هەواڵ
ڕاپۆرت
دۆسیەیی نەوت
دەستپێکردنەوەی بەرهەمهێنان لە کوردستان داهاتی DNOی بەرزکردەوە بۆ ئاستێکی پێوانەیی؛ لە چارەکی سێیەمدا بەرهەمی نەوت لە هەرێم گەیشتە (54 هەزار و914 ) بەرمیل لە ڕۆژێکدا. قازانجی DNO بە رێژەی 46% هەڵکشا و گەیشتە 641.1 ملیۆن دۆلار
بڵاوکراوەتەوە لە : 29 تشرینی یەکەم 2026
قەبارەی دەقەکان
قەبارەی دەقەکان
🔻 کۆمپانیای دی ئێن ئۆ ڕایگەیاند؛
🔹 دەستپێکردنەوەی بەرهەمهێنان لە کوردستان داهاتی DNOی بەرزکردەوە بۆ ئاستێکی پێوانەیی؛ لە چارەکی سێیەمدا بەرهەمی نەوت لە هەرێم گەیشتە (54 هەزار و914 ) بەرمیل لە ڕۆژێکدا.
🔹 بەرزترین نرخی فرۆشتنی نەوت لە کوردستان لە ساڵی 2023ـەوە؛ DNO بۆ هەر بەرمیلێک 38.5 دۆلاری وەرگرت و لەم مانگەشدا نرخەکە بۆ 45 دۆلار بەرزبووەوە.
🔹 پەرەپێدانی کێڵگە نەوتییەکانی کوردستان خێرا دەبێت؛ DNO پلانی دووەمی خستەکار و پلانی هەیە لە 2027ـدا چالاکییەکانی هەڵکەندن زیاتربکات.
🔹 قازانجی کارپێکردنی کۆمپانیای DNO بە رێژەی 46% هەڵکشا و گەیشتە 641.1 ملیۆن دۆلار، کە ژمارەیەکی پێوانەییە لە مێژووی 55 ساڵەی کۆمپانیاکەدا.
🔹 بازدانێکی گەورە لە کۆی بەرهەمی کۆمپانیادا؛ ئاستی بەرهەمهێنانی گشتی گەیشتە (142 هەزار و 768) بەرمیل لە ڕۆژێکدا و داهاتی کۆمپانیاکەش ڕیکۆردی گەورەی تۆمارکرد.
دەقی ڕاگەیەندراوەکەی دی ئێن ئۆ
ئەمڕۆ، 29ی تشرینی یەکەمی 2026 – کۆمپانیای نەوت و غازی نەرویجی "DNO ASA"، ئەمڕۆ ئەنجامە دارایی و ئۆپەراسیۆنییە بەهێزەکانی بۆ چارەکی سێیەمی ساڵی 2026بڵاوکردەوە؛ کە هۆکارە سەرەکییەکانی دەگەڕێنەوە بۆ دەستپێکردنەوەی بەرهەمهێنان لە هەرێمی کوردستانی عێراق و بەرزبوونەوەی نرخەکان لە سەرجەم سەرچاوە و پڕۆژە نەوتییەکانی کۆمپانیاکەیە لە ناوچە جیاوازەکاندا.
کۆی بەرهەمی ڕووت (خاوێن) بە رێژەی 61% بەراورد بە چارەکی پێشوو بەرزبووەوە و گەیشتە (142 هەزار و 800) بەرمیل نەوتی هاوتا لە ڕۆژێکدا، کە پشکی دەریای باکوور (85 هەزار و 400) بەرمیل، هەرێمی کوردستان (54 هەزار و 900) بەرمیل و ئەفریقای ڕۆژئاواش (2 هەزار و 500) بەرمیل بووە.
داهاتی کۆمپانیاکە گەیشتە یەک ملیار دۆلار، کە ژمارەیەکی پێوانەییە لە مێژووی خۆیدا و بە رێژەی یەک لەسەر سێ (33٪) بەراورد بە چارەکی پێشوو زیادیکردووە. قازانجی کارپێکردن بە رێژەی (46٪) بەرزبووەوە و گەیشتە (641 ملیۆن) دۆلار (ئەمەش ژمارەیەکی پێوانەییە بۆ کۆمپانیایەکی 55 ساڵە)، لە کاتێکدا قازانجی پوختە بە رێژەی (21٪) بەرزبووەوە و گەیشتە (101 ملیۆن) دۆلار.
لە دەریای باکوور، نرخی فرۆشتن بە رێژەی (6٪) بەرزبووەوە و تێکڕا گەیشتە (106.7) دۆلار بۆ هەر بەرمیلێکی هاوتا. لە کوردستان، کۆمپانیای DNO بۆ هەر بەرمیلێک (38.5) دۆلاری وەرگرت، کە بەرزترین نرخی تۆمارکراوە لەوکاتەوەی فرۆشتنی خۆماڵی لە ساڵی (2023)ـەوە دەستی پێکردووە؛ سەرجەم شایستە داراییەکانیش پێش ئەنجامدانی ڕادەستکردن، ڕاستەوخۆ دەخرێنە سەر هەژمارە نێودەوڵەتییەکانی کۆمپانیاکە. نرخەکانی فرۆشتنی نەوت لە کوردستان لەم مانگەدا بەرزکرایەوە بۆ (45) دۆلار بۆ هەر بەرمیلێک، کە نزیکەی (50٪) بەراورد بە فرۆشتنەکانی سەرەتای ساڵی 2026 بەرزترە.
لەگەڵ کۆتاییهاتنی زۆربەی کارەکانی چاککردنەوە بۆ ساڵی 2026، DNO پێشبینی دەکات تێکڕای بەرهەمهێنانی دەریای باکوور بۆ کۆی ساڵەکە لە دەوروبەری (86 هەزار) بەرمیل لە ڕۆژێکدا بێت. لە باکووری عێراقیش، کۆمپانیاکە لە نیوەی ساڵدا بەرهەمهێنانی لە مۆڵەتی تاوکی (کە 75٪ی پشکەکانی بەڕێوەدەبات) دەستپێکردەوە، دوای ڕاگرتنێکی پێشوەختەی چوار مانگە بەهۆی پەرەسەندنی هێرشەکانی درۆن و مووشەک لە ناوەڕاستی ڕۆژهەڵاتدا. کۆی بەرهەمی بەڕێوەبراو لە چارەکی سێیەمدا گەیشتە (73 هەزار و 200) بەرمیل لە ڕۆژێکدا و پێشبینیش دەکرێت تێکڕای ساڵانە بگاتە (50 هەزار) بەرمیل.
کۆمپانیای DNO لەم سێیەکەیدا چالاکییەکانی پەرەپێدانی کاروباری بازرگانی بە ئاستێکی بەرز ڕاگرتووە؛ لەوانە فرۆشتنی پشکەکانی لە کۆتدیڤوار (کەناری عاج)، کە بەو هۆیەوە سوودی ساڵانەی (24٪) لەسەر سەرمایەگوازییەکەی دەستکەوت لەوکاتەوەی لە تشرینی یەکەمی 2022ـەوە چووەتە ئەو وڵاتە.
بیجان موسەڤەر ڕەحمانی، سەرۆکی جێبەجێکاری کۆمپانیاکە، وتی: «DNO هێشتا بە تەواوی جەخت لەسەر گەشەکردن دەکاتەوە، بەڵام تەنها ئەگەر ئامانجەکانی قازانج پێکبهێنێت». هەروەها وتیشی: «لە کارەکەماندا، نرخی نەوت و غاز گرنگترین هۆکاری سەرەکیی قازانجە، بەڵام تەنها هۆکار نییە. بێگومان نرخ لە دەسەڵاتی ئێمەدا نییە، بەڵام سەرکەوتن لە گەڕان و پشکنیندا لەژێر دەسەڵاتماندایە کە تێیدا پێشەنگین، هەروەها دیسپلینی دارایی کە بە توندترین شێوە پەیڕەوی دەکەین».
بە گشتی، لە ساڵی 2025ـەوە پێنج پڕۆژەی نوێی پەرەپێدانی کێڵگەکان لە کەناراوەکانی نەرویج خراونەتە کار، شەش پڕۆژەی تریش لە قۆناغی جێبەجێکردندان و شەش پڕۆژەی تریش نزیکدەبنەوە لە بڕیاردانی وەبەرهەمهینان، کە هەموویان پلانیان بۆ دانراوە پێش ساڵی 2030 بخرێنە گەڕ. DNO بەردەوامە لەسەر ئامانجەکەی بۆ گەیاندنی بەرهەمهێنانی دەریای باکوور بۆ (100 هەزار) بەرمیل لە ڕۆژێکدا تا ساڵی 2030.
لە کوردستانیش، چالاکییەکانی هەڵکەندن لە چارەکی سێیەمدا پەرەی سەند بەهۆی ناردنی ئامێرێکی دووەمی کۆمپانیای سێیەم بۆ بەشداریکردن لە بەرنامەی هەڵکەندنی هەشت بير کە کەمێک پێش کۆتایی ساڵی 2025 دەستپێکرابوو. کۆمپانیای DNO کە بە جیاوازی گەورەترین بەڕێوەبەری کێڵگەکانە لە کوردستان، پلانی هەیە لە ساڵی 2027ـدا چالاکییەکانی هەڵکەندن زیاتربکات و بیر لە گرێبەستکردن لەگەڵ ئامێرێکی تری گەورەی هەڵکەندن دەکاتەوە، ئەمەش سەرەڕای هەڵکەندن لە دەرەوەی سنووری ئێستای بەرهەمهێنان لە مۆڵەتەکەدا.
دەستەی بەڕێوەبەرایەتی ڕەزامەندی لەسەر دابەشکردنی قازانجی چارەکە ساڵانە داوە بە بڕی (0.375) نەرویجی NOK بۆ هەر پشکێک، کە لە تشرینی دووەمی 2026 دابەش دەکرێت، بەمەش هەمان ئاستی پێشووی پێنج چارەکی ڕابردوو دەپارێزێت.
ئامارە سەرەکییەکان
دەربارەی کۆمپانیا: کۆمپانیای DNO ASA کۆمپانیایەکی نەرویجییە بۆ نەوت و غاز کە لە دەریای باکوور و ڕۆژهەڵاتی ناوەڕاست کاردەکات. لە ساڵی 1971 دامەزراوە، کۆمپانیای DNO کۆنترین کۆمپانیای نەوتە لە نەرویج و یەکەم کۆمپانیا بوو کە لە ساڵی 1981 لە بۆرسەی ئۆسڵۆ پشکەکانی تۆمارکران. کۆمپانیاکە خاوەنی پشکە لە مۆڵەتەکانی گەڕان، پەرەپێدان و بەرهەمهێنان لە وشکانی و دەریا لە وڵاتانی نەرویج، هەرێمی کوردستانی عێراق، بەریتانیا و یەمەن.
