتر ئاگاداری ئەوە بونایە یان لەوە تێبگەیشتنایە کە پارتی دیموکراتی کورستان زۆرینەی پەرلەمان و حکومەتی بەدەستە، ئەگەر شتێک پارتی نەیەوێت هیچ لایەنێک ناتوانێت تێی پەڕێنێت وە هەرشتێکیش پارتی بیەوێت بە ئاسانی تێیدەپەڕێت، بۆیە واباشتربوو یەکێتی و گۆڕان دانوستانیان لەگەڵ پارتی بکردایە و بیانزانیایە چۆن مامەڵە لەگەڵ ئەم هێزەدا دەکەن کە هێزی یەکەمی کوردستانە،چونکە لە ماوەی ڕابردوودا هەریەکە لە یەکێتی و گۆڕان درێخیان نەکردوە لە ئیستیفزازکردنی حکومەتی هەرێم بەگشتی و بە تایبەت وەزیرەکانی پارتی دیموکراتی کوردستان بەدیاریکراوی مەلەفی نەوت چیان لەدەست هاتبێت دژی ئەم مەلەفە کردویانە، بئ ئاگا لەوەی کە پارتی زۆرینەیە و ئەگەر پارتی کێبرکێیان بکات بێگومان هەردوو لایەنی یەکێتی و گۆڕان بە دۆڕاوی دەردەچن، چونکە ئەمە مەسەلەی دیموکراسیە و زۆرینە و کەمینە حوکم ئەکات لە هەرێمی کوردستان وە دیموکراسی لە کوردستان وەک ڕۆژهەڵاتی ناوەڕاست دیموکراسی زۆرینەو کەمینەیە نەک دیموکراسیەک بێت بەپێی کەلتوری دیموکراسی و یەکتر قەبوڵکردنی تەواوەتی هێزەکان.
پارتی کە زۆرینەی پەرلەمانی هەیە و هێزی یەکەمە هەمیشە ئاراستەکان ڕوو لەون و ئەو بڕیاری سەرەتا و کۆتای دەدات.

هەرچەندە پەرلەمانی کوردستان بەشێوەیەکی گشتی لای هاونیشتیمانیان بوەتە شوێنی موزایدەکردنی کۆمەڵێک خەڵک و کەمترین بەدواداچونیانکردوە وەک ئەوەی کە ڕێواس فایەق سەرۆکی پەرلەمانی کوردستان بە دروستی بە پەرلەمانتارانی وت ئەو ئامارانەی کە لە بەردەستیاندایە زیاتر لە هەزار پرۆژەی حوکمەت ۲٦ پرۆژە بە دواداچونی بۆ کراوە کە لە کاتێکدا ئەمە ئەرکی سەرەکی پەرلەمانتارە کە بەدواداچونی جدی بۆ پرۆژەکانی حوکمەت بکات وە چاودێری وردی حوکمەت بکات بە داتا و زانیاری قسە بکات نەک هەر بە وتی وتی و قسە فڕێدان، چونکە ئەمانە دوا جار شتێک بۆ هاونیشتیمانیان ئیزافە ناکەن.

ئۆپۆزسیۆن هەرچی بکات یان هەرچۆن ڕەخنە بگرێت ڕەنگە کارێکی ئاسایی بێت چونکە ئەو لە ئێستادا هیچ شتێکی بەدەستەوە نیە ڕەخنە نەبێت وە ناکرێت ئۆپۆزسیۆن لۆمەبکرێت لەسەر ڕەخنەکانی وە ناشبێت ئۆپۆزسیۆن تەنها قسە بکات، بەڵکو پێویست بوو لە دانیشتنی ۲۸ و ۲۹ مانگی ڕابردوو ئۆپۆزسیۆن بەدواداچونی جدی هەبوایە تاوەکو بەڵگەی پێویست و ڕاست و دروستی بخستایەتە ڕوو، بەڵام ئەوەی گوێمان لێبوو هەموو قسە سواو و دووبارەکانن کە ڕۆژانە دووبارە و دەبارەی دەکەنەوە بۆیە نەیانتوانی شتێکی گەورە زیاد بکەن لە دانیشتنەکە و ئەو هەلە بقۆزنەوە کە چۆن ڕوو بە ڕووی حوکمەت ببنەوە، بە پێچەوانەوە حوکمەت زۆر سەرکەوتوانەتر و ڕاشکاوانەتر وەڵامی دانەوە توانی بە باشی گرەوەکە بباتەوە.
هەرچەندە گومان لەوەدانیە ئۆپۆزسیۆن لەم خولەدا زۆر دەست و پێ سپین و بەجۆرێک کە هیچ کەسێک ناتوانێت ئیعتیمادیان لەسەر دروست بکات، چونکە پەرتەوازەیی ئۆپۆزسیۆن و نەبوونی گوتارێکی ڕون وە نەبوونی ئیرادەیەکی بەهێز و ناکارایی کادیرەکانیان بوە بە کۆسپێکی گەورە لەبەردەم پرۆژەی ئۆپۆزسیۆندا بۆئەوەی بتوانن هەم ببنە بەدیلی دەسەڵات هەم بتوانن ڕووبەڕووی دەسەڵات ببنەوە بیانەوێت دۆخی کوردستان بگۆڕن بە ئاراستەیەک لە سود و قازانجی هاوڵاتیان بێت.

،کاتێک سەیری ئۆپۆزسیۆن دەکەیت گوتارەکانیان دەبینیت هەست بەوەدەکەیت کە ئەم ئۆپۆزسیۆنە چەندە داما و دەست و پێسپیە زەحمەتە بتوانێت هیچ شتێک زیادبکات بۆ هاونیشتیمانیان، دواجار دەگەینە ئاستێک کە خەڵکی هیچ متمانەیەکیان بە ئۆپۆزسیۆن نامێنێت.

هەرچەندە دانیشتنەکەی پەرلەمان زیاتر لە چواردە کاتژمێری خایاند و ۹۷ پەرلەمانتار قسەی خۆیانکرد کە ماوەیەکی زۆر زۆر بوو بەڵام و زۆرێک لە قسەکان دووبارە بوون و وە جوینەوەی هەمان قسەی هاوڕێکانی پێش خۆیان بوو وە زۆربەشیان بەبێ بەدواداچونێکی ورد و بەبێ هیچ داتا و زانیاریەک وەهەندێجار بڵاوکردنەوەی هەندێک داتا و زانیاری ئێجگار هەڵە لەکاتێکدا ئێمە لە زاری وەزیرەکانەوە گوێمان لێی بوو کەچۆن هەڵەکانیان بۆ ڕاست ئەکردنەوە بۆمان دەرکەوت کە ئەو پەرلەمانتارانە چەندە دەست و پێ سپین لە ئاستی پیشەکەی خۆیاندا، هەروەها نەیانتوانیوە مامەڵەیەکی دروست لەگەڵ پیشەکەی خۆیاندا بکەن و بەجدی نوێنەرایەتی خەڵکی هەرێمی کوردستان
.بکەن

گرنگە هەرسێ لایەنی پارتی دیموکراتی کوردستان و یەکێتی نیشتیمانی کوردستان و بزوتنەوەی گۆڕان، بەرپرسیاریەتی هەڵبگرن، چونکە هاونیشتیمانیان چاویان لە ئایندەیەکی باشترە لانی کەم چاویان لەوەیە کە چۆن لێبڕینی موچە کۆتای بێت و هەموو مانگێک مووچە کانیان لەکاتی خۆیدا وەربگرن و پرۆژەکان پەرەپێدەدەن وە بەردەوام بن، هەروەها چاویان لەوەیە هەلی کار بڕەخسێت بۆ گەنجانی بێکار و ئەو ژمارە زۆرەی دەرچوانی زانکۆ و پەیمانگاکان.
گرنگە ئەم سێ لایەنە بچنە پای بەرپرسیاریەتی و واز لە موزایدە بهێنن و هاونیشتمانیان ئەم سێ لایەنە بە خاوەنی سەرەکی حوکمەت دەزانن هەر کەم و کوڕیەک و هەر ئیشکالێک هەبێت لە ئەستۆی ئەم سێلایەنەیە ئەوانیش بەپێی قەبارە و جیاوازی و بەرپرسیاریەتییان، بەڵام هیچ لایەکیان بێ بەری نین لەوەی کە لەحکومەتدا ڕوودەدا، بۆیە واباشترە لەبری موزایەدە خۆیان کۆبکەنەوە بۆ کار و بەرنامەی جدی و خزمەتی هاوڵاتیان.