هەواڵ
هاوسەرۆکەکان پەنا بۆ دادگا دەبەن
بڵاوکراوەتەوە لە : 3 ئاب 2021
قەبارەی دەقەکان
قەبارەی دەقەکان
هەواڵ
بڵاوکراوەتەوە لە : 3 ئاب 2021
قەبارەی دەقەکان
قەبارەی دەقەکان
درەو:
لەسەر بنەمای چەند سكاڵایەك كە لەلایەن بافڵ تاڵەبانیەوە جوڵێنراوە بڕیارە دادگا فەرمانی دەستگیركردن بۆ لاهور شێخ جەنگی دەربكات، دوێنێش لاهور شێخ جەنگی سكاڵای لەسەر بافڵ تاڵەبانی تۆماركردوەو لە بەریتانیاش رەنج شێخ عەلی سكاڵاى لەسەر بافڵ تاڵەبانی تۆماركردووە.
دوای ئەوەی شكستیان هێنا لە رێی پەیڕەوی ناوخۆ و سەركردایەتی یەكێتییەوە كێشەكانی نێوانیان یەكلا بكەنەوە، هاوسەرۆكەكانی یەكێتی بڕیاریاندا پەنا بۆ دادگا ببەن.
ئەمڕۆ لاهور شێخ جەنگی لەڕێگەی پارێزەرەكانیەوە، بەمادەی (433)ی یاسای سزادانی عێراقی، سكاڵای لەسەر بافڵ تاڵەبانی تۆماركرد، سكاڵاكە تایبەتە بە "ناوزڕاندن"، لاهور شێخ جەنگی پێیوایە لەلایەن بافڵ تاڵەبانییەوە تەشهیری پێكراوەو ناوی زڕێندراوە.
سەرچاوەیەكی ئاگادار لەناو یەكێتی بە (درەو)ی راگەیاند، بڕیارە سبەینێ، لەسەر بنەمای سكاڵای چەند كەسێك كە لەرێگەی بافڵ تاڵەبانییەوە دادگا فەرمانی دەستگیركردن بۆ لاهور شێخ جەنگی دەربكات بە تۆمەتی "داڵدەدانی تۆمەتباران لە ماڵەكەی خۆیدا".
فەرمانی دەستگیركردنەكە بە پێی مادەی (273)ی لەیاسای سزادانی عێراقی دەردەچێت كە تایبەتە بەداڵدەدانی تۆمەتباران، حوكمی ئەم مادەیەیاساییە لە حاڵی ساغ بوونەوەی تۆمەتەكە لەسەر تۆمەتبار ماوەی (7) ساڵ زیندانی كردنەبەڵام هەر بەپێی یاسای سزادانی عێراقی ئەگەر كەسی داڵدەدراو برا یاخود هاوسەر یان ئەندامی پلەیەكی ئەو كەسە بێت كە حەشاری داوە تۆمەتەكە لەسەر كەسی داڵدەدەر پوچەڵ دەبێتەوە.
سەرچاوەیەك لە بەریتانیا بە (درەو)ی راگەیاند: رەنج شێخ عەلی خوشكەزای لاهور شێخ جەنگی، سكاڵای لەسەر بافڵ تاڵەبانی تۆماركردووە، بەتۆمەتی دەستگیركردن و ئەشكەنجەدان و بەزۆر ئیعتراف پێكردنی، ئەو سەرچاوەیەئاماژەی بەوەشكرد، لە رۆژی 8ی تەموزدا رەنج شێخ عەلی و محەمەد شێخ تەحسین لەلایەن بافڵ تاڵەبانیەوە دەستبەسەركران، دواتر رەنج شێخ عەلی لەبەر ئەوەی رەگەزنامەی بەریتانیای هەیە چووەوە بەریتانیا و لەوێ سكاڵای لەسەر بافڵ تاڵەبانی كە ئەویش رەگەزنامەی بەریتانیای هەیە تۆماركردووە.
