ئێمە ئەنفالکراین، ئێوە چیتان کرد

2021-04-22 08:25:43

سەلیم كۆیی

(واز لە وتاری سەر شاشەکان بێنن و روفاتی کەس و کارمان بۆ بێنەوە)

سەرەتا بەپێویستی دەزانم تیشک بخەمە سەر ئەوەی تاکە شتێک هانی دابم لەسەر ئەم پرسە بنوسم ئەوەیە کەبەهۆکاری ئەوەی خۆم کەس وکاری ئەنفالم ولەنزیکەوە ئاگاداری دۆخەکە و ئازاریانم ئەگەرنا لەڕوانگەی سیاسی و خوێندنەوەی واقیعی دەسەڵاتی کوردی و حزبایەتی لەم هەرێمە هیچ ئومێدێکیان نەهێشتۆتەوە و بارودۆخەکە بەجۆرێک شپرزەو ئاڵۆزکراوە وەک دەڵێی لەوە خراپترە بەنوسین بخرێتەڕوو ! بەڵکو پڕۆسەی ئەنفال کراوە بەئامرازی دەستکەوت بۆ حزب و دەسەڵات.

ڕاستی ئەوەیە هەر لە سەرەتاوە دیار بوو خوێنی ئەنفال کراوان بە هەدەر چوو،ئەوە بێخەمی بەرپرسانی شۆڕش و کوردایەتی بوو پێش پڕۆسەی ئەنفال کوردستانیان کردە مەیدانی جەنگی عێراق و ئێران ، چەندجار! عێراق ئێرانی لە بەسرەو فاو دەردەکرد کەچی ئێوە لە کوردستان داخلتان دەکردەوە هێنایەوە، ئەوە جگە لە لێدانی کەرکوک و هێنانی سوپای پاسداران بۆ ناو هەڵەبجە و چەند شوێنێکی تریش وەک بڵێی پێشتر نەخشەی بۆ دانرابێ کە ناوچەکە ئاوای لێ بکرێ،مەگەر دەتانویست خەبات و کوردایەتی بە سوپای پاسدارانەوە بکەن، کوردستان و خەڵکی بەش مەینەتی دێهاتەکانیش بەردەوام لەژێر هێرش و هەڕەشەی شەڕی ناوخۆ و ژیانی کولەمەرگی ناو کونە تەیارە و خزمەت کردنی دوشۆرش دورلە هەموو خزمەت گوزاری یەک جێبهێڵن و لە کۆتایی دا و لە پاداشتی ئەو هەموو ناخۆشی یە سەرانی شۆڕشگێڕ و حیزبەکان تەنانەت ئامادە نەبون ئاگاداری یەک دێهاتیش بکەنەوە کەحزبی بەعس بەرنامەیەکی نەگریس و گەڵاوی لەم جۆرەی هەیە، لەکیمیابارانکردنی هەڵەبجە بیانوتان ئەوەبوو کەئاگاداری پێش وەختەتان نەبوە کیمیاباران دەکرێت، ئەی بۆ ئەنفال چی دەڵێن؟! ئەنفال هەشت قۆناغ بوو لەماوەی شەش مانگ دا ئەنجام درا بۆ ئامادە نەبون یەك دێ یا ناوچەیەك ئاگادار بکەنەوە؟!

ئێستا چی لە تاجەگوڵینەی درۆینە بکەین کە ئەوەش لە سەر قوتوت و موچەی بڕاوی ئەو خەڵکە یە! یادی سی و سێ ساڵ چی دەگەیەنێت کە تاکو ئێستا روفاتەکان هەر لە بیابانەکان و ناوەڕاستی عێراقن ، کەس وکاری ئەنفال چاوەڕوانی کامە ژیانی شایستە بێ کەنیە ،ئاخر زۆربەی زۆری کەس و کاری ئەنفالکراوان لە حەسرەتی چاوەڕوانی دا کۆچی دواییان کرد ،سی ساڵ بەس نی یە کە نەتان توانی ئەو خەڵکە لەژیانی کولە مەرگی رزگار بکەن.

ئاهی مزلومیەتی ئەنفال کراوان سەران و بکەری ئەو تاوانە گەورەیە بوو کە تەخت و تاراجی لە حیزبی بەعس تێکداو و بەهیچ شتێکی خۆیان رانەگەیشتن بۆیە تا ماون دەبێت بەو دەردەوە بناڵێنن، ئێوەی دەسەڵاتی ئەمڕۆی کوردی واز لە وتاری سەر شاشەکان بێنن و روفاتی کەس و کارمان بۆ بێنەوە تا ئێمەش بە حەسرەتی ئەوانەوە سەرنەنێینەوە لەژیانی شایستەی ئێمە گەڕێن کە نایبینین ژیانی شایستە بۆخۆتان.

سڵاو لەڕوحی سی وسێ سالەی ئەنفالکراوان بێت چاوەڕوانی تەرمی پیرۆزتانین.