بۆ لامەرکەزیەت بۆ سلێمانی پێویستە؟

2021-02-23 15:37:02

ئاسۆ حاجی

ئەو پرسیارە یەک وەڵامی هەیە کە زیاتر کار ئاسانیە بۆ دانیشتوانی ئەو پارێزگایە و پارێزگاکانی دیکە،بەڵام دوو مەبەستی جیاواز لە پشت ئەو وەڵامە هەیە:

مەبەستی یەکەم خۆی لە دەسەڵاتی حیزبی و بنەماڵەیی سیاسی ئەو دەڤەرە دەبینێتەوە کە لە رێگای یەکێتی نیشتیمانی کوردستان دەستیان بەسەر داگرتووە و ئێستا ترسیان لەوە هەیە کە کابینەی نۆیەم و شەخسی سەرۆکی حکومەت چیتر ئەوەی ساڵانی رابردوو بۆیان دەچووە سەر قبوڵی نەکات، ئەوەش لە رێگەی جێبەجێکردنی یاسای چاکسازی و گەڕانەوەی هەموو داهاتی نەوتی و نا نەوتی بۆ گەنجینەی دەوڵەت بەوەش ئەوان خۆیان بە زەرەرمەند دەبینن و نایانەوێ ئەو پارە مفتەی لە ساڵانی رابردوو لەسەر حیسابی خەڵکی سلێمانی و لە بڕە بەشی شارەکە کە سەتا چل و سێی بودجەی هەرێمی کوردستان بووە و نیوەی بە هەموو خەڵکی سنووری پارێزگای سلێمانی و هەلەبجە و ئیدارە سەربەخۆکانی بووە و نیوەشی بۆ گیرفانی ماڵباتی هاوسەرۆکەکانی یەکێتی بووە. بۆیە ئەوان کە باسی لامەرکەزیەت و بە هەرێم کردنی سلێمانی و یان رادەستکردنەوەی بە بەغدا دەکەن مەبەستیان پاراستنی ئەو سەتا پەنجایەیە کە دەچێتە گیرفانیان، نەک لەبەر بەرژەوەندی خەڵک کە قسەیەکی ئەوەندە سواوە خەڵک بێزی لێ دەبێتەوە.

مەبەستی دووەم ئەوەیە کە رێگری بکەن لە بەهێزبوونەوەی قەوارەی دەستوری هەرێمی کوردستان چونکە ئەوەیان بە زیانی بەغدای دادەنێن و ئێران نایەوێ هەولێرێکی بەهێز ببینێتەوە، بەڵکو ئەو پلانی هەیە کە قەوارەی دەستوری هەرێمی کوردستان ئەگەر هەڵیشنەوەشێتەوە ئەوە بە رادەیەک لاوازی بکات و بە دەردی حکومەتەکەی کازمی ببات کە نەتوانێ لە تەنازول و داوای لێبوردن لە حەشدی شەعبی شتێکی تر بکات. لێرەشدا سەرانی یەکێتی ئامادەیان هەیە و ئەوان بەشێکن لە داڕشتنی پیلانەکە و جێبەجێکردنی بە هەمان ئامانج و نەفسیەتی شازدەی ئۆکتۆبەری ساڵی 2017 بەو ئامانجەی ئەوان جێگرەوەی حکومەتی هەرێمی کوردستان بن و ئەزموونی سلێمانی بەسەر هەموو هەرێمی کوردستان جێبەجێ بکەن کە ئەوان وەک حاکمی عەسکەری مامەڵە بکەن، بۆ ئەوان گرنگ نیە سەر بە حەشد دەبن یان راستەوخۆ سەر بە سوپای پاسداران. گرنگ ئەوەیە پارە موفتەکە بگاتە دەستیان و ئیمپڕاتۆریەتە میدیایەکەیان لە دژی نەتەوە و نیشتمانیان کاربکەن.

هەردوو مەبەستەکە یەک ئامانجی هەیە مانەوەی دەسەڵات و بەڕێوەبردنی سلێمانی بە حوکمێکی عەسکەری و گرەنتی کردنی ئەو سەتان ملیۆن دۆلارەی لە داهتی گشتیەوە بۆ داهاتی کەسی هاوسەرۆکانی یەکێتی و بنەماڵەکانیان دەگوازرێتەوە.