کۆنفرانسی نیشتمانی بۆ هەڵبژاردن و ئاشتی کۆمەڵایەتی.

2021-05-16 16:55:15

سەرکەوتی جیهاز و بەختیار شارەزوری
عێراق و هەرێمی کوردستان لەبەردەم هەڵبژاردنێکی گرنگدان ، سەرەڕای ئەوەی کورد دەبێت ناکۆکیەکانیان و ململانێکانیان تەواو هێواش و نەرم بکەنەوە دەبێت بە یەک هەڵوێستی کار بۆ پێگەی کورد بکرێت تا قورسایی زیاتری هەبێت لە ناوەنددا ، چونکە بەریەککەوتنی وڵاتانی ناوچە و جیهان لە ناوەنددا دەبێت و بەشێکی گرنگی مافەکانی کورد لە بەغدادا دەبێت ، واتا دەبێت لە هەرێمەوە کۆنتڕۆڵی ئاشتی و پێکەوە ژیانی خەڵکی عێراق بکرێت تا مافەکانی کورد زیاتر بە پێی دەستور بەهێزتر بێ .
لە هەرێمیش ئەوە دەزانین کە بەردەوام هەرێم کەوتوەتە سەر هێڵێکی سیاسی پڕ جوڵەوە ئەمەش پێویستی بە ئاشتی کۆمەڵایەتی قوڵ هەیە تا بتوانرێت مانەوەی خۆی بەهێز تر بکات.
ئەم هەڵبژاردنە دەبێت خەتی سور دابنرێت لە نێوان لیست و کاندید و حیزبەکاندا و نەهێڵرێت کەس ئەم خەتە سورە ببڕێت ،با ململانێ هەبێ و کاری ڕیکلام هەبێ بەڵام نەک لەسەر ئەژماری تێکدانی ئاشتی کۆمەڵایەتی بەڵکو لەسەر کاری باشتر و پتەوکردنی پەیوەندی کۆمەڵایەتی و بەهێز کردنی ئاشتی کۆمەڵایەتی.
پارتەکانی هەرێم لە ئێستادا لە هەمو کات زیاتر بەرپرسیاریەتیان لە ئەستۆدایە ، دەکرێ بڵێین بۆچی ..؟؟؟
ئەگەر چی هەرێم لە ئێستادا کەوتوەتە سەر هێڵی بەرژەوەندی وڵاتە زل هێزەکان و وڵاتانی زلهێزیش ئەوە دەزانن کە هەرێم بوەتە دو زۆن و کۆنتڕۆڵیان لە ئەنقەرە و تارانە ، بەڵام سەرەڕای گڵۆپی سەوزی ناچاری وڵاتە زلهێزەکان ، هێشتا هەرێم بە ناوەندێکی جیپۆلەتیکی گرنگ دەزانن و لە ڕوی ئابوریەوە پێگەیەکی گرنگی جیهانیە و لە ڕوی سیاسیەوە بە ناوەندی ئاشتی گرنگی عێراقی دەزانن ، سەرەڕای ئەمە تا ئێستا هەرێم وەک بەشێکی فیدڕاڵی عێراق دەزانن ، هەربۆیە لەسەر نەخشەی دابەشکاری دەستەڵاتەکانی ناوەنددا ، کورد سەرۆکی کۆماری بەرکەوتوە و شیعە سەرۆکی حکومەت و سونە سەرۆکی پەرلەمان ، کە ئەمانە نیشانەی کۆبەرژەوەندی وڵاتانی ناوچە و جیهانە .
کورد لە عێراق گەر بیەوێ سەقامگیری قوڵتر بونیاد بنێ دەبێ لە ڕێگەی ئاشتی کۆمەڵایەتی و ئابوری سەربەخۆی کۆمەڵایەتی کار لەسەر دو هێڵی گرنگ بکات :
١-پێگەی بەهێزی گشتگیر لە ناونددا.
٢-کارکردن بۆ کۆتایی هێنان بە پاشکۆیەتی.
هەردو خاڵەکە بە بەکارهێنانی کارتە بەهێزەکانی دەبێت لەسەر ئاستی سیاسی و مێژویی و ئابوری و جوگرافی و دبلۆماسی و سەربازی ، هەمو ئەمانەش شەمەندەفەرێکن لەسەر سکەی ئاشتی کۆمەڵایەتی دەڕوا ، هەربۆیە لە ئێستادا لەبەردەم هەڵبژاردنەکانداین و ئەگەر چی وەک پێویستی بەهێزبونی هەرێم ئاشتی کۆمەڵایەتی نیە ، بەڵام کار بکرێت بۆ بونیادنانی ئاشتی قوڵی کۆمەڵایەتی بەم شێوەیە:
١-پێش هەڵبژاردن هەمو کاندید و حیزبەکان بە یار و نەیارەوە کۆنفرانسێکی نیشتمانی ببەسترێ هێڵەکانی ململانێی هەڵبژاردن دیاری بکرێ و ڕای گشتی بکەن بە چاودێر بەسەر خۆیانەوە.
٢-هێزەکانی سەربازی بە پێی بەڵێنێکی شەرەفی نیشتمانی بۆ بە دامەزراوی کردن و بە نیشتمانی بون چالاکتر بکرێ لەوەی کە هەیە.
٣-چاکسازی گشتی لە هەمو بوارەکاندا لەو کۆنفڕاسەدا بنوسرێ و کاری لەسەر بکرێ و ڕای گشتی بکەن بە دادوەر بەسەریەوە.
٤-هەر لەو کۆنفرانەسدا هێڵەکانی ئاسایشی نەتەوەیی و نیشتمانی دیاری بکرێت و کۆ واژۆی لەسەر بکرێ.
٥-هێڵەکانی ململانێی هەڵبژاردن دیاری بکرێت و لە ڕێی کۆمیسۆن و دادەوری و شارەوانیەکانەوە جۆری سزای سەرپێچی دیاری بکرێت.
٦-هەمو کاندیدەکان پەیمانی شەرەف بدەن بە کارکردن بۆ پێگەی هەرێم بە پێی دەستور.
ئەگەر کورد دوای ئەو هەمو هەڵەیەی کە یەک بە دوای یەکدا کرا پەندی وەرنەگرتبێ و ئاشتی کۆمەڵایەتی قوڵ بەرهەم نەهێنن دور نیە بچینەوە چوارگۆشەی یەکەم و دوبارە بڵێین :
تا شۆڕشێکی تر خواتان لەگەڵ.