د. شێركۆ عەبدوڵا تایبەت بە (درەو)

دەست لە برینەکەم مەدە
عەفرینی تێدا نوستوە  
داری واوەیلای مەرەشە 
بەخت لەسەری هەڵنیشتوە 
**
شیعر چەند گرگن و هیچە  
لەبەردەم جۆشی گریانی کوردستاندا !!!
کارەسات چەندە زاڵمە   
کە دەستی ئەچێتە خوێنی 
داراو زارا و زۆرابەکان 
لە بەستەڵەکی زستاندا !!!  
** 
زەمینی ژێرت ئەلەرزێ 
ئاسمانەکەت بەستویەتی  
مەغۆل بە ئێرانی نەکرد 
ئەوەی سروشت لە گەڵ تۆدا کردویەتی 
**
ئای لە قەدەر   
بەعزێک ئەکا 
بە سویسری و خەڵکی قەتەر  
کوردی کڵۆڵیش بە خەبەر  
**
دنیا بۆچی سیخناخ بووە 
لە بەرامەی کۆمەرگی تۆ 
بۆتە هەواڵ و ڕاپۆڕت و 
ڤیدیۆ و فۆتۆ  
بۆ وا بەگەورەیی مردیت ؟ 
زمانەکان بۆچی لاڵ بوون ؟ 
بۆچی کەسێک نەیگوت کوردیت ؟؟ 
** 
وەڵامەکەت 
هێندە سادە و بێ گرێیە 
لەڕووم نایە هیچ بپرسم  
ڕووی شەپۆل و لەرە ڕەش بێ 
کارێکیان کرد 
لەگۆرانی لەرزان لەرزانەش 
بترسم  
ئامان لەرزانە گیانم لەرزانە  
لەم بازاڕەدا  بەس خەم هەرزانە
** 
ڕیختەر خوا  خەجاڵەتت کا 
بۆ پێوەرێک کە داتناوە
لەعنەت لەبابی ئیعلام و سیاسەت 
و دیپلۆماسی   
تەماشاکە  
نەک هەر لە کولەکەی تەڕدا   
لە باینجان و پیازیشدا  
ناوی ڕۆژئاوا و باکووری نەهێناوە 
**  
شڤان  ئەمڕۆ چوو بۆ مەکتەب  
مەکتەب نەبوو  
سەربان گۆڕابوو بە حەوشە  و 
جوگرافیاش 
بە گۆڕستانێکی شێواو  
پڕ لە جەستەی سارد و سڕی  
نەسرین و بەبەکەی زەینەب  
شڤان نەیزانی چی بووە  
نەیزانی کە شەشی شوبات  
میلی سەعات ڕاوەستاوە و  
لەمەولا هەر خۆی مێژووە