(درەو میدیا):
ئەمریكا‌و توركیا رێككەوتنێكیان كرد لەبارەی چارەنوسی رۆژئاوای كوردستان‌و راگرتنی هێرشی توركیا بۆسەر رۆژئاوا، دەقی بەندەكانی رێككەوتنەكە بەمشێوەیەیە:
•    راگرتنی ئۆپراسیۆنە سەربازییەكانی توركیا بەمەبەستی رێگەدان بە كشانەوەی شەڕڤانانی یەكینەكانی پاراستنی گەل لەماوەی 120 كاتژمێردا لە ناوچەكە.
•    ئەمریكا لەگەڵ یەكینەكانی پاراستنی گەل كاردەكات بۆ زامنكردنی كشانەوەی شەڕڤانان بە قوڵایی (32 كیلۆمەتر) یاخود (20 میل) لە سنورەكانی نێوان سوریاو توركیا.
•    رێككەوتنەكە زامنی ئەوە دەكات توركیا هیچ هەنگاوێكی سەربازی لە شاریی كۆبانێ نەنێت كە هێزەكانی سوریای تێدا جێگیر بووە.
•    كۆتایهێنانی بە هێرشی سەربازی توركیا هاوكات لەگەڵ تەواوبوونی پرۆسەی كشانەوەی شەڕڤانانی كورد لە ناوچەكە.
•    ئەمریكا هیچ سەربازێكی لەسەر خاكی سوریا نابێت.
•    ئەمریكا‌و توركیا پابەندن بە گەیشتن بە رێككەوتنێكی ئاشتیانە لەبارەی ناوچەی ئارامەوە لە سوریا، بەجۆرێك رێككەوتنەكە گرەنتی ئاسایشی توركیا‌و كوردەكانیش بكات.
•    پارێزگاریكردن لە كەمینەكان لە ناوچەكانی باكوری سوریا‌و پاراستنی گرتوخانەكانی ئەوێ.
•    لەناوبردنی "داعش" ئامانجی هاوبەشە.
•    ئەمریكا پاشەكشێ دەكات لە سەپاندنی سزای زیاتر بەسەر توركیادا.
•    ناوچەی ئارام لە سوریا، بە قوڵایی 32 كیلۆمەتر لە خۆرهەڵاتی فوراتەوە درێژدەبێتەوە تاوەكو سنوری عێراق.
•    توركیا لەگەڵ روسیا گفتوگۆ دەكات لەبارەی ئەوەی شاری مەنبەج‌و ناوچەكانی تریش بخرێتە چوارچێوەی ناوچەى ئارامەكەوە.
•    دەبێت هێزە كوردییەكان چەكە قورسەكانیان رادەستی سوپای ئەمریكا بكەن.
•    كۆنترۆڵی ناوچەی ئارام لە سوریا بەدەستی هێزەكانی توركیاوە دەبێت. 

دەقی خاڵەکانی ڕێکەوتنەکەیە:

1 ئەمەریکا و تورکیا جەخت دەکەنەوە سەر پەیوەندیـیەکانی نێوانیان وەک دوو ئەندامی ناتۆ. ئەمەریکا لە نیگەرانیـیە ئاسایشیـیە ڕەواکانی تورکیا سەبارەت بە سنوورەکانی باشوری تورکیا تێدەگات.

2 تورکیا و ئەمەریکا کۆکن لەسەر ئەوەی دۆخەکە لەسەر زەوی بە تایبەتی لە باکوری ڕۆژهەڵاتی سوریا وەهایە هاوکاری نزیکتر هەبێت لەسەر بنەمای بەرژەوەندیـیە هاوبەشەکان.

3 تورکیا و ئەمەریکا بەردەوامن لەسەر پاراستنی خاک و هاوڵاتیانی وڵاتە ئەندامەکانی ناتۆ لە بەرامبەر هەر هەڕەشەیەکدا. لەگەڵ تێگەیشتنێکی تەواو بۆ (یەک لە پـێناو هەموومان و هەموو لە پـێناو یەک). (یەک لە پـێناو هەموومان و هەموو لە پـێناو یەک) دەسەتەواژەیەکی وڵاتانی ئەندامی ناتۆیە.

4 ئەم دوو وڵاتە بەڵێنیان دووپاتدەکەنەوە بۆ ڕێزگرتن لە ژیانی مرۆڤەکان، مافەکانی مرۆڤ و پاراستنی کەمایەتیـیە ئاینی و نەژادیـیەکان.

5 تورکیا و ئەمەریکا پابەندن بە نەهێشتنی چالاکیـیەکانی داعش لە باکوری ڕۆژهەڵاتی سوریا.

ئەمە بریتی دەبێت لە هەماهەنگیکردن بەپـێی پـێویست لە بارەی بەندیخانەکانی دەستگیرکراوە داعشەکانی تێدایە و هەروەها لە بارەی ئەو کەسانەی لەو ناوچانە ئاوارەبوون کە جاران لە ژێر دەستی داعشدا بوون.

6 تورکیا و ئەمەریکا ڕێکەوتوون کە شەڕی دژە تێرۆر دەبێت تەنها تێرۆرستان و شوێن و حەشارگەکانیان و چەک و کەلوپەلەکانیان بکاتە ئامانج.

7 لایەنی تورکی پابەندی خۆی دەربڕیوە بۆ ئەوەی مسۆگەربکرێت هەموو دانیشتووانی ناوچەی ئارام بپارێزرێن کە لە لایەن هێزەکانی تورکیاوە کۆنترۆڵ دەکرێن، وە جەختی کردووەتەوە کە ئەوپەڕی هەوڵی خۆی دەدات تاوەکو خەڵکی سیڤیل و ژێرخانی سیڤیلی ناوچەکە بپـارێزێن.

8 هەردوو وڵات جارێکی دیکە بەڵێنی خۆیان دایەوە بۆ پاراستنی یەکگرتوویی سیاسی و یەکپارچەیی خاکی سوریا و بەڕێوەچوونی پـرۆسەی سیاسی بە ڕێبەرایەتی نەتەوە یەکگرتووەکان کە ئامانج لێی کۆتایی‌هێنان بە شەڕی سوریا بەپـێی بڕیاری SCR2254 ئەنجومەنی ئاسایشی نەتەوە یەکگرتووەکان.

9 هەردوو لایەن ڕازیبوون لەسەر گرنگی و کاریگەری ناوچەیەکی ئارام بۆ نەهێشتنی نیگەرانیـیە ئاسایشیـیە نشتیمانیـیەکانی تورکیا، لەوانە گواستنەوەی چەکە قورسەکانی یەپەگە و تێکدانی سەنگەر و بنکەکانیان.

10 ناوچەی ئارام بە شێوەیەکی سەرەکی دەکەوێتە ژێر دەسەڵاتی هێزەکانی تورکیاوە، وە هەردوولا پەرە بە هاوکاریـیان دەدەن لە هەموو بوارەکاندا تاوەکو ئەمە جێبەجێی بکرێت.

11 لایەنی تورکی ئۆپەراسیۆنی"کانی ئاشتی" ڕادەگرێت تاوەکو ڕێگە بە هێزەکانی یەپەگە بدات لە ماوەی 120 کاتژمێر لە ناوچەی ئارام بکێشنەوە. لە پاش تەواوبوونی کشانەوەی هێزەکانی یەپەگە کۆتایی بە ئۆپەراسیۆنی "کانی ئاشتی" دێت.

12 هەر کات ئۆپەراسیۆنی " کانی ئاشتی" ڕاگیرا، ئەمەریکا ڕازی دەبێت سزای زیاتر بەسەر تورکیا نەسەپـێنرێت بەپـێی فەرمانی سەرۆکایەتی کە لە 14 ی مانگی دەی 2019 دەرچووە. بەڕێوەبەرایەتی ئەمەریکا لەگەڵ کۆنگرێس کاردەکات بۆ تاووتوێکردنی هەنگاوە ئەرێنیـیەکان بە ئامانجی گەیشتن بە ئاشتی و ئاسایش لە سوریا بەپێی بڕیاری ژمارە SCR2254 ی ئەنجومەنی ئاسایشی نەتەوە یەکگرتووەکان.

کاتێک ئۆپەراسیۆنی "کانی ئاشتی" کۆتایی پـێهات وەک ئەوەی لە خاڵی ژمارە یازدەدا هاتووە، سزا سەپـێندراوەکانی سەر تورکیا هەڵدەگیرێن.

هەردوولایەن بەڵێنیان داوە پـێکەوە کاربکەن بۆ جێبەجێکردنی تەواوی ئامانجەکان کە لەم ڕاگەیاندنەدا هاتوون.