(درەو):
نزیكەی هەزارو 500 تانكەر لە سنوری سلێمانی كاری گواستنەوەی نەوت و بەرهەمە نەوتییەكان دەكەن بۆ ئێران، ئەمانە ئەمڕۆ رێگەی تانجەرۆیان گرت، نیگەرانن لەوەی خاوەن تانكەرە ئێرانییەكان بە نرخێكی كەمتر نەوت دەگوازنەوەو بەهۆیەوە ئەمان بێكار بوون.
لە ناوچەی پیشەسازیی تانجەرۆ، ژمارەیەك لە شۆفێری تانكەرەكان چونەتە سەر رێگای سەرەكی بۆ دەربڕینی ناڕەزایەتیی، ئەمجار هەر خۆیان نەهاتوون، تانكەرەكانیشیان هێناوە.
وەكو خۆیان باسی دەكەن، نزیكەی (هەزارو 500 شۆفێر) دەبن، كە نەوت و بەرهەمە نەوتییەكان دەگوازنەوە بۆ ئێران، باجی رێگاو ژینگەو سەرپێچی كامێرا دەدەن، بەڵام باریان پێنادرێت و ئامادە نین بەو نرخە بارە نەوتەكان بگوازنەوە كە خاوەن تانكەرە ئێڕانییەكان دەیكەن.
لەبەر ئەوەی شۆفێری تانكەرە ئێرانییەكان بە 10 دۆلار كەمتر باردەكەن، بارمان بە ئێمە نادەن
یەكێكی تر لە شۆفێرەكان دەڵێ: ئێمە كە باری نەوت و بەرهەمە نەوتییەكان دەبەین، لە مەرزی باشماخ و  لە دیوی ئێران (500 دۆلارمان) لێ وەردەگیرێت، با چارەسەری ئەم خەرجییەمان بۆ بكەن، گروپێك لە تانجەرۆ بە ناوی "ناقل"و "مەندوب"ەوە دروستبوون بە خاوەن بارەكان دەڵێن بارەكانتان بە تانكەری ئێرانی بار بكەن كرێی كەمتر دەكەوێت، راستە كرێی ئۆتۆمبیلە ئێرانییەكان كەمترە چونكە ئەوان لە باشماخ پارە نادەن.
خاوەن تانكەرەكان ئێستا رێگە سەرەكییەكەیان گرتووەو دەڵێن رێگە بە رۆیشتنی هیچ تانكەرێك نادەن ئەگەر كێشەكەیان بۆ چارەسەر نەكرێت.
ئەوەی لەم ناوچەیەوە دەگوازرێتەوە بۆ ئێران بریتییە لە (نەفتا، نەوتی خاو، گازو قیری رەش).
لەدوای راوەستانی هەناردەی نەوتی هەرێمی كوردستان بە بۆریی بۆ بەندەری جەیهانی توركیا لە 25ی ئازاری 2023وە، پرۆسەی هەناردەكردنی نەوت و بەروبومە نەوتییەكان لە كوردستان بە تانكەر دەستی پێكردەوە.
بەشی زۆری ئەو نەوتەی كە بە تانكەر دەگوازرێتەوە، پشكی كۆمپانیا بیانییەكانی كەرتی نەوتی هەرێمی كوردستانە، ئەمانە گرێبەستەكانیان لە جۆری (هاوبەشیكردنە لە بەرهەم)دا، بۆیە پشكی خۆیان هەیە لە كێڵگە نەوتییەكان و بەهۆی ئەوەی هەناردە بە بۆریی راوەستاوە، بەتانكەر هەناردەی دەكەن، هەر بەرمیلێك نەوت بە بڕی (31.3 دۆلار) دەفرۆشن، ئەمە بەپێی قسەی وەزیری دارایی.