دكتۆر شێركۆ عەبدوڵا تایبەت بە (درەو)

ئەوەی کە نەخۆشمان ئەخات   
میکرۆب نی یە 
ئاژێری درۆی ئیسعافە 
لە جەمسەری باکورەوە 
بۆ خوار ماڵی بەتریقەکان  
هەموو هەوڵێک بۆ سوڵتەیە
  باقیەکەی لاف و گەزافە 
             ***  
ئای لە ختوکەی ئازادی
وای لێ کردین 
لە خۆشیدا دائیم بگرین 
سڵاو لەزاتی عەولەمە 
فێری کردین 
لەدەریای ئیجەدا بمرین 
  *** 
سەرەواو لە سکتا نی یە 
واش خۆت دەرئەخەی گوگڵی 
دەستت خۆش بێ  
کەڵەشێر چەند هێلکە دەکات  
لەم عێراقە 
ئەوەندەش پیاو  
قسەی دڵی 
  ***  
بە جەنگی ڕەوای تێ گەیشت  
نەیزانی یاریی شەترەنجە  
باوکم ئێستا خۆی پیر بووە  
بەڵام ڕقی هێشتا گەنجە 
  *** 
ئەو پڵنگەی 
جەنگەڵ و بێشە جێ بێڵێت 
بۆ سێبەری تەنەکەی خۆڵ  
پڵنگ نی یە پشیلەیە 
بانقێک نەبێ بە داینەمۆ 
بۆ ئابوری  
قەت بانق نی یە 
دەغیلەیە
  ***