درەو: 
 ڕێکخراوی روونبین  بۆ شەفافییەت لە پرۆسەکانی نەوت.
نووسین و ئامادەکرنی، یادگار سدیق گەڵاڵی

كێڵگەی نەوتی شێخان بە تێكڕا  بەرهەمی رۆژانەی لە هەشت مانگی ئەمساڵی 2025 بڕیتی بووە لە  (41 هەزارو 638) بەرمیل و هەر بەرمیلەی بە تێكڕا بە (27) دۆلار فرۆشراوە، كۆی داهاتەكەی بریتی بووە لە ( 268) ملیۆن دۆلار، پشكی كۆمپانیاكان (44.6%) و  (100) ملیۆن دۆلاری بۆ گۆڵڤ كیستۆن و (19) ملیۆن دۆلاری بۆ كۆمپانیای ئێم ئۆ ئێڵ، پشكی حكومەتی هەرێمی كوردستان (148) ملیۆن دۆلار بووە، بە رێژەی (55.4%). 

کێڵگەی شێخان ،  راپۆرتی شەش مانگی یەکەمی ساڵی 2025 
(داتای بەرهەم و داهات) 

                                                                                                                                                                           
پێشەکی
ئەم ڕاپۆرتە  لە سەر بنەمای راپۆرتی کۆمپانیا نەوتییەکان و گرێبەستی هاوبەشیکردن لە بەرهەم و شیکردنەوەی راپۆرتە داراییەکان و  زانیاریی مەیدانی پاش شەن و کەو کردنی و خستنە ژێر زەڕەبینی ئەو سەرەداوانەی دەستمان کەوتووە و هەڵسەنگاندنی وورد نوسرواە. 
لەم ڕاپۆرتەدا 
•    ئاستی بەرهەمی  رۆژانەی کێڵگەی شێخان لە سەرەتای ساڵەوە  مانگ بەمانگ تا کۆتایی مانگی ئاب خراوەتە روو.
•    کۆی بەرهەم و نرخی فرۆشی هەربەرمیلێک نەوت لەگەڵ کۆی داهاتی کێڵگەکە دۆزراوەتەوە. پاشان لەسەر بنەمای پشکی لایەنەکانی گرێبەستە لە کێڵگە نەوتییەکەدا کە هەریەک لە حکومەتی هەرێم و KRG  کۆمپانیای گۆڵف کیستۆن GKP و ئێم  ئۆ ئێڵ MOL دەستنیشان کراوە.
•    بڕی قەرزەکانی رابووردی کۆمپانیا نەوتییەکانمان ئاشکرا کردووە لەگەڵ جیاکردنەوەی بڕی  خەرجی نەوت  و بڕی  قازانجی  نەوتەکە. 
•    مێژوی کێڵگەی شێخان  و  ژمارەی بیرە نەوتەکانی کێڵگەکە و ئاستی بەرهەمی ئێستا و نەوتی خەمڵێنراوی کێڵگەکە لە خۆدەگرێت. 
ئەم کارەشمان هەروەک کارەکانی ترمان  لەپێناو گەیاندنی زانیارییە بەزمانێکی سادە بەدوور لە بەکارهێنانی دەستەواژەی تەکنیکی ئاڵوز تاوەکو هەرکەسێک خوێندییەوە بەئاسانی لێی تێبگات. بەو هیوایە لەم ڕێگەیەوە بتوانین ئەوبۆشاییەی کە بەهۆی نەبوونی زانیاری لەسەر سەکتەری نەوت هەیە بەشیکی کەمی پڕ بکەینەوە. 

               
کێڵگەی شێخان : راپۆرتی شەش مانگی یەکەمی ساڵی 2025 
(داتای بەرهەم و داهات) 
بەرهەمی نەوتی کێڵگەی شێخان لە ماوەی شەش مانگی یەکەمی ساڵی ٢٠٢٥ دا لە ئا ستێکی زۆر بەرزدا بووە، بەتایبەت لە پێنج مانگی یەکەمدا کە بەتێکڕا لەسەروو 46,500 بەرمیلەوە بووە.  پاشان لەمانگی حوزەیراندا بەهۆی  جەژنی قوربان و جەنگی ١٢ رۆژەی ئێران - ئیسرائیل بارکردن وفرۆشی  بەرهەمی کێڵگەکە کەم بووەتەوە  و ئاستی بەرهەم بەتێکڕا لەو مانگەدا دابەزیوە بۆ 31,800 بەرمیلی رۆژانە. پاشان لەسەرەتای مانگی تەموزدا بەرهەم زیادی کردووە بەڵام جارێکی تر بەهۆی هێرشی درۆنی بۆمبرێژکراوە وە بۆ سەر چەند کێڵگەیەکی نزیک لە کێڵگەی شێخان وەکو سەرسەنگ و عین سفنی و تاوکی (پیشخاپور -تاوکی) کۆمپانیای گۆڵف کیستۆن بڕیاری دا بەرهەمهێنانی نەوت لەکێڵگەکە بووەستێنێت بەمەش تێکڕای بەرهەم لەم مانگەدا دابەزی بۆ 21,200 بەرمیلی رۆژانە . پاشان لە سەرەتای ماگی ئابدا جارێکی تر بەرهەمهێنان لەکێڵگەکە وەکو کۆپانیاکە دەڵێت بە هەماهەنگی لەگەڵ هەرێمی کوردستاندا دەستی پێکردەوە و تێکڕای بەرهە م لە سەرەتای مانگی ئابەوە تا ٢٦ ی ئاب 39,600 بەرمیل بووە. لەئێستادا ئاستی بەرهەمهێنانی نەوت لە کێڵگەکەدا ئاسایی بوووەتەوە. 

 
بەشێوەیەکی گشتی  بەرهەمهێنان  لە نیوەیی ئەکەمی ساڵی ٢٠٢٥دا بە ڕێژەی 12% زیادی کردووە بۆ تێکڕای بەرهەمی 44,100  لە ڕۆژێکدا، لە کاتێکد لەنیوەی یەکەمی ساڵی 2024دا   39,252بەرمیل بووە ئەمەش بەهۆی زیادبونی خواستی  ناوخۆیی بۆ بەرهەمی کێڵگەکە  و ئەدای باشی ئەمباری  کێڵگەکە دەگەڕێتەوە. 
بەڵام گەر  وەکو تێکرای بەرهەمی ئەم هەشت مانگەی ڕابووردوو  ئەژماری بکەین ئەوا بەرهەم  کەمیکردووە  بە هۆکاری  جەنگی ئێران- ئیسرائیل لە مانگی حوزەیران و داخستنی کێڵگەکە لە ناوەڕاستی مانگی تەموز.  بۆیە لە سەرەتای ساڵەوە تا ٢٦ی ئاب کۆی نەوتی بەرهەم هاتوو لە کێڵگەکە زیاتر بووە لە 9.6 ملیۆن بەرمیل کە تێکڕای بەرهەمی رۆژانە بۆ 41,638 بەرمیل دا دەبەزێنێت. 
لە ئێستادا ئاستی بەرهەمی کێڵگەکە  گەڕاوەتەوە بۆ ئاستی ئاسایی خۆی و بەوپەڕی توانای کێڵگەکە نەوت بەرهەم دێت و ئاستی ئێستای 45 هەزار بەرمیل نەوتە، لە  pf-1 بڕی 26 هەزار بەرمیل لە PF-2  بڕی  19 هەزار بەرمیل نەوت بەرهەم دێت . 

 لە شیکردنەوەی  داتاکاندا تێبینی دەکرێت  داهاتی فرۆشی نەوتی کێڵگەکە بەتایبەت لە پێنج مانگی سەرەتای ساڵدا زیادی کردووە ئەمەش بۆ دوو هۆکار دەگەڕێتەوە یەکەم زیادبوونی ئاستی بەرهەمی کێڵگەکە  هەروەها زادبوونی نرخی فرۆشی بەرمیلێک نەوت.
  نرخی هەربەرمیلێک نەوتی کێڵگەکە بەتێكڕا لەماوەی نیوەی یەکەمی ساڵی 2025 دا بە  رێژەی6% بەرز بووەتەوە, بە  27.8دۆلار فرۆشراوە  ئەمەش بەراورد بە نیوەی یەکەمی ساڵی 2024 زیادی کردووە کە 26.3 دۆلار بووە. 
ئەم نرخەی نەوتی کێڵگەکە بەتێکڕا 44.1دۆلار لەژێر نرخی برێنتەوەیە کە بنەمایەکی سەرەکییە بۆ دیاریکردنی نرخی نەوت لەجیهاندا.  بەتێککڕا نرخی بەرمیلێک نەوتی برێنت لەو ماوەیەدا 71.9 دۆلار بووە (فرۆشی نەوتی هەرێم هیچ پەیوەندی بە نرخی برێنتەوە نییە ئەمە تەنها وەکو بەراوردێک ئاماژەمان پێکرد). 
کۆی بەرهەمی کێڵگەکە لەماوەی نیوەی یەکەمی ساڵدا 7,984,900 بەرمیل بووە و کۆی داهاتیش 221,980,220 دۆلار بووە  لەم بڕەش داهاتی کۆمپانیای گۆڵف کیستۆن  83,144,200 دۆلار بووە (بەراورد بە هەمان ماوەی ساڵی 2024 بەڕێژەی 17٪ زیادی کردووە کە 71,186,000  ملیۆن دۆلار بووە) وە داهاتی ئێـم ئۆ ئێڵ 15,982,576  دۆلار بووە  ئەوەشی بۆ حکومەتی هەرێم ماوەتەوە بریتی بووە لە 122,853,444  دۆلار. 
هەروەها کۆی بەرهەم لە سەرەتای ساڵەوە تا ٢٦ی ئابی ٢٠٢٥ واتە ٨ مانگ بریتی بووە لە 9,671,700  بە کۆی داهاتی  268,873,260  دۆلار. لەم ماوەیەشدا کۆی داهاتی گۆڵف کیستۆن بریتی بووە لە 100,708,307 دۆلار  هەروەها  ئێم ئۆ ئێڵ 19,358,875  دۆلار بووە، ئەو بڕەیەی بۆ حکومەتی هەرێم لەم ماوەیەدا ماوەتەوە بریتی بووە لە 148,806,078 دۆلار  کە رێژەی %55.4  دەکات.   

 
تێچووی کارکردن لە نیوەی یەکەمی ساڵی ٢٠٢٥ بە ڕێژەی ١٣% زیادیکردووە بۆ ,26,893,000دۆلار (بەراورد بە نیوەی یەکەمی  2024 کە   23,917,000 دۆلار بووە)، کە بە شێوەیەکی بنەڕەتی بەهۆی زیاتری تێچووی بەرهەمهێنان و بەگەڕ خستنەوەی دوو بیری نەوتەوە بووە. بەمەش تێچووی بەرهەمهێنانی بەرمیلێک نەوت 4.4  دۆلارە  کە هیچ گۆڕانێکی بەسەردا نەهاتووە بە بەراورد بە هەمان ماوەی ساڵی ٢٠٢٤ ئەمەش بۆ راگرتنی بەرزی ئاستی بەرهەم دەگەڕێتەوە. 
خەرجی سەرمایە گوزاری بریتی بووە لە 18.1 ملیۆن دۆلار بەراورد بەساڵی ٢٠٢٤ زیادی کرووە لە 7.8  ملیۆن دۆلاربووە. ئەمەش بۆ بەرنامە باشکردنی کاری یەکەی چارەسەر PF-2 وە باشترکردنی تێچووی بەرهەم هێنان دەگەڕێتەوە. چاوەڕێ دەکرێت لە ساڵی ٢٠٢٥ خەرجی سەرمایەگوزاری لە نێوان   ٣٠ ملیۆن دۆلار بۆ  ٣٥ملیۆندۆلار بێت.
دابەشکردنی قازانج: لە نیوەی یەکەمی ساڵدا بڕی 25 ملیۆن دۆلار قازانجی کاتی دابەشکراوە بەسەر هاوپشکەکاندا  وە کۆمپانیاکە بڕیاری داوە لە ٣٠ ی ئەیلولدا بڕی 25 ملیۆن دۆلاری تر بەسەر هاوپشکەکاندا دابەش بکات، بەمەش کۆی قازانجی راگەیەندراو دەبێ بە ٥٠ ملیۆن دۆلار کە یەکسانە بە 11.52 سەنت دۆلاری ئەمریکی بۆ هەر پشکێکی ئاسایی بە پشتبەستن بە کۆی سەرمایەی پشکی دەرچووی کۆمپانیاکە تا 27ی ئابی 2025 . 
بڕیار دراوە لە سەر  دامەزراندنی یەکەی چارەسەری  ئاو لە PF-2 دا:
چاوەڕوان دەکرێت لە سەرەتای ساڵی ٢٠٢٧دا بخرێتە بواری جێبەجێکردنەوە، کاتێک کە ئەم یەکانە کاردەکەن ، پێشبینی دەکرێت 4,000 – 8,000 بەرمیل لەرۆژێکدا لە بەرهەمهێنانی گشتی زیادبکات  وە لەهەمان کاتدا مەترسی حەشارگەکان کەم بکەنەوە.
کڕیارانی نەوتی کێڵگەکە: 
لە دوای وەستانی هەناردەوە نەوتی بەرهەمهاتوو لەکێڵگەکە لە لایەن کڕیارانی ناوخۆوە دەکڕرێت بەنرخی داشکاو. زۆربەی کڕیارانی نەوت بریتین لە پاڵاوگەکانی نەوتی هەرێمی کوردستان. نەوتی کێڵگەکە لەیەکەی بارکردن بە تانکەر باردەکرێت لەلایەن کڕیارانەوە و پێش بارکردنی هەربارێک پارەکەی پێشەکی وەردەگیرێت. 
 لەماوەی نیوەی یەکەمی ساڵی ٢٠٢٥ دا سێ کڕیاری سەرەکی نەوتی کێڵگەکەیان کڕیوە رێژەکی نەوتی بارکراو  لەلایەن کریارانەوە بەم شێوەیەبووە: 

 
 
قەرزی کۆمپانیاکان لای حکومەت
کۆمپانیاکە بەردەوام بووە لە پەیوەندی لەگەڵ حکومەتی هەرێمی کوردستان سەبارەت بە کێشە بازرگانییە نەدراوەکان، لەوانەش میکانیزمی پارەدان بۆ شایستە دواکەوتووەکان بۆ ماوەی تشرینی یەکەمی ٢٠٢٢ تا ئازاری ٢٠٢٣. کۆی گشتی ئەو بڕە پارەیەی کە قەرزاری هەردوو  کۆمپانیای گۆڵف کیستۆن و  GKP و کۆمپانیای ئێم ئۆ ئێڵ MOL، پێکەوە "بەڵێندەرەکان") 192.8 ملیۆن دۆلارە (150.5 ملیۆن دۆلار تێچووی نەوتە و 42.3 ملیۆن دۆلار قازانجی نەوتە ). کۆمپانیا بەردەوامە لە چاوەڕوانی وەرگرتنەوەی تەواوی ئەم شایستە دواکەوتووانە. 

 
کۆی گشتی بڕی قەرزی  گۆڵف کیستۆن  GKP 151.1 ملیۆن دۆلارە (کە پێکهاتووە لە 120.4ملیۆن دۆلار تێچووی نەوت و 30.7ملیۆن دۆلار لە نەوتی قازانج، پاش لێدەرکردنی پارەی پەرەپێدانی تواناکان CBP). 
قەرزە بازرگانییەکانی پەیوەست بە فرۆشتنی هەناردەکردن کۆی گشتی 171.0 ملیۆن دۆلار بووە. ئەو بڕە پارانەی کە دەبێ بدرێت، بە پشتبەستن بە نرخی نەوتی خاوی تێکەڵاوی کوردستان (KBT)، لەلایەن حکومەتی هەرێمی کوردستانەوە بۆ فرۆشتنی نەوتی خاو دیاری کرابوو  بڕی 158.8 ملیۆن دۆلار بۆ ماوەی  تشرینی یەکەمی 2022 تا مانگی ئازاری 2023، ئەمە جگە لە پشکێک لە قەرزی کێڵگەی شێخان کە  کۆمپانیاکە لە  کۆمپانیای کالێگران کڕیوە.(کۆمپانیایەکی گروپی MOL) بە بڕی 12.2 ملیۆن دۆلار. هەرچەندە هیچ مافێکی یاسایی نییە بۆ خەرجکردن، بەڵام  پوختەی باڵانسی کە لە حکومەتی هەرێمەوە دەدرێت پێکدێت لە 158.8 ملیۆن دۆلار  کە لە قەرزە بازرگانییەکاندا جێگیرکراوە و 7.7 ملیۆن دۆلار کە لە ئیلتزاماتی ئێستای کۆمپانیاکەدا هاتووە (بنیاتنانی تواناکان). لە ئەنجامدا پوختەی باڵانسی کە دەبێ حکومەتی هەرێم بیدات بۆ فرۆشتنی نەوتی خاو  بریتییە لە 151.1 ملیۆن دۆلار .
قەرزەکان لە دوو بەش پێک دێت:
 تێچووی نەوت: ئەو میکانیزمەی کە کۆمپانیا تێچوونەکانی بەهۆیەوە وەردەگرێتەوە.
قازانجی نەوت: ئەو میکانیزمەی کە قازانجەکان لە نێوان کۆمپانیا و هاوبەشەکەی MOL و حکومەتی هەرێمدا دابەش دەکرێن.
باڵانسی نەدراوی سەرەوە کە 151.1 ملیۆن دۆلارە پێکدێت لە 120.4 ملیۆن دۆلار لە نەوتی تێچوون و 30.7 ملیۆن دۆلار لە نەوتی قازانج دوای لێبڕینی پارەی بنیاتنانی تواناکان.

 
کۆی گشتی بڕی قەرزی کۆمپانیا ئێم ئۆ ئێڵ MOL  42.7 ملیۆن دۆلارە،  پێکهاتووە لە 30.1ملیۆن دۆلار تێچووی نەوت و 11.6ملیۆن دۆلار لە نەوتی قازانج .
 
ئەو قەرزانەی حکومەت لای گۆڵف کیستۆن هەیەتی
ئەو بڕە پارانەی کە دەبێ بدرێت بە حکوومەتی هەرێمی کوردستان کە پێشبینی ناکرێ بە کاش یەکلایی بکرێنەوە، بڕی 83.7ملیۆن دۆلار بووە لە کاتێکدا لەساڵی 2024 دا بریتی بووە لە 80.8 ملیۆن دۆلار لەوانە:

•    40.9 ملیۆن دۆلار (2024: 40.1 ملیۆن دۆلار) کە پێشبینی دەکرێت لەبەرامبەر بە فرۆشتنی نەوت بە حکومەتی هەرێم تا ساڵی 2018 قەرەبوو بکرێتەوە، ئەمە جگە لە بڕە پارەکانی تر کە لەلایەن حکومەتی هەرێمەوە بە قەرز دادەنرێت بەڵام لە ژمێریاریدا دانیان پێدانەنراوە بەهۆی جێبەجێنەکردنی پێوەرەکانی دانپێدانانی داهات.

•    42.8 ملیۆن دۆلار (2024: 40.8 ملیۆن دۆلار) پەیوەندی بە جیاوازی ڕێژەی "پارەی پەرەپێدانی توانا" بە ڕێژەی 20% هەیە، بە پشتبەستن بە بنەمای شایستەکان کە لە تشرینی یەکەمی2017ەوە پەسەندکراوە، بە بەراورد بە 30% بەپێی ڕێککەوتنی دوولایەنەی 2016 وە پێشتر ئەم ڕێژەیە %40  بووە.

سوودی کارکردن( پشکی کۆمپانیاکە) بەپێی ڕێککەوتنی دوولایەنەی ساڵی ٢٠١٦بریتییە لە 80% لە کاتێکدا بنەمای پێدانی پارە بە کۆمپانیاکە بەپێی رێژەی 61.5% بووە. کۆمپانیای GKP باوەڕی وایە ئەگەر پێگەی بازرگانی بەتەواوی بگەڕێتەوە بۆ مەرجەکانی گرێبەستی هاوبەشیکردن لەبەرهەم PSC هەموارکراوی جێبەجێکراو و ڕێککەوتنی دوولایەنەی 2016، ئەوا کۆمپانیاکە دەبێت قەرەبوو بکرێتەوە، چونکە پێشبینی دەکات مافی داهاتی GKP  زیاترە لە 42.8 ملیۆن دۆلاربێت کە وەک خەرجیەکی کۆکراوە تۆمارکراوە.
خشتەی قەرزی بازرگانی حکومەت لای کۆمپانیای گۆڵف کیستۆن GKP

 
ڕێکەوتن لە گەڵ بەغدا
کۆمپانیاکە دەڵێت بەوردی چاودێری وتوێژەکانی نێوان بەغدا و هەولێر دەکەین و ئامادەین بۆ ئەوەی لە زوترین کاتدا هەناردە دەستپێبکەینەوە کاتێک رێکەتنی نوسراو هەبێت بۆ چۆنییەتی وەرگرتنی شایستە داراییەکانمان و  قەرزەکانی رابووردوومان لەگەڵ داننان بە مافە بازرگانییەکانمان بەپێی گرێبەستەکانی کەهەمانە لەگەڵ حکومەتی هەرێم. بەدەستپێکردنەوەی هەناردە هەموان سودمەند دەبین کپۆمپانیا داهاتی زیاد دەکات بەوەی نەوتەکەی بەنرخی زیاتر دەفرۆشێت و عێراقیش داهاتی زیاد دەکات. 

کورتەیەك لەسەر کێڵگەی شێخان:
  کێڵگەی شێخان دەکەوێتە پارێزگای دهۆکەوە، ٦٠ کیلۆمەتر لە باکوری رۆژئاوای هەولێر. کۆمپانیای گۆڵف کیستۆن کە کۆمپانیایەکی بەریتانییە پشکی ٨٠% کێڵگەکەی هەیە و کۆمپانیای MOL هەنگاری ٢٠% پشکەکانی هەیە. یەکەمجار لەمانگی ئابی ٢٠٠٩دا نەوت لەم کێڵگەیەدا  دۆزرایەوە ، لەساڵێ ٢٠١٣ وە بەرهەم هێنان دەستی پێکردووە. تا ٢٦/٠٨/٢٠٢٥زیاتر لە 145ملیۆن بەرمیل نەوت لەم کێڵگەیە بەرهەم هاتووە وە لە ٣١/١٢/٢٠٢٤ دا کۆی نەوتی بەرهەم هاتووی کێڵگەکە بریتی بووە لە 145 ملیۆن بەرمیل بووە.  
جۆری نەوتی ئەم کێڵگەیە نەوتی قورسە APIی نەوتەكەی (27) پلەیەو رێژەیەكی كەم كبریت (كۆگرد)و بڕێكی زۆر غازی تێدایە، ئەم كوالیتییە نزمە وایكردووە نرخی نەوتی ئەم كێڵگەیە تا مانگی ئابی ساڵی ٢٠٢٢ بە کەمترلە ٢٣ دۆلار لەژێر نرخی برێنتەوە بفرۆشرێت. پاشتر بە میکانیزمی نوێی حکومەتی هەرێم بە ٣٤ تا ٣٦ دۆلار داشکاندن بۆ هەربەرمیلێک نەوتی ئەم کێڵگەیەک کراوە و  فرۆشراوە تا مانگی شوباتی ٢٠٢٣ پاشان لە مانگی شوباتدا داشکاندنەکە ٢٩ دۆلار لە ژێر نرخی برێنتەوە بووە.  
کێڵگەکە (18) بیری تێدایە، یەکەم بیر لە ساڵی ٢٠٢١٠ دا لێدراوە و کۆتا بیریش ٢ بیر بووە لەساڵی ٢٠٢٣ دا تەواو بووە کەوتووەتە بەرهەم . بیرەکان بەستراوەتەوە بە  2یەکەی چارەسەرەوە PF-1-2 کە توانای چارەسەرکردن و ئەمبارکردنی نزیکەی ٦٠ هەزار بەرمیل یان هەیە، ئەو دوو یەکەیەش  بەستراونەتەوە بە هێڵی هەناردەکردنی بۆری  و یستگەی بارهەڵگرەانەوە.
لە دوای وەستانی هەناردەی نەوتی هەرێم لە ڕیی بۆرییەو نەوتی ئەم کێڵگەیەش  هاوشێوەی کێڵگەکانی تری هەرێم  کۆمپانیایاکان پشکی خۆیان لەبەرهەم دەفرۆشن بە بازرگانە ناوخۆییەكان. وە تێکڕای نرخی نەوتی ئەم کێڵگەیە لە نێوان ٢٧ بۆ ٢٨ دۆلاردا فرۆشراوە.
یەدەگی نەوتی کێڵگەکەبەم شێوەیە لە کۆتای ساڵی ٢٠٢٣دا: 
•    یەدەگی سەلمێنراو  1P reserves: 224 MMstb 
•    یەدەگی ئەگەری 2P( Probable): 2P reserves: 489 MMstb  

بەپێی خەمڵاندنی كۆمپانیای گۆڵف كیستۆن، بەشی نزیكەی 28 ساڵ دەكات، ئەمە بە لەبەرچاوگرتنی وەستانی هەناردەی نەوت لە 2023و راوەستانی كارەكانی پەرەپێدانی كێڵگەكە.

نەخشەی بیرە نەوتییەکانی کێڵگەی شێخان و یەکەکانی چارەسەر:
 

بەرهەم لە شێخان: 
کێڵگەی نەوتی قورس لە شێخان 22.68%ی کۆی ئەو یەدەگەی کە دەتوانرێت دەربهێنرێت بەکارهاتووە ، پێشبینی دەکرێت کێڵگەکە لە ساڵی 2029 دا بگاتە لوتکەی بەرهەمهێنان. بە پشتبەستن بە گریمانە ئابوورییەکان، بەرهەمهێنان بەردەوام دەبێت تاوەکو کێڵگەکە دەگاتە سنووری ئابووری لە ساڵی 2047 پاشان بەرهەم هێنان چیتر سوودی ئابوری نابێت.