▪حەسەن بێگەڵاسی
سەرەتا ویستم ڕەشکردنەوەی پەڕە سپیەکان بەقەڵەمی ڕێبوار کەریم وەلی بەگرینگ نەگرم و وەڵامی قسە هەڵبەستراوەکانی نەدەمەوە، بەڵام ویژدان ڕێگای پێنەدام وابکەم، لەراستیدا هەر کەس ئازادە چۆن دەنوسێ و چۆن لێکدانەوە بۆ جوڵە بەردەوامەکانی سەرۆک بافڵ بکات لەگەڵ کەسی یەکەمی حزبەکان و لەگەڵ بەرپرسە باڵاکانی حکومەتی عێراق و نوێنەری ووڵاتان، بەڵکو ئەو خاڵەی بەلای منەوە گرینگە بریتییەلە هەڵوێستە کردن لەسەر ئەو راستیانەی دەبێ لەکاتی خۆیدا بگوترێن. 

 ▪کاتێک نووسینەکەی ڕێبوار کەریمم خوێندەوە، ئەوکات بۆم دەرکەوت ئەو پیاوە بەناو ڕۆژنامەنووسە بەدەست چ بوغزو هەژارییەکی فکری و ئاڵۆزی دەرونی دەناڵێنێت و دەیەوێت کۆمەڵگەش لەم جۆرە تایبەتمەندیەیڤخۆی بێبەش نەکات.

▪ئەم جۆرە نوسینەی ڕێبوارو مامۆستا و هاوڕێکانی دەرخەری ئەو حەقیقەتەیە کەچەندە تەنگەتاو و هەناسە سوارن بەجووڵەو هەنگاوەکانی سەرۆک بافڵ، بێگومان هەرئەوەشە وایکردووە ڕێبوار کەریم هەر جارەو بەئاوازو تۆنێکی جیاواز و ماکیاج کراو ئاواز دابنێ، کورد گوتەنی خۆشی نازانێ چی بڵێت و چی بنوسێت و چۆن ڕووی خۆی سپی بکاتەوە لەبەردەم شەقام، چونکە ئەو جۆرە لەنووسین و لێدوان و قسەکردنە ڕۆژ بەڕۆژ زیاتر ڕێبوار کەریم و مامۆستاکانی ڕێبواریش بچوکتر و ناشیرین تر دەکەن لەبەردەم حزبەکەی و هەمدیسان کۆمەڵگەی کوردی، چونکە قسەکانی جگە لەبوختان و ووشە ریزکردن و پینەو پەڕۆکردن نەبێ هیچی ترنین.  

▪ڕێبوار کەریم لەسەرەتاوە  تاهەنوکە بەردەوامە لە سیاسەتی خەڵەتاندن و چەواشەکردنی مامۆستاکانی، دڵنیام لەوەی مامۆستاکانی ڕێبوار لەخۆی کەم ئەزموون ترن، ئەگەر نا باش دەزانن قسەکانی ناوبراو بێمانان، چونکە مێژوو گەواهیدەری ئەو ڕاستییەیە کە ڕۆڵ و پێگەی سەرۆک بافڵ و یەکێتی نیشتیمانی کوردستان چ  لەڕووی نێودەوڵەتی چ لەئاستی ناوخۆو چی لەسەر ئاستی هەرچوار پارچەی کوردستان چەندە گەورەو گرنگ و زەروورە بۆ  ڕۆژهەڵاتی ناوەڕاست.   

▪یەکێکی تر لەو خاڵانەی کە ڕێبوار کەریم دەیەوێت بەردەوامی پێبدات بریتییە لەبەرگری کردنی لەدەستکەوتە خودیەکان و پاراستنی بەرژەوەندیەکانی کەسیەکانی، ئەمەش بەبڵاوکردنەوەی وتارە بوختان ئاسا و درۆ میکیاجکراو و ڕیزکردنی قسە لوس و بریقەدارەکانیەتی بۆ مشغوڵکردنی هاوڵاتیان، ئەگەر نا دیدارو سەردانە بەردەوامەکانی سەرۆک بافڵ چ لەگەڵ بەرپرسانی باڵای عێراق و چ لەگەڵ نوێنەرو نێردەی وڵاتان و چ لەگەڵ کەسی یەکەمی حزبە کوردستانیەکان و چی لەگەڵ چین و توێژە جیاوازەکانی کۆمەڵگەی کوردی، لە ماڵە گەورەکەی مام لەدەباشان و دوکان وێنەیەکی گەورەی لای کۆمەڵانی خەڵکی کوردستان و شەقامی عێراقی دروستکردوە.   

▪ئەگەر ڕێبوار کەریم پێی وابێت بەڕەشکرنەوەی پەڕە سپیەکان بەبوختان و قسەی عەفەویانە لەپێگەی یەکێتی و سەرۆک بافڵ کەم دەکاتەوە، ئەوە ئەوکات توشی هستریا بووە و دەبێ ئەو خەونە لەمێژینەی بەرامبەر دوانەی یەکێتی و سەرۆک بافڵ لەگەڵ خۆیی و مامۆستاکانی بباتە ژێر گڵ، چونکە وەک هەموان دەزانن ڕێبوار کەریم بەدرێژایی مێژوو چ ئەوکاتەی لەمیدیایەکی حزبی کەبەپارەی خەڵک کار دەکات، وەچ ئەو کاتانەی لەئەوروپاوە لەژێر ناوی دەمامکی بێلایەنی سیاسیەوە درێژە بەئەجینداکەی دەدات و نوسینەکانی جگە لەشەر فرۆشتن نەبێ بەرامبەر یەکێتی و سەرۆک بافڵ هیچی تر نین، بێگومان خەونیش هەر خەونەو هیچ کاتێک نەبووە بەواقیع.  

▪ڕێبوار کەریم و مامۆستاکانی لەو سۆنگەوە توشی شۆک بوون کاتێک دەبینن سەردان و دیدارە بەردەوامەکانی سەرۆک بافڵ و  پێشکەوتن و گۆڕانکاریەکانی ناو یەکێتی نیشتیمانی کوردستان هیچ کات لەئاستی چاوەروانی پارتی نەبوون، هەربۆیە ئێستا ئەم حزبە وەک دەبینین تووشی شۆک بووە، چونکە سیاسەتی عەقڵانی سەرۆک بافڵ واخەریکە ستۆپ بەعەقڵیەتی پاوانخوازی و سیاسەتی گەمارۆدانان و هەڵاواردن و جیاوازیکردن لەنێوان شارێک بۆ شارێکی تری کوردستان دەکات.