د. شێركۆ عەبدوڵا تایبەت بە (درەو)

وابوین بە قەشمەریی عالەم
 لە ڕاپۆرت و دەنگو باسا 
خەمی سنعاتی کورد ئەخۆین 
بە سپۆنسەری ئاڵتونسا   
** 
فرمێسکی تازەمان دەوێ 
بۆ ئەم خەمە  
سیاسەتبازی کۆنتریش    
گۆڕستانی نوێ زەرورە 
گرتەی ڤیدیۆیی زیاتریش 
*** 
وا زستانیشی بەڕێ کرد
  بەبێ ئەنجومەن  و نەوت 
چاوەڕێیە 
وەعدی درۆ کۆکاتەوە و  
بۆمان بکات بە پاشەکەوت  
** 
ئەوکاتەی باوی مارکس بوو 
میکیافیلییەکەی ئێمە 
خۆی کرد بە پۆلیسی نەجدە  
کە حەملەی ئیمانییش دەرکەوت  
ئەو لێزانە بلیمەتە 
بوو بە هەیفا و فیفی عەبدە 
** 
بومەلەرزە نەگریسەکە 
دەستی بە جۆرێک سوور بووە  
کە ئەتوانی تەڵاق بخۆی  
بڵێی سروشت  
هەبێ و نەبێ 
چەکداری  دەسەڵات بووە  
بە کەڵەگایی هاتووە  و 
هەر بە تەزویریش دەرچووە