درەو:
سەرۆكی پەرلەمانی كوردستان سەردانكردنی "كەسیی" پەرلەمانتارانی بۆ پرۆژەكانی نیشتەجێبوون و خزمەتگوزاریە گشتیەكان قەدەغەكرد.
رێواز فایەق سەرۆكی پەرلەمانی كوردستان لە نوسراوێكدا بۆ سەرۆكایەتی ئەنجومەنی وەزیران رایگەیاندووە كە هیچ پەرلەمانتارێك لەرێگەی كەسیەوەناتوانێت سەردانی پرۆژەكانی نیشتەجێبوون پرۆژەكانی خزمەتگوزاریە گشتیەكانی بواری بەڵێندەرایەتی و بواری وەبەرهێنان بكات، بەڵكو دەبێت بە بڕیاری لیژنەكان ئەم بەدواداچوونە بكات.
بەپێی بەدواداچونەكانی (درەو)، دەرچوونی ئەم فەرمانە، دوای ئەوە هاتووە ژمارەیەك لەخاوەن پرۆژەكانی نیشتەجێبوون و وەبەرهێنان و بەڵێندەران لە سەرۆكایەتی پەرلەمان سكاڵایان لەسەر پەرلەمانتاران كردووە.
سكاڵای خاوەنی پرۆژەكانی نیشتەجێبوون و وەبەرهێنەران لەسەر پەرلەمانتاران، سەرۆكایەتی پەرلەمانی خستووەتە گومانەوە لەبارەی ئەوەی بۆچی پەرلەمانتاران تەنیا سەردانی پرۆژەكانی نیشتەجێبوون و وەبەرهێنان دەكەن و سەردانی ئەو  پرۆژانە ناكەن كەپارەیان تێدانیە، سەردانی تاكەكەسی پەرلەمانتاران بۆ ئەم جۆرە پرۆژانەو بەبێ لیژنەكانی پەرلەمان گومانەكەی زیاتر كردووە.
بە پێی بەدوادچونەكانی (درەو) بڕیارەكەی سەرۆكایەتی پەرلەمان بەپشتبەستن بە مادەكانی (40 و 41) ی پەیرەوی ناوخۆی پەرلەمان دەركراوە، كە ئەم دوو مادەیە سەردانیكردنی مەیدانی داوەتە دەست لیژنەكان نەك پەرلەمانتاران بە شێوەی تاكە كەسی.
بە پێی زانیارییەكانی (درەو) ژمارەیەك لە پەرلەمانتاران چونەتە ناو مامەڵەوە لەگەڵ سەرمایەداران و خاوەن پرۆژەكان لەبەرامبەر وەرگرتنی بڕە پارەیەكدا بەرگری لە پرۆژەی سەرمایەداران دەكەن یاخود كێشەیان بۆ درووست دەكەن 
راسپاردنی لیژنەكانی پەرلەمان بۆسەردانی مەیدانی پرۆژەكان لەبری سەردانی تاكەكەسی پەرلەمانتاران بۆ ئەوەیە بواری مامەڵەكردنی پەرلەمانتار لەگەڵ سەرمایەداران كەمتر بكرێتەوە، كە ئەم جۆرە مامەڵەكردنە لەسەر ئاستی عێراق و هەرێمی كوردستانیش بووە بە مۆدێلی كاركردنی شاراوەی هەندێك لە پەرلەمانتاران.