هەواڵ
دۆسیەیی نەوت
شێخ باز رەئوف: بەستنەوەی تۆڕی غازی سروشتی كوردستان تەواوبوو؛ ئێستا غازی بەرهەمهێنراو راستەوخۆ لە كۆرمۆرەوە دەگاتە دهۆك، هەناردەی نەوتی سۆمۆ لە ڕێگەی بۆری نەوتی کوردستانەوە لە 250 هەزارەوە بۆ 500 هەزار بەرمیل لە رۆژێکدا زیادی کردووە
بڵاوکراوەتەوە لە : 31 تشرینی یەکەم 2026
قەبارەی دەقەکان
قەبارەی دەقەکان
درەو:
شێخ باز رەئوف كەریم، سەرۆكی ئەنجومەنی كارگێڕی گرووپی كۆمپانیاكانی كار دەڵێت، لەم کاتە گرنگەداو بەهەوڵی هەموو لایەنەکان، تۆڕی غازی سروشتی لە هەرێمی کوردستان بە سەرکەوتوویی یەکخرا، ئێستا غازی سروشتی بەرهەم هێنراو لەناو هەرێمدا لە ڕێگەی تۆڕێکی بۆرییە بەرفراوان و یەکگرتووەوە دەگوازرێتەوە، لە كۆر مۆرەوە تا دهۆک درێژدەبێتەوە کە راستەوخۆ سووتەمەنی دەگەیەنێتە وێستگەکانی کارەباو کارگەکان و دامەزراوە پیشەسازییەکان.
شێخ باز رەئوف لە سەكۆی "ئێكس" نوسیویەتی، ئەم هەنگاوە نمایندەی گەیشتن بە قۆناغێكی گرنگ دەکات لە ئاسایشی وزە و پێكهێنانی پایەیەکی بنەڕەتی بۆ گەشەپێدانی زیاتری کەرتی پیشەسازی لە وڵات.
راشیگەیاندووە، قەبارەی هەناردەی نەوتی سۆمۆ لە ڕێگەی بۆری نەوتی کوردستانەوە لە 250 هەزارەوە بۆ 500 هەزار بەرمیل لە رۆژێکدا زیادی کردووە، ئەگەر بۆرییەکە بگاتە ئەوپەڕی توانای هەناردەکردنی یەک ملیۆن بەرمیل لە رۆژێکدا، ئەوا نزیکەی 33%ی کۆی بەرهەمی نەوتی عێراق لە ڕێگەی بۆری نەوتی كوردستانەوە دەگاتە بازاڕە جیهانییەکان.
